မ့ၢ်နကမၤပိာ်ထွဲဒ် တၢ်ကွဲးအသးအသိးဧါ
“တၢ်န့ၣ်တဖၣ်. . . အိၣ်ကွဲးအသးလၢပဝဲဒၣ်, လၢတၢ်အစိၤကတၢၢ်ဟဲဘၣ်အီၤအဂီၢ်, ဒ်သိးပကဘၣ်တၢ်သိၣ်က့ၤသီက့ၤန့ၣ်လီၤ.”—၁ ကရံၣ်သူး ၁၀:၁၁.
၁, ၂. ဘၣ်မနုၤအဃိ ပကသမံသမိးကွၢ် ယူဒၤအစီၤပၤလွံၢ်ဂၤအံၤအဂ့ၢ်လဲၣ်.
နမ့ၢ်ထံၣ်ဘၣ်လၢ ပှၤတဂၤလီၤဃံၢ်ဖဲကျဲတဘိလၢ နကလဲၤန့ၣ် နကပလီၢ်နသး ဒ်သိးနသုတလီၤဃံၢ်ဒ်သိးအီၤ တဂ့ၤအဂီၢ်လီၤ. ဒ်န့ၣ်အသိး ပမ့ၢ်ဆိကမိၣ်ထံ တၢ်ကမၣ်လၢ ပှၤအဂၤတဖၣ် မၤဝဲအဂ့ၢ်န့ၣ် ကမၤစၢၤပှၤဒ်သိး ပသုတမၤကမၣ်တၢ် ဒ်အဝဲသ့ၣ်တဂ့ၤအဂီၢ်လီၤ. အဒိ, ပဟံးန့ၢ်တၢ်မၤလိလၢ ပှၤလၢအမၤဘၣ်တၢ်ကမၣ်လၢ လံာ်စီဆှံပာ်ဖျါထီၣ်ဝဲတဖၣ် အအိၣ်သ့ဝဲလီၤ.
၂ စီၤပၤလွံၢ်ဂၤလၢ ပမၤလိဘၣ်အဂ့ၢ်လၢ တၢ်မၤလိလၢအပူၤကွံာ်တခါန့ၣ် အဝဲသ့ၣ်မၤယွၤအတၢ်မၤလၢ သူၣ်ဒီဖျၢၣ်သးဒီဖျၢၣ်လီၤ. ဘၣ်ဆၣ် အဝဲသ့ၣ်စ့ၢ်ကီး မၤဘၣ်တၢ်ကမၣ်ဖးဒိၣ်လီၤ. အဝဲသ့ၣ်အတၢ်လဲၤခီဖျိတဖၣ်န့ၣ် ဘၣ်တၢ်ကွဲးလီၤအီၤလၢ လံာ်စီဆှံအပူၤ ဒ်သိးပကဆိကမိၣ်ထံ အဝဲသ့ၣ်အဂ့ၢ်ဒီး ဟံးန့ၢ်တၢ်မၤလိလၢ အကဲဘျုးလၢပဂီၢ်န့ၣ်လီၤ. ပဟံးန့ၢ်တၢ်မၤလိလၢ အဝဲသ့ၣ်အအိၣ် ကသ့ဒ်လဲၣ်. ဒီးဒ်သိးပသုတမၤဘၣ်တၢ်ကမၣ် ဒ်အဝဲသ့ၣ်တဂ့ၤအဂီၢ် ပကဘၣ်မၤဒ်လဲၣ်.—ဖး ရိမ့ၤ ၁၅:၄ တက့ၢ်.
ပမ့ၢ်ဟံးန့ၢ်တၢ်ဟ့ၣ်ကူၣ်လၢ ပှၤဟီၣ်ခိၣ်ဖိအအိၣ်န့ၣ် ပကဘၣ်တၢ်ကီတၢ်ခဲ
၃-၅. (က) စီၤအၤစါသန့ၤအသးလၢ ယွၤအအိၣ်လၢ အသးဒီဖျၢၣ်သနာ်က့ အဝဲမၤဘၣ်တၢ်ကမၣ်မနုၤလဲၣ်. (ခ) ဘၣ်မနုၤအဃိ စီၤအၤစါ သန့ၤအသးလၢ ပှၤကညီ ဖဲအဒုးတၢ်ဒီး စီၤဘါၡၤအခါလဲၣ်.
၃ အဆိကတၢၢ် ပကဆိကမိၣ်ကွၢ် စီၤအၤစါအဂ့ၢ်လီၤ. ဖဲပှၤကူၤၡးဖိ အသုးမုၢ်သံၣ်ဘိ တကကွဲၢ် ဟဲဒုးပှၤယူဒၤဖိအခါ အဝဲသန့ၤအသးလၢ ယဟိဝၤယွၤအအိၣ်လီၤ. ဘၣ်ဆၣ် ဖဲစီၤဘါၡၤ ဘှီဂ့ၤထီၣ်က့ၤဝဲ ဝ့ၢ်ရၤမါအခါန့ၣ် စီၤအၤစါအဲၣ်ဒိးမၤပတုာ်ဝဲ စီၤဘါၡၤအတၢ်မၤအံၤလီၤ. ဝ့ၢ်ရၤမါမ့ၢ်ဝဲဝ့ၢ်လၢ အရ့ဒိၣ်တဖျၢၣ်လၢ ကီၢ်အံၣ်စရ့လးအပူၤလီၤ. တဘျီအံၤ ဖဲအဝဲလဲၤဒုး စီၤဘါၡၤ, လၢအမ့ၢ်အံၣ်စရ့လးအစီၤပၤအခါ အဝဲတသန့ၤအသးလၢ ယဟိဝၤယွၤအအိၣ်ဘၣ်. (၂ ကွဲးနီၣ်တၢ် ၁၆:၁-၃) စီၤအၤစါ ဟ့ၣ်လီၤဝဲစူၤရံအစီၤပၤလၢ ကျိၣ်ဧိၤစ့ဧိၤဒီး ထူဧိၤလွဲဧိၤ ဒီးဃ့တၢ်မၤစၢၤလၢအအိၣ်လီၤ. ဖဲပှၤစူၤရံဖိ လဲၤဒုးဝဲအံၣ်စရ့လးအဝ့ၢ်အခါ စီၤဘါၡၤ “ဆိကတီၢ်ကွံာ်အတၢ်မၤဂၢၢ်မၤကျၢၤဝ့ၢ်ရၤမါ အတိာ်အတာ်တဖၣ် ဒီးပာ်တီၢ်ကွံာ်တၢ်မၤန့ၣ်လီၤ.” (၂ ကွဲးနီၣ်တၢ် ၁၆:၅, ခ့ခါစှီၤကျိာ်) ဘၣ်သ့ၣ်သ့ၣ် စီၤအၤစါကဆိကမိၣ်ဝဲလၢ အတၢ်ဆၢတဲာ်အံၤန့ၣ်ဘၣ်ဝဲလီၤ.
