1, 2. (α) Σαρ μοιάζελα ανταβά ντουνιάς με τον εγκληματία σο κα μουνταρέν-λες ατζεχάνικ; (Ντικχ ι φωτογραφία σο ισί κι αρχή.) (β) Σαρ κα νιωθίνεν σαρέ οντουλά σο ισί κο ουρανός ντα κι πφουβ αφού κα καταστραφίντιβελ ανταβά πφιρνό ντουνιάς;

ΣΚΕΦΤΙΝΕΝ ότι εκ μπαρό εγκληματίας πφιρέλα κο διάδρομος αντρέ κι φυλακή ντα ο φρουροί σο ισί λέσαρ ντένα βίκος: «Πφιρέλα ο μουλό!» Σόσκε βακερένα-λες ανταβά; Παρόλο σο οντουβά εγκληματίας ισί τζουβντό ντα ντικχίντιβελα λατσσές, καταδικαντέ-λες τι μερέλ ντα ατζεχάνικ κα μουνταρέν-λες. Ισί σαρ τι μουλόας. *—Ντικχ ι υποσημείωση.

² Ανταβά πφιρνό ντουνιάς σο τζουβντιάσα μοιάζελα με τον εγκληματία σο κα μουνταρέν-λες ατζεχάνικ. Η Αγία Γραφή βακερέλα: «Ο ντουνιάς χασάρντιβελα». (1 Ιωάννη 2:17) Ισινάμ σίγουροι ότι ο τέλος ανταλέ ντουνιάσκο κα αβέλ ατζεχάνικ, επειδή ο Ιεχωβά αποφασιντάς-λες ανταβά. Όμως, ο τέλος ανταλέ ντουνιάσκο ντα ο μεριπέ του εγκληματία τθερένα εκ σημαντική διαφορά. Μερικά τζενέ μπορεί τι πακιάν ότι ισί άδικος τι μουνταρέν τον εγκληματία ντα μπορεί τι ντεν βίκος για μα τι μουνταρέν-λες.  Αλλά ο Ιεχωβά ισί τέλειος κριτής, ντα λέσκι απόφαση τι καταστραφίνελ ανταλέ ντουνιάς ισί σίγουρα δίκαιη. (Δευτερονόμιο 32:4) Η καταστροφή ι ντουνιάσκι να κα αργίνελ. Αφού κα καταστραφίντιβελ τελικά ανταβά ντουνιάς, σαρέ οντουλά σο ισί κο ουρανός ντα κι πφουβ κα συμφωνίνεν ότι η κρίση ι Ιεχωβάσκι ισινέ δίκαιη. Αζομάν σίγουρα κα λοκχιόλ αμαρό γκι!

3. Καλά σταρ προβλήματα κα χασάρντιβεν όταν κα αβέλ η Βασιλεία ι Ντεβλέσκι;

³ Σο ισί αντρέ κο «ντουνιάς» σο «χασάρντιβελα»; Ισί σαρέ ο μπέτι πράγματα σο συνηθίνενα τι κερέν ο τζενέ αντιβές. Σαρέ ανταλά πράγματα κα χασάρντιβεν. Ανταβά-ντα ισί αντρέ κο “λατσσέ αμπέρια κι βασιλειάκε”. (Ματθαίος 24:14) Ανταλέ μαθημάστε, κα ντικχάς σταρ προβλήματα σο κα χασάρντιβεν όταν κα αβέλ η Βασιλεία ι Ντεβλέσκι: πφιρνέ τζενέ, γκεραλέ οργανώσεις, γκεραλέ πράγματα σο αβένα-πες ντα ο μπαρέ δυσκολίες ι ζωγιάκε. Για κάθε πρόβλημας σο κα ντικχάς, κα σικλιάς (1) σαρ επηρεάνελα-αμέν ακανά, (2) σο κα κερέλ ο Ιεχωβά λέσκε ντα (3) σο κα αβέλ λέσκε θεσιάτε.

