1-3. a) ¿Chuqui maʼañic bʌ tsiʼ mele jiñi xʼaltʼan chʼoyol bʌ ti Judá? b) ¿Chuqui tsiʼ chaʼle? (Qʼuele jiñi dibujo).

TI ISRAEL, juntiquil rey i cʼabaʼ Jeroboam (Jeroboán) tsiʼ mele jumpʼejl pulʌntib ti Betel chaʼan miʼ chʼujutesan jiñi diosteʼ tac. Jin chaʼan, Jehová tsiʼ choco majlel juntiquil xʼaltʼan chʼoyol bʌ ti Judá chaʼan miʼ yʌqʼuen tsʌts bʌ ticʼojel. Jiñi xʼaltʼan tsaʼʌch i jacʼʌ come tsiʼ pʌsʌ i pecʼlel. Pero jiñi rey tsaʼ wen michʼa chaʼan tsaʼ bʌ subenti, i Jehová tsaʼʌch i cʌnta jiñi xʼaltʼan (1 Reyes 13:1-10).

² Jehová tsiʼ wʌn sube jiñi xʼaltʼan chaʼan maʼañic chuqui yom miʼ cʼux yicʼot miʼ jap yaʼ ti Israel i chaʼan ti yambʌlix bij baqui yom miʼ sujtel. Pero yaʼ ti bij tsiʼ taja juntiquil wiñic ñoxix bʌ tsaʼ bʌ i poj alʌ chaʼan an chuqui tsaʼ subenti ti Jehová. Ili wiñic tsiʼ pʌyʌ majlel jiñi xʼaltʼan chaʼan miʼ chaʼlen uchʼel tiʼ yotot. Jiñi xʼaltʼan tsaʼʌch i jacʼʌ, i maʼañic tsiʼ jacʼbe i tʼan Jehová. Jin chaʼan, jiñi xʼaltʼan tsaʼ cʼuxle ti juncojt bajlum cheʼ bʌ sujtelix mucʼ tiʼ yotot, come Jehová maʼañic tsiʼ mulaj tsaʼ bʌ i mele (1 Reyes 13:11-24).

³ Mach la cujilic chucoch jiñi xʼaltʼan jin tsiʼ jacʼbe i tʼan jiñi  xñox i mach jiñic tsaʼ bʌ i yʌlʌ Jehová. Pero la cujil chaʼan maʼañic tsiʼ pʌsʌ i pecʼlel tiʼ tojlel Dios (Miqueas 6:8). Juntiquil am bʌ i pecʼlel yujil chaʼan ti bele ora yom miʼ cʼajtiben i coltaya Jehová. Tsaʼic i pʌsʌ i pecʼlel jiñi xʼaltʼan, i wentʌlel tsiʼ cʼajtibe Jehová mi an chuqui tsiʼ chaʼ alʌ. An i tajol tsʌtsʌch chuqui yom bʌ mi lac ñaʼtan i maʼañic mi lac wen chʼʌmben isujm chuqui yom Jehová chaʼan mi lac mel. Pero mi añʌch lac pecʼlel, mi caj laj cʼajtiben chaʼan miʼ tojʼesañonla i maʼañic mi lac mel mach bʌ weñic.

4. ¿Chuqui mi caj laj qʼuel ti ili temaj?

⁴ Yaʼ ti yambʌ temaj tsaʼ laj cʌñʌ chuquiyes jiñi pecʼlel yicʼot chucoch yomʌch miʼ pʌsob jiñi xñoptʼañob. Pero ¿chuqui yom mi lac mel chaʼan ñumen an lac pecʼlel? ¿Chuqui miʼ mejlel i yʌqʼueñonla lac sʌt lac pecʼlel? Laʼ laj qʼuel uxchajp muʼ bʌ i yʌcʼ ti cʌñol mi añʌch lac pecʼlel o maʼañic (Proverbios 11:2).

5, 6. ¿Bajcheʼ tsiʼ pʌsʌ i pecʼlel Barzilai?

