1, 2. Mase iulas hita pasal ompat raja hun Juda?

ANGGO ididah ham adong sasada halak na madabuh i dalan, tontu jaga do ham ase ulang madabuh homa i dalan na sarupa. Sonai ma hita, anggo ibotoh hita hasalahan ni sasada halak, tontu lang ra hita mambahen hasalahan na sarupa. Ulas hita ma hasalahan ni piga-piga halak na ipatugah bani Bibel.

² Bani artikel na salpu, domma iparlajari hita pasal ompat raja hun Juda na mambalosi Jahowa humbani gok ni uhur. Tapi ongga do sidea mambahen hasalahan. Isuratkon do pasal sidea ibagas Bibel, ase boi irimangi hita parlajaranni, janah ase ulang ibahen hita hasalahan na sarupa.—Basa Rom 15:4.

3-5. (a) Hassi pe si Asa marsijoloman uhur bani Jahowa, hasalahan aha do na ibahenni? (b) Mase si Asa marpangunsandeian bani jolma sanggah manlawan si Baesa?

³ Rimangi ma contoh ni si Asa. Sangah roh sajuta halak Etiopia mamorangi Juda, marpangunsandeian do ia  bani Jahowa. Tapi sanggah marporang dompak si Baesa, raja hun Israel, lang marpangunsandeian ia bani Jahowa. Sanggah ipatoguh si Baesa huta Rama, ai ma huta Israel na dohor hun harajaon Juda, sihol do si Asa laho parontihon ai. (2 Kron. 16:1-3) Jadi, itongos si Asa ma sibere-bere hubani raja Aram ase iurupi ia. Sanggah roh halak Aram mamorangi Israel, “maronti ma [si Baesa] patoguhkon Rama, ipasaran ma horjani ai”. (2 Kron. 16:5) Iagan si Asa do domma dear haputusanni.

⁴ Tapi, sonaha pangahap ni Jahowa? Sogam ma uhur-Ni halani lang marpangunsandeian si Asa hu Bani. Anjaha isuruh ma nabi Hanani laho pasingatkon si Asa. (Basa 2 Kronika 16:7-9.) Nini si Hanani ma, “Hunjon hujanan masa ma hamunsuhon tong dompak ham.” Ujungni, bani si Asa ma huta Rama ai, tapi sadokah goluhni totap do adong parporangan bani sidea.

⁵ Bani artikel na salpu, ibotoh hita malas do uhur ni Jahowa mangidah si Asa. Hassi pe mambahen hasalahan ia, ididah Jahowa marsijoloman do uhur ni si Asa hu Bani. (1 Raj. 15:14) Tapi halani mambahen haputusan na lepak, maningon do jaloonni uhuman. Mase si Asa gabe marpangunsandeian bani dirini sandiri ampa halak na legan sedo bani Jahowa? Ra do halani pentar atap gogoh ganupan tentarani, iagan si Asa ma boi monang sidea. Atap halani manangar pandapot na salah humbani na legan.

6. Aha na boi iparlajari hita humbani hasalahan ni si Asa? Bere ma contoh.

⁶ Aha na boi iparlajari hita humbani hasalahan ni si Asa? Ganup panorang, marpangunsandeian bani Jahowa ma hita, sedo bani pingkiranta. Hassi pe borat atap lang parsoalanta, porlu mangindo pangurupion-Ni. Rimangi hita ma on: Sanggah dong parsoalan, marpangunsandeian bani diringku do ahu? Atap hupindahi podah hun Bibel? Umpamani, dong kaluarga na manlanglangi ham martumpu atap hu kebaktian, ai martonggo do ham bani Jahowa laho mambotoh aha na sihol ibahen? Atap domma dokah ham lang marhorja, janah adong na mangarahkon ham marhorja. Ai ra do ham patugahkon hu bani anggo ham maningon martumpu tiap minggu, hassi pe ai boi mambahen ham lang mandapot horja ai? Aha pe parsoala, maningon do hita porsaya podah ni psalmen, “Ondoskon ma dalanmu bani Jahowa anjaha hatengerhon Ia, ase Ia patorsahon.”—Ps. 37:5.

