1, 2. (a) Ndi munjira ipi dziko isalandaniswa na phanga wakuti asadikhira kuphiwa? (Onani cithundzithundzi cakutoma.) (b) Kodi onsene kudzulu na pa dziko yapantsi anapibva tani pakumala kufudzwa kwa dziko ino?

NYEREZERANI citsandzo ici: Phanga wakugopswa atongwa toera kuphiwa. Natenepa akutsogolerwa na anyakuonera kaidi toera kaphiwa. Maseze phanga unoyu ali maso, pontho akuoneka na ungumi wadidi, mbwenye iye asadikhira kuphiwa. *—Onani cidzindikiro capantsi.

² Dziko inakhala ife lero isalandaniswa na phanga unoyu wakugopswa wakuti asadikhira kuphiwa. Bhibhlya isalonga: ‘Dziko ikumala.’ (1 Jwau 2:17) Natenepa tinakwanisa kukhala na cinyindiro cakuti dziko inadzafudzwa. Mbwenye pana kusiyana kukulu pakati pakumala kwa dziko ino na kuphiwa kwa phanga. Kuphiwa kwa phanga, panango anakwanisa kutsidzikizwa na munthu unango mukulonga kuti iye nee atongwa mwadidi. Kusiyapo  pyenepi, nyakutonga miseru panango anakwanisa kucinja pidatonga iye toera phanga akhonde kuphiwa. Mbwenye kufudzwa kwa dziko ino, kwatongwa na Yahova, ntongi wakulungama na waungwiro. (Deuteronomyo 32:4) Yahova nee anacinja pidalonga iye, pontho nkhabepo munthu anakwanisa kukhondesa pidatonga iye. Pyenepi pingamala, onsene kudzulu na pa dziko yapantsi anadzatawira kuti Yahova atonga mwakulungama. Pinadzakhala pyakutsandzayisa kakamwe!

3. Ndi pinthu pipi pinai pinafuna kufudzwa Umambo wa Mulungu ungabwera?

³ Lemba ya 1 Jwau 2:17 isalonga kuti ‘dziko ikumala.’ Mphapo ‘dziko’ ineyi isaphatanizanji? Iyo isaphataniza pinthu pizinji pyakuti anthu asapicita lero, mbanyerezera kuti iwo anapitiriza na makhaliro anewa, mbwenye mwandimomwene iwo anadzafudzwa. Kodi mphangwa zenezi ndi zakuipa? Nkhabe! Izo zisacita khundu ya ‘mphangwa zadidi za Umambo.’ (Mateo 24:14) Natenepa, tendeni tidinge pinthu pinai pinafuna kudzamaliswa na Umambo wa Mulungu ungabwera: (1) anthu akuipa, (2) misoka yakuipa, (3) macitiro akuipa na (4) makhaliro akuipa. Mwa pinthu pyenepi tinadzaona kuti pisakhuya tani umaso wathu lero, Yahova anadzacitanji na pyenepi, pontho iye anadzacita tani toera kubweresa pinthu pyadidi.

4. Kodi anthu akuipa asatikhuya tani lero?

⁴ Kodi anthu akuipa asatikhuya tani lero? Mpostolo Paulu alonga kuti mu ntsiku zakumalisa, ‘inadzaoneka midzidzi yakunentsa kupirira.’ Buluka penepo iye alonga: ‘Anthu akuipa na akunyengeza andzawo, anadzathimiza na kuipa kwawo.’ (2 Timoti 3:1-5, 13) Kodi musaona kukwanirisika kwa pyenepi? Azinji a ife tikhali anthu ausumankha, atsankhulo na auphanga. Anango a iwo nee akhayesera kubisa pinthu pyakuipa pikhacita iwo. Anango asabisa makhaliro awo akuipa. Maseze nee tisacitirwa pyauphanga, tisakhuyiwambo na anthu akuipa. Ife tisadzudzumika kakamwe tingabva njira zakuipa zinatsalakanira iwo ana, ankhalamba na anthu anango akuti nee anakwanisa kutsidzikizika okha. Anthu anewa akuipa asacita pinthu ninga pinyama pyantsanga peno mademonyo. (Tyago 3:15) Mwakutsandzayisa, Mafala a Yahova asatipasa cidikhiro.

5. (a) Kodi anthu akuipa ali na ndzidzi toera kucitanji? (b) Ninji pinafuna citikira anthu anakhonda cinja?