၄ ဘၣ်ဃးဒီး စီၤအၤစါအတၢ်ဆၢတဲာ်အံၤန့ၣ် ယဟိဝၤယွၤတူၢ်ဘၣ်ဝဲဒ်လဲၣ်. စီၤအၤစါ တသန့ၤအသးလၢ ယဟိဝၤယွၤဘၣ်အဃိ ယဟိဝၤယွၤတဘၣ်သူၣ်ဘၣ်သးအီၤဘၣ်. လၢတၢ်န့ၣ်အဃိ ယွၤဆှၢလီၤဝံစီၤဃနၤနံ ဒ်သိးကသိၣ်က့ၤသီက့ၤအီၤလီၤ. (ဖး ၂ ကွဲးနီၣ်တၢ် ၁၆:၇-၉ တက့ၢ်.) စီၤဃနၤနံ တဲဘၣ်စီၤအၤစါလၢ– “တုၤအံၤ ဆူညါနကအိၣ်ဒီး တၢ်ဒုးသုးလီၤ.” အဝဲပၢဘၣ်ဝဲ ရၤမါအဝ့ၢ် ဘၣ်ဆၣ် လၢအတၢ်အိၣ်မူဒီတကတီၢ်အပူၤန့ၣ် အဝဲဒီးအပှၤဂီၢ်မုၢ်တဖၣ် ဘၣ်ဒုးတၢ်အါမးလီၤ.
၅ တၢ်မၤလိလၢ အပူၤကွံာ်တခါန့ၣ် ပသ့ၣ်ညါဘၣ်လၢ ယဟိဝၤယွၤ ဘၣ်သူၣ်ဘၣ်သးဝဲ စီၤအၤစါလီၤ. စီၤအၤစါတမ့ၢ် ပှၤလၢပှၤပှဲၤဘၣ်သနာ်က့ ယွၤထံၣ်အီၤဒ်ပှၤတဂၤလၢ အသန့ၤအသးလၢ ယွၤအအိၣ်လၢအသးဒီဖျၢၣ်လီၤ. (၁ စီၤပၤ ၁၅:၁၄) ဘၣ်ဆၣ် မ့ၢ်လၢစီၤအၤစါမၤတၢ်ဆၢတဲာ်လၢ အကမၣ်အဃိ အဝဲဘၣ်တူၢ်ဘၣ်ဝဲ တၢ်လၢအဟဲကဲထီၣ်အသးလၢ အတၢ်ဆၢတဲာ်အဃိတဖၣ်လီၤ. ဘၣ်မနုၤအဃိ စီၤအၤစါသန့ၤအသးလၢ အနီၢ်ကစၢ်ဒီးပှၤဟီၣ်ခိၣ်ဖိ ဒီးတသန့ၤအသးလၢ ယဟိဝၤယွၤအအိၣ်လဲၣ်. ဘၣ်သ့ၣ်သ့ၣ် စီၤအၤစါ ကဆိကမိၣ်ဝဲလၢ အဝဲမ့ၢ်သူဝဲသုးဖိလၢအဂ့ၤ ဒီးအဖၠဲးတဖၣ်န့ၣ် ကမၤနၢၤဝဲတၢ်ဒုးလီၤ. မ့တမ့ၢ် ဘၣ်သ့ၣ်သ့ၣ် အဝဲကဒိကနၣ်ဘၣ် ပှၤဂၤအတၢ်ဟ့ၣ်ကူၣ်လၢ အကမၣ်န့ၣ်လီၤ.
လၢတၢ်ခဲလၢာ်အပူၤ ပကဘၣ်သန့ၤပသးလၢ ယဟိဝၤယွၤ ဒီးပတဘၣ်သန့ၤပသးလၢ ပနီၢ်ကစၢ်အတၢ်ဆိကမိၣ်ဘၣ်
၆. တၢ်ကမၣ်လၢ စီၤအၤစါမၤဘၣ်ဝဲန့ၣ် ပဟံးန့ၢ်တၢ်မၤလိလၢ အအိၣ်ကသ့ဒ်လဲၣ်, ဟ့ၣ်တၢ်အဒိတက့ၢ်.
၆ တၢ်ကမၣ်လၢ စီၤအၤစါမၤဘၣ်ဝဲန့ၣ် ပဟံးန့ၢ်တၢ်မၤလိလၢ အအိၣ်ကသ့ဒ်လဲၣ်. လၢတၢ်ခဲလၢာ်အပူၤန့ၣ် ပကဘၣ်သန့ၤပသးလၢ ယဟိဝၤယွၤ ဒီးပတဘၣ်သန့ၤပသးလၢ ပနီၢ်ကစၢ်အတၢ်ဆိကမိၣ်ဘၣ်. ပတၢ်ဂ့ၢ်ကီလၢ အဒိၣ်မ့ၢ်ဂ့ၤအဆံးမ့ၢ်ဂ့ၤ ပကဘၣ်ဃ့တၢ်မၤစၢၤလၢ ယဟိဝၤယွၤအအိၣ်လီၤ. ပကြၢးသံကွၢ်လီၤ ပသးဒ်အံၤလီၤ- မ့ၢ်ယသန့ၤယသးလၢ ယနီၢ်ကစၢ်ဒီး ဂုာ်ကျဲးစၢးမၤဘၣ်ဂီၢ်က့ၤ ယတၢ်ဂ့ၢ်ကီဒ် ယနီၢ်ကစၢ်အတၢ်ထံၣ်အသိးဧါ. မ့တမ့ၢ် မ့ၢ်ယဃုဆိ လံာ်စီဆှံအတၢ်ဟံးစုနဲၣ်ကျဲ ဒီးသူအီၤလၢ ကမၤဘၣ်ဂီၢ်က့ၤ ယတၢ်ဂ့ၢ်ကီတဖၣ်အဂီၢ်ဧါ. အဒိ, ဖဲနဟံၣ်ဖိဃီဖိ မၤတံာ်တာ်နၤလၢ နကလဲၤထီၣ်တၢ်အိၣ်ဖှိၣ်ရိဖှိၣ် မ့တမ့ၢ် တၢ်အိၣ်ဖှိၣ်ဖးဒိၣ်အခါ နကမၤဒ်လဲၣ်, မ့ၢ်နကဃ့တၢ်မၤစၢၤလၢ ယဟိဝၤယွၤအအိၣ်ဧါ. မ့တမ့ၢ် ဘၣ်သ့ၣ်သ့ၣ် နတၢ်မၤတအိၣ်ဘၣ်ဖးယံာ်လံ ဘၣ်ဆၣ်အခဲအံၤ နထံၣ်ဘၣ်ပှၤတဂၤလၢ အအဲၣ်ဒိးဟ့ၣ်နၤတၢ်မၤလီၤ. ဘၣ်ဆၣ် မ့ၢ်နကအိၣ်ဒီးတၢ်သူၣ်ဒူသးဒူလၢ နကတဲပၠးအီၤလၢ နကဘၣ်ထီၣ်တၢ်အိၣ်ဖှိၣ်ရိဖှိၣ် ကိးနွံဒဲးအဂီၢ်န့ၣ်ဧါ. ပမ့ၢ်အိၣ်ဒီးတၢ်ကီတၢ်ခဲဒ်လဲၣ်ဂ့ၤ ဒ်လဲၣ်ဂ့ၤ ပကဘၣ်သ့ၣ်နီၣ်ထီၣ် ပှၤကွဲးထါစံးထီၣ်ပတြၢၤ အတၢ်ဟ့ၣ်ကူၣ်လၢ– “ဟ့ၣ်လီၤနသးလၢယွၤ, နာ်အီၤဒီးအဝဲကမၤစၢၤလီၤ.”—စံးထီၣ်ပတြၢၤ ၃၇:၅, ခ့ခါစှီၤကျိာ်.
