SANGA nguda denga, merhat kal bapangku jadi penginjil Methodist erkiteken keleng atena Dibata. Tapi mobah ukurna paksa iogena piga-piga publikasi arah Siswa-Siswa Alkitab janah mulai erteman ras kalak e. Paksa umur 17 tahun, iperidiken ia tahun 1914. Paksa Perang Doni I, ipindo ia ikut militer tapi itulakna. Emaka ipenjaraken ia sepuluh bulan i penjara Kingston, Ontario, Kanada. Kenca ibebasken, jadi kolpoltir ia, mbarenda enda gelar perintis.

Tahun 1926, erjabu bapangku ras Hazel Wilkinson. Niningku arah nande dat kebenaren tahun 1908. Aku tubuh tanggal 24 April 1931, empat kami sembuyak, aku anak si peduaken. Ikelengi ras iergai bapangku kal Pustaka si Badia janah iajarkenna ka gelah kami pe bage. Jahwe si pentingna i bas geluh kami. Alu ratur erberita kami sekeluarga rumah ku rumah.—Perbahanen Rasul-Rasul 20:20.

Tahun 1939, terjadi Perang Doni II. Setahun kenca e, dahin Saksi-Saksi Jahwe i Kanada ilarang. Anak-anak sekolah iarusken hormat bendera ras ngendeken lagu nasional i kelas. Biasana, ipeturut guru aku ras agingku Dorothy ndarat kelas nari paksa acara ibenai. Tapi bas sada wari, ikataken gurungku aku percikcik. Kenca mulih sekolah, ipekpeki piga-piga teman sekelasku aku ngasa ndabuh. Enda erban reh belinna sura-surangku ”ngikutken Dibata, labo manusia”.—Perbahanen Rasul-Rasul 5:29.

Bulan Juli 1942, paksa umurku 11 tahun, iperidiken aku i tanki lau i juma. Meriah kuakap jadi perintis liburen, paksa aku libur sekolah. Gundari igelari perintis ekstra. Bas sada wari, lawes aku ras telu senina si deban ku Ontario Utara, guna erberita man kalak si dahinna motong kayu.

Tanggal 1 Mei 1949, jadi perintis biasa aku. Kenca si e iundang aku nampati dahin pembangunen i kantor cabang Kanada, dungna jadi anggota Betel Kanada. Itugasken aku i percetaken, erlajar aku make mesin cetak. Kuinget pernah aku erdahin asa berngi piga-piga minggu guna ncetak risalah kerna penganiayan umat Jahwe i Kanada.

Kenca si e, erdahin aku i Departemen Dinas. Itugasi aku gelah kuwawancarai perintis si nandangi ngelayani i Quebec, i jah lit penganiayan si mesangat. Salah sada perintis e gelarna Mary Zazula bas Edmonton, Alberta nari. Orangtuana anggota gereja Ortodoks. Paksa la nggit ia ras abangna ngadi erlajar Pustaka, ipelawes orangtuana kalak e. Mary ras abangna iperidiken bulan Juni 1951, enem bulan kenca si e, jadi perintis kalak e. Paksa iwawancarai, banci kueteh maka mbelin kal kekelengen Mary nandangi Jahwe. Kuinget, paksa si e mis turah bas ukurku maka ia me ateku diberu si kuempoi. Siwah bulan kenca si e, erjabu kami tanggal 30 Januari 1954. Seminggu kenca erjabu, iundang kami guna pelatihen pertua keliling. Dua tahun kenca si e, itugasken kami ku Ontario Utara.

 Asum dahin erberita i sebelang doni reh majuna, iperluken terbuen utusen injil. Rukur kami duana, adi tahan nge kami i Kanada si mbergeh kal cuacana paksa musim mbergeh janah melala kal rengit paksa musim melas, berarti ngasup nge kami i japa pe. Iikuti kami Sekolah Gilead kelas si peduapulu pituken janah lulus bulan Juli 1956. Bulan November seh kami i rumah si mbaru i—Brasil.

