1, 2. (a) Ensi egi mbi neeshushanisibwa n’omusibe orihaihi kwitwa, mu muringo ki? (Reeba ekishushani aha kutandika.) (b) Buri omwe omu iguru n’omu nsi naija kwehurira ata ensi egi mbi ku eraacwekyerezibwe?

TEEKATEEKA ahari eki. Omusibe bamucwereire omushango gw’okufa. Hati, abarinzi bariyo nibamutwara kumwita. N’obu omusibe ogwo arikuba akihuriire, naaba arihaihi kufa. *—Reeba obugambo obw’ahansi.

² Ensi egi mbi ei turimu neeshushanisibwa n’omusibe orihaihi kwitwa. Baibuli neegira eti: “Ensi egi neehwaho.” (1 Yohaana 2:17) Yehova acwiremu ngu ensi egi neija kuhwaho juba, n’ahabw’ekyo titwine kubanganisa ngu neija kuhwaho. Kwonka hariho entaaniso ahagati y’ensi egi kuhwaho n’okwitwa kw’omusibe. Abantu abamwe nibabaasa kuteeraho kuhakanisa okwitwa kw’omusibe barikugira ngu abaire atahikire kusharirwa omushango gw’okufa. Kwonka, Yehova we  n’omucwi w’emanja ohikiriire, kandi okucwamu kwe kucwekyereza ensi egi mbi n’okw’oburyo. (Eky’Ebiragiro 32:4) Okucwekyerezibwa kwayo tikurikwija kukyerererwa. Bwanyima y’ensi egi mbi kucwekyerezibwa, buri omwe omu iguru n’omu nsi naija kwikiriza ngu Yehova akozire ekihikire. Nihaija kubaho obugwa gye obwabuzima!

3. Ni buremeezi ki obw’emiringo ena oburaije kurugaho Obukama bwa Ruhanga ku buraije?

³ ‘Ensi erikuhwaho’ neetwariramu ki? Neetwariramu ebintu bibi ebirikubaho omu nsi obunaku obu. Ebintu ebyo byona juba nibiija kuhwaho. Ago ni gamwe aha ‘makuru marungi g’Obukama.’ (Matayo 24:14) Omu kicweka eki, nituza kugamba aha buremeezi bw’emiringo ena oburaarugyeho Obukama bwa Ruhanga ku buraije: abantu babi, ebibiina ebishomankuzi, ebikorwa bibi, n’embeera mbi. Nituza kwega oku buri kimwe ahari ebi (1) kirikutukwataho hati, (2) eki Yehova araije kukikorera, (3) eki araije kuta omu mwanya gwakyo.

4. Abantu babi nibatukwataho bata obunaku obu?

⁴ Abantu babi nibatukwataho bata hati? Paulo akagira ngu omu biro eby’aha mperu, haryabaho “ebiro by’akabi kaingi.” Akongyeraho ati: “Abantu babi, abarikwegira oku batari, baryayeyongyera kuba babi.” (2 Timoseo 3:1-5, 13) Waareebire abantu nk’abo? Baingi ahariitwe tutwariziibwe kubi abantu babi, abarikushoborora omu nganda, n’abarikukora ebihagaro. Bamwe ahari bo tibarikushereka ebintu bibi ebi barikukora. Abandi nibeetwara nk’abarikuhwera abantu, kwonka omu mazima nibaba bari babi. N’obu abarikukora ebi baakuba batatutwariize kubi, ebi barikukora nibitukwataho. Nitwehurira kubi ku turikuhurira oku barikutwariza kubi abaana, abakaikwire, n’abandi abatarikubaasa kwehwera. Abantu babi aba nibatwaza nk’enyamaishwa nari baadaimoni. (Yakobo 3:15) Ekirungi, Ekigambo kya Ruhanga nikituha amatsiko.

5. (a) Abantu ababi bakiine mugisha ki? (b) Niki ekiraahikye ahari abo abatarikwenda kuhindura aha mitwarize yaabo?

