МО ДАД, о Артур, панда сар терно мангела сине е Девле хем мангела сине те овел свештенико ки методистичко црква. Ама, кеда читинѓа нешто тари литература таро Истражувачија е Библијакере, ов сменинѓа пло мислење хем почминѓа те дружинел пе ленцар. Ко 1914 берш, кеда сине ле 17 берш, ов крстинѓа пе. Кеда сине и Прво светско војна, добинѓа покана те џал ки војска, ама, ов одбинѓа. Адалеске, сине осудимо те овел пханло деш масек ко Кингстон (Онтарио, Канада). Кеда иклило таро затвор, уло колпортери, сар со викинена пе сине о пионерија ко адава време.

Ко 1926 берш, мо дад женинѓа пе јекхе пхењаја, и Хејзел Вилкинсон. Лакири дај шунѓа башо чачипе ко 1908 берш. Ко 24 април 1931 берш, бијандиљум ме, о дујто таро штар чхаве. Мо дад бут мангела сине те читинел и Библија хем аменде да сикавѓа те кера адава. Најважно ко живото сине аменге те служина е Јеховаске. Редовно сар фамилија проповединаја сине таро кхер ко кхер (Дела 20:20).

Ко 1939 берш, почминѓа и Дујто светско војна. О јавер берш, е Јеховаскере сведоконге ки Канада сине забранимо те проповединен. Ко школе, таро ученикија родела пе сине те поздравинен о знаме хем те гиљавен и химна. Обично о наставникија мукхена сине ме хем ми пхен и Дороти те икљова тари просторија кеда о јавера керена адава. Ама, јекх диве мо наставнико мангља те лаџакерел ман англо сарине хем вакерѓа манге кај сиум кукавица. Кеда завршинѓе о часија, некобор чхаве тари школа нападинѓе ман хем перавѓе ман ки пхув. Адава керѓа те овав панда поодлучно те шунав е Девле сар владетели, а на е манушен (Дела 5:29).

Ко јули 1942 берш, кеда сине ман 11 берш, крстинѓум ман ко резервоари пањеске ки јекх фарма. Секова распуст користинава ле сине те овав помошно пионери. Јекх берш, сине ман прилика заедно трине пхраленцар те џав ко северно дело таро Онтарио те шај те проповедина е манушенге со чхинена кашта.

Ко 1 мај 1949 берш, почминѓум е општо пионерско службаја. Пало несаво време сиум сине викимо те поможинав те градинел пе и подружница ки Канада, коте со покасно почминѓум те служинав сар члени ки адаја бетелско фамилија. Служинава сине ки печатница коте со сиклиљум сар те користинав и печатарско преса. Сетинава ман кај некобор курке цело рат кераја сине бути те шај те печатина јекх трактати кова со керела сине лафи башо прогонство со сине е Јеховаскере народо ки Канада.

Пало несаво време, служинава сине ко Одделение баши служба. Сине манге денди задача те интервјуиринав е пионерен со ваљани сине те служинен ко Квебек, коте со сине баро прогонство. Јекх таро акала пионерија сине и Мери Зазула таро Едмонтон (Алберта, Канада). Лакере родителија сине православна. Кеда и Мери хем лакоро пхрал на мангле те чхинавен е проучибаја и Библија, ленгере родителија палдинѓе лен таро кхер. Ој хем лакоро пхрал крстинѓе пе јуни 1951 берш хем пало шов масек почминѓе е пионерско службаја. Џикоте интервјуиринава ла сине дикхљум кај бут мангела е Јехова. Сетинава ман кај мислинѓум манге, акаја пхен би мангава те овел мли ромни. Пало ења масек, венчинѓем амен — ко 30 јануари 1954 берш. Јекх курко пали амари венчавка сием сине викиме те добина обука баши покраинско служба. Дуј берш сием сине ки акаја служба ко северно дело таро Онтарио.

 Адалеске со о проповедиба бајрола сине бут сигате ко цело свето, сине потреба таро повише мисионерија. И Мери хем ме мислинѓем аменге, чим амен шај сине те издржина о шудре евенда хем о досадна комарција нилаеске ки Канда, тегани ка шај те издржина сегде. Гелем ки библиско школа Гилеад хем ко јули 1956 берш, дипломиринѓем ко 27 класи. Ноември, сием сине ки амари неви доделба — Бразил.

