1, 2. (a) Hadia zi fagölö nifalua ba gulidanö si lö sökhi hegöi ba niha nibe’e hukuma fa’amate? (Faigi gambara ba wamobörö wamaha’ö.) (b) Hadia nirasoi fefu zi so ba zorugo hegöi ba gulidanö na no tedudugö fefu zi lö sökhi si so ba gulidanö?

KHALAIGÖ zalua andre. So samösa niha si lö sökhi si no tebe’e hukuma fa’amate. Iada’a, la’ohe ia ira safi gurunga ba wanema’ö hukuma. Hewa’ae na auri ia nasa ba lö fökhö, hiza’i ba zi lö aratö mate ia.

² Ulidanö si lö sökhi ni’iagöda iada’a fagölö ia simane niha si lö sökhi nihuku mate. Imane Sura Ni’amoni’ö, ”Si taya nösi gulidanö.” (I Yohane 2:17) No ihalö gangetula Yehowa wa ifakiko gulidanö si lö sökhi andre, ba hasambalö alua da’ö. Hiza’i, so sambua gamaehuta gamozua götö danö faoma wamalua fanguhuku fa’amate ba niha si lö sökhi. So ösa zanguma’ö wa lö atulö lala wanguhuku niha si lö sökhi andrö ba so göi zi lö manema’ö, ba latötöna wa lö labe’e khönia hukuma fa’amate. Hiza’i, Yehowa andre sanguhuku so’ahonoa, ba atulö gangetula nihalönia ba wangohori si lö sökhi salua ba gulidanö andre. (V Moze 32:4)  Lö tetaha wamaluania da’ö. Na no tedudugö wamatörö gulidanö andre, fefu zi so ba zorugo hegöi ba gulidanö fao dödöra ba wanguma’ö wa sindruhu wanguhuku moroi khö Yehowa. No fangefa sebua da’a!

3. Hadia manö zi öfa ngawalö gabula dödö si taya na no tohare Mbanua Lowalangi?

³ Hadia manö zi tefarahu ba ’nösi gulidanö si taya’? Fefu hadia zi lö sökhi nirasoida ba wa’auri si ero ma’ökhö. Lö aratö tehori da’ö fefu. Da’a sindruhu-ndruhu ’turia somuso dödö sanandrösa ba Mbanua Lowalangi’. (Matai’o 24:14) Ba wamaha’ö da’a, tatutunö öfa ngawalö gabula dödö si taya na no tohare Mbanua Lowalangi: niha si lö sökhi, organisasi si lö sökhi, halöwö si fasala, ba abula dödö salua. Moroi ba da’ö dania tafaha’ö ita (1) hewisa wa molua-lua ia khöda iada’a, (2) hadia nifalua Yehowa khöra, ba (3) hadia ibe’e wangalira.

4. Hadia lua-lua nifalua niha si lö sökhi khöda iada’a?

⁴ Hewisa wa molua-lua hadia nifalua niha si lö sökhi khöda iada’a? Imane sinenge sotöi Faulo wa ”so dania mbaŵa si lö sökhi” ba ginötö safuria. Aefa da’ö imane, ”Niha si lö sökhi, samowöhö niha bö’ö, ba tedou-dou manö walösökhi.” (II Timoteo 3:1-5, 13) Hadia no alua khöu da’ö? Ato moroi ba gotaluada zanaögö famakao börö nifalua niha si lö sökhi, simane fo’uduni soi bö’ö, amuta si lö sökhi, ba famakao-makaora niha. So ösa moroi ba gotaluara zi lö mamini’ö amuata si lö sökhi nifaluara. So zombali’ö ya’ia sanolo niha hiza’i sindruhunia ya’ira andre niha si lö sökhi. Hewa’ae lö lafalua khöda zi lö sökhi, hiza’i hasambalö tarasoi lua-lua moroi ba nifalua niha si lö sökhi. Afökhö dödöda na tarongo sanandrösa ba lala nifaluara ba wamakao iraono, niha si no atua, hegöi niha si lö fa’abölö. Nifaluara andre hulö nifalua gurifö mazui bekhu. (Yakobo 3:15) Hiza’i, omuso dödöda börö dötönafö nibe’e Daromali Yehowa khöda.

5. (a) Hadia ginötö ni’okhögö niha si lö sökhi? (b) Hadia zalua ba niha si lö mamalalini era-era?

