1-3. Ngu tihi ati mprofeti a nga mbi timaha? Kambe kuve ni wuyelo yihi? (Wona mfota wu wu ku makhatoni.)

KA MBIMO ya kale, mkoma wa Israeli Jerobhoamu a rumile vathu ti to ve aka txiluvelo ti to ve khozela sizimu sa makuhu didhoropani ka Bheteli. Jehovha a rumete mprofeti wa Judha ti to eya ningela didungula da wulamuli ka Jerobhoamu. Mprofeti a engisile Jehovha. Hambiku mkoma a nga henyela mprofeti, kambe a vhiketwe ngu Jehovha.—1 Vafumeli 13:1-10.

² Jehovha a ti gete mprofeti ti to asi dyi mwendo kusela a ni Israeli. Ni ku a ti fanete ku wuya ngu yimwane nzila. Mbimo yi a nga tshumela ene a mananile ni dijaha di di nga m’hembela di txi ni dona i mprofeti wa Jehovha. Di rambile mprofeti ti to ve tsula votshe m’tini ve ya dya ni kusela. Mprofeti kha engisa Jehovha, ene a tsute ni dijaha dile. Se Jehovha a to henya, ene a to rumela ngonyamo yi ya daya mprofeti.—1 Vafumeli 13:11-24.

³ Kha hi ti zivi ti ti nga maha mprofeti wule asi engisi Jehovha.  Kambe ati hi tizivako ngu ti to kha ‘tsimbila ngu kutiveka hahatshi’ masoni ka Txizimu. (Lera Mika 6:8.) Ka Bhiblia, kutsimbila ni Jehovha ti pata ku m’themba, kulondisela mkongomiso wakwe ni ku m’engisa. M’thu wu a dinganiselako a fanete kumaha mkombelo mbimo yotshe. Mprofeti a ti fanete kuwotisa ka Jehovha ti to e mu kongomisa. Nathu hi nga maha ti ti fanako ngako hi txi maha sisungo, mwendo hi si ti pfisisi ati Jehovha a ti lavako kwathu. Eto ti na hi vhuna kuvayilela kumaha siwonho sa hombe.

4. Hi na bhula ngu txani ka msungo mhaka wuwa?

⁴ Ka msungo mhaka wu wu nga pinda hi gondile ngu ti to ti womba txani kudinganisela ni ku ngu ku txani i di ka lisima. Kambe hi nga ti kotisa ku txani kudinganisela? Nga siemo sihi a ha kudinganisela kwathu ku nga dukwako? He bhuleni ngu siemo soneso sa siraru.—Mavingwa 11:2.

5, 6. Bharzilayi a ti kombisile ngu nzila yihi ti to a txi dinganisela?

⁵ Nzila yi hi a ngulako ngu yona ngako hi txi manana ni ku txitxa ka siemo ni siavelo si nga kombisa ti to ha dinganisela mwendo ahim-him. He wone txikombiso txa Bharzilayi, mngana wo thembeka wa Dhavhidha. Mbimo yi a nga ti ni 80 wa malembe, a rambilwe ngu Dhavhidha ti to eya zumba nayo wukomani. Ene a lambile hambiku a nga txi ti ziva ti to i ti txiavelo txa lisima. A wombile ti to a ti fanete ku ningela mwanana wakwe Kimame.—2 Samueli 19:31-37.

⁶ Ngu ku txani Bharzilayi a di lambile kuamukela txirambo? Ina a txo lamba wutixamuleli mwendo a txo lava kuhanya do titila? Ahim-him. Ene i ti m’thu wo dinganisela. Ene a txi ti ziva ti to kha na ku ngadi e sikota kumaha ati a nga txi ti maha i di ngadi mfana. (Lera Vagalatiya 6:4, 5.) Nathu ti lava hi dinganisela. Ti lava hi si ti dinganisi ni vamwane loko hi txi lava kuthumela Jehovha. Eto nda lisima ngutu kupinda txiavelo txihi ni txihi. (Vagalatiya 5:26) Hi txi dinganisela hi na thumisana kwati ni vanathu ti to hi dhumisa Jehovha ni kuvhuna vamwane.—1 Vakorinto 10:31.

7, 8. Kudinganisela ti nga hi vhunisa ku txani ti to hi si ti thembi?

