1, 2. Соске ка дикха о примерија е штаре царенгере?

Ако дикхеа сар некој со пхирела ко друмо лизгала хем перела, нане ли те пазине ако накхеа таро исто друмо? Слично, ако размислинаја башо грешке со керѓе лен о јавера адава шај те поможинел амен те на кера амен да иста грешке. На пример, шај те сикљова бут таро грешке е манушенгере сој тане спомниме ки Библија.

² О штар царија тари Јуда со сине спомниме ки англуни статија служинѓе е Јеховаске цело вилеа. Ама, ола исто аѓаар керѓе несаве баре грешке. Ленгере примерија тане пишиме ки Библија те шај те размислина хем те сикљова таро ленгере грешке. Со шај те сикљова таро адава со случинѓа пе ленге хем сар шај те избегина амен да те кера иста грешке? (Читин Римјаните 15:4.)

3-5. а) Иако о Аса служинела сине е Јеховаске цело вилеа, сави грешка керѓа? б) Соске шај е Аса сине ле доверба ко мануша кеда о Васа гело против и Јуда?

³ Најпрво те дикха е Асаскоро пример. Ле сине ле  доверба ко Јехова кеда јекх милиони Етиопјања але те нападинен и Јуда. Ама, на сине ле доверба ко Јехова кеда боринѓа пе против о израелско цари, о Васа. О Аса мангља те чхинавел е Васа те на спреминел и диз Рама војнаке. Адаја диз сине важно ко Израел хем сине паше узо царство Јуда (2. Лет. 16:1-3). О Аса мислинѓа кај ка овел шукар те дел сребро хем злато е сириско цареске те нападинел е израелско царе. Кеда и сириско војска нападинѓа о дизја ко Израел, о Васа одма чхинавѓа те спреминел и диз Рама војнаке (2. Лет. 16:5). Ко почеток, о Аса шај мислинѓа песке кај анѓа исправно одлука.

⁴ Ама, со мислинѓа о Јехова башо адава? Адалеске со о Аса на сикавѓа доверба ки лесте, о Јехова бичхалѓа пле пророко, о Ананиј, те пхенел е Асаске кај грешинѓа. (Читин 2. Летописи 16:7-9.) Ов вакерѓа е Асаске: „Ка овен војне против туте“. О Аса леља и диз Рама, ама џи ко крајо таро лескоро живото, ов хем лескоро народо водинѓе бут војне.

⁵ Ки статија со дикхлем англедер сиклилем кај о Јехова сине задоволно таро Аса. Иако сине несовршено, о Девел дикхља кај ов служинела леске цело вилеа (1. Цар. 15:14). Ама, кеда о Аса анѓа лошно одлука, ов мора сине те трпинел о последице. Соске сине ле бари доверба ки песте хем ко јавера мануша, а на ко Јехова? Шај мислинѓа песке кај ка овел ле побари шанса те побединел ако сине ле шукар плани баши војна. Или шај шунѓа некаскоро совет кова со сине погрешно.

6. Со шај те сикљова тари грешка е Асаскири? Вакер пример.

⁶ Со шај те сикљова тари е Асаскири грешка? Ки секоја ситуација ваљани те овел амен доверба ко Јехова, а на ки амари мудрост. Ваљани те рода лестар помош, бизи разлика дали амаре проблемија тане баре или тикне. Шукар тано те пуча амен: „Дали некогаш иси амен доверба ки аменде адалеа со пробинаја те решина несаво проблеми ко начин со мислинаја кај тано најшукар? Или, секогаш дикхаја со вакерела и Библија башо амаре проблемија хем трудинаја амен те применина о библиска начелија те решина лен?“ На пример, шај тли фамилија на мукхела тут те џа ко состанок или ко конгрес. Дали ка роде таро Јехова те дел тут мудрост те џане со те кере ки адаја ситуација? Или, шај сиан бизи бути повише време хем акана конечно аракхеа некас со мангела те дел тут бути. Дали ка вакере леске кај секова курко мора те џа ко состанокија иако шај башо адава нане те добине и бути? Саво било проблеми те овел амен, те на бистра о совет таро псалмисти: „Са тло пхарипе фрде леске, нека овел тут доверба ки лесте хем ов ка поможинел туке“ (Пс. 37:5).

