TONATOU MAʼULI
Neʼe Ma Sisio Ki Te ʼOfa Makehe ʼo Te ʼAtua ʼi Te ʼu Aluʼaga Kehekehe ʼo Toma Maʼuli
ʼI TANA kei tupulaga, neʼe ʼofa taku tamai ko Arthur ki te ʼAtua pea neʼe fia kau ki te Lotu Méthodiste. Kaʼe neʼe fetogi tana manatu ʼi te temi ʼae neʼe ina lau ai ʼihi tohi ʼa te Kau Ako ʼo Te Tohi-Tapu pea neʼe kamata fakatahi leva mo natou. Neʼe papitema taku tamai ʼi tona taʼu 17, ʼi te taʼu 1914. Lolotoga te ʼUluaki Tau Fakamalamanei, neʼe tonu ke alu ʼo solia, kaʼe neʼe fakafisi ki te tau. Koia neʼe pilisoni ai ia mahina ʼe hogofulu ʼi te fale pilisoni ʼo Kingston ʼi Ontario, ʼi Canada. Hili tona fakaʼateaina mai te pilisoni, neʼe liliu ʼo pionie katoa.
ʼI te taʼu 1926, neʼe ʼohoana taku tamai mo Hazel Wilkinson. Ko te faʼe ʼa Hazel Wilkinson neʼe ina ako te moʼoni ʼi te taʼu 1908. Neʼe au tupu ʼi te ʼaho 24 ʼo Apelili 1931, pea neʼe au tuʼulaga lua ʼi te fanau ʼe toko fa. Neʼe ʼofa pea mo fakaʼapaʼapa taku tamai ki te Tohi-Tapu pea neʼe ina akoʼi matou ke matou faʼifaʼitakiʼi ia ia. Ko tamatou tauhi ʼae kia Sehova neʼe maʼuhiga ʼaupito kia matou. Pea tuʼumaʼu pe neʼe matou faifakamafola fakafamili ʼi te ʼu ʼapi.—Gaue 20:20.
OHAGE KO TAKU TAMAI, NEʼE MOLE AU KAU KI TE TAU KAʼE NEʼE AU PIONIE KATOA
ʼI te taʼu 1939, neʼe kamata ai te Lua Tau Fakamalamanei. Pea ʼi te taʼu 1940, neʼe tapuʼi ai te ʼu gaue ʼa te kau Fakamoʼoni ʼa Sehova, ʼi Canada. ʼI te fale ako, neʼe tonu ke fakaʼapaʼapa te tamaliki ki te fuka pea ke natou hiva te hiva fakapuleʼaga ʼi ʼanatou kalasi. ʼI te agamahani, neʼe fakagafua mai e te kau faiako kia au mo toku tokolua ko Dorothy ke ma mavae ʼi te kalasi moka hoko te aluʼaga ʼaia. Kaʼe ʼi te tahi ʼaho, neʼe faigaʼi e taku faiako ke au ufiufi ʼi tana ui ʼae, ʼe au fula. ʼI te hili ʼo te ako, neʼe ta au e ʼoku kaugā ako. Kaʼe neʼe toe ʼaʼasili age ai ia taku fia “fakalogo ki te ʼAtua ʼi tona ʼuhiga pule,” ʼi haku fakalogo ki te tagata.—Gaue 5:29.
ʼI Sulio 1942, ʼi toku taʼu 11, neʼe au papitema ai ʼi he foʼi tane vai ʼo he fale gaue kele. Neʼe au fiafia ʼi te toʼo ʼo te selevisi pionie ʼi te ʼu temi malolo ʼo te ako. Ia ʼaho nei kua fakahigoa ko te selevisi pionie vaeluaʼi temi. ʼI te tahi taʼu, neʼe feala ai ke au alu mo te ʼu tehina ʼe toko tolu ki te potu noleto ʼo Ontario, ʼo matou faifakamafola ai ki te ʼu tagata tuʼusi ʼakau.
ʼI te ʼaho 1 ʼo Maio 1949, neʼe au kamata pionie katoa ai. Neʼe fakaafe mai au ke au alu ʼo tokoni ki te laga ʼo te filiale ʼo Canada pea ki muli age neʼe au kau ki te famili ʼo te Petele ʼo Canada. Pea neʼe hinoʼi au ki te fale ta tohi, ʼo au ako ai leva ia te fakahaʼele ʼo te masini ta tohi. ʼE au manatuʼi, neʼe au gaue poʼuli lolotoga ni vahaʼa ke feala ai te ta ʼo te kiʼi pepa lotu ʼe talanoa ki te fakatagaʼi ʼo te hahaʼi ʼa Sehova ʼi Canada.
