1, 2. 1) ¿Keniuj itamilis tein amo kuali tamati kemej imikilis se temiktijkej? (Xikonita taixkopin ipeujyan tamachtilis.) 2) ¿Keniuj momachiliskej akin moajsiskej iluikak uan taltikpak keman ixpoliuis nochi tein amo kuali?

XIONMONEMILI nejin. Se temiktijkej kiixtalijkej ke moneki mikis. Axkan, tajpianij kiuikaj kampa kimiktitij. Maski nejin takat yoltok uan nesi ke amo mokokoua, amo uejkaua mikiti.

² Nochi tein amo kuali tein axkan mochiua kemej yeskia nejon takat akin kimiktitij. Biblia kijtoua ke nochi tein amo kuali ixpoliuis (1 Juan 2:17). Jiova kiixtalij kiixpolos amo uejkaua, uan ijkon yeski. Sayoj ke itamilis tein amo kuali amo ijkon kemej imikilis nejon temiktijkej. Sekin xa kinemiliskej ke nejon takat amo kinamikia ijkon kitatsakuiltiskej uan xa kitajtouiskej oso kichiaskej maj amo kimiktikan. Sayoj ke itamilis tein amo kuali, kiixtalij akin okachi kuali tamelaujkej, akin amo mopoloua keman kiixtalia teisa uan kichiua kemej kinamiki (Deut. 32:4). Amo uejkaua ixpoliuis nochi tein amo kuali. Keman mochiuas, akin moajsiskej iluikak uan taltikpak kijtoskej ke tein Jiova kiixtalij melauak. ¡Semi yolseuiskej!

3. ¿Toni naui taman ixpoliuis keman ualas iTekiuajyo Dios?

 ³ ¿Toni kiixtalij Jiova ke kiixpolos? Miak taman tein taltikpakneminij kinemiliaj ke amo keman ixpoliuis. Nejin tanauatil poui itech kuali tanauatilmej tein mouika ika iTekiuajyo Dios (Mat. 24:14). Itech nejin tamachtilis ika titajtoskej naui taman tein ixpoliuis keman taixyekanas iTekiuajyo Dios: akin amo yolkualmej, taltikpaknechikolmej kampa takajkayauaj, tein amo kuali uan tein tikijyouiaj kampa tinemij. Keman timomachtiskej sejse, tikitaskej keniuj techijtakoua, keniuj Jiova kiyektalis uan ika toni kiixpatas.

4. ¿Keniuj techijtakoua tein kichiuaj akin amo yolkualmej?

⁴ ¿Keniuj techijtakouaj? Tatitanil Pablo kijtoj ke itamian tonalmej yeskiaj ouijkej. Uan no kijtoj ke taltikpakneminij okachi amo yolkualmej yeskiaj (2 Tim. 3:1-5, 13). ¿Melauj ke tikitaj ke mochiujtok nejin tein moijtojka? Timiakej titajyouianij porin techijtakouanij temiktianij, tachtekinij oso akin teikamauiltiaj, oso akin kintauelitaj akin taman ixtamatij. Sekin nion kitatiaj tein amo kuali tein kichiuaj. Oksekin kinextiaj ke kinekij kinpaleuiskej taltikpakneminij, sayoj ke tein melauj kitemouaj kinchiuiliskej tein amo kuali. Uan maski xa amo teyi techchiuilianij, techijtakoua tein kichiuaj akin amo yolkualmej. ¿Keniuj timomachiliaj keman tikitaj keniuj ininka mauiltiaj seki konemej, akin xiuejkejya uan akin amo ueli mopaleuiaj? Sekin akin amo yolkualmej monejnemiltiaj kemej yeskiaj koujtajtapialmej oso hasta kemej amokuali ejekamej (Sant. 3:15, TNM). Sayoj ke Biblia techmatiltia ke uelis tikchiaskej tein kuali satepan.

5. 1) ¿Toni uelis kichiuaskejok akin amo yolkualmej? 2) ¿Toni kinpanos akin amo kinekiskej mopataskej?