⁵ Kodi Yahova anadzacitanji? Lero Yahova asapasa ndzidzi anthu akuipa toera kucinja. (Izaiya 55:7) Maseze makhaliro ano anafudzwa mwakucimbiza, ntsiku yakutongwa kwawo kwakumalisa idzati fika. Mphapo ninji pinafuna citikira ale anakhonda cinja na ale anaphedzera makhaliro ano mpaka pa nyatwa ikulu? Yahova apikira kuti anadzafudza anthu akuipa pa dziko yapantsi. (Lerini Masalmo 37:10, Tradução do Novo Mundo.) Lero, azinji asabisa pinthu pyakuipa pisacita iwo, mbakhonda kutcunyuswa. (Yobe 21:7, 9) Mbwenye Bhibhlya isalonga: ‘Mulungu asaona makhaliro a anthu mbaonera mafambiro awo ene. Nkhabeko cidima na mbuto yakubisalika toera anthu abise pyakuipa pinacita iwo.’ (Yobe 34:21, 22) Natenepa nkhabepo njira toera kubisira Yahova. Iye asaona pyonsene pinacita anthu akuipa. Pakumala kwa Armajedhoni, tinadzasaka kunakhala iwo, mbwenye nee anadzaonekabve!—Masalmo 37:12-15.

6. Mbani anadzapulumuka anthu akuipa angadzafudzwa, pontho thangwi yanji mphangwa zenezi ndi zakutsandzayisa?

 ⁶ Mbani anadzapulumuka anthu akuipa angadzafudzwa? Yahova apikira: ‘Anthu akupfulika anadzakhala mu dziko, mbakomerwa na ntendere ukulu kakamwe.’ Pa lemba ibodzi ene ya masalmo, tisaleri: ‘Anthu akulungama anadzatambira dziko, mbakhala mwenemo kwenda na kwenda.’ (Masalmo 37:11, 29) Mbani ‘anthu akupfulika’ na ‘anthu akulungama’? Anthu akupfulika ndi akucepeseka na asabvera Yahova. Anthu akulungama ndi ale anakomerwa kucita pinthu pyadidi pinalonga Mulungu. Pa dziko yapantsi lero, pana anthu azinji akuipa kupiringana akulungama. Mbwenye mu dziko ipswa, munadzakhala anthu akulungama na akupfulika basi. Iwo anadzacitisa dziko yapantsi kukhala paraizu!

7. Kodi misoka yakuipa isatikhuya tani lero?

⁷ Kodi misoka yakuipa isatikhuya tani lero? Pinthu pizinji pyakuipa pinacitwa lero, nee pisacitwa na munthu m’bodzi na m’bodzi, mbwenye na misoka. Misoka ya mauphemberi isanyengeza anthu azinji kakamwe. Mwacitsandzo, iwo asalonga uthambi thangwi ya Mulungu, asalonga kuti Bhibhlya nee ndi yakunyindirika, pontho asalonga pyauthambi thangwi ya tsogolo ya anthu na dziko yapantsi. Mautongi akuipa asacitisa nkhondo, kuidana kwa madzindza, kuponderera anthu akutcerenga na kusoweka kwa citsidzikizo. Mautongi anewa asapfuma kakamwe mbakhala akubvekera thangwi yakutawira kudyekerwa. Makomponi asapswipisa dziko, kufudza pyakucitwa, pontho asaponderera anthu toera kupfumisa anthu akucepa. Mwakukhonda penula, misoka ineyi isacitisa nyatwa zizinji kakamwe lero.

8. Bhibhlya isalonganji thangwi ya misoka inaoneka ninga yakuwanga lero?

⁸ Kodi Yahova anadzacitanji? Nyatwa ikulu inadzatoma mu ndzidzi wakuti mautongi amphambvu angapomokera uphemberi waunthawatawa, wakuti m’Bhibhlya asadziwika ninga nkazi waupombo, anacemerwa Bhabhilonya Wankulu. (Apokalipse 17:1, 2, 16; 18:1-4) Misoka ineyi ya mauphemberi inadzafudzwa kwenda na kwenda. Mphapo ninji pinadzacitika na misoka inango yonsene yakuipa? Bhibhlya isalandanisa misoka ineyi na mapiri na ntsuwa thangwi isaoneka ninga yakuwanga na yakukhonda tekenyeka. (Lerini Apokalipse 6:14.) Mbwenye Bhibhlya isalongambo kuti mautongi na misoka inango yonsene yakuti nee isaphedzera Umambo wa Mulungu, inadzafudzwa. Ineyi inadzakhala khundu yakumalisa ya nyatwa ikulu. (Yeremiya 25:31-33) Pakumalisa, nkhabe kudzaonekabve misoka yakuipa!

