ကစၢ်ယွၤအဘီမုၢ် မ့ၢ်ဟဲန့ၣ် တၢ်မနုၤ ကလီၤမၢ်ကွံာ်ဝဲလဲၣ်
“ဟီၣ်ခိၣ်, ဒီးဟီၣ်ခိၣ်အတၢ်သးကွံန့ၣ် ဒံကွံာ်ဝဲ, မ့မ့ၢ်ပှၤမၤဖဲယွၤအသးန့ၣ် ကအိၣ်ကဆိးလီၤထူလီၤယိာ်လီၤ.”—၁ ယိၤဟၣ် ၂:၁၇.
၁, ၂. (က) တၢ်ကမၤဟးဂီၤ ဟီၣ်ခိၣ်လၢအအၢအသီအံၤဒီး တၢ်စံၣ်ညီၣ်သံပှၤအၢပှၤသီတဂၤ အတၢ်အိၣ်သးလီၤဂာ်လိာ်အသးလၢ ကျဲဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.) (ခ) တၢ်မၤဟးဂီၤ ဟီၣ်ခိၣ်လၢအအၢအသီအံၤ မ့ၢ်ဝံၤန့ၣ် ပှၤအိၣ်လၢမူခိၣ်ဒီး ပှၤဟီၣ်ခိၣ်ကိးဂၤဒဲး ကတူၢ်ဘၣ်ဝဲဒ်လဲၣ်.
ထံၣ်တမှံကွၢ် ဖဲပှၤခိးတၢ်ဖိတဖၣ် ထုးထီၣ်ဝဲပှၤအၢပှၤသီတဂၤလၢ ဃိာ်ပူၤအခါ ပှၤအါဂၤကိးပသူထီၣ်ဝဲလၢ “ပှၤသံတဂၤဟဲထီၣ်လံ.” ဘၣ်မနုၤအဃိ အဝဲသ့ၣ်ကိးပသူထီၣ်ဝဲဒ်န့ၣ်လဲၣ်. မ့ၢ်လၢပှၤအၢပှၤသီတဂၤအံၤ ကဘၣ်တၢ်မၤသံအီၤ ဘူးထီၣ်လံအဃိလီၤ. အဝဲအဂံၢ်အဘါဆူၣ် ဒီးအတၢ်အိၣ်ဆူၣ်အိၣ်ချ့ဂ့ၤ သနာ်က့ လီၤဂာ်ဒ် ပှၤသံတဂၤအသိးလီၤ. *—ကွၢ်တၢ်ဂ့ၢ်အဘျဲၣ်တက့ၢ်.
၂ ဒ်ပှၤအၢပှၤသီတဂၤအံၤ ကဘၣ်တၢ်မၤသံအီၤအသိး တယံာ်လၢၤဘၣ်န့ၣ် ဟီၣ်ခိၣ်လၢအအၢအသီအံၤ ကဘၣ်တၢ်မၤဟးဂီၤကွံာ်အီၤစ့ၢ်ကီးလီၤ. လံာ်စီဆှံစံးဝဲလၢ– “ဟီၣ်ခိၣ် . . . ဒံကွံာ်ဝဲ” လီၤ. (၁ ယိၤဟၣ် ၂:၁၇) ယဟိဝၤယွၤ ဆၢတဲာ်ဝဲလၢ တယံာ်လၢၤဘၣ်န့ၣ် အဝဲကမၤဟးဂီၤကွံာ် ဟီၣ်ခိၣ်လၢအအၢအသီအံၤအဃိ ပနာ်သ့သပှၢ်ကတၢၢ်လၢ ကဟဲလၢထီၣ်ပှဲၤထီၣ်ဝဲလီၤ. ဘၣ်ဆၣ် ဟီၣ်ခိၣ်လၢအအၢအသီအံၤ အစိၤကတၢၢ်ဒီး ပှၤအၢပှၤသီတဂၤအံၤ ဘၣ်တၢ်စံၣ်ညီၣ်သံအီၤန့ၣ် တၢ်လီၤဆီလိာ်အသးအိၣ်ဝဲတမံၤလီၤ. ပှၤတနီၤနီၤ ကထံၣ်ဝဲလၢ ပှၤအၢပှၤသီတဂၤအံၤတကြၢး တၢ်မၤသံအီၤဘၣ်အဃိ အဝဲသ့ၣ်ကထီဒါတၢ်ဒ်သိး ပှၤသုတမၤသံအီၤတဂ့ၤအဂီၢ်လီၤ. မ့မ့ၢ်ယဟိဝၤယွၤန့ၣ် မ့ၢ်စံၣ်ညီၣ်ကွီၢ်လၢအတီအလိၤအဃိ အတၢ်ဆၢတဲာ်လၢ ကမၤဟးဂီၤကွံာ်ဟီၣ်ခိၣ်လၢ အအၢအသီအံၤန့ၣ် ကြၢးဝဲဘၣ်ဝဲလီၤ. (၅ မိၤၡ့ ၃၂:၄) ဒီးအတၢ်စံၣ်ညီၣ်န့ၣ် တစဲၤခံဘၣ်. ယဟိဝၤယွၤမၤဟးဂီၤကွံာ် ဟီၣ်ခိၣ်လၢ အအၢအသီအံၤမ့ၢ်ဝံၤန့ၣ် ပှၤအိၣ်လၢမူခိၣ် ဒီးပှၤဟီၣ်ခိၣ်ဖိကိးဂၤဒဲး ကတူၢ်လိာ်ဝဲလၢ ယဟိဝၤယွၤအတၢ်စံၣ်ညီၣ်န့ၣ် မ့ၢ်တၢ်လၢအဘၣ်ဒီး တီဝဲလိၤဝဲလီၤ. ဖဲန့ၣ်အဆၢကတီၢ် ကမ့ၢ်တၢ်ဆၢကတီၢ်လၢ အလီၤသူၣ်မံသးမုာ်ဝဲဒိၣ်မးလီၤ.
၃. ယွၤအဘီအမုၢ်မ့ၢ်ဟဲန့ၣ် တၢ်မနုၤလွံၢ်မံၤ ကလီၤမၢ်ကွံာ်ဝဲလဲၣ်.
