1-3. Kai si la ilakoken nabi i bas Juda nari, janah kai akibatna? (Nehen gambar i bas pemena artikel.)

RAJA JEROBEAM Israel nari erban batar-batar persembahen man gana-gana i kuta Betel. Iutus Jahwe sekalak nabi Juda nari guna mpeseh berita penghakimen man Jerobeam. Nabi si meteruk ukur enda patuh man Jahwe janah ipesehna berita e. Merawa kal raja man nabi e, tapi ikawali Jahwe ia.—1 Raja-Raja 13:1-10.

² Isuruh Jahwe nabi e gelah ula man ntah pe minem i Israel janah ia arus mulih arah dalan si deban. Sanga ia mulih, jumpa nabi e ras sekalak dilaki si nggo metua. Ibualina nabi e alu ngataken maka nggo ialokenna pedah i bas Jahwe nari. Iundang dilaki e ia man ras minem ku rumahna. La patuh nabi e man Jahwe, iikutkenna dilaki si metua e. Merawa Jahwe man bana. Sanga ia mulih, i bas dalan ibunuh singa ia.—1 Raja-Raja 13:11-24.

³ La sieteh engkai maka ibegikenna dilaki e, labo Jahwe. Tapi sieteh ia la terus ”meteruk ukur” sanga erdalan ras Jahwe. (Oge Miha 6:8.) I bas Pustaka si Badia  erdalan ras Jahwe ertina tek man Jahwe, ngikutken petunjukNa, ras matuhi Ia. Ieteh kalak si meteruk rukur maka perlu ia ertoto alu ratur. Adi nabi e meteruk rukur, pasti isungkunna Jahwe guna mastiken petunjuk e. Maun-maun kita pe arus erban pilihen si mesera, janah banci saja la sieteh alu tangkas kai si iarapken Jahwe. Adi meteruk rukur kita, pasti sipindo Jahwe negu-negu kita gelah ula siban kesalahen si mbelin.

4. Kai kari sibahas i bas artikel enda?

⁴ I bas artikel si nggo lewat, sipelajari kai ertina meteruk ukur janah engkai e penting gundari. Tapi uga carana gelah banci kita lebih meteruk ukur? Janah keadan kai saja si banci nguji sifatta e, si ncidahken tuhu-tuhu nge kita meteruk ukur ntah lang? Mari sibahas i bas telu keadan.—Kuan-kuanen 11:2.

5, 6. Uga Barsilai ncidahken maka ia meteruk ukur?

⁵ Caranta nanggapi perubahen tugas ntah pe keadan, banci ncidahken tuhu-tuhu nge kita meteruk rukur ntah lang. Banci kita erlajar i bas contoh Barsilai nari, teman raja Daud si setia. Sanga umur Barsilai 80 tahun, iundang Daud ia tading i istana. Aminna pe e sada kinihamaten si mbelin, ikataken Barsilai maka madin ibereken tugas enda man Kimham, anakna.—2 Samuel 19:31-37.

⁶ Engkai maka Barsilai la nggit? La nge ia nggit ngaloken tanggung jabap, ntah gelah ula latih iakapna? Labo bage, tapi erkiteken ia meteruk rukur. Isedarina keadanna nggo berubah, janah iakuina keterbatasenna. (Oge Galati 6:4, 5.) Bagi Barsilai, perlu kita meteruk ukur. Asangken terus ngukuri sura-suranta saja ntah mbandingken dirinta ras kalak si deban, padin siakap mereken si mehulina man Jahwe. Pentingen enda asangken hak istimewa ntah pe jadi terberita. (Galati 5:26) Adi meteruk ukur kita, sada arihta ras turang seninanta i bas ngelayani Jahwe bage pe nampati kalak si deban.—1 Korinti 10:31.

7, 8. Uga sifat meteruk ukur nampati kita gelah ula ngandalken diri sendiri?

⁷ Banci saja la menukah terus meteruk ukur adi sialoken terbuen tanggung jabap ntah pe wewenang. Banci kita erlajar arah Nehemia nari. Sanga ibegina lit perbeben i Jerusalem, ertoto ia mindo penampat. (Nehemia 1:4, 11) Ijabap Jahwe totona. Iban raja Artaserses ia jadi gubernur i Jerusalem. Aminna pe Nehemia erkuasa janah bayak, la pernah ia ernalem man dirina. Idaramina petunjuk Jahwe janah iogena undang-undangNa alu ratur. (Nehemia 8:1, 8, 9) Lit kuasana tapi la pernah ipakena kuasana e guna ndatken keuntungen ntah pe kasar man kalak si deban.—Nehemia 5:14-19.