7, 8. Саве грешке керѓа о Јосафат хем саве сине о последице? (Дикх и слика ко почеток тари статија.)

⁷ Те дикха со керѓа о Јосафат, е Асаскоро чхаво. Лесте сине ле бут шуже особине хем о Јехова сине задоволно лестар. Кеда сине ле доверба ко Јехова, ов керела сине бут шукар буќа. Ама, исто аѓаар, ов анѓа несаве лошна одлуке. На пример, иако о Ахав сине лошно цари, о Јосафат женинѓа пле чхаве лескере чхајаја. Пало адава, о Јосафат заедно е Ахавеа гело те боринел пе против о Сиријција, иако о пророко о Михаија вакерѓа леске те на керел адава. Ки борба, о Сиријција нападинѓе е Јосафате хем мангле те мударен ле (2. Лет. 18:1-32). Кеда иранѓа пе ко Ерусалим, о пророко о Јуј пучља ле: „Дали тано исправно те поможине адале сој тано лошно хем те манге околен со мрзинена е Јехова?“ (Читин 2. Летописи 19:1-3.)

⁸ Дали о Јосафат сиклило нешто таро адава со случинѓа пе леске хем таро адава со вакерѓа леске о пророко о Јуј? На. Иако панда мангела сине е Јехова хем мангела сине те керел лескири волја, о Јосафат палем уло амал манушеа кова со на служинела сине е Јеховаске. Адава мануш сине о цари Охозија, о чхаво е Ахавескоро. Ола заедно градинѓе бродија, ама о бродија пхагиле хем ола нашти сине те користинен лен (2. Лет. 20:35-37).

9. Со шај те случинел пе ако биринаја лошно друштво?

⁹ Со шај те сикљова таро адава со случинѓа пе е Јосафатеске? Ов керела сине адава сој исправно хем родела сине е Јехова цело вилеа (2. Лет. 22:9). Ама, ов биринѓа те накхавел  повише време манушенцар кола со на мангена е Јехова, хем адава анѓа леске баре проблемија ко живото. Харичкаске ка мударен ле сине. Акава сетинкерела амен ко библиска лафија: „Кој џала мудра манушенцар, мудро ка овел, а кас иси бути околенцар со нане гоѓавер, лошно ка накхел.“ (Изр. 13:20). Амен мангаја те вакера е јаверенге башо Јехова. Ама, шај те овел опасно ако на пазинаја хем накхаваја бут време манушенцар кола со на служинена е Јеховаске.

10. а) Сар шај о пример е Јосафатескоро те поможинел туке ако мангеа те кхуве ко брако? б) Со на ваљани те бистра?

¹⁰ Сар шај о пример е Јосафатескоро те поможинел туке ако мангеа те кхуве ко брако? Шај ка почминен те овен тут романтична чувствија спрема некасте со на служинела е Јеховаске. Адава шај те овел адалеске со мислинеа кај нашти те аракхе брачно партнери машкар е Девлескоро народо. Или, шај некој тари фамилија вакерена туке кај ваљани те кхуве ко брако англедер те џан те берша. Точно тано адава кај о Јехова керѓа амен те манга хем те ова мангле. Ама, со ваљани те кере ако нашти те аракхе брачно партнери кова со одговоринела туке? Јекх бути со шај те поможинел туке тани, те размислине башо адава со случинѓа пе е Јосафатеске. Ов ко бут ситуацие родинѓа водство таро Јехова (2. Лет. 18:4-6). Ама, кеда уло амал е Ахавеа, кова со на мангела сине е Јехова, о Јосафат почминѓа те на шунел е Јехова. Ов ваљанѓа те на бистрел кај „о Јехова пле јакхенцар родела ки цело пхув те сикавел пли сила ки корист околенге со служинена леске цело вилеа“ (2. Лет. 16:9). Амен да ваљани те на бистра кај о Јехова мангела те поможинел амен. Ов хаљола амари ситуација хем мангела амен. Дали иси тут доверба кај ако мангеа те аракхе брачно партнери со одговоринела туке, о Јехова џанела адава хем мангела те поможинел тут? Ов сигурно кај о Јехова ка керел адава!

