Di tɛm we wi papa we nem Atɔ bin yɔŋ, i bin want fɔ bi minista na di Mɛtodist chɔch bikɔs i bin lɛk Gɔd. Bɔt i bin chenj in maynd di tɛm we i bigin fɔ rid sɔm pan di buk dɛn we di Baybul studɛnt dɛn de gi am, ɛn we i bigin fɔ go dɛn mitin dɛn. Insay di ia 1914, mi papa bin baptayz we i ol 17 ia. Insay Wɔl Wɔ Wan, dɛn bin tɛl am fɔ jɔyn di ami, bɔt i nɔ gri fɔ fɛt. So dɛn bin sɛn am na jel fɔ tɛn mɔnt na wan ples we dɛn kɔl Kingston Penitentiary na Ɔntɛrio insay Kanada. We dɛn pul am na jel, i bin bi colporteur, dat na di nem we dɛn bin de kɔl payɔnia dɛn trade.

Insay 1926, mi papa mared Ezɛl Wilkinsin. In mama bin dɔn lan di trut insay di ia 1908. A bin bɔn Epril 24, 1931. Mi na di sɛkɔn wan pan di 4 pikin dɛn we mi mama ɛn papa bɔn. Mi papa lɛk ɛn rɛspɛkt di Baybul, ɛn i tich wi fɔ du di sem tin. Di tin we bin impɔtant pas ɔl na wi layf na fɔ wɔship Jiova. Wi ɔl kin prich frɔm os to os ɔltɛm.—Di Apɔsul Dɛn Wok [Akt] 20:20.

Insay di ia 1939, Wɔl Wɔ Tu bin bigin. Di ia afta dat, dɛn bin stop Jiova Witnɛs dɛn wok na Kanada. Dɛn se skul pikin dɛn fɔ salut di flag ɛn siŋ di nashɔnal antɛm na dɛn klas rum dɛn. Bɔt di ticha kin alaw mi ɛn mi sista we nem Dorati fɔ go na do ɛnitɛm we dis de apin. Bɔt wande, mi ticha tray fɔ mek a shem bay we i tɔk se mi na fred man. We skul kɔmɔt, bɔku pan mi klasmet dɛn atak mi ɛn ib mi na grɔn. Wetin apin da de de jɔs mek a mekɔp mi maynd mɔ “fɔ du wetin Gɔd tɛl wi fɔ du, “ɛn nɔ” fɔ du wetin mɔtalman tɛl wi fɔ du.”—Di Apɔsul Dɛn Wok [Akt] 5:29.

Insay Julay 1942, a bin baptayz insay wan tank na wan fam. Da tɛm de a bin ol 11 ia. Ɛnitɛm we skul lɔk, a bin de ɛnjɔy fɔ du vacation pioneering, we wi de kɔl tide ɔgzilari payɔnia. Wan ia, a bin ebul fɔ go wit tri ɔda brɔda dɛn na di nɔt pat na Ɔntɛrio, usay wi bin prich to pipul dɛn we de kɔt big big tik dɛn fɔ mek wud ɔ bod.

A bigin fɔ rɛgyula payɔnia Me 1, insay 1949. Dɔn dɛn kɔl mi na di Kanada branch fɔ ɛp pan wan bildin wok we dɛn bin de du ɛn leta a bin bi Bɛtɛlayt. Dɛn bin put mi na di say we dɛn de print buk dɛn ɛn na de a bin lan fɔ wok wit wan mashin we dɛn de kɔl flatbed press. A mɛmba di tɛm we wi bin de wok ol nɛt fɔ sɔm wik fɔ ɛp fɔ print wan trakt we de tɔk bɔt aw Jiova in pipul dɛn de sɔfa na Kanada.

Leta, a bin wok na di Savis Dipatmɛnt. Dɛn bin gi mi di wok fɔ intavyu payɔnia dɛn we fɔ go sav na Kwibɛk, usay dɛn bin de rili mek Jiova in pipul dɛn sɔfa. Wan pan dɛn payɔnia dɛn de na Meri Zezula we kɔmɔt na Ɛdmɔtin insay Albata. In mama ɛn papa na bin mɛmba dɛn na di Ɔtodɔks Chɔch. We Meri ɛn in big brɔda nɔ bin gri fɔ lɛf fɔ stɔdi di Baybul, dɛn mama ɛn papa bin drɛb dɛn kɔmɔt na os. Meri ɛn in brɔda bin baptayz insay Jun 1951, ɛn afta siks mɔnt dɛn bin bigin fɔ payɔnia. Di tɛm we a bin de intavyu dɛn, a bin si se Meri rili lɛk Jiova. A mɛmba we a bin de tɛl misɛf se in na di uman we a go lɛk fɔ mared. Afta nayn mɔnt, wi bin mared Janwari 30, insay 1954. Dɔn afta wan wik we wi mared, dɛn bin invayt mi  ɛn Meri fɔ lɛ dɛn tren wi fɔ du sakit wok. Fɔ tu ia, wi bin du sakit wok na Ɔntɛrio.