Ki muli age, neʼe au gaue ʼi te Selevisi Gaue. Neʼe fekauʼi au ke au fakafehuʼi te kau pionie ʼae neʼe ʼamanaki olo ʼo fakahoko tanatou selevisi ʼi Québec, ʼae ʼe kovi ai te fakataga. Neʼe kau ai ia Mary Zazula mai Edmonton, ʼi Alberta. Kaʼe neʼe kau ʼana matuʼā ʼi te Lotu Orthodoxe. Neʼe kapu ia Mary mo tona tokolua lahi e ʼanā matuʼā ʼi tonatou loto fale, he neʼe mole nā loto ke nā fakagata tanā ako te Tohi-Tapu. Pea neʼe papitema ia Mary mo tona tokolua ʼi Sunio 1951, ʼo nā pionie tokolua hili ki ai mahina ʼe ono. Lolotoga te ʼu faifehuʼi, neʼe au mahino ai ki te lahi ʼo te ʼofa ʼae ʼa Mary kia Sehova. ʼE au manatuʼi ia taku ui, ko te taʼahine ʼae ʼe au fia ʼohoana mo ia. Hili ki ai mahina ʼe hiva, neʼe ma ʼohoana ʼi te ʼaho 30 ʼo Sanualio 1954. Pea ʼosi te vahaʼa katoa ki toma ʼohoana, neʼe fakaafe maua ke ma akoako ki te gaue fakasiliko. Lolotoga te ʼu taʼu ʼe lua ʼae neʼe hoa mai, neʼe ma kau ki te gaue fakasiliko ʼi te potu noleto ʼi Ontario.
ʼI te tuputupu ʼo te gaue faifakamafola fakamalamanei, neʼe ʼaoga ke ʼi ai he kau misionea ʼe tokolahi.
Ko au pea mo Mary, neʼe ma ui, mo kapau ʼe ma lavaʼi te momoko ʼo Canada pea mo te ʼu namu ʼi te temi vela, ʼe feala hamā maʼuʼuli ʼi he koga meʼa pe. Neʼe ma kau ki te 27 kalasi ʼo te Ako ʼo Kileate pea neʼe maʼu toma pepa ʼi Sulio 1956. Pea ʼi Novepeli, neʼe ma olo ai ki toma nofoʼaga foʼou, ʼi Brésil.TAMĀ SELEVISI MISIONEA ʼI BRÉSIL
ʼI tamā tau atu ki Brésil, neʼe ma ako ia te lea Portugais. ʼUluaki, neʼe ma ako he ʼu palalau ʼe faigafua ke ma kamata faipalalau ai mo te hahaʼi. Hili ia, neʼe ma ako fakaʼatamai he ʼu ʼuluaki palalau moʼo tufa te ʼu nusipepa. Neʼe ma olo leva ʼo faifakamafola pea neʼe ma felaveʼi mo te fafine neʼe ina leleiʼia te logo lelei. Neʼe ma fakatuʼutuʼu leva, mo kapau ʼe fia logo he tahi, pea ʼe ma lau age anai he vaega ʼo ʼuhiga mo te maʼuli lolotoga te ʼafio ʼo te Puleʼaga ʼo te ʼAtua. Koia neʼe au lau ia Fakaha 21:3, 4 pea neʼe au pogia. Koteʼuhi neʼe mole au mahani ʼosi au mo te vevela. Pea ʼe kei faigataʼa pe kia au ia te vevela.
Neʼe hinoʼi maua ke ma olo ʼo fakahoko tamā selevisi misionea ʼi te kolo ko Campos. Ia ʼaho nei, kua ʼi ai kokelekasio ʼe 15. Kaʼe ʼi te temi ʼae neʼe ma tau atu ai, neʼe ʼi ai pe te kiʼi kutuga ʼi te kolo, mo te fale ʼo te kau misionea neʼe maʼuʼuli ai tuagaʼane ʼe toko fa. Neʼe ko Esther Tracy, mo Ramona Bauer, mo Luiza Schwarz pea mo Lorraine Brookes (ʼi te temi nei ko Lorraine Wallen). ʼI te fale ʼo te kau misionea, neʼe au tokaga ki te fai fo pea mo te ʼu fafie moʼo fai te kuka. Hili tamatou tahi ako Te Tule Leʼo ʼi te Monite afiafi, neʼe ʼai muʼa te kiʼi malolo ʼa Mary ʼi te sofa mo ina hili tona ʼulu ki te foʼi pila. Neʼe ma faipalalau ki te ʼu aluʼaga ʼae neʼe hoko ʼi te ʼaho ʼaia. Kaʼe ʼi te temi ʼae neʼe tuʼu ake ai leva ia Mary, neʼe ʼi ai te gata ʼi tona lalo pila. Neʼe matou matataku, ʼo au matehi ai leva ia te gata.
