1, 2. (a) Mwa enamuna xeeni olumwenku ola wootakhala onlikana aya ni nakrime olamuliwe wiiviwa? (Nwehe elatarato yoopacerya.) (b) Atthu otheene wiirimu ni valaponi-va anrowa woonela sai nuumala opwetexiwa olumwenku ola?

NKAHAYA muupuwela ela: Nakrime mmosa oolamuliwa wiiviwa. Okathi wotheene, owo onniweha-wehiwa ni mapiliisa okhala wira onrowa wiiviwa. Nnaamwi nakrime ole ori ene mukumi, owo oneetta ookhwa ene. *​—Nwehe enoota.

² Olumwenku ola onikhala ahu onoolikana ni nakrime ole olamuliwe wiiviwa. Biibiliya onihimya wira: “Makhalelo ala anomala”. (1 Yohani 2:17) Moohipisa, Yehova onrowa omaliha makhalelo ootakhala a olumwenku ola, nto eyo enimwiiraneya tthiri. Masi wookhala ovirikana wuulupale eriyari ya omalihiwa wa makhalelo ala ni wiiviwa wa nakrime ole. Atthu akina pooti ohimya wira ophukeliwa wa nakrime ole ti woohixariya, nave awo pooti ovaanyiha aphavelaka wira nakrime ole ohiiviwe. Hata vari siiso, Yehova ti namaphuka a xariya, nto yoolakela  awe ya opwetexa olumwenku ola ti ya xariya. (Otumererya 32:4) Nto olamuliwa wa olumwenku ola khoninteya. Nuumala opwetexiwa olumwenku ola, atthu otheene wiirimu ni valaponi-va anrowa okupali wira ophukela wa Yehova ti wa xariya. Tthiri vanrowa okhala otaphuwa wuulupale!

3. Mixankiho xeeni mixexe sinrowa omalihiwa okathi Omwene wa Muluku onrwa aya?

³ Nto “makhalelo” xeeni anrowa ‘omala’? Makhalelo awo anihela muhina itthu sootakhala siniiraneya olelo-va. Itthu iyo sotheene, sinrowa omala moohipisa. Nto muhupi owo oniirela mpantta ‘ihapari sorera s’Omwene’. (Matheyo 24:14) Mwaha ola, ninrowa othokorerya mixankiho mixexe sinrowa omalihiwa okathi Omwene wa Muluku onrwa aya, niire so, atthu ootakhala, mitthenkeso sootakhala, itthu soohiloka ni mikhalelo soohiloka. Okathi ninrowa ahu othokorerya itthu iya, ninrowa wiixutta (1) moota sinnihapuwela aya, (2) ele Yehova onrowa awe opaka ni (3) moota Yehova onrowa awe orantteliha.

4. Olelo-va, moota xeeni atthu ootakhala annihapuwela aya?

⁴ Moota xeeni atthu ootakhala annihapuwela aya? Murummwa Paulo aahimmye wira “okathi wokiserya, anophiya mahiku òxanka”. Nave ahincererya oriki: “Atthu òtakhala murima ni òwòtha anovira etepaka”. (2 Timótheyo 3:1-5, 13) Niireke munniweha eyo yiiraneyaka? Anamunceene a hiyo pooti wira nootoko ohaaxiwa ni atthu ootakhala, ntoko atthu oowali, a nthalu ni anakrime. Atakhali akina khanivitha itthu anipaka aya. Akina anikhala ntoko aniphavela okhaliherya, masi aphavelaka owiiriha etthu yootakhala. Hata nihiphwanyiwe ni anakrime awo, hiyo ninnixanka mwaha wa itthu sinipakiwa ni atakhali awo. Nave ninnixanka vaavo nniiwa ahu moota anihaaxiwa aya anamwane, atthu oowuuluvala ni ale ahirina mutthu oowaakiha. Itthu sinipakiwa ni atakhali sinniwiiriha okhalaka ntoko axinama aahiiso minepa sootakhala. (Yakobo 3:15) Moohakalaliha, Nuulumo na Yehova ninninivaha nlipelelo.

