OKATHI tiithi aka, Arthur, aari awe mmiravo, owo aanimphenta Muluku ni aaphavela okhala pastore a ekerexa Metodista. Masi aahirukunuxa muupuwelo awe nuumala osoma iliivuru saakumiheriwa ni Alipa-oomusoma Biibiliya, ni aahipacerya omusoma Biibiliya naawo. Mwaakha wa 1914, orineene iyaakha 17, paapa aka aahibatiziwa. Okathi yaawaniwa Ekhotto Yoopacerya ya Olumwenku Wotheene, owo aahirummwa orowa okhottoni, masi aahikhootta. Nto aahitthukweliwa myeeri muloko Ekhatteya ya Kingston, wOntario, oCanada. Nuumala otaphuliwa mukhatteya, owo aahikhala colportor, eyo piiyo, pioneero.

Mwaakha wa 1926, paapa aka aahimuthela Hazel Wilkinson. Maama awe Hazel aixuntte ekeekhai mwaakha wa 1908. Nto miyo kiyariwe nihiku 24 a Abril, 1931, ni ka nenli, wa anamwane axexe. Tiithi ahu aanisiveliwa ni aanimuttittimiha Biibiliya, nto aahiniixuttiha hiyo opaka etthu emosaru. Etthu yootepaxa otthuneya mookumini mwahu waari omukokhorela Yehova. Ikwaha sinceene emusi ahu yotheene naanilaleerya empa ni empa.—Miteko 20:20.

Mwaakha wa 1939 yaahipacerya Ekhotto Yanenli ya Olumwenku Wotheene. Nto mwaakha woottharelana, muteko wa Anamoona a Yehova waahikhoottihiwa oCanada. Anaxikola yaanitumereriwa wuntela ebandera ni yahaana omwiipa hino musaala. Ikwaha sinceene mapirisoori yaneemererya wira miyo ni murokoraka Dorothy nikhumeleke vate okathi siiriwa aya itthu iyo. Masi nihiku nimosa, pirisoori aka aaheererya okuulihiha muru, ohimyaka wira miyo kaari mutthu ootakhala. Nuumala omwariwa oxikola, amiravo anceene kaasomana aka yaahikituphela khiyakimana, nto kaahimorela vathi. Eyo yaahikiiriha otepa “omwiiwelela Muluku ovikana owiwelela atthu”.—Miteko 5:29.

Mweeri wa Julyo a 1942, kirineene iyaakha 11, kaahibatiziwa mutankini ya maasi yaari mmatta mwahu. Okathi wa ifeeriya, waanikisivela okhala pioneero a ifeeriya. Olelo va, opioneero owo, onisuweliwa okhala pioneero ookhaliherya. Mwaakha mmosa kaahirowa ni anna araru muttetthe mmosa oniitthaniwa Ontario, weiwo naalaleerya ahu atthu yaikittha miri.

Okhuma 1 a Maio 1949, kaahipacerya orumeela ntoko pioneero ookilaatheya. Nuumala-vo, kaahilattuliwa okhaliherya muteko wooteka efiliyaali ya oCanada, nto muhoolo mwaya kaahipacerya orumeela emusi ya oBetheli ya oCanada. Kaahithanliwa okhaliherya opuro saapakiwa iliivuru, weiwo kaixuntte aka orumeela maakina yaapaka iliivuru, yaalikana ni ettheere. Kinnuupuwela wira wookhala okathi kaavara aka isumana sinceene okhuma ohiyu mpakha oxa, kikhaliheryaka opaka ebroxura emosa yaalavula sa olupatthiwa wa Anamoona a Yehova oCanada.

