1-3. Wetin wan prɔfɛt we kɔmɔt na Juda nɔ bin du? Wetin bin apin to am? (Luk di pikchɔ nia dis atikul in taytul.)

KIŊ JƐROBOAM we bin de na Izrɛl bin bil wan ɔlta fɔ wɔship lay lay gɔd na wan tɔŋ we dɛn kɔl Bɛthɛl. Jiova sɛn wan prɔfɛt we kɔmɔt Juda fɔ go gi Jɛroboam wan mɛsej. Na bin jɔjmɛnt mɛsej. Di prɔfɛt bin ɔmbul, so i obe Jiova ɛn go gi di mɛsej. Di kiŋ bin vɛks pan di prɔfɛt, bɔt Jiova bin protɛkt di prɔfɛt.—Fɔs Kiŋ 13:1-10.

² Jiova bin dɔn tɛl di prɔfɛt se i nɔ fɔ it ɔ drink na Izrɛl, ɛn i fɔ yuz ɔda rod fɔ go na in os. We di prɔfɛt bin de na rod fɔ go bak na in os, i mit wan pa we lay to am se i gɛt mɛsej we kɔmɔt frɔm Jiova. Di pa invayt di prɔfɛt na in os fɔ go it ɛn drink. Di prɔfɛt nɔ bin obe Jiova, so i go wit di pa na in os. Jiova nɔ bin gladi. So we di prɔfɛt bin de go bak na in os, wan layɔn kech am ɛn kil am.—Fɔs Kiŋ 13:11-24.

³ Wi nɔ no wetin mek di prɔfɛt bin disayd fɔ lisin to di pa, ɛn nɔ lisin to Jiova. Bɔt wi no se i nɔ kɔntinyu fɔ ‘put insɛf dɔŋ fɔ du wetin Jiova want.’ (Rid Mayka 6:8.) Insay di Baybul, pɔsin we de du wetin Jiova want, na pɔsin we abop  pan Jiova, i biliv se i go gayd am, ɛn i de obe am. Pɔsin we no se nɔto ɔltin i ebul fɔ du no se i nid fɔ pre ɔl di tɛm. If da prɔfɛt bin no se nɔto ɔltin i ebul fɔ du, i fɔ dɔn aks Jiova if i dɔn chenj wetin i bin tɛl am. Sɔntɛnde wisɛf go nid fɔ disayd fɔ du sɔntin we wi nɔ shɔ, ɛn wi nɔ no klia wan wetin Jiova want wi fɔ du. Bɔt if wi no se nɔto ɔltin wi ebul fɔ du, wi go aks Jiova fɔ lɛ i gayd wi so dat wi nɔ go mek siriɔs mistek dɛn.

4. Wetin wi go lan insay dis atikul?

⁴ Insay di atikul we de bifo dis wan ya, wi bin lan wetin i min fɔ bi pɔsin we no se nɔto ɔltin i ebul fɔ du, ɛn wetin mek dis impɔtant fɔ wi tide. Bɔt aw wi go bi pɔsin we rili no se nɔto ɔltin i ebul fɔ du? Ɛn uskayn tin we go tɛst wi fɔ no if wi na pɔsin we rili no se nɔto ɔltin i ebul fɔ du? Lɛ wi tɔk bɔt tri tin dɛn.—Prɔvabs 11:2.

5, 6. Aw Bazilay bin sho se in na pɔsin we no se nɔto ɔltin i ebul fɔ du?

⁵ We di wok we wi de du chenj ɔ di tin dɛn we de apin to wi chenj, di we aw wi biev go sho if wi rili no se nɔto ɔltin wi ebul fɔ du. Wi go lan frɔm Bazilay in ɛgzampul. Na bin Kiŋ Devid in tru tru padi. We Bazilay bin ol 80 ia, Devid bin kɔl am fɔ go liv na in pales. Pan ɔl we na bin big big ɔnɔ, Bazilay bin se i go bɛtɛ fɔ lɛ wan man we nem Kimam go wit di Kiŋ. Sɔntɛm na bin in pikin.—Sɛkɛn Samiɛl 19:31-37.