ပဃုထၢ တံၤသကိးမ့ၢ်ကမၣ်န့ၣ် တၢ်မနုၤကဲထီၣ်အသးသ့လဲၣ်
၇, ၈. စီၤယဟိၡၤဖး မၤတၢ်ကမၣ်မနုၤလဲၣ်, ဒီးတၢ်ကဲထီၣ်အသးဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၇ ခဲအံၤ ပကဆိကမိၣ်ကွၢ် စီၤအၤစါအဖိခွါ စီၤယဟိၡၤဖးအဂ့ၢ်လီၤ. အဝဲအိၣ်ဒီး တၢ်ဂ့ၤတၢ်ဝါအါမံၤလၢ ယဟိဝၤယွၤ ဘၣ်သူၣ်ဘၣ်သးဝဲန့ၣ်လီၤ. ဒီးဖဲအဝဲသန့ၤအသးလၢ ယဟိဝၤယွၤအခါ အဝဲမၤဝဲတၢ်ဂ့ၤအါမးလီၤ. ဘၣ်ဆၣ် အဝဲမၤဘၣ် တၢ်ဆၢတဲာ်လၢ အကမၣ်စ့ၢ်ကီးလီၤ. အဒိ, အဝဲရဲၣ်ကျဲၤဝဲလၢ အဖိခွါကဆီဟံၣ်ဆီဃီဒီး စီၤပၤအၤဃာ်လၢအမ့ၢ် ပှၤအၢပှၤသီတဂၤ အဖိမုၣ်န့ၣ်လီၤ. လၢခံဝံမံၤကါယၤ ဟ့ၣ်ပလီၢ်အီၤလၢ တဘၣ်လဲၤဒုးသကိးတၢ်ဒီး စီၤအၤဃာ်ဘၣ် ဘၣ်ဆၣ် ဖဲစီၤအၤဃာ်လဲၤဒုး ပှၤစူၤရံဖိအခါ စီၤယဟိၡၤဖး လဲၤဒုးစၢၤဝဲလီၤ. လၢတၢ်ဒုးပျီပူၤန့ၣ် ပှၤစူၤရံဖိဒုး စီၤယဟိၡၤဖး ဒီးဂုာ်ကျဲးစၢးမၤသံအီၤလီၤ. (၂ ကွဲးနီၣ်တၢ် ၁၈:၁-၃၂) ဖဲအဝဲဟဲက့ၤလၢ ဝ့ၢ်ယရူၤၡလ့ၣ်အခါ ဝံယ့ၤဟူ သံကွၢ်အီၤလၢ– “နကမၤစၢၤပှၤတတီတလိၤ, ဒီးအဲၣ်ပှၤလၢအသးဟ့ယွၤန့ၣ်ဧါ.”—ဖး ၂ ကွဲးနီၣ်တၢ် ၁၉:၁-၃ တက့ၢ်.
၈ မ့ၢ်စီၤယဟိၡၤဖး ဟံးန့ၢ်တၢ်မၤလိလၢ တၢ်လၢကဲထီၣ်သးဒီးအီၤ ဒီးဝံအတၢ်ဟ့ၣ်ပလီၢ်ဧါ. လီၤသးအုးဒိၣ်မးလၢ အဝဲတဟံးန့ၢ်တၢ်မၤလိဘၣ်. အဝဲအဲၣ်ယဟိဝၤယွၤဒီး အဲၣ်ဒိးမၤယွၤအတၢ်ဘၣ်သးသနာ်က့ လၢခံအဝဲဒီတံၤဒီသကိးဒီး စီၤပၤအၤဃာ်အဖိခွါ စီၤအဃၤစယၤ လၢအမ့ၢ် ပှၤလၢအတအဲၣ်ဒိးဘူၣ်ထီၣ်ဘါထီၣ် ယဟိဝၤယွၤန့ၣ်လီၤ. စီၤယဟိၡၤဖးဒီးစီၤအဃၤစယၤန့ၣ် တ့ထီၣ်သကိးဝဲကဘီတဖၣ်လီၤ. ဘၣ်ဆၣ် တချုးလၢအဝဲသ့ၣ် သူဘၣ်ကဘီတဖၣ်ဒံးဘၣ်အခါ ကဘီတဖၣ်အံၤဟးဂီၤကွံာ်ဝဲလီၤ.—၂ ကွဲးနီၣ်တၢ် ၂၀:၃၅-၃၇.
၉. ပဃုထၢတံၤသကိး မ့ၢ်ကမၣ်န့ၣ် တၢ်ကကဲထီၣ်အသးဒီးပှၤဒ်လဲၣ်.
