1, 2. (1) Mmukhalelo taani elapo ela enalikanaaya ni mulipa awiipha othoriheliwe okhwa? (Moone eruku yoopacerya.) (2) Achu oothene wirimu ni veelaponi yavathi anahaala woona hai elapo ela yoonanara emanle otolosiwa?

NKAANYIHERYANI yaweereya. Mulipa awiipha oothoriheliwa okhwa. Vano, owo onahooliwa ni mulipeleli wi iiphiwe. Naamwi ari mukumi nave akhalaka wi ookhalano ekumi, owo oneeca ookhweene.

² Elapo yoonanara nnakhalaahumo enalikana ni mulipa awiipha yoowo othoriheliwe okhwa. Piipiliya onnaloca: “Eparipari elapo enanvira.” (1 Yohani 2:17) Yehova oolakelela wi elapo ela enahaala okuchuwa mwawaakuveya, nave hisaavo minikwa wi enahaala okuchuwa. Nyenya wookhalavo ohiyana otokweene variyari va okuchuwa wa elapo ela ni wiiphiwa wa mulipa awiipha. Achu akina akhweya anamuupuwela wi othorihiwa wa mulipa awiipha tahi waphaama nave anamwaakaaha, eweheryaka wi oopoliwe. Nyenya, Yehova muthoriha awaakhwanela, nave yoolakelela awe ya otolosa elapo ela ti yawaakhwanela. (Malamulo 32:4) Otolosiwa waya onahaala weereya chiryene. Voocharela, elapo ela emanle otolosiwa, muchu ti muchu  wirimu ni veelaponi yavathi onahaala weemererya wi othoriha wa Yehova ti wawookololowa. Onahaala okhalavo woopowa weeparipari!

3.Makacamiho taani masese anahaala omala Omwene wa Muluku warwa?

³ “Elapo” yeeyo enahaala ‘ovira’ enaphitaanyerya eheeni? Eyo enaphitaanyerya ichu soonanara seiyo inapaka makupa a okumi olelo. Ichu soothene seiyo sinahaala omala moohilekela. Nave ti yeeyo “Mutxhaka ola wa omwene” onooniheryaaya. (Mateu 24:14) Mmwaha yoola nnahaala othokororya makacamiho masese anahaala omala Omwene wa Muluku warwa: Achu oonanara murima, marehereryo oowoka, saweera soonanara ni meerelo oonanara. Nikacamiho ti nikacamiho nnahaala ohuserya (1) mukhalelo ananivolowelaaya, (2) yeeyo Yehova onahaaleiye oweerela ni (3)  yeeyo onahaaleiye oraceelihano.

4. Achu oonanara murima ananivolowela hai?

⁴ Achu oonanara murima ananivolowela hai? Murummwa Paulo aaloca wi mmahiku oomaliherya, “inamphiya ilukuluku sokatxamiha.” Voocharela aahi: “Alipa ònanara murima ni òwoka eni enanvira etepaka.” (2 Timóteo 3:1-5, 13) Apwanne montoko woona yeela? Ancipale a hiyo nontoko ohooxeya ni achu oonanara murima, a nlala, hiiha ntoko onyemuliwa, ni othanyiwa. Akina a yaawo haneererya ovitha ichu soonanara anapakaaya. Akina annachuna waakhaviherya achu, eniiha chiryene eri achu oonanara murima. Mwawiihiiha, naamwi nihintonko ohooxeya, nlelo ninnavoloweliwa ni achu oonanara murima. Ninnakhala awuukhuwa vaavaa nniiwaahu mukhalelo woonanara anaweerelaaya anamwane, achu awuuluvala ni akina yaawo ahinawerya wiisaakiha. Achu yaala oonanara murima, annapaka ichu seiyo sinaweeriha olikanaka ni asinama naari amusaserya. (Tiyako 3:15) Moohakalaliha, Masu a Muluku annanivaha ewehereryo!

5. (1) Ekari taani achu oonanara murima nlelo aryaayano? (2) Tiheeni eni yaaphacuwele yaale anakhooca otoroka mukhalelo aya?

