1, 2. a) ¿Cai mundopi tiyaj millai ruraicunaca imamantataj shuj millai runa ñalla huañugrij shina can? (Jahuapi tiyaj dibujota ricui). b) ¿Yaya Dios millai ruraicunata tucuchijpica jahua pachapi causajcunapish, cai Allpapi causajcunapish ima shinashi sintiringacuna?

CAITA yuyashun. Shuj millai runami carcelpi can. Chai millai runatami huañuchingapaj guardiacunaca shujtaj ladoman apacun. Chai runa sano, mana ima tucushca laya cajpipish paica huañunami can.

² Cai millai runa ñalla huañugrij shinallatajmi cai mundopi tiyaj millai ruraicunapish ñalla tucuringa. Bibliapica: “Cai pachaca, tucui munaicunandijmi chingaricun” ninmi (1 Juan 2:17). Jehová Diosca ñallami millai ruraicunata tucuchinata decidishca. Chaica pajtaringatajmi. Cutin chai millai runamanta parlashun. Huaquin gentecunaca chai millai runata ama huañuchichunllami, yangamanta juchachishpa carcelpi churashcacuna nincuna. Pero Jehová Diosca cashcata ruraj Diosmi can. Chaimantami millai ruraicunata tucuchinga (Deuteronomio 32:4). Cai mundopi mana alli causaica ñallami tucuringa, mana uniyangachu. Chai punlla chayamujpica jahua pachapi causajcunapish,  cai Allpapi causajcunapish, ‘Diosca cashcata ruraj cashcamantami tucui millai ruraicunata tucuchina carca’ ningacunami. Chaita yachashpaca ¿manachu cushilla sintirinchij?

3. ¿Dios churashca Mandanaca imatataj tucuchinga?

³ Bibliapi ‘cai pacha chingaricun’ nishpaca cunan tiempopi tiyaj tucui millai ruraicuna ñalla tucurina cashcatami nicun. Caica shuj ‘alli huillaimi’ can ¿nachu? (Mateo 24:14). Cai yachaipica Dios churashca Mandana chayamujpi, mana alli gentecuna, millai organizacioncuna, millai ruraicuna, llaqui causaipish tucurina cashcatami yachashun. Shinallataj ñucanchijpish cai tucui llaquicuna tiyashcamanta ima shina causacushcata, Jehová Dios imata ruragrijtapishmi yachashun.

4. ¿Millai gentecuna tiyashcamantaca ima shinataj causanchij?

⁴ ¿Millai gentecuna tiyashcamantaca ima shinataj causanchij? Apóstol Pabloca: “Cai punllacuna tucurinapajca llaqui punllacunami shamunga”, gentecunapish ashtahuanmi millaicuna tucunga nircami (2 Timoteo 3:1-5, 13). Cai shimicunaca cunan punllacunapimi pajtaricun. Chaimantami shuhuacuna, llaquichijcuna tiyan. Yana, yuraj cajpipish pꞌiñancunami. Huaquincunacarin mana alli cosascunata rurashpapish mana pingarincunachu. Cutin shujtajcunaca nij tucushpallami ayudaj tucuncuna. Ñucanchijta mana llaquichishca cajpipish, chaita ricushpaca llaquillami sintirinchij ¿nachu? Chashnallataj huahuacunapish yuyajcunapish shujtaj gentecunapish mana defindiri tucushcamantami paicunata yallitaj llaquichincuna. Cutin shujtajcunaca animalcuna shina, demoniocuna shinami comportarincuna (Santiago 3:15). Pero Diospaj Shimipica alli huillaicunami tiyan.

5. a) ¿Diosca imamantataj tiempota cucun? b) ¿Paicunapaj causaita mana cambiasha nijcunahuanca imataj tucunga?

