KAMAM yedi, Arthur i, fyor byaboya iswar Allah I kaku. Imarisen fa ḇye penginjil Metodis. Ḇape, fyor iwasya syap ro Siswa-Siswa Alkitab ma ḇyebati kuker si, fyadwer kakara ḇyena. Ro 1914, Kamam yedi ḇyebaptis fyor ḇyeumur taun ri 17. Fyoro werḇa, Perang Dunia I ikpef ma Kamam yedi siwan i fa dakso ro mamamun ani, ḇape imewer. Inja, sisuni ḇe bui ḇero Kingston, Ontario, Kanada, swaf paik risamfur. Ramnai fyor sisae i, ḇye kolportir, kirine sap siḇe perintis.

Ro 1926, Kamam yedi fyarbuk kuker Hazel Wilkinson. Apus yedi fyawi napnapes kwar ro taun 1908. Yaḇeaḇen ro 24 April 1931. Bedar ayesi nkoḇe fyak aya iso romawa ḇesuru ya. Kamami imarisen ma ḇyesyowi kaku Refoya. Imarisen insama nkofarari i. Inja, farsamsyom faro Yahwe ima roi ḇefandun kaku faro nko. Nkokame nkobaryas kayam ro rum ḇe rum.—Farfyar 20:20.

Ro 1939, Perang Dunia II ya ikpef. Ro taun ḇeuser ya, ro Kanada sidwarek fararur ro Saksi-Saksi Yahwe sya. Ro rumfarkor romawa sya siwan sifa sikanow bramin faro barbar ya ma sidisen doya kebangsaan ro kelas. Fyor sifrurna, aya ma eba yedi Dorothy bisa fa nusaye. Ḇape ras oso, guru ifrur mamyai aya ḇo ikofen ayama yamakakak. Inja fyor yabur ro rumfarkor bati yesi smun aya ma spampum aya isof yasapi. Roi nane nafrur yun snemuk fa ’yaso syadi faro Allah ro yaso snonkaku’.—Farfyar 5:29.

Ro Juli 1942, rofyor yaḇe umur taun ri 11, yaḇebaptis ro tangki war ḇero peternakan oso. Fyor nkofarkor ḇa ido, yakḇe perintis liburan, kirine sap siḇe perintis ekstra. Yakra ḇe bar wambrur Ontario kwar kuker naek rikyor fa nkobaryas ḇe snonkaku ḇekar ai sya.

Yaḇemerintis randak ro 1 Mei 1949. Ramnai, sor aya fa yafnoḇek fararur konstruksi ḇero kantor cabang Kanada. Mura ido, yaksun ro keluarga Betel ḇero diwa. Yana fararur ro percetakan, ma yafarkor rariso yuf mesin cetak ani. Yaswarepen minggu ḇeḇeso yafararur isof roḇ fa nkoḇecetak syapram ḇaḇewayam faro Yahwe kawasa ḇyesi ro Kanada.

Barpur muma, yafararur wer ro Departemen Dinas. Fararur yediso yawawos kuker perintis ḇeḇeso nari ḇefarmyan ro Quebec. Ro diwa, fararur nkoḇedi, spampum kakuna. Yaḇewawancara perintis oso snoriso Mary Zazula ḇerama ro Edmonton, Alberta. Mary sinan ḇyansuya suyakso ro Gereja Ortodoks. Inja, rofyor Mary ma eba ḇyedi sumarisen pdef sufarkor Refo, siyaw subur rum ya. Ramnai, suḇebaptis ro Juni 1951, paik riwonem ramnai suḇemerintis. Fyor yaḇewawancara Mary i, yamam ima iswar Yahwe I kaku. Yakara ro mankundaya, ’Yamarisen yafarbuk kuker bin ḇemnis radine.’ Paik risiw ramnai, ro 30 Januari 1954, nufarbuk. Minggu oser ḇyenande, Mary nusmai farkarkor faro fararur fararmyan ḇe sidang-sidangna. Ma ro swaf taun risuru, nufrur fararur ine ro bar wambrur Ontario.

 Fararur ḇaḇebaryas ine nabor syadi wer inja sfandun misionaris nabore. Nukara mboi bisa nufarmyan ro moḇ sariryakam snar nusambraḇ fa nubarek ro moḇ ḇepnunek kaku ro Kanada inja na numkak ḇa faro roi ḇeyarek ro fafisu idadaresya. Sor nufa nuso Sekolah Gilead kelas ḇeḇe-27, ro Juli 1956 numnai ro farkarkor ani. Ro paik November, nusabu ro Brasil iso moḇ ḇebabo nubedi.