Neʼe ma ako te lea Portugais lolotoga he taʼu katoa, pea hili ia, neʼe ma kamata kau ki te gaue fakasiliko. Neʼe ma gaue mo nonofo ʼi he koga meʼa ʼe mole ʼi ai he hila. Neʼe ma momoe ʼi te ʼu fala pea neʼe ma feoloʼaki ʼi te hosi mo te saliote ʼe toho ʼaki te ʼu hosi. ʼI te tahi ʼaho, neʼe ma toʼo te saliote afi ke ma olo ʼo faifakamafola ʼi he kolo ʼe tuʼu mamaʼo ʼi te ʼu moʼuga. Neʼe momoli mai e te filiale ia nusipepa ʼe 800 ki te faifakamafola. Pea neʼe ma olo liuliuga ki te laposi ʼo toʼo mai ai te ʼu nusipepa.
ʼI te taʼu 1962, neʼe fai te Ako ʼo Te Minisitelio ʼo Te Puleʼaga ʼi he ʼu koga meʼa kehekehe ʼo Brésil. Neʼe tuku mai te ʼu ako takitahi ke au fai tokotahi lolotoga mahina ʼe ono. Neʼe fai te Ako ʼo Te Minisitelio ʼi Manaus, mo Belém, mo Fortaleza, mo Recife pea mo Salvador. ʼI taku nofo ʼi Manaus, neʼe au fakatuʼutuʼu ai he fakatahi lahi ʼi he fale hiva iloa. Kaʼe neʼe kovi ʼosi te ʼua, koia ʼae neʼe mole lelei ai te vai inu. Pea neʼe mole ʼi ai he koga meʼa ke kakai ai te ʼu tehina mo tuagaʼane ʼi te fakatahi. Neʼe au fakamahino tomatou fihifihia ʼaia ki te ofisie. Pea neʼe tokaga leva te ofisie ke ʼi ai hamatou ʼu foʼi vai lolotoga te fakatahi katoa. Neʼe ina toe fekauʼi foki he ʼu solia ke natou fakatuʼu he ʼu fale la lalahi ʼe lua, ke matou kuka pea mo kakai ai.
Lolotoga taku puli, neʼe faifakamafola ia Mary ʼi te ʼu koga meʼa ʼe tuʼu ai te ʼu fale koloa mo te ʼu matani gaue, ʼae ʼe mole fia palalau ai he tahi ki te Tohi-Tapu. Ko te hahaʼi ʼae neʼe maʼuʼuli ai neʼe ʼomai mai Portugal ki Brésil ke natou maʼu paʼaga. Neʼe lotovaivai ia Mary
pea neʼe ina ui fenei ki ʼihi ʼo ʼona kaumeʼa: “Ko te koga meʼa ʼae ʼe mole au fia maʼuli ai ʼi te kele ko te fenua ko Portugal.” Pea neʼe mole faʼa fualoa ki ai, neʼe ma maʼu tamā tohi. Neʼe ko te fakaafe ʼaia ʼo maua ke ma olo ʼo fakahoko tamā selevisi ʼi Portugal, ʼae ʼe kua tapuʼi ai te gaue faifakamafola. Neʼe punamaʼuli ʼosi ia Mary. Kaʼe neʼe ma tali toma fakaafe ʼaia, ʼo ma olo ai ki Portugal.TAMĀ SELEVISI ʼI PORTUGAL
Neʼe ma tau atu ki Lisbonne, ʼi Portugal ʼi ʼAukusito, ʼi te taʼu 1964. Neʼe fakatagaʼi te ʼu tehina mo tuagaʼane e te ʼu polisi fakafufu ʼo te fenua. Koia ʼae neʼe lelei age ke mole ma felaveʼi peʼe ke ma telefoni ki te kau Fakamoʼoni ʼa Sehova ʼo te fenua ʼi te kamata. Neʼe ma nonofo muʼa ʼi toma koga fale neʼe ma lue. Pea ʼi tamā maʼu leva ʼoma visa, neʼe ma lue he koga fale ʼe lahi age. Hili ki ai mahina ʼe nima, neʼe hoki feala ai leva ke ma felogoʼi mo te ʼu tehina ʼo te filiale. Neʼe ma fiafia ʼaupito ʼi te temi leva ʼae neʼe feala ai ke ma olo ʼo fono.