⁵ Hadia nifalua Yehowa? Iada’a, ibe’e Yehowa ginötö ba niha si lö sökhi ba wamalalini era-era. (Yesaya 55:7) Hewa’ae ba zi lö aratö tedudugö gulidanö si lö sökhi andre, hiza’i lö nihalö gangetula hadia tehuku ira mazui lö’ö. Hadia zalua ba niha si lö mamalalini era-era hegöi ba niha sanuhini famatörö gulidanö andre irugi wa’atohare wamakao sabölö-bölö? No ifabu’u Yehowa wa ihori fefu niha si lö sökhi ba gulidanö. (Baso Zinunö 37:10.) Iada’a, ato niha samomaha ya’ira ba wombini’ö amuata si lö sökhi nifaluara, ba sasesenia lö lahuku ira. (Yobi 21:7, 9) Hiza’i, ifangelama ita Sura Ni’amoni’ö, ”Anehe sa ia lala zamösana, fefu mbekania, ba i’ila. Lö si bongi ba lö sogömi-gömi sibai, ba nibini’ö zamazökhi si lö sökhi ya’ira ena’ö.” (Yobi 34:21, 22) Andrö wa lö tobini da’ö föna Yehowa. Tola i’ila fefu hadia ia nifalua niha si lö sökhi. Na no aefa Hamagedo, tola tafaigi hezoso nahiara hiza’i lö hadöi ya’ira sa’ae. No tehori ira sagötö fa’ara!—Zinunö 37:12-15.

6. Haniha zi toröi na no tehori niha si lö sökhi, ba hana wa no turia si sökhi da’a?

⁶ Haniha zi toröi na no tehori niha  si lö sökhi? No ifabu’u Yehowa: ”Ba sebolo tödö andrö zokhö tanö dania, ba owua-wua dödöra ba wa’afahöna wangorifi.” Aefa da’ö, tabaso göi ba zinunö da’ö, ”Satulö tödö zokhö tanö dania, ya’ira zowanua ba danö, si lö mamalö-malö.” (Zinunö 37:11, 29) Haniha ’zebolo tödö’ ba ”satulö tödö”? Sebolo tödö ya’ia da’ö niha si so fangide-ngide’ö ba wamaha’ö ya’ia hegöi solo’ö khö Yehowa. Satulö tödö ya’ia da’ö niha somasi mamalua hadia zatulö niwa’ö Lowalangi. Ba gulidanö iada’a, ato niha si lö sökhi moroi ba niha satulö tödö. Hiza’i, ba gulidanö si bohou, ha niha sebolo tödö ba satulö tödö zi so ba da’ö, ba labali’ö faradaiso gulidanö andre!

7. Hewisa wa molua-lua hadia nifalua organisasi si lö sökhi khöda iada’a?

⁷ Hewisa wa molua-lua hadia nifalua organisasi si lö sökhi khöda iada’a? Oya zi lö sökhi salua ba gulidanö andre, tenga ha börö nifalua zi samösa niha, hiza’i börö zi sambua organisasi. Zuta niha fa’ato nilimo organisasi agama. Duma-dumania, falimo ira sanandrösa khö Lowalangi, lawa’ö wa tebai tafaduhusi tödö Zura Ni’amoni’ö, ba lalimo niha sanandrösa ba dötönafö ba zi so miföna ba gulidanö hegöi ba niha. Famatörö si lö sökhi fao dödöra ba wasuwöta, fo’uduni soi bö’ö, ba lafakao niha si numana hegöi niha si tosasa. Tola kayo ba aro wamatörö ndra samatörö na so khöra wamaigi bawa mazui na latema zölö-sölö. Lata’unöisi zi fasuida ira perusahaan, lafakiko gumbu wangalui ba gulidanö, ba lahalö harera ba niha bö’ö irege tola kayo ira. Ba da’a oroma wa organisasi si lö sökhi andre zonorögö tödö fefu abula dödö ba gulidanö iada’a.