Rofyor nuro Brasil kwar, nufarkor wos Portugis. Randakya, nufarkor rariso nuwawos ḇe snonkaku ḇese sya. Ramnai, nuswarepen moḇsai nubuk majalah ḇe snonkaku sya. Fyor nuḇebaryas, nusrow awin oso ḇemarisen kaku. Nukara kwar fyor nusrow kuker snonkaku ḇemarisen, nari nuwasya mnuk oso kuker rosai nari snonkaku sya sismaina ro ḇaḇ Karajan Allah. Inja, yawasya Wahyu 21:3, 4, ramnai yasapi! Snaro yapok samsam ma pananunek yaba ro moḇ ani. Nane nbe roi ḇesamswen ḇe ayaker.

Siwan nuḇe mnu ḇeba Campos. Kirine, sidang ri 15 nasya ro moḇ ani! Ḇape rofyor nusabu, raryur oser isya ro moḇ ani ma kako rum misionaris oser, ḇebarek rodia imḇesrar rifyak: Esther Tracy, Ramona Bauer, Luiza Schwarz, ma Lorraine Brookes (kirine Wallen). Ro rum misionaris ani, roi yafrur iso yapapap sansun, ma yaryur aimun fa nkobuki kankun. Ro ras Senin roḇ ya, fyor Farkarkor Baryas ya ramnai, Mary denef ro sofa yabori, nukain nufawar rosai nufrur kwar ro ras ani. Fyor Mary ikbok, fyoroba ido, ikak oso syae ro afyak ḇero sofa ani! Nkokandor kame, ma yamun ikak ani ḇeri.

Rofyor nufarkor wos Portugis swaf taun oser ramnai, nufrur fararur keliling. Nufarmyan ro moḇ ḇena listrik ḇa. Nuyenef ro yar ma nura farma ido nuyek kuda ma kereta kuda. Nukako nuraḇe mnu ḇebinkwan ro urekbon kuker nuso kereta api. Ro diwa, nuḇesewa sim oso. Kantor cabang fyarem majalah ri 800 fa nuḇuki baryas. Ine nafnai fa nukaḇkaḇer ḇe kantor pos insa nuyun karton majalah anna.

Ro 1962, Sekolah Pelayanan Kerajaan sifrurna ro moḇ ḇeḇeso ro Brasil. Ro swaf paik riwonem, siwan aya fa yemir yara ḇe sekolah-sekolah nane. Yabuk farkarkor ro kelas-kelas ḇero Manaus, Belém, Fortaleza, Recife, ma Salvador. Fyor yaro Manaus, yafasos munara kebaktian distrik ro aidoram opera ḇero moḇ ya. Snar mekem ya iba, war ḇesrenna samswen fa nkinem, ma naek srar sna moḇ noba fa sanan ro kebaktian ani. Inja yakofenḇair ḇe pejabat militer oso. Kuker payamyum fyasos insama nkona war fa nkinem rofyor kebaktian ya imbrane. Fyarem sordade ḇeḇeso fa sifrur tenda ḇeba risuru insa nkokankun ma nkonan rodia.

 Rofyor yafrur nanekam, Mary ḇyaryas ro moḇ sfarḇaḇyan ḇape ono sisya simarisen kuker Refoya ḇa. Snonkaku ḇerodiwa srama ḇe Portugal fa sfarḇaḇyan ro Brasil. Mary iryaḇ werḇa. Ikofen ḇe bati ḇyesya, ”Yamewer kaku yaḇarek ro Portugal.” Fyoro werḇa, nusmai syapram. Ima undangan fa nufarmyan ro sup ḇeba ḇedwarek fararur koḇena, iso Portugal. Mary ikandor fafayaḇa! Ḇape, numarisen nusmai fararur ani ma nuraḇe diwa.

Fyor nusya ro Lisbon, Portugal, ro Agustus 1964. Agen rahasia ro moḇ ani sifrur samswen naek srar ḇerodiwa sya. Inja, nuyawos ḇaim ḇe Saksi ḇero diansya. Rofyor nusabu, nuḇesewa sim fa nubarek. Ma rofyor nusmai visa kwar, nuḇesewa apartemen oso. Paik ririm ḇyenande, fyor moḇ ya iknon kwar, nuyawos ḇe naek ḇero kantor cabang sya. Numarisen kaku snar nuso fananjur ya kwar!

Snar fararur koḇedi sidwarek ro moḇ ani, Balai Kerajaan nakam skenna, inja fananjur ya sifrur ro naek srar sya rum sena. Polisi sya sisun fa saiwarek rum sena. Naek srar sibor kaku sforsi ma sun siḇe kantor polisi fa sifukensi. Sifrurpyum siḇa ma sidafdifer si fa sikofenḇair naek ḇefarkin fararur nkoḇena. Insa sfor nkoba ido, nkap keret nkoḇena ḇa, mboi nkor monda snonsnon nkoḇena.