၉ တၢ်လၢအကဲထီၣ်အသးဒီး စီၤယဟိၡၤဖးန့ၣ် ပဟံးန့ၢ်တၢ်မၤလိသ့ဒ်လဲၣ်. စီၤယဟိၡၤဖး မၤတၢ်လၢအဘၣ်ဒီး “ဃုယွၤလၢအသးဒီဖျၢၣ်ညါ” လီၤ. (၂ ကွဲးနီၣ်တၢ် ၂၂:၉) ဘၣ်ဆၣ် အဝဲရ့ဒီးပှၤလၢတအဲၣ်ယဟိဝၤယွၤဘၣ်အဃိ တၢ်ကီတၢ်ခဲဖးဒိၣ်အိၣ်ထီၣ်ဝဲလၢ အတၢ်အိၣ်မူအပူၤတုၤဒၣ်လဲာ် ပှၤဘူးကမၤသံအီၤန့ၣ်လီၤ. သ့ၣ်နီၣ်ထီၣ်လၢ လံာ်စီဆှံစံးဝဲ– “ပှၤလၢအလဲၤတၢ်ဒီး ပှၤကူၣ်တၢ်သ့န့ၣ် ကကဲထီၣ်ပှၤကူၣ်တၢ်သ့လီၤ. မ့မ့ၢ်ပှၤဒီတံၤဒီသကိးဒီး ပှၤဟးဂီၤဖိန့ၣ် ကတုၤလၢတၢ်ဟးဂီၤလီၤ.” (ကတိၤဒိ ၁၃:၂၀) ပအဲၣ်ဒိးတဲဘၣ်ပှၤဂၤလၢ ယဟိဝၤယွၤအဂ့ၢ်လီၤ. ဘၣ်ဆၣ် ပမ့ၢ်ရ့ဘူးဘူးတံၢ်တံၢ်ဒီး ပှၤလၢတဘူၣ်ထီၣ်ဘါထီၣ် ယဟိဝၤယွၤန့ၣ် မ့ၢ်တၢ်လၢအလီၤဘၣ်ယိၣ်ဒိၣ်မးလီၤ.
နမ့ၢ်အဲၣ်ဒိးဃုထံၣ်န့ၢ် နသးသမူတံၤသကိး လၢအကြၢးဝဲဘၣ်ဝဲန့ၣ် မ့ၢ်နနာ်လၢ ယဟိဝၤယွၤသ့ၣ်ညါ နတၢ်လိၣ်ဘၣ်ဒီး အဲၣ်ဒိးမၤစၢၤနၤစ့ၢ်ကီးဧါ
၁၀. (က) ပမ့ၢ်အဲၣ်ဒိးဆီဟံၣ်ဆီဃီန့ၣ် ပဟံးန့ၢ်တၢ်မၤလိလၢ စီၤယဟိၡၤဖး အအိၣ်ကသ့ဒ်လဲၣ်. (ခ) ပကြၢးသ့ၣ်နီၣ်ထီၣ်တၢ်မနုၤလဲၣ်.
၁၀ ပမ့ၢ်အဲၣ်ဒိးဆီဟံၣ်ဆီဃီန့ၣ် ပဟံးန့ၢ်တၢ်မၤလိလၢ စီၤယဟိၡၤဖး အအိၣ်ကသ့ဒ်လဲၣ်. အဒိ, ပကကွၢ်ဂ့ၤပှၤတဂၤလၢ အတဘူၣ်ထီၣ်ဘါထီၣ် ယဟိဝၤယွၤ ဒီးအဝဲကထုးန့ၢ်ပသးလီၤ. ဘၣ်သ့ၣ်သ့ၣ် ပအဲၣ်ဒိးဆီဟံၣ်ဆီဃီ ဘၣ်ဆၣ် ပတူၢ်ဘၣ်လၢ ယွၤအတၢ်ကရၢကရိအပူၤ ပဃုပှၤတဘၣ်နီတဂၤဘၣ်. မ့တမ့ၢ် ပဘူးပတံၢ်ကတဲပှၤလၢ ပညါအိၣ်ထီၣ်လံ အခါဘၣ်လၢ ပကဘၣ်ဆီဟံၣ်ဆီဃီလီၤ. ယဟိဝၤယွၤတ့လီၤပှၤဃုာ်ဒီး တၢ်တူၢ်ဘၣ်လၢ ပကအဲၣ်တၢ်ဒီးပအဲၣ်ဒိး ဒိးန့ၢ်တၢ်အဲၣ်လၢ ပှၤဂၤအအိၣ်လီၤ. ဘၣ်ဆၣ် ပဃုပှၤလၢ အကြၢးအဘၣ်လၢ ပကဆီဟံၣ်ဆီဃီအဂီၢ် မ့ၢ်တဘၣ်ဒံးဘၣ်န့ၣ် ပကြၢးမၤဒ်လဲၣ်. ကျဲတဘိလၢ ကမၤစၢၤပှၤန့ၣ် ပကဘၣ်ဆိကမိၣ်ထံ တၢ်လၢအကဲထီၣ်အသးဒီး စီၤယဟိၡၤဖးန့ၣ်လီၤ. ညီနုၢ်န့ၣ် အဝဲဃ့တၢ်ဟံးစုနဲၣ်ကျဲလၢ ယဟိဝၤယွၤအအိၣ်လီၤ. (၂ ကွဲးနီၣ်တၢ် ၁၈:၄-၆) ဘၣ်ဆၣ် ဖဲအဝဲဒီတံၤဒီသကိးဒီး စီၤအၤဃာ် လၢအမ့ၢ်ပှၤလၢ တဘူၣ်ထီၣ်ဘါထီၣ် ယဟိဝၤယွၤအခါ အဝဲတဒိကနၣ် ယဟိဝၤယွၤအတၢ်ဟ့ၣ်ပလီၢ်လၢၤဘၣ်. စီၤယဟိၡၤဖး ကြၢးသ့ၣ်နီၣ်ထီၣ်ဝဲလၢ “ယွၤအမဲာ်ဟးဝ့ၤဝီၤတၢ်လၢ ဟီၣ်ခိၣ်ချၢဒီဘ့ၣ်ညါ, ဒ်သိးအကပာ်ဆူၣ်ထီၣ်အသးလၢ ပှၤလၢအအိၣ်ဒီး အသးဒီဖျၢၣ်ဒီး အီၤတဖၣ်အဂီၢ်န့ၣ်လီၤ.” (၂ ကွဲးနီၣ်တၢ် ၁၆:၉) ပဝဲစ့ၢ်ကီး ပကြၢးသ့ၣ်နီၣ်ထီၣ်လၢ ယဟိဝၤယွၤသးအိၣ်မၤစၢၤပှၤလီၤ. ကစၢ်ယွၤနၢ်ပၢၢ်ပတၢ်အိၣ်သးဒီး အဝဲအဲၣ်ပှၤလီၤ. နမ့ၢ်အဲၣ်ဒိးဃုထံၣ်န့ၢ် နသးသမူတံၤသကိးလၢ အကြၢးဝဲဘၣ်ဝဲန့ၣ် မ့ၢ်နနာ်လၢ ယဟိဝၤယွၤသ့ၣ်ညါ နတၢ်လိၣ်ဘၣ်ဒီး အဲၣ်ဒိးမၤစၢၤနၤစ့ၢ်ကီးဧါ. နနာ်သ့သပှၢ်ကတၢၢ်လၢ အဆၢကတီၢ်မ့ၢ်ဘၣ်န့ၣ် အဝဲကမၤစၢၤနၤလီၤ.
