Ka Akaatea te Patireia o te Atua i te Kino
“Te ngaro ke nei teianei ao, ma ta to reira katoa e anoano nei: ko tei akono ra i to te Atua ra anoano, e tika ïa i te ora anga e tuatau ua atu.”—1 IOANE 2:17.
1, 2. (a) Akapeea teia ao kino i aite ei ki tetai tangata rave kino te ka tamateia? (Akara i te tutu mua.) (e) Eaa te manako o te katoatoa i te rangi e te enua nei me akapou takiriia teia akatereanga kino?
AKAMANAKO ana i teia tupuanga. Te aaere ra tetai tangata rave kino na roto i te areauri e te kapiki nei te au tiaki mouauri, “Te aere ra te tangata mate!” Eaa ratou i tuatua akapera ai? Noatu te ora nei te tangata rave kino e te akaraanga meitaki, kua akautungaia aia kia mate. Mei te mea rai e kua mate takere aia. *—Akara i te tataanga rikiriki i raro.
2 Te ao kino ta tatou e noo nei, kua aite rai ki teia tangata rave kino e ka tamateia. Karanga te Pipiria: “Te ngaro ke nei teianei ao.” (1 Ioane 2:17) Kua iki a Iehova i te takore i teia akatereanga kare e roa atu ana, no reira kare e ekoko ka tupu teia. Inara te vaira tetai tuke maata i rotopu i te openga o teia akatereanga kino e te tamate anga i te tangata rave kino. Penei ka manako tetai pae kare e tau ana te akava anga a te tangata rave kino e ka patoi i te reira, ma te irinaki e kare aia e tamateia. Inara, e akava apa kore a Iehova, e e mea tau tikai tana ikianga kia takore i teia akatereanga. (Deuteronomi 32:4) Kare te openga e tavarevare. Me akapou takiriia teia akatereanga, ka āriki te katoatoa i te rangi e te enua nei e mea tika ta Iehova akava anga. Mei teaa atura te rekareka!
3. Eaa te ā manamanata te ka akaateaia me tae mai te Patireia o te Atua?
3 Eaa te kapiti maira ki “teianei ao” te “ngaro ke nei”? Ko te au mea kino tei riro ei tuanga no te oraanga i teia tuatau. Kare e roa atu ana ka kore teia au mea. Ko teia tetai tuanga o te “evangelia o te basileia nei.” (Mataio 24:14) I teia atikara, ka uriuri tatou e ā manamanata te ka akaateaia me tae mai te Patireia o te Atua: te aronga kino, te au akaaereanga pikikaa, te au angaanga tarevake, e te au turanga kino. No teia au manako maata ka apii tatou e (1) akapeea te reira me akakeu ia tatou i teianei, (2) ta Iehova ka rave ki te reira, e te (3) eaa te ka mono atu i te reira.
ARONGA KINO
4. Akapeea te aronga kino me akakeu ia tatou i teianei?
4 Akapeea te aronga kino me akakeu ia tatou i teianei? Karanga te apotetoro ko Paulo i te tuatau openga, “ka tupu te kino maata.” E oti karanga aia: “Te aronga pikikaa ra, e tupu rai to ratou kino, e e maata atu.” (2 Timoteo 3:1-5, 13) Kua tupu ainei teia kia koe? E manganui ia tatou tei takinoia e te aronga kino mei te au tā tangata, te iriiri tangata, e te aronga rave kino tikai. Tetai pae, kare e uuna i te au mea kino ta ratou e rave ra. E tetai pae ka akatutu ua i te tauturu i te tangata, inara e kino tikai ratou. Noatu te reira, me kare tatou i takinoia e te aronga kino, ka riro rai ratou ei akakeu anga kia tatou. Ka kinokino tatou i te akarongo ua atu i ta ratou takinokinoanga i te tamariki, te au ruaine, e tetai ua atu kare e rauka i te paruru ia ratou uaorai. Mei te au manu taetaevao rai me kore e au temoni ratou. (Iakobo 3:15) Mea meitaki, te oronga maira te Tuatua a Iehova i te manakonakoanga no tatou.