⁷ Ti nga thuka ti hi nemelela kudinganisela ngako hi txi amukela wutixamuleli mwendo txiavelo txo kari. Hi nga gonda ka txikombiso txa Nehemiya. Mbimo yi a nga wona ti to vathu va ni Jerusalema va txi tshangana ni sikarato, a kombete ka Jehovha ti to eva vhuna. (Nehemiya 1:4, 11) Jehovha a xamute mkombelo wa Nehemiya. Mkoma Artaxerxe a vekile Nehemiya ti to eva mkoma wa Jerusalema. Ene a ti ni mtamo ni ku a ti ganyile, futhi kha lava ku tikongomisa apune. Ene a lavile mkongomiso ka Jehovha ngu kugonda dipswi dakwe mbimo yotshe. (Nehemiya 8:1, 8, 9) Nehemiya kha thumisa txiavelo txakwe ngu nzila yo biha ti to e ti wuyelisa mwendo kuxanisa vathu vamwane.—Nehemiya 5:14-19.

⁸ Kufana ni Nehemiya, mbimo yi hi amukelako txiavelo mwendo wutixamuleli wo kari, hi fanete hi tsaniseka ti to ha  dinganisela. Kha ha fanela kuthemba wusikoti wathu hipune. Ti nga mahisa ku txani ti to m’thu e khata ku tithemba apune? Ngu txikombiso, didhota do kari di nga lava ku khatalela mhaka yo kari dibanzani di sa khata ngu kumaha mkombelo. Mwendo mwanathu wo kari a nga maha txisungo txo kari a sa khata ngu kukombela txivhuno ka Jehovha. Kambe a txi dinganisela kha na mbi tithemba hambi a di mahile sisungo makhambi o tala. Mbimo yotshe wa ti ziva ti to kha na ku tidinganisa ni Jehovha. (Lera Mavingwa 3:5, 6.) Nyamsi vathu va vangi va dhunda ku tiveka masoni ka vamwane. Kambe Malanda a Jehovha kha ma mahi toneto. Hi nga tumeleleni ti to ku va ni wutixamuleli ti hi maha hi va va tshuko kupinda vamwane timwayani mwendo dibanzani. Kuhambana ni toneto, he khumbuleni ti to mthumo wathu ka lulamiselo ya Jehovha, ngu thumisana ni vanathu.—1 Timoti 3:15.

9, 10. Kudinganisela ti nga hi vhunisa ku txani ngako vamwane va txi hi sola-sola ngu nzila yo biha?

⁹ Mbimo yimwane ha pandiseka ngako vamwane va txi hi sola-sola. Eto ti humelete ka Ana. Hambiku a nga txi dhundwa  ngu mwamna wakwe, kambe a sa tsaka. Penina msikati kulowe ati zumbela ku m’seka. Ana a singa ni mwanana. Ditshiku dimwane a yite dithepeleni e ya khongela. Mbimo yi Mprista Eli a nga m’wona a to pimisa ti to o xanga mwendo ku a levile! Ana a ti pandisekile ngutu. Kambe ene a xamute Eli ngu nzila ya txixonipho. Ka mkombelo wakwe ene a kombisile likholo ka Jehovha ni nzila yi a nga ti m’dhunda ngu yona.—1 Samueli 1:5-7, 12-16; 2:1-10.

¹⁰ Kudinganisela ti na hi vhuna “kusimama hi xula kubiha ngu wunene”. (Varoma 12:21) Mafu ya a Sathane ma tate ngu silo so biha. Ngu toneto kha ti hi xamalisi hi txi ñolwa ngu nzila yo biha. Mbimo yimwane ti nga hi nemelela hi txi manana ni sikarato. (Masalmu 37:1) Ti nga karata ngutu loko hi di ni sikarato ni vanathu dibanzani. Ngako ti txi humelela, hi fanete hi etetela Jesu. Bhiblia yi womba tiya: “Ene, mbimo yi va nga ti m’ruketela, kha ruketela nene. Mbimo yi va nga ti m’xanisa, kha va kwatela, aniko a to ti ningela ka wule a lamulako ngu kululama.” (1 Pedro 2:23) Jesu a ti ti veka hahatshi ni ku a ti ti ziva ti to Jehovha a na lulamisa wubihi wotshe. (Varoma 12:19) Nanathu hi lava ku tiveka hahatshi hi si ‘tshumeti wubihi ngu wubihi’.—1 Pedro 3:8, 9.