⁵ Tiheeni Yehova onahaaleiye opaka? Mmahiku ahu yaala Yehova onnaavaha ekari amutakhali wi etoroke mukhalelo aya. (Isaiya 55:7) Naamwi elapo ela ehaalaka vakhaani omalihiwa, awo nlelo hathorihiwe. Tiheeni, enahaala waaphacuwela yaale anakhooca otoroka mukhalelo aya nave anakhaviherya elapo yeela ophiyerya ekoi etokotoko? Yehova onnalaiherya waatolosavo veelaponi yavathi achu oothene oonanara murima. (Mwaalakhanye Salumu 37:10.) Olelo, ancipale annahuserya ovitha ichu soonanara anapakaaya, nave ikwaha ikina awo hanalakiwa. (Yobi 21:7, 9) Nyenya Piipiliya onnanuupuserya: “Ntakhara òsuwela itxhu sothene nnerahu nave onnòna metxelo ahu othene. Hiyavo epiphi enawerya wavitha amutakhali vamithoni va Muluku.” (Yobi 34:21, 22) Mwawiihiiha hiyaavo echu enavitheya vamiithoni va Yehova. Owo onnawerya woona ichu soothene achu oonanara murima anapakaaya. Amanle Armaketo, nnahaala owaavya nyenya hinni niwoone. Awo anahaala otoloxiwa okhala wookhala!—Salumu 37:12-15.

6. Taani anahaala okhala vaavaa achu oonanara murima eneeraaya etolosiwe, nave ntakhara heeni eyo eryaaya michaka saphaama?

⁶ Taani onahaala okhala achu oonanara  murima yatolosiwa? Yehova onnalaiherya: “Nyenya awitchachala tiniriaya yakhele elapo ya vathi; Nave enatheyano murechele wawacha.” Mu salmo mmohamoha, ninnaalakhanya: “Ekhaikhai tiniriaya yakhele elapo ya vathi, yikhalelaru mummo okhala wokhala.” (Salmo 37:11, 29, Nlakano Nahihano.) Taani ari “awitchachala” ni “ekhaikhai”? Awiichacala ari achu awiiyeviha yaawo anahuserya sa Yehova ni omwiiwelela. Eekhaikhai achu yaale anasiveliwa opaka yeeyo Muluku onaloceiye okhala yeeparipari. Mu elapo yeela, aakhalamo achu ancipale aneera soonanara opwaha achu eekhaikhai. Nyenya mu elapo yahiihaano eni ekhalemo pahiru achu awiichacala ni eekhaikhai, nave anahaala weeriha elapo okhala parataiso!

7. Marehereryo oowoka ananivolowela hai olelo?

⁷ Marehereryo oowoka ananivolowela hai olelo? Ichu sincipale soonanara ineereya mweelaponi olelo, hasinatannyiwa ni achu, nyenya moorweela wa marehereryo. Marehereryo a malapelo annaahuweliha macikhwi aachu. Ntoko yootakiherya, awo annootha vooloca sa Muluku taani, awo analoca wi Piipiliya hanaphwanela ororomeliwa, nave annaahuweliha achu vooloca sa muhoolo wa elapo ni achu. Alamuleli oonanara annavuwiha ikhoco, nthalu nave annawiiyera achu oohaawa ni yaale ahinawerya wiisaakiha. Alamuleli yaawo annakhala ooreela ni oowerya moorweela wa wooniherya nthalu naari weemererya makhwankwa. Marehereryo a nrima annapahula elapo ni mwiixi wawunkha, annatoloxa ichu sa veelaponi, nave annawiiyera achu wi ekhaleno muhakhu. Mweeparipari, marehereryo oowoka tanatannya ohooseya wawaaca onakhumelela mweelaponi olelo.

8. Piipiliya onaloca eheeni wa yeeyo enahaala weereya ni marehereryo anakhala wi toolipa wa achu ancipale olelo?

⁸ Tiheeni Yehova onahaaleiye opaka? Ekoi etokotoko enahaala opacerya vaavaa alamuleli oowerya eneeraaya epahule marehereryo a malapelo, yaawo Piipiliya onathariheiye ntoko muthiyana oocapaheya oniichaniwa Papulu Mutokotoko. (Wupulula 17:1, 2, 16; 18:1-4) Marehereryo yaala a malapelo anahaala otolosiwa moomalela. Nyenya tiheeni eni yeereye ni marehereryo oothene oowoka? Piipiliya onnaalikanyiha ni miyaako ni ivilivili nthowa nawi anakhala ntoko wi toolipa ni oohicikinyeya. (Mwaalakhanye Wupulula 6:14.) Nyenya eyo enooniherya wi alamuleli ni marehereryo oothene yaawo ahinakhaviherya Omwene wa Muluku anahaala otolosiwa. Eyo enahaala okhala makupa ookuchula a ekoi etokotoko. (Yeremiya 25:31-33) Yeereya yeeyo, heni ekhalevotho marehereryo oowoka!