4. Σαρ επηρεάνενα-αμέν ακανά ο πφιρνέ τζενέ;

⁴ Σαρ επηρεάνενα-αμέν ακανά ο πφιρνέ τζενέ; Ο απόστολος Παύλος βακερντάς ότι, κο τελευταία ντιβεσά, “ο πράγματα κα αβένας μπουτ δύσκολα, να κα αβέλας εύκολος τι ντας-λεν πέρα”. Σοράν βακερντάς: «Πφιρνέ τζενέ ντα απατεώνες κα τζαν από το κακό στο χειρότερο». (2 Τιμόθεο 3:1-5, 13) Τουμέν νακχλέν κάτι ασακό; Μπουτ τζενέ αμένταρ τθεράας προβλήματα τζενένταρ σο κερένα συνέχεια φασαρίες, σο ισί ρατσιστές ντα σο ισί μπαρέ εγκληματίες. Μερικοί λένταρ να προσπαθίνενα τι γκεραβέν ο μπέτι πράγματα σο κερένα. Γιαβερά κερένα-πες ότι βοηθίνενα ι τζενέν, αλλά κι πραγματικότητα ισί πφιρνέ. Όμως ατζέ-ντα άμα να νακχλάμ κάτι ασακό, ο πφιρνέ τζενέ συνεχίνενα τι επηρεάνεν-αμέν. Χασαράσα αμαρό κουράγιος όταν ασουνάσα ότι συμπεριφερίντιβενα μπέτι κο χουρντέ, κο πφουρέ ντα κο γιαβερά τζενέ σο ναστί υπερασπίνενα πουμαρό νεαυτός. Η συμπεριφορά σο τθερένα ανταλά πφιρνέ τζενέ κερέλα-λεν τι αβέν σαρ άγρια ζώα ή τι μοιάζεν ατζέ-ντα με δαίμονες. (Ιακώβου 3:15) Ευτυχώς, ο Λάφι ι Ιεχωβάσκο ντέλα-αμέν ελπίδα.

5. (α) Καγιά ευκαιρία συνεχίνενα τι τθερέν ο πφιρνέ τζενέ; (β) Σο κα αβέλ-πες σαρέ κο τζενέ σο να μανγκένα τι αλλάνεν;

⁵ Σο κα κερέλ ο Ιεχωβά; Ακανά ο Ιεχωβά ντέλα κο πφιρνέ τζενέ ι ευκαιρία τι αλλάνεν. (Ησαΐας 55:7) Παρόλο σο ανταβά ντουνιάς κα καταστραφίντιβελ ατζεχάνικ, η τελική κρίση ι πφιρνέ τζενένγκι να αβιλί ατζέκ. Όμως σο κα αβέλ-πες κο τζενέ σο να κα μανγκέν τι αλλάνεν ντα κα συνεχίνεν τι υποστηρίνεν ανταλέ ντουνιάς όταν κα αβέλ η μπαρί στεναχώρια; Ο Ιεχωβά ντινάς πο λάφι ότι κα πάλντελ σαρέ ι πφιρνέ τζενέν κατά πφουβ. (Διαβάνεν Ψαλμός 37:10) Αντιβές, μπουτ τζενέ σικλιλέ τι γκεραβέν ο γκεραλέ πράγματα σο κερένα, ντα μπουτ φαρ να τιμωρίντιβενα. (Ιώβ 21:7, 9) Όμως, η Γραφή βακερέλα αμένγκε: «Ο γιακχά ι Ντεβλέσκε ισί οπράλ κο ντρομά κι τζενέσκε, ντα ντικχέλα σαρέ λέσκε βήματα. Να υπαρχίντιβελα καρανίκι ούτε βουτσσάλ για τι γκεραβέν-πες ο τζενέ σο κερένα μπέτι πράγματα». (Ιώβ 34:21, 22) Άρα, καέκ να μπορίνελα τι γκεραβέλ-πες κατά Ιεχωβά. Βοβ μπορίνελα τι ντικχέλ σαρέ ο πράγματα σο κερένα ο πφιρνέ τζενέ. Μετά τον Αρμαγεδδώνα, κάνα κα ντικχάς ο τθαν σο ισινέ ο πφιρνέ τζενέ, βον να κα αβέν οτθέ. Κα χασάρντιβεν για πάντα!—Ψαλμός 37:12-15.