As di prichin wok de go bifo ɔlsay na di wɔl, dɛn bin nid mɔ mishɔnari dɛn. Mi ɛn Meri si am se if wi ebul fɔ bia di kol wɛda na Kanada ɛn di maskita dɛn insay di sɔmma sizin, wi go ebul fɔ liv ɛnisay. Wi bin atɛnd di 27 klas na di Giliad Skul ɛn wi bin gradiet insay Julay 1956. Arawnd dɛn Novɛmba, wi bin de na wi nyu os na Brazil.

We wi rich na Brazil, wi bigin fɔ lan Pɔtyugiz. Fɔs, wi lan simpul we fɔ bigin fɔ tɔk. Afta dat, wi kram aw fɔ gi di magazin insay Pɔtyugiz. Dɔn wi go fil savis ɛn mit wan uman we lisin to wi we wi de prich to am. Wi dɔn disayd se if wi mit pɔsin we want fɔ lisin to wi, wi go rid wan skripchɔ we de tɔk bɔt aw layf go tan lɛk ɔnda Gɔd in Kiŋdɔm. So a rid Rɛvɛleshɔn 21:3, 4 dɔn a fent! A nɔ bin yuz to di wɛda we bin so ɔt. Di ɔt wɛda nɔ bin rili izi fɔ mi.

Wi bin de du wi mishɔnari wok na wan siti we dɛn kɔl Kampɔs. Tide, na 15 kɔngrigeshɔn dɛn de de! Bɔt we wi bin kam, na bin jɔs wan grup bin de na di siti ɛn wan mishɔnari os usay 4 sista dɛn bin de: Ɛsta Tresi, Remɔna Bawa, Luiza Shuwɔs, ɛn Lɔrin Bruks (naw in nem na Wɔlin). Mi wok na di mishɔnari os na fɔ ɛp fɔ bruk ɛn fɛn wud fɔ kuk. Wan Mɔnde nɛt afta wi dɔn du di Wachtawa Stɔdi, Meri bin ledɔm na di sɛti ɛn i bin le in ed pan wan pilo. Wi bin de tɔk bɔt wetin apin da de de. We Meri grap, wan snek kɔmɔt ɔnda di pilo! Di snek bin mek wi de wɔnda te a kil am.

Afta wi dɔn lan Pɔtyugiz fɔ wan ia, wi bigin fɔ du di sakit wok. Wi bin de sav na say dɛn we layt nɔ de. Wi bin de ledɔm na mat ɛn yuz ɔs ɛn karej fɔ travul. Wan tɛm wi yuz tren fɔ go na wan tɔŋ we de ɔp di mawntin dɛn so dat wi go prich na say we de fa frɔm di men tɔŋ. Wi rɛnt rum de. Di branch ɔfis sɛn 800 magazin dɛn fɔ wi fɔ prich wit. Wi bin gɛt fɔ go bɔku tɛm na di post ɔfis fɔ tek di bɔks dɛn we di magazin dɛn de insay.

Insay 1962, dɛn bin de gɛt di Kiŋdɔm Ministri Skul na difrɛn ples dɛn na Brazil. Fɔ siks mɔnt, a bin gɛt di wok fɔ travul ɛn go na dɛn skul dɛn de wan bay wan. A bin tich na Manaus, Belɛm, Fɔtelaza, Rɛsifa, ɛn Salvadɔ. We a bin de na Manaus, a bin ɔganayz wan kɔnvɛnshɔn na wan big ples we bɔku pipul dɛn sabi ɛn we dɛn de kɔl opera house. Bikɔs ɛbi ɛbi ren bin de kam, wi nɔ bin gɛt bɔku klin wata fɔ drink, ɛn wi nɔ bin gɛt fayn ples fɔ mek di brɔda ɛn sista dɛn it. A tɔk to wan big man na di ami ɛn ɛksplen wi prɔblɛm gi am. I bin arenj fɔ mek wi gɛt bɔku wata fɔ drink te di kɔnvɛnshɔn dɔn. I bin sɛn sɔm sojaman dɛn bak fɔ bil tu big tɛnt dɛn. Wi bin yuz wan tɛnt fɔ kuk ɛn di ɔda wan fɔ it.