⁵ Niki eki Yehova arikwija kukora? Hati Yehova ahaire abantu ababi akagisha k’okuhinduka bakaba barungi. (Isaaya 55:7) N’obu ensi egi embi eraabe eri haihi kucwekyerezibwa, tibakacwereirwe rubanja. Kwonka shi, niki ekiraije kuhika ahari abo abarikwanga kuhinduka bakaguma nibashagika ensi egi embi okuhitsya obu okubonabona kwingi kuraabeho? Yehova naaraganisa ngu naaza kucwekyereza ababi boona abari omu nsi. (Shoma Zaaburi 37:10.) Obunaku obu, abantu baingi beegire kushereka ebibi ebi barikukora, kandi emirundi mingi tibarikufubirwa. (Yobu 21:7, 9) Kwonka Baibuli neetwijutsya eti: ‘Amaisho ga Ruhanga atuura agataire aha mitwarize y’omuntu. Tihariho mwirima, n’obu kyakuba ekibunda kya rufu, ahu enkozi z’ebibi zaakubaasa kweshereka.’ (Yobu 34:21, 22) N’ahabw’ekyo tihariho ahu omuntu arikubaasa kweshereka Yehova. Naabaasa kureeba buri kimwe eki abantu babi barikukora. Bwanyima ya Haramagedoni, nitubaasa kubasherura ahu baabaire nibatuura, tushangye batariho. Nibaija kuba batakiriho!—Zaaburi 37:12-15.

6. Ni baahi abaraatsigareho ababi baaba batakiriho, ahabw’enki ago gari amakuru marungi?

 ⁶ Ni baahi abaraatsigareho abantu babi baaba batakiriho? Yehova naaraganisa ati: “Kwonka abacureezi baryahungura ensi, beesiime ahabw’okugira obusingye bwingi.” Omu Zaaburi niyo emwe, nitushoma tuti: “Abahikiriire baryahungura ensi, bagituuremu ebiro byona.” (Zaaburi 37:11, 29) ‘Abacureezi hamwe n’abahikiriire’ ni baahi? Abacureezi n’abarikwega ahari Yehova kandi bakamworobera. Abahikiriire n’abo abarikukunda kukora ebihikire omu maisho ga Yehova. Obunaku obu, omu nsi harimu abantu baingi ababi okukira abahikiriire. Kwonka omu nsi ensya, nihaija kubayo abacureezi n’abahikiriire bonka, kandi nibaija kuhindura ensi paradiso!

7. Ebibiina ebishomankuzi nibitukwataho bita obunaku obu?

⁷ Ebibiina ebishomankuzi nibitukwataho bita obunaku obu? Ebintu ebibi ebirikukira kubaho omu nsi omu, tibirikureetwaho muntu omwe kureka ebibiina ebishomankuzi. Ebibiina by’amadiini g’ebishuba nibihabisa abantu baingi munonga. Nk’eky’okureeberaho, nibibeiha aha ki Ruhanga ari, nibigira ngu Baibuli terikubaasa kwesigwa, kandi nibibeiha abantu aha biro by’omu maisho. Gavumenti enshomankuzi nizireetaho entaro na rwango kandi zibonabonesa abooro n’abataine burinzi. Gavumeenti nk’ezo niziba engaiga munonga kandi zigira amaani ziikiriza ebituga. Ebibiina ebiine omururu nibishiisha ensi, bicwekyereza eby’obuhangwa, kandi bitwara ebintu by’abandi reero bakye baaba nibo baagaigahara. Buzima, ebibiina ebishomankuzi nibyo birikureetaho okubonabona obunaku obu.

8. Baibuli neegamba ngu niki ekiraahikye aha bibiina ebirikureebeka nk’ebiine amaani obunaku obu?

⁸ Niki eki Yehova arikwija kukora? Okubonabona kwingi nikwija kutandika gavumenti zaataahirira amadiini g’ebishuba, agu Baibuli erikweta Babulooni orukuru. (Okushuuruurwa 17:1, 2, 16; 18:1-4) Ebibiina ebyo by’amadiini g’ebishuba nibiza kucwekyererezibwa kimwe. Kandi shi ebibiina ebindi ebishomankuzi? Baibuli neebigyeragyeranisa n’enshozi n’ebirwa ahabw’okugira ngu nibireebeka nk’ebiine maani. (Shoma Okushuuruurwa 6:14.) Baibuli neeyongyera egira ngu n’ebibiina ebindi ebitarikushagika Obukama bwa Ruhanga nibiija kucwekyerezibwa. Ekyo kiryaba ekicweka ekirikuhererukayo eky’okubonabona kwingi. (Yeremia 25:31-33) Obwo, nihaija kuba hatakiriho ebibiina ebishomankuzi.