Nkofrur rarirya insama naek srar sya bisa sismai pdef publikasi ḇefnofek si fa sfarmku pdef. Mary iso ḇeketik artikel farkarkor Baryas ma publikasi ḇesena ro kertas oso. Ramnai, kertas ani sḇuk naḇe stensil, ḇaido cetakan, fa sifrur majalah nabor syadiwer ḇe naek srar sya.

Ro Juni 1966, persidangan ḇefandun oso sifrurna ro Lisbon. Snonkaku ri 49 ḇero sidang Feijó skursof siḇe snonkaku ḇeyuk sasoser snar sakso ro fananjur sifrur ro snonkaku oso rum ḇyeja. Insa yafasos sifaro persidangan ani, yafrur raris pengacara ḇepampum Saksi Yahwe sya. Ḇape raris nkokara kwarna, nun bon ḇepyumḇa. Naek srar ri 49 sisun si ro bui. Swaf sena ro bui neḇeseyae, ono sisya sḇarek ras ri 45 isof paik peser ririm. Ḇape, persidangan nane nḇuk kesaksian ḇepyum. Snaro ro persidangan ani, pengacara nkoḇedi dapkaḇer Gamaliel wos ḇyena ro Refo. (Farfyar 5:33-39) Inja, kasus persidangan nkoḇedi sisunna ro berita. Nkomarisen kaku snaro pengacara ani ifarkor Refo ma dakso ro fananjur.

Ro Desember 1966, siwan aya fa yaḇe pengawas cabang. Yafrur fasasos faro kasus hukum naḇore. Nkosewar nyan naḇore insama nkofawi dasar hukum ḇefnoḇek Saksi-Saksi Yahwe ḇero Portugal insa sḇe ibadat kaḇer wer. (Filipi 1:7)  Inja, ro 18 Desember 1974, sḇuk ijin ḇe inko fa nkoḇe ibadat wer. Naek Nathan Knorr ma Frederick Franz ḇero kantor pusat surama fa nkofrur sarisa ine. Nkoḇefnder ḇaḇeri fananjur nkofrur ro Oporto ma Lisbon ma ḇerama rodia sya snonkaku ri 46.870.

Yahwe ifnoḇek fararur ḇaḇebaryas ine isof ḇe myos ḇeyawos wos Portugis, raris Azore, Tanjung Verde, Madeira, São Tomé ma Príncipe. Snar Saksi ḇero moḇ ani sibor syadiwer, inja nkofandun kantor cabang ḇeba wer. Fyor sifrurna kwar, Naek Milton Henschel dawos faya penahbisan ro 23 April 1988. Ḇerama sya barbor sena 45.522, ma kako misionaris ri 20 ḇefarmyan kwar ro Portugal fafisu iwara.

Ro taun ḇe taun, aya ma Mary numarisen nufarkor ro snonkaku ḇesouser sya. Raris yafarkor roi ḇepyum ro Naek Theodore Jaracz fyor kunjungan zona ya. Cabang nkorama ya isma samswen beba kaku ma Panitia Cabang sifrur roi nakam kwar fa sifrurmnis kaḇerna. Ḇape, skara sisasar kwar snar jadi fa sifrur royoḇa. Inja, Naek Jaracz ḇyuk wos sneprei ḇesi ma ikofen, ”Kirine koḇuk swaf ḇe rur ḇesren fa ifararur.” Aya kako na yaḇefnder ḇaḇeri Naek Franz wos ḇyena fyor nurama ḇe Brooklyn taun-taun ḇepon naiwara. Nu ma bati ḇeḇeso nuḇesya nkosmai anun ro i. Ikofen, ”Kakara Yeja, rosai monda ḇeḇejadi ya, koso pdef Yahwe organisasi ḇero supswan ine. Ine organisasi oser monda ḇefrur Yesus parenta ḇyena ḇemanfamyan ḇesya, iso kobaryas ankankinem ḇeḇye Karajan Allah!”

Nanekam nafrur aya ma Mary numarisen kaku. Nukako nuna fawar ḇepyum fyor nura ḇe kantor cabang ḇebor ro supswan ḇesiper fyor nufarmyan ḇe hamba zona. Numarisen nusrow kuker Yahwe manfamyan ḇyesi ro umur sariryakam ma nuḇuk kakakyar ḇesi snar fararmyan sena nesyowi kaku. Nudif si ḇesya kwar insama sifarmyan pdef ḇe Yahwe I.

Nukara ḇaḇeri fafisuya nambran fasaw kaku, kirine nuḇeumur taun ri 80 kwar. Mary isma dafduf nabor. (2 Korintus 12:9) Ma nu kako nusma roi ḇedwarek ḇesena. Ḇape, roi annakam sambraḇser kakyar nuḇena, ma nuyun snemuk fa nusouser pdef faro Yahwe I. Fyor nuswarepen mura ḇe taun-taun fararmyan nuḇena, numam snar Yahwe ḇyuk ḇaḇenaḇye Ḇyeja nabor kaku ḇe nu. *