Кеда реслем ко Бразил, почминѓем те сикљова и португалско чхиб. Прво, почминѓем те сикљова некобор лафија те шај те почмина разговор, а пало адава кратка презентацие сар те нудина списание. Тегани, кеда гелем ки служба, аракхлем јекхе ромња која со сикавѓа интерес. Англедер договоринѓем амен кај, ако некој сикавела интерес, ка читина леске несаво стихо со вакерела саво ка овел о живото кеда ка владинел е Девлескоро Царство. Адалеске читинѓум Откровение 21:3, 4 — хем пало адава пељум ко несвест! Сине манге бут пхаро те издржинав о татипе хем о влажно време. Никогаш на успејнѓум те навикнинав ман ки адаја клима.

Е мисионерско службаја почминѓем ки диз Кампос. Авдиве адари иси 15 собранија! Ама, прво пути кеда гелем, сине само јекх група хем мисионерско кхер коте со живинена сине штар пхења: Естер Трејси, Рамона Бауер, Луиза Шварц хем и Лорејн Брукс (акана Вален). Мли задача ко мисионерско кхер сине те поможинав те тховен пе о шеја хем те анав кашта те керел пе хајбаске. Јекх рат понеделник кеда завршинѓем е проучибаја и Стражарско кула, и Мери пашлили упро јекх јастуко ко каучуко. Кераја сине лафи сар накхља аменге о диве. Кеда уштили таро каучуко, тело јастуко коте со пашљола сине иклило сап! Акава биканимо госто керѓа аменге бари буна са џикоте на мударѓум ле.

Пало јекх берш, кеда сиклилем и чхиб, почминѓем е покраинско службаја. Служинѓем ко тхана коте со на сине струја. Соваја сине теле ки пхув хем патујнаја сине грастеа хем кочијаја. Те шај те проповедина ко тхана коте со на сине проповедимо, гелем возеа ко јекх гради ко планине хем адари лелем јекх соба ки кирија. И подружница бичхалѓа аменге 800 списанија те користина лен ки служба. Ваљани сине повише пути те џа ки пошта те шај те ла са о кутие.

Ко 1962 берш, ко различна тхана ко цело Бразил икерела пе сине и школа башо именујме пхраља. Шов масек, ваљани сине коркори те патујнав тари јекх школа ки јавер. Сиум сине инструктори ко Манаус, Белем, Форталеза, Ресифе хем Салвадор. Кеда сиум сине ко Манаус, организиринѓум обласно конгрес ки јекх пенџарди сала баши опера. Адалеске со сине баро бршим, на сине доволно чисто пани пијбаске хем на сине амен шукар тхана коте со шај о пхраља хем о пхења те хан маро (ко адава време, ко конгресија дела пе сине хајбаске). Керѓум лафи јекхе воено офицереа хем вакерѓум леске башо амаро проблеми. Ов сине љубезно хем грижинѓа пе те овел амен доволно пани пијбаске башо цело конгрес. Исто аѓаар, бичхалѓа војникија те чхивен дуј баре шаторија, кола со користинѓем лен сар кујна хем трпезарија.

Џикоте на сиум сине кхере, и Мери проповединела сине ко деловна тхана, коте со никој на мангела  сине те керел лафи баши Библија. Адала мануша сине тари Португалија хем але ко Бразил те заработинен паре. И Мери разочаринѓа пе хем вакерѓа несаве пле амаленге: „И Португалија тани последно тхан ко свето коте со би мангава те живинав“. Кратко пало адава, добинѓем јекх писмо. Адава сине покана те служина баш ки Португалија, коте со о проповедибе сине забранимо. И Мери нашти сине те верујнел. Ама, прифатинѓем и доделба хем селинѓем амен ки Португалија.

Реслем ко Лисабон (Португалија), ко август 1964 берш. И тајно полиција керела сине е пхраленге бут проблемија. Адалеске, на сине мудро одма те контактирина е Јеховаскере сведоконцар адари. Прво, живинѓем киријаја ки јекх соба, ама кеда добинѓем виза лелем ки кирија јекх стани. Пало панџ масек, шај сине те контактирина е пхраленцар тари подружница. Сием сине бут бахтале со шај сине те џа ко состанок.

Адалеске со о проповедибе сине забранимо, о дворане сине пханле, а о состанокија икерена пе сине ко кхера е пхраленгере. И полиција редовно проверинела сине е пхраленгере кхера. Бут пхраља хем пхења сине ингарде ко полициска станице те овен испрашиме. И полиција малтретиринела лен сине хем чхивела лен сине силаја те вакерен о анава е одговорна пхраленгере. Те шај те заштитинен пе јекх јекхеа, о пхраља на користинена сине пумаре презимија него викинена пе сине само ко анав.

Амари главно цел сине те грижина амен о пхраља понадари да те добинен литература која со ка поможинел лен те издржинен о прогонство. И Мери, машинаја башо куцибе, ки јекх посебно хартија пишинела сине о статие проучибаске тари Стражарско кула хем јавер литература. Адаја хартија пало адава користинела пе сине сар матрица те шај те керен пе повише копие е пхраленге.

