MISIGISALIKKERSAARUT
Guutip ajunngisaarnera pisassarinngisaraluaq amerlasuutigut misigaarput
ATAATAGA, Arthur, Guutimik mianerinnittuugami inuusuttuulluni metodistinut palasinngorusuppoq. Biibilimilli Atuaqqissaartartut Biibililersaarutaannik atuareerluni taakkuninngalu peqateqartalerami isummani allanngortippaa. 1914-imilu 17-inik ukioqarluni kuisippoq. Sorsunnersuup siulliup nalaani sakkutuunngorumannginnami Canadami Kingston Penitentiary-mi Ontariomiittumi qaammatini qulini parnaarussassanngortinneqarpoq. Iperagaanermi kingorna kolportørinngorpoq, tassa pionerinngorpoq.
1926-mi ataatama Hazel Wilkinson nulissiuppaa. Taassuma arnaata sallusuissut 1908-mi paasisimavaa. Uanga 1931-mi apriilip 24-anni qatanngutigiinni sisamaasuni angajulliup tulliatut inunngorpunga. Ataatama Biibili nuannaralugulu ataqqivaa taamaaliornissamillu ilinniartilluta. Jehovamik pallorfiginninneq inuunitsinni pingaarnerpaavoq. Ilaqutariittut illumiit illumut oqaluussikulasarpugut. – ApS 20:20.
ATAATATTUT AALAJAALLUNGALU PIONERIUVUNGA
1939-mi sorsunnersuaq kingulleq aallartippoq. Aappaaguani Jehovap Nalunaajaasuisa Canadami sulinerat inerteqqutaalerpoq. Atuarfimmi meeqqat erfalasoq ilasseriarlugu inuiattut erinarsuut atoraangassuk qatanngutigalu Dorothy klassiup silataani utaqqisarnissarput ilinniartitsisut akuerisarpaat. Ilinniartitsisumali taamaalluni kanngusutsinniarlunga qunutunerarpaanga. Soraaratta atuaqatima arlallit saassuppaannga orlutillunga. Tamannali ‘Guutip inunnit naalannerunissaanik’ aalajangiusimanninnerulissutigaara. – ApS 5:29.
1942-mi juulimi aqqanilinnik ukioqarlunga nunaateqarfimmi imiisivissuarmi kuisippunga. Atuanngiffiup nalaani pioneriusarneq (tassa ikiorti-pioneriusarneq) nuannarisarpara. Ukiut ilaanni qatanngutit angutit pingasut ilagalugit Ontariop avannaatungaani orpippassuarni sulisartunut oqaluussiartorpunga.
1949-mi maajip aallaqqaataanni pionerinngorpunga. Canadami immikkoortortaqarfimmik sanaartornermi suleqataasussatut tamatumalu kingorna Canadami Betelimi kiffartortussatut qaaqquneqarpunga. Naqiterivimmi naqiterisutut ilinniartinneqarpunga. Eqqaamavara Jehovap innuttaanik Canadami malersuineq pillugu naqitaaqqanik sapaatit-akunnerini arlalinni unnuarsuarmut naqiterisarluta.
Kingusinnerusukkut Kiffartornermik Nakkutilliisoqarfimmi kiffartulerpunga. Pionerit Quebecimi, sumiiffimmi malersuisoqarfiungaartumi, kiffartortussat apersortussanngorpakka. Mary Zazula Albertami Edmontonimeersoq taakkua ilagaat. Biibilimik atuaqqissaartarnertik unitsikkusunngimmassuk angajoqqaavisa ilagiinnut grækerilerisunut ilaasortaasut Mary anialu angerlarsimaffimminnit anisippaat. Mary aninilu 1951-imi juunimi kuisipput qaammatillu arfinillit qaangiummata pionerinngorlutik. Apersuininni Maryp Jehovamik asanningaarnera takusinnaavara. Eqqaamavara eqqarsarlunga nuliartaarerusullugu. Qaammatit qulingiluat qaangiummata 1954-imi januaarip 30-anni katippugut. Katinnitta kingorna sapaatip-akunnera ataaseq qaangiuttoq nakkutilliisutut angalasartutut ilinniartinneqarnissamut qaaqquneqarpugut. Ukiuni marlunni tulliuttuni Ontariop avannaatungaani nakkutilliisutut angalasarpugut.