⁶ Wetin mek Bazilay nɔ bin gri fɔ go? Fɔ se na di wok i nɔ bin want ɔ i bin jɔs want fɔ ɛnjɔy simpul layf? Nɔ, na bikɔs Bazilay na pɔsin we no se nɔto ɔltin i ebul fɔ du. I no se sɔm tin dɛn dɔn chenj na in layf, ɛn i gri se nɔto ɔltin i ebul fɔ du. (Rid Lɛta Fɔ Galeshya 6:4, 5.) Jɔs lɛk Bazilay, wi nid fɔ no se nɔto ɔltin wi ebul fɔ du. Bifo wi pe atɛnshɔn pan di tin dɛn we wi want ɔ kɔmpia wisɛf to ɔda pipul dɛn, wi fɔ de tink bɔt aw wi go gi Jiova wi bɛst. Dis impɔtant mɔ pas fɔ gɛt spɛshal wok ɔ fɔ mek ɔlman no wi. (Lɛta Fɔ Galeshya 5:26) If wi no se nɔto ɔltin wi ebul fɔ du, wi go ebul fɔ wok togɛda wit wi brɔda dɛn fɔ ɔnɔ Jiova ɛn ɛp ɔda pipul dɛn.—Fɔs Lɛta Fɔ Kɔrint 10:31.

7, 8. If wi bi pɔsin we no se nɔto ɔltin i ebul fɔ du, aw dat go ɛp wi lɛ wi nɔ abop pan wisɛf?

⁷ I kin tranga fɔ kɔntinyu fɔ bi pɔsin we no se nɔto ɔltin i ebul fɔ du we dɛn gi wi mɔ wok fɔ du ɔ pawa. Wi go lan frɔm Nɛimaya in ɛgzampul. We Nɛimaya bin yɛri se di pipul dɛn na Jerusɛlɛm dɔn gɛt bɔku prɔblɛm dɛn, i bin beg Jiova fɔ lɛ i ɛp dɛn. (Nɛimaya 1:4, 11) Jiova bin ansa Nɛimaya in prea. Kiŋ Atazakzis bin mek Nɛimaya gɔvnɔ na di eria. Pan ɔl we Nɛimaya bin kam gɛt pawa ɛn jɛntri, i nɔ bin ɛva abop pan insɛf. I bin abop pan Jiova fɔ lɛ i sho am wetin fɔ du, ɛn i bin de rid Gɔd in Lɔ ɔltɛm. (Nɛimaya 8:1, 8, 9) Nɛimaya bin gɛt pawa pas bɔku pipul dɛn. Bɔt i nɔ ɛva yuz da pawa de fɔ bɛnifit insɛf ɔ fɔ trit ɔda pipul dɛn bad.—Nɛimaya 5:14-19.

⁸ Jɔs lɛk Nɛimaya, if wi gɛt mɔ wok ɔ dɛn chenj di wok we wi de du, wi want fɔ mek shɔ se wi kɔntinyu fɔ bi pɔsin we no se nɔto ɔltin i ebul fɔ du. Wi nɔ want fɔ abop pan di tin dɛn we wi sabi du ɔ di tin dɛn we wi dɔn du. Aw pɔsin go bigin fɔ abop pan insɛf? Fɔ ɛgzampul, wan  ɛlda go du wok na di kɔngrigeshɔn we i nɔ ivin pre fɔs. Ɔ wan brɔda ɔ sista go disayd fɔ du sɔntin fɔs, dɔn afta, i go pre to Jiova fɔ lɛ i blɛs wetin i dɔn disayd fɔ du. Bɔt pɔsin we no se nɔto ɔltin i ebul fɔ du nɔ de abop pan insɛf, ivin we i de du sɔntin we i bin dɔn du bɔku tɛm. I kin mɛmba ɔltɛm se i nɔ go kɔmpia di tin dɛn we i sabi du to di tin dɛn we Jiova de du. (Rid Prɔvabs 3:5, 6.) Insay di wɔl tide, bɔku pipul dɛn de tink bɔt dɛnsɛf nɔmɔ, ɛn dɛn de tray fɔ de bifo ɔda pipul dɛn. Bɔt Jiova in pipul dɛn nɔ de lɛk dat. Wi nɔ de tink se na we wi gɛt bɔku wok, na in de mek wi bɛtɛ pas ɔda pipul dɛn na wi famili ɔ na di kɔngrigeshɔn. Bifo dat, wi fɔ de mɛmba di pat we wi de ple na Gɔd in arenjmɛnt ɛn wok wit wi brɔda ɛn sista dɛn.—Fɔs Lɛta To Timoti 3:15.

9, 10. We wi no se nɔto ɔltin wi ebul fɔ du, aw dat go ɛp wi we dɛn de fɛn fɔlt pan wi fɔ natin?

