1, 2. (a) Dan ki fason ki sa move lemonn i parey en kriminel ki pros pour ganny egzekite? (Vwar portre o konmansman sa lartik.) (b) Ki mannyer tou sa ki dan lesyel ek lo later pou santi apre ki sa move lemonn in ganny detrir?

IMAZIN sa senn. En kriminel danzere pe desann dan koridor prizon, anmezir ki bann gard ki avek li pe kriye, “Zonm mor pe marse!” Akoz zot dir sa? Menm si sa kriminel i vivan e paret an bonn sante, i’n ganny kondannen amor e i pros pour ganny egzekite. Alor, i konmsi i ti’n fini mor. *—Vwar not.

² Sa move lemonn ki nou pe viv ladan i parey sa kriminel ki pros pour ganny ekzekite. Labib i dir: “Sa lemonn e osi son bann dezir pou disparet.” (1 Zan 2:17) Vi ki Zeova in fini deside, alor napa dout ki sa move lemonn pou disparet tre byento. Me i annan en diferans enportan ant lafen sa move lemonn ek legzekisyon sa kriminel. Serten dimoun i kapab santi ki zizman sa kriminel pa ti zis e zot kapab  proteste avek lespwar ki i pa pou ganny egzekite. Par kont, Zeova i en ziz parfe e son desizyon pour detri sa move lemonn i parfetman zis. (Deterononm 32:4) Sa legzekisyon pa pou an retar. Apre ki sa move lemonn i finalman ganny detrir, tou sa ki dan lesyel ek lo later pou dakor ki zizman Zeova ti zis. Pa sa pou en gran soulazman!

3. Ki sa kat problenm ki pou ganny retire ler Rwayonm Bondye i vini?

³ Kwa ki enkli avek “sa lemonn” ki “pou disparet”? I enkli tou bann move keksoz ki’n vin en parti nou lavi toulezour. Byento tou sa bann keksoz pou nepli egziste. Sa i form parti “sa bon nouvel Rwayonm.” (Matye 24:14) Dan sa lartik, nou pou diskit lo kat problenm ki pou ganny retire ler Rwayonm Bondye i vini: bann move dimoun, bann lorganizasyon koronpi, bann move keksoz ki pe arive e bann move kondisyon lavi. Pour sakenn sa bann problenm nou pou aprann (1) lefe ki zot annan lo nou, (2) sa ki Zeova pou fer konsernan zot e (3) kwa ki Zeova pou ranplas zot avek.

4. Ki lefe bann move dimoun i annan lo nou ozordi?

⁴ Ki lefe bann move dimoun i annan lo nou ozordi? Zapot Pol ti dir ki bann dernyen zour, pou “en letan vreman difisil.” Apre i ti azoute: “Bann move dimoun ek bann anbeter pou vin deplizanpli pli move.” (2 Timote 3:1-5, 13) Eski ou’n deza eksperyans sa? Plizyer parmi nou in viktim bann move dimoun tel parey bann bouli ki vyolan, bann ki rasis ki annan laenn e bann kriminel. Serten parmi zot pa esey kasyet bann move keksoz ki zot fer. Lezot i pretann ki zot pe ed dimoun me ki an realite zot move. Menm si nou pa’n deza viktim en krim, bann move dimoun i annan en lefe lo nou. Nou pa santi nou byen ler nou tann konsernan bann move fason ki zot tret bann zanfan, bann aze ek lezot ki pa kapab defann zot lekor. Sa bann move dimoun i azir dan en fason ki fer zot paret parey bann zannimo sovaz ouswa menm bann demon. (Zak 3:15) Erezman parol Zeova i donn nou lespwar.

5. (a) Ki loportinite bann move dimoun i ankor annan? (b) Ki pou arive avek sa bann ki refize sanze?

⁵ Ki Zeova pou fer? Ozordi Zeova pe donn bann move dimoun sa loportinite pour sanze. (Izai 55:7) Menm si sa move lemonn pou byento ganny detrir, zot pa ankor ganny zize. Me, kantmenm sa, ki pou arive avek sa bann ki refize sanze e ki siport sa move lemonn ziska gran ladetres? Zeova in promet pour retir tou move dimoun lo later. (Lir Psonm 37:10.) Ozordi, bokou in aprann pour kasyet bann move keksoz ki zot fer e souvandfwa zot pa ganny pini. (Zob 21:7, 9) Me, Labib i rapel nou: “Lizye Bondye i swiv tou sa ki en zonm i fer e i war tou lepa ki i fer. Napa okenn kwen ki tro fernwanr kot malfeter i kapab kasyet.” (Zob 34:21, 22) Alor napa okenn par ki nou kapab kasyet Zeova. I kapab vwar tou sa ki bann move dimoun pe fer. Apre Armagedon, nou pou kapab get kot zot ti ete, me nou pa pou vwar zot. Zot pou’n fini disparet pour touzour!—Psonm 37:12-15.