5. (a) Eaa te atianga no te aronga kino i teia taime tikai? (e) Eaa te ka tupu ki te aronga kare e inangaro i te taui?
5 Eaa ta Iehova ka rave? I teia taime tikai, te oronga nei a Iehova i te tuatau no te aronga kino kia taui i to ratou tu. (Isaia 55:7) Noatu e kare teia akatereanga i takoreia ake, kare ratou i akava opengaia. Inara eaa te ka tupu ki te aronga kare i inangaro i te taui e ka turu ua rai i teia akatereanga e tae ua atu ki te tuatau o te mate maata? Kua taputou a Iehova i te takore pouroa i te aronga kino i runga i te enua nei. (E tatau ia Salamo 37:10.) I teia rā, e manganui tei kite i te uuna i te au mea kino ta ratou e rave ra, te maata anga i te taime kare ratou e akautungaia. (Iobu 21:7, 9) Inara te akamaara maira te Pipiria ia tatou: “Tei runga oki i to te tangata nei au aerenga ona mata, e te akara maira aia i tona ra au takainga ravarai. Kare e poiri, kare e maru-mate, ei pipini anga no te aronga rave tuatua kino ra.” (Iobu 34:21, 22) No reira kare e rauka i te pipini mei ia Iehova. Te kite nei aia i te au mea ravarai ta te aronga kino e rave ra. I muri ake ia Aramakito, ka akara tatou i to ratou ngai, e kare ua. Ka kore ratou e mutukore ua atu!—Salamo 37:12-15.
6. Koai ma ka toe mai me akaateaia te aronga kino, e no teaa ra teia i te nuti meitaki?
6 Koai ma ka toe mai me akaateaia te aronga kino? Taputou a Iehova: “Kareka te aronga maru ra, ka noo ïa i te enua, e ka rekareka ratou i te maata o te au.” I roto katoa i teia salamo, ka tatau tatou: “Ka riro te enua no te aronga tuatua-tika, ka noo tamou rai ratou i reira.” (Salamo 37:11, 29) Koai “te aronga maru” e te “aronga tuatua-tika”? Te aronga maru ko tei akaaka e tei apii no runga ia Iehova ma te akarongo kiaia. Te aronga tuatua tika ko tei inangaro i te rave i ta te Atua i karanga e e mea tika. I roto i teianei ao, e maata atu te aronga kino i te aronga tuatua tika. Inara i roto i te ao ou, ko te aronga maru e te tuatua tika anake te ka toe mai, e ka akariro ratou i te enua ei parataito!
AU AKAAEREANGA PIKIKAA
7. Akapeea te akaaereanga pikikaa me akakeu ia tatou i teianei?
7 Akapeea te akaaereanga pikikaa me akakeu ia tatou i teianei? Te tupu maata ra te kino i teia tuatau kare no te tangata ua mari ra no te au akaaereanga. Te akavare nei te au akaaereanga akonoanga i te mirioni ua atu tangata. Ei akaraanga, te pikikaa nei ratou no runga i te Atua, karanga ratou eiaa e irinaki i te Pipiria, e te akavare nei i te tangata no te tuatau ki mua o te enua e te tangata. Te akatupu nei te au kavamani pikikaa i te tamaki e te takino ra i te katiri tangata pera katoa i te aronga putaua e te parukaua. Ka riro teia au kavamani ei au akaaereanga apinganui e te mana ririnui na te akatika anga me kore te āriki ua anga i te moni tutaki. Ka akataero ua te au pitiniti noinoi i te ao rangi, taviivii i te au ngai natura, e te taomi i te tangata kia meangiti ua te aronga apinganui. Te taka meitaki ua ra, na te au akaaereanga pikikaa e akatupu ana i te maata anga o te mamae i te ao nei.
