1, 2. (a) Engkai maka banci ikataken doni si jahat enda seri ras penjahat si nandangi iukum mate? (Nen gambar pemena artikel.) (b) Uga perasan kerina si i surga bage pe i doni kenca jaman si jahat enda masap?

CUBA bayangkenndu situasi enda. Lit sekalak penjahat si kejam dat ukumen mate. Gundari, ibaba penjaga ia guna ibunuh. Amin gia ia nggeluh janah sehat tapi nandangi mate nge ia.

² Bali kap doni si jahat enda ras penjahat si nandangi iukum mate ndai. Nina Pustaka si Badia, ’Doni masap kap pagi.’ (1 Johanes 2:17) Enggo itetapken Jahwe maka masap me pagi jaman enda, lanai isangsiken maka kernep nge kerina e. Tapi lit perbedan si penting i bas kedungen jaman enda ras ukumen mate penjahat ndai. Banci saja akap piga-piga kalak ukumen man penjahat ndai la adil janah la teralokensa, ngarap kalak enda maka la ia iukum mate. Tapi, Jahwe hakim si serta, janah keputusenNa guna ngkernepken jaman enda tuhu-tuhu adil. (Ulangen 32:4) Pengukumen enda labo pernah elat. Kenca jaman  enda ikernepken, iakui kerina si lit i surga bage pe i doni maka pengukumen Jahwe benar. Tuhu-tuhu salang kel akap kalak enda!

3. Kai empat masalah si isasapken paksa reh Kinirajan Dibata?

³ Kai saja si ikut masap ras ”doni” e pagi? Kerina si la mehuli si terjadi i bas geluhta gundari. Kerina enda masap nge pagi. Situhuna enda me ”berita si meriah kerna Kinirajan”. (Matius 24:14) Bas artikel enda, sibahas kari empat masalah si isasapken paksa reh Kinirajan Dibata: kalak jahat, organisasi si la mehuli, perbahanen si salah, ras keadan si la mehuli. Bas tep-tep masalah enda si pelajari kari (1) kai pengaruhna man banta, (2) kai si ilakoken Jahwe nandangi masalah e, janah (3) alu kai igantikenNa.

4. Kai pengaruh kalak jahat man banta?

⁴ Kai pengaruh kalak jahat man banta? Ikataken rasul Paulus maka bas wari-wari pendungi ”mbue reh kiniseran” janah ”kalak jahat ras penipu reh dekahna reh jahatna”. (2 Timotius 3:1-5, 13) Pernah nge ialamindu e? Nterem kita pernah jadi korban kalak jahat misalna itokohi, la mehuli perbahanen kalak banta erkiteken beda suku, bage pe kejahaten si kejam. Piga-piga kalak icubakenna muniken perbahanenna si la mehuli e. Tempa-tempa isampatina kalak si deban, tapi situhuna kalak jahat nge ia. Selain e, amin gia la kita jadi korban, erpengaruh kang banta. Ceda kel pusuhta paksa sibegi lit si kejam man anak-anak, man kalak si nggo metua, bage pe kalak si la banci mbela dirina. Perbahanen kalak jahat e tempa-tempa bagi binatang ntah pe malekat si jahat. (Jakup 3:15) Tapi, ibereken Jahwe arapen man banta.

5. (a) Kesempaten kai si lit bas kalak jahat? (b) Kai si terjadi nandangi kalak si la nggit robah?

⁵ Kai si nandangi ilakoken Jahwe? Gundari ibere Jahwe kesempaten man kalak jahat gelah robah. (Jesaya 55:7) Amin gia jaman enda nandangi ikernepken, lenga bo kalak enda tuhu-tuhu iakimi. Tapi, uga kerna kalak si la nggit robah ras kalak si ndukung jaman enda ngasa reh kiniseran si mbelin? Erjanji Jahwe guna ngkernepken kalak jahat bas doni enda nari. (Oge Masmur 37:10.) Gundari, nterem kalak iusahakenna nutupi perbahanenna si salah, janah megati la iukum. (Jop 21:7, 9) Tapi ipersingeti Pustaka kita, ”IperdiatekenNa kerina langkah manusia, idah Dibata kerina perdalanenna. La lit ingan si gelap, aminna kugapa pe gelapna, si banci man ingan cebuni kalak perdosa.” (Jop 34:21, 22) Emaka la banci terbuniken perbahanenna e bas Jahwe nari. IidahNa kerina kejahaten si terjadi. Kenca Harmagedon pagi, sidarami pe kalak enda, lanai bo siidah. Kerina nggo masap seh rasa lalap!​—Masmur 37:12-15.