⁵ ¿Toni kichiuas Jiova? Axkan, Jiova kinkaujtok akin amo yolkualmej maj mopatakan (Is. 55:7). Maski nochi tein amo kuali ixyetok ixpoliuis amo uejkaua, yejuatsin ayamo kiixtalia tein kinpanos sejsemej akin kichiuaj tein amo kuali. ¿Toni panos iniuan akin amo kinekiskej mopataskej uan kipaleuiskej tein mochiua nikan taltikpak hasta keman peuas okachi ueyi tajyouilis? Dios motenkauak kinixpolos (xikonixtajtolti Salmo 37:10). Miakej kimatinij keniuj kitatiskej tein amo kuali tein kichiuaj uan miakpa amo teyi kinpanouani (Job 21:7, 9). Sayoj ke Biblia techelnamiktia ke “iixtololouan Dios yetokej itech iojuan taltikpaknenkej, uan yejuatsin kiita nochi itaksalis. Amo onkak kampa tayouayan nion kampa yekauilaj kampa uelis motatiskej akin kichiuaj tein amo kuali” (Job 34:21, 22). Yejua ika amo akin uelis motatis iixpan Dios. Yejuatsin kiita nochi tein kichiuaj akin amo yolkualmej. Satepan ke panos Armagedón, yejuan amo nemiskejok. Amo keman tikinitaskejok (Sal. 37:12-15).

6. ¿Akonimej makisaskej keman ixpoliuiskej akin amo yolkualmej, uan keyej nejin se kuali tanauatil?

⁶ ¿Akonimej makisaskej keman ixpoliuiskej akin amo yolkualmej? Jiova motenkaua: “Akin yolnejmachmej ininaxkatis taltikpak uan yekmelauj yolpakiskej porin kipiaskej ueyi yolseuilis”. Uan satepan kijtoua: “Akin yolmelaujkej ininaxkatis taltikpak, uan ompa nemiskej nochipaya” (Sal. 37:11, 29). ¿Akonimej “yolnejmachmej” uan “yolmelaujkej”? Yolnejmachmej yejuan  taltikpakneminij akin yolyemankej akin kiixmatij Jiova uan kitakamatij. Yejuan no moixmatij kemej yolmelaujkej porin kinekij kichiuaskej tein yejuatsin kijtoua ke kuali yetok. Itech nejin tonalmej, okachi moajsij akin amo yolkualmej ke akin yolmelaujkej. Sayoj ke itech yankuik taltikpak tein Dios motenkaua kichiuas sayoj moajsiskej akin yolnejmachmej uan yolmelaujkej. Yejuan kichiuaskej maj nejin taltikpak mochiua se xochital.

7. ¿Keniuj techijtakouaj taltikpaknechikolmej kampa takajkayauaj?

⁷ ¿Keniuj techijtakouaj? Miak taman tein amo kuali tein mochiua amo inintajtakol taltikpakneminij, ta inintajtakol taltikpaknechikolmej kampa takajkayauaj. Onkakej seki taneltokalismej kampa kinkajkayauaj millones taltikpakneminij. Amo kijtouaj tein melauak kemej tamati Dios uan tein kipanos taltikpak satepan uan tein kinpanos taltikpakneminij. No tamachtiaj ke amo uelis se takuaujtamatis itech tein kijtoua Biblia. Uan no, moajsij tekiuanij akin takajkayauaj uan kichiuaj maj onka neteuilismej uan maj kinijtakokan akin taman kemej ixtamatij. Nejin tekiuanij kintajyouiltiaj akin amo kipiaj tomin uan amo ueli mopaleuiaj. Uan no, okachi motomintiaj uan okachi kipiaj tanauatil keman kinpaleuiaj sayoj seki taltikpakneminij oso kichiuaj teisa keman kinmakaj tomin. No moajsij uejueyi tekitiloyamej kampa kitemouaj okachi motomintiskej uan amo kintekipachoua kipitsotiliskej taltikpak, kiixpolouaj nochi tein onkak uan ininka mauiltiaj taltikpakneminij uan ijkon sayoj sekin motomintiaj. Tein melauj, taltikpaknechikolmej kampa takajkayauaj inintajtakol maj tel miakej tajyouikan axkan.

8. ¿Toni kijtoua Biblia ke kinpanos taltikpaknechikolmej tein moitaj ke amo teyi kinuetsiltis?

⁸ ¿Toni kichiuas Jiova? Okachi ueyi tajyouilis peuas keman taltikpaktekiuajyomej kiixnamikiskej nochi taneltokalismej tein amo melaujkej. Biblia kinneskayotia kemej se siuaauilnenkej akin motokaytia Ueyi Babilonia (Apoc. 17:1, 2, 16; 18:1-4). Nejin taneltokalismej ixpoliuiskej. ¿Uan toni panos iniuan okseki taltikpaknechikolmej kampa takajkayauaj? Biblia kijtoua ke nejin taltikpaknechikolmej tamatij kemej talmej tein moajsij tatajko ueyiat uan tepemej porin moita ke kuali kinyoui uan amo teyi kinuetsiltis (xikonixtajtolti Apocalipsis 6:14). Sayoj ke no kijtoua ke tekiuajyomej uan tein yeski taltikpaknechikol kampa amo kipaleuiskej iTekiuajyo Dios ixpoliuiskej. Nejin panos itamiampa okachi ueyi tajyouilis (Jer. 25:31-33). Amo mokauas nion se taltikpaknechikol kampa takajkayauaj.

