1, 2. Engkai maka perlu sipelajari kerna empat raja Juda?

ADI idahndu kalak celus bas sada dalan, tentu manjar-anjar kam erdalan bas dalan e. Bage ka pe, adi siperdiateken kesalahen si pernah ilakoken kalak, banci la silakoken kesalahen si seri. Contohna, banci kita erlajar i bas kesalahen kalak si ituriken i bas Pustaka si Badia.

² I bas artikel si nggo lewat, sipelajari kerna empat raja Juda si ngelayani Jahwe alu bulat ukur. Tapi lit ka kesalahen si mbelin si iban kalak e. Pengalamen kalak e isuratken i bas Pustaka gelah banci siukuri janah banci kita erlajar jenari. Kai si banci sipelajari jenda nari, janah uga gelah ula siban kesalahen si seri?—Oge Roma 15:4.

3-5. (a) Amin gia bulat ukur Asa man Jahwe, kai kesalahen si ilakokenna? (b) Engkai maka ernalem Asa man manusia paksa erperang ras Baasa?

³ Si pemena mari sipelajari kerna Asa. Ernalem ia  man Jahwe paksa Juda iserang sada juta kalak Etiopia. Tapi, la ia ernalem man Jahwe paksa iserangna Baasa, raja Israel. Ipengadina atena Baasa mbangun benteng Rama, kota si penting i Israel deher perbatasen kerajan Juda. (2 Kronika 16:1-3) Isogok Asa me raja Siria gelah isampatina ia. Paksa iserang Siria kota-kota i Israel, ”ingadiken Baasa erbahan benteng kuta Rama jenari itadingkenna dahin e”. (2 Kronika 16:5) Tangtangna, banci saja nggo benar iakap Asa keputusen si ibanna e.

⁴ Tapi uga perasan Jahwe? Nembeh ate Jahwe erkiteken la Asa ernalem man baNa, emaka iutusna nabi Hanani guna mpersingeti Asa. (Oge 2 Kronika 16:7-9.) Nina Hanani, ”Genduari nari kam lalap erperang.” Payo ikuasai Asa kuta Rama, tapi kidekah geluhna, ia ras rayatna lalap erperang.

⁵ Bas artikel si nggo lewat, sipelajari maka jadi ate Jahwe ngidah Asa. Amin gia Asa la serta, iidah Jahwe maka bulat ukur Asa man baNa. (1 Raja-Raja 15:14) Amin gia bage, paksa iban Asa keputusen si salah, la banci lang itanggungna akibatna. Engkai maka ernalem ia man dirina ras jelma si deban, lanai ernalem man Jahwe? Banci saja iakap Asa banci igunakenna taktik perang gelah menang ia ntah pe erkiteken ibegikenna nasehat si la mehuli bas si deban nari.

6. Kai si banci sipelajari i bas kesalahen Asa nari? Bereken contohna.

⁶ Kai nge si banci sipelajari i bas kesalahen Asa nari? Uga pe situasina, arus kita ernalem man Jahwe, ula man perukurenta saja. Perlu sipindo penampat Jahwe, la soal kitik ntah pe mbelin masalah e. Penting adi siukuri enda: Maun-maun sidungi nge masalah alu caranta sendiri? Ntah siukuri nge lebe kai si ikataken Pustaka janah siusahaken makeken keterangen e guna ndungi masalahta? Contohna, la ibere keluargandu kam lawes ku perpulungen ntah pe ku kebaktin. Ipindondu nge penampat Jahwe gelah ietehndu kai si arus ilakokenndu? Ntah pe banci saja nggo ndekah kam ndarami dahin, dungna lit kalak si nggit ngaloken kam jadi si erdahinna. Ikatakenndu nge bana maka arus kam pulung tep-tep minggu amin gia e banci erban kam la dat dahin? Kai pe masalahna, arus siinget nasehat pemasmur enda, ”Endesken dirindu man [Jahwe], ernalemlah man baNa, tentu isampatiNa kam.”—Masmur 37:5.

7, 8. Kesalahen kai si ilakoken Josapat, janah kai akibatna? (Nehen gambar pemena artikel.)

⁷ Gundari mari sipelajari contoh anak Asa, eme Josapat. Melala sipat-sipatna si mehuli si erban jadi ate Jahwe. Janah paksa ernalem ia man Jahwe, mbue perbahanenna si mehuli. Tapi, ibanna ka piga-piga keputusen si la mehuli. Contohna, iaturna gelah iempoi anakna anak Raja Ahap. Kenca si e, radu ras Ahap iserangna me kalak Siria, amin gia nggo ipersingeti nabi Mikaya. I bas pertempuren e, iserang tentera Siria me Josapat janah menam ibunuhna me ia. (2 Kronika 18:1-32) Paksa mulih ia ku Jerusalem, ikataken nabi Jehu bana, ”Iakapndu kin payo nampati kalak si jahat dingen ngkapiti kalak si ernembeh ate man [Jahwe]?”—Oge 2 Kronika 19:1-3.