8. Hadia niwa’ö Zura Ni’amoni’ö salua ba organisasi sabölö ba wamaigi niha sato iada’a?

⁸ Hadia nifalua Yehowa? Tebörögö wamakao sabölö-bölö na lahori fefu organisasi agama faya ira samatörö ulidanö, si no i’amaedolagö Sura Ni’amoni’ö simane ira alawe sohorö-horö töinia Mbabilona Sebua. (Fama’ele’ö 17:1, 2, 16; 18:1-4) Sindruhu-ndruhu wa tedudugö fefu organisasi agama. Hiza’i, hadia zalua ba organisasi si lö sökhi tano bö’ö? I’amaedolagö ira Sura Ni’amoni’ö simane hili ba hulo, börö me hulö zabölö ira ba saro. (Baso Fama’ele’ö 6:14.) Aefa da’ö, famatörö hegöi fefu organisasi si lö manuhini Mbanua Lowalangi hasambalö tedudugö. Da’a gamozua moroi ba wamakao sabölö-bölö. (Yeremia 25:31-33) Na no aefa da’ö fefu, lö hadöi sa’ae organisasi si lö sökhi!

9. Hana wa tola faduhu dödöda wa tola toföfö wamatörö tanö si bohou?

⁹ Hadia zamalalini organisasi si lö sökhi? Na no aefa Hamagedo, hadia so organisasi ba gulidanö? Imane Sura Ni’amoni’ö, ”Tadöna-döna mbanua si yawa, si bohou, ba tanö si bohou, dali gamabu’ula linia andrö, ba zahono fa’atulö dödö.” (II Fetero 3:13) Mbanua si yawa hegöi ulidanö satua ya’ia da’ö famatörö si lö sökhi hegöi niha samatörö ya’ia. Na no aefa tehori ira, hadia wangalira? ”Mbanua si yawa, si bohou, ba tanö si bohou.” Banua si yawa si bohou eluahania sambua famatörö si bohou,  Mbanua Lowalangi nifatörö Yesu Keriso hegöi si 144.000 si fao khönia ba wamatorö. Ulidanö si bohou eluahania niha si so barö wamatörö Mbanua Lowalangi. Yesu hegöi niha si fao khönia ba wamatorö, sindruhu-ndruhu la’o’ö Lowalangi Yehowa, Lowalangi si toföfö. (I Korindro 14:33) Andrö wa toföfö wamatörö ”tanö si bohou”. So niha si sökhi sangehaogö da’a. (Zinunö 45:17) Latema wanuturu lala moroi khö Keriso hegöi si 144.000. Khalaigö hewisa na fefu organisasi si lö sökhi andre tefalalini ia tobali sambua organisasi saro si lö irai mamalua si lö sökhi!

10. Hadia manö halöwö si fasala si no asese alua ba zi toröi ya’ugö, ba hewisa wa molua-lua ia ba wa’aurimö hegöi ba nösi nomomö?

¹⁰ Hewisa wa molua-lua khöda iada’a halöwö si fasala? Toröi ita ba gulidanö samalua amuata fohorö, falimosa, hegöi fa’afaito si lö sökhi si no to’ölö alua. Goi-goi Yehowa sanandrösa ba zatulö hegöi si sala, labali’ö fama’iki mazui hiburan ba gulidanö iada’a. (Yesaya 5:20) Moguna laforege ira satua ba wolumö’ö iraonora ba gisö-isö dödö si lö sökhi. Sindruhunia, fefu niha Keriso sindruhu laforege ba wolumö’ö fahuwusara khö Yehowa ba gulidanö si lö mo’ame’egö tödö goi-goi Lowalangi andre.

11. Hadia wamaha’ö si tola tahalö moroi ba lala wanguhuku Yehowa Zodoma hegöi Gomora?

¹¹ Hadia nifalua Yehowa sanandrösa ba halöwö si fasala? Angeraigö hadia nifalua Yehowa sanandrösa ba zi lö sökhi salua ba mbanua Zodoma hegöi Gomora. (Baso II Fetero 2:6-8.) Loti, samösa niha satulö tödö. Ya’ia hegöi ösi nomonia tefakao sibai wa’aurira börö me ato niha samalua si lö sökhi ba zi fasuira. Idudugö mbanua da’ö Yehowa ba wangasiwaisi si lö sökhi salua ba da’ö. Hiza’i, ”ibe’e famaedo” da’ö ba niha si lö sökhi iada’a. Simane me ihori fefu zi lö sökhi Yehowa ba götö da’ö, hasambalö ifalua zimane da’ö ba ginötö ihori fefu zalua ba gulidanö andre.