9. Ntakhara heeni ninnaphwanela ororomela wi elapo yahiihaano enahaala okhala yooreheryeya?

⁹ Tiheeni eni eraceele marehereryo oowoka? Apwanne amanle Armaketo, veelaponi anahaala okhalavo marehereryo? Piipiliya oni: “Ntoko Muluku ororomelinheiye, ninnawehererya erimu esya ni elapo esya, oryayamo wokololowa.” (2 Pedro 3:13) Erimu ni elapo yakhalai, marehereryo oonanara ni achu yaawo analamulela. Imanle otolosiwa, sini siraceelihiwe ni eheeni? Sinahaala oraceelihiwa ni “erimu esya ni elapo esya.” Erimu evyaani enataphulela olamulelo muvyaani, Omwene onalamuleliwa  ni Yesu Kristu ni 144.000. Elapo evyaani enaahiwa achu eni elamuleliweke ni Omwene wa Muluku. Yesu ni yaale onahaaleiye olamulelano vamoha anahaala omutakiherya moomalela Yehova Muluku, yoowo ori Muluku oohaakanyeryeya. (1 Korinto 14:33) Mwawiihiiha “elapo esya” enahaala okhala yooreheryeya. Anahaala okhalavo alopwana aphaama wi ekhapeleleke ichu. (Salumu 45:17) Alopwana yaawo anahaala ohooleliwaka ni Kristu vamoha ni 144.000. Nkaanyiheryani elukuluku yeeyo marehereryo oothene oowoka eneeraaya eraceelihiwe ni marehereryo mamoharu awiiwanana yaawo eni ehiraceeliwe!

10. Saweera taani soonanara siri sawunlaana mu nipuro munakhalaanyuwo, nave sinoovolowelani hai vamoha ni emusi anyu?

¹⁰ Saweera soonanara sinanivolowela hai olelo? Nnakhala mu elapo esaren’ye ni ocapaheya, ohiroromeleya ni nlala. Mathatelo a elapo anneeriha ichu okhala sooreera iniiha inyemulaka malakiheryo a Yehova vooloca sa yaphaama ni yoonanara. (Isaiya 5:20) Xaxaxa asitiithi annaphwanela owaniha wi yaakhapelele anamwane aya orweela wa ovolowela yoola woonanara. Chiryene, Akristu oothene eeparipari anaphwanela wiilipiherya wi ekhapelele onthamwene aya ni Yehova mu elapo yeela ehinacicimiha malakiheryo a Muluku.

11. Tiheeni nnahuseryaahu orweela wa Yehova othoriha ipooma sa Sotoma ni Komora?

¹¹ Tiheeni Yehova onahaaleiye opaka ni saweera soonanara? Muthokororye yeeyo Yehova aapankeiye vooloca sa ichu soonanara seereya mu epooma yo Sotoma ni Komora. (Mwaalakhanye 2 Pedro 2:6-8.) Loti aari mulopwana eekhaikhai, nave yene ni emusi awe yaahihooxeya vatokovene nthowa na ichu soothene soonanara achu yaapakaaya. Yehova aahitolosa epooma yoothene yeele wi amalihe ichu soonanara seereya weiwo. Navetho aahitikitherya wi okhale “moneiho wa atxhu ònanara murima” a mahiku ahu. Hiiha ntoko Yehova aamalinheiye saweera soocapaheya khalai, olelotho owo onahaala omaliha vaavaa oneereiye atoloxe elapo yeela.

12. Saweera taani munaweheryaanyu elapo ela yakuchuwa?

¹² Saweera soonanara sinahaala oraceelihiwa ni eheeni? Mu elapo evyaani, nnahaala okhala ooweiwa ni saweera sincipale soohakalaliha. Ntoko yootakiherya, nnahaala weeriha wi elapo ekhale parataiso ni oteka ipa sahu ni sa oosiveliwa ahu. Nnahaalatho owaakhela macikhwi aachu eni eviihiwe mookhwani ni waahusiha vooloca sa Yehova ni soothene owo opankeiye ntakhara achu. (Isaiya 65:21, 22; Saweriwa T’arummwa 24:15) Mu elukuluku yeeyo, nnahaala okhala ooweiwa ni saweera sinahaala onihakalaliha ni omucicimiha Yehova!