6. Καλά τζενέ κα τζουβντιόν όταν ο πφιρνέ κα χασάρντιβεν, ντα σόσκε ισί λατσσέ αμπέρια ανταλά;

⁶ Καλά τζενέ κα τζουβντιόν όταν ο πφιρνέ κα χασάρντιβεν; Ο Ιεχωβά ντινάς  πο λάφι: «Ο τζενέ σο ισί ήρεμοι . . . κα τθερέν πουμένγκε ι πφουβ ντα κα αβέν ευτυχισμέ επειδή κα τθερέν μπουτ ειρήνη». Σοράν, κο ίδιος ψαλμός διαβάνασα: «Ο τζενέ σο ισί δίκαιοι κα τθερέν πουμένγκε ι πφουβ ντα κα τζουβντιόν για πάντα λάτε». (Ψαλμός 37:11, 29) Κον ισί ο «ήρεμοι» ντα «ο δίκαιοι»; Ο ήρεμοι ισί ο ταπεινά τζενέ σο σικλιόνα ντα ασουνένα ι Ιεχωβάς. Ο δίκαιοι ισί οντουλά σο μπεϊντίνενα τι κερέν οντουβά σο βακερέλα ο Ντεβέλ ότι ισί σωστός. Κο ντουνιάς σο τζουβντιάσα ακανά, ο πφιρνέ τζενέ ισί μπουτ ντα ο δίκαιοι χάνικ. Όμως κο νεβό ντουνιάς, κα τζουβντιόν σάντε ήρεμα ντα δίκαια τζενέ σο κα κερέν ι πφουβ παράδεισος!

7. Σαρ επηρεάνενα-αμέν ακανά ο γκεραλέ οργανώσεις;

⁷ Σαρ επηρεάνενα-αμέν ακανά ο γκεραλέ οργανώσεις; Μπουτ κατά μπέτι πράγματα σο αβένα-πες ανταλέ ντουνιάστε να κερένα-λεν ο τζενέ αλλά ο οργανώσεις. Ο θρησκείες χουχαβένα εκατομμύρια τζενέν. Για παράδειγμας, βακερένα κο τζενέ ψέματα ι Ντεβλέσκε, βακερένα ότι να μπορίνενα τι ντεν μπέσα κι Γραφή, ντα χουχαβένα-λεν ι πραγματένγκε σο κα αβέν κι πφουβ ντα κο τζενέ. Γκεραλέ κυβερνήσεις υποστηρίνενα ο τζένγκια ντα ο ρατσισμός, ντα πιένενα ι τσορορέν ντα οντουλέν σο να τθερένα καεκχές τι υποστηρίνελ-λεν. Ασακέ κυβερνήσεις αβένα πιο χουλανέ ντα πιο ζουρανέ επειδή βοηθίνενα οντουλέ τζενέν σο ισί πιο ζουρανέ για τι λεν λένταρ λοβέ. Γκεραλέ επιχειρήσεις ανένα μόλυνση κι πφουβ, καταστραφίνενα-λα ντα χουχαβένα ι τζενέν για τι μπορίνεν χάνικ τζενέ τι χουλάνιβεν ατζέ πιο μπουτ. Ισί ξεκάθαρος ότι ο γκεραλέ οργανώσεις ισί υπεύθυνες μπουτέ μπέτι πραγματένγκε σο αβένα-πες κο ντουνιάς αντιβές.

8. Σο βακερέλα η Γραφή ότι κα αβέλ-πες κο οργανώσεις σο ισί ζουρανέ κι τζενένγκε γιακχά;

⁸ Σο κα κερέλ ο Ιεχωβά; Η μπαρί στεναχώρια κα αρχίνελ όταν ο κυβερνήσεις κα κερέν επίθεση σαρέ κο ψεύτικες θρησκείες. Η Γραφή βακερέλα ότι ανταλά θρησκείες ισί σαρ εκ λουμνί σο βακέρντιβελα Βαβυλώνα η Μπαρί. (Αποκάλυψη 17:1, 2, 16· 18:1-4) Ανταλά θρησκείες κα καταστραφίντιβεν σαρέ. Αλλά σο κα παθίνεν σαρέ ο γκεραλέ οργανώσεις; Η Γραφή βακερέλα ότι μοιάζενα με βεσά ντα νησιά επειδή ντικχίντιβελα ότι ισί ζουρανέ ντα σταθερές. (Διαβάνεν Αποκάλυψη 6:14) Αλλά βακερέλα επίσης ότι ο κυβερνήσεις ντα σαρέ ο γιαβερά οργανώσεις σο να υποστηρίνενα ι Βασιλεία ι Ντεβλέσκι κα καταστραφίντιβεν. Ανταβά ισί ο τελευταίος πράγμας σο κα αβέλ κι μπαρί στεναχώρια. (Ιερεμίας 25:31-33) Σοράν, να κα αβέλ καέκ γκεραλί οργάνωση!

