1-3. Hadia zi lö ifalua zi samösa sama’ele’ö moroi ba Yahudi, ba hadia lua-luania? (Faigi gambara ba wamobörö wamaha’ö.)

RAZO YEROBEAMO moroi ba Gizara’eli ifazökhi nahia wame’e sumange ba mbanua Mbetieli. Ifalua da’a ba wame’e sumange khö mba’ali. Andrö wa ifatenge samösa sama’ele’önia Yehowa moroi ba Yahudi ba wangombakha fanguhuku khö Yerobeamo. Sama’ele’ö si so fangide-ngide’ö andre, i’o’ö ba ifa’ema duria niwa’ö Yehowa. Mofönu sibai razo khönia, hiza’i ilumö’ö ia Yehowa.—I Razo 13:1-10.

² Iwa’ö Yehowa khö zama’ele’ö andrö wa tebai manga mazui mamadu idanö ia ba danö Gizara’eli, ba na mangawuli ia tebai itörö lala nitörönia mege me tohare ia. Hiza’i, me mangawuli ia, falukha ia khö zi samösa ira matua si no numalö ndröfi. Ilimo ia niha si no numalö ndröfi andrö me iwa’ö wa no muhede khönia Yehowa ba wogaoni sama’ele’ö andrö ena’ö möi ia manga ba mamadu idanö ba nomonia. Lö i’o’ö niwa’ö Yehowa sama’ele’ö andrö. Fao ia khö ndra matua si no alawa ndröfi. Lö omasi Yehowa ba nifaluania. Me mangawuli  ia, tohare sageu zingo i’a zama’ele’ö andrö.—I Razo 13:11-24.

³ Lö ta’ila sibai hana wa abölö ifondro-ndrongo niwa’ö ndra matua si no alawa ndröfi andrö moroi ba niwa’ö Yehowa. Hiza’i, oroma wa ”fayawa” ia ba wanörö lala andrö khö Yehowa. (Baso Mikha 6:8.) Ba Zura Ni’amoni’ö, manörö lala Yehowa eluahania faduhu dödönia khö Yehowa, i’odaligö wanuturu lala nibe’enia, ba i’o’ö hadia niwa’ö Yehowa. Niha si so fangide-ngide’ö i’ila wa lö aetu moguna mangandrö ia khö Yehowa. Na so wangide-ngide’ö khö zama’ele’ö andrö, isofu ua sakali khö Yehowa hadia no tebulö wanuturu lala nibe’enia. Itaria, abua khöda wangai angetula hegöi ba wotatugöi hadia ni’andrö Yehowa khöda. Hiza’i, na so khöda wangide-ngide’ö, ta’andrö wanuturu lala moroi khö Yehowa ena’ö tola tatimbagö ba wamalua sala sebua.

4. Hadia nitutunöda ba wamaha’ö andre?

⁴ Ba wamaha’ö migu silalö, no ta’ila hadia geluaha wangide-ngide’ö ba hadia mbörö wa moguna sibai ta’okhögö da’ö iada’a. Hiza’i, hewisa ena’ö tola so khöda wangide-ngide’ö? Hadia manö zalua irege tola abua khöda ba wangoroma’ö fangide-ngide’ö? Iada’a, tatutunö tölu ngawalö zalua si tobali dani irege abua khöda wangoroma’ö fangide-ngide’ö.—Gamaedola 11:2.

5, 6. Hewisa wangoroma’ö Barasilai wa so khönia wangide-ngide’ö?

⁵ Hadia nifaluada ba ginötö tatema halöwö si bohou mazui ba ginötö tebulö halöwöda, da’ö zangoroma’ö hadia sindruhu-ndruhu so khöda wangide-ngide’ö. Tola tahalö wamaha’ö moroi ba duma-duma Mbarasilai, niha si fahuwu ba si lö faröi khö Razo Dawido. Me no 80 fakhe sa’ae ndröfinia, ikaoni ia Dawido ena’ö toröi ia ba nomo razo. Hewa’ae no töi sebua da’ö, hiza’i iwa’ö Barasilai wa abölö sökhi na labe’e halöwö da’ö khö Kimihami. Te ononia Kimihami andrö.—II Zamueli 19:31-37.

