ÑUCA yayaca Arthur shutimi carca. Paica Diospi crij cashcamantami Iglesia Metodista nishcaman purinata yuyacurca. Pero Estudiantes de la Bibliacunapaj publicacioncunata leyishca qꞌuipaca paicunahuanmi tandanacui callarirca. Paica 17 huatacunata charishpami 1914 huatapi bautizarirca. Primera Guerra Mundialpi soldado tucuchun nijpipish paica mana munarcachu. Chaimantami Canadá llajtapaj Kingston pueblopi 10 quillacunata carcelpi churarca. Carcelmanta llujshishca qꞌuipaca colportormi tucurca, cunanca precursores nishpami rijsinchij.

Ñuca mamaca Hazel Wilkinson shutimi carca. Paipaj mamaca 1908-pimi Diosta rijsishca carca. Shinallataj ñuca yaya mamaca 1926 huatapimi cazarashcacuna carca. Ñucaca 24 de abril de 1931-pimi huacharircani. Chuscu huahuacunamantaca segundo lugarpimi huacharircani. Ñuca yayaca Bibliata estudianatami munaj carca. Chaimantami ñucanchijpish chaillatataj rurasha nircanchij. Ñuca familiapajca Diosta servinami ashtahuan importante carca. Chaimantami huasin huasin Diosmanta huillangapaj tandalla llujshij carcanchij (Hechos 20:20).

1939-pica Segunda Guerra Mundialmi callarirca, chai huata qꞌuipaca Canadá llajtapica Testigocuna Diosmanta ama yachachishpa catichunmi jarcarcacuna. Escuelacunapipish huambracunaca banderata saludana, himnotapish cantanami carca. Chai horascunaca profesorcunaca ñucatapish, ñuca panitapish canllaman llujshichunmi saquijcuna carca. Pero shuj punllaca ñuca profesoraca manchaisiqui nishpami pingaipi churarca. Shinallataj clases tucurishca qꞌuipaca ñuca compañerocunaca macashpami pambaman shitarcacuna. Chaita rurajpipish ñucaca mana desanimarircanichu, ‘runacunata cazunapaj randica Taita Diostami cazusha’ nircani (Hechos 5:29).

11 huatacunata charishpami julio de 1942-pi, shuj haciendapi tanque yacupi bautizarircani. Escuelamanta vacacionman llujshishpaca precursormi tucuj carcani. Cunan punllacunapica precursor auxiliar nishpami rijsinchij. Shuj huatacarin quimsa huauquicunahuanmi Ontario llajtapi yantata mashcajcunaman huillanaman rircanchij.

1 de mayo de 1949-pimi precursor regular tucurcani. Chai huatacunami Canadapi tiyaj sucursalman invitarca. Chaipica construccionpimi trabajarcani. Asha quillacuna qꞌuipaca betelita cachunmi invitarcacuna. Betelpi cashpaca imprimina maquinacunapimi trabajarcani. Huaquin semanacunataca tutacunami uchilla hojacunata imprimishpa trabajarcani. Chai hojacunapica Canadá llajtapi Diosmanta ama yachachichun nishpa testigocunata llaquichishcatami parlarca.

Qꞌuipaca Departamento de Serviciopimi trabajachun mañarcacuna. Quebec llajtamanmi huaquin precursorcuna servinaman ricurcacuna. Quebec llajtapica testigocunataca achcatami llaquichicurcacuna. Chai llajtaman rigrij precursorcunatami huaquin tapuicunata rurana carcani. Chaipimi María Zazulata rijsircani. Paipaj yaya mamaca Iglesia Ortodoxa nishcamanmi rijcuna cashcarca. Paipish paipaj jatun turipish Bibliamanta yachanata mana saquisha nishcamantami yaya mamaca huasimanta llujshichishpa cachashca carca. Pero ishquindijmi junio de 1951-pi bautizarishcacuna carca. 6 quillacuna qꞌuipaca precursorcunami tucushca carca. Mariata tapucushpaca, paica Jehová Diosta achcata cꞌuyashcatami ricurcani. Chaimantami paihuan cazaranami alli canman yuyarcani. Chai qꞌuipaca, 9 quillacunata rijsinacushpami 30 de enero de 1954-pi cazararcanchij. Cazarashca shuj semana qꞌuipaca superintendente de circuito shina servingapajmi preparacionta chasquichun invitarca. Chai qꞌuipaca ishqui huatacunatami Ontario llajtapi, congregacioncunata visitarcanchij.