9. ¿Keyej uelis tikyekmatiskej ke yankuik taltikpak kuali ixyetos keniuj moajsis?

⁹ ¿Toni kinixpatas taltikpaknechikolmej kampa takajkayauaj? ¿Moajsis se nechikol itech taltikpak satepan ke panos Armagedón? Biblia kijtoua: “Dios kichijchiuas se yankuik eluiyak uan ne yankuik taltikpak, kampa mochiutos sayo ten kualtsin chipaukanemilis ijkon kemej yejuatsin motenkauak” (2 Ped. 3:13). Iluikak tein achto moajsia kinixnextia tekiuajyomej tein takajkayauaj. Uan taltikpak tein achto moajsia kinixnextia taltikpakneminij akin kinixyekanaj. ¿Toni kinixpatas taltikpak uan iluikak tein achto moajsiaj? “Se yankuik eluiyak uan ne yankuik taltikpak.” Yankuik iluikak kiixnextia  se yankuik tekiuajyot. Nejin yejua iTekiuajyo Dios, kampa pouij Jesucristo uan 144,000 tekiuanij akin iuan taixyekanaskej. Yankuik taltikpak kinixnextia taltikpakneminij akin kinixyekanas iTekiuajyo Dios. Jesús uan akin iuan tekiuajtiskej senkis kinextiskej ikualneskayouan Jiova, akin kiuelita maj nochi kuali tayekyeto (1 Cor. 14:33). Yejua ika kuali ixyetos keniuj moajsis “yankuik taltikpak”. Takamej akin taixyekanaskej itech Xochital yeskij yolkualmej uan kitojtokaskej itaixyekanalis Jesús uan 144,000 (Sal. 45:16). Maj tiknemilikan keniuj yeski nemilis keman taltikpaknechikolmej kampa takajkayauaj kinixpatas sayoj se nechikol kampa amo xexeliujtoskej uan kampa amo keman takajkayauaskej.

10. 1) ¿Toni tein amo kuali motelchiua kampa tejuatsin tionnemi? 2) ¿Keniuj tein amo kuali mitsonijtakoua tejuatsin uan mochankauan?

¹⁰ ¿Keniuj techijtakoua? Itech nejin tonalmej, tel miakej auilnemij, takajkayauaj uan tel tateuiaj. Neixpetanilis tein onkak axkan kichiua maj teyolnotsa nochi nejin uan kinextia ke amo kipia ipatiuj itanauatiluan Jiova ika tein kuali uan tein amo kuali (Is. 5:20). Tetatmej okachiok moneki mochikauaskej kinyekpiaskej ininkoneuan ika tein teijtakoua. Tein melauj, tinochin akin tikchiuaj kemej Cristo moneki timochikauaskej tikyekpiaskej tokuali uikalis iuan Jiova itech nejin taltikpak kampa miakej amo kipoujkaitaj itanauatiluan.

11. ¿Toni techmachtia tein Jiova kichiuak iuan Sodoma uan Gomorra?

¹¹ ¿Toni kichiuas Jiova? Maj tikitakan tein kichiuak ika tein amo kuali tein mochiuaya Sodoma uan Gomorra (xikonixtajtolti 2 Pedro 2:6-8). Lot katka se takat yolmelauak, uan yejua uan ichankauan kitelijyouiayaj tein amo kuali tein kichiuayaj akin ompa nemiaj. Dios kinixpoloj nejon xolalmej uan ijkon kitamij tein amo kuali. Sayoj ke “ijkon mochiuak para Dios kinnejmachtis nochi in taltikpakuani ten nemikiue ok uan nentinemiske ok tech in tajtakol para ma amo ijkon kichiuakan”. Ijkon kemej Jiova kiixpoloj auilnemilis ne uejkauj, ijkon kichiuas itech totonaluan keman kiixpolos nochi tein amo kuali.

12. ¿Toni tikonneki tikonchiuas keman amo onkasok tein amo kuali?