ပလီၢ်နသးဒ်သိး နသုတယိး နီၣ်ယိးဘိဖုၣ်ထံၣ်ဖုၣ်ထီဒီး ပှၤလၢအတဘူၣ်ထီၣ်ဘါထီၣ် ယဟိဝၤယွၤန့ၣ်တဂ့ၤ (ကွၢ်လံာ်အဆၢ ၁၀)
တဘၣ်ဟ့ၣ်အခွဲးလၢ နကအိၣ်ဒီး တၢ်ပာ်ထီၣ်ထီသးတဂ့ၤ
၁၁, ၁၂. (က) စီၤဃံးစကံယၤ မၤတၢ်မနုၤလၢ ပာ်ဖျါထီၣ်တၢ်အိၣ်လၢ အသးပူၤနီၢ်နီၢ်န့ၣ်လဲၣ်. (ခ) ဘၣ်မနုၤအဃိ ယဟိဝၤယွၤ ပျၢ်ကွံာ်အတၢ်ကမၣ်လဲၣ်.
၁၁ ပဟံးန့ၢ်တၢ်မၤလိလၢ စီၤဃံးစကံယၤအအိၣ်သ့ဒ်လဲၣ်. ယဟိဝၤယွၤ မၤစၢၤစီၤဃံးစကံယၤ ဒ်သိးအကသ့ၣ်ညါလီၤအသးလၢ အမ့ၢ်ပှၤဒ်လဲၣ်တဂၤလဲၣ်န့ၣ်လီၤ. (ဖး ၂ ကွဲးနီၣ်တၢ် ၃၂:၃၁ တက့ၢ်.) ဖဲစီၤဃံးစကံယၤ ဆိးက့နးနးကလဲာ်အခါ ယွၤတဲအီၤလၢ အဝဲကကိညၢ်လီၤဒီး ယွၤဟ့ၣ်အီၤတၢ်ပနီၣ်လၢ ကမၤဘျါက့ၤအတၢ်ဆါခီဖျိ ယဟိဝၤယွၤဒုးက့ၤကဒါက့ၤ တၢ်ကဒုအတီၤတဆံ ဆူတၢ်လီၢ်ခံန့ၣ်လီၤ. ဒီးလၢခံလီၤဂာ်လၢ ဘၤဘူၤလိၣ်အပဒိၣ်တဖၣ် အဲၣ်ဒိးသ့ၣ်ညါအါထီၣ်ဘၣ်ဃး တၢ်ဂ့ၢ်အံၤဒီး အဝဲသ့ၣ်ဆှၢလီၤအပှၤလၢ ကဟဲသံကွၢ်စီၤဃံးစကံယၤန့ၣ်လီၤ. (၂ စီၤပၤ ၂၀:၈-၁၃; ၂ ကွဲးနီၣ်တၢ် ၃၂:၂၄) စီၤဃံးစကံယၤ ကဘၣ်ရ့ဒီးပှၤတဖၣ်အံၤဒ်လဲၣ်န့ၣ် ယဟိဝၤယွၤတတဲအီၤဘၣ်. လံာ်စီဆှံပာ်ဖျါထီၣ်ဝဲလၢ ယဟိဝၤယွၤ “လဲၤသဒၣ်” မ့တမ့ၢ် ပျဲစီၤဃံးစကံယၤ ဒ်သိးကမၤဝဲဒ် တၢ်အိၣ်လၢအသးပူၤအသိးလီၤ. စီၤဃံးစကံယၤဒုးနဲၣ် ပှၤဘၤဘူၤလိၣ်ဖိလၢ အဟဲသံကွၢ်တၢ်တဖၣ် လၢတၢ်လုၢ်ဒိၣ်ပှ့ၤဒိၣ်လၢ အိၣ်ဒီးအီၤခဲလၢာ်လီၤ. စီၤဃံးစကံယၤ အတၢ်မၤအံၤပာ်ဖျါထီၣ်ဝဲ တၢ်လၢအိၣ်လၢအသးပူၤတဖၣ်လီၤ. လၢကျဲဒ်လဲၣ်.
၁၂ လီၤသးအုးဒိၣ်မးလၢ စီၤဃံးစကံယၤ အတၢ်ပာ်ထီၣ်ထီသး အိၣ်ထီၣ်ဝဲလီၤ. လၢတၢ်န့ၣ်အဃိ အဝဲ “တဟ့ၣ်ကၣ်ဘၣ်တၢ်ဒ် တၢ်ဘျုးတၢ်ဖှိၣ် လၢအဘၣ်အီၤအသိးန့ၣ်ဘၣ်.” ဘၣ်မနုၤအဃိ အဝဲအတၢ်ပာ်သူၣ်ပာ်သး ဆီတလဲလဲၣ်န့ၣ် လံာ်စီဆှံတပာ်ဖျါဝဲဒၣ်ဘၣ်. ဘၣ်သ့ၣ်သ့ၣ် ကမ့ၢ်လၢအဝဲ ဒုးနၢၤဝဲပှၤအၤၡူၢ်ဖိအဃိ မ့တမ့ၢ် ခီဖျိလၢ ယဟိဝၤယွၤမၤဘျါကွံာ် အတၢ်ဆါအဃိလီၤ. မ့တမ့ၢ် ခီဖျိလၢအဝဲထူးထီၣ်တီၤထီၣ် ဒီးအမံၤဟူသၣ်ဖျါထီၣ်အဃိလီၤ. စီၤဃံးစကံယၤ မၤယွၤအတၢ်မၤလၢ သူၣ်ဒီဖျၢၣ်သးဒီဖျၢၣ် သနာ်က့ အတၢ်ပာ်ထီၣ်ထီသးအိၣ်ထီၣ်အဃိ ယဟိဝၤယွၤတဘၣ်သးဝဲဘၣ်. ဘၣ်ဆၣ်လၢခံ “စီၤဃံးစကံယၤဆီၣ်လီၤအသး” အဃိ ကစၢ်ယွၤပျၢ်ကွံာ်အတၢ်ကမၣ်လီၤ.—၂ ကွဲးနီၣ်တၢ် ၃၂:၂၅-၂၇; စံးထီၣ်ပတြၢၤ ၁၃၈:၆.