⁹ Wi kin fil bad we pɔsin de fɛn fɔlt pan wi we wi nɔ du natin. Na dis bin apin to Ana. Pan ɔl we Ana in man bin lɛk am pasmak, i nɔ bin stil gladi. Pɛnina, we na in met, bin de provok am ɔltɛm. Ana bin want fɔ bɔn pikin, bɔt i nɔ bin ebul. Wan de Ana bin rili de fil bad, so i go na di tabanakul fɔ go pre. We di Ay Prist, we nem Ilay, si Ana de kray, i lay pan am se  Ana dɔn chak! Ana fɔ bin dɔn vɛks bad bad wan. Bɔt bifo dat, i tɔk to Ilay wit rɛspɛkt. Leta, Ana pre wan prea we sho se i gɛt fet pan Jiova ɛn i lɛk am.—Fɔs Samiɛl 1:5-7, 12-16; 2:1-10.

¹⁰ We wi no se nɔto ɔltin wi ebul fɔ du, dat go ɛp wi fɔ ‘du gud to ɛnibɔdi we du wi bad.’ (Lɛta Fɔ Rom 12:21) Setan in wɔl ful-ɔp wit bad bad tin dɛn. So wi nɔ fɔ sɔprayz if pipul dɛn nɔ trit wi fayn. Pan ɔl we dis go mek wi want fɔ vɛks, wi fɔ tray tranga wan nɔ fɔ vɛks. (Sam 37:1) I nɔ kin rili izi we wi gɛt prɔblɛm dɛn wit wi brɔda ɛn sista dɛn na di kɔngrigeshɔn. If dat apin, wi fɔ falamakata Jizɔs. Di Baybul se: “Wɛn pɔsin tɛl am wɔd we go at am, i nɔba tɛl dɛn wɔd we go at dɛn bak.” Bifo dat, “i kin lɛf in kes na Gɔd an, bikɔs na Gɔd de jɔj tret wan.” (Pita In Fɔs Lɛta 2:23) Jizɔs bin ɔmbul, ɛn i no se Jiova go kɔrɛkt ɛnitin we nɔ rayt. (Lɛta Fɔ Rom 12:19) Wisɛf fɔ ɔmbul, ɛn wi “nɔ fɔ tɔn am gi.”—Pita In Fɔs Lɛta 3:8, 9.

11, 12. (a) Aw wi go kɔntinyu fɔ bi pɔsin we no se nɔto ɔltin i ebul fɔ du we pipul dɛn prez wi ɔ tɛl wi sɔntin we de mek wi ed big? (b) Aw di we we wi de drɛs ɛn biev de sho se wi no se nɔto ɔltin wi ebul fɔ du?

¹¹ I nɔ kin izi fɔ bi pɔsin we no se nɔto ɔltin i ebul fɔ du we dɛn prez wi ɔ tɛl wi sɔntin we de mek wi ed big. Dɛn bin de prez Ɛsta pasmak ɛn tɛl am sɔntin dɛn we kin mek pɔsin in ed big. In na bin  wan pan di uman dɛn we fayn pas ɔlman na Pashia. Fɔ wan ia, dɛn bin de rɔb spɛshal tin dɛn na in bɔdi so dat i go frɛsh ɛn fayn mɔ. Bɔt nɔto in nɔmɔ dɛn bin de du dis to. Dɛn bin de du am bak to bɔku yɔŋ uman dɛn we bin de tray fɔ lɛ di kiŋ notis dɛn. Dɔn di kiŋ bin gɛt fɔ pik Ɛsta fɔ bi in kwin. Bɔt ɔl dis nɔ bin mek i chenj. Ɛsta nɔ bin bigin tink bɔt insɛf nɔmɔ. Bifo dat, i bin kɔntinyu fɔ bi pɔsin we no se nɔto ɔltin i ebul fɔ du, i bin gud, ɛn gɛt rɛspɛkt.—Ɛsta 2:9, 12, 15, 17.