5. (a) Eparakha xeeni atakhali arina aya? (b) Exeeni enrowa owiiraneela ale anikhootta opaka marukunuxo?

⁵ Yehova onrowa opaka exeeni? Olelo-va, Yehova onnaavaha eparakha atakhali wira arukunuxe murima aya. (Yesaya 55:7) Nnaamwi olumwenku ola wootakhala orowaka opwetexiwa moohipisa, nlelo atakhali awo khanatthi ophukeliwa. Nto exeeni enrowa owiiraneela ale anikhootta opaka marukunuxo? Ankhi ale anrowa ophwanyiwa akhaliheryaka olumwenku ola mpakha maxakha maalupale? Yehova ooleiherya waapwetexa atakhali otheene valaponi. (Musome Esalimo 37:10.) Olelo-va, atthu anceene annivitha itthu soohiloka anipaka aya, nto okathi mukina khanihukhummwa. (Yobi 21:7, 9) Masi Biibiliya onihimya wira: “Owo onniweha mwettelo w’atthu: onnalikela mavalo aya othene. Khivo epiphi walá ewiriphi enwerya wavitha atakhali vamaithoni vawe”. (Yobi 34:21, 22) Tivonto, khiivo etthu Yehova ohiniwerya awe oweha. Owo onniweha itthu sotheene sinipakiwa ni atakhali. Nuumala Armagedoni, ninrowa owaavyaka opuro yaakhala aya, masi khaninrowa waaphwanya. Maana anrowa opwetexiwa khuluwi!​—Esalimo 37:12-15.

6. Tani anrowa woopowa okathi atakhali anrowa aya opwetexiwa, ni xeeni siri aya ihapari sooreera?

 ⁶ Tani anrowa woopowa okathi atakhali anrowa aya opwetexiwa? Yehova onileiherya wira: “Vano atthu òmàla anoreriwa vathí-va: anokhala-mu ni murettele womalela”. Eversiikulu ekina eri esaalimo emosaru enihimya so: “Anaxariya animwakhela elapo yohiyeriw’aya: anrowa okhalaka-mo mahiku othene”. (Esalimo 37:11, 29) Tani anihimmwa okhala “atthu òmàla” ni “anaxariya”? Atthu oomaala, taale oowiiyeviha aniphavela wiixutta ni omwiiwelela Yehova. Nto anaxariya taale anisiveliwa ni ele Muluku onihimya awe okhala ya xariya. Molumwenkuni olelo-va, atakhali khareere masi anaxariya ari vakhaani. Elapo esya, anrowa okhala paahi atthu oomaala ni anaxariya, yaawo anrowa wiiriha elapo okhala eparayiisu!

7. Olelo-va, mitthenkeso sootakhala sinnihapuwela sai?

⁷ Moota xeeni mitthenkeso sootakhala sinnihapuwela aya? Itthu sootakhala sihireere valaponi olelo-va, khahiyo sinikumiheriwa ni mutthu mmosa paahi, masi-tho sinikumiheriwa ni mitthenkeso. Mitthenkeso sa itiini sinnaawoka atthu anceene. Mwa ntakiheryo, khasinihimya ekeekhai voohimya sa Muluku, sinihimya wira Biibiliya khoniroromeleya ni sinnaawoka atthu voohimya sa ele enrowa owiiraneela apinaatamu muhoolo valaponi. Iguvernu sootakhala sinnikumiherya ekhotto, nthalu ni waahasula alipa-oohaawa ni ale ahirina mutthu oowaakiha. Anamalamulela a elapo anootepa opwalaha ni okhalana oowerya mwaha wa makhwankwa. Mitthenkeso iyo sootakhala sinnipahula elapo, ohonona mireerelo sa elapo, nave sinnithaaciri mwaha wowiiyerya atthu. Mwekeekhai, mitthenkeso sootakhala sinnikumiherya ohaawa wuulupale valaponi olelo-va.

