1, 2. (a) Rosai ḇemnis kuker dunya ḇeḇarḇor ine ma snon ḇeḇarḇor ḇesmai samamyai ani? (Mam sonin ro randak artikel ine.) (b) Rariso sneḇaḇir ḇekenem ro nanki ma supswan sya rofyor dunya ḇeḇarḇor ine neḇepyos?

KWARAPAN roine. Snon ḇeḇarḇor oso isma samamyai marmar. Sipir sya suni ḇe moḇ nari smuni. Komam ikenem kaker mboi, na kerower spambosi ra imar.

² Dunya ḇeḇarḇor kokenem ine imnis raris snon ḇeḇarḇor imbe spambos ani. Refo ikofen, ”Supswan ine ma roi ḇeḇor kawasa sirmomen ro ina nari napromes.” (1 Yohanes 2:17) Yahwe ikofen kwar nari kero monda ḇyuk samamyai faro dunya ine, inja koḇeḇirḇar awer nari ifrur rarirya. Ḇape roi oso ḇeḇese rofandu pupes ro dunya ine ma samamyai snon ḇeḇarḇor ani ismana. Snonkaku ḇeḇeso imbude skara samamyai ismana namnis faro i ḇa ma sawos nabore. Simarisen insama snon ani isma samamyai ḇa. Ḇape, Yahwe ima mankara ḇenapes ma snemuk dun fa ḇyemankara dunya ine ifrurna kuker nanapes kaku. (Ulangan 32:4) Ḇaḇemankara ḇyena pok fa nesusu ḇa. Rofyor dunya ḇeḇarḇor ma roi ḇeḇor kawasa sirmomen  ro ina neḇepyos kwar ido, ḇero nanki ma supswan sya nari sikyar kaku snar Yahwe ḇyemankara kuker kakaku. Nari komkei kaku bur kandera nakam!

3. Samswen rifyak rosai nari neḇepyos rofyor Karajan Allah ryama?

³ Rosai ḇekurfasna ro wos ”supswan ine nari napromes”? Ine kyurfasna ḇe roi ḇeḇyeḇa kosmana ro kankenem koḇena. Roi ḇeḇyeḇa nakam nari napromes. Ine ḇar ro ”ankankinem ḇeḇye ro Ḇaḇesasoser”. (Matius 24:14) Ro artikel ine, nari kowawos samswen rifyak nari neḇepyos rofyor Karajan Allah ryama: snonkaku ḇeḇarḇor, organisasi ḇeḇyeḇana, fararur ḇesasar ma fafisu ḇeḇyeḇana. Ro roi nane nari kofarkor (1) rariso roi anna nawyae ko, (2) rosai nari Yahwe ifrur faro roi anna, ma (3) rosai nari ḇyuk fadwerna.

4. Rariso snonkaku ḇeḇarḇor sya sawyae ko?

⁴ Rariso snonkaku ḇeḇarḇor sya sawyae ko? Manwawan Paulus ikofen ro ras-ras ḇepupes ”nari ndama kuker kandera nabor”. Ma ikofenwer ”Ḇeḇarḇorsya ma ḇesararersya sikada nari sḇarḇor syadi.” (2 Timotius 3:1-5, 13) Wasma na kwar ke? Kokame kosmai kandera kwar snar snonkaku ḇeḇarḇor sya. Skoryae ma sifarfnak ko, smam farfir ma sayin ko, ma sifrur susa ko. Iba syadiwer snonkaku ḇeḇeso sifrur roi ḇeḇarḇor ro ḇarpon snonkaku syakam. Ḇesesya sifnoḇek snonkaku ḇese mboi kakuya siḇe sifrur susa si. Ḇaido imbude kosma roi ḇeḇyeḇa ḇa, ḇape snonkaku ḇeḇarḇor sine sawyae ko ker. Kayin kaku rofyor korower sifrur roi ḇeḇyeḇa faro romawa sya, sinan sya ma snonkaku ḇeryarḇa sya. Rosai sifrur nane nafrur si fa smam si raris aiwan ḇaido hantu sya. (Yakobus 3:15) Ḇape Yahwe Wos Ḇyena nḇuk saneraro ḇeko.

5. (a) Snonkaku ḇeḇarḇor sya sisma swaf fa sifrur rosai? (b) Faro snonkaku ḇemewer ḇefadwer kenem sena nari rosai sismana?