⁵ Jiñʌch bajcheʼ yilal mi lac pʌs cheʼ bʌ an chuqui miʼ qʼuextʌyel ti lac tojlel, mi caj laj cʌcʼ ti cʌñol mi añʌch lac pecʼlel. Miʼ mejlel laj cʌn tiʼ tojlel Barzilai, juntiquil wen xucʼul bʌ i yamigo jiñi rey David. Cheʼ bʌ Barzilai añix 80 i jabilel, David tsiʼ sube chaʼan miʼ chaʼlen eʼtel (troñel) yaʼ tiʼ yotot. Barzilai yujil chaʼan ili jiñʌch wen ñuc bʌ eʼtel. Pero tsiʼ yʌlʌ chaʼan miʼ yochel yambʌ wiñic i cʼabaʼ Quimam (Kimham), tajol juntiquilʌch i yalobil (2 Samuel 19:31-37).

⁶ ¿Chucoch maʼañic tsiʼ jacʼʌ Barzilai? Mach chaʼañic mach yomic eʼtel mi chaʼañic utsʼat yom bajñel chumtʌl. Maʼañic tsiʼ jacʼʌ come tsiʼ pʌsʌ i pecʼlel. Tsiʼ yʌlʌ chaʼan tsaʼix ñoxʼa i tsiʼ yʌlʌ chaʼan mach lajalix miʼ mejlel i mel bajcheʼ ti ñaxan (pejcan Gálatas 6:4, 5). Joñonla cheʼʌch yomonla bajcheʼ Barzilai. La com lac melben i yeʼtel Jehová ti ñumen utsʼat, mach yaʼic mi la cʌcʼ lac ñaʼtʌbal ti chuqui tac la com lac mel mi chaʼañic mi lac lajin lac bʌ yicʼot yañoʼ bʌ. Cheʼ mi lac mel ti utsʼat i yeʼtel Jehová jiñʌch ñumen i cʼʌjñibal bʌ, mach lajalic bajcheʼ yan tac bʌ eʼtel o cheʼ wen cʌmbilonla (Gálatas 5:26). Mi añʌch lac pecʼlel, temel mi caj lac chaʼlen eʼtel la quicʼot la quermañojob chaʼan mi la cʌqʼuen i ñuclel Jehová yicʼot mi laj coltan yambʌlob (1 Corintios 10:31).

7, 8. Mi añʌch lac pecʼlel, ¿bajcheʼ miʼ coltañonla chaʼan maʼañic mi lac bajñel chʼʌm lac bʌ ti ñuc?

⁷ Cheʼ mi lac ñumen aqʼuentel la queʼtel tajol wocolʌch chaʼan mi lac bej pʌs lac pecʼlel. Mi cheʼ bajcheʼ jiñi, miʼ mejlel i coltañonla cheʼ mi laj cʌn tiʼ tojlel Nehemías. Nehemías tsiʼ cʼajtibe i coltaya Jehová cheʼ bʌ tsiʼ yubi chaʼan cabʌl wocol yaʼ ti Jerusalén (Nehemías 1:4, 11). ¿Bajcheʼ tsiʼ jacʼʌ Jehová? Jiñi rey Artajerjes tsiʼ waʼchoco bajcheʼ gobernador jiñi Nehemías yaʼ ti Jerusalén. Anquese Nehemías cabʌl i taqʼuin yicʼot ñucʌch i yeʼtel, tsiʼ chʌn sʌcla i coltʌntel ti Jehová yicʼot tsiʼ wen pejcʌbe i Mandar (Nehemías 8:1, 8, 9). Anquese ñuc i yeʼtel tiʼ tojlel wiñicob maʼañic tsiʼ cʼʌñʌ chaʼan miʼ bajñel taj i wenlel mi chaʼañic miʼ ticʼlan yambʌlob (Nehemías 5:14-19).

