1, 2. (a) Nihokáaʼgi doo tsʼíí áhootʼéii dóó hastiin doo tsʼíí ádzaa yę́ę haitʼéego aheełtʼé? (Áłtsé naashchʼąąʼígíí níníłʼı̨́.) (b) Nihokáaʼgi doo tsʼíí áhootʼé yę́ę íisdįįdgo, yáʼąąshdi dóó nihookáaʼgi haʼátʼíí dajiníi doo?

DÍÍ áhoonííł jiní. Hastiin léiʼ doo tsʼíí ádzaaígíí biniinaa bidiʼyoolyéełgo bá nahootʼą́. Siláo éí díí hastiin bidiʼyoolyééłgóó yił yikah. Áko tʼóó doo ájítʼéhí da nahojílin, ákondi kʼad éí hodiʼniilyı̨́.

² Nihokáaʼgi doo tsʼíí áhootʼéii, éí hastiin doo tsʼíí ádzaa yę́ę nahalingo ałdóʼ ádooldįįłgo bá nahootʼą́. Diyin Bizaad ání: “Nihokáaʼgi dahólóonii . . . bił yóóʼahodoogááł.” (1 John 2:17) Áko díí kʼad hoogáłígíí éí tʼáadoo hodinaʼí ndootʼihgo Jiihóvah yee nihoníʼą́. Ndi díí hoogáłígíí ndootʼihgi dóó hastiin doo tsʼíí ádzaa yę́ę diyoolyéełgo bá nihootʼánę́ę, éí łáaʼgo bee ałʼąą átʼé. Díí hastiin doo bidiʼyoolyéeł da danízingo łaʼ éí doo ákótʼéégóó bá nahootʼą́ dadidooniiłgo átʼé. Jiihóvah éí ánihwiiʼaahii tʼáá ákóneʼ átʼéii nilı̨́. Áko díí hoogáłígíí niidoołtʼihgi éí tsʼídá tʼáá ákogi átʼéiigi ázhdooníiłgo bee há hazʼą́. (Deuteronomy 32:4) Éí íidoołdįįłgi doo yaa naʼáhodilziid da doo. Díí  hoogáłígíí ałtso íisdįįdgo yáʼąąshdi dóó nihookáaʼgi Jiihóvah bee nihozhníʼánę́ę tʼáá ałtso tʼáá ákogi ájiidzaa dahóʼníi doo. Kʼad lá índa hodidooʼniił!

³ “Nihokáaʼgi dahólóonii” haʼátʼíísh ałdóʼ “bił yóóʼahodoogááł”? Dííshjı̨́įdi tʼáá ałtso doo yáʼádaashónígíí bił yóóltąʼ. Áko hodíínááʼígo éí ałtso ábiʼniildįįd. Díí God biNahatʼaʼ baa “haneʼ yáʼátʼéehii” atah bił bóóltąʼii átʼé. (Matthew 24:14) Dı̨́įʼgo God biNahatʼaʼ íidoołdįįłígíí éí kʼad baa nídadíitʼįįł: diné doo tsʼíí ádaatʼínígíí, inaʼadloʼgo bił nidahazʼánígíí, bąąhági áhátʼı̨́, dóó bikʼee tidaʼhwiiʼníhígíí ałdóʼ. Éí bitsʼą́ą́dóó díí bídahodiilʼááł (1) haitʼéego nihidaʼdiiłʼáhígíí, (2)  éí Jiihóvah haa yidoolííł, dóó (3) haʼátʼíí bitsáskʼeh góneʼ ninéiidooʼnił.

4. Diné doo tsʼíí ádaatʼínígíí haitʼéego nihichʼįʼ nidahwiiłná?

⁴ Diné doo tsʼíí ádaatʼínígíí haitʼéego nihichʼįʼ nidahwiiłná? Yilʼaadii Paul ání: “nihoogháahjįʼ yoołkáałgo yéego achʼįʼ nahwiiʼnáa doo.” Áádóó: “diné doo yáʼádaashóonii índa yóóʼadaʼniiʼáahii bindaʼadloʼgo . . . tʼóó yówehda bąąhági ádaaníił dooleeł.” (2 Timothy 3:1-5, 13) Łahdaásh diné doo yáʼádaashóonii, ayóo ídaʼatsʼihii, ałʼąą dadineʼé joodlá, dóó tʼáá íiyisíí doo tsʼíí ádaatʼįįłii bikʼee tiʼhosíníniiʼ? Łaʼ éí doo nideiniłʼingóó, doo yáʼáshóonii yaa deiyíkááh. Łaʼ éí diné yíká anídaajahgo ádahodilʼı̨́į ndi, éí doo tsʼíí ádaatʼéii da. Tʼáá nihí siidzínígi doo shı̨́ı̨́ atínihiʼdiilyaa da ndi, doo yáʼáshóonii tʼahdii bikʼee tidaʼhwiiʼnííh. Áłchíní, hadaastihígíí, dóó diné hojoobaʼ ádeinízinígíí atídaalʼı̨́įgo éí nihijéí yéigo biʼdiiłʼáa łeh. Díí diné ákódaatʼéhígíí naaldlooshii báádahadzidígíí, doodaiiʼ demons nahalingo ádaʼdilʼı̨́. (James 3:15) Ákótʼéii ndi, Jiihóvah Bizaad binahjįʼ nihił chodahooʼínígíí baa nihił dahózhǫ́.