Muhoolo mwaya kaahivara eDepartamento ya Muteko. Muteko aka waari waapaka makoho mapioneero yaarowa olaleeryaka muttetthe wa oQuebec, weiwo annihu yaalupatthiwa aya vanceene. Pioneera mmosa aitthaniwa Mary Zazula, aari a wEdmonton, wAlberta. Anamuyari awe yaari a Ekerexa Ortodoxa. Okathi Mary ni murokorawe yaakhoottale aya ohiya omusoma Biibiliya, anamuyari aya yaahiwoomola vatthokoni vaya. Mary ni murokorawe yaabatiziwe mweeri wa Junyo, 1951, nto nuuvira miyeeri mithanu namosa yaahikela opioneero. Okathi kaamukoha aka, kaaniweha wira Mary aahimphenta Yehova vanceene. Okathi ole kaanuupuwela wira ola ti muthiyana oniphavela aka omuthela. Nuuvira miyeeri mithanu naxexe, nihiku 30 a Janero, 1954, naahithelana. Nuuvira esumana emosa, miyo ni Mary naahilattuliwa wira naixuttihiwe muteko wa esirkwiitu. Okhuma okathi yoowo, hiyo naahirumeela esirkwiitu ya wOntario, iyaakha piili.

 Nto vaavo muteko woolaleerya waatepa aya wunnuwa olumwenku wotheene, yaanitthuneya mamisionaario manceene. Miyo ni Mary naahuupuwela wira akhala wira naaniwerya ovilela oriirya eyiita ni ipwilimwithi sa elimwe, weeso nanwerya orumeela khula opuro. Naahirowela Exikola ya oGileadi ya nummuru 27, ni naahigraduwari mweeri wa Julyo, 1956. Nto mweeri wa Novembro naahiphiya opuro waarowa ahu ovaraka muteko woolalerya, oBrasil.

Niphiyakaru oBrasil, naahipacerya wiixutta Ekunya. Wanipacerya, naahiixutta inamuna soolaleerya sookhweya. Moottharelana, naahiixutta moota wookawa irevista. Nuumala-vo, naahirowa olaleerya ni naahimphwanya muthiyana aasiveliwe muhupi naalaleya ahu. Nihinatthi okhuma owaani nihiku nle, naahilakela wira mutthu oopacerya onrowa osiveliwa muhupi ahu, ninrowa omusomela yoolepa enilavula sa moota onrowa aya okhala okumi moMweneni mwa Muluku. Nto kaahimusoma Wisupulula 21:3, 4, nuumala vo, kaahimora! Nihiku nle naahitepa oviha, nto miyo nkaalimalenle oviha siisaale. Nto kaanitepa ohaawa mwaha wa oviha.

Epooma naathanleliwe ahu olaleerya yaitthaniwa Campos. Olelo-va, sookhala miloko 15! Masi okathi naaphiyale ahu epooma ele, yaarina egrupu emosa paahi ni enupa emosa yaakhala mamisionaario Esther Tracy, Ramona Bauer, Luiza Schwarz, ni Lorraine Brookes (vano Wallen). Muteko aka waari okattha ikuwo ni orowa othuma soolya. Ohiyu omosa wa eSegunda-feira nuumala Yoosoma ya Owehaweha, Mary amphumurya vakhatterani, omuhaamenle ene almofada. Navaanela voohimya sa itthu saakhumelenle nihiku nle. Okathi Mary aavenyale awe, yaahikhuma enowa vathi va almofada! Otheene ahu naahixanka, masi wanikisa waya kaahiiva enowa eyo.

Nuumala ovira mwaakha niixutthaka Ekunya, naahipacerya orumeela osirkwiitu. Naarumeela mapuro yahaakhanle maluuxu. Naarupela ettheere ni neetta mikwaha ni ikhavalo ni abuuru. Ekwaha emosa naahirowa ni kampoi olaleerya muttetthe mmosa wowaatta myaako. Nto naahiphavelasa empa yookhala. Efiliyaali yaahiniruuhela irevista 800 wira narumeeleke naalaleeryaka. Nahaana weetta ikwaha sinceene wira nilovole ikaaxa sotthene sa irevista.

