1-3. Ki sa profet sorti Zida pa ti fer e ki rezilta sa ti anmennen? (Vwar portre o konmansman sa lartik.)

LERWA Izrael, Zeroboam ti’n fer en lotel pour fo ladorasyon dan lavil Betel. Zeova ti anvoy enn son profet sorti Zida pour anons en mesaz zizman avek Zeroboam. Sa profet ki ti annan limilite ti obei Zeova e anons sa mesaz. Lerwa ti vreman ankoler avek sa profet, me Zeova ti protez li.—1 Lerwa 13:1-10.

² Zeova ti’n donn lord sa profet pour pa ni manze ni bwar nanryen dan pei Izrael e i ti demann li pour pas par en lot semen ler i retournen. Ler i ti pe retournen, sa profet ti rankontre en msye aze ki ti koz manti avek li e dir ki i ti en mesaze sorti kot Zeova. I ti envit sa profet pour vin kot li pour manze e bwar. Sa profet ti dezobei Zeova e al avek sa msye aze. Zeova pa ti kontan. Ler sa profet ti dan semen pour retourn kot li, en lyon ti atak li e touy li.—1 Lerwa 13:11-24.

³ Nou pa konnen akoz sa profet ti deside ekout sa msye  dan plas Zeova. Me sa ki nou konnen, se ki i pa ti kontinyen “mars dan en fason modes” avek Zeova. (Lir Mika 6:8, NWT.) * Dan Labib, mars avek Zeova i enkli met konfyans dan Zeova, depan lo son gidans e obei li. En dimoun modes i konnen ki i bezwen priye toultan. Si sa profet ti modes, i ti pou’n demann Zeova si son lenstriksyon in sanze. Par ler nou bezwen fer bann desizyon difisil e i kapab ki par ler i pa kler ki Zeova i anvi nou fer. Me si nou modes, nou pou demann Zeova pour gid nou pour ki nou pa fer bann fot grav.

4. Ki nou pou aprann dan sa lartik?

⁴ Dan sa lartik avan, nou’n aprann ki savedir modes e akoz i enportan ozordi. Me ki mannyer nou kapab vin pli modes? Ki sityasyon ki kapab teste si nou modes oubyen non? Annou vwar trwa sa bann sityasyon.—Proverb 11:2.

5, 6. Ki mannyer Barzilai ti demontre ki i ti modes?

⁵ Fason ki nou reazir ler nou sityasyon ek responsabilite i sanze i kapab montre si nou vreman modes. Nou kapab aprann avek legzanp Barzilay en zanmi fidel David. Ler Barzilai ti annan 80 an, David ti envit li pour vin reste dan pale lerwa. Menm si sa ti en gran loner, Barzilai ti dir ki i ti a pli bon donn son garson Kimam sa responsabilite.—2 Samyel 19:31-37.

⁶ Akoz Barzilai pa ti aksepte sa lenvitasyon? Eski i akoz i pa ti anvi responsabilite oubyen akoz i ti anvi en lavi fasil? Non, se parski Barzilai ti modes. I ti rekonnet ki son sirkonstans ti’n sanze e i ti aksepte ki i pa ti kapab fer keksoz parey avan. (Lir Galat 6:4, 5.) Parey Barzilai, nou bezwen modes. Dan plas konsantre lo sa ki nou anvi oubyen konpar nou avek lezot, nou konsantre lo donn Zeova nou meyer. Sa i pli enportan ki annan en responsabilite spesyal oubyen vin popiler. (Galat 5:26) Si nou modes, nou pou travay ansanm avek nou bann frer pour onor Zeova e ed lezot.—1 Korentyen 10:31.

7, 8. Ki mannyer ler nou modes sa pou ed nou pa depan lo nou menm?

⁷ I kapab difisil pour reste modes ler nou ganny plis responsabilite oubyen lotorite. Nou kapab aprann avek legzanp Neemya. Ler Neemya ti tande ki bann dimoun Zerizalenm ti annan bokou problenm, i ti sipliy Zeova pour ed zot. (Neemya 1:4, 11) Zeova ti reponn lapriyer Neemya. Lerwa Artakzerses ti fer Neemya vin gouverner sa rezyon. Menm si Neemya ti annan bokou pouvwar e i ti ris, i pa ti depan lo li menm. I ti rod gidans Zeova e lir son Lalwa regilyerman. (Neemya 8:1, 8, 9) Neemya ti annan lotorite lo bokou dimoun. Me i pa ti zanmen servi son lotorite pour son prop byenfe oubyen tret lezot brit.—Neemya 5:14-19.