6. Lekel ki pou reste ler bann move dimoun pou nepli la e akoz sa i en bon nouvel?

 ⁶ Lekel ki pou reste ler bann move dimoun pou nepli la? Zeova i promet: “Bann dimoun ki annan limilite pou posed later e zot pou trouv bokou plezir dan labondans lape.” Pli tar dan sa menm psonm, i dir: “Bann dimoun drwat pou posed later e zot pou reste lo la pour touzour.” (Psonm 37:11, 29, NWT) Lekel sa “bann dimoun ki annan limilite” ek sa “bann dimoun drwat”? Sa bann dimoun ki annan limilite i bann ki aprann avek Zeova e obei li. Bann dimoun drwat i sa bann ki kontan fer sa ki byen dan lizye Bondye. Dan sa lemonn ozordi, i annan bokou plis move dimoun ki dimoun drwat. Me dan nouvo lemonn, i pou annan zis bann dimoun ki annan limilite ek bann dimoun drwat e zot pou fer later vin en paradi!

7. Ki lefe bann lorganizasyon koronpi i annan lo nou ozordi?

⁷ Ki lefe bann lorganizasyon koronpi i annan lo nou ozordi? Laplipar bann move keksoz ki pe arive ozordi i pa lafot bann endividi, me i lafot bann lorganizasyon. Plizyer milyon dimoun i ganny anbete par bann lorganizasyon relizye. Par egzanp, zot koz mansonz konsernan Bondye, zot dir ki ou pa kapab annan konfyans dan Labib e zot anbet dimoun konsernan lavenir later ek bann imen. Bann gouvernman koronpi i promot lager ek konfli rasyal e zot abiz bann pov ki san defans. Sa bann tel gouvernman i vin pli ris e pli pwisan par fer lapreferans ouswa aksepte bann gous. Bann konpannyen egois i polye lanvironnman, detri bann resours natirel e profit lo bann dimoun pour ki serten dimoun i kapab vin ris. I kler alor ki bann lorganizasyon koronpi i responsab pour laplipar soufrans ki pe arive dan lemonn ozordi.

8. Ki Labib i dir pou arive avek bann lorganizasyon ki pour laplipar dimoun i paret for ozordi?

⁸ Ki Zeova pou fer? Gran ladetres pou konmanse ler bann pouvwar politik pou atak tou bann lorganizasyon fo larelizyon, ki dan Labib i ganny dekrir konman en prostitye ki apel Gran Babilonn. (Revelasyon 17:1, 2, 16; 18:1-4) Sa bann lorganizasyon relizye pou ganny detrir konpletman. Me ki pou arive avek lezot lorganizasyon koronpi? Labib i konpar zot avek bann montanny ek bann zil parski zot paret for e solid. (Lir Revelasyon 6:14.) Me i azoute ki bann gouvernman ek tou lezot lorganizasyon ki pa siport Rwayonm Bondye pou ganny detrir. Sa pou sa parti final gran ladetres. (Zeremi 25:31-33) Apre sa, i pou nepli annan ankor okenn lorganizasyon koronpi!

9. Akoz nou kapab asire ki sa nouvo later pou byen organize?

⁹ Kwa ki pou ranplas bann lorganizasyon koronpi? Apre Armagedon, eski i pou annan okenn lorganizasyon lo later? Labib i dir: “Me dapre son promes, nou pe esper en nouvo lesyel ek en nouvo later kot i pou annan ladrwatir.” (2 Pyer 3:13) Sa vye lesyel ek later i bann gouvernman koronpi ek bann dimoun ki zot pe kontrole. Kwa ki pou ranplas zot apre ki zot in disparet? “En nouvo lesyel ek en nouvo later.” Sa nouvo lesyel pe refer avek en nouvo gouvernman, sa i en  Rwayonm kot Zezi Kri ek sa 144,000 i bann dirizan. Sa nouvo later pe refer avek bann dimoun ki pou ganny dirize par Rwayonm Bondye. Zezi ek sa 144,000 ki pou diriz ansanm avek li pou imit parfetman Zeova, ki en Bondye annord. (1 Korentyen 14:33) Alor sa “nouvo later” pou ganny organize. I pou annan bann zonm ki bon pour pran swen avek tou keksoz. (Psonm 45:16) Sa bann zonm pou ganny gide par Kris ek sa 144,000. Imazin en letan ler tou bann lorganizasyon koronpi pou ganny ranplase par en sel lorganizasyon ki ini e ki pa pou zanmen kapab vin koronpi!

10. Ki bann move keksoz ki popiler kot ou reste e ki lefe i annan lo ou ek ou fanmir?

¹⁰ Ki lefe bann move keksoz ki pe arive i annan lo nou? Nou viv dan en lemonn kot imoralite, malonnekte ek vyolans i popiler. Bann divertisman sa lemonn i fer sa bann tel keksoz paret pli atiran anmezir ki zot pe monk bann standar Zeova lo sa ki byen ek sa ki mal. (Izai 5:20) Bann paran espesyalman, zot bezwen lite pour protez zot zanfan kont sa bann move lenfliyans. Anfet, tou bann vre Kretyen i bezwen fer bokou zefor pour protez zot relasyon avek Zeova dan en lemonn ki napa respe pour bann standar Bondye.