⁸ Erlajar nge Josapat i bas kai si terjadi man bana bage pe i bas persinget si ibereken nabi Jehu ndai? Lang. Amin gia keleng atena Jahwe janah terus atena erban meriah ukur Jahwe, tapi mulihi ka ia erteman ras kalak si la ngelayani Jahwe, eme Raja Ahasia, anak Ahap. Radu me Josapat ras Ahasia erban kapal. Tapi leben kapal e rontas sope ipake kalak enda.—2 Kronika 20:35-37.

9. Kai akibatna adi salah kam milih teman?

⁹ Kai si banci sipelajari bas Josapat nari? Ilakoken Josapat kai si benar janah ”erdahin guna [Jahwe] asa gegehna lit”. (2 Kronika 22:9) Tapi erteman ia ras kalak si la ngkelengi  Jahwe, janah enda maba masalah si mbelin bas geluhna. Erkiteken si e menam ka ia ibunuh. Ingetlah kuan-kuanen bas Pustaka, nina, ”Adi kam erteman ras kalak pentar kam pe ikut jadi pentar, tapi adi kalak bodoh temanindu, kam pe ikut jadi bodoh.” (Kuan-kuanen 13:20) Sipebetehken ateta kerna Jahwe man kalak si deban. Tapi, bahaya adi ndehersa kita ras kalak si la ngelayani Jahwe.

10. (a) Kai si banci sipelajari bas Josapat nari adi erjabu ateta? (b) Kai si arusna siinget?

¹⁰ Contohna, kai si banci sipelajari bas Josapat nari adi erjabu ateta? Banci saja mulai ngena ateta kalak si la ngkelengi Jahwe. La lit siakap si cocok i bas umat Dibata. Ntah pe lalap isuruh kade-kadenta kita erjabu sope metua. Payo itepa Jahwe kita guna ikelengi ras ngkelengi. Tapi, adi la lit si cocok, kai nge si arus silakoken? Tersampati kita adi siukuri kai si terjadi nandangi Josapat. Biasana ipindona petunjuk Jahwe. (2 Kronika 18:4-6) Tapi, paksa erteman ia ras Ahap, si la ngkelengi Jahwe, lanai iperdiateken Josapat persinget Jahwe. Arusna iinget Josapat maka ”iperdiateken [Jahwe] kerina doni enda, gelah iberekenNa gegeh man kalak si setia man baNa.” (2 Kronika 16:9) Janah kita pe arus ka siinget maka Jahwe nggit nampati kita. IangkaiNa keadanta janah keleng ateNa kita. Tek nge kam maka ieteh Dibata kerna sura-surandu i bas ndatken teman nggeluh si cocok janah pasti isampatiNa? Teklah kam, isampatiNa nge!

11, 12. (a) Kai si ilakoken Hiskia si ncidahken isi pusuhna? (b) Engkai maka ialemi Jahwe Hiskia?

¹¹ Kai nge si banci sipelajari bas Hiskia nari? Isampati Jahwe me Hiskia guna meteh kai si lit bas pusuhna. (Oge 2 Kronika 32:31.) Paksa sakit Hiskia, ikataken Dibata bana maka malem nge ia janah ibereNa tanda gelah ia tenang. Iban Jahwe awih-awih bas tangga surut sepuluh jingkang. Kenca si e, banci saja ieteh raja Babilon atena terbuen kerna tanda e, emaka iutusna utusen-utusen man Hiskia guna nungkunisa. (2 Raja-Raja 20:8-13; 2 Kronika 32:24) La ikataken Jahwe uga arusna perbahanenna kempak utusen e. Ikataken Pustaka maka ”ipelepas Dibata si Hiskia sisada”  guna meteh kai si ilakokenna kari. Icidahken Hiskia kerina kinibayakenna man utusen Babilon e. Enda ncidahken kai si lit bas pusuh Hiskia.

¹² Sayangna, meganjang me dungna ukur Hiskia. Enda erban ”Hiskia la ngataken bujur kerna kai si enggo ibahan [Jahwe] man bana”. La ikataken Pustaka ngkai maka Hiskia berubah. Banci saja erkiteken menang ia ngelawan Assur ntah pe erkiteken ipepalem Jahwe. Ntah banci saja erkiteken ia nggo bayak ras terkenal. Amin gia bulat ukur Hiskia ngelayani Jahwe, pernah ka ia meganjang rukur janah la ngena ate Jahwe. Tapi dungna, ’ipeteruk Hiskia bana’, janah ialemi Dibata ia.—2 Kronika 32:25-27; Masmur 138:6.

13, 14. (a) Keadan kai si banci ncidahken isi pusuhta? (b) Uga arusna tanggapenta paksa ipuji?