Paksa seh i Brasil, mulai kami erlajar cakap Portugis. Tangtangna, ipelajari kami kata-kata sederhana guna mbenai percakapen. Kenca si e, kata penaruh guna nawarken majalah. Dungna, erberita kami janah jumpa ras sekalak diberu si nggit megiken. Enggo tekadken kami maka adi jumpa ras si mada jabu si nggit megiken, ogeken kami ate kami sada ayat kerna kegeluhen bas Kinirajan Dibata. Emaka kuogeken Ketangkasen 21:3, 4—kenca e pingsan aku! Lenga terbiasa aku ras cuaca si melas ras lembap. Cuaca si melas e rusur jadi tantangen man bangku.

Itugasken kami ku kota Campos selaku utusen injil. Gundari, lit 15 runggun i je! Paksa kami reh, sada terpuk kitik ngenca lit i je bage pe lit empat turang senina si diberu si tading i rumah utusen injil: Esther Tracy, Ramona Bauer, Luiza Schwarz, ras Lorraine Brookes (gundari Wallen). Tugasku i rumah utusen injil nuci ras muat ranting. Bas wari Senin berngi kenca dung pelajaren majalah Watchtower, medem-medem Mary i kursi pake bantal. Cakap-cakap kami kerna pengalamen kami bas wari e. Paksa keke Mary, lit nipe ndarat arah teruh bantalna! Sengget kal kami piahna kubunuh nipe e.

Setahun kenca erlajar cakap Portugis, jadi pertua keliling aku. Kami ngelayani i daerah si la lit listrikna. Ingan medem kami amak, janah adi kami lawes-lawes, erkuda ras ersado ngenca. Pernah kami nangkih kereta api ku sada kota i pegunungen gelah banci erberita i daerah si mesuni. Isewa kami sada kamar i jah. Erkiteken ikirim kantor cabang 800 majalah, arus mulih-ulih kami ku kantor pos muat kerina majalah e.

Tahun 1962, iban me Sekolah man Perberita Kinirajan bas piga-piga ingan i Brasil. Enem bulan dekahna aku itugasken ngajar ku sekolah-sekolah e, i Manaus, Belém, Fortaleza, Recife, ras Salvador, tapi Mary la ikut. Paksa i Manaus, aku si ngaturken kebaktin distrik i rumah opera si terkenal. Erkiteken meder kal udan, sitik ngenca lau bersih man inemen, janah la lit ingan si cocok guna man paksa kebaktin. Kuturiken masalah kami man sekalak tentera. Iberekenna me inemen man kerina si reh. Isuruhna ka tentera-tentera erban dua tenda si galang, si banci pake kami jadi dapur ras ingan man.

Asum si e, erberita Mary i daerah bisnis janah la lit sada pe si ngalokenca. Kalak si i je rehna  Portugis nari guna ndarami sen. Kitik kal ukur Mary janah katakenna man temanna, ”Asa ndigan pe la kunggit ku Portugis!” La ndekah kenca e, dat surat kami. Enda undangen guna ngelayani i Portugis, i je dahinta ilarang. Sengget kal Mary! Tapi ialoken kami tugas e janah berkat me kami.

Agustus 1964, seh kami i Lisbon, Portugis. Melala turang seninanta ianiaya polisi-polisi rahasia i je. Emaka la mis hubungi kami Saksi-Saksi Jahwe si i je. Tangtangna isewa kami kamar. Kenca si e, paksa visa kami ndarat, isewa kami apartemen. Lima bulan kenca si e, nggo aman keadanna guna ngubungi turang senina i kantor cabang. Meriah kal akap kami, dungna banci kami reh ku perpulungen!

Erkiteken dahinta ilarang, itutup me Bale Kinirajan emaka perpulungen ilakoken i rumah turang senina. Rumah kalak e rusur idahi Polisi. Ratusen turang seninanta ibaba ku kantor polisi guna isungkuni. Ipaksa Polisi kalak e gelah mpebetehken gelar turang senina si ertanggungjabap janah la mehuli perbahanenna man kalak e. Gelah banci sikawal-kawalen, turang seninanta la ngelebuh turang senina si deban alu mergana.