8. Moovarihana ni Biibiliya, exeeni enrowa wiiraneya ni mitthenkeso sotheene sinooniwa okhala ntoko soolipa olelo-va?

⁸ Yehova onrowa opaka exeeni? Maxakha maalupale anrowa opacerya vaavo anamalamulela a epoliitika anrowa aya otuphela mitthenkeso sa itiini sowootha, seiyo Biibiliya onihimya awe okhala namararuwa, niire so, Babilonia Muulupale. (Wisupulula 17:1, 2, 16; 18:1-4) Mitthenkeso iyo sa itiini sinrowa opwetexiwa moomalela. Exeeni enrowa wiiraneya ni mitthenkeso sotheene sootakhala? Biibiliya onnilikanyiha mitthenkeso iyo ni myaako ni isisiro, mwaha woowi sinooniwa okhala ntoko soolipa. (Mmusome Wisupulula 6:14.) Nave onihimya wira iguvernu ni mitthenkeso sihinikhaliherya Omwene wa Muluku sinrowa opwetexiwa. Nto eyo enrowa wiiraneya mpantta wookiserya wa maxakha maalupale. (Yeremiya 25:31-33) Nuumala-vo, mitthenkeso sotheene sootakhala khasinrowa okhala!

9. Exeeni ennikupaliha wira elapo esya enrowa okhala yootthokiheya saana?

⁹ Mitthenkeso sootakhala sinrowa oranttelihiwa ni exeeni? Nuumala Armagedoni, niireke wookhala mutthenkeso onrowa ohala valaponi? Biibiliya onaakhula so: “Ninniwehererya erimu esyá n’ilapo esyá, eryaya-mo exariya, ntoko sihimalyawe Muluku”. (2 Pedru 3:13) Erimu ni elapo ya khalai, sinihimmwa iguvernu sootakhala ni atthu oohixariya anaalamulela aya. Exeeni enrowa oranttela iguvernu iyo? Sinrowa  oranttelihiwa ni “erimu esyá n’ilapo esyá”. Erimu esya, enihimmwa eguvernu esya, erina mwene aya Yesu Kristu ni anamalamulela akhwaawe 144.000. Elapo esya, anihimmwa atthu anrowa olamuleliwaka ni Omwene owo. Yesu ni anamalamulela akhwaawe, anrowa omutakihaka moomalela Yehova Muluku, yoowo ori Muluku ootthokiheya. (1 aKorinto 14:33) Tivonto, ‘elapo esyá’ enrowa okhala yootthokiheya. Nto, anrowa othanliwa makhulupale wira aneettiheke. (Esalimo 45:17) Atthu awo anrowa olakiheriwaka ni Kristu vamosa ni 144.000. Nkahaya muupuwele okathi mitthenkeso sotheene sootakhala sinrowa ya oranttelihiwa ni mutthenkeso mmosa wowiiraana ni ohinrowa-tho okhala wootakhala!

10. Itthu xeeni soohiloka sihireere wuulaana mmuttettheni mwanyu, nto exeeni enitthuneya opaka?

¹⁰ Moota xeeni itthu soohiloka sinnihapuwela aya? Hiyo ninkhala olumwenku woosareya ohiroromeleya, orupihana woohiloka ni otakhala wuulupale. Okhala wira matthekulelo a olumwenku ola annooniherya itthu iyo ntoko sooloka, eyo enniwiiriha atthu woonaka itthu sooreera okhala sootakhala nto sootakhala okhala sooreera. (Yesaya 5:20) Wira itthu iyo sihaapahule, anamuyari ahaana wiimananiha wira yaakiherye waamini wa anaaya. Mwekeekhai, maKristau otheene ahaana wiimananiha wira yaakiherye wataana waya ni Yehova olumwenku ola atthu ahinittittimiha aya malamulo a Muluku.