⁵ Rosai nari Yahwe ifrur ya? Kirine Yahwe ḇyuk swaf ḇe snonkaku ḇeḇarḇor. (Yesaya 55:7) Dunya ḇeḇarḇor ine nari neḇepyos, ḇape snonkaku ḇero dori sya bisa sfadwer kenem sena. Rariso kuker snonkaku ḇemḇrorḇa ma ḇeso kaker dunya ine rofyor ḇaḇekandera ḇeba ryama ya? Yahwe ḇyeasas nari ipyosbur sikam ro supswan ine. (Wasya Mazmur 37:10.) Baboine snonkaku ḇebor sya siyokef roi ḇeḇyeḇa sifrurna ma fyorno ido semankara siḇa. (Ayub 21:7, 9) Ḇape Refo ḇyuk swarapepen ḇeko, ”Mkasi myamwarek nyan snonkaku sya, ma myam wewur sena kam. Ro pampan befnureb kaku, befrur ḇarḇor sya sipok siyokef bur I ba.” (Ayub 34:21, 22, KSKK) Inja na osoḇaḇeri neḇeyokef ro ḇarpon Yahwe I. Bisa myam rosai riryakam ḇeḇarḇor sya sifrurna. Armagedon ya ramnai, nari komam si werba, snar sisyaba kwar!—Mazmur 37:12-15.

6. Mansei nari ḇekenem kaker rofyor snonkaku ḇeḇarḇor sya sisyaḇa kwar? Sai ḇefnai ima ankankinem ḇeḇye?

⁶ Mansei nari ḇekenem kaker rofyor snonkaku ḇeḇarḇor sya sisyaḇa kwar? Yahwe ḇyeasas, ”Snonkaku bena sne ḇemayar sya siso nari bena supswan ma nari sismai kaku marasrisen ḇeba snar ḇaḇeaski ḇebor.” Ro Mazmur ya kako ikofen, ”Snonkaku ḇenapes sya nari sikenem ro supswan  ma nari sḇarek rodiwa isof fyoro-fyoro.” (Mazmur 37:11, 29) Mansei ”snonkaku bena sne ḇemayar sya” ma ”snonkaku ḇenapes sya”? Snonkaku bena sne ḇemayar iso ḇemarisen ḇefarkor ro Yahwe ma ḇesouser I. Snonkaku ḇenapes iso ḇeswar Allah I ma ḇefrur parenta ḇyenakam. Ro baboine, snonkaku ḇeḇarḇor sya sibor syadibur snonkaku ḇenapes sya. Ḇape ro dunya babo iwama, nari snonkaku bena sne ḇemayar ma ḇenapes sya siso monda nari ḇekenem rodiwa. Nari sifrur supswan ine ḇyefirdaus!

7. Rariso organisasi ḇeḇyeḇa nawyae koro kirine?

⁷ Rariso organisasi ḇeḇyeḇa nawyae koro kirine? Roi ḇeḇarḇor komam ro kirine ndrama ro snonkaku oser-oser syaḇa, ḇape ro organisasi beborna. Organisasi agama ifrowes snonkaku syaran risyaran. Imnis raris, sḇuk farkarkor ḇesasar kuker Allah I, sikofen Refo ima naser roi ḇekakuḇa ma sifrowes snonkaku sya faro fafisu iyama kuker supswan ma snonkaku sya. Pamarenta ḇeḇyeḇa sḇuk saramper faro mamamun, roi ḇeḇyeḇa sifrur rofandu er sya ma sifrur susa snonkaku ḇesabarar ma ḇeryarḇa sya. Pamarenta ḇeḇarḇor ḇeradine sisma nana ḇebor snaro sḇuk pipi ḇesi ma simarisen sfanam kuker snonkaku bena nana nabor monda. Perusahan-perusahan ḇebana sifrur naḇyeḇa supswan ine ma roi ḇero dorina imnis marisen sena monda. Ine nafrur fa sna arasai nabor kaku. Inja, siso ḇefrur fa ḇaḇekandera nabor nasya ro dunya ine.

8. Refo ikofenbair rosai nari ḇeḇejadi kuker organisasi ḇeḇemam ḇe ḇesambraḇ ro baboine?

⁸ Rosai nari Yahwe ifrur ya? Ḇaḇekandera ḇeba nari ḇeḇejadi rofyor pamarenta sya smun organisasi agama ḇekakuḇa syakam, Refo dap si ḇe Babel Ḇeba. (Fasasna [Wahyu] 17:1, 2, 16; 18:1-4) Organisasi agama anna nari neḇepyos ḇeri. Inja rariso kuker organisasi ḇeḇyeḇa ḇesena? Refo ikofen rya sisambraḇ ma senako raris bon ma myos. (Wasya Fasasna 6:14.) Ḇape Refo ikofen pamarenta ma organisasi rosai riryakam ḇesonem Allah Karajan Ḇyedi ḇa nari neḇepyos kame. Ine iso ḇar ḇepupes ro kandera ḇebaya. (Yeremia 25:31-33) Inja ro fafisuya organisasi ḇeḇyeḇa nari nasya werḇa!