¹³ Kai si banci sipelajari bas Hiskia nari bage pe kesalahenna? Ingetlah maka meganjang ukur Hiskia kenca isampati Jahwe ia naluken Assur bage pe kenca ia ipepalem. Emaka paksa jore geluhta ntah pe paksa ipuji, uga nge tanggapenta? Tanggapenta ncidahken isi pusuhta. Contohna, tutus kel ate turang seninanta erban persikapen guna mpeseh kotbah man jelma si nterem. Melala si muji ia. Uga nge tanggapenna kerna pujin e?

¹⁴ Arusna siinget rusur kai si ikataken Jesus, ”Adi enggo idalankenndu kerina kewajipenndu, nindulah, ’Kami enda suruh-suruhen si la erguna, kewajipen kami ngenca idalanken kami.’” (Lukas 17:10) Ingetlah paksa meganjang ukur Hiskia, la iergaina penampat Jahwe. Emaka paksa kita ipuji kerna kotbah si nggo sipeseh, kai nge si nampati kita gelah tetap meteruk rukur? Banci siukuri kai si nggo ilakoken Jahwe banta. Janah banci situriken uga Ia nampati kita. Ugapa pe, Ia nge si mereken Pustaka ras kesah si badia gelah banci mpeseh kotbah e.

15, 16. Kai si ilakoken Josia si erban ia mate?

¹⁵ Si pendungi, kai si banci sipelajari bas Josia nari? Amin gia Josia raja si mehuli, ilakokenna ka kesalahen si erban ia mate. (Oge 2 Kronika 35:20-22.) Kai si terjadi? Iserangna Neko, raja Mesir, amin gia la lit alasenna. Kepeken, Neko sendiri si ngataken man Josia maka la atena erperang ras ia. Nina Pustaka, kata-kata Neko e rehna bas Dibata nari. Tapi tetap iserangna janah dungna mate me  Josia. Engkai maka iserangna Neko? La ikataken Pustaka alasenna.

¹⁶ Arusna idarami Josia lebe tuhu ntah lang kata-kata Neko e bas Jahwe nari. Uga carana? Banci isungkunna Jeremia, nabi Jahwe. (2 Kronika 35:23, 25) Bage pe, arusna ipegermetken Josia ka lebe uga keadan situhuna. Ate Neko lawes ku Kermis nerang bangsa si deban, labo Jerusalem. Janah labo ihinana Jahwe bage pe umatNa. La manjar-anjar iukuri Josia kerna si e sope erban keputusen. Kai pelajarenna? Paksa lit masalahta janah perlu siban keputusen, arus siperdiateken lebe kai peraten Jahwe.

17. Paksa lit masalahta, uga carana gelah la siban kesalahen bagi Josia?

¹⁷ Paksa arus siban keputusen, si-ukuri lebe ayat-ayat Pustaka si banci nampati kita ras uga ngelakokenca. I bas masalah tertentu, banci ka siriset oge-ogenta ntah pe banci ka sipindo nasehat pertua. Banci isampatina kita ngukuri ayat-ayat si deban bas Pustaka. Cuba ukuri keadan enda: Lit sekalak turang seninanta si perbulangenna la Saksi. Ibanna rencana guna lawes erberita. (Perbahanen Rasul-Rasul 4:20) Tapi, la ate perbulangenna ia lawes bas wari si nggo itentukenna e. Ikataken perbulangenna maka bas pudi wari enda la lit waktu kalak e dua-dua emaka erdalan-dalan atena. Emaka iukuri turang seninanta e ayat Pustaka si banci nampati ia erban keputusen si mehuli. Ietehna maka arus ia patuh man Dibata ras perentah Jesus guna erberita. (Matius 28:19, 20; Perbahanen Rasul-Rasul 5:29) Tapi iingetna ka maka ndehara arus patuh man perbulangenna janah umat Dibata arus masuk akal. (Epesus 5:15, 22-24) Gelah ula erberita saja nge ate perbulangenna ia, ntah gelah erdalan-dalan saja nge atena? Selaku umat Jahwe, ateta erban keputusen si masuk akal ras si erban meriah ukur Jahwe.

18. Pelajaren kai si banci sidat i bas ngukuri empat contoh raja Juda?

¹⁸ Banci saja bas sada paksa ngelakoken kesalahen kita bagi salah sada i bas empat raja Juda e. Mungkin (1) ernalem kita man perukurenta, (2) salah sipilih temanta, (3) meganjang ukurta, ntah pe (4) siban keputusen tapi la siukuri lebe kai peraten Dibata. Tapi, ula siakap la banci siban meriah ukur Jahwe. Iidah Jahwe kai si mehuli bas dirinta, bagi Ia ngidah kai si mehuli bas empat raja e. Iidah Jahwe ka uga belinna kekelengenta baNa ras uga belinna sura-suranta ngelayani Ia. Emaka ibereNa kita contoh si nampati kita gelah ula ngelakoken kesalahen si mbelin. Mari siukuri persinget si lit bas Pustaka e janah sikataken bujur erkiteken ibere Jahwe e jadi contoh man banta!