၃ “ဟီၣ်ခိၣ်” မ့ၢ် “ဒံကွံာ်” န့ၣ် တၢ်မနုၤ ကလီၤမၢ်ကွံာ်ဝဲလဲၣ်. တၢ်အၢတၢ်သီလၢ အကဲထီၣ်အသးလၢ မုၢ်မဆါတနံၤအံၤတဖၣ်န့ၣ် ကလီၤမၢ်ကွံာ်ဝဲလီၤ. တယံာ်လၢၤဘၣ် တၢ်သ့ၣ်တဖၣ်အံၤ ကလီၤမၢ်ကွံာ်ဝဲအဃိမ့ၢ်ဝဲ “တၢ်သးခုအကစီၣ်” န့ၣ်လီၤ. (မးသဲ ၂၄:၁၄) လၢတၢ်မၤလိအံၤအပူၤ ပကတဲသကိး တၢ်လွံၢ်မံၤလၢကလီၤမၢ်ကွံာ်ဝဲဖဲ ယွၤအဘီအမုၢ် ဟဲအဆၢကတီၢ်န့ၣ်လီၤ. တၢ်လွံၢ်မံၤန့ၣ်မ့ၢ်ဝဲ– ပှၤအၢပှၤသီ, တၢ်ကရၢကရိလၢ အမၤတၢ်တတီတလိၤ, တၢ်တဂ့ၤတဘၣ် ဒီးတၢ်အိၣ်သးလၢအတဂ့ၤတဖၣ်န့ၣ်လီၤ. ပကမၤလိဘၣ်လၢ တၢ်သ့ၣ်တဖၣ်အံၤ (၁) မၤဘၣ်ဒိပှၤဒ်လဲၣ်, (၂) ယဟိဝၤယွၤ ကမၤဝဲဒ်လဲၣ် ဒီး (၃) ကစၢ်ယွၤကဒုးအိၣ်ထီၣ်က့ၤဝဲ တၢ်မနုၤလၢအလီၢ်လဲၣ်.
ပှၤအၢပှၤသီ
၄. ပှၤအၢပှၤသီတဖၣ် မၤဘၣ်ဒိပှၤလၢ ကျဲဒ်လဲၣ်.
၄ ပှၤအၢပှၤသီတဖၣ် မၤဘၣ်ဒိပှၤဒ်လဲၣ်. စီၤပီလူးတဲဝဲလၢ မုၢ်နံၤခံကတၢၢ် အဆၢကတီၢ်န့ၣ် “မ့ၢ်တၢ်ဆၢကတီၢ်လၢ အကီအခဲ” လီၤ. ဒီးအဝဲတဲစ့ၢ်ကီးဝဲလၢ– “ပှၤအၢပှၤသီဒီး ပှၤလီတၢ်ဝ့ၤတၢ်တဖၣ်န့ၣ် . . . ကအၢလီၤဝဲ နးထီၣ်နးထီၣ်လီၤ.” (၂ တံၤမသ့း ၃:၁-၅, ၁၃) တၢ်သ့ၣ်တဖၣ်အံၤ ဟဲကဲထီၣ်ဝဲန့ၣ် မ့ၢ်နထံၣ်ဘၣ်လၢ နမဲာ်လံဧါ. ပှၤအၢပှၤသီတဖၣ်အဃိ ပှၤအါဂၤတူၢ်ဘၣ်ဝဲ တၢ်မၤနၢၤအီၣ်ဃီၣ်, တၢ်ကွၢ်တလီၤလိာ်သး ဒီးတၢ်မၤအၢမၤသီတဖၣ်လီၤ. အဝဲသ့ၣ်တနီၤန့ၣ် မၤတၢ်အၢတၢ်သီဒူဒူလီၤ. မ့မ့ၢ်အဂၤတနီၤန့ၣ် ပာ်မၤအသးဒ်သိးဒီး အမ့ၢ်ပှၤဂ့ၤလၢအမၤစၢၤပှၤဂၤ ဘၣ်ဆၣ်မၤတၢ်အၢတၢ်သီလီၤ. ပှၤအၢပှၤသီတဖၣ် မ့ၢ်တမၤပှၤတၢ်နီတမံၤဒၣ်လဲာ် ပသးဘၣ်ဒိလၢ အဝဲသ့ၣ်အတၢ်ဖံးတၢ်မၤအဃိလီၤ. ဖဲပနၢ်ဟူဘၣ်လၢ အဝဲသ့ၣ်မၤအၢမၤနး ပှၤဖိသၣ်, ပှၤသးပှၢ် ဒီးပှၤလၢအဂံၢ်စၢ်ဘါစၢ်တဖၣ်အခါ ပသးဘၣ်ဒိဒိၣ်မးလီၤ. ပှၤအၢပှၤသီတဖၣ်အံၤ အတၢ်ပာ်သူၣ်ပာ်သးန့ၣ် လီၤဂာ်ဒ်ဆၣ်ဖိကီၢ်ဖိ ဒီးတၢ်ဝံတၢ်နါတဖၣ်လီၤ. (ယၤကိာ် ၃:၁၅) ဘၣ်ဆၣ် မ့ၢ်လၢယဟိဝၤယွၤ အကလုၢ်ကထါ ဟ့ၣ်ပှၤတၢ်မုၢ်လၢ်အဃိ ပသးခုဒိၣ်မးလီၤ.
၅. (က) ပှၤအၢပှၤသီတဖၣ် အိၣ်ဒီးတၢ်ခွဲးတၢ်ယာ်ဒ်လဲၣ်. (ခ) ပှၤအၢပှၤသီ မ့ၢ်တပီၢ်ယၢ်လီၤက့ၤအသးဘၣ်န့ၣ် တၢ်ကမၤအသးဒီးအီၤဒ်လဲၣ်.