⁸ Cheʼ mi la cʌqʼuentel yambʌ eʼtel tac o an chuqui miʼ qʼuextʌyel ti lac tojlel, yom an lac pecʼlel bajcheʼ Nehemías. Ili jiñʌch muʼ bʌ caj i coltañonla chaʼan maʼañic mi  lac ñaʼtan chaʼan wen la cujil. ¿Chuqui miʼ yʌcʼ ti cʌñol juntiquil xñoptʼan chaʼan woliʼ bajñel chʼʌm i bʌ ti ñuc? Jumpʼejl ejemplo, tajol juntiquil anciano maʼañic miʼ ñaxan melben oración Jehová cheʼ an chuqui mi caj i qʼuel ti congregación. O joñonla an chuqui mi lac ñaʼtan lac mel i ti wiʼil mi laj cʼajtiben i bendición Dios. Pero jiñi xñoptʼan am bʌ i pecʼlel maʼañic miʼ bajñel chʼʌm i bʌ ti ñuc anquese mach cojic jaxto woli (choncol) i mel jiñi tsaʼ bʌ i ñaʼta i mel. Miʼ chʌcʌ cʼajtesan chaʼan maʼañic miʼ mejlel i laj i bʌ yicʼot Jehová chaʼan yujil bʌ melol (pejcan Proverbios 3:5, 6). Cabʌl lac piʼʌlob ili ora muʼ bʌ i qʼuelob i bʌ ti ñuc i maʼañix miʼ chʼʌmob ti ñuc yambʌlob. Pero jiñi i wiñicob Jehová mach cheʼobic. La cujil chaʼan jiñi eʼtel muʼ bʌ la cʌqʼuentel mach yomic i yʌl chaʼan ñumen ñuconla bajcheʼ jiñi yambʌ hermanojob mi yaʼic ti lac familia. Laʼ laj qʼuel ti ñuc jiñi la cajñib tiʼ tejclum Dios yicʼot laʼ lac tem chaʼlen eʼtel la quicʼot la quermañojob (1 Timoteo 3:15).

9, 10. Cheʼ bʌ lecoj chuqui miʼ yʌjlel ti lac tojlel, ¿bajcheʼ miʼ coltañonla lac pecʼlel?

⁹ Tajol wen cʼux mi la cubin cheʼ bʌ mach weñic chuqui miʼ yʌjlel ti lac tojlel. Cheʼʌch tsaʼ ujti tiʼ tojlel Ana. Anquese wen cʼuxbibil tiʼ tojlel i ñoxiʼal, tsiʼ yubi i chʼijiyemlel cheʼ maʼañic miʼ mejlel i yʌcʼ i yalobil. Cheʼ jaʼel jiñi yambʌ i yijñam i ñoxiʼal ti bele ora tsiʼ wajle. Ti jumpʼejl bʌ qʼuin, Ana tsaʼ majli ti oración yaʼ ti tabernáculo cheʼ bʌ wen chʼijiyem. Pero jiñi ñuc bʌ motomaj Elí tsiʼ sube chaʼan yʌc come tsiʼ qʼuele chaʼan woli (yʌquel) ti uqʼuel. Cheʼic  yom Ana tsaʼ wen michʼa tiʼ tojlel, pero wen jach tsiʼ jacʼbe. Ti wiʼil tsiʼ mele jumpʼejl oración, baqui tsiʼ pʌsʌ chaʼan miʼ wen ñop Jehová yicʼot mucʼʌch i cʼuxbin (1 Samuel 1:5-7, 12-16; 2:1-10).

¹⁰ Jiñi pecʼlel miʼ coltañonla jaʼel chaʼan maʼañic mi lac jacʼ mulil cheʼ mi lac mel chuqui wen (Romanos 12:21). Ili i pañimil (mulawil) Satanás wen butʼul ti jontolil. Jin chaʼan, mach toj sajtelic lac pusicʼal cheʼ mi lac melbentel mach bʌ weñic. Anquese tajol mucʼʌch i wen michʼesañonla, mach yomic mi la cʌcʼ ti ñuc bajcheʼ yubil mi la cubin (Salmo 37:1). I ñumen tsʌts to mi jiñi lac wocol jiñʌch yicʼot yambʌ hermano ti laj congregación. Miʼ cheʼʌch mi la cujtel, la lac mel bajcheʼ tsiʼ mele Jesús. Jiñi Biblia miʼ yʌl chaʼan Jesús maʼañic tsiʼ chaʼ sutqʼui cheʼ woliʼ pʼajtʌl. Jiñʌch tsiʼ yʌcʼbe «tiʼ wenta jini muʼ bʌ i chaʼlen meloñel ti toj» (1 Pedro 2:23). Jesús tsiʼ pʌsʌ i pecʼlel yicʼot tsiʼ ñopo chaʼan Jehová mi caj i tojʼesan chuqui tac mach bʌ tojic (Romanos 12:19). Joñonla yom mi lac pʌs lac pecʼlel jaʼel i ‹mach yomic mi laj qʼuextan jontolil› (1 Pedro 3:8, 9).