7, 8. Aha do hasalahan na ibahen si Josafat, janah sonaha do ujungni? (Idah gambar bani alaman 21.)

⁷ Sonari ulas hita ma contoh hun si  Josafat, anak ni si Asa. Dear do paruhuranni janah Jahowa pe malas do uhur-Ni mangidahsi. Sanggah ia marpangunsandeian bani Jahowa, dear do ujungni. Tapi ongga do ia mambahen haputusan na lepak. Umpamani, ipaturut do anakni marhajabuan pakon boru ni Raja Ahab na jahat. Dob ai marhasoman ma ia pakon si Ahab laho mamorangi halak Assur, hassi pe domma ipasingat nabi Mika ase ulang ibahen sonai. Bani parporangan ai, roh ma halak Assur laho mamunuhsi. (2 Kron. 18:1-32) Dobkonsi mulak hu Jerusalem, isungkun nabi Jehu ma hu bani, “Ai bulih do ninuhurmu urupan halak parjahat barang haholongan halak na marsogam ni uhur bani Jahowa?”—Basa 2 Kronika 19:1-3.

⁸ Ai marlajar do si Josafat humbani hasalahanni ai? Lang. Hassi pe holong do ia bani Jahowa janah pamalaskon uhur-Ni, tapi totap do ia marhasoman pakon halak na lang manombah Jahowa, ai ma Raja Ahasya, anak ni si Ahab. Ipauli sidea ma sada kapal, tapi marropukan ma kapal ai paima igunahon.—2 Kron. 20:35-37.

9. Sonaha do ujungni anggo lang maruhur hita mamilih hasoman?

⁹ Aha na boi iparlajari hita humbani si Josafat? Ihorjahon si Josafat do aha na sintong janah “mangindahi Jahowa humbani bulat ni uhurni”. (2 Kron. 22:9) Tapi lalab do ia marhasoman pakon na lang mangkaholongi Jahowa, anjaha gabe bahat ma parsoalan halani ai. Ongga do ia laho ibunuh. Dingat ma podah ni Bibel on, “Marsaor pakon halak na pentar,  parohkon hapentaran, tapi maseda do halak na marhasomankon halak na oto.” (Pod. 13:20) Malas do uhurta patugahkon pasal Jahowa bani na legan. Tapi anggo orot parhasomananta pakon sidea na lang manombah Jahowa, parohkon mara do ai.

10. (a) Anggo sihol marhajabuan, aha do na boi iparlajari hita humbani si Josafat? (b) Aha do na porlu idingat hita?

¹⁰ Anggo sihol marhajabuan, aha do na boi iparlajari hita humbani si Josafat? Ra do marosuh hita bani sasada halak na lang mangkaholongi Jahowa, halani pangahapta lang adong na sosok ididah hita i organisasi ni Jahowa na laho gabe hasomanta marhajabuan. Atap ra do ipasingat kaluarga, ulang dokah-dokah ase marhajabuan. Tongon, itompa Jahowa do hita ase boi marsihaholongan. Tapi anggo lape adong na sosok ididah hita, sonaha do bahenonta? Rimangi ma na masa bani si Josafat. Tongtong do ia mangindahi podah hun Jahowa. (2 Kron. 18:4-6) Tapi dob marhasoman pakon si Ahab na lang manombah Jahowa, gabe lang be itangar podah ni Jahowa. Sasintongni maningon do idingat si Josafat, “manatap manonggor do mata ni Jahowa hu sab tanoh on, laho mambere gogoh hubani halak paruhur na marsijoloman hu Bani”. (2 Kron. 16:9) Maningon do homa idingat hita anggo Jahowa sihol mangurupi hita. Iarusi do situasinta janah holong do Ia hubanta. Ai porsaya do nasiam ibotoh Jahowa do haporluan ni nasiam na sihol ihaholongi ampa sihol marhasoman? Pos ma uhur ni nasiam pasal ai!

