TAEM papa blong mi, Arthur, i yangfala, hem i lavem God mo i wantem kam pasta blong Metodis jos. Be taem hem i ridim sam buk blong ol Baebol Studen, hem i jenisim tingting blong hem mo i stat blong joen wetem olgeta. Long 1914, hem i baptaes taem hem i gat 17 yia. Long Wol Wo Wan, oli askem long hem blong i joen long ami, be hem i no wantem go faet. Ale hem i go kalabus blong ten manis long Presin Haos blong Ontario, long Kanada. Afta we hem i aot long kalabus, hem i mekem wok blong paenia.

Long 1926, papa blong mi i maredem Hazel Wilkinson, we mama blong hem i kasem trutok long 1908. Mi mi bon long 24 Eprel 1931, mo mi mi seken bon long fo pikinini. Papa blong mi i laekem mo i respektem Baebol, mo hem i tijim mifala tu blong mekem sem mak. Samting we i moa impoten long laef blong mifala, hemia blong wosipim Jehova. Evri wik, mifala evriwan i go prij long ol haos wanwan.—Ol Wok 20:20.

Long 1939, Wol Wo Tu i stat. Wan yia afta, oli putum tabu long wok blong prij long Kanada. Ol studen oli mas singsing nasnal antem long klasrum mo salut long flag. Taem samting ya i hapen, plante taem tija i letem mi mo sista blong mi Dorothy, i go afsaed. Be wan dei, tija blong mi i wantem mekem mi mi sem, ale hem i talem se mi mi wan slak man. Taem skul i finis, plante studen oli kilim mi mo oli mekem mi foldaon. Hemia i mekem se tingting blong mi i strong moa blong ‘obei long God, be i no long man.’—Ol Wok 5:29.

Long Julae 1942, taem mi gat 11 yia, mi baptaes long wan tang, long wan plantesen. Evri taem we mi spel long skul, mi mekem wok blong haftaem paenia. Blong wan yia, mi go wetem tri narafala brata long not blong Ontario, blong prij long ol man blong katem wud.

Long namba 1 Mei 1949, mi statem wok blong fultaem paenia. Biaen, oli askem mi blong joen long wok blong bildim branj ofis blong Kanada, mo biaen, mi wok long Betel blong Kanada. Mi wok long ples blong printim ol buk, mo mi lanem blong yusum masin blong printim buk. Mi tingbaot se long plante wik, mi wok fulnaet blong printim wan traket we i tokbaot fasin agens we ol man blong Jehova long Kanada oli stap fesem.

Smol taem biaen, mi wok long Seves Dipatmen. Wok blong mi i blong askem kwestin long ol paenia we bambae oli go prij long eria blong Quebec, we fasin agens i strong moa long hem. Wan long ol paenia ya i Mary Zazula blong Edmonton, long Alberta. Papa mama blong hem oli blong Otodoks Jos. Taem Mary mo bigfala brata blong hem i no wantem stop blong stadi, papa mama blong tufala i ronemaot tufala long haos. Tufala i baptaes long Jun 1951, mo sikis manis afta, tufala i stat blong paenia. Taem mi stap askem kwestin long Mary, mi luksave se hem i lavem Jehova tumas. Mi tingbaot se long taem ya, mi stap tingting se hemia gel we mi wantem mared long hem. Ale naen manis biaen, long 30 Jenuware 1954, mitufala i mared. Wan wik afta, oli askem mitufala blong go kasem trening blong mekem wok blong eria elda. Blong tu yia, mitufala i mekem wok blong visitim ol eria long not blong Ontario.

Taem wok blong prij i stap kam bigwan moa long olgeta ples long wol, i nidim moa misinari. Mitufala i stap tingting se sipos mitufala i save laef long Kanada we weta blong hem i kolkol bitim mak mo ol moskito blong hem oli plante long hot taem, mitufala i  save laef long eniples tu. Mitufala i joen long namba 27 klas blong Gilead Skul, mo graduesen blong mitufala i stap long Julae 1956. Jes bifo long manis Novemba, mitufala i stap finis long niufala hom blong mitufala, Brasil.

Taem mitufala i kasem Brasil, mitufala i stat blong lanem lanwis Potugis. Long stat, mitufala i lanem ol fastok we oli isi blong talem. Afta, mitufala i lanem baehat sam sot fastok blong seremaot magasin. Biaen, mitufala i go prij, mo mitufala i faenem wan woman we i intres. Mitufala i bin talem finis se sipos wan man i intres, bambae mitufala i ridim wan vas we i tokbaot laef aninit long Kingdom blong God. Ale mi ridim Revelesen 21:3, 4, !be biaen, ae blong mi i dak nao mi foldaon! Mi mi no lan long weta we i mekem man i hot mo i swet. Kam kasem naoia, mi no lan yet long weta olsem.