၅ ယဟိဝၤယွၤ ကမၤဝဲဒ်လဲၣ်. မုၢ်မဆါတနံၤအံၤ ယဟိဝၤယွၤ ဟ့ၣ်ဝဲပှၤအၢပှၤသီတဖၣ် တၢ်ခွဲးတၢ်ယာ်လၢ ကပီၢ်ယၢ်လီၤက့ၤအသးအဂီၢ်လီၤ. (ယၡါယၤ ၅၅:၇) တယံာ်လၢၤဘၣ် ကစၢ်ယွၤကမၤဟးဂီၤကွံာ် ပှၤအၢပှၤသီတဖၣ်အံၤသနာ်က့ အခဲအံၤ အဝဲတစံၣ်ညီၣ် ပှၤအၢပှၤသီတဖၣ်အံၤဒံးဘၣ်. ဘၣ်ဆၣ် အဝဲသ့ၣ်မ့ၢ်ဆဲးဆီၣ်ထွဲမၤစၢၤ မုၣ်ကီၤလံၢ် အတၢ်ရဲၣ်တၢ်ကျဲၤဒီး မ့ၢ်တပီၢ်ယၢ်လီၤက့ၤအသးဘၣ်န့ၣ် ဖဲတၢ်နးတၢ်ဖှီၣ်ဖးဒိၣ် စးထီၣ်ဝဲအခါ တၢ်ကကဲထီၣ်အသးဒီးအဝဲသ့ၣ်ဒ်လဲၣ်. ယဟိဝၤယွၤ အၢၣ်လီၤဝဲလၢ ကမၤဟးဂီၤကွံာ်ဝဲ ပှၤအၢပှၤသီခဲလၢာ်လၢ ဟီၣ်ခိၣ်ချၢလီၤ. (ဖး စံးထီၣ်ပတြၢၤ ၃၇:၁၀ တက့ၢ်.) မုၢ်မဆါတနံၤအံၤ ပှၤအါဂၤမၤခူသူၣ် တၢ်အၢတၢ်သီသနာ်က့ တဘျီတခီၣ် အဝဲသ့ၣ်တဘၣ် တၢ်စံၣ်ညီၣ်ဘၣ်. (ယိၤဘး ၂၁:၇, ၉) ဘၣ်ဆၣ် လံာ်စီဆှံ ဟ့ၣ်ပလီၢ်ပှၤလၢ– “ယွၤအမဲာ်အိၣ်ဝဲလၢ ပှၤကညီအကျဲအဖီခိၣ်, ဒီးကယဲၢ်အလဲၤတၢ်န့ၣ်ထံၣ်ဝဲလီၤ. တၢ်ခံးမ့ၢ်ဂ့ၤ, တၢ်သံအကဒုမ့ၢ်ဂ့ၤ, ဖဲပှၤမၤတၢ်အၢ ကပာ်ခူသူၣ်အသးန့ၣ်တအိၣ်ဘၣ်.” (ယိၤဘး ၃၄:၂၁, ၂၂) လၢတၢ်န့ၣ်အဃိ ပှၤပာ်ခူသူၣ်တၢ်လၢ ယွၤအမဲာ်ညါတသ့ နီတမံၤဘၣ်. တၢ်လၢပှၤအၢပှၤသီ မၤဝဲတဖၣ်န့ၣ် ယဟိဝၤယွၤထံၣ်ဝဲခဲလၢာ်လီၤ. အၢ်မက့းဒိၣ်မ့ၢ်ဝံၤန့ၣ် ပမ့ၢ်ဟးဃုအဝဲသ့ၣ်ဒၣ်လဲာ် ပတထံၣ်အီၤလၢၤဘၣ်. အဝဲသ့ၣ်ကလီၤမၢ်ကွံာ်ဝဲ လီၤထူလီၤယိာ်လီၤ.—စံးထီၣ်ပတြၢၤ ၃၇:၁၂-၁၅.
၆. ပှၤအၢပှၤသီတဖၣ် မ့ၢ်လီၤမၢ်ကွံာ်န့ၣ် မတၤတဖၣ်ကအိၣ်ဒံးဝဲလဲၣ်, ဒီးဘၣ်မနုၤအဃိ မ့ၢ်ဝဲတၢ်သးခုကစီၣ်တခါလဲၣ်.
၆ ပှၤအၢပှၤသီတဖၣ် မ့ၢ်လီၤမၢ်ကွံာ်န့ၣ် မတၤတဖၣ်ကအိၣ်ဒံးဝဲလဲၣ်. ယဟိဝၤယွၤ အၢၣ်လီၤဝဲလၢ– “ပှၤလၢအသးစူၤ ကန့ၢ်ဘၣ်သါ ထံဧိၤကီၢ်ဧိၤ, ဒီးကမုာ်လၤတၢ်လၢ တၢ်ဃူတၢ်ဖိး အါအါကလဲာ်အပူၤလီၤ.” တကးဒံးဘၣ်– “ပှၤတီပှၤလိၤန့ၢ်ဘၣ်သါ ထံဧိၤကီၢ်ဧိၤ, ဒီးအိၣ်ဝဲဆိးဝဲ လီၤစိၤလီၤထီလီၤ.” (စံးထီၣ်ပတြၢၤ ၃၇:၁၁, ၂၉) “ပှၤသးစူၤ” ဒီး “ပှၤတီပှၤလိၤ” တဖၣ်န့ၣ် မ့ၢ်မတၤသ့ၣ်တဖၣ်လဲၣ်. ပှၤလၢအသးစူၤတဖၣ်န့ၣ် မ့ၢ်ဝဲပှၤလၢအိၣ်ဒီး တၢ်ဆီၣ်လီၤသးလၢ ကဒိကနၣ်ဒီးမၤထွဲ ယဟိဝၤယွၤအကလုၢ်လီၤ. မ့မ့ၢ်ပှၤတီပှၤလိၤတဖၣ်န့ၣ် မ့ၢ်ဝဲပှၤလၢအမၤတၢ်လၢအဘၣ် ဒ်ယွၤတဲအီၤအသိးန့ၣ်လီၤ. မုၢ်မဆါတနံၤအံၤ ပှၤအၢပှၤသီတဖၣ် အိၣ်အါန့ၢ်ဒံးပှၤတီပှၤလိၤတဖၣ်လီၤ. ဘၣ်ဆၣ်လၢဟီၣ်ခိၣ်သီအပူၤန့ၣ် ကအိၣ်ထဲ ပှၤလၢအသးစူၤဒီး ပှၤတီပှၤလိၤတဖၣ်လီၤ. ဒီးပှၤတဖၣ်အံၤ ကမၤကဲထီၣ်ဟီၣ်ခိၣ်လၢ ပၤရဒံစူးလီၤ.