8. Eaa ta te Pipiria e karanga ra ka tupu ki te au akaaereanga tei akaraanga ketaketa ki te manganui i teia tuatau?
8 Eaa ta Iehova ka rave? Ka akamata te mate maata me tamaki atu te au mana poritiki i te au akaaereanga pouroa o te akonoanga pikikaa, ta te Pipiria e akataka ra ei vaine akaturi ko Babulonia Maata. (Apokalupo 17:1, 2, 16; 18:1-4) Ka takore takiriia teia au akaaereanga akonoanga. Inara eaa te ka tupu ki te toenga o te akaaereanga pikikaa? Te akaaite ra te Pipiria ia ratou mei te au maunga e te au pa enua no te mea e akaraanga ketaketa ratou. (E tatau ia Apokalupo 6:14.) Inara akakite katoa te reira ka takoreia te au kavamani e te au akaaereanga pouroa tei kore i turu i te Patireia o te Atua. Ko teia te tuanga openga o te mate maata. (Ieremia 25:31-33) I reira, kare e akaaerenga pikikaa akaou!
9. No teaa ra tatou i papu ei ka akaaere meitakiia te enua ou?
9 Eaa te ka mono atu i te au akaaereanga pikikaa? I muri ake ia Aramakito, ka toe mai ainei tetai akaaereanga i te enua nei? Karanga te Pipiria: “Te tatari nei ra tatou i te rangi ou e te enua ou tana i tuatua maira, i te vai tika anga o te tuatua-tika ra.” (2 Petero 3:13) Te rangi e te enua taito, ko te au kavamani pikikaa e te aronga ta ratou e akatere ra. Me akaateaia ratou, eaa te ka mono atu i te reira? “Te rangi ou e te enua ou.” Ko te rangi ou tetai kavamani ou, koia te Patireia o Iesu Mesia e tona 144,000 aronga tutara. Ko te enua ou te aronga tei tutaraia e te Patireia o te Atua. Ka aru vaitata a Iesu e tona aronga tutara i te Atua ko Iehova, te Atua o te au. (1 Korinetia 14:33) No reira ka akaaereia te “enua ou.” Ka akanooia te aronga meitaki ei akono i te au mea ravarai. (Salamo 45:16) Ka aratakiia teia aronga e Karaiti e te 144,000. Akamanako ana i te tuatau me monoia te au akaaereanga pikikaa pouroa e te akaaerenga okotai, tei taokotaiia e kare rava e pikikaa!
ANGAANGA TAREVAKE
10. Eaa te au angaanga tarevake tei mātauia i toou ngai, e akapeea te reira me akakeu ia koe e toou ngutuare tangata?
10 Akapeea te angaanga tarevake me akakeu ia tatou i teianei? Te noo nei tatou i tetai ao e mea mātauia te ainga tau kore, te tu tika kore, e te tā ua kino tikai. Te akariro ra te tamataora anga o teianei ao i teia au mea ei mea meitaki e i taua taime rai te aviri ra i to Iehova au turanga no te mea tika e te tarevake. (Isaia 5:20) Ka anoanoia te au metua kia tauta pakari i te paruru i ta ratou tamariki mei teia au akakeu anga kino. E tika, ka anoanoia te au Kerititiano pouroa kia angaanga pakari i te paruru i to ratou pirianga kia Iehova i roto i tetai ao kare e akangateitei ana i to te Atua turanga.
11. Eaa ta tatou ka apii mei ta Iehova akava anga ia Sodoma e Gomora?
11 Eaa ta Iehova ka rave no te au angaanga tarevake? Akamanako i ta Iehova i rave no te au mea kino e tupu ra i te oire o Sodoma e Gomora. (E tatau ia 2 Petero 2:6-8) E tangata tuatua tika a Lota, e kua mamae maata aia e tona ngutuare tangata no te kino pouroa ta te au tangata e rave ra. Kua takore takiri a Iehova i te reira ngai kia akamutu te au mea kino i te tupu. Inara “akariro atura oki [aia] ei akaraanga” no te aronga kino o teia tuatau. Mei ta Iehova akaope anga i te angaanga tau kore i tera tuatau, ka akakore katoa aia i te reira me takore aia i teia akatere anga.
12. Eaa te au angaanga taau e tapapa ra me takoreia teia akatereanga?
12 Eaa te ka mono i te au angaanga tarevake? I roto i te ao ou, e maata ta tatou angaanga mataora ka rave. Ei akaraanga, ka akariro tatou i te enua ei parataito e ka akatu i te au are no tatou e to tatou au akaperepere. Ka turou katoa tatou i te mirioni ua atu te ka akatuia mai e ka apii ia ratou no runga ia Iehova e tana i rave no te tangata. (Isaia 65:21, 22; Angaanga 24:15) A tera tuatau, e maata ta tatou angaanga ka rave tei apai mai i te mataora e te akapaapaa anga kia Iehova!
