NTOKO mmiravo aamusivela Muluku, apapa yaachuna okhala muhooleli a ekerexa Metotista. Nyenya yaatoroka muupuwelo aya vaava yaalakhanyaaya soolaleeryiwa sa Oohuserya a Piipiliya nave yaapacerya okhala ni yaawo. Mu 1914, vaavaa apapa yaaryaayano iyaakha 17, yaahipatisiwa. Variyari va Ekhoco Etokweene Yoopacerya, yaalamuleliwa okhala mukhoco, nyenya yaakhooca owaniha. Mwawiihiiha yaahiwaleeliwa miyeeri khumi mu ekalaposo etokweene o Kanata. Emanle okumihiwa mukalaposo, yaahikhala Kolportor—nsina nenlo yiichaneliwaaya mapiyoneero akhalai.

Mu 1926, apapa yaahimuthela Hazel Wilkinison. Amannya a Hazel Wilkinison yaahusenrye eparipari mu 1908. Kiyariwe mu 24 a Apirili a 1931, ka mwaana anaawiili variyari va anamwane asese. Apapa yaanamusivela nave yaanamucicimiha Piipiliya, nave yaananihusiha weerano emohamoha. Omulapela Yehova yaari echu yookhweleya muukumini mwahu. Wiiliwiili naanalaleerya empa ni empa ntoko emusi.—Saweriwa T’arummwa 20:20.

Mu 1939, yaapacerya Ekhoco Etokweene Yanawiili. Voocharela, muteko wa Anamoona a Yehova o Kanata waawateelihiwa. Anamwane yaaya osikola yaanakokhorela nipantera ni wiipa ncipo nneemelela elapo mu nipuro naya na ohuserya. Wiiliwiili, ahusiha yaanakeemererya miyaano ni murokoraka Toroti okhumela vaate vaavaa yeeraayano yeela. Nyenya nihiku nimoha, muhusiha aka aaheererya okuuliha muru moorweela wa oloca wi kaari haleela. Nimanle ohuserya, asinthamwene osikola yaakiphara nave ekikakhela okhwipi. Yaweereya ela pahiru yaakeerinhe okhala oolalekelela “omwiwelela Muluku wapwaha atxhu.”—Saweriwa T’arummwa 5:29.

Mu Yulyu a 1942, kirino iyaakha 11, kaahipatisiwa mutankini. Yamala exikola miyaano kaanakhala piyoneero awiichuuwela—olelo nneeraahu piyoneero ookhaviherya. Eyaakha emoha kaaya o Ontario oomoko ni anna akina araru, weiwo naalalenryaanhuwo alopwana yuuha miri.

Mu 1 a Maiyu a 1949, kaahipacerya opiyoneero wa elukuluku yoothene. Voocharela kaahiwopiwa okhaviherya nikhuuru na oteka o efiliyali ya o Kanata nave ohoolo waya kipaka makupa a emusi ya Peteli o Kanata. Kaathanleliwe olapa ni maakina ookumiha, weiwo kaahusenryaakawo olapa ni makina enakumiha soolaleeryiwa. Kinnuupuwela elukuluku kaalapaka othana ni ohiyu mu isumana sincipale wi kikhaviherye okumiha etrataatu yaaloca sa wiikariwa wa achu a Yehova o Kanata.

Ohoolo waya, kaahilapa mu Nikhuuru na Muteko. Kaahithanliwa waapakela makoho mapiyoneero yaawo yaaya orumeelaka o Quebec, weiwo waariwo wiikariwa otokweene. Mmoha a mapiyoneero yaala aari Mariya Zazula o Etmonton, Alperta. Asitiithi awe yaari a ekerexa ya Ortodox. Vavaa Mariya ni munnawe awunnuwelavo yaakhoncaaya omaala omuhuserya Piipiliya, asitiithi aya yaahiwiikara vaate. Mariya ni munnawe yaapatisiwe mu Yunyu a 1951, nave miyeeri mithanu nammoha ohoolo waya yaapacerya muteko wa opiyoneero. Variyari va okoha ni waakhula, kaawerya woona wi Mariya aanamusivela vancipale Yehova. Kaahuupuwela wi owo aari mwali kaachunaaka wi kimuthele. Miyeeri mithanu nasese ohoolo waya, naahipaka othela—mu 30 a Yaneru a 1954. Esumana emoha nimanle othelana, miyaano ni mwaaraka naawopiwa wi nivyakihiwe mmuteko wa ooweherya a weeceeca. Mu iyaakha piili soocharela, naapaka muteko wa ooweherya aweeceeca o Ontario oomoko.