¹² If wi no se nɔto ɔltin wi ebul fɔ du, di we aw wi de drɛs ɛn biev go sho se wi rɛspɛkt ɔda pipul dɛn ɛn wi rɛspɛkt wisɛf. Wi nɔ go de bost ɔ tray fɔ blɔf pipul dɛn, bifo dat, wi go tray fɔ “de tɔk ɛn du tin saful saful.” (Rid Pita In Fɔs Lɛta 3:3, 4; Jɛrimaya 9:23, 24) As tɛm de go, di we aw wi de tɔk ɛn du tin go sho aw wi de fil bɔt wisɛf. Fɔ ɛgzampul, sɔntɛm wi go de tray fɔ mek ɔda pipul dɛn fil se wi spɛshal bikɔs wi fil se wi de du impɔtant wok, wi sabi bɔku tin, ɔ wi no pipul dɛn we impɔtant. Ɔ sɔntɛm wi de tray fɔ mek lɛk se na wi wangren du wan impɔtant wok, we i bi se ɔda pipul dɛn bin ɛp wi. I go fayn lɛ wi tink bɔt Jizɔs. I bin fɔ dɔn blɔf pipul dɛn wit di kayn sɛns we i gɛt. Bɔt i nɔ bin du dat, bifo dat, i bin de kot Gɔd in Wɔd bɔku tɛm. I nɔ bin want lɛ pipul dɛn prez am. I bin want lɛ pipul dɛn prez Jiova.—Jɔn 8:28.

13, 14. If wi no se nɔto ɔltin wi ebul fɔ du, aw dat go ɛp wi fɔ disayd fɔ du di rayt tin?

¹³ Wi fɔ no se nɔto ɔltin wi ebul fɔ du we wi de disayd fɔ du sɔntin ɔ we ɔda pipul dɛn disayd fɔ du sɔntin we go afɛkt wi. We di apɔsul Pɔl bin de na Sizaria, i bin want fɔ go na Jerusɛlɛm fɔ go dɔn di wok we Jiova bin gi am. Bɔt wan prɔfɛt we nem Agabɔs bin tɛl am se if i go, dɛn go kech am. Dɛn go ivin kil am. Di brɔda dɛn bin beg Pɔl fɔ mek i nɔ go. Bɔt Pɔl bin disayd fɔ go na Jerusɛlɛm. Yu tink se na bikɔs i bin abop pan insɛf? Nɔ, Pɔl bin no se nɔto ɔltin i ebul fɔ du, ɛn i bin rili de abop pan Jiova. Di brɔda dɛnsɛf bin no se nɔto ɔltin dɛn ebul fɔ du. So dɛn bin sɔpɔt Pɔl we i bin disayd fɔ go.—Di Apɔsul Dɛn Wok [Akt] 21:10-14.

¹⁴ If wi no se nɔto ɔltin wi ebul fɔ du, dat go ɛp wi fɔ disayd fɔ du di rayt tin, ivin we wi nɔ no aw sɔntin go bi ɔ we wi nɔ ebul mek ɔltin bi aw wi want. Fɔ ɛgzampul, sɔntɛm wi go want fɔ bigin fɔ yuz ɔl wi tɛm fɔ sav Jiova. Bɔt wetin go apin if wi sik? Wetin go apin if wi mama ɛn papa sik ɛn dɛn nid pɔsin fɔ ɛp dɛn? Wetin go apin we wi ol? Wi nɔ go ebul ansa ɔl dɛn kwɛstyɔn ya, ilɛksɛf wi pre ɛn tink bɔt dɛn. (Ɛkliziastis 8:16, 17) Bɔt if wi abop pan Jiova, wi go gri se nɔto ɔltin wi ebul fɔ du. Wi go luk di tin dɛn we de apin, aks pɔsin fɔ advays wi ɛn, di tin we impɔtant pas ɔl na dat wi go pre to Jiova fɔ lɛ i sho wi wetin fɔ du. Dɔn wi fɔ du wetin Jiova in spirit want lɛ wi du. (Rid Ɛkliziastis 11:4-6.) Jiova kin blɛs wetin wi dɔn disayd fɔ du, ɔ i kin ɛp wi fɔ chenj di tin dɛn we wi dɔn plan fɔ du.—Prɔvabs 16:3, 9.

15. We wi tink gud wan bɔt Jiova, aw dat go ɛp wi fɔ kɔntinyu fɔ ɔmbul?

¹⁵ Aw wi go bi pɔsin we rili no se nɔto ɔltin i ebul fɔ du? Wi go tɔk bɔt 4 tin dɛn we go ɛp wi. Fɔs, wi nid fɔ tink gud wan bɔt Jiova, wi fɔ tink bɔt di kayn Gɔd we i bi. We wi kɔmpia wisɛf to Jiova, wi go si se wi rili smɔl ɛn wi nɔ sabi bɛtɛ tin atɔl. (Ayzaya 8:13) Wi fɔ mɛmba se na di Gɔd we gɛt pawa pas ɔlman wi de sav nɔto mɔtalman ɔ enjɛl. We wi tink bɔt dis, dat go ɛp wi fɔ ɔmbul wisɛf “ɔnda Gɔd in pawaful an.”—Pita In Fɔs Lɛta 5:6, NW.