11, 12. a) Cheʼ bʌ an majqui miʼ wen qʼueloñobla ti ñuc, ¿bajcheʼ miʼ mejlel lac chʌn pʌs lac pecʼlel? b) ¿Bajcheʼ yilal mi caj lac xoj lac pislel yicʼot mi caj lac pʌs lac bʌ mi añʌch lac pecʼlel

¹¹ Cheʼ mi laj cʌlʌx qʼuejlel ti ñuc wocolʌch chaʼan mi lac pʌs lac pecʼlel. Cheʼʌch tsaʼ ujti tiʼ tojlel Ester. Jiñʌch juntiquil xʼixic wen i tʼojol jax bʌ yaʼ ti Persia. Jumpʼejl jab tsaʼ wen cʌntʌnti yicʼot tsaʼ aqʼuenti i tsʼʌcal tac chaʼan i yutsʼatlel, lajal bajcheʼ yambʌ xʼixicob tsaʼ bʌ i sʌclayob chaʼan utsʼat miʼ qʼuejlelob tiʼ tojlel jiñi rey. Pero Ester tsaʼ yajcʌnti chaʼan miʼ yochel tiʼ yijñam jiñi rey. Cabʌl chuqui tsaʼ aqʼuenti  Ester, pero maʼañic tsaʼ caji i bajñel ñaʼtan i bʌ. Tsiʼ chʌn pʌsʌ i pecʼlel, i yutslel yicʼot tsiʼ qʼuele ti ñuc yambʌlob (Ester 2:9, 12, 15, 17).

¹² Mi añʌch lac pecʼlel, maʼañic mi caj lac lʌp (xoj) lac pislel muʼ bʌ i pʌs chaʼan mi lac chanʼesan lac bʌ o chaʼan mi laj qʼuejlel ti ñuc. Wen jach muʼ bʌ caj lac xoj yicʼot chuqui mi caj lac mel, come mi laj cʌcʼ ti ñuc yambʌlob yicʼot mi lac pʌs ‹i yutslel yicʼot i ñʌchʼtʌlel lac pusicʼal› (pejcan 1 Pedro 3:3, 4; Jeremías 9:23, 24). Mi maʼañic lac pecʼlel, xucʼu xucʼul mi caj laj cʌcʼ ti cʌjñel ti lac tʼan o ti lac melbal chuqui muʼ bʌ lac ñaʼtan. Jumpʼejl ejemplo, ¿muʼ ba la cʌcʼ ti ñaʼtʌntel chaʼan yom mi laj qʼuejlel ti ñuc chaʼan la queʼtel, chaʼan chuqui la cujil o chaʼan majqui laj cʌñʌyob? ¿O muʼ ba lac sʌclan bajcheʼ miʼ mejlel i ñaʼtañob yambʌlob chaʼan an chuqui ñuc bʌ i cʼʌjñibal tsaʼ lac bajñel mele, anquese añʌch majqui tsiʼ coltayonla? Laʼ lac ñaʼtan tiʼ tojlel Jesús. Cheʼic yom tsiʼ sube yambʌlob tiʼ pejtelel chuqui yujil chaʼan toj sajtelob i pusicʼal. Pero maʼañic tsiʼ mele. Ti bele ora tsiʼ yʌlʌ chuqui tsʼijbubil tiʼ Tʼan Dios come mach jiñic yom chaʼan miʼ qʼuejlel ti ñuc, yom bʌ jiñʌch chaʼan miʼ yʌjqʼuel ti ñuc Jehová (Juan 8:28).

13, 14. ¿Bajcheʼ miʼ coltañonla jiñi lac pecʼlel chaʼan wen chuqui mi lac ñaʼtan lac mel?

¹³ Yomʌch lac pecʼlel jaʼel cheʼ bʌ an chuqui mi lac ñaʼtan lac mel o an chuqui woliʼ ñaʼtʌntel ti lac tojlel. Cheʼ bʌ jiñi apóstol Pablo majlel mucʼ ti Jerusalén chaʼan miʼ tsʼʌctesan jumpʼejl eʼtel tsaʼ bʌ i yʌqʼue Jehová, tsaʼ cʌyle chaʼpʼejl uxpʼejl qʼuin yaʼ ti Cesarea. Pero juntiquil xʼaltʼan i cʼabaʼ Ágabo tsiʼ sube Pablo chaʼan mi caj i chujquel mi tsaʼ majli ti Jerusalén, i tajol muʼto i tsʌnsʌntel. Anquese jiñi hermanojob tsiʼ wersa subeyob Pablo chaʼan maʼañic miʼ majlel, tsaʼʌch majli. Pablo maʼañic tsaʼ majli ti Jerusalén tiʼ caj miʼ bajñel qʼuel i bʌ ti ñuc. An i pecʼlel yicʼot tsiʼ wen ñopo Jehová. Jiñi hermanojob tsaʼʌch i pʌsʌyob i pecʼlel. Jin chaʼan tsaʼʌch i cʌyʌyob majlel Pablo (Hechos 21:10-14).