 Woona wi muteko woolaleerya elapo yoothene waanunnuwa, yaanachuneya mamisiyonaariyo ancipale. Mwaaraka ni miyaano naahuupuwela wi wakhala wi nookophola mu elukuluku yooriiryasa ni ya ipuuni mu elimwe o Kanata, nanwerya okophola mu nipuro vyakala. Mwawiihiiha naavolowa mu nikhuuru 27 na Exikola ya Kiliyati nave naamalinhe mu Yulyu a 1956. Mu Novempuru naahirummwa oya o Prasili.

Vaavaa naaphin’yaahu o Prasili, naapacerya ohuserya Ekunya. Woopaceryani, naahusenrye mikhalelo sookhweya sa opacerya ovaanela. Voocharela, naanahuserya mukhalelo wookhweya wa okawa erevista. Wookuchulani, naaya mmuteko woolaleerya nave naakumana ni muthiyana yoowo oonihenrye nchuno mmuchaka ahu. Naalakelela wi wakhala wi mulipa a vaate ohooniherya nchuno, nahaala waalakhanya yoorepa enaloca sa okumi mu olamulelo wa Omwene wa Muluku. Mwawiihiiha, kaamwaalakhanya Wupulula 21:3, 4—voocharela aanakirweela neeruuryu! Nkaakhovelenle oviha. Elukuluku ya elimwi yaanatitelela okhala nikacamiho wa miyo.

Muteko ahu woomisiyonaario waari o epooma ya Campos. Olelo, sookhalawo miloko sawaakhwana 15! Nyenya nrikimphiyaru, naariwo pahi nikhuuru nimoha nikhaani ni empa emoha ya mamisiyonaariyo yaarimo arokora asese: Ester Tracy, Ramona Pauwer, Luisa Schwars ni Lorraine Prookes (vano oniichaniwa Wallen). Murici aka waari okhaviherya ocapa ikuwo ni waavya ikhuuni wi yaapeiwe yoolya. Ohiyu omoha wa Noomorela muteko nimanle yoohuserya ahu ya Mulipeleli, mwaaraka aakiraathi vasofani nave muru awe aaxeenrye valmofatani. Naaloca sa mukhalelo nivirinhaahu nihiku. Vaavaa mwaaraka aavinnyeiye, enowa yaahikhuma valmofatani! Muleco yoola oohiwehereryeya aatannya woova otokweene naamwi hiiha naamwiipha.

Nimalinhe eyaakha emoha nihuseryaka Ekunya, naapacerya opaka muteko wa ooweherya aweeceeca. Naanarumeela mmapuro yaahaariwo makeesi. Naanakona vaniikwakhwa nave naanapaka mikwaha ni kavalo ni ekarowaxe. Ekwaha emoha naaya opooma ni kumpoiyu wi nalaleerye mapuro yaawo yahaalaleeryiwawo. Naapoleya ekwaartu naalivelaahu. Efiliyale yaarumiha irevista 800 wi nipharihele mmuteko woolaleerya. Naaphwanela opaka mikwaha mincipale oya o okoreiyu wi nakuse ikaaxa sa irevista.