⁶ Hana wa lö itema’ö wogaoni da’ö Barasilai? Hadia ena’ö tola lö mohalöwö ia mazui ena’ö lö i’abusi tödö wa’aurinia? Tenga. Ifalua da’ö Barasilai börö me so khönia wangide-ngide’ö. I’ila wa no tebulö zalua khönia, ba itema’ö wa so zi tebai ifalua sa’ae börö me no alawa ndröfinia. (Baso Galatia 6:4, 5.) Simane Barasilai, moguna göi so khöda wangide-ngide’ö. Moroi na ta’osambua’ö dödöda ba zomasi ita mazui tafaehu-faehusi ita ba niha bö’ö, abölö baga na ta’osambua’ö dödöda ba wame’e zabölö sökhi khö Yehowa. Abölö moguna da’a moroi na tasöndra halöwö sebua mazui ena’ö tehöngö ita. (Galatia 5:26) Na so khöda wangide-ngide’ö, falulu fohalöwö ita khö ndra talifusöda ba wamosumange Yehowa hegöi ba wanolo niha bö’ö.—I Korindro 10:31.

7, 8. Hewisa wa tola itolo ita fangide-ngide’ö ena’ö böi ta’odaligö ita samösa?

⁷ Tola manö abua wangoroma’ö fangide-ngide’ö ba ginötö oya halöwö nitemada. Hiza’i, tola tahalö wamaha’ö moroi ba duma-duma Nehemia. Ba ginötö irongo Nehemia wa oya gabula dödö nitaögö niha si toröi ba Yeruzalema, ilau mangandrö ena’ö itolo ira Yehowa. (Nehemia 1:4, 11) Itema Yehowa wangandrö Nehemia. Ifili ia Razo Aretazasa tobali gumandru ba Yeruzalema. Hewa’ae so khö Nehemia kuaso hegöi harato sebua, lö irai i’odaligö ia samösa. I’andrö mene-mene moroi khö Yehowa ba ero ma’ökhö ibaso Goroisa  Lowalangi. (Nehemia 8:1, 8, 9) Sindruhunia, tola ifatörö niha ba zomasi dödönia. Hiza’i, lö i’oguna’ö kuasonia ba wamalua soguna khönia samösa mazui ba wamalua si lö sökhi.—Nehemia 5:14-19.

⁸ Simane Nehemia, hewa’ae oya halöwö nitemada mazui na tebulö lala halöwöda, moguna so khöda wangide-ngide’ö. Lö omasi ita ta’odaligö wa’abölöda mazui si no irai tatörö. Hewisa wa tola ibörögö i’odaligö ia si samösa niha? Duma-dumania, te so samösa zatua sokubaloi si lö mangandrö ba ginötö ihalö gangetula so’amakhaita ba mbanua niha Keriso. Mazui so ndra talifusöda, oföna ua lahalö gangetula awena mangandrö ira ena’ö ifahowu’ö gangetulara andrö Yehowa. Hiza’i, niha si so fangide-ngide’ö lö i’odaligö ia samösa hewa’ae na no to’ölö ia. Lö aetu itörö tödönia wa tebai ifaomagö wa’abölönia ba wa’abölö Yehowa. (Baso Gamaedola 3:5, 6.) Ba gulidanö da’a, ato niha sangalui tana khönia ba omasi ira na abölö tohude ira moroi ba niha bö’ö. Hiza’i, lö omasi lafalua da’ö ira samosumange Yehowa. Böi so ba wangera-ngerada wa abölö sökhi ita moroi ba niha bö’ö na no ta’okhögö halöwö sebua, he ba nomo mazui ba mbanua niha Keriso. Moguna tatörö tödöda wetaroda ba zi no itatugöi Lowalangi ba moguna göi falulu fohalöwö ita khö ndra talifusöda.—I Timoteo 3:15.