Di tɛm we a nɔ bin de, Meri bin de prich na wan eria usay dɛn bin de du biznɛs, bɔt di pipul dɛn na  da eria de nɔ want fɔ tɔk bɔt di Baybul. Di pipul dɛn we bin de de bin kɔmɔt na Pɔtyugal ɛn kam na Brazil fɔ fɛn mɔni. Meri bin fil bad ɛn i tɛl sɔm pan in padi dɛn se. “Di las ples we a go want fɔ liv na dis wɔl na Pɔtyugal.” I nɔ tu te, nain wi gɛt lɛta. Insay di lɛta, dɛn kɔl wi fɔ go sav na Pɔtyugal, usay dɛn bin dɔn ban di prichin wok. Meri bin shɔk! Bɔt wi bin gri fɔ go.

Wi bin rich na Lizbɔn, insay Pɔtyugal, Ɔgɔst 1964. Di sikrit polis dɛn bin de rili mek layf tranga fɔ wi brɔda ɛn sista dɛn we bin de de. So i bin mek sɛns fɔ mek wi nɔ tray fɔ fɛn di Witnɛs dɛn we wi bin jɔs rich. Fɔs, wi bin de na wan rum we wi rɛnt. Dɔn we wi gɛt wi visa, wi bin rɛnt wan os. Afta fayv mɔnt, i bin sef fɔ lɛ wi tɔk to di brɔda dɛn we de na di branch. Wi bin gladi we wi ebul fɔ go na mitin!

Bikɔs dɛn bin ban di wok, dɛn lɔk ɔl di Kiŋdɔm Ɔl dɛn. Na sɔm brɔda dɛn os dɛn wi bin de gɛt di mitin dɛn. Polisman dɛn bin de kam luk na dɛn os dɛn ɔltɛm. Dɛn bin kɛr bɔku pan wi brɔda ɛn sista dɛn go na pɔlis steshɔn fɔ aks dɛn kwɛstyɔn. Di polis dɛn bin mɔlɛs dɛn ɛn tray fɔ fos dɛn fɔ mek dɛn sho sɔm brɔda dɛn nem, dat na di brɔda dɛn we de bifo na di kɔngrigeshɔn. So di brɔda dɛn stɔp fɔ yuz dɛn sɔ nem dɛn ɛn bigin fɔ yuz dɛn fɔs nem we dɛn want fɔ kɔl dɛnsɛf, so dat dɛn go protɛkt dɛnsɛf.

Di men tin we wi bin want na fɔ mek shɔ se wi brɔda dɛn stil de gɛt di buk ɛn magazin dɛn we go ɛp dɛn fɔ bia. Meri kin tayp Wachtawa stɔdi atikul dɛn ɛn ɔda atikul dɛn pan wan spɛshal pepa. Dɔn i kin yuz di pepa fɔ mek bɔku bɔku kɔpi fɔ di brɔda dɛn.

Insay Jun 1966, wi bin gɛt wan impɔtant kes na Lizbɔn. Dɛn bin ol ɔl di 49 mɛmba dɛn na di Fijɔ kɔngrigeshɔn bikɔs dɛn se dɛn ol mitin na sɔmbɔdi in os we dɛn nɔ gɛt rayt fɔ du dat. Fɔ rɛdi dɛn fɔ di kɔt kes, a mek lɛk se mi na di lɔya we go tray fɔ pruv se di brɔda dɛn rɔng. Bɔt wi lɔs di kes jɔs lɛk aw wi bin de tink. Ɔl di 49 brɔda ɛn sista dɛn bin go na jel. Dɛn nɔ bin jɔs de de fɔ 45 dez, bɔt dɛn bin de de fɔ fayv ɛn af mɔnt. Bɔt di kɔt kes bin mek wi ebul fɔ prich to pipul dɛn. Infakt, we wi bin de pan di kes, wi lɔya bin tɔk wetin Gameliɛl bin tɔk na di Baybul. (Di Apɔsul Dɛn Wok [Akt] 5:33-39) Leta, di wan dɛn we de rid nyus bin ripɔt bɔt wi kɔt kes. Wi bin rili gladi we wi lɔya bin bigin fɔ stɔdi di Baybul wit wi ɛn atɛnd di mitin dɛn.