11, 12. a) Hi nga simamisa ku txani hi dinganisela ngako vamwane va txi hi ndunduzela mwendo ku hi guleta? b) Hi nga ti kombisisa ku txani ti to ha dinganisela ngu ma ambalelo athu?

 ¹¹ Kudinganisela kwathu ku nga dukwa ngako vamwane va txi hi ndunduzela mwendo ku hi guleta. Ka mbimo ya kale, Esteri a guletilwe ni ku ndunduzelwa. Ka ditiko da Persiya, a ti pala votshe ngu kutshura. Mbimo yi mkoma a nga ti lava msikati, Esteri ni vamwane va langilwe kasiku ve ya ka wukhalo wo sawuleka ti to ve ya emela kulangwa ngu mkoma. I mani a nga langwa ngu mkoma? I Esteri. Kambe Esteri kha nga tiguleta, e khata kutialakanyela. Ene a simamile e dinganisela, e va ni wunene ni txixonipho.—Esteri 2:9, 12, 15, 17.

¹² Ngako hi txi dinganisela, hi na Ambala ngu nzila yi yi kombisako ti to ha va xonipha vamwane ni nathu hi pune. Hahanze ko zama kukomba vamwane, hi na zama ku va ni “moya wo thutha ni wa kudikha.” (Lera 1 Pedro 3:3, 4; Jeremiya 9:23, 24) Ati hi ti wombako ni ti hi ti mahako, ti na kombisa nzila yi hi titekako ngu yona. Ngu txikombiso, hi nga maha ti to vamwane ve alakanya ti to athu hi sawulekile nguku hi tikotako kumaha, ati hi tizivako ni mu hi kuzivako. Mwendo ngu loko hi di mahile hi pune to kari ta lisima ngutu hambi i di ti to vamwane va hi vhuni. Kambe alakanya ngu Jesu. Phela adi ndindile vathu ngu wutxhari wu a nga ti nawo. Kambe mbimo yo tala Jesu a ti seketela mapswi akwe ka Dipswi da Txizimu. A si ti lavi ti to vathu ve mu dhumisa, kambe a lavile ti to ve dhumisa Jehovha.—Johane 8:28.

13, 14. Kudinganisela ku nga hi vhunisa txani ti to hi maha sisungo sa sinene?

¹³ Hi fanete hi dinganisela mbimo yi hi mahako sisungo ni loko vamwane va txi maha sisungo asi si hi gwesako. Mbimo yi Paulo a nga ti Khezariya, ene a ti lava kuya Jerusalema ti to e ya hetisa mthumo wu a nga ti ningilwe ngu Jehovha. Kambe mprofeti Agabho a gete Paulo ti to a txo tsula kheya a ndina khotelwa mwendo kudawa. Vanathu va gete Paulo ti to asi tsuli. Kambe ene a lambile e tsula. Ti la kuwomba to Paulo a txo ti themba? Ahim-him. Ene a txi dinganisela ni ku a thembile ngutu Jehovha. Vanathu avale ni vona va ti dinganisela. Vona va seketete txisungo txa Paulo ve m’leka e tsula.—Mithumo 21:10-14.

¹⁴ Kudinganisela ti na hi vhuna ti to hi maha sisungo sa sinene, hambi mbimo yimwane hi si tizivi a ti ti no hi humelela masoni. Ngu txikombiso, hi nga alakanya ngu kuva vanyaphandule va mbimo yotshe. Kambe ku na humelela txani hi txo thuka hi lwala? Ngako vaveleki vathu va txi lwala se va txi lava txivhuno? Ngako hi txi kumba? Hi nambi si xamula sotshe siwotiso siya, ti lava hi maha mkombelo ni kualakanyisisa ngu sona. (Eklesiaste 8:16, 17) Kambe hi txi themba Jehovha hi na tumela ti to ha tandeka. Hi na xolisisa siemo sathu ni kukombela txivhuno, kambe txa lisima ngutu hi na kombela mkongomiso ka Jehovha ngu kumaha mkombelo, hi tshumela hi wu londisela. (Lera Eklesiaste 11:4-6.) Jehovha a nga hi katekisa, mwendo ku hi vhuna ti to hi txitxa sisungo sathu.—Mavingwa 16:3, 9.