 Tucui llajtacunapimi Diosmanta yachachina minishtirirca. Chaimantami ashtahuan misionerocunapish minishtirirca. Ñuca huarmihuanca cai Canadá llajtapi chiritapish, calortapish, chuspicunatapish ahuantashcanchijllami, shinaca maipipish causashunllami nishpami parlanacurcanchij. Chai qꞌuipaca clase 27 de la Escuela de Galaad nishcamanmi rircanchij. Julio de 1956 huatapimi graduarircanchij. Chuscu quillacuna qꞌuipaca Brasilpimi servinaman rircanchij.

Brasilman chayashpaca portugués shimitami yachai callarircanchij. Gentecunata saludashpa parlai callaringapajmi huaquin palabracunata yacharcanchij. Revistacunata gentecunaman saquingapajpishmi imata ninata yacharcanchij. Qꞌuipaca huillanamanmi llujshircanchij. Gentecuna uyanata munajpica Jesús cai pachata ña mandacushpa ima shina gentecuna causanamantami parlasha nircanchij. Chai punlla shuj huarmi Diosmanta uyanata munajpimi Apocalipsis 21:3, 4-ta leyircanchij. Qꞌuipaca ñapishmi desmayarircani. Calorpica manataj amañarircanichu.

Qꞌuipaca Campos nishca llajtamanmi cacharcacuna. Chaipica 15 congregacioncunami cunanca tiyan. Pero chai tiempopica shuj uchilla grupollami tiyarca. Shinallataj chuscu panicunallami casa misional nishcapi causacurcacuna. Paicunaca: Ester Tracy, Ramona Bauer, Luiza Schwarz, Lorraine Brookes shuticunami carca. Casa misional huasipica ropata tajshanata, yanungapaj yantata apamushpami ayudana carcani. Shuj lunes tutataca, La Atalaya revistata estudiashca qꞌuipaca punllapi imallata rurashcatami ñuca huarmihuan parlacurcani. Paica shuj mueble jahuapimi saunashpa samaricurca. Jatarijpica ñapishmi shuj culebra sauna ucumanta llujshirca. Chaita ricushpaca achcatami mancharircanchij, pero chai culebrataca huañuchircanimi.

Shuj huatata portugués shimita yachacushca qꞌuipami superintendente de circuito shina servichun invitarcacuna. Huaquin pueblocunapicarin luzpish mana tiyarcachu. Estera jahuapimi dormij carcanchij, maimanpish caballopi, carretacunapimi viajana carcanchij. Shuj cutinca urcu chaupipi tiyaj caru llajtapimi huillana carcanchij. Chaiman chayangapajca trenpimi rircanchij, chaipimi shuj cuartota arrendarcanchij. Sucursalmantaca 800 revistacunatami huillangapaj cacharcacuna. Chaicunata apamungapajmi cutin cutin tren shayarina oficinaman rina carcani.

1962-pica huaquin pueblocunapimi Escuela del Ministerio del Reino nishca tiyarca. Chaipimi clasesta cuna carcani. 6 quillacunatami Manaos, Belém, Fortaleza, Recife, Salvador pueblocunapi clasesta cushpa viajaj carcani. Manaos pueblopi cashpaca shuj jatun tandanacuitami organizarcani. Tandanacui punllacunaca achcatami tamyarca. Chaimantami limpio yacupish, maipi micuna pushtupish mana tiyarca. Chaimi shuj militarman ima tucushcata parlarcani. Paica preocuparishpami tandanacui tucuringacama yacu tiyachun ayudarca. Shujtaj soldadocunata cayashpami jatun carpacunata shayachichunpish mandarca. Chai carpacunapimi cocinatapish, micunapaj mesacunatapish churarcanchij.