Ко јуни 1966 берш, ко Лисабон икерѓа пе јекх важно судско случај. Са о 49 членија таро собрание Фејжу сине обвиниме адалеске со сине ко јекх незаконско состанок со икерѓа пе ко несаво кхер. Те шај те спремина лен башо акава судибе, вежбинаја сине аѓаар со ме сиум сине о адвокати со ваљанѓа те докажинел кај о пхраља тане крива. Хем сар со мислинѓем, губинѓем о случај. Са о 49 пхраља хем пхења сине пханле ко затвор таро 45 диве џи ко панџ текваш масекија. Ама, адава судибе денѓа баро сведоштво. Џикоте сине о судибе амаро адвокати чак цитиринела сине о лафија таро Гамалиел сој пишиме ки Библија (Дела 5:33-39). Пало адава, о медиумија известинѓе башо акава судибе. Сием сине бут бахтале со амаро адвокати почминѓа те проучинел и Библија хем те џал ко состанокија.

Ко декември 1966 берш, сиум сине именујмо сар надгледнико ки подружница, хем побаро дело таро мло време грижинава ман сине башо правна буќа. Керѓем са со шај те ана јекх правно основа е Јеховаскере сведоконге ки Португалија те шај слободно те служинен е Девлеске (Фил. 1:7). Ко 18 декември 1974 берш, о проповедибе конечно сине законско признајмо. О пхрал Натан Нор хем о пхрал Фредерик Франц але таро главно седиште те  радујнен пе заедно аменцар. Сине амен конгрес ко Порто хем ко Лисабон, сине присутна 46.870 џене, акава конгрес никогаш нане те бистра ле.

О Јехова керѓа исто аѓаар те проповединел пе ко островија коте со о мануша керена сине лафи ки португалско чхиб, сар на пример, ко Азорска Островија, Зелен ’Рт, Мадеира, Сао Томе хем Принсипе. Адалеске со о број таро објавителија бајрола сине ко акала тхана, сине потреба тари побари подружница. Кеда завршинѓа пе е градибаја, о пхрал Милтон Хеншел икерѓа јекх говор хем свечено пхравѓа и подружница ко 23 април 1988 берш. Сине присутна 45.522 пхраља хем пхења, адатхе сине исто аѓаар 20 џене кола сине англедер мисионерија ки Португалија хем але башо акава посебно настан.

Ко са адала берша, ме хем и Мери сиклилем бут таро верна пхраља. На пример, кеда сиум сине е пхралеа Теодор Џерес ки јекх зонско посета, сиклиљум јекх бут важно поука. И подружница со посетинѓем ла сине ла бут баро проблеми хем о пхраља таро Одбор керѓе са со шај те поможинен. Осетинѓе пе бут лошно со на џанле со јавер те керен те шај те решинен о проблеми. Адалеске о пхрал Џерес утешинѓа лен е лафенцар: „Акана тано време те мукха о свети дух те керел пло“. Исто аѓаар никогаш нане те бистрав со вакерѓа о пхрал Франц англедер бут берша, кеда ме хем и Мери посетинѓем о Бруклин. Кеда заедно јавере пхраленцар пучлем ле саво совет иси те дел амен, ов вакерѓа: „Мло совет тано: Ачховен е Јеховаскере организацијаја хем ко шукар хем ко лошно. Нијекх јавер организација на керела адава со о Исус заповединѓа пле учениконге те керен — те проповединел пе о шукар хабери башо е Девлескоро Царство!“

Ме хем и Мери шунѓем лескоро совет хем адава керѓа амен бут бахтале. Исто аѓаар, иси амен бут шуже споменија таро зонска посете со сине амен ко некобор подружнице. Сине аменге бут шукар со шај сине те запознајна попхуре хем потерне пхрален хем пхењен, хем те уверина лен кај о Јехова бут ценинела ленгири служба. Секогаш охрабринѓем лен понадари да те служинен леске.

Бут берша накхле, хем акана о солдуј џене иси амен повише таро 80 берша. И Мери иси ла проблемија е састипаја (2. Кор. 12:9). Ко живото сине амен бут искушенија. Ама, са адава панда повише керела сине амари вера позорали хем керѓа те ова решиме те ачхова верна е Јеховаске. Кеда размислинаја башо берша со накхаѓем лен ки служба е Јеховаске, хаљоваја кај пле шукарипаја кова со назаслужинаја ле ов благословинѓа амен ко бут, бут начинија. * (Дикх и фуснота.)