13. Tiivi iri sookhumelela sa omwaryeya mu Eteni?

¹³ Meerelo oonanara ananivolowela hai olelo? Mu elapo esaren’ye achu oonanara murima, marehereryo oowoka ni saweera soonanara, ichu seiya sinneeriha okhalavo meerelo oonanara. Oothene ahu ninnavoloweliwa ni ichu ntoko ikhoco, ohaawa, nthalu, wiiceliwa ni okhwa. Meerelo yaala oonanara yaapacenrye vaavaa Satana, Atamu ni Eva yaammwarenlaaya Yehova. Nave oothene ahu noovoloweliwa ni omwaryeya waya.

14. Tiheeni Yehova onahaaleiye opaka ni meerelo oonanara?

 ¹⁴ Tiheeni Yehova onahaaleiye opaka ni meerelo oonanara? Muthokororye sootakiherya iha. Yehova oolaiherya omaliha ikhoco soothene. (Mwaalakhanye Salumu 46:10, 11.) Owo onahaala omaliha ireca. (Isaiya 33:24) Onahaala omaliha okhwa okhala wookhala. (Isaiya 25:8) Onahaala omaliha ohaawa. (Salumu 72:12-16) Nave Yehova onahaala oviihavo meerelo oothene oonanara yaawo aneeriha okumi okhala wootakhaliwa olelo. Ophiyerya wi onahaala omviihavo Satana ni masololo awe!—Éfeso 2:2.

15. Amanle Armaketo, ichu taani sini imalihiwe okhala wookhala?

¹⁵ Nkaanyiheryani okhala mu elapo ohirimo ikhoco, ireca ni okhwa! Heni ekhalemo anakhoco, akapuchi naari ikhoco soohicuwaleya. Hinni nchuneke mapuro eekumi, matotore, alipa murece, ipa sa miruchu naari mahiye. Honi okhalamo ohooxana, nave hinni naachuneke asuphai, alarme nave akhweya honi ochuneyeke ikateyatu naari ixaavi! Meerelo oothene yaala oonanara ananeeriha okhala awiiniwa murima, anahaala omalihiwa okhala wookhala.

16, 17. (1) Achu eni evuluwe mu Armaketo anahaala woona hai? Mphwanaphwanihe. (2) Nni nroromele hai wi nnahaala okhala vaavaa elapo ela yoonanara enamalaaya?

¹⁶ Okumi oni okhale hai meerelo oonanara yaviihiwavo? Hannawerya waanyiherya. Nootepa owanano meerelo oonanara mu elukuluku yincipale ophiyerya ohoona mukhalelo ananihooxaaya. Wi niphwanaphwanihe, achu yaawo anakhala waacamela aneemelavo akhompoiyu akhweya haniiwa onyakula waya. Nave achu anakhala waacamela nipuro onuukeliwavo ikokhola, hanoona wunkha. Nyenya, vaavaa Yehova oneereiye aviihevo meerelo oothene oonanara, onahaala okhalavo woopowa otokotoko!

¹⁷ Vanonto, ohooxeya woothene yoola nnoonaahu onahaala oraceelihiwa ni eheeni? Salumu 37:11 onnaloca: “Anamukhalano muretxele nave anampuha saphama sothene.” Echu yoohakararya osuwela wi ti yeeyo Yehova onachuneiye wa hiyo! Variyari va ilukuluku seiya soohooxa, mpake soothene munaweryaanyu wi mukhale vakhiviru va Yehova ni marehereryo awe. Ewehereryo anyu ya muhoolo ti yasisapo, mwawiihiiha muupuwelele mwawiiseela vooloca sa yeeyo, muroromele wi eyo eparipari wa nyuwaano, nave mwaaleele akina. (1 Timóteo 4:15, 16; 1 Pedro 3:15) Mmukhalelo yoola munahaala ororomela wi vaavaa elapo ela enaphiyaaya omakuchuwelo, munahaala okhalano ekumi ni ohakalala okhala wookhala!