11. Ki nou aprann avek zizman Zeova lo Sodonm ek Gomor?

¹¹ Ki Zeova pou fer konsernan bann move keksoz ki pe arive? Mazin lo sa ki Zeova ti fer konsernan bann move keksoz ki ti pe arive dan lavil Sodonm ek Gomor. (Lir 2 Pyer 2:6-8.) Lot ti en zonm drwat, li ek son fanmir ti soufer en kantite avek tou sa bann move keksoz ki bann dimoun otour zot ti pe fer. Zeova ti detri sa rezyon an antye pour met en lafen avek sa bann move keksoz ki ti pe arive laba. Me i ti pe osi servi sa konman “en lavertisman” pour bann move dimoun ozordi. Zis parey Zeova ti termin tou bann aktivite imoral sa letan, i pou fer parey dan nou letan.

12. Ki bann keksoz ki ou enpasyan pour fer ler sa lemonn i disparet?

¹² Kwa ki pou ranplas bann move keksoz ki pe arive? Dan sa nouvo lemonn nou pou okipe pe fer plizyer keksoz ki anmenn lazwa. Par egzanp, nou pou fer later vin en paradi e konstri bann lakaz pour nou menm e pour bann ki nou kontan. Nou pou osi akeyir plizyer milyon dimoun ki pou resisite e ansenny zot konsernan Zeova ek tou sa ki i’n fer pour bann imen. (Izai 65:21, 22; Akt 24:15) Sa letan, nou pou vreman okipe pe fer bann keksoz ki pou fer nou ere e ki pou loue Zeova!

13. Ki rezilta rebelyon dan Zarden Edenn in anmennen?

¹³ Ki lefe bann move kondisyon lavi i annan lo nou ozordi? En lemonn ranpli avek move dimoun, bann lorganizasyon koronpi e bann move keksoz ki pe arive in anmenn bann move kondisyon lavi. Nou tou nou ganny afekte avek lager, lapovrete, rasizm, maladi ek lanmor. Sa bann move kondisyon ti konmanse parski Satan, Adan ek Ev ti rebele kont Zeova e nou tou nou’n ganny afekte avek zot rebelyon.

14. Ki Zeova pou fer konsernan bann move kondisyon?

 ¹⁴ Ki Zeova pou fer konsernan bann move kondisyon? Annou vwar serten legzanp. Zeova i promet pour met en lafen avek tou bann lager. (Lir Psonm 46:8, 9.) I pou elimin tou maladi. (Izai 33:24) Lanmor pou disparet pour touzour. (Izai 25:8) I pou met en lafen avek lapovrete. (Psonm 72:12-16) I pou retir tou lezot move kondisyon ki fer lavi difisil ozordi. I pou menm retir move lenfliyans Satan ek son bann demon!—Efezyen 2:2.

15. Ki serten keksoz ki pou disparet apre Armagedon?

¹⁵ Zis imazinen ki mannyer i pou ete pour viv dan en lemonn ki napa lager, maladi ek lanmor! I pou napa ni larme, ni zarm ouswa bann servis memoryal pour bann ki’n mor dan lager. Nou pou nepli bezwen lopital, dokter, ners, mortyer ouswa simityer. Pou napa ni krim, alor nou pou nepli bezwen lapolis, bann sistenm alarm kot lakaz ouswa menm petet lok ek lakle avek nou laport! Tou sa bann move kondisyon lavi ki pe vreman trakas nou ozordi pou disparet pour touzour.

16, 17. (a) Ki mannyer sa bann ki sirviv Armagedon pou santi zot? Donn en legzanp. (b) Ki mannyer nou asire ki nou pou reste vivan apre ki sa vye lemonn in disparet?

¹⁶ Ki mannyer i pou ete ler bann move kondisyon pou disparet? I pa fasil pour imazin sa. Nou’n viv avek sa bann move kondisyon pour sitan lontan ki nou menm pa kapab remarke ki degre zot fer nou strese. Pour donn en legzanp, dimoun ki reste pros avek en stasyon tren ki byen okipe, i kapab ki zot nepli realize ki i annan tapaz. Dimoun ki reste pros avek en landrwa kot i zet salte, i kapab ki zot nepli santi loder salte. Pa i pou en gran soulazman, ler Zeova i retir tou sa bann move kondisyon!

¹⁷ Kwa ki pou ranplas tou sa bann stres ki nou santi ozordi? Psonm 37:11, NWT i dir: “Zot pou trouv bokou plezir dan labondans lape.” Pa i rekonfortan pour konnen ki i sanmenm ki Zeova i anvi pour nou! Pandan sa letan ki anmenn bokou stres, fer tou sa ki ou kapab pour reste pros avek Zeova ek son lorganizasyon. Ou lespwar pour lavenir i presye, alor mazin o profon lo la, fer sir ki i reel pour ou e partaz li avek lezot. (1 Timote 4:15, 16; 1 Pyer 3:15) Dan sa fason, ou kapab asire ki ler lafen sa lemonn i arive, ou pou reste vivan e ere pour touzour!