ဖဲပှၤဂၤစံးပတြၢၤပှၤအခါ ပတၢ်စံးတၢ်ကတိၤ ဒီးပတၢ်ပာ်သူၣ်ပာ်သးန့ၣ် ကပာ်ဖျါထီၣ်ဝဲလၢ ပမ့ၢ်ပှၤဒ်လဲၣ်တဂၤလဲၣ်န့ၣ်လီၤ
၁၃, ၁၄. (က) တၢ်အိၣ်လၢပသးပူၤဒ်လဲၣ်န့ၣ် ကဖျါထီၣ်လၢ အဆၢကတီၢ်ဖဲလဲၣ်. (ခ) ဖဲပှၤဂၤ ပတြၢၤပှၤအခါ ပကြၢးမၤဒ်လဲၣ်.
၁၃ တၢ်ကမၣ်လၢ စီၤဃံးစကံယၤမၤဝဲန့ၣ် ပဟံးန့ၢ်တၢ်မၤလိမနုၤသ့လဲၣ်. သ့ၣ်နီၣ်ထီၣ်လၢ ဖဲယဟိဝၤယွၤမၤစၢၤ စီၤဃံးစကံယၤလၢ အဒုးနၢၤဝဲ အၤၡူၢ် ဒီးမၤဘျါအတၢ်ဆါဝံၤအလီၢ်ခံန့ၣ် အဝဲအိၣ်ဒီး တၢ်ပာ်ထီၣ်ထီသးလီၤ. လၢတၢ်န့ၣ်အဃိ ဖဲပတၢ်မၤကဲထီၣ်လိၣ်ထီၣ်ဒီး ပှၤဂၤစံးပတြၢၤပှၤအခါ ပကမၤဒ်လဲၣ်. ဖဲန့ၣ်အဆၢကတီၢ် ပတၢ်စံးတၢ်ကတိၤ ဒီးပတၢ်ပာ်သူၣ်ပာ်သးန့ၣ် ကပာ်ဖျါထီၣ်ဝဲလၢ ပမ့ၢ်ပှၤဒ်လဲၣ်တဂၤလဲၣ်န့ၣ်လီၤ. အဒိ, ဒီပုၢ်ဝဲၢ်ခွါတဂၤ အဝဲဂုာ်ကျဲးစၢးကတဲာ်ကတီၤဝဲ တၢ်ဂ့ၢ်တၢ်ကျိၤ ဒ်သိးကဟ့ၣ်တၢ်စံၣ်တဲၤတဲလီၤတၢ် လၢကမျၢၢ်အါအါအမဲာ်ညါလီၤ. လၢတၢ်န့ၣ်အဃိ ပှၤအါဂၤပတြၢၤအီၤလီၤ. ဖဲန့ၣ်အခါအဝဲကမၤဝဲဒ်လဲၣ်.
၁၄ ထီဘိန့ၣ် ပကြၢးသ့ၣ်နီၣ်ထီၣ် ယ့ၣ်ၡူးအတၢ်ကတိၤလၢ– “ဒ်တၢ်မၤလိာ်သုအသိးန့ၣ်, သုမၤခဲလၢာ်ဝံၤဒီး, စံးသုဝဲလၢ– ‘ယမ့ၢ်တၢ်အခ့အပှၤလၢ အတဂိာ်တသီၣ်ဘၣ်တၢ်လီၤ. အဂ့ၢ်ဒ်အံၤ, တၢ်လၢပမၤလံန့ၣ် မ့ၢ်တၢ်လၢပကြၢး မၤန့ၣ်လီၤ.’” (လူၤကၣ် ၁၇:၁၀) သ့ၣ်နီၣ်ထီၣ်ဖဲ စီၤဃံးစကံယၤ အတၢ်ပာ်ထီၣ်ထီသးအိၣ်ထီၣ်အခါ အဝဲသးပ့ၤနီၣ်ကွံာ်ဝဲ တၢ်လၢယဟိဝၤယွၤ မၤစၢၤတ့ၢ်အီၤတဖၣ်န့ၣ်လီၤ. ဖဲပဟ့ၣ်တၢ်စံၣ်တဲၤတဲလီၤတၢ်ဝံၤအခါ ပှၤဂၤမ့ၢ်စံးပတြၢၤပှၤန့ၣ် ဒ်သိးပကအိၣ်ဒီး တၢ်ဆီၣ်လီၤသးအဂီၢ် တၢ်မနုၤကမၤစၢၤပှၤလဲၣ်. ပကဆိကမိၣ်ထံက့ၤတၢ်လၢ ယဟိဝၤယွၤ မၤစၢၤတ့ၢ်ပှၤတဖၣ်လီၤ. ဝံၤဒီးပကတဲဘၣ်ပှၤဂၤလၢ ယဟိဝၤယွၤအဂ့ၢ်ဒီး တၢ်လၢ အဝဲမၤစၢၤတ့ၢ်ပှၤတဖၣ် အဂ့ၢ်န့ၣ်လီၤ. နီၢ်နီၢ်န့ၣ် ယဟိဝၤယွၤ ဟ့ၣ်ပှၤအကလုၢ်ကထါ လံာ်စီဆှံဒီးအသးစီဆှံ ဒ်သိးပဟ့ၣ်တၢ်စံၣ်တဲၤတဲလီၤ ကကဲထီၣ်လိၣ်ထီၣ်အဂီၢ်လီၤ.
ပျဲယဟိဝၤယွၤ ဟံးစုနဲၣ်ကျဲနၤ ဖဲနမၤတၢ်ဆၢတဲာ်အခါ
၁၅, ၁၆. စီၤယိၤၡံယၤမၤဝဲတၢ်မနုၤ တုၤအဆှၢအီၤဆူတၢ်သံန့ၣ်လဲၣ်.