5. (a) Doo tsʼíí ádaatʼįįłii haʼátʼíí tʼahdii bá bidahónéedzą́? (b) Doo łah átʼéego nitsíńdadikeesígíishąʼ haa dadoonííł?

⁵ Jiihóvah haash doonííł? Jiihóvah éí kʼad diné doo tsʼíí ádaatʼínígíí łahgo tsíńdadidookosgo yá ąą áyósin. (Isaiah 55:7) Díí hoolzhishígíí kʼadę́ę niitʼééh, ndi tʼahdoo ałtso bee nihodiyiitʼaah da. Áko ayóó átʼéego achʼįʼ nahwiiʼná ayííłką́ąjįʼ, éí doo łah átʼéégóó nitsíńdadeezkéezgo, haashąʼ dadoonííł? Jiihóvah éí doo yáʼádaashóonii nahjįʼ kwíidoolíiłgo yee ádee haadzííʼ. (Psalm 37:10 yíníłtaʼ.) Dííshjı̨́įdi, doo yáʼádaashxǫ́ǫ́góó ádaaníiłii éí nideiniłʼin, ndi doo haitʼéego yá nidaatłizh da. (Job 21:7, 9) Diyin Bizaad ání: “Diné ádajítʼéii haisííd, índa dajíkááhgóó tʼáá ałtso yiníłʼı̨́. Chahałheeł índa anoonééł bichahaʼoh biiʼ diné doo ákwii ádajooníiłii tʼáá hó nídazhdidootʼı̨́įłgi tʼáá há ádin.” (Job 34:21, 22) Áko Jiihóvah éí doo bitsʼąą níʼdítʼįįh átʼéii da. Doo tsʼíí ádajooníłígíí éí tʼáá ałtso yooʼı̨́. Armagédan bikéédóó éí diné kééhatʼı̨́ı̨́ ńtʼééʼ yę́ęgi hádadíníitʼı̨́įʼ ndi, éí hoolʼáágóó ádaadin doo.—Psalm 37:12-15.

6. Doo tsʼíí ádaaníiłii ádaadingo háísh tʼéiyá doodzih, éí haitʼéego haneʼ yáʼátʼéehii átʼé?

 ⁶ Doo tsʼíí ádaaníiłii ádaadingo háísh tʼéiyá doodzih? Jiihóvah ání: “Aʼohgo ádaatʼéii nahasdzáán daabííʼ dooleeł, áádóó tʼáá ałtsoní bee hashtʼehodítʼé baa bił nidahoozhǫǫh doo.” Áádóó ałdóʼ: “Tʼáá ákogi ádaaníiłii hoolʼáágóó kéyah bííʼ dadooleeł, áádóó ákwii hoolʼáágóó kéédahatʼı̨́į doo.” (Psalm 37:11, 29) Háísh éí “aʼohgo ádaatʼéii” dóó “tʼáá ákogi ádaaníiłii” ádaatʼı̨́? Éí Jiihóvah ánínígíí ayóóʼádayóʼníigo yitsʼą́ą́dóó ídahoołʼaahgo yikʼeh dahółʼı̨́. Dííshjı̨́įdi doo tsʼíí ádaaníiłii éí diné tʼáá ákogi ádaaníiłii yilááh ánéelą́ą́ʼ. Ndi, aʼohgo ádaatʼéii dóó tʼáá ákogi ádaaníiłii tʼéiyá nahasdzáán ayóo áhonóolingo ádeidoolííł!

