1-3. Namavuhulela w’o Juda wakosile eni, nanda txini yampadduweli? (Koona foto omaromo.)

MWENE JEROBOAU wa Izrayel wawale, wahimetxa ebuwa yammageliye mulugu wonyengetta mu sidadi ya Betel. Yehova wahimuruma namavuhulela waye w’o Judá wi amwaddele mpaganyo womusaddeyana Jeroboau. Namavuhulela oddu woviyeviha, wahimwiwelela Mulugu nanda badhowana mpaganyoya. Mwene wahisilidhiwa vaddiddi na namavuhulela oddu masiki dhawene Mulugu wahinvuna.—1 Amwene 13:1-10.

² Yehova wahimwaddela namavuhulela wila kaje vina kamwe manje mu Jeruzalemi, nanda eyelele owaniwe aviraga dila yina. Mudhidhi weyeliye, mulobwana dhahi wa kalaba odha omunyengetta, alogaga wila ohakela mpaganyo wa Yehova. Kalaba oddu wahimuwobela vatakulu vaye namavuhulela oddule wi aje vina amwe. Nomala namavuhulela wahittiya ovirihamo malago a Yehova, nanda banfara kalaba oddule. Yehova kaziveliwe. Namavuhulela eyelelaga owaniwaye, wahittiddiwa  poddogoma bakwa.—1 Amwene 13:11-24.

³ Kaninziwa emukosihile namavuhulelaya omwiwelela mulobwana oddule wa kalaba ottiya Yehova. Mbwenye enziwa iyo jowi kawodhile “weddana okurumuwa” na Yehova. (Kengesa Mikeya 6:8.) Mbibiliani, weedda na Yehova ontapulela omukuluvela, weeddana malago aye vina omwiwelela. Muttu wokurumuwa onoziwa wi onofanyeela olobela mudhidhi oli wotene. Noona namavuhulela oddu kokala muttu woviyeviha, agahiroma onvuza Mulugu akala ddi iyene osaddulile malago anvahiliye. Mudhidhi mwina iyo vina ninogumana na makattamiho nigafunaga osakula elobo, ofiyedha ohinonelamo mowakwana ennifunana Yehova. Mbwenye nigakala attu oviyeviha, ninele okumbirha nikamihedho na Yehova wi nirabele ottega.

4. Mutoma obu onanisunzihe eni?

⁴ Mutoma wa nsunzo ovirile, nihisunza txini entapulela oviyeviha na okurumuwa vina sabwa ekalelani yamakamaka masaka abano. Ninfanyeelela eni okala okurumuwa vina oviyeviha? Nanda makattamiho gani agawodhile weha okurumuwa na oviyeviha wehu, na efunelo ya woona akala ninolagiha okurumuwa? Ndoweni nisekeserhe dhipaddi esi ttaru.—Gano 11:2.

5, 6. Barzelayi walagihile dhavi okala wokurumuwa?

⁵ Akala dhilobo dhinosadduwa obe ninottiya ettomo yanihuna mmulogoni, merelo ehu anele olagiha akala n’attu okurumuwa obe nne. Ndoweni niloge vang’onovi yotagiha ya Barzelayi, marho wa Mwene David. Barzelayi vaniyena vyaka 80 dhobaliwa, David wahimuwobela okala vatakulu va mwene. Masiki vooniye wila ntti nali nriho ninddimuwa, Barzelayi wahikoodda nanda baloga wila ngafuna adhowe mwanaye Kimeyam.—2 Samuwel 19:31-37.

⁶ Barzelayi wakooddeli eni orumeela niwobo ntti? Wova anadhe akaane ettomo, obe wafuna egumi yofwasa? Nne, iyene wali muttu wokurumuwa. Iyene wahinonelamo wila ekalelo yaye yahisadduwa vina dhilobo dhina kawodha okosawa. (Kengesa Galásia 6:4, 5.) Nikale attu okurumuwa ninga Barzelayi. Ottiya wila nang’anelege dhofuna dhehu obe oviladdaniha na attu eena, ninofanyeela onvaha Yehova guru dhehu. Ejo jaderetu ottiya otamelega ottomeliwa mabasa apama obe otameletxa oziwiwa. (Galásia 5:26) Nigakala attu oviyeviha ninele olaba vamodha na abalihu vina ninele wakamihedha eena omuttittimiha Yehova.—1 Korinto 10:31.