Clasesta cushpa viajacujpica ñuca huarmica negociocunapimi Diosmanta huillarca. Chaipi caj gentecunaca Portugal llajtamantami shamushcacuna carca. Paicunaca cullquita gananallatami yuyajcuna carca.  Chaimantami Diosmanta mana uyasha nircacuna. Caita ricushpami ñuca huarmica huaquin huauquicunamanca: “Portugal llajtapica nunca mana causanaman rishachu” nirca. Qꞌuipa punllacunaca shuj cartatami chasquircanchij. Chai cartapica Portugalpi servichunmi invitanchij nircami. Chaita yuyashpaca ñuca huarmica mancharishcami saquirirca. Portugalpica Diosmanta ama yachachichunmi jarcashcacuna carca. Pero ari nishpami chai llajtapi servinaman rircanchij.

1964-pimi Portugalman chayarcanchij. Cai llajtapica Diosmanta huillachunca mana saquicurcacunachu. Chaimantami huauquicunahuan tupanacunaca manaraj allichu canga nishpa shuyarcanchij. Cunanlla chayashpaca shuj uchilla cuartotami alquilarcanchij. Qꞌuipacunaca, chai llajtapi ña saquiringapaj papelcunata ña cujpimi shujtaj ashtahuan alli huasita alquilarcanchij. 5 quillacuna qꞌuipami sucursalmanta huauquicunahuan parlai tucurcanchij. Chai tucui tiempopi shuj tandanacuiman ri tucushcamantami cushilla sintirircanchij.

Jarcaicuna tiyashcamantami Tandanacuna Huasicunaca huichcashca carca, tandanacuicunatapish huauquicunapaj huasicunapimi rurajcuna carca. Policiacunapish testigocunapaj huasicunataca cada ratomi ricushpa purijcuna carca. Achca huauquicunata panicunatapish tapungapajmi cuartelman apajcuna carca. Policiacunaca pushaj huauquicunapaj shutita huillachun nishpami mana alli tratajcuna carca. Chai huauquicunata ama llaquichichunmi apellidocunapi cayanapaj randica paicunapaj shuticunallapi cayajcuna carca.

Huauquicunapish panicunapish llaquicunata ahuantashpa catichunmi, publicacioncuna amataj faltachun munarcanchij. Chaimantami ñuca huarmica La Atalaya revistamanta yachangapaj temacunata, shujtaj publicacioncunatapish escribina maquinapi escribij carca. Shuj alli papelpimi escribij carca. Cai papelca shujtaj copiacunata rurangapajpishmi servij carca.

Lisboa llajtapica junio de 1966-pica, 49 huauquicunata panicunatami juiciopi churarcacuna. Paicunataca ama rurachun nishca tandanacuimanmi rishcanguichij nishpami juchachircacuna. Chai juicio punllapi huauquicuna imata ninata yachachunmi, ñucaca abogado tucushpa paicunata tapushpa repasachircanchij. Chai juiciotaca perdircanchijmi. Chashna cashcamantami cai 49 huauquicunatapish panicunatapish carcelpi churarcacuna. Maijancunataca 45 punllacunatami carcelarcacuna, shujtajcunataca 5 quilla chaupitami carcelarcacuna. Pero cai jucio tiyashcamantami Diosmanta alli huillai tucurcanchij. Ñucanchij abogadoca Bibliapi parlashca Gamaliel runamanta parlashpami cai juiciotaca tucuchirca (Hechos 5:33-39). Cai juicioca radiopi, televisionpimi llujshirca. Qꞌuipaca ñucanchij abogadopish Bibliamanta yachai callarishcamanta, tandanacuicunaman ri callarishcamantapishmi achcata cushicurcanchij.