ʼUhi ko te tapuʼi ʼo tamatou gaue, neʼe pupunu te ʼu Fale Fono pea neʼe fai te ʼu fono ʼi te ʼu ʼapi ʼo te ʼu tehina mo tuagaʼane. Neʼe hue tuʼumaʼu ʼonatou ʼapi e te kau polisi. Pea neʼe ko te toko lauʼi teau ʼu tehina mo tuagaʼane neʼe ʼave ʼo fakafehuʼi ʼi te ʼu fale polisi. Neʼe gaohi koviʼi pea mo fakakinauʼi natou e te kau polisi ke natou fakaha age te ʼu higoa ʼo te ʼu tehina takitaki. Koia, ke feala hanatou fepuipuiʼaki, neʼe natou fakaʼaogaʼi pe ʼonatou kiʼi higoa veliveli.
Kaʼe neʼe maʼuhiga age kia matou ke maʼu tuʼumaʼu e ʼomatou tehina mo tuagaʼane te ʼu tohi ʼae ʼe tokoni anai kia natou ke natou faʼa kataki. Neʼe ta e Mary ia te ʼu alatike ako ʼo Te Tule Leʼo pea mo ʼihi atu tohi ʼaki he tahi age faʼahiga pepa. Pea neʼe fakaʼaogaʼi leva te pepa ʼaia ko he faʼifaʼitakiʼaga ʼo te ʼu alatike mo te ʼu tohi ʼae neʼe toe fai ki muli age maʼa te ʼu tehina mo tuagaʼane.
TE TAUʼI ʼO TE LOGO LELEI ʼI TE TELEPINALE
ʼI Sunio 1966, neʼe ʼi ai te faifakamau maʼuhiga neʼe hoko ʼi te telepinale ʼi Lisbonne. Ko te kokelekasio katoa ʼo Feijó, ia te toko 49 ʼu tehina mo tuagaʼane, neʼe tukugakoviʼi he ʼe takua neʼe natou kau ki he fono ʼi he loto fale kaʼe neʼe kua tapuʼi. Pea ke feala hamatou teuteu ki te ʼahiʼahi ʼaia, neʼe au loi ko au ko te avoka ʼae ka au fakaha anai neʼe tukugakoviʼi hala te ʼu tehina. Kaʼe neʼe mole matou malo ʼi te faifakamau ʼaia, pea neʼe mole matou punamaʼuli ki ai. Neʼe pilisoni ai te ʼu tehina mo tuagaʼane ʼe toko 49, ʼo kamata atu ia ʼaho ʼe 45 ʼo kaku kia mahina ʼe nima vaelua. Kaʼe ko te ʼahiʼahi ʼaia, neʼe ko he toe fakamoʼoni lahi ki te hahaʼi. Lolotoga te ʼahiʼahi, neʼe fakaʼaogaʼi e tomatou avoka ia te ʼu palalau ʼa Kamaliele ʼae ʼe tuʼu ʼi te Tohi-Tapu. (Gaue 5:33-39) Hili ia, neʼe fakamatala tomatou ʼahiʼahi ʼaia ʼi te ʼu tala logo. Pea neʼe matou fiafia ʼaupito ʼi te temi ʼae neʼe kamata ako ai e tomatou avoka ia te Tohi-Tapu pea mo kau ki te ʼu fono.
ʼI Tesepeli 1966, neʼe fakanofo au ko te tehina taupau ʼo te filiale ʼo lahi ai taku tokaga ʼae ki te ʼu faifakamau ʼi te telepinale. Neʼe matou fai ai meʼa fuli ke matou fakatuʼu he ʼu tupuʼaga ʼe fakamoʼoni ki ai te lao ke tauhi faʼifaʼitaliha te kau Fakamoʼoni ʼa Sehova ʼi Portugal. (Filipe 1:7) Neʼe fakagafua leva e te Puleʼaga ia te gaue ʼa te kau Fakamoʼoni ʼa Sehova ʼi te ʼaho 18 ʼo Tesepeli 1974. Pea neʼe ʼomai ai te ʼu Tehina ko Nathan Knorr pea mo Frederick Franz mai ʼotatou pilo lalahi ʼo matou fakafiafia fakatahi ai. Neʼe fai ai ia he fono fakagalo gataʼa ʼi Oporto pea mo Lisbonne pea neʼe kau ai he toko 46 870.