11, 12. (a) Hunja do taridah paruhuran ni si Hiskia na sasintongni? (b) Mase ra Jahowa manasap dousa ni si Hiskia?

¹¹ Aha do na boi iparlajari hita humbani si Hiskia? Iurupi Jahowa do ia ase mambotoh sonaha do paruhuranni sasintongni. (Basa 2 Kronika 32:31.) Sanggah ia boritan, ipatugah Jahowa laho pamalumon-Ni do ia anjaha ibere ma tanda ase porsaya si Hiskia. Ibahen Jahowa do sada tanda, ai ma halinoh na laho sapuluh garis dompak pudi. Dob ai, isuruh halak Babel ma suruhanni laho manjumpahi si Hiskia ase ibotoh aha arti ni tanda ai. (2 Raj. 20:8-13; 2 Kron. 32:24) Lang ipatugah Jahowa aha na maningon ibahen si Hiskia anggo roh sidea. Bibel patugahkon “itadingkon” Jahowa do ia ase ibotoh sonaha paruhuran ni si Hiskia. Ipataridah si Hiskia ma ganup artani hubani halak Babel. Hunjon taridah ma sonaha do paruhuran ni si Hiskia.

¹² Gabe gijang do uhurni si Hiskia.  Ujungni, “seng maruhur tarima kasih si Hiskia pasal idop ni uhur na jinaloni ai”. Lang ipatugah Bibel mase gabe sonai si Hiskia. Ra do halani domma italuhon ia halak Assur, atap ipamalum Jahowa na boritni, atap boi do homa halani bahat artani janah halak na tarsar do ia. Hassi pe humbani gok ni uhur do si Hiskia mambalosi Jahowa, tapi ongga do gijang uhurni janah lang marosuh Jahowa. Tapi dob ai, “ipaunduk si Hiskia ma uhurni” janah isasap Jahowa ma hasalahanni.—2 Kron. 32:25-27; Ps. 138:6.

13, 14. (a) Hunja do taridah sonaha paruhuranta na sasintongni? (b) Sonaha ma namin pangahapta sanggah dong na mamuji hita?

¹³ Aha do na boi iparlajari hita humbani hasalahan ni si Hiskia? Dingat hita ma si Hiskia margijang ni uhur dobkonsi ibahen Jahowa sidea manaluhon halak Assur, ampa ipamalum Jahowa naboritni. Jadi, anggo dapot hita na madear humbani aha na ibahen hita, atap sanggah dong na mamuji hita, sonaha namin pangahapta? Sonaha paruhuranta, taridah do ai humbani aha na ibahen hita. Umpamani, dong sanina na dear padaskon ambilan. Halani ai, bahat do halak na mamuji ia. Sonaha ma namin pangahapni sanggah ipuji?

¹⁴ Tongtong ma dingat hita aha na ihatahon Jesus on, “Anggo domma ihorjahon hanima ganup na pinarentahkon bannima, hatahon hanima ma, ‘Jabolon na so margagan do hanami, sibar horja na patut do hansa ilahoi hanami.’” (Luk. 17:10) Dingat ma halani gijang uhur ni si Hiskia, gabe lang be ia martarima kasih bani pangurupion ni Jahowa. Sanggah dong halak na mamuji halani dear hita marambilan, aha ma na mangurupi hita ase totap martoruh ni uhur? Rimangi ma aha na ibahen Jahowa hubanta. Patugah ma bani na legan sonaha Jahowa mangurupi hita. Sasintongni Jahowa do na mambere Bibel pakon tonduy-Ni banta ase boi marambilan.

15, 16. Aha do ihorjahon si Josia na mambahen matei ia?