TURANGA KINO
13. Eaa tei tupu no te meameaau anga i Edene?
13 Akapeea te turanga kino me akakeu ia tatou i teianei? Tetai ao kua ki i te aronga kino, te au akaaereanga pikikaa, e te au angaanga tarevake ka taki atu ki te turanga kino o te oraanga. Pouroa ia tatou kua takinoia mei te tamaki, putaua, iriiri tangata, maki e te mate. Kua akamata teia au turanga kino no ta Satani, Adamu, e ta Eva patoi anga ia Iehova. Kua akakeuia tatou katoatoa no to ratou akarongo kore.
14. Eaa ta Iehova ka rave no te au turanga kino?
Salamo 46:8, 9.) Ka takore aia i te maki. (Isaia 33:24) Ka akakore aia i te mate e tuatau ua atu. (Isaia 25:8) Ka akaatea aia i te turanga putaua. (Salamo 72:12-16) E ka akakore pouroa a Iehova i te au mea kino tei akariro i te oraanga i teia tuatau ei mea taitaia. Ka akakore katoa aia i te au akakeu anga kino a Satani e tana au temoni!—Ephesia 2:2.
14 Eaa ta Iehova ka rave no te au turanga kino? Akamanako ana i teia au akaraanga. Kua taputou a Iehova i te akakore i te tamaki. (E tatau iaAkamanako i tetai ao kare e tamaki, e maki e te mate! (Akara i te parakarapa 15)
15. Eaa tetai au apinga ka akaateaia e tuatau ua atu i muri ake ia Aramakito?
15 Akamanako ana mei teaa rai te tu o te oraanga i roto i tetai ao kare e tamaki, e maki e te mate! Ka kore te au nuku vaeau, te au apinga tamaki, e te akamaaraanga tamaki. Kare katoa e anoanoia te are maki, taote, neti, are vairanga tangata mate, me kore te ngai tanumanga. Kare te kino e tupu akaou, no reira kare e anoanoia te au akava, te au ove tiaki, penei katoa te au roka e te taviri! Ka kore rava teia au turanga kino tei akatupu i te taitaia e tuatau ua atu.
16, 17 (a) Eaa te manako o te aronga te ka ora mai ia Aramakito? Akatutu mai. (e) Akapeea tatou me akapapu e ka ora ua atu tatou me akaateaia teia ao kino?
16 Mei teaa rai te tu o te oraanga me kore te au turanga kino? Kare i te mea māmā i te akamanako. Kua roa to tatou nooanga ma te turanga kino e penei kare tatou e kite akaou mei teaa tikai te taitaia. Ei akatutuanga, te aronga e noo ra i te pae i te ngai rerue penei kare ratou e akarongo akaou i te turituri. E te aronga tei noo i te pae i te ngai titiri tita penei kare e kite akaou i te aunga. Inara me akaatea takiri a Iehova i te turanga kino, mei teaa atura te rekareka!
17 Eaa te ka mono atu i te taitaia maata ta tatou e kite nei? Karanga a Salamo 37:11 e: “Ka rekareka ratou i te maata o te au.” Mei teaa tikai te pumaana te kite i ta Iehova e inangaro ra no tatou! I teia tuatau taitaia tikai, e rave i taau ka rauka kia piri vaitata kia Iehova e tana akaaerenga. E mea akaperepere toou manakonakoanga no te tuatau ki mua, no reira e akamanako oonu i te reira, e akapapu e e mea tika tikai kia koe, e kia akakite i te reira ki te tangata. (1 Timoteo 4:15, 16; 1 Petero 3:15) Ka papu i reira koe me ope teia akatereanga, ka ora ua atu koe e ka mataora e tuatau ua atu!
^ para. 1 Te akataka ra teia parakarapa i tetai peu taito tei raveia i roto i te au areauri i Marike i te tuatau i topa.