Ples we mitufala i mas prij long hem, hemia taon blong Campos. !Tede, i gat 15 kongregesen long taon ya! Be taem mitufala i jes kam, i gat wan smol grup nomo, mo i gat wan haos blong ol misinari we fo sista i stap long hem. I gat Esther Tracy, Ramona Bauer, Luiza Schwarz, mo Lorraine Brookes (naoia Wallen). Wok blong mi long misinari haos, hemia blong was mo karem faeawud blong kuk. Long wan mande naet, afta long Wajtaoa stadi, Mary i ledaon long wan longfala jea mo hem i putum hed blong hem antap long wan pilo. Mifala i stap tokbaot samting we mifala i mekem long dei ya. !Taem Mary i stanap, wan snek i kamaot aninit long pilo ya! Longfala man ya i mekem evriwan i danis smol go kasem we mi kilim hem i ded.

Mitufala i lanem lanwis Potugis blong wan yia, mo biaen mitufala i stat blong goraon long ol kongregesen. Mitufala i prij long ol ples we i no gat lektrik. Mitufala i slip long mat nomo, mo mitufala i yusum kat we hos i pulum blong go long ol defren ples. Wan taem, mitufala i wantem go prij long wan ples we i stap longwe, ale mitufala i go long tren blong kasem wan taon we i stap antap long ol hil. Mitufala i rentem wan rum long taon ya. Branj ofis i sanem 800 magasin blong mifala i yusum long wok blong prij. Mitufala i mas mekem plante trip i gokam long postofis, blong karem ol katon magasin ya.

Long 1962, Kingdom Ministri Skul i stap long ol defdefren ples long Brasil. Ale, blong sikis manis, mi go mi wan long ol ples ya blong tij long skul ya. Mi tij long Manaus, Belém, Fortaleza, Recife, mo Salvador. Taem mi stap long Manaus, mi ogenaesem wan asembli blong tri dei we i stap long wan haos blong konset we plante man oli save long hem. I gat bigfala ren, ale i no gat klin wota blong dring mo gudfala ples blong ol brata sista oli kakae, long taem blong asembli. Mi tokbaot problem ya long wan bigman blong ami, mo wetem kaen fasin, hem i mekem rod blong mifala i gat inaf wota blong dring long ful asembli ya. Mo tu, hem i sanem sam soldia i kam blong stanemap tu bigfala tent, we mifala i yusum blong kuk mo kakae long hem.

Taem mi no stap, Mary i go prij long wan eria we i gat ol bisnes long hem, mo ol man long ples ya oli no  wantem tokbaot Baebol. Ol man ya oli aot long Potugal i kam, blong mekem bisnes. Tingting blong Mary i foldaon, nao hem i talem long sam fren blong hem se: “Long olgeta ples we mi wantem go stap long hem, Potugal hem i laswan long lis blong mi.” I no longtaem biaen, mitufala i kasem wan leta we i talem se bambae mitufala i go prij long Potugal. !Mary i sek we i sek! Be mitufala i agri nomo, mo mitufala i go long Potugal we wok blong prij i tabu long hem.

Long Ogis 1964, mitufala i kasem taon blong Lisbon, long Potugal. Ol sikret polis oli mekem laef blong ol brata long ples ya i had. Taswe mitufala i ting se i moagud blong no kontaktem ol Witnes fastaem. Long stat, mitufala i rentem wan rum. Biaen, taem mitufala i kasem visa blong mitufala, mitufala i rentem wan haos. Afta long faef manis, i sef blong mitufala i kontaktem ol brata long branj ofis. !Mitufala i glad tumas we naoia mitufala i save go long ol miting!

Oli putum tabu long wok blong prij long ples ya, taswe oli klosem ol Haos Kingdom, mo ol miting i stap long haos blong ol brata nomo. Oltaem ol polis oli go long haos blong ol brata ya blong traem faenem sam samting, mo oli tekem plante handred brata mo sista i go long polis stesen, blong kwestinim olgeta. Ol polis oli mekem i strong long olgeta mo oli traem fosem olgeta blong oli talemaot nem blong ol brata we oli lidim wok. Taswe, blong protektem ol brata, oli singaot olgeta long prapa nem blong olgeta nomo, be oli no moa yusum famle nem blong olgeta.