တၢ်ကရၢကရိလၢ အမၤတၢ်တတီတလိၤတဖၣ်
၇. မုၢ်မဆါတနံၤအံၤ တၢ်ကရၢကရိလၢ အမၤတၢ်တတီတလိၤတဖၣ် မၤဘၣ်ဒိပှၤဒ်လဲၣ်.
၇ တၢ်ကရၢကရိလၢ အမၤတၢ်တတီတလိၤတဖၣ် မၤဘၣ်ဒိပှၤဒ်လဲၣ်. မုၢ်မဆါတနံၤအံၤ အါတက့ၢ်န့ၣ် တၢ်အၢတၢ်သီတဖၣ် ဟဲကဲထီၣ်အသးခီဖျိ တၢ်ကရၢကရိလၢ အမၤတၢ်တတီတလိၤတဖၣ် အဃိလီၤ. တၢ်ဘူၣ်တၢ်ဘါလၢ အကမၣ်တဖၣ်စ့ၢ်ကီး ကွဲန့ၢ်လွဲန့ၢ်ဝဲ ပှၤလၢအကကွဲၢ်တဖၣ်လီၤ. အဒိ, အဝဲသ့ၣ်တသိၣ်လိဝဲ ကစၢ်ယွၤအတၢ်တိာ်ပာ်လၢ ဘၣ်ဃးဒီး ပှၤဟီၣ်ခိၣ်ဖိတဖၣ်အဂီၢ်, တၢ်မ့ၢ်တၢ်တီလၢဘၣ်ဃးဒီး ကစၢ်ယွၤအဂ့ၢ် ဒီးလံာ်စီဆှံ တၢ်မ့ၢ်တၢ်တီ အဂ့ၢ်န့ၣ်ဘၣ်. ပဒိၣ်ပပှၢ်လၢ အတတီတလိၤတဖၣ်န့ၣ် ဒုးအိၣ်ထီၣ်ဝဲ တၢ်ဒုးတၢ်ယၤ, တၢ်သဘံၣ်သဘုၣ်လၢ ကလုာ်ဒူၣ်အကျါ ဒီးမၤနၢၤအီၣ်ဃီၣ်ဝဲ ပှၤဖှီၣ်ဖိယာ်ဖိဒီး ပှၤလၢအဂံၢ်စၢ်ဘါစၢ်တဖၣ်လီၤ. ပဒိၣ်ပပှၢ်ဒ်အံၤတဖၣ် မ့ၢ်လၢအကွၢ်ကျိၣ်မဲာ်စ့မဲာ် ဒီးအီၣ်ကျိၣ်အီၣ်စ့အဃိ ကဲဒိၣ်ထီၣ်ဝဲလီၤ. အဝဲသ့ၣ် သူၣ်လီသးကွံတၢ်အါတလၢအဃိ အတၢ်ဖံးတၢ်မၤတဖၣ် မၤဘၣ်ဒိဘၣ်ထံးဝဲ န့ဆၢၣ်သနာ်က့ တပာ်ဝဲလၢတၢ်နီတမံၤဘၣ်. ဒ်သိးအကကဲဒိၣ်ထီၣ်အဂီၢ် ဟးမၤနၢၤအီၣ်ဃီၣ်ပှၤဂၤလီၤ. လၢတၢ်န့ၣ်အဃိ ပသ့ၣ်ညါဘၣ် လီၤတံၢ်လီၤဆဲးလၢ တၢ်ကရၢကရိလၢ အမၤတၢ်တတီတလိၤတဖၣ် ဒုးအိၣ်ထီၣ်ဝဲတၢ်နးတၢ်ဖှီၣ်အါမးန့ၣ်လီၤ.
၈. လံာ်စီဆှံတဲဝဲလၢ တၢ်ကရၢကရိလၢ အဖျါလၢအဂံၢ်ဆူၣ်ဘါဆူၣ်ဒီး အဂၢၢ်အကျၢၤတဖၣ် တၢ်ကကဲထီၣ်အသးဒီး အဝဲသ့ၣ်ဒ်လဲၣ်.
၈ ယဟိဝၤယွၤ ကမၤဝဲဒ်လဲၣ်. တၢ်နးတၢ်ဖှီၣ်ဖးဒိၣ် ကစးထီၣ်ဖဲ ဟီၣ်ခိၣ်အပဒိၣ်ပပှၢ်တဖၣ် ထီဒါဝဲ တၢ်ဘူၣ်တၢ်ဘါလၢ အကမၣ်တဖၣ်အခါန့ၣ်လီၤ. တၢ်ဘူၣ်တၢ်ဘါလၢအကမၣ်တဖၣ်န့ၣ် လံာ်စီဆှံကိးအီၤလၢ ပှၤဃဲသဲမုၣ်လၢအမ့ၢ် ဘၤဘူၤလိၣ်ဖးဒိၣ်န့ၣ်လီၤ. (လီၣ်ဖျါ ၁၇:၁, ၂, ၁၆; ၁၈:၁-၄) တၢ်ဘူၣ်တၢ်ဘါလၢအကမၣ်တဖၣ် ကဘၣ်တၢ်မၤဟးဂီၤကွံာ်အီၤ ခဲလၢာ်ခဲဆ့လီၤ. ဘၣ်ဆၣ် တၢ်ကရၢကရိလၢ အမၤတၢ်တတီတလိၤအဂၤတဖၣ် တၢ်ကမၤအသးဒီးအီၤဒ်လဲၣ်. လံာ်စီဆှံထိၣ်သတြီၤ အဝဲသ့ၣ်လၢ ကစၢၢ်ဒီးကီးတဖၣ်န့ၣ်လီၤ. (ဖး လီၣ်ဖျါ ၆:၁၄ တက့ၢ်.) ဘၣ်ဆၣ် လံာ်စီဆှံစံးစ့ၢ်ကီးဝဲလၢ ပဒိၣ်ပပှၢ်ဒီး တၢ်ကရၢကရိလၢ တဆီၣ်ထွဲယွၤအဘီအမုၢ်တဖၣ် ကဘၣ်တၢ်မၤဟးဂီၤကွံာ်အီၤလီၤ. ဒီးတၢ်ကမၤဟးဂီၤကွံာ် အဝဲသ့ၣ်လၢတၢ်နးတၢ်ဖှီၣ်ဖးဒိၣ် အကတၢၢ်န့ၣ်လီၤ. (ယံးရမံယၤ ၂၅:၃၁-၃၃) တၢ်နးတၢ်ဖှီၣ်ဖးဒိၣ်မ့ၢ်ဝံၤအလီၢ်ခံ တၢ်ကရၢကရိလၢ အမၤတၢ်တတီတလိၤ တအိၣ်နီတခါလၢၤဘၣ်.