7. Dííshjı̨́įdi inaʼadloʼgo bił nidahazʼánígíí haitʼéego bikʼee tidaʼhwiiʼnííh?

⁷ Inaʼadloʼgo bił nidahazʼánígíí haitʼéego bikʼee tidaʼhwiiʼnííh? Agháʼánéelą́ąʼgo doo tsʼíí ádaatʼéii éí inaʼadloʼgo bił nidahazʼánígíí íiyisíí bitsʼą́ą́dę́ę́ʼ yitʼih. Oodląʼ ałʼąą ádaatʼéii dah deiyíkáhígíí éí ląʼí mííl ánéelą́ąʼgo diné yindaʼaloʼ. Éí háí God átʼínígíí, nahasdzáán dóó bílaʼashdlaʼii náásgóó bá ahóótʼiʼígíí yaa dabiyoochʼííd. Áádóó Diyin Bizaad tʼáadoo baa daʼíínóhłíhí daaní. Nahatʼaʼ bindaʼadloʼígíí éí anaaʼ, ałʼąą dadineʼé doo tsʼíí ádayoolíłígíí dóó baa dahajoobáaʼii atídeiłʼínígíí tʼóó náás dayółtʼééh. Éí łaʼ diné alą́ąjįʼ nideinilgo binahjįʼ ayóó daʼatʼı̨́ dóó ayóó ádaatʼé daaleʼ. Corporations béeso yichą́ʼídadéelniʼígíí nahasdzáán nidayiiłchxǫǫh, dóó łaʼ diné chodayoołʼı̨́įgo yitsʼą́ą́dóó daʼatʼı̨́ daaleʼ. Inaʼadloʼgo bił nidahazʼánígíí, éí bitsʼą́ą́dóó dííshjı̨́įdi tidaʼhwiiʼnííh.

8. Inaʼadloʼgo bił nidahazʼánígíí daniłdzil nidahalinígíishąʼ, Diyin Bizaad éí haa dadoonííł ní?

⁸ Jiihóvah éí haa doonííł? Ayóó átʼéego achʼįʼ nahwiiʼná éí díí bee hahodoolzhish. Doo tʼáá aaníígóó oodląʼ dah deiyíkáhígíí éí Bábilan Ayóó Átʼéii ałjiłnii nilínígíí, éí aláahgo naatʼáanii danilíinii hachʼįʼ nídadidoobah. (Revelation 17:1, 2, 16; 18:1-4) Doo tʼáá aaníígóó oodląʼ dah deiyíkáhígíí éí tʼáá ałtso ádooldįįł. Ndi, náánáłaʼ inaʼadloʼgo bił nidahazʼánígíishąʼ haa dadoonííł? Diyin Bizaad ání, éí dził dóó kéyah táyiʼgóó naaznilii tʼóó dabidziil nidahalin. (Revelation 6:14 yíníłtaʼ.) Ayóó átʼéego achʼįʼ nahwiiʼnánígíí éí díí bee nihodoolzhish. Éí diné binahatʼaʼ dóó tʼáá ałtso bił nidahazʼáanii God biNahatʼaʼ doo deinízinígíí ádabiʼdidooldįįł. (Jeremiah 25:31-33) Áadi índa inaʼadloʼgo bił nidahazʼánígíí doo nááhódlǫ́ǫ da doo!

9. Nahasdzáán ániidíii éí hazhóʼó hashtʼehodítʼée dooleełígíí, haash yitʼéego nihił bééhózin?

⁹ Inaʼadloʼgo bił nidahazʼánígíí haʼátʼíishąʼ bitsáskʼeh góneʼ nidootʼááł? Armagédan bikéédóó, nihookáaʼgi haa hootʼée doo? Diyin Bizaad ání: “God yee nihoníʼáanii bikʼehgo yótʼááh hiníláii ániidíii áádóó nahasdzáán ániidíii bíká dadíníitʼı̨́ı̨́ʼ, éí bikááʼ tʼáá ałtsogóó tsʼídá tʼáá ákogi éʼétʼé hólǫ́ǫ dooleeł.” (2 Peter 3:13) Yótʼááh hiníláii dóó nahasdzáán átséédą́ą́ʼ yę́ę, éí nahatʼaʼ bindaʼadloʼígíí dóó diné éí yikʼi bídahólníhígíí  átʼé. Éí bił yóóʼahóóyáago haʼátʼíishąʼ bitsáskʼeh góneʼ nidootʼááł? “Yótʼááh hiníláii ániidíii.” Yótʼááh hiníláii ániidíii éí nahatʼaʼ ániidígíí átʼé, éí Jesus dóó 144,000 yikʼi dahwéeʼaah doo. “Nahasdzáán ániidíii” éí diné, God binahatʼaʼ bikʼi hooʼáał dooígíí áhyiłní. Jiihóvah God bił hashtʼehodítʼéego bił yáʼátʼééh, éí Jesus dóó bił dahooʼaahígíí tʼáá ákótʼéego yeʼełʼı̨́į doo. (1 Corinthians 14:33) Áko “nahasdzáán ániidíii” éí hashtʼehodítʼée doo. Hastóí dahóyánígíí éí yaa ádahalyą́ą doo. (Psalm 45:16) Christ dóó 144,000 éí díí hastóí dayéeʼéesh doo. Díí baa nitsíníkees: inaʼadloʼgo bił nidahazʼánígíí éí łáaʼgo hootʼáłígíí bitsáskʼeh góneʼ nidootʼááł, éí inaʼadloʼ bąąh ádin doo!