Mak blong mifala i blong mekem sua se ol brata oli kasem ol buk we bae i givhan long olgeta blong stanap strong. Ale Mary i taepem ol haf blong Wajtaoa stadi mo sam narafala buk long wan spesel pepa. Biaen oli yusum pepa ya blong mekem plante kopi blong givimaot long ol brata.

Long Jun 1966, wan impoten kot kes i kamaot long Lisbon. Oli tok agensem ol 49 memba blong kongregesen blong Feijó, se oli brekem loa taem oli holem wan miting long haos blong wan man. Blong rerem ol brata ya, mi mi mekem olsem se mi nao mi loea we bambae i traem blong pruvum se ol brata oli brekem loa. Mifala i lusum kot kes ya mo mifala i save finis se hemia bambae i hapen. Ol 49 brata mo sista ya evriwan oli go long presin, samfala blong 45 dei mo sam narafala blong faef manis haf. Be kot kes ya i givim bigfala witnes. Blong talem stret, taem mifala i stap long kot, loea blong mifala i yusum toktok blong Gamaliel long Baebol. (Ol Wok 5:33-39) Mo biaen, kot kes ya i kamaot long nius. Mifala i glad tumas taem loea blong mifala i stadi Baebol mo i joen long ol miting.

Long Disemba 1966, wok blong mi i jenis, mo naoia mi mas lidim ol wok long branj ofis, mo mi spenem plante taem long ol samting we oli joen wetem loa. Mifala i mekem evri samting we mifala i naf blong mekem, blong pruvum se folem loa, ol Witnes blong Jehova oli gat raet blong wosip long Potugal. (Filipae 1:7) Ale, long 18 Disemba 1974, gavman i rejistarem skul blong ol Witnes blong Jehova. Brata  Nathan Knorr mo Frederick Franz long hedkwota blong ol Witnes blong Jehova, tufala i kam blong joen wetem mifala long hapi taem ya. Mifala i holem wan bigfala miting long Oporto mo long Lisbon, mo i gat 46,870 man oli stap.

Jehova i mekem se wok blong prij i kam bigwan moa long ol aelan we ol man oli toktok lanwis Potugis, olsem Asores, Kap Verde, Madira, São Tomé mo Príncipe. Namba blong ol Witnes long ol aelan ya i kam antap moa, taswe mifala i nidim wan branj ofis we i bigwan moa. Taem oli wokem haos ya finis, Brata Milton Henschel i givim wan tok blong dedikesen long 23 Eprel 1988. I gat 45,522 brata sista oli stap long taem ya, mo 20 brata sista we bifo oli bin misinari long Potugal, oli kambak from dedikesen ya.

Long plante yia we i pas, Mi mo Mary i glad tumas blong lanem plante samting long ol gudfala brata. Eksampol, taem mi folem Brata Theodore Jaracz long wan son visit, mi lanem wan gudfala lesen. Branj ofis we mifala i visitim i gat wan bigfala problem, mo ol brata long Branj Komiti oli mekem evri samting we oli naf blong mekem, blong traem givhan. Oli harem nogud se oli no naf blong mekem moa. Ale Brata Jaracz i leftemap tingting blong olgeta se: “Naoia i taem blong letem ples long tabu spirit blong i wok.” Mo tu, bambae mi neva fogetem toktok we Brata Franz i bin talem plante yia bifo, taem mi mo Mary i go visitim Brooklyn. Long taem ya, grup we mitufala i stap long hem i askem advaes long hem, nao hem i talem se: “Advaes blong mi se: No lego ogenaesesen blong Jehova, nomata wanem i hapen. Hem nomo i stap mekem wok we Jisas i talem long ol disaepol blong hem blong mekem: !Talemaot gud nius blong Kingdom blong God!”

Taem mitufala i mekem samting ya, mitufala i glad tumas. Mo tu, mitufala i gat ol gudfala memori blong ol son visit we mitufala i mekem long ol branj long olgeta ples long wol. Mitufala i laekem tumas blong mitim ol man blong Jehova we yia blong olgeta i defdefren, mo talem long olgeta se Jehova i glad tumas long wok we oli mekem. Mitufala i leftemap tingting blong olgeta oltaem blong oli gohed blong mekem wok blong hem.

Plante yia i pas finis, mo naoia mitufala i gat bitim 80 yia. Mary i gat plante problem blong helt. (2 Korin 12:9) Mo mitufala i gat sam narafala trabol. Be ol trabol ya oli mekem bilif blong mitufala i strong, mo mitufala i gat strong tingting blong holemstrong long Jehova. Taem mitufala i luklukbak long ol yia we mitufala i mekem wok blong Jehova, mitufala i save se Jehova i blesem mitufala, i soemaot kaen fasin blong hem long mitufala long plante rod. *