¹⁴ Anquese mach la cujilic o maʼañic ti laj cʼʌb tiʼ pejtelel chuqui miʼ mejlel ti ujtel, mi añʌch lac pecʼlel wen muʼ bʌ caj lac ñaʼtan lac mel. Jumpʼejl ejemplo, tajol woli lac ñaʼtan lac melben i yeʼtel Dios tiʼ pejtelel ora. Pero mi tsaʼ cʼamʼayonla o miʼ cʼamʼan lac tat lac ñaʼ tajol mi laj cʼajtiben lac bʌ chuqui mi caj lac mel. Tajol mi lac wen ñaʼtan jeʼel bajcheʼ mi caj lac mel cheʼ bʌ ñoxoñixla. Tiʼ pejtelel iliyi maʼañic miʼ mejlel lac luʼ ñaʼtan anquese mi lac mel oración yicʼot mi lac wen cʼojoʼtan (Eclesiastés 8:16, 17). Mi añʌch lac pecʼlel mi caj lac ñop Jehová, mi caj lac ñaʼtan chaʼan an jach baqui jaxʌlonla, mi caj lac wen ñaʼtan bajcheʼ añonla yicʼot mi caj laj cʼajtin laj coltʌntel. Pero ñumen mi caj laj cʼajtiben Jehová chaʼan miʼ tojʼesañonla. Ti wiʼil mi lac jacʼ bajcheʼ miʼ tojʼesañonla majlel jiñi espíritu (pejcan Eclesiastés 11:4-6). Cheʼ bʌ wen chuqui mi lac ñaʼtan lac mel, Jehová miʼ yʌqʼueñonla i bendición o miʼ mejlel i coltañonla laj qʼuextan bajcheʼ mi lac ñaʼtan (Proverbios 16:3, 9).

15. ¿Bajcheʼ miʼ coltañonla lac chʌn pʌs lac pecʼlel cheʼ mi lac wen ñaʼtan Jehová?

¹⁵ Laʼ laj qʼuel chʌnchajp yom bʌ mi lac mel chaʼan bajcheʼ miʼ mejlel lac ñumen pʌs  lac pecʼlel. Ñaxam bʌ, yom mi lac wen ñaʼtan Jehová. Laʼ lac ñaʼtʌben i ñuclel yicʼot i ñaʼtʌbal. Cheʼ mi lac lajin lac bʌ yicʼot Jehová, mi laj cʌn chaʼan wen chʼoʼchʼoconla (chutonla) i maʼañic chuqui wen la cujil (Isaías 8:13). Laʼ laj cʼajtesan chaʼan chumulonla cheʼ bajcheʼ yom jiñi Dios mach bʌ añic i pʼisol i pʼʌtʌlel, mach cheʼic bajcheʼ yom juntiquil ángel o juntiquil quixtañu. Cheʼ mi lac wen ñaʼtan ili tac mi caj i coltañonla lac pʌs lac pecʼlel yicʼot chaʼan mi laj cʌn i ñuclel Dios (1 Pedro 5:6).

16. ¿Bajcheʼ miʼ coltañonla lac pʌs lac pecʼlel cheʼ mi lac wen ñaʼtʌben i cʼuxbiya Dios?

¹⁶ I chaʼchajplel yom bʌ mi lac mel chaʼan mi lac taj lac pecʼlel jiñʌch mi lac wen ñaʼtan bajcheʼ cʼamel miʼ cʼuxbiñonla Jehová. Pablo tsiʼ yʌlʌ chaʼan jiñi hermanojob lajalobʌch bajcheʼ jujunchajp chucul tac bʌ ti lac bʌcʼtal. Jehová tsiʼ yʌqʼue i cʼʌjñibal ti jujunchajp chuqui an ti lac bʌcʼtal (1 Corintios 12:23, 24). Jehová miʼ wen qʼuelonla ti ñuc ti jujuntiquil come miʼ wen cʼuxbiñonla. Mach yʌlʌlic baqui woli lac melben i yeʼtel, maʼañic miʼ lajiñonla yicʼot yambʌlob mi muqʼuic i cʌyonla cheʼ mi lac mel mach bʌ weñic. Tijicña mi la cubin cheʼ la cujil chaʼan miʼ cʼuxbiñonla Jehová.