Diciembre de 1966 huatapica, superintendente de sucursal cachunmi invitarcacuna. Achca tiempotami leycunapi mandashcata ima shina pajtachinata ricuj carcani. Por ejemplo, Portugal llajtapi testigo de Jehovacuna Diosmanta yachachishpa catichun, leycuna ama jarcachunmi ricuj carcani (Filipenses 1:7). 18 de  diciembre de 1974 huatapimi leycunapica Diosmanta yachachichun saquirca. Cai ley llujshijpica Estados Unidosmantami huauqui Nathan Knorrpish, huauqui Frederick Franzpish ñucanchijta visitanaman shamurcacuna. Paicunahuanmi Oporto llajtapipish, Lisboa llajtapipish shuj tandanacuita charircanchij. Chai tandanacuipica 46.870 runacunami tandanacurcanchij.

Diospaj ayudahuanmi portuguesta parlajcunaman Diosmanta ashtahuan huillai tucurcanchij. Por ejemplo, Azores, Madeira, Cabo Verde, Santo Tomé, Príncipe nishca islacunapimi huillarcanchij. Cai pushtucunapi Diosmanta yachasha nijcuna ashtahuan mirajpimi ashtahuan jatun sucursalta rurana minishtirirca. Chaimantami ashtahuan jatun sucursalta shayachircanchij. 23 de abril de 1988-pimi huauqui Milton Henschelca shuj conferenciata cushpa cai sucursalta Diosman mingarca. 45.522 huauqui panicunapish Portugalpi ñaupa servij 20 misionerocunapishmi cai conferenciaman shamurcacuna.

Cai tucui huatacunapica, ñucapish ñuca huarmipish Diosta tucui shunguhuan servij huauquicuna panicunamantami achcata yachashcanchij. Por ejemplo, shuj cutinca huauqui Teodoro Jaraczca shuj sucursaltami visitanaman rirca. Ñucapish paihuanmi rircani. Chai sucursalpica shuj jatun problemami tiyashca carca. Chai sucursalta pushaj huauquicunapish allichingapajmi tucuita rurashca carca. Pero chai problemacuna mana tucurishcamantami llaquilla cashcacuna carca. Huauqui Teodoroca, “cunanca Diospaj espíritu santo ayudachun saquichij” nishpami animarca. Shinallataj Estados Unidosman ñuca huarmihuan rijpica huauqui Franz nishcataca mana cungarishachu. Ñucanchijpish shujtaj huauquicunapish shuj consejota mañajpica cashnami nirca: “Ima tucushpapish Jehová Diospaj pueblotaca amataj saquinguichijchu, Diospaj pueblollami Jesús mandashcata cazushpa Diosmanta yachachicun” nirca.

Huauqui Franz cushca consejocunata catishpami ñucapish ñuca huarmipish cushilla causashcanchij. Shinallataj sucursalcunata visitanaca sumajmi carca. Cushicushpami yuyarinchij. Diosta tucui shunguhuan servij achca jovencunata mayorcunatapishmi rijsircanchij. Paicunataca: “Cancunapaj rurashcacunaca Diospajca achca valishcami. Diosta servishpa catichij” nishpami animaj carcanchij.

Cunanca ñami 80 yalli huatacunata charinchij. Ñuca huarmica achca ungurishcami pasan (2 Corintios 12:9). Shinallataj shujtaj llaquicunatami pasashcanchij. Pero chai llaquicunahuan cashpaca ashtahuanmi Diospi shunguta churashcanchij. Diosta servicushpa imallata rurashcata yuyarishpaca Jehová Dios ñucanchijta cꞌuyashcatami ricushcanchij * (urapi ricurij notata ricui).