၉. ဘၣ်မနုၤအဃိ ပနာ်သ့လၢ လၢဟီၣ်ခိၣ်သီအပူၤန့ၣ် တၢ်ခဲလၢာ်ကလဲၤအသးလၢ အဂ့ၢ်အဝီလဲၣ်.
၉ တၢ်ကရၢကရိလၢ အမၤတၢ်တတီတလိၤတဖၣ် မ့ၢ်ဟးဂီၤကွံာ်န့ၣ် ကစၢ်ယွၤကပာ်လီၤ တၢ်မနုၤလၢအလီၢ်လဲၣ်. အၢ်မက့းဒိၣ် မ့ၢ်ဝံၤန့ၣ် လၢဟီၣ်ခိၣ်ချၢ တၢ်ကရၢကရိအဂၤ ကအိၣ်ဒံးဧါ. လံာ်စီဆှံ စံးဝဲလၢ– “ပကွၢ်လၢ်မူခိၣ်အသီ, ဒီးဟီၣ်ခိၣ်အသီ, ဖဲတၢ်တီတၢ်လိၤ အိၣ်ဝဲဆိးဝဲလၢအပူၤန့ၣ်လီၤ.” (၂ ပ့းတရူး ၃:၁၃) မူခိၣ်အလီၢ်လံၤန့ၣ် မ့ၢ်ဝဲတၢ်ပၢတၢ်ပြးလၢ အတတီတလိၤန့ၣ်လီၤ. ဒီးဟီၣ်ခိၣ်အလီၢ်လံၤန့ၣ် မ့ၢ်ဝဲပှၤအၢပှၤသီလၢ မုၣ်ကီၤလံၢ်ပၢဝဲတဖၣ်န့ၣ်လီၤ. တၢ်သ့ၣ်တဖၣ်အံၤ မ့ၢ်လီၤမၢ်ကွံာ်ဝဲန့ၣ် တၢ်မနုၤကအိၣ်က့ၤလၢ အဝဲသ့ၣ်အလီၢ်လဲၣ်. “မူခိၣ်အသီ, ဒီးဟီၣ်ခိၣ်အသီ” ကအိၣ်က့ၤလၢ အဝဲသ့ၣ်အလီၢ်လီၤ. မူခိၣ်အသီန့ၣ် မ့ၢ်ဝဲတၢ်ပၢတၢ်ပြးအသီ လၢယ့ၣ်ၡူးဒီးပှၤ ၁၄၄,၀၀၀ ပၢဝဲန့ၣ်လီၤ. ဟီၣ်ခိၣ်အသီန့ၣ် မ့ၢ်ဝဲပှၤလၢအဒိးပၢအသးလၢ ယွၤအဘီမုၢ်အဖီလာ်တဖၣ်န့ၣ်လီၤ. ယ့ၣ်ၡူးဒီးပှၤလၢအပၢဃုာ်တၢ်ဒီးအီၤတဖၣ် ကကွၢ်လိမၤဒိးဝဲ ယဟိဝၤယွၤအဃိ တၢ်ခဲလၢာ်ကလဲၤအသးလၢ အဂ့ၢ်အဝီလီၤ. (၁ ကရံၣ်သူး ၁၄:၃၃) ဒီး “ဟီၣ်ခိၣ်အသီ” အံၤ ကဘၣ်တၢ်ပရၢကရိထီၣ်အီၤဂ့ၤဂ့ၤအဃိ ပှၤတီပှၤလိၤတဖၣ်အံၤ ကအံးထွဲကွၢ်ထွဲဝဲဟီၣ်ခိၣ်ဂ့ၤဂ့ၤလီၤ. (စံးထီၣ်ပတြၢၤ ၄၅:၁၆) ယ့ၣ်ၡူးဒီးပှၤ ၁၄၄,၀၀၀ ကဟံးစုနဲၣ်ကျဲအဝဲသ့ၣ်လီၤ. ဖဲန့ၣ်အဆၢကတီၢ် တၢ်ကရၢကရိလၢ အမၤတၢ်တတီတလိၤတဖၣ် တအိၣ်လၢၤဘၣ် ဒီးကအိၣ်က့ၤဝဲထဲ တၢ်ကရၢကရိလၢ အတီအလိၤတဖုဧိၤလီၤ.
တၢ်လၢအတဂ့ၤတဘၣ်တဖၣ်
၁၀. လၢနအိၣ်တၢ်အလီၢ်န့ၣ် အိၣ်ဝဲဒီးတၢ်လၢအတဂ့ၤတဘၣ် မနုၤသ့ၣ်တဖၣ်လဲၣ်, ဒီး ကဲထီၣ်တၢ်ကီတၢ်ခဲလၢ နၤဒီးနဟံၣ်ဖိဃီဖိ အဂီၢ်ဒ်လဲၣ်.