Mu 1962, Exikola ya Orummwa wa Omwene yaanapakiwa mmapuro oohiyana hiyana o Prasili. Mu miyeeri mithanu nammoha, kaahirummwa opaka mukwaha mukhataaka kiyaaka exikola ti exikola. Kaahihusiha o Manaus, Belém, Fortaleza, Recife, ni Salvador. Vaavaa kaaryaaka o Manaus, kaarehererya muthukumano wa muceche mu empa yooniwamo exilema. Woona wi epwila etokweene yaanarupa, hinaarino maahi aphaama a owurya, nave hinaarino mpuro waphaama wi anna ni arokora elyeekevo nimanle nikupa na muthukumano wa muceche. Kaahiloca ni mpilisa nave kaamuleela nikacamiho nahu. Moophaameya aahipaka marehereryo a onivaha maahi awaakhwanela wa achu oothene a vamuthukumano. Owo aahaaruma atoropa wi epake  misakala miili mitokotoko, seiyo naapharihenlaahu naapeyaka ni mpuro wa olyamo.

Elukuluku kaapwahaakavo, mwaaraka aanalaleerya mmapuro a maroca, weiwo ahaariwo naari mano muchu mmoha aarino nchuno na oloca sa Piipiliya. Achu yaari weiwo yaaruule o Portukali wi empake nakoso. Mwaaraka aaceecheya nave aaloca wa asinthamwene awe ariki, “Nipuro kihinachunaakaru okhalawo ti o Portukali.” Moohilekela, naahaakhela ekaarata. Waari nwopelo wa orumeela o Portukali, weiwo muteko ahu woolaleerya waawateelihiwaaya. Mwaaraka haasiveliwe. Nyenya naaheemererya nwopelo nave naaya o Portukali.

Naaphin’ye o Portukali, mu Akostu a 1964. Kaaputera a weiwo aanawooniha ekoi annihu. Mwawiihiiha, waari wamiruku ohiwaavya Anamoona a Yehova a vanipuroni. Woopaceryani, naakhala mu ekwartu naapolen’yaahu nlivelaka. Voocharela, vaavaa naaryaahuno kartao a weemereryiwa, naapoleya empa yeeyo naalivelaahu. Simanle miyeeri mithanu, naari ootaphuwa owaavya ni oloca ni anna o efiliyale. Naatepa ohakalala vaavaa wookuchulani naawenryaahu oya mmithukumano!

Woona wi muteko ahu waahiwateelihiwa, Ipa sa Omwene saawaliwa nave mithukumano sa muloko seecihiwa mmavete mwa anna. Ipa saya saanaavyaavyiwa ni mapilisa. Masana a anna ni arokora yaakerihiwa o nipuro na mapilisa wi yapakeleliwe makoho. Mpilisa yoowo aakhaliha moonanara, aaheererya waakhinyeererya oloca masina a anna yaarino mirici. Mwawiihiiha wi ekhapelelane mukina ni mukhwaawe, anna yaamaala opharihela nsina nootiithi nave eniichanana pahiru ni nsina na mwaneene.

Yoolakelela ahu etokweene waari weeriha wi annihu yaakheleke soolaleeryiwa seiyo saakhaviherya ovilela. Mwaaraka aanarepa mwaha wa yoohuserya ya Mulipeleli ni soolaleeryiwa ikina mu epapeli. Voocharela ikoopiya sincipale saanakumihiwa moorweela wa epapeli wi ephwanyihiwe anna ancipale.

Mu Yunyu a 1966, waalociwa mulacu mutokweene o nipuro na othoriha o Lispoa. Anna oothene awaakhwana 49 a muloko wa Feixo yaahootheryiwa opaka muthukumano wooheemereryiwa vaate va munna. Wi kiirehererye ntakhara othoriha, kaamveka mulipa a waakiha malamulo wi ooniherye wi anna yaakhalano nthowa. Nyenya hinaawenrye ovootha mwaha owo. Anna ni arokora oothene awaakhwana 49 yaawaleliwa mukalaposo miyeeri mithanu ni emeya. Nyenya othorihiwa waavaha onamoona otokweene. Chiryene, variyari va othorihiwa, mulipa a waakiha malamulo, aaphiyerya oromola masu a Kamaliyeli orweela Mpiipiliya. (Saweriwa T’arummwa 5:33-39) Voocharela, othoriha iwo waalokohiwa mu iyornali ni araatiyu. Naatepa ohakalala vaavaa mulipa awaakiha malamulo aapacenryeiye omuhuserya Piipiliya ni hiyaano ni ophiya mmithukumano.