9. Sai ḇefnai kokyar supswan ḇebabo nari neḇefasos kuker pyum kaku?

⁹ Rosai nari ḇefadwer organisasi ḇeḇyeḇa nane? Rofyor Armagedon ramnai, nari organisasi oso isya ro supswan ine kaker ke? Refo ikofen, ”Ḇape kowaf rosai Allah ḇyeasas kwar, isoine nanki ḇebabo ma supswan ḇebabo, ro moḇ kosma ḇaḇenapnapesya.” (2 Petrus 3:13) Nanki ma supswan ḇekwar iso pamarenta ḇeḇyeḇa ma snonkaku ḇero baḇ papoik sena. Rofyor sisyaḇa wer, rosai nari ḇefadwer organisasi ḇeḇyeḇa nane? ”Nanki ḇebabo ma supswan ḇebabo.” Nanki ḇebabo ine kyurfasna ḇe pamarenta ḇebabo, iso Karajan ḇero papoik Yesus Kristus ma 144.000 ḇepoik kayam kuker i sya. Supswan ḇebabo kyurfasna ḇe snonkaku ḇero baḇ papoik Karajan Allah. Yesus ma ḇepoik kayam kuker i sya na sifarari mnis Allah Yahwe, Allah  ḇepoik kuker sapurnakḇa. (1 Korintus 14:33) Inja ”supswan ḇebabo” ine nari neḇefasos. Nari bar snon ḇeḇekinfir sya sisya fa ḇemamwarekna . (Mazmur 45:16) bar snon ansya nari sisma farkankin ro Yesus ma 144.000 sya. Wawasen kada fafisu oso organisasi ḇeḇyeḇa nakam nari neḇefadwer kuker pamarenta oser, isoine organisasi oser ḇefrur roi ḇeḇyeḇa ḇa!

10. Fararur ḇesasar rosai monda mam ro moḇ bedi? Rariso roi anna nawyae Au ma kina bedi?

¹⁰ Rariso fararur ḇesasar na nawyae koro kirine? Kokenem ro dunya ḇefo kuker amoralitas, ankarkar ma rarmomen. Hiburan ro dunya ine nafrur roi anna nasnai pyum ma nafrur Yahwe standar ḇyena kuker roi ḇekaku ma ḇesasar namnis ḇa kuker fafisu ine. (Yesaya 5:20) Inja sinansya fandun fa smamwarek romawa sesya ro roi ḇeḇyeḇa nane. Kakuya, snonkaku Kristen ḇekaku sya sifararur marḇak kwar fa sfaduru fasfesepen sena kuker Yahwe I ro dunya ḇesyowi Allah farkankin ḇyena ḇa.

11. Rosai nari kofarkor ro samamyai Yahwe ifrur faro Sodom ma Gomora?

¹¹ Rosai nari Yahwe ifrur faro fararur ḇesasar nakam? Kwarapan kuker rosai Yahwe ifrurna faro roi ḇeḇyeḇa ḇeḇejadi ro mnu ḇeba Sodom ma Gomora. (Wasya 2 Petrus 2:6-8.) Lot ima snon ḇesouser. Lot ma kina ḇyesya sḇekandera kaku snar roi ḇesasar nabor snonkaku ḇero ris sedi sifrurna. Yahwe myunpres moḇ nakam insama roi ḇeḇyeḇa ro diya napromeskam. Ḇape I kako ”ifrur swarapepen oso” faro snonkaku ḇeḇarḇor ro baboine. Imnis raris rosai Yahwe ifrur ro fafisu iwara, I kako nari ipyos snonkaku ḇeḇarḇor rofyor myunpres dunya ḇeḇarḇor ine.

12. Fararur rosai nari kowaf kaku rofyor dunya ḇeḇarḇor ine neḇepyos?

¹² Rosai nari ḇefadwer fararur ḇesasar nane? Ro dunya babo, nari komyaren kaku kuker fararur ḇeyun marisen. Imnis raris, nari kofrurmnis kaḇer supswan ine ḇe firdaus, kofrur rum ḇeko ma snonkaku koswar sya. Ko kako nari kosrow kaḇer snonkaku syaran risyaran ḇeḇebawes kaḇer sya ma kofarkor si kuker Yahwe I ma roi ifrur kwar ḇe snonkaku sya. (Yesaya 65:21, 22; Farfyar ro Manwawansya [Kisah] 24:15) Ro fafisuya, nari kona fararur nabor ḇefrur fa komarisen kaku ma nun sanandik faro Yahwe I!