9. Σόσκε μπορίνασα τι αβάς σίγουροι ότι η νεβί πφουβ κα αβέλ λατσσές οργανωμέ;

⁹ Όταν κα καταστραφίντιβεν ο γκεραλέ οργανώσεις, σο κα αβέλ λένγκε θεσιάτε; Μετά τον Αρμαγεδδώνα, κα υπαρχίντιβελ κάποια οργάνωση κι πφουβ; Η Γραφή βακερέλα: «Αλλά μπεσάσα τι αβέλ νεβό ουρανός ντα νεβί πφουβ σαρ ντινάς πο λάφι, ντα οτθέ κα αβέλ δικαιοσύνη». (2 Πέτρου 3:13) Ο πουρανό ουρανός ντα η πουρανί πφουβ ισί ο γκεραλέ κυβερνήσεις ντα ο τζενέ σο κερένα-λεν κουμάντος ανταλά κυβερνήσεις. Αφού κα καταστραφίντιβεν, σο κα αβέλ λένγκε θεσιάτε; «Νεβό ουρανός ντα νεβί πφουβ». Ο νεβό ουρανός ισί εκ νεβί κυβέρνηση, η Βασιλεία, ντα οντουλά σο κυβερνίνενα ισί ο Ιησούς ντα ο 144.000. Η νεβί πφουβ ισί ο τζενέ σο κα κυβερνίνελ-λεν η Βασιλεία ι Ντεβλέσκι. Ο Ιησούς ντα ο 144.000 κα κυβερνίνεν αντικάς σαρ κα κυβερνίνελας ο Ιεχωβά, ο Ντεβέλ σο μανγκέλα τι αβέν σαρέ ο πράγματα με εκ σειράς.  (1 Κορινθίους 14:33) Άρα, η «νεβί πφουβ» κα αβέλ οργανωμέ. Οτθέ κα αβέν λατσσέ τζενέ σο κα φροντίνεν ο πράγματα. (Ψαλμός 45:16) Οντουλά τζενέ κα οδηγίντιβεν κατά Χριστός ντα κατά 144.000. Σκεφτίνεν ο ντιβές σο σαρέ ο γκεραλέ οργανώσεις κα καταστραφίντιβεν ντα λένγκε θεσιάτε κα αβέλ εκ ενωμέ οργάνωση σο να κα κερέλ ποτές γκεραλέ πράγματα!

10. Καλά γκεραλέ πράγματα κερένα ο τζενέ κο τθεμ σο τζουβντιόνα, ντα σαρ επηρεάντιβενα τουμέν ντα τουμαρί φαμιλί;

¹⁰ Σαρ επηρεάνενα-αμέν ακανά ο γκεραλέ πράγματα σο αβένα-πες; Τζουβντιάσα εκχέ ντουνιάστε σο ο τζενέ ισί συνηθισμέ τι τζαν γιαβερέντζαρ, τι χουχαβέν ο εκ ι γιαβερές ντα τι μουντάρντιβεν ο εκ ι γιαβερέσαρ. Ο τρόπος σο διασκεδάνενα ο τζενέ κερέλα ανταλά πράγματα τι ντικχίντιβεν σουκάρ, παρόλο σο τζάλα κόντρα κο νόμοι κι Ιεχωβάσκε σο σικαβένα καβά ισί ο σωστός ντα καβά ισί ο λάθος. (Ησαΐας 5:20) Οντουλά σο τθερένα τσσαβέν πρέπει τι προσπαθίνεν μπουτ τι αρακχαβέν πουμαρέ τσσαβέν ανταλέ μπέτι πραγματένταρ. Κι πραγματικότητα, σαρέ ο αληθινοί Χριστιανοί πρέπει τι προσπαθίνεν μπουτ για τι αρακχαβέν πουμαρί σχέση ι Ιεχωβάσαρ εκχέ ντουνιάστε σο να σεβάνελα ο νόμοι ι Ντεβλέσκε.