¹⁵ Aha na boi iparlajari hita humbani si Josia? Hassi pe raja na dear ia, tapi ongga do mambahen hasalahan na mambahen matei ia. (Basa 2 Kronika 35:20-22.) Aha do na masa? Iporangi ia ma si Neko raja hun Masir, hassi pe lang adong alasanni na sintong laho mamorangi sidea. Hape domma ipatugah si Neko bani si Josia, anggo ia sedo na laho mamorangi sidea. Ihatahon Bibel do aha na ihatahon si Neko, marharorohan “humbani pamangan ni Naibata” do ai. Tapi, totap do iporangi ia si Neko anjaha matei ma ia. Mase sonai pambahenanni?  Lang ipatugah Bibel alasanni.

¹⁶ Ipindahi si Josia ma namin ai tongon do atap lang na ihatahon si Neko ai roh humbani Jahowa. Sonaha bahenonni? Boi isungkun ia si Jeremia atap nabi na legan. (2 Kron. 35:23, 25) Anjaha maningon ibotoh si Josia ma lobei aha do na masa sasintongni. Laho mamorangi bangsa na legan do Si Neko hu Karkemis, sedo hu huta Jerusalem. Anjaha si Neko lang manrisai Jahowa ampa juakjuak-Ni. Jadi, lang ipingkirhon si Josafat ganupan ai paima mambahen haputusan. Aha ma parlajaranni? Sanggah dong parsoalanta atap laho mambahen haputusan, maningon ipingkirhon hita ma aha do na sasintongni harosuh ni Naibata Jahowa.

17. Sanggah dong parsoalan, sonaha ase hita ulang songon si Josia?

¹⁷ Sanggah laho mambahen haputusan, maningon do lobei ipingkirhon hita podah hun Bibel, janah sonaha mandalankon ai. Sipata boi do ipindahi hatorangan hun publikasinta atap sungkun ma sada sintua. Ia boi mangurupi hita ase mangarusi podah hun Bibel. Rimangi ma contoh on: Adong sahalak botou na marhajabuan pakon na lang Saksi Jahowa. Bani sada ari, sihol marbarita do ia songon na somal. (Lah. 4:20) Tapi roh ma paramangonni patugahkon, domma dokah sidea lang padua-dua janah iarahkon ma ia laho hu sada ianan. Jadi, irimangi botou ai ma podah na ija do hun Bibel na boi mangurupi ia mambahen haputusan na dear. Ibotoh do maningon itangihon Jahowa, janah ihorjahon parentah ni Jesus laho mambahen susian. (Mat. 28:19, 20; Lah. 5:29) Tapi idingat do homa anggo ia pe porlu unduk bani paramangonni. (Ep. 5:22-24; Pil. 4:5) Ai na laho manlanglangi do paramangonni ai, atap pitah sihol mardalani pakonsi? Na gabe juakjuak ni Jahowa, maningon maruhur do hita mambahen haputusan janah pamalaskon uhur-Ni.

18. Parlajaran aha do na dapot hita humbani ompat raja hun Juda?

¹⁸ Sipata, ongga do homa hita mambahen hasalahan songon na ibahen ompat raja hun Juda. Ra do hita (1) marpangunsandeian bani pingkiran sandiri, (2) lang maruhur mamilih hasoman, (3) gabe gijang uhur, atap (4) mambahen haputusan paima ipindahi aha do harosuh ni Jahowa. Hassi pe sonai, ulang iahap hita anggo hita lang boi pamalaskon uhur-Ni. Ididah Jahowa do paruhuranta na dear, songon Ia mangidah paruhuran ni ompat raja ai. Ibotoh Jahowa do homa sonaha banggal ni holongta ampa harosuhta na laho mambalosi-Si. Jadi ipasirsir do contoh ase ulang hita mambahen hasalahan sisonai. Rimangi ma contoh ai, janah martarima kasih ma hubani Jahowa halani ai!