၁၅ ပဟံးန့ၢ်တၢ်မၤလိလၢ စီၤယိၤၡံယၤအအိၣ်ကသ့ဒ်လဲၣ်. စီၤယိၤၡံယၤ မ့ၢ်ဝဲစီၤပၤလၢ အဂ့ၤဘၣ်ဆၣ် အဝဲမၤဘၣ်ဝဲတၢ်ကမၣ်တခါလၢ အဆှၢအီၤဆူတၢ်သံန့ၣ်လီၤ. (ဖး ၂ ကွဲးနီၣ်တၢ် ၃၅:၂၀-၂၂ တက့ၢ်.) တၢ်မနုၤကဲထီၣ်အသးလဲၣ်. တၢ်ဂ့ၢ်တအိၣ်လၢ စီၤယိၤၡံယၤ ကဘၣ်လဲၤဒုးဝဲ ပှၤအဲၤကူပတူးဖိအစီၤပၤနကိၤ သနာ်က့ အဝဲလဲၤဒုးဝဲလီၤ. ဒီးစီၤနကိၤ အနီၢ်ကစၢ်ဒၣ်ဝဲ တဲဘၣ်စီၤယိၤၡံယၤလၢ အဝဲတအဲၣ်ဒိး ဒုးတၢ်ဒီးအီၤဘၣ်. လံာ်စီဆှံပာ်ဖျါဝဲလၢ စီၤနကိၤအတၢ်ကတိၤန့ၣ် ဟဲလၢ “ယွၤအထးခိၣ်” လီၤ. ဘၣ်ဆၣ် စီၤယိၤၡံယၤ လဲၤဒုးဒံးဝဲစီၤနကိၤအဃိ စီၤယိၤၡံယၤ ဘၣ်တၢ်မၤသံအီၤန့ၣ်လီၤ. ဘၣ်မနုၤအဃိ စိၤယိၤၡံယၤ လဲၤဒုးဝဲစီၤနကိၤလဲၣ်န့ၣ် လံာ်စီဆှံတပာ်ဖျါထီၣ်ဝဲဘၣ်.
၁၆ စီၤယိၤၡံယၤ ကြၢးဃုသ့ၣ်ညါဝဲတၢ်လၢ စီၤနကိၤတဲအီၤန့ၣ် မ့ၢ်တၢ်ကတိၤလၢ အဟဲလၢ ယဟိဝၤယွၤအအိၣ်နီၢ်နီၢ်ဧါန့ၣ်လီၤ. အဝဲမၤဝဲကသ့ဒ်လဲၣ်. အဝဲသံကွၢ် ယဟိဝၤယွၤအဝံလၢအမ့ၢ် ဝံယံးရမံယၤသ့ဝဲလီၤ. (၂ ကွဲးနီၣ်တၢ် ၃၅:၂၃, ၂၅) အဂၤတမံၤန့ၣ် စီၤယိၤၡံယၤ ကြၢးဃုသ့ၣ်ညါဝဲ လီၤတံၢ်လီၤဆဲးလၢ စီၤနကိၤလဲၤဝဲလၢ ကၢ်ကမံၣ်န့ၣ် ဒ်သိးကလဲၤဒုးဝဲ ထံကီၢ်လၢအဂၤလီၤ. တမ့ၢ်အကလဲၤဒုးဝဲ ယရူၤၡလ့ၣ်ဘၣ်. ဒီးစီၤနကိၤန့ၣ် အဝဲတတဲတရီတပါ ယဟိဝၤယွၤ ဒီးအပှၤဂီၢ်မုၢ်ဘၣ်. စီၤယိၤၡံယၤန့ၣ် တချုးလၢ အဝဲမၤတၢ်ဆၢတဲာ်ဒံးဘၣ်အခါ အဝဲတဆိကမိၣ်ဆိတၢ် ထံထံဆးဆးဘၣ်. ဖဲအံၤ ပဒိးန့ၢ်ဘၣ်တၢ်မၤလိဒ်လဲၣ်. ပတၢ်ကီတၢ်ခဲမ့ၢ်အိၣ်ထီၣ် ဒီးပမ့ၢ်ဘၣ်မၤတၢ်ဆၢတဲာ်န့ၣ် အဆိကတၢၢ် ပကဘၣ်ဆိကမိၣ်ထံတၢ်လၢ ယဟိဝၤယွၤအဲၣ်ဒိးလၢ ပမၤဒ်လဲၣ်န့ၣ်လီၤ.
၁၇. ဖဲတၢ်ဂ့ၢ်ကီအိၣ်ထီၣ်အခါ ပဟးဆှဲးတၢ်ဆၢတဲာ်လၢ အကမၣ်ဒ် စီၤယိၤၡံယၤအသိး ကသ့ဒ်လဲၣ်.