10. Kééhonítʼı̨́įgi bąąhági áhátʼı̨́ haitʼéhígíí hólǫ́, dóó nighan hazʼą́ągi haitʼéego bikʼee tidaʼhohnííh?

¹⁰ Bąąhági áhátʼı̨́ haitʼéego bikʼee tidaʼhwiiʼnííh? Kéédahwiitʼínígi naʼageh bee tsiʼnaʼadá, inaʼadloʼ dóó doo tsʼíí bee atídaʼjiłʼı̨́. Áko nihokááʼgóó honeeni yę́ę éí ákódaatʼéhígíí béédaʼjiłʼı̨́įgo, Jiihóvah bibee hazʼáanii yę́ę tʼóó bá nidahojiłtʼiʼ. (Isaiah 5:20) Amá dóó azhéʼé, baʼáłchíní éí bąąhígi ádaatʼée, wołíbee yitsʼąą ádaa ádahalyą́ą doo. Dííshjı̨́įdi diné łaʼ Jiihóvah bibee hazʼáanii doo bił danílı̨́į da, áko Oodlání danilíinii éí Jiihóvah yił kʼé daʼahidiʼníigi yéigo yaa ádahalyą́ą doo.

11. Jiihóvah éí Sádam dóó Gomárah yá nihoníʼą́ągo íísdįįd yę́ę, haʼátʼíísh bitsʼą́ą́dóó ídahwiilʼą́ą́ʼ?

¹¹ Bąąhági áhátʼínígíishąʼ Jiihóvah haa yidoolííł? Sádam dóó Gomárah kin haalʼáagi bąąhági ádajíítʼįįdígíí, éí Jiihóvah haa hoolaa yę́ę baa nitsíníkees. (2 Peter 2:6-8 yíníłtaʼ.) Lat éí diné tʼáá ákogi átʼéii jílı̨́, ákondi bí dóó bighan hazʼą́ągi yéigo tiʼdahojoozniiʼ. Éí diné doo yáʼádaashóonii bitahgi kéédahojitʼı̨́ı̨́ ńtʼéʼígíí biniinaa. Jiihóvah éí ákweʼégi bąąhági ádaaníiłgo kéédahatʼínígíí ałtso íísdįįd. Áko dííshjı̨́įdi nihił hoogáłígíí biiʼ, diné bąąhági ádaaníiłii éí tʼáá ákótʼéego ánáánéidoołdįįł.

12. Náasdi yáʼádaatʼéehii ádíílííł nínízinígíí, háiidígíí lá bíká díníʼı̨́ı̨́ʼ?

¹² Bąąhági áhátʼı̨́, haʼátʼíí bitsáskʼeh góneʼ nidootʼááł? Nahasdzáán ániidíii bikáaʼgi éí yáʼádaatʼéhígíí tʼéiyá ádeilʼı̨́į doo. Éí ayóó áhonóolingo ádadiilnííł, áádóó nihí dóó ayóóʼádeiyíníiʼnínígíí bighan bá ádadiilnííł. Ląʼí diné náábidiʼdooljah, éí Jiihóvah áádóó bílaʼashdlaʼii yá áátʼįįdígíí bee nidabidíníitįįł. (Isaiah 65:21, 22; Acts 24:15) Áadi éí nihił dahózhǫ́ǫgo yáʼádaatʼéehii ádeilʼı̨́į doo, áádóó Jiihóvah baa dahwiiʼniih doo!

13. Íídendi áhóótʼįįd yę́ęshąʼ, haʼátʼíí bitsʼą́ą́dę́ę́ʼ háátʼiʼ?