6. Ise pagi si tetap tading paksa kalak jahat ikernepken, janah ngkai maka enda sada berita si meriah?

⁶ Ise pagi si tetap tading paksa kalak jahat ikernepken? Erjanji Jahwe, ”Kalak si meteruk rukur ndatken taneh e, inanamina kedamen ras  kesenangen.” Sioge ka bas masmur e, nina, ”Kalak bujur me si ndatken bagin taneh i bas negeri e, janah ringan ia i je rasa lalap.” (Masmur 37:11, 29) Ise nge ”kalak si meteruk rukur” ras ”kalak bujur”? Kalak si meteruk rukur eme kalak si erlajar bas Jahwe nari janah patuh man baNa. Kalak si bujur eme kalak si nggit ngelakoken kai si benar i lebe-lebe Dibata. Gundari, buen kalak jahat asangken kalak bujur. Tapi bas doni si mbaru pagi, kalak si meteruk rukur ras si bujur ngenca si tading i je, kalak enda me si erban doni enda pagi jadi pardis!

7. Kai pengaruh organisasi si la mehuli enda man banta?

⁷ Kai pengaruh organisasi si la mehuli enda man banta? Mbue kejahaten labo ilakoken pribadi-pribadi tapi organisasi. Jutan kalak itipu organisasi agama. Contohna, erbual ia kerna ise kin Dibata, ikatakenna maka Pustaka la terteki, janah itipuna kalak kerna masa depan doni ras manusia. Pemerentah si la mehuli pe erban reh buena perang, kekerasen nandangi suku si deban, ras penindasen man kalak musil bage pe kalak si la banci mbela dirina. Lit ka pemerentah si terus reh bayakna ras reh belinna kuasana erkiteken la adil ntah pe ngaloken sogok. Bage ka pe perusahan si rangap ncedai lingkungen ras doni janah muat keuntungen bas kalak si deban gelah piga-piga kalak ngenca si jadi bayak. Jelas me, melala kiniseran bas doni enda erkiteken organisasi si la mehuli.

8. Kai si ikataken Pustaka kerna organisasi-organisasi si tempa-tempa paguh iakap jelma gundari?

⁸ Kai si nandangi ilakoken Jahwe? Ibenaken me kiniseran si mbelin paksa iserang kuasa politik kerina organisasi agama palsu, si igambarken Pustaka bagi sekalak perlua-lua si gelarna Babilon si Mbelin. (Ketangkasen 17:1, 2, 16; 18:1-4) Tuhu-tuhu ikernepken me pagi organisasi agama enda. Tapi kai si terjadi nandangi kerina organisasi si la mehuli si debanna? Igambarken Pustaka kalak enda tempa-tempa megegeh bagi deleng-deleng bage pe pulo-pulo. (Oge Ketangkasen 6:14.) Tapi itambahken ka maka pemerentah-pemerentah ras kerina organisasi si deban si la ndukung Kinirajan Dibata ikernepken me pagi. (Jeremia 25:31-33) Enda me puncak kiniseran si mbelin. Kenca e, lanai lit organisasi si la mehuli!

9. Engkai maka banci kita tek doni si mbaru iatur alu mehuli?

⁹ Kai si nggantiken organisasi si la mehuli e? Lit denga nge pagi organisasi bas doni enda kenca Harmagedon? Nina Pustaka, ”Kita nimai kai si enggo ipadanken Dibata e me langit si mbaru ras doni si mbaru; i je me inganna keadilen.” (2 Petrus 3:13) Langit ras doni si nggo metua enda eme pemerentah-pemerentah si la mehuli ras manusia si iatur pemerentah e. Kai si nggantiken kalak enda kenca ia ikernepken? ”Langit si mbaru ras doni si mbaru.” Langit si mbaru ertina pemerentah si mbaru, eme Kinirajan si iperentah Jesus  Kristus ras 144.000 temanna. Doni si mbaru ertina manusia si iperentah Kinirajan Dibata. Alu serta iusih Jesus ras temanna me Dibata Jahwe, Dibata kiniraturen. (1 Korinti 14:33) Emaka kalak enda me si ngaturken ”doni si mbaru” e. I je kerina jelmana mehuli ras ermediate. (Masmur 45:16) Jesus ras 144.000 me si negu-negu kalak enda. Bayangken paksa seh waktuna kerina organisasi si la mehuli igantiken sada organisasi, eme organisasi si ersada si la pernah la mehuli!

10. Perbahanen salah kai saja si lit bas inganndu tading, janah kai pengaruhna man bandu ras keluargandu?

¹⁰ Kai pengaruh perbahanen si salah man banta? Kita nggeluh i bas doni si lagu langkahna la mehuli, la jujur, bage pe dem alu kekerasen si seh kel kejamna. Hiburen erban perbahanen-perbahanen e menarik janah erban patoken Jahwe kerna si benar ras si salah la meherga. (Jesaya 5:20) Emaka, orang tua arus erjuang njagai anak-anakna i bas pengaruh si la mehuli e nari. Situhuna, kerina kalak Kristen situhu-tuhu arus erjuang mpertahanken hubungenna ras Jahwe bas doni si la ngergai patoken Dibata.