⁵ ¿Jehová Diosca imatataj ruranga? Diosca millai gentecuna paicunapaj causaita cambiachunmi tiempota cucun (Isaías 55:7). Cai mundopi tiyaj millai ruraicuna ñalla tucurigrijpipish Diosca gentecunataca manaraj juzgashcachu. Pero ‘jatun llaqui punllacuna’ chayamungacama millai gentecuna mana cambiasha nijpica ¿imataj tucunga? Jehová Diosca paicunataca tucuchisha ninmi (Salmo 37:10-ta leyipai). Cunan punllacunapi achca gentecunaca mana allita rurashpaca pacancunami. Paicunapaj rurashcacunata pi mana yachaj chayajpica ima mana rurashca layami purincuna (Job 21:7, 9). Pero Bibliapica cashnami nin: ‘Diospaj ñahuicunaca runa maita purishcatami chaparacun. Chaqui sarushcatapish tucuitami ricuracun. Millaita rurajcuna miticurinapajca, manchanana amsapish, huañuna amsapish mana tiyanchu’ ninmi (Job 34:21, 22). Chaimanta Diospaj ñaupajpica tucuimi ricurin. Paica tucui millaicunapaj ruraicunatapish ricucunmi. Armagedón qꞌuipaca millai gentecunaca ña mana tiyangachu. Paicunataca cutinca ña mana ricushunchu (Salmo 37:12-15).

6. a) ¿Millaicuna tucurijpica picunataj causashpa catinga? b) ¿Allicunalla cai Allpapi causanata yachashpaca ima shinataj sintirinchij?

⁶ ¿Millaicuna tucurijpica picunataj causashpa catinga? Diosca: ‘Alli shungucunami, Dios cusha nishca Allpataca japingacuna. Yallitaj sumaj causaipimi cushicungacuna’ ninmi. Chashnallataj, ‘cashcata rurajcunallami Allpata japingacuna. Tucui causaipimi Allpapi causangacuna’ ninmi (Salmo  37:11, 29, NM). ¿Picunataj cashcata rurajcuna, alli shungucuna can? Alli shungucunaca humilde gentecunami can. Paicunaca humildes cashcamantami Diosmanta yachashpa paita cazuncunapish. Shinallataj Dios munashca shina causasha nishcamantami cashcata rurajcunapish can. Cunan punllacunapica alli gentecunaca ashallami tiyan. Pero Dios cugrij paraisopica alli shungu gentecunalla, cashcata ruraj gentecunallami causanga. Paicunami cai Allpataca shuj sumaj paraisota ruranga.

7. ¿Millai organizacioncuna tiyashcamantaca ima shinataj causanchij?

⁷ ¿Millai organizacioncuna tiyashcamantaca ima shinataj causanchij? Paicunapaj culpamantami cai mundopica achca llaquicuna tiyan. Por ejemplo, panda religioncunapica achca gentecunamanmi Diosmanta llullashpa yachachincuna. Shamuj punllacunapi ima tucunatapish llullashpami yachachincuna. Biblia ima nishcatapish mana crinachu canchij nishpami yachachincuna. Cutin mana alli gobiernocunaca shujtaj llajtacunahuan macanacushpami gentecunata llaquichincuna. Pobrecunatapish mana defindiri tucushcamantami llaquichincuna. Ashtahuanpish cullquiraicu imatapish rurashpami ashtahuan charij tucuncuna. Jatun empresacunapish charij canallata munashpami Allpata mapayachishpa catincuna. Pobre gentecunatapish sinchita trabajachishpa, mana alli pagashpami paicunalla charij tucuncuna. ¿Manachu cai millai organizacioncunamanta achca llaquicuna tiyan?

8. ¿Biblia nishca shinaca millai organizacioncunahuanca imataj tucunga?

⁸ ¿Jehová Diosca imatataj ruranga? Tucui panda religioncunata gobiernocuna llaquichijpimi ‘jatun llaqui punllacunaca’ callaringa. Chai panda religioncunataca Bibliapica shuj huainayaj huarmihuanmi chꞌimbapuran. Chai huainayaj huarmica Babilonia jatun pueblomi can (Apocalipsis 17:1, 2, 16; 18:1-4). Chai tucui panda religioncunaca tucuimi chingaringa. Cutin ¿shujtaj organizacioncunahuanca imataj tucunga? Diospaj Shimipica: ‘Chai organizacioncunaca urcucuna shina, cucha chaupipi tiyaj allpacuna shinami sinchi ricurin’ ninmi (Apocalipsis 6:14-ta leyipai). Pero Dios churashca Mandanata mana apoyashcamantami gobiernocunapish, shujtaj organizacioncunapish tucuchishca cangacuna. ‘Jatun llaqui punllacuna’ ña tucurigrijpimi chaica pajtaringa (Jeremías 25:31-33). Chai qꞌuipaca millai organizacioncunaca shujllapish ña mana tiyangachu.