¹² ¿Toni kiixpatas tein amo kuali? Itech Xochital tikchiuaskej miak taman tein techyolpaktis. Kemej neskayot, tikchiuaskej maj taltikpak mochiua se xochital uan tikinchijchiuaskej tokaluan uan ininkaluan tochankauan. No tikinseliskej tel miak millones akin moajokuiskej uan tikinpaleuiskej maj kiixmatikan Jiova uan nochi tein kichiuani ininka taltikpakneminij (Is. 65:21, 22; Hech. 24:15). Tikchiujtoskej miak taman tein techyolpaktis uan tein kiueyichiuas Jiova.

13. ¿Keniuj techijtakoua taixnamikilis tein mochiuak itech xochital tein moajsia Edén?

¹³ ¿Keniuj techijtakoua? Axkan amo kuali tinemij porin mochiua tein amo kuali uan moajsij taltikpaknechikolmej kampa takajkayauaj. Tinochin techijtakouaj ouijkayomej kemej neteuilis, tatasojtilis, tachikoitalis, kokolis oso mikilis. Nejin ouijkayomej peuak mochiuaj porin Satanás, Adán uan Eva kiixnamikkej Jiova. Uan tinochin tikijyouiaj tein amo kuali tein kiualkuik nejon.

14. ¿Toni kichiuas Jiova ika tein tikijyouiaj kampa tinemij?

¹⁴ ¿Toni kichiuas Jiova? Maj titanemilikan  itech seki taman tein Jiova motenkaua kichiuas tein ika kiixpolos tein tikijyouiaj kampa tinemij. Senkis kiixpolos neteuilismej (xikonixtajtolti Salmo 46:8, 9). Kiixpolos kokolismej (Is. 33:24). Senkis kijkuanis mikilis (Is. 25:8). Uan kitamis tatasojtilis (Sal. 72:12-16). Jiova kijkuanis nochi tein axkan techtajyouiltia. Hasta kiixpolos itaixyekanalis Satanás uan iamokuali ejekauan (Efes. 2:2).

15. ¿Toni amo onkasok satepan ke panos Armagedón?

¹⁵ Xionmonemili keniuj tinemiskej keman amo onkasok neteuilismej, kokolismej nion mikilis. Amo onkaskejok tateuianij, nion teposmej tein ika temiktiaj, tapajtiloyamej, tapajtianij nion miketekochmej. Uan kemej amo onkaskejok tachtekinij oso temiktianij, amo no onkaskejok policías nion teposmej tein kakistij keman mochiua tein amo kuali. Uan xa nion monekisok maj titeltatsakuakan tokalijtik nion monekisok tikpiaskej tein ika titataposkej. Nochi tein axkan kichiua maj timotekipachokan amo keman onkasok.

16, 17. 1) ¿Keniuj momachiliskej akin makisaskej itech Armagedón? Xikonijto se neskayot. 2) ¿Toni techpaleuis maj timakisakan keman ixpoliuis nochi tein amo kuali?

¹⁶ ¿Keniuj timomachiliskej keman amo onkasok tein tikijyouiaj kampa tinemij? Ouij se kinemilis keniuj yeski. Kemej uejkaujya titajyouianij kampa tinemij, xa nion tikmachiliajok ke techkuasioujtia ijkon tinemiskej. Kemej neskayot, xa akin nemij kampa ika panouaj miakej teposmej momatkejya maj tel takuejsiujto. Uan akin nemij kampa ika kitamotaj tajsol xa momatkejya maj tel tatsojyaxto. Sayoj ke komo amo teyi takuejsoskiaok uan amo tatsojyayaskiaok, kualtsin momachiliskiaj. Ijkon tiyolseuiskej keman Jiova senkis kiixpolos nochi tein techtajyouiltia kampa tinemij.

¹⁷ ¿Toni kiixpatas netekipacholis tein axkan tikpiaj? Salmo 37:11 kijtoua ke satepan tikpiaskej “ueyi yolseuilis”. ¿Melauj ke techyolseuia tikmatiskej ke ijkon kineki Jiova maj tinemikan? Itech nejin tonalmej kampa techkuasioujtia miak taman, maj timochikauakan timotokiskej iuan Jiova uan inechikol. Tein tikchiaj tikseliskej satepan semi kipia ipatiuj, yejua ika maj miakpa itech titanemilikan. Maj timochikauakan tikitaskej kemej se taman tein yekmelauj mochiuas uan maj ika titajtokan iniuan oksekin (1 Tim. 4:15, 16; 1 Ped. 3:15). Komo ijkon tikchiuaj, timakisaskej keman ixpoliuis nochi tein amo kuali uan tiyolpakiskej nochipaya.