Mu Tesempuru a 1966, kaahithanliwa wi kikhale ooweherya a efiliyale nave kaamaliha elukuluku yincipale kilapaka ni miyaha sahu ni alamuleli. Naawetha wi weemereryiwe muteko wa Anamoona a Yehova o Portukali. (Filipi 1:7) Wookuchulani, mu 18 a  Tesempuru a 1974, naaheemereryiwa okhala ootaphuwa. Anna Nathan Knorr ni Frederick Franz yaahirwa orweela o nipuro ntokweene na Anamoona a Yehova wi ehakalale ni hiyo. Naakhalano muthukumano woohicuwaleya o Porto Riko ni o Lispoa ni achu awaakhwana 46.870.

Yehova tho aaheeriha wi muteko woolaleerya ophiye mu ivilivili weiwo achu yaalocaaya Ekunya, ntoko Asores, Kapo Verte, Mateira, ni São Tomé e Príncipe. Woona wi mapuro yaala Anamoona yaamvira yaaceereryeyaka, waanachuneya efiliyale etokweene. Emanle otekiwa, Munna Milton Henschel aapaka mwaha wa ohuliwa efiliyale mu 23 a Apirili a 1988. Yaakhalavo anna ni arokora awaakhwana 45.522, ophitaanyerya mamisiyonaariyo 20 o Portukali yaawo yaakonke wi yoone ohuliwa wa efiliyale.

Moovira wa iyaakha, mwaaraka ni miyaano naahuserya orweela wa sootakiherya sa anna oororomeleya. Ntoko yootakiherya, vaavaa kaalampaaka ni Munna Theodore Jaracz mu weecelela ifiliyale, kaahihuserya ichu sa esisapo. Efiliyale naaxekunryaahu yaakhalano nikacamiho ntokweene, nave Nikhuuru na Efiliyale naahipaka soothene naaweryaaya wi nikhaviherye. Nno naatepa othanana voosuwela wi hinaahaala owerya opaka sincipale. Mwawiihiiha Munna Jaracz aahilipiha moorweela wa oloca: “Vano ela elukuluku ya ovaha mpuro wi munepa waweela ophare muteko.” Navetho nkini kicuwale echu Munna Franz aalonceiye iyaakha sincipale muculi vaavaa miyaano ni mwaaraka naakelaahu oxekurya o Brooklyn. Ancipale a hiyo naamveka ekano, nave aanileela: “Echu kinooleelakani ti ela: Mukhale mmarehereryo awooneya a Yehova mu ilukuluku sookacamiha ni saphaama. Eyo tiwi opaka pahiru muteko Yesu aalamulenleiye oomuchara awe—olaleerya michaka saphaama sa Omwene wa Muluku!”

Weerano yeela ennakeeriha miyaano ni mwaaraka okhala oohakalala. Ninnuupuwelela ilukuluku seiyo nrumenlaahu ntoko ooweherya a weeceeca, ni weecelela ifiliyale orukurerya elapo yoothene. Naanasiveliwa othukumana, ni waalipiha akapuro a Yehova a iyaakha soothene wi muteko aya wa Yehova ti woothamaleleya. Wiiliwiili ninnaalipiha otitelela omurumeela Yehova.

Soovira iyaakha sincipale, nave oopiili ahu nrino waacamela iyaakha 80 sa oyariwa. Mwaaraka ookhalano makacamiho mancipale a ekumi. (2 Korinto 12:9) Nave nookhalano tho saweeha ikina. Nyenya saweeha seiya sinnalipiha nroromelo nahu nave sinnaneeriha okhala oolakelela otitelela oororomeleya wa Yehova. Vaavaa nnuupuwelaahu iyaakha ivinre nimurumeelaka Yehova, ninnoona wi owo onnanreeliha ni mahala awe mmikhalelo soohiyana hiyana. *—Moone masu avathi.