၁၀ တၢ်လၢ အတဂ့ၤတဘၣ်တဖၣ်န့ၣ် မၤဘၣ်ဒိပှၤဒ်လဲၣ်. ပအိၣ်မူဘၣ်လၢ ဟီၣ်ခိၣ်လၢအပှဲၤဝဲဒီး တၢ်မၤကမၣ်မုၣ်ကမၣ်ခွါ, တၢ်တတီတလိၤ ဒီးတၢ်မၤဆူၣ်မၤစိးတဖၣ်လီၤ. ပှၤဟီၣ်ခိၣ်ဖိတဖၣ် ဒုးအိၣ်ထီၣ်ဝဲ တၢ်မၤမုာ်မၤဖှံသးလၢ အထီဒါလိာ်အသးဒီး ယဟိဝၤယွၤအတၢ်သိၣ်တၢ်သီန့ၣ်လီၤ. (ယၡါယၤ ၅:၂၀) လၢတၢ်န့ၣ်အဃိ လီၤဆီဒၣ်တၢ် မိၢ်ပၢ်သ့ၣ်တဖၣ် ဘၣ်ဂုာ်ကျဲးစၢးတြီဆၢဝဲ လုၢ်လၢ်လၢအတဂ့ၤတဖၣ်ဒ်သိး ကဒီသဒၢ အနီၢ်ကစၢ်ဒီး အဖိသ့ၣ်တဖၣ်အဂီၢ်လီၤ. ဒီးမ့ၢ်လၢပှၤဟီၣ်ခိၣ်ဖိတဖၣ် တပာ်ကဲယွၤအတၢ်သိၣ်တၢ်သီ လၢၤဘၣ်အဃိ ခရံာ်ဖိသ့ၣ်တဖၣ် ကဘၣ်ဂုာ်ကျဲးစၢးတြီဆၢဝဲ တၢ်လၢကမၤဟးဂီၤ အတၢ်ရ့လိာ်သးဒီး ယဟိဝၤယွၤန့ၣ်လီၤ.
၁၁. မ့ၢ်လၢယဟိဝၤယွၤ စံၣ်ညီၣ်ဝဲ ဝ့ၢ်စဒိၣ်ဒီးဂမိရၤအဃိ ပမၤလိန့ၢ်တၢ်မနုၤလဲၣ်.
၁၁ တၢ်လၢအတဂ့ၤတဘၣ် တဖၣ်အံၤ ယဟိဝၤယွၤ ကမၤဝဲဒ်လဲၣ်. ဆိကမိၣ်ကွၢ် တၢ်အၢတၢ်သီလၢ ဝ့ၢ်စဒိၣ်ဒီးဂမိရၤအပူၤန့ၣ် ယဟိဝၤယွၤ မၤဝဲဒ်လဲၣ်. (ဖး ၂ ပ့းတရူး ၂:၆-၈ တက့ၢ်.) စီၤလိၣ်မ့ၢ်ဝဲ ပှၤလၢအတီအလိၤတဂၤ ဘၣ်ဆၣ် ပှၤလၢအိၣ်လၢ အခိၣ်အဃၢၤတဖၣ် မၤဝဲတၢ်အၢတၢ်သီအဃိ ကဲထီၣ်ဝဲတၢ်ကီတၢ်ခဲလၢ အဝဲသ့ၣ်အဂီၢ်လီၤ. လၢတၢ်န့ၣ်အဃိ ပှၤအၢပှၤသီလၢအအိၣ်လၢ အဝဲသ့ၣ်အဟီၣ်ကဝီၤအပူၤတဖၣ် ယဟိဝၤယွၤ မၤဟးဂီၤကွံာ်ဝဲခဲလၢာ် တကးဒံးဘၣ် တၢ်အံၤမ့ၢ်ဝဲ “တၢ်အဒိအတဲာ်” လၢပှၤအၢပှၤသီလၢ မုၢ်မဆါတနံၤအံၤတဖၣ်အဂီၢ်လီၤ. ဒ်ယဟိဝၤယွၤ မၤဟးဂီၤကွံာ်ဝဲ တၢ်အၢတၢ်သီလၢညါအသိး မုၢ်မဆါတနံၤအံၤစ့ၢ်ကီး ကမၤဟးဂီၤကွံာ်ဝဲ တၢ်အၢတၢ်သီတဖၣ်အံၤန့ၣ်လီၤ.
၁၂. ကစၢ်ယွၤမၤဟးဂီၤကွံာ် ဟီၣ်ခိၣ်လၢမုၣ်ကီၤလံၢ် ပၢဝဲအံၤမ့ၢ်ဝံၤန့ၣ် နအဲၣ်ဒိးမၤတၢ်မနုၤလဲၣ်.
၁၂ တၢ်လၢ အတဂ့ၤတဘၣ်တဖၣ် မ့ၢ်လီၤမၢ်ကွံာ်ဝဲန့ၣ် တၢ်မနုၤကအိၣ်က့ၤလၢ အလီၢ်လဲၣ်. လၢဟီၣ်ခိၣ်ပၤရဒံစူးအပူၤန့ၣ် ပတၢ်မၤကအါလၢ တၢ်ဖံးတၢ်မၤလၢအပှဲၤဒီး တၢ်သူၣ်ခုသးခုန့ၣ်လီၤ. အဒိ, ပကမၤကဲထီၣ် ဟီၣ်ခိၣ်လၢပၤရဒံစူး ဒီးပကသူၣ်ထီၣ်ဟံၣ် လၢပနီၢ်ကစၢ် ဒီးပှၤလၢပအဲၣ်အီၤတဖၣ်အဂီၢ်လီၤ. တကးဒံးဘၣ် ပကတူၢ်လိာ်မုာ်ဘၣ် ပှၤလၢအဂဲၤဆၢထၢၣ်သမူထီၣ်က့ၤတဖၣ် ဒီးတဲဘၣ်အဝဲသ့ၣ်လၢ ယဟိဝၤယွၤ ဒီးတၢ်လၢအမၤန့ၢ်ပှၤတဖၣ်အဂ့ၢ်လီၤ. (ယၡါယၤ ၆၅:၂၁, ၂၂; မၤတၢ် ၂၄:၁၅) ဖဲန့ၣ်အဆၢကတီၢ် ပတၢ်ဖံးတၢ်မၤကအါ ဒီးပကပှဲၤဒီးတၢ်သူၣ်ခုသးခုဒီး တၢ်စံးထီၣ်ပတြၢၤယဟိဝၤယွၤလီၤ.