9. ¿Cai Allpa tucui ordenpi cachunca Jehová Diosca imatataj ruranga?

⁹ ¿Armagedón jatun macanacui qꞌuipaca shujtaj organización cai Allpapi tiyangachu? Diospaj Shimipica: ‘Ñucanchijca, pai rurasha nishca shinallataj mushuj jahua pachata, mushuj cai pachatami shuyacunchij. Chaipica tucuicunami cashcata rurajcunalla canga’ ninmi (2 Pedro 3:13). ‘Mauca jahua’ pacha nishpaca millai gobiernocunatami nin. Cutin ‘mauca cai pacha’ nishpaca gobiernocunapaj maquipi caj gentecunatami nin. ¿Chai millai gobiernocuna tucurijpica pitaj mandanga? Bibliapica mushuj jahua pacha nishpaca mushuj gobiernomantami parlan. Cai gobiernopica Jesucristomi mandanga. 144 mil ungidocunapishmi Jesushuan mandanga. Cutin ‘mushuj cai pacha’ nishpaca Jesús mandagrij alli gentecunamantami  parlan. Jehová Diosca tucuita alli charij Diosmi can. Chaimantami Jesuspish ungidocunapish Jehová Dios shina gentecunata alli mandanga (1 Corintios 14:40). Cai Allpapica huaquin cꞌaricunapish Jesús nishcata, ungidocuna nishcata uyashpami ñaupajman pushangacuna (Salmo 45:16). Dios churashca Mandanalla cai Allpata mandajpica millai ruraicunapish mana tiyangachu. Chaipica tucuicunami tandalla, cushilla causashun. Chaita yachashpaca ¿manachu cushilla sintirinchij?

10. a) ¿Cambaj llajtapica ima llaquicunataj tiyan? b) ¿Llaquicuna tiyashcamantaca canpish, cambaj familiapish ima shinataj causanguichij?

¹⁰ ¿Millai ruraicuna tiyashcamantaca ima shinataj causanchij? Cai pachapi gentecunaca huainayashpalla, shuhuashpalla, macanacushpallami causan. Televisionpi, Internetpipish mana alli ruraicunataca alli cashcata shinami ricuchin. Gentecunapish Diospaj mandashcacunataca yangapimi churashcacuna (Isaías 5:20). Chaimantami yaya mamacunaca paicunapaj huahuacuna mana alli ruraicunamanta cuidarichun ayudana can. Ñucanchijpish Diospaj mandashcacunata mana cazusha nijcuna shinaca mana casha ninchijchu. Ashtahuanpish Diospajman cꞌuchuyangapajmi achca esfuerzota rurana canchij.

11. ¿Sodoma, Gomorrapi causajcunata Dios chingachishcamantaca imatataj yachanchij?

¹¹ ¿Jehová Diosca imatataj ruranga? Sodoma, Gomorrapi causajcuna mana allita rurashpa causashcamanta Jehová Dios paicunata imata rurashcata yuyarishun (2 Pedro 2:6-8-ta leyipai). Lotca cashcata ruraj runami carca. Paipaj familiaca millai gentecunapaj chaupipi causacushcamantami llaquicunata aparcacuna. Jehová Diosca chai millai gentecunata tucuchircami. Qꞌuipa punllacunapipish Diosta mana manchashpa causajcunatapish, ima shina llaquichina cashcata ricuchingapajmi chashna rurarca. Ima shinami Lot causacun punllacunapi huainayaj gentecunata chingachirca, chashnallatajmi millaita rurajcunataca Diosca chingachinga.

12. ¿Millai ruraicuna tucurijpica imatataj rurasha ningui?