Mwaakha wa 1962 yaahipaceriwa Exikola ya Orummwa wa Omwene mittetthe sinceene elapo yotheene ya oBrasil. Kaahivira miyeeri mithanu namosa kivira-viraka mekhaka ixikola sotheene. Kaahirowa osomiha mittetthe ntoko Manaus, Belém, Fortaleza, Recife ni Salvador. Kiryeene oManaus, kaahimulokiherya kongresu muulupale, nipuro nimosa noosuwelexiwa. Mwaha wa epula yahaareere orupa, nto khiyaakhanle maasi oowurya ni khinaakhanle nipuro nooreerela wira anna ni arokora alyeeke okathi woophumurya. Nto kaahilavula ni xeefi a atoropa a muttethe ole, kimutthokiherya muxankiho ahu. Owo aahipaka mareheryo wira nikhalane maasi yaaphiyerya owurya mahiku otheene naari ahu opuro ole. Nave-tho aahaaruma atoropa othipela iheema piili suulupale wira anna yaapeyeke ni alyeeke-mo.

Okathi owo wotheene kahaakhanle aka, Mary aalalerya muttetthe weettiwa nakoso, yoowo atthu otheene yahaaphavela aya owiriyana ihapari soreera sa mBiibiliyani. Atthu awo yaakhuma oPortugal,  nto yaarwiiye oBrasil wira aphwanye musurukhu. Mary aahiriipiwa murima vanceene, nto aanaaleela akhwaawe oriki: “Elapo yoopacerya yahaarowa okisivela okhala ti oPortugal”. Ahivinre mahiku manceene, nahaakhela epaphelo. Naari nlattulo wira narumeeleke oPortugal, weiwo muteko ahu woolaleerya waakhoottihiwe aya ni guvernu. Mary khaatthuna okupali! Masi naheemererya, nto naahithaamela oPortugal.

Mweeri wa Agosto, 1964, naahiphiya oLisboa, oPortugal. Mapiliisa yaanitepa waahasula annihu elapo ele. Tivonto, nahuupuwela wira vaamureerela ohikumana ni anna wanipacerya wene. Nuumala ophiya, naakhala ekwarto yowaalugariwa. Nuumala-vo naahaakhela idukumento saneemererya okhala elapo ele, nto naahaalugari empa emosa. Nuuvira myeeri mithanu, nto naahoona wira vaanireerela okumana ni anna ofiliyali. Naahihakalala vanceene osuwela wira vano vaaniweryaneya orowa omuthukumanoni!

Okhala wira muteko ahu waahikhoottihiwa, nto Inupa sotheene sa Omwene saahiwaliwa, ni mithukumano saapakiwa mmaitthokoni mwa anna. Mapiliisa yaamakela okukurya ipa sa anna. Anna ni arokora anceene yaamakela oroihiwa oposto ya mapiliisa wira yakohiwe. Mapiliisa awo yanaahasula ni yeererya owiiriha anna ohimya masina a anna yaahoolela. Nto wira anna yaakiheryane, awo yaahihiya orumeela nsina na nenli na munna, khiyarumeela nsina noopacerya paahi.

Yoolakela ahu yaari waakhaliherya anna wira akhalaneke iliivuru saatthuneya wira alipihe waamini waya. Mary aanilepa myaha soosoma sa Owehaweha ni iliivuru sikina, orumeelaka epaphelo emosa ya vameekhaaya. Nuumala-vo, epaphelo eyo yaanivirihiwa mmaakinani wira sipakiwe ikoopiya sinceene saarowa okaweliwa anna.

Mweeri wa Junyo, 1966, waahithokoreriwa mwaha mmosa wootthuneya etribunaali ya oLisboa. Anna otheene 49 a Muloko wa Feijó, yaahihimmwa wira yaahittheka mwaha wa othukumana vatthokoni va mutthu. Okathi nailokiherya ahu, miyo kaaniipaka okhala namaphukela, yoowo aarowa wooniherya wira anna ale aakhalana nthowa. Masi ntoko naalipelela ahu, hiyo naahivahiwa mulattu. Anna ni arokora otheene 49 yaahitthukweliwa mukhatteya, amalihaka mahiku 45, akina miyeeri mithanu nnimeya. Masi mwaha ole otribunali waahivaha onamoona muulupale. Tthiri, okathi waaphukiwa aya mwaha ole, mulipa-aanaakiha aahiiso advogado aahiromola moolumo a Gamaliyeli ari mBiibiliyani. (Miteko 5:33-39) Muhoolo mwaha, mwaha ole waahilaleiwa ni mitthenkeso sinilaleya ihapari. Naahihakalala vanceene okathi mulipa-aanaakiha otribunaali eemerenrye awe omusoma Biibiliya ni hiyo ni opacerya orowela mithukumano.