13. Roi ḇeḇyeḇa rosai kosmana snar ḇaḇemḇrob ro Eden?

¹³ Rariso fafisu ḇeḇyeḇa nane nawyae ko? Dunya ine nafo kuker snonkaku ḇeḇarḇor sya, organisasi ḇeḇyeḇa, ma fararur ḇesasar ḇeḇejadi ker ḇefrur fa fafisu na naḇyeḇa syadi. Roi nane nawyae ko imnis raris, mamamun, ḇaḇesabarar, rari bemam farfir er nakam, dafduf ma marmar. Fafisu ḇeḇyeḇa nane nasya snar Setan, Adam ma Eva semḇrob Yahwe I. Kokame kosmai roi nane snar ḇaḇembroḇ sena.

14. Rosai nari Yahwe ifrur faro fafisu ḇeḇyeḇana?

¹⁴ Rosai nari Yahwe ifrur faro fafisu ḇeḇyeḇa na? Kokarapan contoh  ḇeḇeso nane. Yahwe ḇyeasas nari ifrurmnai mamamun nakam. (Wasya Mazmur 46:8, 9.) Nari ipyos dafduf nakam. (Yesaya 33:24) Nari dor’n marmar ya isof fyoro-fyoro. (Yesaya 25:8) Nari ipyos ḇaḇesaḇararna. (Mazmur 72:12-16) Ma Yahwe nari fyadwer fafisu ḇeḇyeḇa nakam ḇefnai fa koḇe kandera kaku. Nari ipyos roi ḇeḇyeḇa Setan ma hantu-hantu ḇyesya sifrur fa nawyae ko!—Efesus 2:2.

15. Rofyor Armagedon ramnai rosai nari neḇepyos?

¹⁵ Kwarapan kada wakenem ro dunya nari mamamun, dafduf ḇaido marmar nasya werḇa! Rodiwa sordade, roi sḇuki mamun, ḇaido swarapepen ḇeḇair mamamun nasya werḇa. Kofandun rum ḇeduf ḇa, dokter, suster ḇaido sim ḇeser snonkaku ḇemar kwar sya ḇaido kuḇir na ḇa. Nari rodiwa roi ḇeḇarḇor nasya ḇa, inja kofandun polisi, rakrok ḇeḇuk swarapepen ḇaido kofandun asyopder ḇe ken kedwa na ḇa! Fafisu ḇeḇyeḇa nakam ḇefrur koḇe kandera kakuna nari neḇepyos.

16, 17. (a) Buk contoh rariso sneḇaḇir snonkaku ḇesasyarbur Armagedon sya? (b) Rariso na kokyar kokenem pdef isof dunya ḇeḇarḇor ine neḇepyos?

¹⁶ Kankenem koḇedi nari imnis rariso rofyor fafisu ḇeḇyeḇa neḇepyos kwar? Napyan fa kokara na ḇa. Snar kokenem kuker roi ḇeḇyeḇa kawan kaku ḇefnai fa koḇestres. Imnis raris, snonkaku ḇeḇarek fanam kuker stasiun kereta. Imbude fyoro mura sfandun rakrok ro kereta ani werba. Ḇaido imnis snonkaku ḇeḇarek fanam kuker moḇ sisawen papusna. Imbude fyoro mura sfandun sananarem ḇyena werba. Ḇape rofyor Yahwe ipyos fafisu ḇeḇyeḇakam ine iso fafisu ḇeyun marisen ḇeba kaku!

¹⁷ Rosai nari ḇefadwer roi ḇefrur koḇestres ro kirine? Mazmur 37:11 ikofen, ”Nari sismai kaku marasrisen ḇeba snar ḇaḇeaski ḇebor.” Nari komarisen kaku snar kofawi ineiso roi Yahwe imarisen ifrur ḇe kona! Kirine kosma samswen nabor raryano, koḇensewar infa kofrur rosai riryakam fa kofanam ḇe Yahwe ma organisasi ḇyeja. Kona saneraro ḇepyum kaku, inja fandun fa kokarauser kakuna. Kokyar kaku saneraro nane nari nasnai faro ko ma komarisen korwas faro snonkaku ḇesesya. (1 Timotius 4:15, 16; 1 Petrus 3:15) Inja, nari wakyar kaku rofyor dunya ḇeḇarḇor ine neḇepyos kwar, nari wakenem pdef ma wasma aski isof fyoro-fyoro!