12. Hadia halöwö somasi öfalua na no aefa tehori fefu zalua ba gulidanö andre?

¹² Hadia zamalalini halöwö si fasala andre? Ba gulidanö si bohou, oya halöwö nifaluada si tola mangomusoi’ö tödöda. Duma-dumania, tabali’ö faradaiso gulidanö andre ba tahaogö nomoda samösa hegöi niha ni’omasi’öda. Tola tafalukhaisi zuta niha fa’ato si no tesusugi ba tafaha’ö ira sanandrösa khö Yehowa ba fefu hadia ia nifaluania ba niha. (Yesaya 65:21, 22; Halöwö Zinenge 24:15) Ba ginötö da’ö, oya halöwö nifaluada si tola möi fangomusoi’ö dödöda ba famolakhömi Yehowa!

13. Hadia lua-lua wamadaö ba kabu Edena?

¹³ Hewisa wa molua-lua khöda gabula dödö salua andre iada’a? Ulidanö andre afönu niha si lö sökhi, organisasi si lö sökhi, hegöi halöwö si fasala sanga’asogö lua-lua si lö sökhi ba wa’aurida. Fefu ita tarasoi lua-lua moroi ba wasuwöta, fa’anumana, fo’uduni soi bö’ö, fökhö, ba fa’amate. Fefu zi lö sökhi andre tebörötaigö ia börö wamadaö nifalua Zatana, Adamo, ba Khawa khö Yehowa. Ba fefu ita tarasoi lua-lua moroi ba wamadaöra.

14. Hadia nifalua Yehowa ba gabula dödö salua andre?

 ¹⁴ Hadia nifalua Yehowa ba gabula dödö salua andre? Angeraigö duma-duma da’a. No ifabu’u Yehowa wa ihori fefu wasuwöta. (Baso Zinunö 46:9, 10.) Iheta fefu wökhö. (Yesaya 33:24) Iheta wa’amate sagötö fa’ara. (Yesaya 25:8) Iheta wa’anumana. (Zinunö 72:12-16) Ihori fefu gabula dödö Yehowa sanga’asogö abula dödö ba wa’aurida iada’a. Ihori fefu gisö-isö dödö moroi khö Zatana hegöi bekhu si fao khönia!—Efeso 2:2.

15. Hadia manö zi taya sagötö fa’ara na no tohare Hamagedo?

¹⁵ Khalaigö hewisa wa’aurida na toröi ita ba gulidanö si lö hadöi fasuwöta, fökhö mazui fa’amate! Lö hadöi sa’ae saradadu, fakake wasuwöta, ruma saki, doto, matiri, mazui lewatö. Lö hadöi fa’alösökhi ba da’ö, ba lö moguna folisi, alarm keamanan mazui lö tafake mbuarate mazui onokusi! Fefu ngawalö zi lö sökhi sanga’asogö abula dödö, no ahori taya sagötö fa’ara.

16, 17. (a) Hewisa dödö niha sauri na no aefa Hamagedo? Be’e duma-duma. (b) Hewisa wa tola faduhu dödöda wa tola auri ita na no aefa tehori gulidanö satua andre?

¹⁶ Hewisa wa’auri nirasoida na no tehori fefu ngawalö zi lö sökhi? Abua wokhalaigö ya’ia. No ara toröi ita ba nahia si so abula dödö irege lö ta’ila ta’erai hawa’oya gabula dödö nirasoida ba ngawalö nifaluara. Si tobali duma-duma, niha si toröi ba zinga lala sebua, te lö sa’ae irasoi hewisa wa’aföli salua ba da’ö. Niha si toröi sahatö ba nahia wanibo’ö zasao te lö sa’ae taraso khöra wa’aböu. Hiza’i, na ihori fefu gabula dödö Yehowa, da’a sambua fangefa sebua!

¹⁷ Hadia zi tobali fangali moroi ba gabula dödö nirasoida iada’a? Imane Zinunö 37:11, ”Owua-wua dödöra ba wa’afahöna wangorifi.” Omuso sibai dödöda me ta’ila wa da’a zomasi Yehowa khöda! Ba ginötö so gabula dödö, falua hadia manö zi tola mangahatö’ö ndra’ugö khö Yehowa hegöi ba organisasinia. Sökhi sibai dötönafö si tola ö’okhögö ba zi so miföna, andrö wa moguna öhaogö ö’angerönusi ia, falua ena’ö sindruhu-ndruhu alua ia khöu, ba tutunö ba niha bö’ö. (I Timoteo 4:15, 16; I Fetero 3:15) Da’a zi tola manolo ya’ugö ena’ö tola faduhu dödömö wa lö aratö tedudugö fefu hadia zalua ba gulidanö andre, ba tola auri ndra’ugö ba owua-wua dödömö sagötö fa’ara!