⁸ Bagi Nehemia, adi sialoken terbuen tanggung jabap ntah pe lit perubahen tugas, sipastiken kita tetap meteruk ukur. La atenta siandalken  kengasupen ntah pe pengalamenta. Uga maka banci sekalak jelma mulai ngandalken dirina sendiri? Contohna, banci saja idungi sekalak pertua masalah runggun alu la ertoto lebe. Ntah pe sekalak turang senina erban keputusen lebe, kenca si e maka ipindona Jahwe masu-masu keputusenna. Tapi, kalak si meteruk ukur la iandalkenna dirina, aminna pe nggo melala pengalamenna. Lalap iingetna maka kengasupenna e labo lit ertina ibandingken Jahwe. (Oge Kuan-kuanen 3:5, 6.) Gundari, nterem kalak mentingken bana janah iusahakenna gelah ia si hebatna. Tapi juak-juak Jahwe la bage. La siakap maka tanggungjabapta erban kita ulin asangken kalak si deban bas keluarga ntah pe runggun. Sebalikna, siinget kai baginta bas pengaturen Dibata janah ersada ras  turang seninanta.—1 Timotius 3:15.

9, 10. Uga sifat meteruk ukur banci nampati kita sanga lit mandangi kita alu la adil?

⁹ Banci kitik ukurta adi lit si mandangi kita alu la adil. Enda terjadi man Hanna. Aminna pe keleng kal ate perbulangenna ia, Hanna la ermeriah ukur. Penina, kiduana, rusur megombang man bana. Merhat Hanna mupus tapi la banci. I bas sada wari sanga  kitik kal ukur Hanna lawes ia ertoto ku tabernakel. Imam si Mbelin Eli ngidah ia ngadung, janah ituduhna ia mabuk! Banci saja Hanna merawa. Tapi ijabapna Eli alu mehamat. I bas pudi wari ertoto ia. Totona ncidahken kiniteken ras kekelengenna man Jahwe.—1 Samuel 1:5-7, 12-16; 2:1-10.

¹⁰ Adi meteruk ukur kita banci ’sitaluken si jahat alu perbahanen si mehuli’. (Roma 12:21) I bas doni setan enda dem kejahaten. Emaka ula kita sengget adi la adil kalak man banta. Aminna pe enda banci erban kita merawa, arus silawan rawanta e. (Masmur 37:1) Tapi banci saja suin siakap adi ermasalah kita ras turang seninanta i runggun. Adi e terjadi, siusih atenta Jesus. Nina Pustaka, ”Asum ia igombang-gombangi kalak, la ibalasna alu kata megombang. Tapi erpengendes ia man Dibata, Hakim si bujur.” (1 Petrus 2:23) Jesus meteruk ukur janah ietehna maka pasti ikernepken Jahwe kerina kai si la adil. (Roma 12:19) Atenta pe meteruk ukur janah ’la sibalas perbahanen si jahat alu si jahat’.—1 Petrus 3:8, 9.

11, 12. (a) Uga kita banci tetap meteruk ukur sanga ipuji? (b) Uga banci sicidahken maka kita meteruk ukur arah peruis bage pe perbahanenta?

¹¹ Tetap nge kita meteruk ukur sanga  ipuji kalak? Melala kal si muji Ester. Ia salah sada diberu si mejilena i bas Persia. Setahun dekahna ia ras nterem diberu sidebanna irawat gelah reh jilena. Tujunna gelah ngena ate raja. Tapi Ester si ipilih jadi kemberahen raja. Kerina enda la erbanca ia berubah. Ester la jadi sombong. Tetap ia meteruk ukur, mehuli, ras mehamat.—Ester 2:9, 12, 15, 17.

¹² Adi meteruk ukur kita, peruista bage pe perbahanenta ncidahken maka siergai kalak si deban ras dirinta. Asangken siusahaken gelah hebat iakap kalak kita, madin siusahaken sifat ”lemah lembut dingen ukur teneng”. (Oge 1 Petrus 3:3, 4; Jeremia 9:23, 24) Caranta ngenen dirinta teridah arah ranan bage pe perbahanenta. Contohna, banci saja siusahaken gelah jago iakap kalak kita erkiteken kai si nggo silakoken, pemetehta, ntah pe ise saja teman-temanta. Ntah siusahaken gelah iakap kalak kita sisada ngelakoken hal si penting, padahal situhuna lit sinampatisa. Tapi ukuri kerna Jesus. Banci saja ibanna kalak tertarik erkiteken kepentarenna. Tapi, Kata Dibata si rusur ipakena. Jahwe ngenca atena imuliakenna, labo dirina.—Johanes 8:28.

13, 14. Uga sifat meteruk ukur banci nampati kita erban keputusen si mehuli?

¹³ Perlu kita meteruk ukur sanga erban keputusen, ntah pe sanga keputusen kalak si deban mpengaruhi kita. Paksa Paulus tading i Kesarea, lawes atena ku Jerusalem guna ndungi dahin si ibereken Jahwe. Tapi ikataken nabi Agabus adi lawes Paulus banci ia itangkap. Janah banci ka ibunuh. Ipindo turang senina gelah ula ia lawes. Tapi tetap ia lawes. Engkai? Dirina nge si iandalkenna? Lang, Paulus meteruk ukur janah iandalkenna kal Jahwe. Turang senina pe meteruk ukur ka. Emaka idukungna keputusen Paulus janah ipediatna ia lawes.—Perbahanen Rasul-Rasul 21:10-14.