၁၇ ဖဲပဘၣ်မၤတၢ်ဆၢတဲာ်အခါ အဆိကတၢၢ်န့ၣ် ပကဘၣ်ဆိကမိၣ်ထံ လံာ်စီဆှံ အတၢ်ဟံးစုနဲၣ်ကျဲမၤစၢၤယၤသ့လၢ ကျဲဒ်လဲၣ် ဒီးယမၤထွဲအီၤကသ့ဒ်လဲၣ်န့ၣ်လီၤ. ဘၣ်သ့ၣ်သ့ၣ် လၢတၢ်အိၣ်သးတနီၤနီၤအဃိ နကအဲၣ်ဒိး ဃုကွၢ်အါထီၣ်တၢ်ဟ့ၣ်ကူၣ်လၢ ပလံာ်လဲၢ်တဖၣ်အပူၤ မ့တမ့ၢ် ဃ့တၢ်ဟ့ၣ်ကူၣ်လၢ တၢ်အိၣ်ဖှိၣ်သးပှၢ်တဂၤအအိၣ်လီၤ. တၢ်အိၣ်ဖှိၣ်သးပှၢ်မၤစၢၤပှၤဒ်သိး ပကဆိကမိၣ်ထံ လံာ်စီဆှံအတၢ်ဟံးစုနဲၣ်ကျဲလၢ အဂၤသ့ဝဲလီၤ. ဆိကမိၣ်ကွၢ် တၢ်အိၣ်သးတခါအံၤတက့ၢ်– ဒီပုၢ်ဝဲၢ်မုၣ်တဂၤ အဝဲဆီဟံၣ်ဆီဃီဒီး ပှၤတဂၤလၢ အတဘူၣ်ထီၣ်ဘါထီၣ် ယဟိဝၤယွၤလီၤ. ဘၣ်တနံၤန့ၣ် အဝဲအဲၣ်ဒိး လဲၤစံၣ်တဲၤတဲလီၤတၢ်လီၤ. (မၤတၢ် ၄:၂၀) ဘၣ်ဆၣ် ဖဲမုၢ်နံၤအဝဲန့ၣ်န့ၣ် အဝၤတအဲၣ်ဒိးလၢ အဝဲကလဲၤစံၣ်တဲၤတဲလီၤတၢ်ဘၣ်. အဝၤတဲအီၤလၢ အဝဲသ့ၣ်ဟ့ၣ်လီၤလိာ်အသး တၢ်ဆၢကတီၢ် တချုးအါအါဘၣ်အဃိ အဝၤအဲၣ်ဒိးလၢ အကဟ့ၣ်လီၤအတၢ်ဆၢကတီၢ်လၢ ကဟးလိာ်ကွဲဒ်သိးသိး အဂီၢ်လီၤ. လၢတၢ်န့ၣ်အဃိ ဒီပုၢ်ဝဲၢ်မုၣ်အံၤ ကဘၣ်ဆိကမိၣ်ထံဝဲ လံာ်စီဆှံအတၢ်ဟံးစုနဲၣ်ကျဲတဖၣ် ဒ်သိးအကဆၢတဲာ်တၢ်လၢ တၢ်ကူၣ်သ့အပူၤလီၤ. အဝဲသ့ၣ်ညါဝဲလၢ ကဘၣ်ဒိကနၣ် ကစၢ်ယွၤအကလုၢ် ဒီးယ့ၣ်ၡူးမၤလိာ်ပှၤလၢ ပကဘၣ်လဲၤဒုးကဲထီၣ် ပှၤဂၤလၢအပျဲၢ်အဘီၣ်လီၤ. (မးသဲ ၂၈:၁၉, ၂၀; မၤတၢ် ၅:၂၉) ဘၣ်ဆၣ်ဒီး ဒီပုၢ်ဝဲၢ်မုၣ်အံၤ သ့ၣ်နီၣ်ထီၣ်စ့ၢ်ကီးဝဲလၢ မါန့ၣ်ဘၣ်ဒိးပၢအသးလၢ အဝၤအဖီလာ်လီၤ. ဒီးယွၤအခ့အပှၤန့ၣ် တဘၣ်မ့ၢ်ပှၤလၢ အခိၣ်ကိၤစ့ၢ်ကီးဘၣ်. (အ့းဖ့းစူး ၅:၂၂-၂၄; ဖံလံးပံၤ ၄:၅) အဝဲကဘၣ် ဆိကမိၣ်ထံဝဲလၢ မ့ၢ်အဝၤအဲၣ်ဒိးတြီအီၤလၢ အကလဲၤစံၣ်တဲၤတဲလီၤတၢ်ဧါ မ့တမ့ၢ် မ့ၢ်အဝၤအဲၣ်ဒိးလၢ အကဟ့ၣ်အတၢ်ဆၢကတီၢ်လၢ ကဟးလိာ်ကွဲဒ်သိးသိးအဂီၢ်ဧါ. ဒ်ပမ့ၢ် ယဟိဝၤယွၤအခ့အပှၤအသိး ပအဲၣ်ဒိးမၤတၢ်ဆၢတဲာ်လၢ အအိၣ်ဒီးတၢ်ကူၣ်သ့ ဒီးမၤသးခုယွၤအသးလီၤ.
ဆဲးဘူၣ်ထီၣ်ဘါထီၣ် ယွၤလၢ သူၣ်ဒီဖျၢၣ်သးဒီဖျၢၣ် ဒီးလၢတၢ်သူၣ်ခုသးခုအပူၤ
၁၈. လၢယူဒၤအစီၤပၤ လွံၢ်ဂၤအံၤအအိၣ်န့ၣ် ပမၤလိန့ၢ်တၢ်မနုၤလဲၣ်.
၁၈ တဘျီတခီၣ် ပဝဲစ့ၢ်ကီးပမၤဘၣ်တၢ်ကမၣ် ဒ်ယူဒၤအစီၤပၤလွံၢ်ဂၤအံၤအသိး သ့ဝဲလီၤ. ဘၣ်သ့ၣ်သ့ၣ် (၁) ပကသန့ၤပသးလၢ ပနီၢ်ကစၢ်အတၢ်ထံၣ် (၂) ဃုထၢတံၤသကိး လၢအကမၣ် (၃) အိၣ်ဒီးတၢ်ပာ်ထီၣ်ထီသး (၄) တဆိကမိၣ်ထံ ယွၤအတၢ်ဟံးစုနဲၣ်ကျဲ ဒီးမၤတၢ်ဆၢတဲာ်လၢညါန့ၣ်လီၤ. ပမ့ၢ်မၤဘၣ်တၢ်သ့ၣ်တဖၣ်အံၤ သနာ်က့ ပမၤယွၤအတၢ်ဘၣ်သးသ့ဒံးဝဲလီၤ. ယွၤထံၣ်ဝဲတၢ်ဂ့ၤလၢ အအိၣ်လၢပပူၤ ဒ်အဝဲထံၣ်ဝဲ စီၤပၤလွံၢ်ဂၤအံၤအသိးလီၤ. တကးဒံးဘၣ် ယဟိဝၤယွၤသ့ၣ်ညါဝဲလၢ ပအဲၣ်အီၤထဲလဲၣ်ဒီး ပအဲၣ်ဒိးမၤအတၢ်မၤလၢ သူၣ်ဒီဖျၢၣ်သးဒီဖျၢၣ်ထဲလဲၣ်န့ၣ်လီၤ. လၢတၢ်န့ၣ်အဃိ အဝဲပာ်ဖျါထီၣ်န့ၢ်ပှၤ တၢ်ဒိတၢ်တဲာ်တဖၣ် ဒ်သိးပသုတမၤဘၣ် တၢ်ကမၣ်ဖးဒိၣ်တဂ့ၤအဂီၢ်လီၤ. မ်ပကဆိကမိၣ်ထံက့ၤ စီၤပၤလွံၢ်ဂၤအံၤ အတၢ်လဲၤခီဖျိ ဒီးစံးဘျုးယဟိဝၤယွၤလၢ အပာ်ဖျါထီၣ်န့ၢ်ပှၤ တၢ်ဂ့ၢ်တဖၣ်အံၤအဃိတက့ၢ်.