16. We wi tink gud wan bɔt aw Gɔd lɛk wi, aw dat go ɛp wi fɔ no se nɔto ɔltin wi ebul fɔ du?

¹⁶ Di sɛkɔn tin we go ɛp wi fɔ rili no se nɔto ɔltin wi ebul fɔ du na we wi tink gud wan bɔt aw Jiova dɔn sho se i lɛk wi. Pɔl bin kɔmpia di kɔngrigeshɔn to mɔtalman bɔdi. Ɔl di pat dɛn we Jiova mek na wi bɔdi impɔtant. (Fɔs Lɛta Fɔ Kɔrint 12:23, 24) Semweso, wi ɔl impɔtant na Jiova in yay. I nɔ de kɔmpia wi wit ɔda pipul dɛn, ɛn i nɔ de lɛf fɔ lɛk wi we wi mek mistek. Wi kin fil fayn we wi no se Jiova lɛk wi.

17. Us bɛnifit wi go gɛt we wi luk fɔ di gud tin dɛn we ɔda pipul dɛn de du?

¹⁷ Di tɔd tin we go ɛp wi fɔ rili no se nɔto ɔltin wi ebul fɔ du na we wi luk fɔ di gud tin dɛn we ɔda pipul dɛn de du, jɔs lɛk Jiova. Wi nɔ fɔ tray fɔ mek pipul dɛn de pe atɛnshɔn to wi ɔltɛm ɔ tɛl ɔda pipul dɛn wetin dɛn fɔ du ɔltɛm. Bifo dat, wi fɔ aks dɛn fɔ lɛ dɛn advays wi, ɛn wi fɔ gri fɔ tek wetin dɛn se. (Prɔvabs 13:10) Wi kin gladi fɔ wi brɔda ɛn sista dɛn we dɛn gi dɛn spɛshal wok fɔ du. Ɛn wi kin tɛl Jiova tɛnki we i alaw wi ɔl fɔ sav am.—Pita In Fɔs Lɛta 5:9.

18. We wi tren wi kɔnshɛns, aw dat go ɛp wi fɔ rili no se nɔto ɔltin wi ebul fɔ du?

¹⁸ Di nɔmba 4 tin we go ɛp wi fɔ rili no se nɔto ɔltin wi ebul fɔ du na we wi yuz di advays dɛn we de na di Baybul fɔ tren wi kɔnshɛns. Dɛn advays ya go sho wi aw Jiova de fil ɛn tink. We wi lan fɔ si tin di we aw Jiova de si am, wi go disayd fɔ du sɔntin we go mek Gɔd gladi. We wi de stɔdi, pre, ɛn du wetin wi de lan, na di mɔ wi go gɛt gud kɔnshɛns. (Fɔs Lɛta To Timoti 1:5) Wi go lan fɔ put ɔda pipul dɛn bifo. If wi du dɛn tin ya, Jiova prɔmis se i go dɔn fɔ tren wi, we min se i go ivin ɛp wi fɔ rili no se nɔto ɔltin wi ebul fɔ du.—Pita In Fɔs Lɛta 5:10, NW.

19. Wetin go ɛp wi fɔ kɔntinyu fɔ sho se wi na pɔsin we no se nɔto ɔltin wi ebul fɔ du?

¹⁹ Yu mɛmba di prɔfɛt we bin kɔmɔt Juda, we wi tɔk bɔt na dis atikul in biginin? I bin day ɛn in nɔto bin Jiova in padi igen. Wetin mek? Na bikɔs i nɔ bin kɔntinyu fɔ bi pɔsin we no se nɔto ɔltin i ebul fɔ du. Bɔt wi go kɔntinyu fɔ bi pɔsin we no se nɔto ɔltin i ebul fɔ du, pan ɔl we i nɔ go izi fɔ du. Di tin dɛn we bɔku pipul dɛn we fetful to Jiova dɔn du, sho se dat pɔsibul. Di mɔ we wi dɔn sav Jiova fɔ lɔng tɛm, na di mɔ wi fɔ abop pan am. (Prɔvabs 8:13) Ilɛk uskayn prɔblɛm de mit wi na layf, wi kin stil ebul fɔ du wetin Jiova want. Dis ɔnɔ pas ɛni ɔda ɔnɔ we wi go ɛva gɛt. So lɛ wi du ɔltin we wi ebul fɔ du fɔ sho se wi no se nɔto ɔltin wi ebul fɔ du ɛn du wetin Jiova want sote go.