11. Σο σικλιάσα κατά κρίση σο αντάς ο Ιεχωβά κο Σόδομα ντα κο Γόμορρα;

¹¹ Σο κα κερέλ ο Ιεχωβά ι γκεραλέ πραγματένγκε σο αβένα-πες; Σκεφτίνεν σο κερντάς ο Ιεχωβά ι μπέτι πραγματένγκε σο αβένας-πες κο Σόδομα ντα κο Γόμορρα. (Διαβάνεν 2 Πέτρου 2:6-8) Ο Λωτ ισινέ εκ δίκαιος τζενό, ντα βοβ πι φαμιλιάσαρ τσσίντελας μπουτ κατά μπέτι πράγματα σο αβένας-πες αζομάν. Ο Ιεχωβά καταστραφιντάς σαρό οντουβά τθεμ για τι σταματίνελ ο μπέτι πράγματα σο αβένας-πες οτθέ. Όμως “ντινάς επίσης εκ παράδειγμας” κο πφιρνέ τζενέ αντιβές. Σαρ ο Ιεχωβά σταματιντάς ο μπέτι πράγματα σο αβένας-πες αζομάν, αντικάς κα σταματίνελ-λεν αντιβές-ντα όταν κα καταστραφίνελ ανταλέ ντουνιάς.

12. Καλά ισί μερικά πράγματα σο μπεκλεντίνενα τι κερέν όταν κα χασάρντιβελ ανταβά ντουνιάς;

¹² Όταν κα καταστραφίντιβεν ο γκεραλέ πράγματα σο αβένα-πες, σο κα αβέλ λένγκε θεσιάτε; Κο νεβό ντουνιάς, κα τθεράς μπουτ πράγματα τι κεράς σο κα ανέν αμένγκε χαρά. Για παράδειγμας, κα κεράς ι πφουβ παράδεισος ντα κα χτίνας κχερά αμένγκε ντα ι τζενένγκε σο μανγκάσα. Επίσης κα καλωσορίνας εκατομμύρια αναστημέ τζενέν σο κα αβέν πάλι κι ζωή ντα κα σικλιαράς-λεν ι Ιεχωβάσκε ντα σαρέ οντουλένγκε σο κερντάς ι τζενένγκε. (Ησαΐας 65:21, 22· Πράξεις 24:15) Αζομάν, κα κεράς πράγματα σο κα ανέν αμένγκε χαρά ντα κα ντεν δόξα κο Ιεχωβά!

13. Καβά ισινέ ο αποτέλεσμας επειδή ο Σατανάς, ο Αδάμ ντα η Εύα γκιλέ κόντρα κο Ιεχωβά;

¹³ Σαρ επηρεάνενα-αμέν ακανά ο μπαρέ δυσκολίες ι ζωγιάκε; Ανταβά ντουνιάς, σο ισί πφερντό πφιρνέ τζενέντζαρ, με γκεραλέ οργανώσεις ντα γκεραλέ πραγματέντζαρ σο αβένα-πες, ανέλα αμαρέ ζωγιάτε μπαρέ δυσκολίες. Σαρέ επηρεάντιβασα πραγματένταρ σαρ ισί ο τζένγκια, ο τσοροριπέ, ο ρατσισμός, ο νασφαλίματα ντα ο μεριπέ. Ανταλά μπαρέ δυσκολίες αρχισάλε επειδή ο Σατανάς, ο Αδάμ ντα η Εύα γκιλέ κόντρα κο Ιεχωβά. Ντα σαρέ επηρεασάλαμ οντουλέσταρ σο κερντέ.

14. Σο κα κερέλ ο Ιεχωβά για το μπαρέ δυσκολίες ι ζωγιάκε;

¹⁴ Σο κα κερέλ ο Ιεχωβά για το μπαρέ δυσκολίες ι ζωγιάκε; Σκεφτίνεν μερικά  παραδείγματα. Ο Ιεχωβά ντέλα πο λάφι ότι κα σταματίνελ σαρέ ο τζένγκια. (Διαβάνεν Ψαλμός 46:8, 9) Κα τσσουβέλ τέλος κο νασφαλίματα. (Ησαΐας 33:24) Κα μπιλιαβέλ ο μεριπέ για πάντα. (Ησαΐας 25:8) Κα σταματίνελ ο τσοροριπέ. (Ψαλμός 72:12-16) Ο Ιεχωβά κα νασκιαρέλ σαρέ ο μπαρέ δυσκολίες σο κερένα αντιβές αμαρί ζωή δυστυχισμέ. Να κα μουκχέλ ποτές ξανά τι επηρεάνελ-αμέν ο Σατανάς ντα λέσκε δαίμονες!—Εφεσίους 2:2.