¹² ¿Millai ruraicuna tucurijpica causaica ima shinashi canga? Paraíso Allpapica achca trabajomi tiyanga. Por ejemplo, cai Allpa sumaj, verdijlla cachunmi tucuicuna tandalla cushilla trabajashun. Ñucanchijpajpish, shujtajcunapajpish huasicunatami shayachishun. Huañushcacuna causarijpica paicunatapish chasquishunmi. Ashtahuancarin paicunamanca Diosmantami yachachishun, pai ñucanchijmanta tucuita rurashcatapishmi yachachishun (Isaías 65:21, 22; Hechos 24:15). Paraíso Allpapica ima trabajota rurashpapish cushillami causashun, Jehová Diostapish jatunyachishunmi.

13. ¿Diablopish Adanpish Evapish Diosta mana cazushcamantaca ima shinataj causanchij?

¹³ ¿Llaqui causai tiyashcamantaca ima shinataj causanchij? Millai organizacioncuna tiyashcamanta, millai ruraicuna tiyashcamantami llaqui causai tiyan. Chashnallataj guerracuna, huañuicuna, ungüicuna, pobreza tiyashcamantapishmi llaqui causanchij. Yana o yuraj cashcamanta pꞌiñajpipish llaquillami causanchij. ¿Imamantataj chashna causanchij? Diablopish, Adanpish Evapish Diosta mana cazushcamantami chashna llaqui causaica tiyai callarirca.

14. ¿Llaqui causai ama ashtahuan tiyachunca Diosca imatataj ruranga?

 ¹⁴ ¿Jehová Diosca imatataj ruranga? Llaqui causai ama tiyachun Jehová Dios imata ruragrijta yuyarishun. Paica guerracunatami tucuchinga (Salmo 46:8, 9-ta leyipai). Ungüicunatapish tucuchingami (Isaías 33:24). Huañuitapish huiñaipajmi chingachinga (Isaías 25:8). Pobrecunapish ña mana tiyangachu (Salmo 72:12-16). Diosca tucui llaqui causaitami tucuchinga. Diablo paipaj demoniocunapish ñucanchijta umashpa llaquichichunca mana saquingachu (Efesios 2:2).

15. ¿Armagedón macanacui qꞌuipaca imataj mana tiyanga?

¹⁵ ¿Guerracuna, ungüicuna, huañuicuna tucurijpica causaica ima shinashi canga? Causaica sumajmi canga. Macanacungapaj armacunapish soldadocunapish mana tiyangachu. Shinallataj hospitalcunapish, doctorcunapish, enfermerocunapish, cementeriocunapish mana tiyangachu. Pi shuhuajcuna mana tiyashcamanta policiacunapish mana tiyangachu. Huasicunatapish ña mana candadohuan charishunchu. Tucui llaquicunaca tucuchishcami canga.

16, 17. a) ¿Llaqui causai tucurijpica ima shinataj sintirishun? b) ¿Quishpiringapajca imatataj rurana canchij?

¹⁶ ¿Llaqui causai tucurijpica ima shinataj sintirishun? Huahuamantapacha llaquicunahuan causashcamantami ña amañarishca laya canchij. Chaimantami paraisopi ima shina causai tiyanata yuyanaca sinchi can. Por ejemplo, huaquin gentecunaca carro shayarina cꞌuchullapimi causancuna. Ña amañarishca cashcamantami bullata mana sintincuna. Cutin shujtaj gentecunaca basurata shitana cꞌuchullapimi causancuna. Chai basura jiru ashnajpipish mana sintincunachu. Pero bullacuna, mapa ashnaicuna tucurijpica ¿manachu chai gentecunaca tranquilo, cushilla causai pudingacuna? Ari. Llaqui causaita, mapa causaita Jehová Dios tucuchijpica ñucanchijpish cushillami causashun.

¹⁷ Salmo 37:11-pi nishca shinaca tucuicunami cushilla, sumajta causashun. Jehová Diosmi chashna causachun munan. Chaimanta cai llaqui punllacunapi causashpapish Jehová Diosmanta, paipaj pueblomantapish amataj caruyashunchijchu. Ashtahuanpish shamuj punllacunapi sumaj causai tiyana cashcata yuyaillami causana canchij. Muscuillami can nishpa ama yuyashunchijchu. Shujtaj gentecunamanpish cai sumaj causai tiyanata huillashunchij (1 Timoteo 4:15, 16; 1 Pedro 3:15). Chaita rurashpaca huiñaitami cushilla causashun.