Insay Disɛmba 1966, dɛn bin pik mi fɔ bi branch ovasia, ɛn a bin de spɛn bɔku tɛm de wok fɔ mek wi gɛt rayt fɔ du sɔm tin dɛn. Wi bin du ɔl wetin wi ebul fɔ mek dɛn si se dɛn fɔ gi Jiova Witnɛs dɛn di rayt fɔ wɔship fri wan na Pɔtyugal. (Lɛta Fɔ Filipay 1:7) Dɔn, Disɛmba 18, 1974, wi  bin gɛt di rayt fɔ wɔship fri wan. Brɔda Netan Nɔ ɛn Frɛdrik Franz bin kɔmɔt na di wɔl ɛdkwata kam fɔ gladi wit wi. Wi bin ol wan mitin we wi nɔ go ɛva fɔgɛt na Ɔpoto ɛn Lizbɔn ɛn na 46,870 pipul dɛn bin atɛnd.

Jiova bin mek di prichin wok go bifo bak na ayland dɛn usay pipul dɛn bin de tɔk Pɔtyugiz, ples dɛn lɛk di Ezɔs, Kep Vade, Mɛdira, ɛn Sao Tom ɛn Príncipi. As Jiova Witnɛs dɛn bin de bɔku na dɛn ples ya, wi bin nid big branch. Afta we dɛn bil di big branch, Brɔda Miltin Ɛnshɛl bin gi di tɔk we dɛn de gi di branch to Jiova Epril 23, insay 1988. Na 45,522 brɔda ɛn sista dɛn bin atɛnd dis program, plɔs 20 ɔda brɔda ɛn sista dɛn we bin dɔn sav as mishɔnari na Pɔtyugal we kam bak fɔ atɛnd di program.

As tɛm bin de go, mi ɛn Meri bin rili ɛnjɔy fɔ lan frɔm brɔda dɛn we bin fetful. Fɔ ɛgzampul, we a bin de wok wit Brɔda Tiodɔ Jeraz fɔ du zone visit, a bin lan wan impɔtant lisin. Di branch we wi fɔ go bin gɛt big prɔblɛm, ɛn di Branch Kɔmiti dɔn du ɔl wetin dɛn ebul fɔ ɛp. Dɛn bin fil bad we dɛn nɔ bin ebul fɔ du mɔ. So brɔda Jeraz bin kɔrej dɛn bay we i tɔk se: “Naw na di tɛm fɔ alaw di oli spirit fɔ du in wok.” Ɛn bak a nɔ go ɛva fɔgɛt wetin Brɔda Franz bin tɔk trade trade we mi ɛn Meri go waka na Bruklin. Sɔm pan wi bin aks am fɔ advays, ɛn i tɛl wi se: “Mi advays na: Una nɔ kɔmɔt na Jiova in ɔganayzeshɔn ilɛk wetin apin. Na dis ɔganayzeshɔn nɔmɔ de du di wok we Jizɔs bin tɛl in disaypul dɛn fɔ du, dat na fɔ prich di gud nyus bɔt Gɔd in Kiŋdɔm!”

Bikɔs mi ɛn Meri tek dis advays, wi rili gladi. Wi mɛmba bak sɔm fayn tin dɛn we bin apin di tɛm we wi bin de du zone visits na bɔku branch dɛn na di wɔl. Wi bin lɛk fɔ mit Jiova in savant dɛn, pikin dɛn, di yɔŋ wan dɛn, ɛn ivin di wan dɛn we dɔn ol, ɛn mek lɛ dɛn no se Jiova gladi fɔ wetin dɛn de du fɔ am. Wi bin de ɛnkɔrej dɛn ɔltɛm fɔ kɔntinyu fɔ sav Jiova.

Bɔku tɛm dɔn pas, ɛn mi ɛn Meri de insay wi 80 ia. Meri gɛt sɔm wɛlbɔdi prɔblɛm. (Sɛkɛn Lɛta Fɔ Kɔrint 12:9) Ɛn wi dɔn gɛt ɔda prɔblɛm dɛn. Bɔt dɛn prɔblɛm dɛn de dɔn mek wi gɛt mɔ fet ɛn dɔn mek wi mekɔp wi maynd mɔ fɔ kɔntinyu fɔ du wetin Jiova want. We wi mɛmba ɔl di tɛm we wi dɔn de sav Jiova, wi no se i dɔn blɛs wi bɔku we dɛn pan ɔl we wi nɔ fit fɔ mek i blɛs wi. *—Luk di futnot.