⁸ Parey Neemya, si nou ganny plis responsabilite oubyen ganny donnen en lot responsabilite, nou anvi fer sir  ki nou reste modes. Nou pa pou anvi depan lo nou prop abilite oubyen leksperyans. Ki mannyer en dimoun i kapab konmans depan lo li menm? Par egzanp, en ansyen i kapab fer bann keksoz ki annan pour fer avek kongregasyon san priye. En frer oubyen en ser i kapab fer en desizyon e apre priy lo la pour demann Zeova pour beni son desizyon. Par kont, en dimoun ki modes pa depan lo li menm, menm si i pe fer en keksoz ki i abitye fer toultan. I toultan gard antet ki Zeova ki ed li arive fer sa ki i pe fer. (Lir Proverb 3:5, 6.) Dan sa lemonn ozordi, bokou dimoun i egois e anvi vin pli siperyer ki lezot. Me bann serviter Zeova pa koumsa. Nou pa mazinen ki nou bann responsabilite i fer nou pli siperyer ki lezot dan nou fanmir oubyen kongregasyon. O kontrer, nou rapel nou plas dan laranzman Bondye e travay ansanm avek nou bann frer ek ser.—1 Timote 3:15.

9, 10. Ki mannyer ler nou modes sa i kapab ed nou ler lezot i kritik nou san okenn rezon?

⁹ Ler lezot i kritik nou san okenn rezon, sa i kapab fer nou tris. Sanmenm ki ti arive avek Ana. Menm si son msye  ti kontan li en kantite, i pa ti santi li ere. Penina, lot madanm son msye, ti toultan pe sikann li. Ana ti oule zanfan me i pa ti kapab fer zanfan. En zour ki Ana ti santi li vreman sagren, i ti al kot tabernak pour priye. Granpret Eli ti vwar li pe plere e i ti akiz Ana konmkwa i ti sou. Dan plas ankoler, Ana ti reponn Eli avek respe. Pli tar, Ana ti fer en lapriyer ki ti montre son lafwa ek lanmour pour Zeova.—1 Samyel 1:5-7, 12-16; 2:1-10.

¹⁰ Ler nou modes, sa i kapab ed nou “kontinyen domin lemal avek sa ki byen.” (Romen 12:21) Lemonn Satan i ranpli avek bann move keksoz. Alor nou pa devret sirprann ler nou pa ganny trete byen. Menm si sa i fer nou ankoler, nou bezwen lager avek sa santiman. (Psonm 37:1) I kapab pli difisil ankor ler nou ganny problenm avek nou bann frer ek ser dan kongregasyon. Si sa i arive nou anvi imit Zezi. Labib i dir: “Ler zot ti ensilte li, i pa ti ensilte zot li osi.” O kontrer, “i ti les tou dan lanmen sa Enn ki ziz avek lazistis.” (1 Pyer 2:23) Zezi ti annan limilite e i ti konnen ki Zeova ti pou koriz nenport lenzistis. (Romen 12:19) Nou osi nou anvi annan limilite e “pa rann mal pour mal.”—1 Pyer 3:8, 9.

11, 12. (a) Ki mannyer nou kapab reste modes ler lezot i felisit oubyen flat nou? (b) Ki mannyer nou kapab montre ki nou modes par fason ki nou sanze e konport nou?

 ¹¹ Ler lezot i felisit oubyen flat nou, sa i kapab teste si nou modes oubyen non. Dimoun ti flat e felisit Ester en kantite. I ti enn parmi sa pli zoli fiy Pers. Pour enn an, li ek lezot zenn fiy ki ti anvi ganny swazir par lerwa pour vin larenn, ti ganny bann tretman labote spesyal. Lerwa ti swazir Ester pour vin son larenn. Me tou sa latansyon ki i ti gannyen pa ti fer li sanze. Ester pa ti vin granzar. I ti reste modes, respektab e i ti annan labonte.—Ester 2:9, 12, 15, 17.

¹² Si nou modes, nou pou sanz e konport nou dan en fason ki montre ki nou respekte lezot ek nou prop lekor. Dan plas vant nou lekor oubyen esey enpresyonn lezot, nou esey “demontre en leta lespri trankil e dous.” (Lir 1 Pyer 3:3, 4; Zeremi 9:23, 24) Nou fason koze e sa ki nou fer pou montre ki mannyer nou vwar nou prop lekor. Par egzanp, nou kapab fer lezot krwar ki nou spesyal akoz sa ki nou fer, sa ki nou konnen oubyen bann dimoun ki nou konnen. Nou kapab fer konmsi nou ki’n fer en keksoz enportan lo nou menm, menm si an realite lezot ki’n ed nou. Me mazin Zezi. I ti kapab enpresyonn lezot par montre ki i ti vreman malen. O kontrer, Zezi ti souvandfwa sit Parol Bondye. I pa ti anvi dimoun i donn li laglwar. I ti toultan anvi laglwar i al pour Zeova.—Zan 8:28.

13, 14. Ki mannyer ler nou modes, sa i kapab ed nou fer bann bon desizyon?