7, 8. Okurumuwa onnikamihedha dhavi okoodda ovikuluvela nanya?

⁷ Mudhidhi mwina enorutxaga okala wokurumuwa, ttabwattabwa nigattomeliwa mabasa maswa. Ndoweni nitanaalele yotagiha ya Nehemiya. Nehemiya mwasogorheliye nlogo mu Jeruzalemi, awene ahikaana makattamiho menjene, mbwenye wahikumbirha nikamihedho na Yehova. (Nehemiya 1:4, 11) Yehova wahakula nlobelo na Nehemiya. Mwene Artaserse omuttoma Nehemiya ninga mulamuleliya. Nehemiya wali waguru vina woreela, masiki dhawene kavikuluveli mwinya. Iyene wang’anetxa magano a Yehova na wengesa Malamulo  aye. (Nehemiya 8:1, 8, 9) Nehemiya wannalamulela attu enjene. Masiki dhawene kalabihedhi olamulela oko wi avittukulelena obe atabutxena attu.—Nehemiya 5:14-19.

⁸ Dhahene ninga Nehemiya, akala ninottomeliwa mabasa gwé, obe akala dhilobodha dhinosadduwa, ninofanyeela okalavi okurumuwa vina oviyeviha. Nittiye ovikuluvela bure mwa esile dhinwodhihu. Koddi muttu onroma dhavi ovikuluvela mwinyene? Motagiha, txino munddimuwa wa mulogo onoroma weeddiha makani a mmulogoni s’olobela. Obe ngafuna mbali obe murogora onogana elobo ahinatti okumbirha mareliho obe nikamihedho na Yehova. Muttu wokurumuwa vina woviyeviha, kanivikuluvela mwinya, masiki akala onokosa elobo elemeeliye okosawa, onokumbirha nikamihedho na Yehova. Muttuya oddo onoziwa wila ewodhelo eniye txipo kinladdana na Yehova. (Kengesa Gano 3:5, 6.) Nsaka nttino, attu enjene anamakumbela vawa vina anotamelaga okosa dhilobo dhowapittana akwawa. Mbwenye emeleli a Yehova kankosa esuwene. Ninoziwa wila ottomeliwa mabasa mmulogoni kintapulela wila muttuya ddottiyana vaddiddi na akwaye a mmulogoni. Mwa dhotedhene eso, kanidduwale mabasa avahiwehu munikuruni na Mulugu vina nilabevi vamodha na abali vina arogora otene.—1 Timóteo 3:15.

9, 10. Okurumuwa onanikamihedhe dhavi akala ninosisiguliwa s’o muladdu?

⁹ Mudhidhi mwina ninosilidhiwaga akala muttu ononisisigula s’muladdu. Eji yahimpadduwela Ana. Masiki Ana vafuniwiye vaddiddi na mamunaye, iyene kahagalala. Penina munanddaye wannimunyimula mudhidhi wotene. Ana wanunlela okaana mwana, mbwenye kabala. Labo nimodha valiye wokubanyene wahidhowa olobela mumparhani. Namakutta Munddimuwa Eli mmooneliye bagonla ommagedha olezela! Eji txino egahimusilidha vaddiddi Ana. Ottiya okala wosilidhiwa, iyene omwakula Eli na nriho. Musogorhomwa, Ana wahikosa nlobelo nalagiha omuroromela waye Yehova vamodha na omukwela waye.—1 Samuwel 1:5-7, 12-16; 2:1-10.