9. Ahabw’enki nitubaasa kugira obuhame ngu ensi ensya neija kuba omu buteeka?

⁹ Niki ekiraaze omu mwanya gw’ebibiina ebishomankuzi? Bwanyima ya Haramagedoni, nihaija kuba hakiriho ekibiina kyona omu nsi? Baibuli neegira eti: “Nitutegyereza eiguru erisya n’ensi ensya ebituurwamu okuhikiirira nk’oku yaaraganiise.” (2 Petero 3:13) Iguru n’ensi ebya ira ni zaagavumenti enshomankuzi n’abantu abarikuzishagika. Zaaheza kucwekyerezibwa, niki ekiraaze omu mwanya gwazo? “Eiguru erisya n’ensi ensya.” Iguru erisya ni gavumenti nsya, Obukama oburimu Yesu Kristo n’abashukirweho amajuta 144,000. Ensi nsya n’abantu abaraategyekwe  Obukama bwa Ruhanga. Yesu n’abu araategyekye nabo nibaija kutooreza Yehova Ruhanga, oine obuteeka. (1 Abakorinso 14:33) N’ahabw’ekyo ‘ensi nsya’ neija kuba erimu obuteeka. Nihaija kubaho abashaija ab’emitwarize mirungi ab’okureeberera ebintu. (Zaaburi 45:16) Abashaija abo nibaija kuba nibeebemberwa Kristo n’abashukirwe amajuta 144,000. Teekateeka aha bwire obu ebibiina byona ebishomankuzi birihwaho omu mwanya gwabyo hakazamu ekibiina kimwe, ekiine obumwe kandi ekitaribamu obushomankuzi!

10. Ni bikorwa ki bibi ebiri ahu orikutuura, kandi nibikukwataho bita n’ab’eka yaawe?

¹⁰ Ebikorwa bibi nibitukwataho bita? Tutwire omu nsi eijwiremu eby’obushambani, obutaribwesigwa, n’obushaarizi. Eby’okweshemeza ebiri omu nsi nibireebeka nk’ebirikushemeza ebirikureetera abantu kutafayo ha mutindo gwa Yehova gw’ekirungi n’ekibi. (Isaaya 5:20) Okukira munonga abazaire bashemereire kuteeraho munonga kurinda abaana baabo bakaguma baine emicwe mirungi. Kandi buzima, Abakristaayo boona bashemereire kukora n’amaani kubaasa kurinda omukago gwabo na Yehova omu nsi egi etarikuha emitindo ya Yehova ekitiinisa.

11. Nitwega ki aha ku Yehova yaacwereire Sodoma na Gomora orubanja?

¹¹ Yehova naija kukora ki aha bikwatiraine n’ebikorwa bibi? Teekateeka aha ki Yehova yaakozire aha bikwatiraine n’ebikorwa bibi ebyabaire biri omu ndembo Sodoma na Gomora. (Shoma 2 Petero 2:6-8.) Looti akaba ari ohikiriire, kandi we n’ab’eka ye bakabonabona munonga ahabw’ebintu bibi ebyabaire nibikorwa abantu ababeetooroire. Yehova akacwekyereza ensi egyo yaamaraho ebintu bibi ebyabaire birimu. Kwonka nabwo akaba naayoreka ekirikwija kuhika aha bantu babi obunaku obu. Nk’oku Yehova yaamazireho ebikorwa bibi ira, n’obunaku obu naija kumaraho ebikorwa bibi ebiriho omu nsi.

12. Ni bikorwa ki ebi oiniire ekihika ensi egi mbi ku eraarugyeho?

¹² Niki ekiraaze omu mwanya gw’ebikorwa bibi? Omu nsi ensya, nitwija kugira bingi eby’okukora ebirikushemeza. Nk’eky’okureeberaho, nitwija kuhindura ensi ebe paradiso kandi tweyombekyere amaju gaitu n’ag’abakundwa baitu. Kandi nitwija kwakiira obukaikuru bw’abantu abaraazookye reero tubeegyese ebirikukwata ahari Yehova na byona ebi akoreire abantu. (Isaaya 65:21, 22; Ebyakozirwe 24:15) Obwire obwo, nitwija kuba nitukora ebintu ebirikutureetera okushemererwa kandi kuhimbisa Yehova!