Nunarsuaq tamakkerlugu oqaluussineq siumukarnerujartortillugu ajoqersuiartortitat amerlanerusut
pisariaqartinneqalerput. Marylu eqqarsarpugut Canadami ukioq issittorsuaq aasakkullu ippernakasiit anigorsinnaagutsigit sumiluunniit najugaqarsinnaalluta. Ilinniarfimmi Gileadimi klassit 27-ssaanni ilinnialerpugut 1956-imilu juulimi naammassilluta. Novembarimi Brasiliamut nuuppugut.BRASILIAMI KIFFARTORNERPUT
Brasiliamut tikikkatta Portugalimiutut ilinnialerpugut. Aallaqqaammut ilassinninneq ilinniarparput. Taava aallarneeriaaseq naatsoq alanngaarsinnaanngorparput. Aatsaavissuaq oqaluussinitsinni arnaq tusarliussatsinnik soqutiginnittoq naapipparput. Pulaagaq soqutiginnippat Guutip naalagaaffiani inuuneq pillugu allassimaffimmik atuaaniarluta aalajangernikuugatta Saqqummersitat 21:3, 4-lu atuarpakka. Isugutattumili kiassuaq sungiusimannginnakku taartippunga. Kiak sungiutinngisaannarpara.
Illoqarfimmi Camposimi kiffartorpugut. Maannakkut tassani ilagiit 15-iupput! Taamani illoqarfimmi oqaluussisartoqatigiit avinngarusimasumiittut ataasiinnaapput, ajoqersuiartortitanullu angerlarsimaffimmi qatanngutit arnat sisamat Esther Tracy, Ramona Bauer, Luiza Schwarz aamma Lorraine Brookes (maanna Wallen) najugaqatigiipput. Ajoqersuiartortitanut angerlarsimaffimmi errorsineq qisuttarnerlu isumagisarpakka. Ataasinngornikkut unnukkut Napasuliaq Alapernaarsuiffik-mik atuaqqissaareerluta Mary akisilerluni sofami qasuersaarpoq. Ullup ingerlanerani misigisavut eqqartorpavut. Mary massimmat akitsip ataaniit pulateriaarsuk anillariataarpoq! Tatammutereerluta toquppara.
Portugalimiutut ukioq ataaseq ilinniareerluta nakkutilliisutut angalasalerpugut. Sumiiffinni innaallagiaqanngitsuni kiffartorpugut. Allequttani sinittarpugut hestinillu qimuttoqarluta angalasarluta. Taamaalluta sumiiffimmi avinngarusimasumiittumi oqaluussiumalluta illoqarfimmut qaqqamiittumut qimuttuitsorpugut. Tassani ineeqqamik attartorpugut. Immikkoortortaqarfiup atuagassianik 800-nik nassippaatigut. Karsit atuagassianik imallit allakkerivimmut uteqattaarlugit aasaqattaarpavut.
1962-imi Brasiliami sumiiffinni assigiinngitsuni Naalagaaffimmut Kiffartornermik Ilinniarfik ingerlanneqarpoq. Qaammatini arfinilinni kisimiillunga ilinniarfinnut taakkununnga angalaqattaarpunga. Manausimi, Belémimi, Fortalezami, Recifemi aamma Salvadorimi ilinniartitsivunga. Manausimiillunga operartarfimmi tusaamasami ataatsimeersuarneq aaqqissuuppara. Sialussuarnera pissutigalugu minguitsumik imeqarnanilu qatanngutit naleqquttumik neriartortarfissaqanngillat. Sakkutuut naalagaat oqaloqatigigakku ajornartorsiutitsinnik nassuiaappara. Ajunngisaarluni imermik sorujoqanngitsumik pilersorpaatigut. Aamma sakkutuut tupersuarnik marlunnik igaffittut nerisarfittullu atorsinnaasatsinnik nappaatippai.