11. Kai si banci sipelajari bas pengukumen Jahwe nandangi Sodom ras Gomora?

¹¹ Kai si ilakoken Jahwe nandangi perbahanen si salah? Cuba ukuri kai si ilakoken Jahwe nandangi perbahanen si salah si lit bas kuta Sodom ras Gomora. (Oge 2 Petrus 2:6-8.) Lot sekalak si bujur, janah latih akapna ras keluargana erkiteken kerina kalak isekelewetna ngelakoken si la mehuli. Ikernepken Jahwe kuta e bage pe kuta i sekelewetna guna ngkernepken kejahaten si terjadi i je. Enda jadi persinget man kalak jahat si gundari. Bali bagi pengkernepen Jahwe nandangi perbahanen si la mehuli mbarenda, ikernepkenNa ka nge perbahanen si la mehuli si lit gundari.

12. Kai saja si atendu ilakokenndu paksa jaman enda nggo masap?

¹² Kai si nggantiken perbahanen si salah? Bas doni si mbaru, melala dahin si erban meriah ukurta. Contohna, siban doni enda jadi pardis janah sibangun rumahta ras kalak sinikelengi. Sialo-alo ka jutan kalak si ipekeke ras siajari ia kerna Jahwe bage pe kerna kai si nggo ilakokenNa man manusia. (Jesaya 65:21, 22; Perbahanen Rasul-Rasul 24:15) Paksa si e, kerina pendahinta erban meriah ukurta janah maba kepujin man Jahwe!

13. Kai akibat pemberontaken si terjadi bas Eden?

¹³ Kai pengaruh keadan si la mehuli man banta? Enterem kel kalak jahat bas doni enda, bage pe organisasi si la mehuli, ras perbahanen si salah si erban keadan bas doni enda ceda. Kerina kita kena pengaruh keadan si la mehuli, misalna, perang, kemusilen, perbahanen si la adil nandangi suku, penakit, bage pe kematen. Enda terjadi erkiteken Setan, Adam, ras Hawa mberontak ngelawan Jahwe. Janah kerina kita kena pengaruhna.

14. Kai si ilakoken Jahwe nandangi keadan si la mehuli?

 ¹⁴ Kai si ilakoken Jahwe nandangi keadan si la mehuli? Mari sibahas piga-piga contohna. Erjanji Jahwe guna mpengadi perang. (Oge Masmur 46:8, 9.) IpesasapNa penakit. (Jesaya 33:24) IkernepkenNa kematen seh rasa lalap. (Jesaya 25:8) IpengadiNa kemusilen. (Masmur 72:12-16) Janah isasapken Jahwe pagi kerina keadan si la mehuli si deban si erban geluhta mesera gundari. IsasapkenNa kerina pengaruh Setan bage pe malekat-malekat si jahat!​—Epesus 2:2.

15. Kai si lanai lit kenca Harmagedon?

¹⁵ Cuba bayangken uga kegeluhenta kari bas doni si la lit perang, penakit ntah pe kematen! Lanai perlu tentera, senjata, ntah pe peringet-ingeten kerna perang. Lanai kita perlu rumah sakit, dokter, perawat, ntah pe kuburen. Lanai lit kejahaten, emaka lanai kita perlu polisi, ntah pe banci saja la perlu kita gembok ntah pe kunci! Kerina keadan si la mehuli si erban aru pusuhta bene seh rasa lalap.

16, 17. (a) Uga perasan kalak si selamat bas Harmagedon nari? Ban anding-andingenna. (b) Uga carana gelah banci kita tetap nggeluh kenca doni si nggo metua e masap?

¹⁶ Uga keadan geluhta paksa masap keadan si la mehuli? Labo menukah mbayangkensa. Erkiteken nggo ndekah kita nggeluh bas keadan si la mehuli, banci saja la sisedari uga picetna ukurta erkiteken si e. Anding-andingenna, kalak si tading deher stasiun kereta api banci saja nggo terbiasa ia megi sora si gejek. Bage ka pe kalak si tading deher ingan sampah nggo terbiasa ia nganggeh bau sampah e. Tapi paksa isasapken Jahwe kerina keadan si la mehuli, salang kel siakap!

¹⁷ Kai si nggantiken kepiceten ukurta? Nina Masmur 37:11, ”Inanamina kedamen ras kesenangen.” Tuhu-tuhu terapuli kel kita erkiteken sieteh maka enda me peraten Jahwe man banta! Sedekah masa si dem kepiceten e, usahakenndulah asa ngasupndu gelah terus ndeher ras Jahwe bage pe organisasiNa. Meherga kel arapenndu kerna wari si pepagi, emaka ukuri alu mbages kerna si e, banlah enda tuhu-tuhu lit i lebe-lebendu, janah turiken man kalak si deban. (1 Timotius 4:15, 16; 1 Petrus 3:15) Enda me carana gelah banci kam tek maka paksa jaman enda masap, banci kam tetap nggeluh janah ermeriah ukur rasa lalap!