11, 12. а) Сар о Езекија сикавѓа со сине ле ко вило? б) Соске о Јехова простинѓа е Езекијаске?

¹¹ Со шај те сикљова таро Езекија? О Јехова поможинѓа леске те дикхел со иси ле чаче ко вило. (Читин 2. Летописи 32:31.) Кеда о Езекија пело бут насвало, о Девел вакерѓа леске кај ка сасљарел ле хем денѓа ле знако те сикавел леске кај ка керел адава. О Јехова керѓа и сенка со перела упро басамакија те иранел пе деш басамакија напалал. Пало адава, о кнезија таро Вавилон, веројатно мангле те џанен повише башо адава знако хем бичхалѓе манушен ко Езекија те пучен ле (2. Цар. 20:8-13; 2. Лет. 32:24). О  Јехова на вакерѓа леске со те керел ки адаја ситуација. Ки Библија пишинела кај о Јехова „мукхља ле коркори“ те шај те дикхел со ка керел. О Езекија сикавѓа ленге са о барвалипе со сине ле. Акава сикавѓа со сине ле ко вило.

¹² О Езекија уло гордо, адалеске на сикавѓа благодарност башо шукарипа со сине леске сикавдо. И Библија на вакерела аменге соске уло гордо. Шај адалеске со побединѓа е Асирцон или башо адава со о Јехова сасљарѓа ле, а шај соске уло барвало хем славно. Иако о Езекија служинела сине е Јеховаске цело вилеа, несаво време уло гордо хем о Јехова на сине лестар задоволно. Ама, пало несаво време о Езекија уло понизно хем о Јехова простинѓа леске (2. Лет. 32:25-27; Пс. 138:6).

13, 14. а) Која ситуација шај те сикавел со иси амен ко вило? б) Сар ваљани те реагирина кеда некој фалинела амен?

¹³ Со шај те сикљова таро грешке со керѓа лен о Езекија? Ов уло гордо одма пало адава кеда о Јехова поможинѓа леске те побединел е Асирцон хем сасљарѓа ле таро пхаро насвалипе. Со ка кера ако случинена пе аменге шукар буќа или ако некој фалинела амен башо нешто со керѓем? О начин сар ка реагирина шај те сикавел со иси амен ко вило. На пример, јекх пхрал шај бут трудинѓа пе те спреминел хем те икерел несаво говор. Шај бут џене ка фалинен ле башо адава. Сар ка реагиринел тегани?

¹⁴ Ваљани секогаш те сетина амен ко лафија е Исусескере: „Кеда ка керен са о буќа сој туменге денде те керен, вакерен: ‚Амен сием робија кола со на заслужинаја те фалинен амен. Керѓем адава со ваљани сине те кера‘“ (Лука 17:10). Сар со дикхлем англедер, кеда о Езекија уло гордо ов на сине благодарно баши помош со добинѓа ла таро Јехова. Со ка поможинел амен те ачхова понизна кеда ка фалинен амен башо несаво говор со икерѓем ле? Шај те размислина башо са о буќа со керѓа лен о Јехова аменге хем те вакера сар ов поможинѓа амен ко адава. О Јехова тано адава со денѓа амен и Библија хем о свети дух те шај те икера говорија.

15, 16. Баши која грешка нашавѓа о Јосија пло живото?