9. Thangwi yanji tisanyindira kuti dziko ipswa inadzatsalakanwa mwadidi?

⁹ Mbani anadzakhala pa mbuto ya misoka yakuipa? Kodi panadzaoneka misoka inango pa dziko yapantsi pakumala kwa Armajedhoni? Bhibhlya isalonga: ‘Ife tisadikhira kudzulu kupswa na dziko yapantsi ipswa, munakhala ulungami ninga mudapikira iye.’ (2 Pedro 3:13) Kudzulu kwakale na dziko yapantsi yakale ndi mautongi akuipa na anthu anatsogolerwa na mautongi anewa. Angamala kufudzwa, mbani anafuna kudzakhala pa mbuto yawo? ‘Kudzulu kupswa na dziko yapantsi ipswa.’ Kudzulu kupswa kusabveka utongi upswa, Umambo wakuti unadzatsogolerwa  na Yezu Kristu pabodzi na atongi andzace akukwana 144.000. Dziko yapantsi ipswa isabveka anthu anafuna kudzatongwa na Umambo wa Mulungu. Yezu na atongi andzace anadzatowezera mwadidi Yahova Mulungu, wakuti ndi Mulungu wakucita pinthu munjira yadidi. (1 Akorinto 14:33) Natenepa ‘dziko yapantsi ipswa’ inadzatsalakanwa mwadidi. Dziko inadzakhala na amuna adidi toera kutsalakana pinthu. (Masalmo 45:16) Amuna anewa anadzatsogolerwa na Kristu pabodzi na akudzodzwa 144.000. Pinadzakhala pyakutsandzayisa kakamwe kuona kufudzwa kwa misoka yonsene yakuipa, mbipitirwa m’mbuto na nsoka ubodzi wakuti cipo unadzakhala wakuipa!

10. Ndi macitiro api akuipa akuti asaoneka kazinji kene kunakhala imwe, pontho asakhuya tani imwe na banjanu?

¹⁰ Kodi macitiro akuipa asatikhuya tani lero? Ife tikukhala mu dziko yakuti yadzala na makhaliro aulukwali, kusowa ulungami na uphanga. Ubalangazi wa dziko usacitisa pinthu pyenepi kukhala pyakutundusa pyakuti pisacitisa anthu kupwaza midida ya Yahova yakusiyanisa pinthu pyadidi na pyakuipa. (Izaiya 5:20) Makamaka anyakubala asafunika kuwangisira toera kutsidzikiza anawo ku pinthu pyakuipa. Mbwenye Akristu onsene andimomwene asafunika kuwangisira toera kutsidzikiza uxamwali wawo na Yahova mu dziko ino yakuti nkhabe kulemedza midida ya Mulungu.

11. Tisapfundzanji thangwi ya pidacita Yahova mukufudza Sodhoma na Gomora?

¹¹ Yahova anadzacitanji na macitiro akuipa? Nyerezerani pidacita Yahova mu ndzidzi wakale thangwi ya pinthu pyakuipa pikhacitika mu nzinda wa Sodhoma na Gomora. (Lerini 2 Pedro 2:6-8.) Loti akhali munthu wakulungama, pontho iye na banjace athabuka kakamwe thangwi ya pinthu pyakuipa pikhacita anthu. Yahova afudza pinthu pyonsene pyakuipa pikhacitika mu nzinda unoyu. Natenepa iye ‘akhapangiza’ pinafuna kucitikira anthu akuipa lero. Ninga pidacita Yahova mukumalisa makhaliro aulukwali akale, iye anadzacitambo pibodzi pyene mu ndzidzi unafuna iye kufudza makhaliro ano akuipa.