Angalaninni Mary niuertarfinni oqaluussivoq. Inuilli aningaasarsiorniarlutik Portugalimiit Brasiliamut nuussimagamik soqutiginninngillat. Maryp
nikallorluni ikinngutimi ilaat oqarfigai: “Portugalimut nuunngisaannassaanga.” Tamatuma kinguninngua Portugalimi, nunami oqaluussinermik inerteqquteqarfiusumi, kiffartorsinnaanersugut aperineqaratta Mary assut tupappoq! Akuersivugulli Portugalimullu nuulluta.PORTUGALIMI KIFFARTORNERPUT
1964-imi aggustimi Portugalimi Lissabonimut tikippugut. Qatanngutit isertortumik politiinit sakkortuumik malersorneqarmata aalajangerpugut aallaqqaammut attaviginiarnagit. Ineeqqamik attartoreerluta visummit pigatsigit inissiamik attartorpugut. Qaammatit tallimat qaangiummata immikkoortortaqarfimmi qatanngutit attavigisinnaanngorpavut. Kiisami ataatsimiinnerni najuussinnaaleratta nuannaaqaagut!
Sulinitta inerteqqutaanera pissutigalugu naalagaaffilersaarfiit matuneqarmata qatanngutit angerlarsimaffinni ataatsimiittarput. Taakkua angerlarsimaffii politiinit misissorneqakulasarput. Qatanngutit hundredillit politeeqarfinni killisiorneqartarput. Qatanngutit angutit akisussaasut atii nalunaarutigeqqullugit politiinit ajortumik pineqartaramik imminnut illersorumallutik kinguliaqutit atorunnaarlugit atit kisiisa atortarpaat.
Qatanngutitta Biibililersaarutinik pinertusaarnissamut iluaqutissaminnik pisarnissaat pingaarnertut anguniagaraarput. Maryp allaaserisat atuaqqissaagassat Napasuliaq Alapernaarsuiffik-meersut pappiaqqanut duplikeeriilluni naqiterinermut atugassanut allattarpai.
EQQARTUUSSIVINNI NUTAARSIASSAP NUANNERSUP ILLERSORNERA
1966-imi juunimi Lissabonimi pingaarutilimmik eqqartuussisoqarpoq. Qatanngutit 49-t Feijómi ilagiinneersut angerlarsimaffimmi inerteqqutaasumik ataatsimiissimasutut unnerluunneqarput. Eqqartuussinermut piareersarniarlugit qatanngutit pisuunerat uppernarsarniarlugu eqqartuussissuserisuusaarpunga. Ilimageriikkatsitulli ajorsarpugut. Qatanngutit angutit arnallu 49-t ullut 45-t qaammatillu tallimat affarlu akornanni parnaarussaasussatut eqqartuunneqarput. Eqqartuussinerli nalunaajaataalluarpoq. Allaat eqqartuussinermi eqqartuussissuserisutta Biibilimi Gamalielip oqaasii issuarpai. (ApS 5:33-39) Tamatuma kingorna eqqartuussineq tusagassiuutini eqqartorneqarpoq. Eqqartuussissuserisorput Biibilimik atuaqqissaartalermat ataatsimiinnernilu najuuttalermat nuannaangaarpugut.