Neʼe toe ʼave foki e Sehova ia te gaue faifakamafola ki te ʼu motu ʼae ʼe palalau ai te hahaʼi ʼi te lea Portugais. Ohage la ko te ʼu motu les Açores, mo Cap Vert, mo Madère pea mo Sao Tomé-et-Principe. ʼI te tuputupu ʼa te kau Fakamoʼoni ʼa Sehova ʼi te ʼu koga meʼa ʼaia, neʼe ʼaoga ai ke laga hamatou filiale ʼe lahi age. Hili te laga ʼo tomatou filiale, neʼe fai e te Tehina ko Milton Henschel ia te akonaki ʼo tona avahi ʼi te ʼaho 23 ʼo Apelili 1988. Neʼe kau ki ai te toko 45 522 ʼu tehina mo tuagaʼane pea mo te toko 20 ʼae neʼe misionea ʼi Portugal ʼi muʼa atu, ʼae neʼe toe liliu mai ki te avahi ʼo te filiale.
TE ʼU AKO MAI HE ʼU TEHINA AGATONU
ʼAki te ʼu taʼu, neʼe ma fiafia mo Mary ʼuhi ko te ʼu ako ʼae neʼe ma taʼofi mai te ʼu tehina agatonu. Ohage la, neʼe au taʼofi he ako maʼuhiga mai te Tehina ko Theodore Jaracz ʼi tamā olo fakatahi ʼo ʼaʼahi te filiale ʼo te tahi fenua. Neʼe ʼi ai te toe fihifihia ʼo te filiale ʼae neʼe ma ʼaʼahi pea neʼe kua faigaʼi ia meʼa fuli e te Komite ʼo Te Filiale moʼona fakatokatoka. Kaʼe neʼe natou lotomamahi he neʼe mole natou maʼu he puleʼaki ki ai. Koia, neʼe fakalotofimalieʼi natou e te Tehina ko Jaracz, ʼo ina ui fenei: “ ʼI te temi leva ʼaeni, tou tuku ke gaue ia te laumalie maʼoniʼoni.” Pea ʼe mole galo anai ʼi he temi te ʼu palalau ʼae neʼe ui e te Tehina ko Franz ʼi ni taʼu ki muʼa atu ʼi te ʼaho ʼae neʼe ma ʼaʼahi ai mo Mary ia Brooklyn. Neʼe ko te kiʼi kutuga ʼo matou neʼe matou kole tokoni kia ia, pea neʼe ina ui fenei mai: “Ko te tokoni ʼe feala ke au fai atu, ke kotou pipiki ki te koga ʼo te kautahi ʼa Sehova ʼi te kele maʼia ʼi te ʼu faigataʼaʼia. Pea ko te gaue pe ʼae neʼe fakatotonu e Sesu ke fai e ʼana tisipulo, ko te fakamafola ʼo te logo lelei ʼo te Puleʼaga ʼo te ʼAtua.”
ʼI tamā fai te ʼu faʼahi ʼaia, neʼe ma fiafia ʼaupito ai mo Mary. ʼE toe ʼi ai foki mo ʼamā suvenia maʼuhiga ʼi tamā ʼaʼahi ia te ʼu filiale ʼi te malamanei katoa. Neʼe ma leleiʼia te fakatahi mo te ʼu kaugana ʼa Sehova fuli, te kau tupulaga peʼe ko te kau matutuʼa, pea neʼe ma fakalotofimalieʼi natou, ʼo ma ui age neʼe maʼuhiga tanatou tauhi ʼae kia Sehova. Pea neʼe ma fakalotomalohiʼi tuʼumaʼu natou ke natou haga tauhi kia te ia.
Kua hili nei ki ai he ʼu taʼu, pea kua ma taki taʼu 80 tupu ʼi te temi nei. Ko Mary ʼe mahamahaki. (2 Kolonito 12:9) Pea neʼe ʼi ai ʼoma tahi ʼu fihifihia. Kaʼe ʼaki te ʼu ʼahiʼahi ʼaia, neʼe toe malohi age ai tamā tui, ʼo ma fakatotonu ai ke ma nonofo agatonu kia Sehova. Moka ma toe fakakaukauʼi ʼoma taʼu gaue kia Sehova, ʼe ma mahino ai neʼe ina tapuakinaʼi maua ʼaki tona ʼofa makehe ʼi te ʼu aluʼaga kehekehe ʼo toma maʼuli. *—Vakaʼi te kiʼi nota.
^ pal. 29 Lolotoga te teuteuʼi ʼo te alatike ʼaeni, ko Douglas Guest neʼe mate agatonu kia Sehova ʼi te ʼaho 25 ʼo Oketopeli 2015.