15. Καλά ισί μερικά πράγματα σο κα χασάρντιβεν για πάντα μετά τον Αρμαγεδδώνα;

¹⁵ Απλά σκεφτίνεν σαρ κα αβέλ η ζωή εκχέ ντουνιάστε σο να κα τθερέλ τζένγκια, νασφαλίματα ή μεριπέ! Να κα τθερέλ στρατούς, πιστόλια ή γιαβερά πράγματα σο κα ανέν αμαρέ γκοντιάτε ο τζένγκι. Να κα χρειαζίντιβας νοσοκομεία, γιατρούς, νοσοκόμες, νεκροτομεία ή μεζάρια! Να κα υπαρχίντιβελ έγκλημας, άρα ούτε ασκέρια ντα συναγερμοί. Μπορεί μα τι υπαρχίντιβεν ατζέ-ντα κλειδαριές ντα κλειδιά! Σαρέ ανταλά μπαρέ δυσκολίες σο ανένα αμένγκε αζόμ μπαρό άγχος κα χασάρντιβεν για πάντα.

16, 17. (α) Σαρ κα νιωθίνεν οντουλά σο κα τζουβντιόν κατά Αρμαγεδδώνας; Ντεν παράδειγμας. (β) Σαρ μπορίνασα τι αβάς σίγουροι ότι κα συνεχίνας τι τζουβντιάς όταν ανταβά ντουνιάς κα χασάρντιβελ;

¹⁶ Σαρ κα αβέλ η ζωή όταν να κα τθεράς μπαρέ δυσκολίες; Νανέ εύκολος τι σκεφτίνας-λες ανταβά. Μπουτ μπρεσά τθεράσα αμαρέ ζωγιάτε αζόμ μπαρέ δυσκολίες σο μπορεί μα τι αγαβάσα καζόμ μπαρό άγχος ανένα αμένγκε. Για παράδειγμας, ο τζενέ σο μπεσένα πασέ σε εκ στάση σο νακχένα μπουτ τρένα μπορεί μα τι αγαβένα ο θόρυβος σο υπαρχίντιβελα οτθέ. Ντα ο τζενέ σο μπεσένα πασέ εκχέ τθανέστε σο φουρτίνενα ο σκουπίδια μπορεί μα τι αγαβένα ότι κχάντελα. Αλλά όταν ο Ιεχωβά κα νασκιαρέλ σαρέ ο μπαρέ δυσκολίες αμαρέ ζωγιάταρ, αμαρό γκι σίγουρα κα λοκχιόλ!

¹⁷ Όταν κα νασέλ ο άγχος σο τθεράσα ακανά, σο κα αβέλ λέσκε θεσιάτε; Ο εδάφιος Ψαλμός 37:11 βακερέλα: «Κα αβέν ευτυχισμέ επειδή κα τθερέν μπουτ ειρήνη». Αρακχάσα μπαρί παρηγοριά σο τζανάσα ότι ανταβά μανγκέλα αμένγκε ο Ιεχωβά! Ανταλέ ντιβεσέντε σο ανένα μπουτ άγχος κο τζενέ, κερέν σο νακχέλα τουμαρέ βαστέσταρ για τι ατσσόν πασέ κο Ιεχωβά ντα κι οργάνωση λέσκι. Τουμαρί ελπίδα για το μέλλον τθερέλα μπαρί αξία, οτθάρ τι σκεφτίνεν-λα συνέχεια, τι αβέν σίγουροι ότι ισί πραγματική τουμένγκε ντα τι κερέν λάφι λάκε κο γιαβερά. (1 Τιμόθεο 4:15, 16· 1 Πέτρου 3:15) Αντικάς, μπορίνενα τι αβέν σίγουροι ότι, όταν ανταβά ντουνιάς κα καταστραφίντιβελ, τουμέν κα συνεχίνεν τι τζουβντιόν ντα κα αβέν χαρούμενοι για πάντα!