¹⁵ Со шај те сикљова таро Јосија? Иако сине шукар цари, ов керѓа грешка баши која со нашавѓа пло живото. (Читин 2. Летописи 35:20-22.) Сар ало џи ко адава? О Јосија ѓело ки војна против о Египетско цари, о Нехо, иако о Нехо вакерѓа леске кај на мангела те марел пе леа. Ки Библија пишинела кај о лафија со вакерѓа лен о Нехо иклиле „таро е Девлескоро муј“. Ама о Јосија гело ки војна хем муло. Соске керѓа адава? И Библија на вакерела аменге.

 ¹⁶ О Јосија ваљанга те дикхел дали адава со вакерѓа о Нехо чаче авела таро Девел. Ов шај сине те пучел е Еремија, јекх таро верна пророкија е Девлескере (2. Лет. 35:23, 25). Исто аѓаар, о Јосија ваљани сине шукар те размислинел башо некобор буќа. На пример, о Нехо гело ко Кархемис те марел пе против јавер народо, а на против о Ерусалим. А исто аѓаар о Нехо на мангља те наврединел е Јехова хем лескере народо. О Јосија на размислинѓа шукар башо акала буќа англедер те анел одлука. Со сикљоваја таро акава? Кеда иси амен несаво проблеми хем ваљани те ана одлука, прво ваљани те размислина сар мангела о Јехова те постапина.

17. Кеда иси амен проблемија, сар шај те на кера о иста грешке со керѓа лен о Јосија?

¹⁷ Кеда ваљани те ана одлука, прво мора те размислина кола библиска начелија шај те поможинен амен хем сар те применина лен. Ко несаве ситуацие, шај ка ваљани повише те истражина ко амаре публикацие, па чак те рода совет таро несаво старешина. Ов шај те поможинел амен те размислина башо јавера да библиска начелија. Те дикха јекх пример: Јекх пхен тани ко брако некасаја со нане Сведоко. Јекх диве, ој керѓа песке плани те џал ки служба (Дела 4:20). Ама, лакоро ром мангела адава диве ој те ачхол кхере. Ов вакерела лаке кај ко последно време на накхавена бут време заедно хем кај мангела те икљовен негде. Адалеске, и пхен размислинела башо несаве библиска стихија кола со шај те поможинен ла те анел мудро одлука. Ој џанела кај мора те шунел е Девле хем кај о Исус денѓа амен и заповед те кера ученикија (Мат. 28:19, 20; Дела 5:29). Ама, исто аѓаар џанела кај о ромња ваљани те овен подложна пле роменге хем кај е Девлескере слуге ваљани те овен разумна (Еф. 5:22-24; Фил. 4:5). Адалеске, ваљани те размислинел дали лакоро ром мангела те чхинавел ла те џал ки служба или само мангела те овел лаја адава диве. Сар слуге е Јеховаскере амен мангаја те ана одлуке кола со сикавена кај сием разумна хем кај мангаја те радујна ле.

18. Соске тано шукар те размислина башо примерија е штаре царенгере сој спомниме ки акаја статија?

¹⁸ Адалеске со сием несовршена, амен да шај некогаш те кера о иста грешке со керѓе лен акала штар царија. Шај 1) ка овел амен доверба ко мануша, 2) ка бирина лошно друштво, 3) ка ова горда или 4) ка ана одлуке бизо те размислина сави тани е Девлескири волја. Чак ако случинела пе аменге нешто асавко, на ваљани те мислина кај нашти никогаш те кера е Јеховаскири волја. Ов дикхела о шукар буќа ки аменде, исто сар со дикхела сине ко акала штар царија. О Јехова исто аѓаар дикхела кобор мангаја ле хем кобор мангаја те служина леске цело вилеа. Адалеске, мукхља аменге примерија кола со шај те поможинен амен те на кера сериозна грешке. Те размислина башо акала библиска извештаија хем те сикава благодарност башо адава со о Јехова мукхља те овен пишиме сар примерија аменге!