Mweeri wa Dezembro, 1966, kaahithanliwa okhala muhooleli a efiliyali, nto kaaniviriha okathi munceene kithokoreryaka myaha saavarihana malamulo a guvernu. Naahiimananiha wira niwooniherye ahooleli a guverno nthowa naya Anamoona a Yehova  yaaphwanela aya omukokhorela Yehova mootaphuwa oPortugal. (aFilipi 1:7) Nto, nihiku 18 a Dezembro, 1974, naheemereriwa ovara muteko ahu mootaphuwa. Munna Nathan Knorr ni Frederick Franz a eseedi ahu ya olumwenku wotheene yaahirwa onixukurya. Naahikhalana muthukumano ohinliyaleya, waapakiwe epooma ya oPorto ni oLisboa, nto atthu otheene yaarwiiye yaari 46.870.

Yehova aahikhaliherya-tho wira muteko woolaleerya omwareele isisiro seiye atthu aya anilavula ekunya, ntoko Açores, Cabo Verde, Madeira ni São Tomé e Príncipe. Vaavo nummuru na Anamoona nancerereya aya mapuro awo, nto nahaana wuncererya efiliyaali ahu. Nuumala omalihiwa otekiwa, Munna Milton Henschel aahilavula mwaha wa dedicação, nihiku 23 a Abril, 1988. Nihiku nlo, anna ni arokora 45.522 yaahiwiriyana mwaha owo, waahela muhina anna 20 yaatonko okhala mamisionaario oPortugal, yaarwenle owiriyana mwaha owo.

Iyaakha iya sotheene, miyo ni Mary ninnihakalala vanceene wiixuttha itthu sooloka ni anna oororomeleya. Mwa ntakiheryo, okathi naaxukurya ahu efiliyali vamosa ni Munna Theodore Jaracz, miyo kahiixutta etthu yootthuneya. Efiliyali yaaxukurya ahu yaahikhalana muxankiho mmosa muulupale, nto anna a Ekomisau ya Efiliyali yaahiimananiha vanceene wira aphuke muxankiho ole. Yaahiriipiwa murima vanceene maana khiyaawerya, hata yaimananiha vanceene. Nto Munna Jaracz aahaalipiha oriki: “Vano woophiya okathi wira muhiye munepa wotteela ovaraka muteko”. Nave-tho nkinliyala etthu Munna Franz aahimmye awe khalai, okathi miyo ni Mary naaxukurya ahu oBrooklyn. Akina a hiyo naahinvekela miruku, nto owo aahimmye so: “Etthu kinooleelaakani tiila: Nvarexexeke mutthenkeso wowooneya wa Yehova okathi woreerela ni wooxankiha. Ola paahi tonivara muteko Yesu aarumme awe awiixutti awe, eyo piiyo, olaleya ihapari sooreera sa Omwene wa Muluku!”

Otthara miruku iyo woonihakalaliha vanceene miyo ni Mary. Nave ninnihakalala vanceene okathi onuupuwela ahu ikwaha naaxukurya ahu ifiliyaali olumwenku wotheene. Waaninsivela okumana ni arumeyi anceene a Yehova, amiravo ni oowunnuwa, ni nanaalipiha wira Yehova onnisiveliwa vanceene ni muteko aninvarela aya. Nanaatumererya wira avikaniheke omurumeela Yehova.

Vano soovira iyaakha sinceene, ni oowanli ahu noovikana iyaakha 80. Mary onimakela owereyasiwa. (2 aKorinto 12:9) Nave-tho ninnikumana mixankiho sikina. Masi mixankiho iya soolipiha waamini wahu ni soonikhaliherya olakela ovikaniha okhala oororomeleya wa Yehova. Okathi oniweha ahu ottuli iyaakha sotheene nimmurumeela ahu Yehova, noosuwela wira yena onninreeliha ni onninreerela murima mwa inamuna sinceenexa. *—Nwehe enoota.