Tujun utama kami gelah turang senina ndatken publikasi, si nampati kalak e megenggeng. Emaka iketik Mary me bas sada kertas si khusus majalah Watchtower edisi pelajaren ras publikasi si deban guna jadi cetaken ntah pe stensil gelah banci ipebue.

Bulan Juni 1966, lit persidangen penting i Lisbon. Kerina anggota runggun Feijó si jumlahna 49 kalak, ituduh erkiteken ngikuti perpulungen bas sada rumah. Guna nikapken kalak e i bas persidangen, latihen kami, aku jadi pengacara si erusaha mbuktiken maka turang seninanta salah. Tapi bagi nggo iduga, talu kami bas persidangen. Kerina turang senina e ipenjaraken, lit si 45 wari seh ku lima setengah bulan. Tapi persidangen enda mereken kesaksin si mehuli, sedekah persidangen, ikutip pengacara kami kata-kata Gamaliel i bas Pustaka. (Perbahanen Rasul-Rasul 5:33-39) Kenca si e, mbar me berita kerna persidangen e. Meriah iakap kami erkiteken pengacara kami mulai erlajar Pustaka ras kami janah reh ku perpulungen.

Bulan Desember 1966, itugasken aku jadi pengawas cabang janah rusur ngurus masalah hukum. Ilakoken kami asa bancina erban alasen hukum gelah Saksi-Saksi Jahwe banci bebas i Portugal. (Pilipi 1:7) Dungna, tanggal 18 Desember 1974, iakui me kita secara hukum. Emaka reh Turang Seninanta Nathan Knorr ras  Frederick Franz kantor cabang nari. La kal terlupaken kami kebaktin i Oporto ras Lisbon si idahi 46.870 kalak.

Ipebelang Jahwe ka dahin erberita seh ku pulo-pulo si kalakna make cakap Portugis, misalna pulo Azores, Cape Verde, Madeira, ras pulo São Tomé ras Príncipe. Erkiteken jumlah Saksi-Saksi Jahwe i daerah e reh teremna, iperluken kantor cabang si tergalangen. Kenca pajek, ipeseh Turang Seninanta Milton Henschel khotbah penahbisen tanggal 23 April 1988. Lit 45.522 turang senina si reh, termasuk 20 utusen injil si pernah reh ku Portugis guna acara penahbisen.

Ertahun-tahun dekahna, erlajar aku ras Mary bas turang senina si setia nari. Contohna, paksa ngelakoken kunjungen pengawas zona, erdahin aku ras Turang Seninanta Theodore Jaracz, i je kudat pelajaren si meherga. Mbelin kal masalah cabang si idahi kami janah nggo isampati Panitia Cabang asa bancina. Tapi kitik kal ukurna erkiteken lanai banci ngelakoken kai pe. Emaka iapuli Turang Seninanta Jaracz kalak e alu ngataken, ”Gundari, peturut kesah si badia si erdahin.” Janah la aku pernah lupa kata-kata Turang Seninanta Franz puluhen tahun si lewat paksa aku ras Mary reh ku Brooklyn. Piga-piga kami mindo saran man bana, nina, ”Saranku: Tetaplah kam bas organisasi Jahwe si teridah, subuk sanga senang bage pe mesera. Organisasi e ngenca si ndalanken dahin si iperentahken Jesus man ajar-ajarna, emaka beritakenlah berita si meriah kerna Kinirajan Dibata!”

Ndalanken saran e erban aku ras Mary ermeriah ukur. Lit ka kenangen si meherga i bas ndahi cabang-cabang sebelang doni selaku pengawas zona. Meriah akap kami jumpa ras juak-juak Jahwe bas erbage usia janah mpetetap ukur kalak e maka iergai nge pelayanenna. Pegegehi kami rusur kalak e gelah terus ngelayani Jahwe.

La gejap, gundari umur kami nggo 80-en. Lit piga-piga masalah bas kesehaten Mary. (2 Korinti 12:9) Janah lit tantangen si debanna. Tapi enda mpegegehi kiniteken kami janah erban kami erusaha tetap setia. Adi nginget tahun-tahun pelayanen kami, ieteh kami maka ipasu-pasuNa kami alu melala kal kiniulinNa si la metunggung ialoken. *—Nehen penjelasen tambahen.