¹³ Nou bezwen modes ler nou fer bann desizyon oubyen ler lezot i fer bann desizyon ki annan en lefe lo nou. Ler zapot Pol ti pe reste Sezare, i ti anvi al Zerizalenm pour fini travay ki Zeova ti’n donn li. Me profet Agabis ti dir Pol ki si i ale, i ti pou ganny tyonbo e petet menm ganny touye. Bann frer ti sipliy Pol pour pa ale. Me Pol ti deside al Zerizalenm. Eski sa i vedir ki i ti pe depan lo li menm? Non, Pol ti modes e i ti vreman annan konfyans dan Zeova. Bann frer osi ti modes. Alor zot ti siport desizyon ki Pol ti pran e les li ale.—Akt 21:10-14.

¹⁴ Ler nou modes, sa pou ed nou fer bann bon desizyon menm ler nou pa kapab konn oubyen kontrol sa ki pou arive. Par egzanp, nou kapab pe mazin konmans servis a plen tan. Me ki pou arive si nou tonm malad oubyen si nou paran i tonm malad e zot bezwen led? Ki nou pou fer ler nou vin vye? Nou pa kapab reponn tou sa bann kestyon, menm si nou priye e mazin lo la. (Eklezyast 8:16, 17) Me si nou annan konfyans dan Zeova, nou pou rekonnet e aksepte nou limit. Nou pou get bann fe, demann konsey e pli enportan ankor, priye pour ganny gidans Bondye. Apre sa, nou bezwen swiv direksyon lespri sen Zeova. (Lir Eklezyast 11:4-6.) Zeova i kapab beni nou desizyon oubyen ed nou pour sanz nou plan.—Proverb 16:3, 9.

15. Ler nou medit lo Zeova, ki mannyer sa i ed nou pour kontinyen abes nou?

¹⁵ Ki mannyer nou kapab vin pli modes? Annou vwar kat pwen. Premyerman, nou bezwen medit lo Zeova, mazin o profon lo ki kalite Bondye i ete. Ler nou konpar nou avek Zeova, nou realize ki nou ptipti e ki nou pa konn preski nanryen. (Izai 8:13) Gard antet ki servi sa Bondye Tou Pwisan, pa en imen oubyen en lanz. Ler nou medit lo sa, sa pou ed nou pour abes nou “devan sa Bondye pwisan.”—1 Pyer 5:6.

16. Ler nou medit lo lanmour Bondye, ki mannyer sa i ed nou vin pli modes?

¹⁶ En dezyenm fason ki nou kapab vin pli modes i ler nou medit lo ki kantite Zeova i kontan nou. Pol ti konpar kongregasyon avek lekor en imen. Zeova in fer diferan parti lekor e zot tou zot annan valer. (1 Korentyen 12:23, 24) Sakenn ant nou i osi annan valer pour Zeova. I pa konpar nou avek lezot e i pa aret kontan nou ler nou fer bann fot. Nou pa per e nou kapab santi nou an sekirite ler nou konnen ki Zeova i kontan nou.

17. Ki mannyer nou pou benefisye ler nou rod sa ki bon dan lezot?

¹⁷ Trwazyenmman, nou pou vin pli modes ler nou rod sa ki bon dan lezot, parey Zeova i fer. Dan plas toultan esey ganny tou latansyon lezot oubyen dir lezot sa ki zot devret fer, nou pou demann zot konsey e nou pou pare pour aksepte zot bann nide. (Proverb 13:10) Nou kontan ler nou bann frer ek ser i ganny bann responsabilite spesyal e nou remersye Zeova ki i permet nou tou pour servi li.—1 Pyer 5:9.

18. Ki mannyer ler nou form nou konsyans, sa pou ed nou pour vin pli modes?

¹⁸ Katriyenmman, nou pou pli modes ler nou servi bann prensip Labib pour form nou konsyans. Sa bann prensip i ansenny nou ki mannyer Zeova i santi e panse. Ler nou aprann pour vwar keksoz parey Zeova, nou kapab fer bann desizyon ki fer li plezir. Anmezir ki nou etidye, priye e aplik sa ki nou aprann, nou konsyans pou vin pli for. (1 Timote 1:5) Nou aprann met lezot premye. Si nou fer sa bann keksoz, Zeova i promet nou ki i pou ‘fini nou formasyon’ enkli ed nou pour vin pli modes.—1 Pyer 5:10.

19. Kwa ki pou ed nou reste modes pour touzour?

¹⁹ Eski ou ankor rapel sa profet sorti Zida ki nou ti koz lo la o konmansman sa lartik? I ti perdi son lavi ek son lanmitye avek Zeova akoz i pa ti reste modes. Me nou kapab reste modes menm ler i difisil pour fer li. Legzanp tou sa bann serviter Zeova i montre ki sa i posib. Pli nou servi Zeova, pli nou pou depan lo li. (Proverb 8:13) Nenport ki sirkonstans ki nou ladan, nou kapab kontinyen mars avek Zeova. Sa i pli gran loner ki nou kapab annan. Alor annou fer tou sa ki nou kapab pour reste modes e mars avek Zeova pour touzour!