1966-imi decembarimi immikkoortortaqarfimmi nakkutilliisutut kiffartulerama piffissarujussuaq atorlugu eqqartuussinermut tunngasut isumagisarpakka. Jehovap Nalunaajaasuisa Portugalimi akornusersorneqaratik pallorfiginnissinnaanerat sapinngisatsinnik inatsisitigut tunngavilersorniartarparput. (Fil 1:7) Kiisami 1974-imi decembarip 18-ianni inatsisitigut akuerineqaratta qatanngutit Nathan Knorrip aamma Frederick Franzip qullersaqarfimmit tikeraarpaatigut. Oportomi Lissabonimilu puiunaatsumik ataatsimiinnitsinni 46.870-it najuupput.
Qeqertani Portugalimiutut oqaaseqarfiusuni – soorlu Acorini, Kap Verdemi, Madeirami aamma São Tomé & Príncipemi – oqaluussinermik sulineq Jehovap pilluaqquaa. Sumiiffinni taakkunani Nalunaajaasut amerliartortillugit immikkoortortaqarfik anginerusoq pisariaqalerpoq. Sanaartorneq naammassimmat qatanngut Milton Henschel 1988-imi apriilip 23-anni atoqqaartitsinermi oqalugiarpoq. Qatanngutit 45.522-t taakkunanngalu Portugalimi ajoqersuiartortitatut kiffartorsimasut 20-t najuupput.
AALAJAATSUT ILINNIARFIGAAVUT
Ukiut ingerlanerini Marylu qatanngutit angutit aalajaatsut ilinniarfigingaarpavut. Assersuutigalugu qatanngut Theodore Jaracz qullersaqarfimmit aallartitatut angalaqatigigakku pingaarutilimmik ilikkagaqarpunga. Immikkoortortaqarfimmi tikeraakkatsinni ajornartorsiut annertooq Immikkoortortaqarfiup Ataatsimiititaliaanut ilaasortat sapinngisaminnik aaqqinniarsimagaluarlugu iliuuseqarnerusinnaannginnertik ajuusaarutigaat. Qatanngutilli Jaraczip tuppallersarlugit ima oqarfigai: “Maanna anersaap illernartup sunniuteqartinnissaanut piffissanngorpoq.” Aamma ukiorpassuit matuma siorna Marylu Brooklynimi tikeraarluta qatanngutip Franzip oqaasii puiunngisaannassavakka. Arlaliulluta siunersioratsinni oqarpoq: “Ima siunnersussavassi: Qanorluunniit pisoqaraluarpat Jehovap peqatigiissortaa takussaasoq qimanngisaannassavarsi. Guutip naalagaaffianik nutaarsiassap nuannersup oqaluussissutigineqarnissaanik Jiisusip peqqussutaa taamaallaat maleruarsinnaavarput!”
Siunnersuutaanik maleruaanerput Marylu nuannaarutigeqaarput. Aamma qullersaqarfimmit aallartitatut nunani tamalaani immikkoortortaqarfinnut tikeraartarnivut puiunaatsut amerlapput. Taamatut angalasarnitsigut inuusuttunut utoqqarnullu aalajaatsunut qujamasunnermik ersersitsinissamut immikkullu ittumik Jehovamut kiffartortuarnissamik kajumissaarinissamut periarfissaqartarpugut.
Ukiorpassuit ingerlareerput, marluullutalu 80-it qaangereerpavut. Mary assigiinngitsunik peqqiilliuuteqarpoq. (2 Kor 12:9) Aamma allatigut misilinneqartarpugut. Misilinneqarnerilli taakku uppernikkut nakussatsissutigalugillu Jehovamut aalajaattuarnissamik aalajangiusimanninnerulissutigaavut. Ukiorpassuarni Jehovamut kiffartornerput eqqarsaatigigaangatsigu naluneq ajorparput amerlasoorpassuartigut Jehovap pisassarinngisaraluatsinnik ajunngisaarfigisaraatigut. *
^ par. 29 Allaaserisap matuma piareersarneqarnerani Douglas Guest Jehovamut aalajaalluni 2015-imi oktobarip 25-anni toquvoq.