¹⁴ Meteruk ukur banci nampati kita erban keputusen si mehuli aminna pe la banci sieteh ntah siatur uga kari asilna. Contohna, banci saja siikuti atenta dinas sepenuh waktu. Tapi uga kari adi kita sakit? Uga adi orang tuanta sakit janah perlu penampat? Uga kari adi kita nggo metua? La banci sijabap kerina penungkunen enda, aminna pe sitotoken ntah pe siukuri. (Pengerana 8:16, 17) Tapi adi siandalken Jahwe, sisedari janah siakui maka lit keterbatasenta. Banci siban riset, sipindo pedah, janah si pentingna ertoto mindo penampat. Kenca si e perlu siikuti petunjuk kesah si badia. (Oge Pengerana 11:4-6.) Asilna banci ipasu-pasu Jahwe keputusenta, ntah pe isampatina kita ngubah rencananta.—Kuan-kuanen 16:3, 9.

15. Uga ngukuri kerna Jahwe banci nampati kita tetap meteruk ukur?

¹⁵ Uga gelah kita lebih meteruk ukur? Banci sibahas empat cara. Si  pemena, perlu siukuri kerna Jahwe. Ukuri alu mbages kiniulinNa. Adi sibandingken dirinta ras Jahwe, sisedari maka tuhu-tuhu kitik kal kita janah sitik kal pemetehta. (Jesaya 8:13) Ingetlah maka kita ngelayani Dibata si Madakuasa, labo manusia ntah pe malekat. Adi siukuri kerna si e banci nampati kita gelah ’mpeteruk dirinta i teruh tan Dibata si erkuasa’.—1 Petrus 5:6.

16. Uga ngukuri kerna kekelengen Dibata nampati kita gelah meteruk ukur?

¹⁶ Cara si peduaken gelah lebih meteruk ukur, eme alu ngukuri uga belinna kekelengen Jahwe man banta. Iumpamaken Paulus runggun bagi kula manusia. Kerina bagin kulanta e meherga iban Jahwe. (1 Korinti 12:23, 24) Kerina kita meherga iakap Jahwe. La ibandingkenNa kita ras kalak si deban, janah la ngadi Ia ngkelengi kita sanga siban kesalahen. Malem kal atenta meteh maka keleng kal ate Jahwe kita.

17. Kai manfaatna adi sidarami kai si mehuli i bas kalak si deban nari?

¹⁷ Si peteluken, banci kita lebih meteruk ukur adi sidarami kai si mehuli i bas kalak si deban, bagi si ilakoken Jahwe. Asangken lalap siusahaken gelah iperdiateken kalak kita ntah pe sikataken kai si arus si ilakoken kalak, padin sipindo pedah man kalak janah nggit ngaloken pendapatna. (Kuan-kuanen 13:10) Meriah ukurta sanga ialoken turang seninanta hak istimewa. Janah bujur sikataken man Jahwe erkiteken banci ngelayani Ia.—1 Petrus 5:9.

18. Uga mere pelatihen man pusuh peraten nampati kita lebih meteruk ukur?

¹⁸ Si peempatken, banci kita lebih meteruk ukur adi sigunaken prinsip Pustaka ngelatih pusuh peratenta. Prinsip enda ngajari kita perasan ras perukuren Jahwe. Sanga erlajar, kai pe sinen bagi cara Jahwe, banci siban keputusen si erban meriah ukurNa. Asum kita erlajar, ertoto janah ndalanken kai si nggo sipelajari, pusuh peratenta jadi terlatih. (1 Timotius 1:5) Erlajar kita mpelebe kalak si deban. Adi silakoken enda, erjanji Jahwe maka ’ibanNa serta’ pelatihenta termasuk nampati kita lebih meteruk ukur.—1 Petrus 5:10.

19. Kai si banci nampati kita gelah tetap meteruk ukur seh rasa lalap?

¹⁹ Ingetndu nabi i bas Juda nari si ibahas i bas pemena artikel enda? Bene kegeluhenna bage pe hubungenna ras Jahwe erkiteken la ia tetap meteruk ukur. Tapi banci kita tetap meteruk ukur aminna pe mesera ngelakokenca. Enda terbukti erkiteken nterem juak-juak Jahwe si setia berhasil ngelakokenca. Reh dekahna kita ngelayani Jahwe, arusna reh ernalemna kita man baNa. (Kuan-kuanen 8:13) La soal uga keadanta, banci nge kita erdalan ras Jahwe. Enda me kinihamaten si mbelinna. Emaka mari silakoken kai pe gelah tetap meteruk ukur janah erdalan ras Jahwe seh rasa lalap.