17. ¿Chucoch miʼ coltañonla cheʼ mi laj qʼuel chuqui wem bʌ tiʼ tojlel yambʌlob?

¹⁷ I yuxchajplel yom bʌ mi lac mel chaʼan mi la pʌs lac pecʼlel jiñʌch cheʼ mi laj qʼuel chuqui wem bʌ tiʼ tojlel yambʌlob, cheʼ bajcheʼ miʼ mel Jehová. ¿Chucoch miʼ coltañonla cheʼ mi lac mel? Come mi caj laj cʼajtibeñob ticʼojel yicʼot mi caj lac jacʼ bajcheʼ miʼ ñaʼtañob, mach lac bajñelic mi caj laj qʼuel lac bʌ ti ñuc mi muqʼuic jach caj lac chaʼlen xicʼoñel (Proverbios 13:10). Cheʼ mi laj qʼuel chuqui wen tiʼ tojlel yambʌlob, tijicña mi caj la cubin cheʼ miʼ yʌqʼuentelob tsijib eʼtel. Mi caj la cʌqʼuen wocolix i yʌlʌ Jehová jaʼel cheʼ miʼ yʌcʼonla ti eʼtel temel la quicʼot yambʌ hermanojob (1 Pedro 5:9).

18. ¿Bajcheʼ miʼ mejlel laj cʌntesan laj conciencia chaʼan mi lac taj lac pecʼlel?

¹⁸ I chʌnchajplel yom bʌ mi lac mel jiñʌch cheʼ mi laj cʌntesan laj conciencia ti jiñi principio tac am bʌ ti Biblia. Jiñi principio tac miʼ cʌntesañonla chuqui miʼ ñaʼtan Jehová yicʼot bajcheʼ yubil miʼ yubin. Mi lajalʌch mi lac ñaʼtan bajcheʼ miʼ ñaʼtan Jehová, wen chuqui mi caj lac yajcan lac mel. Mi mucʼʌch lac pejcan i Tʼan, mi lac mel oración yicʼot mi lac jacʼ bajcheʼ woli laj cʌn, mi caj i pʼʌtʼan laj conciencia yicʼot ñaxan ñuc mi caj laj cʌcʼ yambʌlob (1 Timoteo 1:5). Mi cheʼʌch mi lac mel, Jehová miʼ yʌcʼ i tʼan chaʼan mi caj i coltañonla ti ñumen weñʼan bajcheʼ xñoptʼan i mi lac ñumen pʌs lac pecʼlel (1 Pedro 5:10).

19. ¿Chuqui mi caj i coltañonla lac pʌs lac pecʼlel ili ora yicʼot ti talto bʌ qʼuin?

¹⁹ ¿Cʼajal ba a chaʼan jiñi xʼaltʼan chʼoyol bʌ ti Judá tsaʼ bʌ la cʌlʌ tiʼ tejchibal? Jiñi xʼaltʼan tsaʼ chʌmi (sajti) yicʼot tsiʼ cʌyʌ Jehová come maʼañic tsiʼ pʌsʌ i pecʼlel. Pero cheʼ mi lac wen qʼuel tiʼ tojlel yambʌ i wiñicob Jehová xucʼul bʌ tsaʼ ajñiyob miʼ coltañonla laj cʌn chaʼan mucʼʌch i mejlel lac chʌn pʌs lac pecʼlel anquese wocolʌch. Mi añix ora cajel lac melben i yeʼtel Jehová ñumen yom mi lac ñop Jehová (Proverbios 8:13). Anquese chuqui tac jach mi lac ñusan, mucʼʌch i mejlel lac jacʼben i tʼan Jehová. Iliyi jiñʌch ñuc bʌ lac majtan. Jin chaʼan, laʼ lac chaʼlen wersa lac mel cheʼ bajcheʼ tsaʼ laj cʌñʌ ti ili temaj. Cheʼʌch mi caj lac pʌs lac pecʼlel yicʼot ti bele ora mi caj lac chumtʌl cheʼ bajcheʼ yom Jehová.