¹⁰ Okurumuwa ononikamihedha ‘opemberha mubureni.’ (Roma 12:21) Elabo ejino ya Satana ehidhaala dhubuwelo dhobure. Kahiyo rurumutxa wawoona attu annikosela obure. Masiki niziwaga wila esodha dhinonisilidha vaddiddi, ninofanyeela owanana dhubuwelo eso dhabure. (Masalmo 37:1) Ejo enopa vaddiddi akala ninokaana makattamiho na abali ehu a mmulogoni. Eji egapadduwa, ninofanyeela omutagiha Yezu. Bibilia onloga: “Vanyemuliweye, kakulile kambo; asosiwaga  konihile okoya ntxiga.” Ottiya ejo “wavilevela Mulugu onthonga n’ebaribari.” (1 Pedro 2:23) Yezu wali muttu woviyeviha vina wanziwa wila Yehova wahoona obure wotene wakoseliwiye. (Roma 12:19) Ninofanyela oviyeviha, vina onnirela ‘yabure kanimwirele yabure yakakene.’—1 Pedro 3:8, 9.

11, 12. (a) Okurumuwa onanikamihedhe dhavi akala ninotamaaleliwa vopitta? (b) Mwabalelo na merelo ehu analagihe dhavi wila nili attu okurumuwa?

¹¹ Okurumuwa obe oviyeviha wehu onowehiwa ttabwattabwa nigasibiwaga. Ester wantamaaleliwa vina osibiwa vopitta. Iyene wali muyana wokoddela Pérsia muzima. Vayakani wansasanyiwa na mukalelo wotene wakosiwana anayana ena asakuliwa wi adhowe woniwa ekoddelelo yawa na mwene. Nomala mwene wahimusakula Ester wi akale musano. Masiki dhawene masasanyedho abo kasaddulile mubuwelo waye. Ester txipo kali mukumbela vaye. Iyene walivi, woviyeviha, wokurumuwa vina woriha.—Ester 2:9, 12, 15, 17.

¹² Nigakala attu oviyeviha, ninele wabala guwo na mukalelo onlagiha wila ninowariha akwehu. Ottiya ovigwarula obe osibiwa wi nooniwege ninga amakamakaya, ninokosa guru wila nizuzumele okala “wofwasa, wa murenddele.” (Kengesa 1 Pedro 3:3, 4; Jeremiya 9:23, 24) Mukalelo onivyonihu, mweddelo na merelo ehu anele olagiha ejile elihu. Motagiha txino podi wakosiha attu onoonaga ninga amakamaka sabwa ya esile dhinziwehu vina dhinkosehu. Obe ninovilagiha ninga niwodhile okosa elobo yaderetu oku nigelile okamihedhiwa na muttu mwina. Nimubuwele Yezu. Txino iyene agahakosiha attu enjene woona wila wali muziwetxi. Ottiya okosa ejuwene, dila dhinjene Yezu wantonya Nzu na Mulugu. Iyene kafuna wila attu amuttittimihege. Iyene wankosa dhetene wi nriho na nttittimiho dhiperhekeliwe Yehova.—Joau 8:28.

13, 14. Oviyeviha onanikamihedhe dhavi okosa dhosakula dhapama?

¹³ Nikurumuwe akala ninokosa yosakula yamakamaka obe akala muttu onokosa yosakula ennipatta. Murumiwi Paulo valiye o Sesareya, wanfuna vaddiddi odhowa o Jeruzalemi wi agomihe mabasa anvahile Yehova. Mbwenye namavuhula Ágabo omwaddela Paulo wila agadhowawo onele omagiwa. Txino vina ofiyedha opiwa. Abali ahimudidela Paulo wila anadhowe. Masiki dhawene Paulo wahikalela ntidi odhowa o Jeruzalemi. Wakosele sabwa ya ovikuluvela? Nne, Paulo wali muttu woviyeviha vina wannimukuluvela kakamwe Yehova. Abali vina aali oviyeviha. Noona ahirumeela yosakula ya Paulo nanda ahimuttiya odhowa.—Merelo 21:10-14.

¹⁴ Okurumuwa onele onikamihedha okosa dhosakula dhapama masiki nihiziwaga enfuna odha musogorhomwa. Motagiha, akala ninowubuwela olaba mabasa a mudhidhi wotene. Txini enapadduwe nigafanyiwa eredda? Enakale dhavi akala mambali wawo muredda, nanda bagafuna nikamihedho nawo? Txini enakosihu nigoluvala? Kaninawodhe wakula mavuzo aba etene, masiki nilobelaga obe nitanaalelaga esidha. (Kohelét 8:16, 17) Mbwenye nigamukuluvela Yehova, ninele ononelamo vina orumeela wobana wehu. Ninele otanaalela makaniya, okumbirha nikamihedho vina olobela wi nivahiwe malago apama. Nifare malago a muya wa Yehova. (Kengesa  Kohelét 11:4-6.) Yehova onele onireliha na dhosakula dhehu dhapama, vina onele onikamihedha osaddula dhubuwelo dhehu.—Gano 16:3, 9.