တၢ်အိၣ်သးလၢအတဂ့ၤ
၁၃. လၢဧ့ၤဒ့ၣ်တၤသၣ်အလီၢ်ပူၤန့ၣ် ပှၤထီဒါတၢ်အဃိ တၢ်ကဲထီၣ်အသးဒ်လဲၣ်.
၁၃ တၢ်အိၣ်သးလၢ အတဂ့ၤတဖၣ် မၤဘၣ်ဒိပှၤဒ်လဲၣ်. ဟီၣ်ခိၣ်အံၤပှဲၤဝဲဒီး ပှၤအၢပှၤသီ, တၢ်ကရၢကရိလၢအမၤတၢ် တတီတလိၤ, တၢ်လၢအတဂ့ၤတဘၣ်တဖၣ်အဃိ တၢ်အိၣ်သးလၢအတဂ့ၤတဖၣ် ဟဲကဲထီၣ်ဝဲန့ၣ်လီၤ. တၢ်ဒုးတၢ်ယၤ, တၢ်ဖှီၣ်တၢ်ယာ်, တၢ်ကွၢ်တလီၤကလုာ်ဒူၣ်, တၢ်ဆူးတၢ်ဆါ ဒီးတၢ်သံတဖၣ် မၤဘၣ်ဒိပဝဲခဲလၢာ်လီၤ. မ့ၢ်လၢ နီၢ်အံၣ်အုဒီး စီၤအၤဒၣ် ဒီးမုၣ်ကီၤလံၢ်ထီဒါ ယဟိဝၤယွၤအဃိ တၢ်အိၣ်သးလၢအတဂ့ၤတဖၣ် ဟဲကဲထီၣ်ဝဲ ဒီးမၤဘၣ်ဒိပှၤခဲလၢာ်လီၤ.
၁၄. တၢ်အိၣ်သးလၢအတဂ့ၤတဖၣ်န့ၣ် ယဟိဝၤယွၤ ကမၤဝဲဒ်လဲၣ်.
၁၄ တၢ်အိၣ်သးလၢ အတဂ့ၤတဖၣ်အံၤ ယဟိဝၤယွၤ ကမၤဝဲဒ်လဲၣ်. ပကတဲသကိး တၢ်အဒိတနီၤလီၤ. ယဟိဝၤယွၤအၢၣ်လီၤဝဲလၢ ကမၤကတၢၢ်ကွံာ် တၢ်ဒုးတၢ်ယၤခဲလၢာ်လီၤ. (ဖး စံးထီၣ်ပတြၢၤ ၄၆:၈, ၉ တက့ၢ်.) အဝဲကမၤလီၤမၢ်ကွံာ် တၢ်ဆူးတၢ်ဆါတဖၣ်လီၤ. (ယၡါယၤ ၃၃:၂၄) ဒီးကမၤလီၤမၢ်ကွံာ် တၢ်သံလီၤထူလီၤယိာ်လီၤ. (ယၡါယၤ ၂၅:၈) တကးဒံးဘၣ် အဝဲကမၤကတၢၢ်ကွံာ် တၢ်ဖှီၣ်တၢ်ယာ်တဖၣ်လီၤ. (စံးထီၣ်ပတြၢၤ ၇၂:၁၂-၁၆) ဒီးမုၢ်မဆါတနံၤအံၤ တၢ်အိၣ်သးလၢအမၤ သူၣ်အုးသးအုးပှၤတဖၣ်န့ၣ် ယဟိဝၤယွၤ ကမၤလီၤမၢ်ကွံာ်ဝဲခဲလၢာ်လီၤ. အဝဲကမၤလီၤမၢ်ကွံာ် မုၣ်ကီၤလံၢ်ဒီး အတၢ်ဝံတၢ်နါတဖၣ် အတၢ်လ့ပစီခဲလၢာ် စ့ၢ်ကီးန့ၣ်လီၤ.—အ့းဖ့းစူး ၂:၂.
ဆိကမိၣ်ကွၢ် လၢဟီၣ်ခိၣ်ချၢ တၢ်ဒုးတၢ်ယၤ, တၢ်ဆူးတၢ်ဆါ ဒီးတၢ်သံတၢ်ပှၢ် တအိၣ်လၢၤဘၣ်န့ၣ်တက့ၢ်. (ကွၢ်လံာ်အဆၢ ၁၅)
၁၅. အၢ်မက့းဒိၣ် မ့ၢ်ဝံၤအလီၢ်ခံန့ၣ် တၢ်မနုၤတဖၣ် ကလီၤမၢ်ကွံာ်ဝဲလဲၣ်.
၁၅ ဆိကမိၣ်ကွၢ် လၢဟီၣ်ခိၣ်န့ၣ် တၢ်ဒုးတၢ်ယၤ, တၢ်ဆူးတၢ်ဆါ ဒီးတၢ်သံတၢ်ပှၢ် မ့ၢ်တအိၣ်လၢၤဘၣ်န့ၣ် ကမုာ်ဝဲထဲလဲၣ်န့ၣ်တက့ၢ်. ဖဲန့ၣ်အဆၢကတီၢ် သုးမုၢ်သံၣ်ဘိ, တၢ်စုကဝဲၤ ဒီးပှၤသံလၢ တၢ်ဒုးပူၤ အတၢ်သ့ၣ်နီၣ်အပနီၣ် တအိၣ်လၢၤဘၣ်. ပတလိၣ်ဘၣ်စ့ၢ်ကီး တၢ်ဆါဟံၣ်, ကသံၣ်သရၣ်, ပှၤပာ်ပှၤစိၣ်အလီၢ် ဒီးတၢ်သွၣ်ခိၣ်လၢၤဘၣ်. တကးဒံးဘၣ် တၢ်အၢတၢ်သီတအိၣ်လၢၤဘၣ်အဃိ ပတလိၣ်ဘၣ်စ့ၢ်ကီး ပလံး, စဲးလၢတၢ်ဘံၣ်တၢ်ဘၢအဂီၢ် ဒီးနီၣ်ဝံာ်ခံလၢ ပကကးတံာ်ဃာ်တြဲၤအဂီၢ်လၢၤဘၣ်. တၢ်အိၣ်သးလၢအတဂ့ၤလၢ ကမၤသူၣ်ကိၢ်သးဂီၤပှၤတဖၣ်န့ၣ် ကလီၤမၢ်ကွံာ်ဝဲလီၤထူလီၤယိာ်လီၤ.