9, 10. Hewisa wa tola itolo ita fangide-ngide’ö ba ginötö lategu mazui lafalua khöda zi lö atulö?

⁹ Tatu abao dödöda na so niha sanguma’ö fehede si lö atulö khöda. Da’ö zalua  khö Khana. Hewa’ae i’omasi’ö sibai ia fo’omonia ira matua, hiza’i lö ohahau dödö Khana. Lö aetu i’o’aya ia Penina, niha si fahindri khönia. Omasi ia mo’ono, hiza’i tebai. Sambua inötö me abu sibai dödönia, möi ia mangandrö ba tabernakel. I’ila Ere Sebua sotöi Eli wa mege-ege ia, ba iwalingagö si mabu Khana andre! Tola manö mofönu Khana me luo da’ö. Hiza’i, ihaogö wanema wehede Eli. Aefa da’ö, ba wangandrönia, ifuli iwa’ö wehede sangoroma’ö famati hegöi fa’omasinia khö Yehowa.—I Zamueli 1:5-7, 12-16; 2:1-10.

¹⁰ Fangide-ngide’ö tola möi fanoloda ba wame’e ”folawa zi lö sökhi zi sökhi”. (Roma 12:21) Afönu fa’alösökhi gulidanö nifatörö Zatana andre. Andrö, böi tokea ita na lafalua khöda zi lö atulö. Moguna tataha wönuda. (Zinunö 37:1) Hiza’i, abölö afökhö na alua da’a ba gotalua ndra talifusöda ba mbanua niha Keriso. Na alua da’a, moguna ta’o’ö duma-duma Yesu. Imane Sura Ni’amoni’ö, ”Me lahede-hede’ö ia, ba lö ifuli ihede-hede’ö” hiza’i ”ibe’e ba danga zangatulö’ö fanguhuku andrö.” (I Fetero 2:23) So wangide-ngide’ö khö Yesu ba i’ila wa hasambalö ihori fefu zi lö atulö Yehowa. (Roma 12:19) Moguna göi so khöda wangide-ngide’ö ba ’böi tasulöni zi lö sökhi awönia si lö sökhi’.—I Fetero 3:8, 9.

11, 12. (a) Hewisa wa tola taforoma’ö wangide-ngide’ö na lasuno mazui lahöni-höni ita niha bö’ö? (b) Hewisa wangoroma’öda fangide-ngide’ö moroi ba lagu wonukhada hegöi bua-buada?

¹¹ Tola göi oroma wangide-ngide’öda na lasuno mazui na lahöni-höni ita niha bö’ö. Lasuno ba lahöni-höni sibai Gesitera börö me ya’ia andrö samösa ba gotalua ndra  alawe si sökhi zikhala ba Persia. Ba zi döfi, labe’e khönia wangehao mboto, simane iraono alawe sawuyu-wuyu tanö bö’ö si fahindri ba wangai tödö razo. Hiza’i, Gesitera nifili razo tobali ratu. Hewa’ae no itema fefu da’ö, lö tebulö gamuatania. Lö i’alui dana khönia. Iforoma’ö wangide-ngide’ö, fa’asökhi dödö, ba ifosumange niha bö’ö.—Gesitera 2:9, 12, 15, 17.