15. Kualakanyisisa ngu Jehovha ti na hi vhunisa ku txani ti to hi ti veka hahatshi?

¹⁵ Nji txani txi no hi vhuna ti to hi dinganisela ngutu? Hi na wombawomba ngu mune wa tinzila. Yo khata ka totshe ngu alakanyisisa ngu Jehovha. Eto ti na hi vhuna ti to hi txi ziva kwati Txizimu. Ngu kumaha eto hi na pfisisa ti to hi vadotho ngutu ni ku kha hi na ku tidinganisa ni Jehovha. (Isaya 8:13) Khumbula ti to hi thumela Txizimu txa mtamo wotshe, i singa vathu mwendo tingelozi. Kualakanyisisa ngutu ti na hi vhuna ti to hi tiveka hahatshi ka “diwoko da mtamo, da Txizimu”.—1 Pedro 5:6.

16. Kualakanyisisa ngu lirando la Txizimu ti hi vhunisa ku txani ti to hi dinganisela?

¹⁶ Nzila ya wumbidi ngu alakanyisisa ngu nzila yi Jehovha a hi randako ngu yona. Paulo a fananisile dibanza ni mmidi wa m’thu. Jehovha a mahile siro sotshe sa mmidi si di ni lisima. (1 Vakorinto 12:23, 24) Tximwetxo ngu tximwetxo ka Jehovha txi ni lisima. Ene kha hi dinganisi ni vamwane, ni ku kha leki ku hi komba lirando hambi hi txi thuka hi maha siwonho. Hi nga wona kutsakisa ka tona kuziva ti to Jehovha wa hi randa!

17. Hi na wuyelwa ngu txani ngako hi txi wona ati i ku ta tinene ka vamwane?

¹⁷ Ya wuraru ngu kufana ni Jehovha, wona ati i ku ta tinene ka vamwane. Hi txi zumbela ku wonetela ati va ti mahako mwendo ku va gela ti to ve maha to kari, eto ti na kombisa ti to kha hi dinganiseli, hahanze keto hi fanete kukombela ni ku amukela mawonelo awe. (Mavingwa 13:10) Hi na tsaka ni vanathu ngako va txi amukela siavelo sa siphya. Ni ku hi na bonga Jehovha nguku a hi tumelelako ti to hi m’thumela.—1 Pedro 5:9.

18. Ku toloveta livhalo lathu ti nga hi vhunisa ku txani ti to hi dinganisela ngutu?

¹⁸ Ya wumune, ngu thumisa matshina a milayo ti to hi toloveta livhalo lathu. Matshina oneyo ma hi gondisa ngu matipfelo ni mialakanyo ya Jehovha. Hi txi gonda kuengisa Jehovha, ti nga hi vhuna kumaha sisungo asi si m’tsakisako. Nji txani txi no tsanisa livhalo lathu? Ngu gonda Bhiblia, mkombelo, ni kuthumisa ati hi ti gondako. (1 Timoti 1:5) Ngako hi txi teka vamwane i di va lisima kwathu, Jehovha a hi thembisa ti to a na ‘hi gondisa’, ni ku hi vhuna ti to hi dinganisela ngutu.—1 Pedro 5:10.

19. Nji txani txi no hi vhuna kusimama hi dinganisela ngu ha ku si gumiko?

¹⁹ Ina wa mkhumbula mprofeti wa ni Judha awu hi nga bhula ngu ngene makhatoni ka msungo mhaka wuwa? Ene a luzile wutomi ni wuxaka wakwe ni Jehovha ngu mhaka yo mbi dinganisela. Kambe athu hi nga ti kota kusimama hi dinganisela hambi ti txi karata, ngu kuvhunwa ngu sikombiso sa malanda o thembeka a Jehovha. Mbimo yi hi yako hi thumela Jehovha, hi ya hi tshuketa hafuhi kwakwe. (Mavingwa 8:13) Ti singa ni mhaka ni ti to kuhumelela txani, he simameni hi tsimbila ni Jehovha. Eyo i lungelo ya hombe yi hi ku nayo. He maheni totshe ti to hi simama hi dinganisela ni kutsimbila ni Jehovha ngu ha kusi gumiko.