13. Niki ekirugire omu bugomi obwabaire omuri Edeni?

¹³ Embeera mbi nizitukwataho zita? Ensi eijwiremu abantu babi, ebibiina ebishomankuzi, n’ebikorwa bibi ebireetsireho embeera mbi munonga. Twena nitukwatwaho entaro, obworo, okushoroora omu nganda, oburwaire, n’okufa. Embeera mbi ezi zikatandikaho ahakuba Sitaane, Adamu, na Haawa bakagomera Yehova. Kandi twena nitukwatwaho obugomi bwabo.

14. Yehova naija kukora ki aha bikwatiraine n’embeera mbi?

¹⁴ Yehova naija kukorera ki embeera  mbi? Yetegyereze eby’okureeberaho ebi. Yehova naaraganisa kumaraho entaro. (Shoma Zaaburi 46:8, 9.) Naija kwihiraho kimwe endwara. (Isaaya 33:24) Naija kumirira kimwe rufu. (Isaaya 25:8) Naija kumaraho obworo. (Zaaburi 72:12-16) Kandi Yehova naija kwihaho n’embeera ezindi zoona ezirikutureetera amaganya. Naija n’okwihiraho kimwe Sitaane na baadaimoni be!—Abaefeso 2:2.

15. Ni bintu ki ebiraije kurugiraho kimwe bwanyima ya Haramagedoni?

¹⁵ Teekateeka oku kiriba kiri okutuura omu nsi etarimu entaro, endwara, nari okufa! Tiharibaho amahe, eby’okurwanisa, nari okwijuka eby’engamba. Titurikwija kwetenga amarwariro, abashaho, eihanika, nari eirimbo. Tiharibaho ebikorwa bibi, n’ahabw’ekyo titurikwija kwetenga abaporiisi, eby’okwerindisa, nari enkufuru nari ebishumuruzo! Embeera zoona ezi ezirikutureetera amaganya tizirigaruka kubaho bundi.

16, 17. (a) Abarahonekyeho aha Haramagedoni nibaija kwehurira bata? Ha eky’okureeberaho. (b) Nitubaasa kugira tuta obuhame ngu nitwija kugumaho ensi egi embi ku eraacwekyerezibwe?

¹⁶ Nitwija kuba mu mbeera ki, embi ku ziraarugyeho? Ti kyorobi kukiteekateekaho. Tutwire nituhikwaho embeera mbi kumara obwire buraingwa kandi obumwe nitubaasa obuteetegyereza ngu embeera ezo nizitureetera amaganya. Nk’eky’okureeberaho, abantu abarikutuura haihi n’ahu egaari y’omwika erikwemerera nibabaasa obutetegyereza ngu neebayomberera. Kandi abantu abarikutuura haihi n’ahu barikunaga ebisasiro nibabaasa obutetegyereza ngu nibibanuukira. Kwonka Yehova ku araiheho embeera mbi, nitwija kugira obugwagye!

¹⁷ Niki ekiraaze omu mwanya gw’amaganya agu twine hati? Zaaburi 37:11 nihagira hati: “Beesiime ahabw’okugira obusingye bwingi.” Ka nikigaruramu amaani kumanya ngu eki nikyo Yehova arikutwendeza! Omu bwire obu bw’amaganya, kora buri kimwe eki orikubaasa kuguma ori haihi na Yehova n’ekibiina kye. Amatsiko agu oine aha biro by’omu maisho n’ag’omuhendo, n’ahabw’ekyo guma noogateekateekaho, oreebe ngu gaakubeera aga buzima, kandi ogagambire n’abandi. (1 Timoseo 4:15, 16; 1 Petero 3:15) Omu muringo ogwo noobaasa kugira obuhame ngu ensi embi ku eraahweho, noija kugumaho kandi noija kugira okushemererwa ebiro byona.