၁၆, ၁၇. (က) ပှၤလၢအပူၤဖျဲးထီၣ်လၢ အၢ်မက့းဒိၣ်တဖၣ်န့ၣ် ကတူၢ်ဘၣ်ဝဲဒ်လဲၣ်. ဟ့ၣ်အဒိတက့ၢ်. (ခ) ဖဲတၢ်မၤဟးဂီၤကွံာ် ဟီၣ်ခိၣ်လၢမုၣ်ကီၤလံၢ်ပၢဝဲအံၤအခါ ဒ်သိးပကပူၤဖျဲးအဂီၢ် ပကဘၣ်မၤဒ်လဲၣ်.
၁၆ တၢ်အိၣ်သးလၢ အတဂ့ၤတဖၣ် မ့ၢ်လီၤမၢ်ကွံာ်ဝဲန့ၣ် နတၢ်အိၣ်မူကမၤအသးဒ်လဲၣ်. ပကထံၣ်တမှံကွၢ် တၢ်သ့ၣ်တဖၣ်အံၤအဂီၢ်တညီဘၣ်. မ့ၢ်လၢပအိၣ်မူဘၣ်လၢ တၢ်အိၣ်သးလၢအတဂ့ၤတဖၣ် အကျါယံာ်တ့ၢ်လံအဃိ ပအိၣ်ဒီးတၢ်သူၣ်ကိၢ်သးဂီၤ သနာ်က့ တမ့ၢ်တၢ်လၢအလီၤဆီလၢ ပဂီၢ်လၢၤဘၣ်. အဒိ, ပှၤလၢအဟံၣ်အိၣ်ဘူးဒီးလ့ၣ်မ့ၣ်အူ အကျဲတဖၣ်န့ၣ် ယံာ်ထီၣ်ယံာ်ထီၣ်ဒီး တၢ်တကံၢ်နၢ်ဘၣ်အီၤလၢၤဘၣ်. ဒီးပှၤလၢအဟံၣ်အိၣ်ဘူးဒီး ပှၤလဲၤတၢၤကွံာ် တၢ်ကမှံၤအလီၢ်စ့ၢ်ကီး ယံာ်ထီၣ်ယံာ်ထီၣ်န့ၣ် တၢ်တနၢအုၣ်ဘၣ်အီၤလၢၤဘၣ်. ဘၣ်ဆၣ် ယဟိဝၤယွၤ မ့ၢ်မၤလီၤမၢ်ကွံာ်ဝဲ တၢ်အိၣ်သးလၢအတဂ့ၤတဖၣ်အံၤန့ၣ် တၢ်ကမုာ်ထီၣ်ဝဲဖးဒိၣ်န့ၣ်လီၤ.
၁၇ လၢတၢ်သူၣ်ကိၢ်သးဂီၤအလီၢ်န့ၣ် ပကဒိးန့ၢ်ဘၣ်က့ၤ တၢ်မနုၤလဲၣ်. စံးထီၣ်ပတြၢၤ ၃၇:၁၁ စံးဝဲလၢ– “ကမုာ်လၤတၢ်လၢ တၢ်ဃူတၢ်ဖိး အါအါကလဲာ်အပူၤလီၤ.” ပသ့ၣ်ညါဘၣ်လၢ ယဟိဝၤယွၤ ကမၤန့ၢ်ပှၤတၢ်သ့ၣ်တဖၣ်အံၤအဃိ ပသးခုဒိၣ်မးလီၤ. ဘၣ်ဆၣ်အခဲအံၤန့ၣ် ပအိၣ်မူဘၣ်လၢ တၢ်ဆၢကတီၢ်လၢ အပှဲၤဒီးတၢ်ဘၣ်ယိၣ်ဘၣ်ဘီသနာ်က့ ဂုာ်ကျဲးစၢးအိၣ်ဘူးဒီး ယဟိဝၤယွၤဒီး အတၢ်ကရၢကရိတက့ၢ်. နတၢ်မုၢ်လၢ်လၢခါဆူညါန့ၣ် အလုၢ်အပှ့ၤအိၣ်ဒိၣ်မးလီၤ. လၢတၢ်န့ၣ်အဃိ သးစၢၢ်ဆၢဒီး နာ်တၢ်လၢနကဒိးန့ၢ်ဘၣ်လၢ ခါဆူညါတဖၣ်ဒီး တဲဘၣ်ပှၤဂၤလၢတၢ်ဂ့ၢ်အံၤတက့ၢ်. (၁ တံၤမသ့း ၄:၁၅, ၁၆; ၁ ပ့းတရူး ၃:၁၅) နမ့ၢ်မၤဒ်န့ၣ်န့ၣ် နနာ်သ့သပှၢ်ကတၢၢ်လၢ ဖဲဟီၣ်ခိၣ်လၢ မုၣ်ကီၤလံၢ်ပၢဝဲအံၤ ဘၣ်တၢ်မၤဟးဂီၤအီၤအခါ နကပူၤဖျဲးဒီးဒိးန့ၢ်ဘၣ် တၢ်သူၣ်ခုသးခုလီၤထူလီၤယိာ်လီၤ.
^ လံာ်အဆၢ. 1 လၢအပူၤကွံာ် လၢကီၢ်အမဲရကၤအဃိာ်ပူၤန့ၣ် ပှၤသူညီနုၢ်တၢ်ကတိၤလၢအမ့ၢ် “ပှၤသံတဂၤဟဲထီၣ်လံ” န့ၣ်လီၤ.