¹² Na so khöda wangide-ngide’ö, sökhi lala wonukhada hegöi bua-buada, ba taforoma’ö wa ta’ame’egö tödö niha bö’ö. Moroi na tahöni-höni manö ita mazui taforege ena’ö toröi-röi dödö niha khöda, omasi ita ta’okhögö ”wa’ebolo dödö ba fa’ahono-hono”. (Baso I Fetero 3:3, 4; Yeremia 9:23, 24) Moroi ba wehede hegöi ba nifaluada, ba da’ö oroma hewisa dödöda sanandrösa ba wa’aurida samösa. Duma-dumania, tola manö ibörögö so ba wangera-ngerada wamalua gofu hadia ia ena’ö lasuno ita niha bö’ö sanandrösa ba wohalöwö, fa’atua-tua mazui börö niha si fa’ila khöda. Mazui, taforege ena’ö la’ila niha wa tola mofozu ita ba wamalua hadia ia zi tohude hewa’ae na sindruhunia tola alua da’ö börö wanolo moroi ba niha bö’ö. Hiza’i, törö tödöu hadia nifalua Yesu. Tola manö i’oguna’ö wa’atua-tuania ena’ö lasuno ia niha bö’ö. Hiza’i, lö ifalua da’ö. Sasesenia, ayati moroi ba Daromali Lowalangi ni’oguna’önia. Lö omasi ia na lasuno ia niha. Omasi ia na ha Yehowa nisuno.—Yohane 8:28.

13, 14. Hewisa wa tola itolo ita fangide-ngide’ö ba wangai angetula si sökhi?

¹³ Moguna so khöda wangide-ngide’ö ba ginötö tahalö gangetula mazui ba ginötö lahalö gangetula niha bö’ö si tola molua-lua ba wa’aurida. Me ba Kaizaria so zinenge sotöi Faulo, omasi möi ia ba Yeruzalema ba wangasiwai halöwö nibe’e Yehowa khönia. Hiza’i, iwa’ö khönia sama’ele’ö sotöi Agabo wa na möi ia ba da’ö hasambalö lara’u ia ba tola manö labunu. La’andrö khönia göi ira talifusöda ena’ö lö mofanö ia. Hiza’i, ihalö gangetula Waulo wa hasambalö möi ia ba Yeruzalema. Hadia da’ö geluahania wa i’odaligö ia samösa? Lö’ö. So khönia wangide-ngide’ö ba sindruhu-ndruhu faduhu dödönia khö Yehowa. So göi wangide-ngide’ö khö ndra talifusöda si so ba da’ö. Andrö wa fao dödöra ba gangetula nihalö Waulo ba latehegö mofanö ia.—Halöwö Zinenge 21:10-14.

¹⁴ Fangide-ngide’ö zanolo ya’ita ba wangai angetula si sökhi hewa’ae lö ta’ila mazui tebai tafatörö hadia zalua. Duma-dumania, te so ba wangera-ngerada ba wangai halöwö safönu inötö. Hiza’i, hewisa na mofökhö ita? Hewisa na mofökhö zatuada ba moguna tatolo ira? Hewisa na no atua ita? Lö ta’ila tabe’e wanema li ba wanofu-nofu da’a hewa’ae no mangandrö ita ba ta’angera-ngeraigö manö da’ö. (Zangombakha 8:16, 17) Hiza’i, na faduhu dödöda khö Yehowa, tola ta’ila ba tatema’ö hadia zi tebai tafalua. Moguna tafatimbaisi fefu hadia zatulö, ta’andrö mene-mene, ba sabölö tohudenia ta’andrö wanuturu lala. Moguna göi ta’o’ö fefu wanuturu lala moroi ba geheha Yehowa. (Baso Zangombakha 11:4-6.) Tola ifahowu’ö gangetula nihalöda Yehowa mazui itolo ita ba wombulö’ö hadia ia ni’era-erada.—Gamaedola 16:3, 9.

15. Hewisa wa tola ta’okhögö wangide-ngide’ö na ta’angerönusi sanandrösa khö Yehowa?

¹⁵ Hewisa ena’ö itugu ta’okhögö wangide-ngide’ö? Datatutunö öfa ngawalö lala. Si oföna, moguna ta’angerönusi sanandrösa khö Yehowa, tahaogö ta’angeraigö wa’ebua dödö Lowalangi. Na tafagölösi ita khö Yehowa, ba da’ö ta’ila hawa’ide-ide ita ba sinduruhu-ndruhu lö oya ni’ilada. (Yesaya 8:13) Törö tödöu wa Lowalangi Fondrege Zabölö nifosumangeda, tenga niha gulidanö mazui mala’ika. Na ta’angerönusi da’ö, tola ta’okhögö wangide-ngide’ö ba tatou’ö ita ba ”danga Lowalangi”.—I Fetero 5:6.