¹³ Bikʼee tidaʼhwiiʼníhígíí, haitʼéego nihidaʼdiiłʼá? Diné doo tsʼíí ádaatʼínígíí, inaʼadloʼgo bił nidahazʼánígíí, bąąhági áhátʼı̨́, biniinaa doo yáʼáhooshǫ́ǫ da. Anaaʼ, téʼéʼı̨́, ałʼąą dadineʼé joodlá, ąąh nidahoyiiʼaah dóó anoonééł biniinaa nihichʼįʼ nidahwiiʼná. Séítan, Ádam dóó Íiv éí Jiihóvah yichʼįʼ nidaasteeʼ, éí biniinaa doo yáʼáshǫ́ǫ́góó  ooldah. Áko éí biniinaa bikʼee tidaʼhwiiʼnííh.

14. Doo yáʼáshǫ́ǫ́góó ooldahígíishąʼ Jiihóvah haa yidoolííł?

¹⁴ Bikʼee tidaʼhwiiʼníhígíishąʼ, Jiihóvah haa yidoolííł? Jiihóvah éí anaaʼ ałtso íidoołdįįłgo yee ádee haadzííʼ. (Psalm 46:8, 9 yíníłtaʼ.) Ąąh dahayooʼaał ałdóʼ íidoołdįįł. (Isaiah 33:24) Áádóó hoolʼáágóó anoonééł iidoołnah. (Isaiah 25:8) Téʼéʼı̨́ niidoołtʼih. (Psalm 72:12-16) Jiihóvah éí doo yáʼáshǫ́ǫ́góó ooldahígíí ałtso nahjįʼ kwíidoolííł. Áádóó Séítan dóó demons bitsʼą́ą́dę́ę́ʼ bąąhígi ádaatʼée, Jiihóvah éí ałdóʼ íidoołdįįł!—Ephesians 2:2.

15. Armagédan bikéédóó haʼátʼíishąʼ hoolʼáágóó ádaadin doo?

¹⁵ Anaaʼ, ąąh dahazʼą́, dóó anoonééł ádaadingo baa nitsíníkees! Siláo, bee nidaʼabaahii, doodaiiʼ anaaʼ bee béédahaniih yę́ę ádaadin doo. Azeeʼálʼíní bá hooghan, azeeʼííłʼínígíí, diné daneeznáanii neheʼníłígi dóó jishchááʼ ádaadin doo. Doo tsʼíí áhátʼı̨́ ádin doo. Siláo áádóó bee aańdítı̨́hí doo chodeilʼı̨́į da doo! Doo yáʼáshǫ́ǫ́góó ooldahígíí hoolʼáágóó ádaadin doo.

16, 17. (a) Armagédan bikéédóó daadzíʼígíí, haitʼéego yaa nitsídaakees doo? Łaʼ baa chʼíhoníʼaah. (b) Díí hoogáłígíí bił nihoolzhíísh, áko tʼáá kʼad haa yiitʼı̨́įgo tʼéiyá yisdá diidááł?

¹⁶ Doo yáʼáshǫ́ǫ́góó ooldahígíí ninítʼiʼgo, haash hootʼée doo? Jó, éí bídaniildinígíí biniinaa shı̨́ı̨́ doo ayóo nihidaʼdiiłʼáa da. Díí nahalingo, kǫʼ naʼałbąąsii bíighahgóó dabighanígíí tʼóó yídaneesdinígíí biniinaa doo yaa ákodanízin da. Áádóó tsʼiilzéí yah ahigeeh bíighahgi dabighanígíí éí doo bił daniłchxon da, daa leʼ. Áko, Jiihóvah doo yáʼáshǫ́ǫ́góó ooldahígíí nahjįʼ kóyiilaago, dooládóʼ shı̨́ı̨́ nihikʼi hodooldoh da!

¹⁷ Kʼad bikʼéé tidaʼhwiiʼníhígíí haʼátʼíí bitsáskʼeh góneʼ nidooʼnił? Psalm 37:11 ání: “Tʼáá ałtsoní bee hashtʼehodítʼé baa bił nidahoozhǫǫh doo.” Díí Jiihóvah nihá yinízinígíí, éí ayóo baa hózhǫ́! Yéigo nihichʼįʼ nidahwiiʼnánígíí biniinaa Jiihóvah dóó bá ndaalʼaʼígíí tʼáá kʼad áhą́dígo bił kʼé daʼahidiiʼníi doo. Náásgóó nił chohooʼínígíí éí ílı̨́, áko nił tʼáá aaníigo baa nitsíníkees. Áádóó náánáłaʼ bee bił hólneʼ doo. (1 Timothy 4:15, 16; 1 Peter 3:15) Áko éí nihoníyáago, nił hózhǫ́ǫgo hoolʼáágóó hinínáa doo!