12. Ndi mabasa api anango akutsandzayisa anadikhira ife kucita ntsogolo?

¹² Ninji pinafuna kudzapitira m’mbuto macitiro akuipa? Mu dziko ipswa, tinadzakhala na mabasa mazinji akutsandzayisa. Mwacitsandzo, tinadzacitisa dziko toera kukhala paraizu na kumanga nyumba zathu na za anyakufunika athu. Tinadzatambira anthu azinji kakamwe anafuna kulamuswa muli akufa na kuapfundzisa thangwi ya Yahova, pontho na pyonsene pidacita iye kwa anthu. (Izaiya 65:21, 22; Macitiro 24:15) Mu ndzidzi unoyu, tinadzacita mabasa akutsandzayisa mbatipasa mbiri Yahova!

13. Ninji pinacitika lero thangwi ya upanduki mu Edheni?

¹³ Kodi makhaliro akuipa asatikhuya tani lero? Dziko yadzala na anthu akuipa, misoka yakuipa na makhaliro akuipa anacitisa kuti tikhale mwakunentseka. Tonsene tisakhuyiwa na nkhondo, utcerengi, tsankhulo, utenda na kufa. Makhaliro anewa atoma thangwi Sathani, Adhamu na Eva apandukira Yahova. Pontho tonsene tisakhuyiwambo na kukhonda kwawo kubvera Yahova.

14. Yahova anadzacitanji na makhaliro akuipa?

 ¹⁴ Yahova anadzacitanji na makhaliro akuipa? Dingani mapikiro mangasi. Yahova apikira kumalisa nkhondo zonsene. (Lerini Masalmo 46:8, 9.) Iye anadzamalisa utenda. (Izaiya 33:24) Iye anadzafudza kufa kwenda na kwenda. (Izaiya 25:8) Iye anadzamalisa utcerengi. (Masalmo 72:12-16) Pontho Yahova anadzafudza makhaliro akuipa akuti asacitisa umaso kukhala wakunentsa lero. Iye anadzafudzambo pyonsene pinacitiswa na Sathani na mademonyo ace!—Aefesi 2:2.

15. Ndi pinthu pipi pinango pinadzafudzwa pa Armajedhoni kwenda na kwenda?

¹⁵ Nyerezerani kudzakhala mu dziko yakusowa nkhondo, utenda, peno kufa! Nkhabe kudzaonekabve anyankhondo na pida pya nkhondo. Ife nee tinadzafuna nyumba yaungumi, madotoro, nyumba zinakoyerwa anthu akufa na masiye. Nkhabe kudzaonekabve uphanga, nee tinadzafuna apolixa, sistemas de alarme, makandiado peno maxavi! Makhaliro anewa akuipa akuti asatidzudzumisa anadzafudzwa kwenda na kwenda.

16, 17. (a) Kodi ale anafuna kupulumuka pa Armajedhoni anadzapibva tani? Perekani citsandzo. (b) Tinakhala tani na cinyindiro cakuti tinadzapulumuka dziko ino ingafudzwa?

¹⁶ Umaso unadzakhala tani makhaliro akuipa angafudzwa? Mwandimomwene pyenepi pisaoneka ninga ndoto. Ife tatoma kale kakamwe kuthimbana na makhaliro akuipa akuti panango nee tisadzudzumikabve nawo. Mwacitsandzo, anthu anakhala cifupi na mbuto inafikira xitima panango nee asabvabve dzumbi ya xitima. Pontho anthu anakhala cifupi na mbuto inataiwa lixo panango nee asabvabve kununkha kwa lixo. Mbwenye Yahova angadzamalisa makhaliro onsene akuipa, pinadzakhala pyakutsanzayisa kakamwe!

¹⁷ Ninji pinafuna kudzapitira m’mbuto kutsukwala kunakhala na ife lero? Lemba ya Masalmo 37:11, NM, isalonga: ‘Iwo anadzakomerwa na ntendere ukulu kakamwe.’ Mphyakubalangaza kakamwe kudziwa kuti Yahova asafuna kucita pyenepi kuna ife! Midzidzi ino yakunentsa, citani pyonsene pinakwanisa imwe toera kukhala cifupi na Yahova na gulu yace. Cidikhiro canu cantsogolo ndi cakufunika kakamwe, natenepa nyerezerani mwadidi thangwi ya pyenepi, khalani na cinyindiro cakuti ipyo pinadzacitika kwa imwe, pontho panganimbo anango pyenepi. (1 Timoti 4:15, 16; 1 Pedro 3:15) Natenepa, munakwanisa kukhala na cinyindiro cakuti makhaliro ano a pinthu angadzafudzwa, imwe munapulumuka na kutsandzaya kwenda na kwenda!