16. Hadia mbörö wa tola ta’okhögö wangide-ngide’ö na ta’angerönusi wa’omasi Lowalangi?

¹⁶ Lala si dua ya’ia da’ö na ta’angerönusi hawa’ebua wa’omasi Yehowa khöda. Ifaomagö mbanua niha Keriso Faulo hulö simane boto niha. Moguna khö Yehowa fefu ndroto-ndroto niha nifazökhinia. (I Korindro 12:23, 24) So so ba dödö Yehowa ita zamösana. Lö ifagölö-gölösi ita ba niha bö’ö, ba lö aetu i’omasi’ö ita hewa’ae tafalua zala. Tola ohahau dödöda börö me ta’ila wa i’omasi’ö ita Yehowa.

17. Hadia mbuania na ta’osambua’ö dödöda ba zi sökhi nifalua niha bö’ö?

¹⁷ Si tölu, itugu ta’okhögö wangide-ngide’ö na ta’osambua’ö dödöda ba zi sökhi nifalua niha bö’ö, simane nifalua Yehowa. Moroi na taforege ena’ö lahöni-höni ita niha mazui na tatatugöi hadia ia nifalua niha, abölö sökhi na ta’andrö khöra mene-mene ba tatema’ö hadia mbua gera-erara. (Gamaedola 13:10) Omuso dödöda ba ginötö latema halöwö sebua ira talifusöda. Ba ta’andrö saohagölö khö Yehowa me no itehegö khöda ba wamosumange ya’ia.—I Fetero 5:9.

18. Hana wa itugu ta’okhögö wangide-ngide’ö na tafaha’ö dödöda side-ide?

¹⁸ Si öfa, itugu ta’okhögö wangide-ngide’ö na ta’oguna’ö goi-goi Zura Ni’amoni’ö ba wamaha’ö dödöda side-ide. Goi-goi Zura Ni’amoni’ö zamaha’ö ya’ita ena’ö aboto ba dödöda hewisa lala wangera-ngera Yehowa hegöi tödönia. Na tafaigi fefu hadia ia molo’ö lala wamaigi Yehowa, tola tahalö gangetula sangomusoi’ö tödö Lowalangi. Na tafaha’ö ita, talau mangandrö, ba tafalua ba wa’aurida hadia ia zi no tafaha’ö ita, tola itugu tefaha’ö dödöda side-ide. (I Timoteo 1:5) Tafaha’ö ita ba wangofönai’ö niha bö’ö. Na tafalua da’ö, ifabu’u Yehowa wa ’ifo’ahonoa ita’, itolo ita ena’ö itugu ta’okhögö wangide-ngide’ö.—I Fetero 5:10.

19. Hadia zanolo ya’ita ena’ö lö aetu ta’okhögö wangide-ngide’ö?

¹⁹ Hadia itörö tödömö zama’ele’ö moroi ba Yahudi nidunö-dunöda ba wamobörö wamaha’ö? Mate ia ba taya göi wahuwusania khö Yehowa börö me lö khönia sa’ae fangide-ngide’ö. Hiza’i, tola taforoma’ö wangide-ngide’ö hewa’ae abua wamalua ya’ia. Duma-dumania, ato zamosumange Yehowa si lö faröi ba wangoroma’ö fangide-ngide’ö. Na no itugu ara tafosumange Yehowa, itugu ta’odaligö ia. (Gamaedola 8:13) Tola tatörö lala Yehowa gofu hadia ia zalua khöda. Da’ö no sambua töi sebua khöda. Andrö, datafalua gofu hadia ia zi tola tafalua ena’ö lö aetu ta’okhögö wangide-ngide’ö ba tatörö lala Yehowa irugi zi lö aetu.