15. Omutanaala Yehova onnikamihedha dhavi oviyeviha?

¹⁵ Ninawodhe dhavi okala okurumuwa? Ndoweni nitanaalele tharho nai. Voroma iyo notene ninofanyeela omubuwela Yehova nitanaalaga ekalelo ya Omulugu waye. Nigaviladdaniha deretu na Yehova, ninele woona wila nang’ono vaddiddi vina eziwelo yehu eng’ono opitta yaye. (Izaiya 8:13) Nubuwele wila nineedda na Mulugu wowodha-wodha, ottiya muttu mwina obe angelo. Otanaalela esene dhinele onikamihedha oviyeviha “vamentoni va Mulugu.”—1 Pedro 5:6.

16. Otanaalela onikwela wa Yehova onnikamihedha dhavi okurumuwa?

¹⁶ Ttarho yanawili enanikamihedhe okala woviyeviha ja otanaalela mukwelelo onnikwela Yehova. Paulo wahiladdaniha mulogo ninga ningo na muttu. Yehova ottanddile wila dhipaddi dhetene dha maningo dhikale dhamakamaka. (1 Korinto 12:23, 24) Muttu-muttu wa iyo, ddwa makamaka vamentoni va Yehova. Iyene kanniladdaniha na attu eena, vina kanttiya onikwela akala ninokosa yovirigana. Oziwa wila Yehova ononikwela, ejo enonihagalaliha vaddiddi.

17. Nimpurelamo eni nigatamela dha oderetu wa attu eena?

¹⁷ Elobo yanoraru enanikamihedhe okurumuwa, ku otamela oderetu wa attu eena ninga munirela Yehova. Ottiya okalelaga wawaddelavi akwehu dhokosa, nakumbirhe nikamihedho nigamala ovuruwana na ofwaseya, nittiddihedhe mabasa mirugudha. (Gano 13:10) Nittangarhame akala abali na arogora anottomeliwa mabasa maswa. Vina ninomutamaalela vopitta Yehova onirumeelile omulaba.—1 Pedro 5:9.

18. Oshagiha etanaalelo yehu onnikamihedha dhavi okala oviyeviha?

¹⁸ Elobo yanonai enanikamihedhe okurumuwa vina woviyeviha ku olabihedha magano a Bibilia wi nishagihena yubuwelo yehu. Magano abo anonikamihedha oziwa mukalelo onubuwela vina onoona Yehova dhilobo. Nigasunza woona dhilobo na moonelo wa Yehova, ninele okosa dhosakula dhinimuhagalaliha Mulugu. Venevo vanromihu osunza, olobela vina ottiddihedha mabasa malagoya, etanaalelo yehu enele oliba. (1 Timóteo 1:5) Ninosunza wawika attu eena vamburoni voroma. Nigavirihamo dhubuwelo esi, Yehova onolibela wi ‘ononilibiha’, ononikamihedha wi nikurumuwe.—1 Pedro 5:10.

19. Txini enanikamihedhe okala okurumuwa na mukalakala?

¹⁹ Onomubuwela namavuhulela oddule wa mu Judá omulogile iyo omaromo wa nsunzo ntti? Iyene wahiyelela egumi na omarho waye na Yehova sabwani wahittiya okala woviyeviha. Mbwenye enowodheya okalavi woviyeviha masiki egali yorutxa. Motagiha, emeleli enjene a Yehova anolagiha wila ejiya enowodheya. Venevo vanimulabihu Yehova, ninofanyeela omukuluvelavi. (Gano 8:13) Masiki makattamiho enjive, enowodheya weedda na Yehova. Ejo gari enddimuwa ena iyo. Noona nikose guru eli yotene wi nikale attu okurumuwa vina oviyeviha wi needdegevi na Yehova.