11. Mwaha wa Yehova ophukela ipooma sa oSodoma ni oGomora, onniixuttiha exeeni?

¹¹ Yehova onrowa wiiriha exeeni itthu soohiloka? Muthokorerye ele Yehova aapanke awe ni ipooma sa oSodoma ni oGomora, mwaha wa itthu soohiloka saapakiwa. (Mmusome 2 Pedru 2:6-8.) Lothi aari mulopwana a xariya. Owo ni etthoko awe yaanihaawa vanceene mwaha wa itthu soohiloka saapakiwa ni atthu a elapo ele. Nto Yehova aahipwetexa mittetthe iye wira omalihe itthu soohiloka saapakiwa. Nave owo ‘ohathonyerya’ ele enrowa owiiraneela atakhali a mahiku ala. Okhala wira khalai Yehova aahimaliha orupihana woohiloka, nave olelo-va onrowa omaliha okathi onrowa awe opwetexa olumwenku ola.

12. Nuumala opwetexiwa olumwenku ola, miteko xeeni sinlipelela anyu ovara?

¹² Itthu soohiloka sinrowa oranttelihiwa ni exeeni? Elapo esya, ninrowa okhalana miteko sinceene soohakalaliha. Mwa ntakiheryo, ninrowa wiiriha elapo okhala eparayiisu ni oteka ipa sahu ni sa amusi ihu. Nave-tho, ninrowa owaakhela atthu imilyau sinceene anrowa ohihimuxiwa ni owiixuttiha voohimya sa Yehova ni ele aapakenle awe apinaatamu. (Yesaya 65:21, 22; Miteko 24:15) Tthiri, okathi owo, ninrowa ovaraka miteko soohakalaliha ni onvuwiha Yehova!

13. Exeeni ekhumelenle mwaha wa orukunuweliwa Yehova wEedeni?

¹³ Moota xeeni mikhalelo soohiloka sinnihapuwela aya? Olumwenku woosareya atakhali, mitthenkeso sootakhala ni itthu soohiloka sinniiriha okhalaka mmikhalelo soohiloka. Otheene ahu ninnixanka mwaha wa ikhotto, ohaawa, nthalu, iretta ni okhwa. Mikhalelo iya soohiloka sipacenrye mwaha wa Satana, Adamu ni Eva omurukunuwela Yehova. Nto otheene ahu ninnihaawa mwaha wa orukunuweliwa Yehova.

14. Yehova onrowa opaka exeeni ni mikhalelo iya soohiloka?

 ¹⁴ Exeeni Yehova onrowa awe opaka ni mikhalelo soohiloka? Nwehe matakiheryo ala: Yehova onileiherya wira onoomaliha ikhotto. (Musome Esalimo 46:9, 10.) Owo onrowa omaliha iretta. (Yesaya 33:24) Onrowa omaliha okhwa. (Yesaya 25:8) Onrowa omaliha ohaawa. (Esalimo 72:12-16) Nave Yehova onrowa omaliha itthu sotheene soohiloka siniiriha okumi okhala wooxankiha olelo-va. Onrowa-tho omaliha itthu sotheene sootakhala sinikumiheriwa ni Satana ni minepa sawe!​—aÉfeso 2:2.

15. Nuumala Armagedoni, mikhalelo xeeni soohiloka sinrowa omalihiwa?

¹⁵ Nkahaya muupuwele moota onrowa aya oreera okhala elapo ehinrowa okhala ikhotto, iretta ni okhwa! Khanrowa okhala atoropa, ikapwitthi aahiiso mahiku anuupuweleliwa ekhotto. Khasinrowa okhala ixiripitaali, matotoro, manfurumeero, nipuro nimpwehiwa mirutthu aahiiso mahiye. Khasinrowa okhala ikrime, mapiliisa, alarme oniruma yaphiya anawiiye aahiiso ikhattiyatto! Mikhalelo iya sotheene soohiloka sinnikumiherya maxakha, sinrowa omalihiwa.

16, 17. (a) Anrowa woonela sai ale anrowa woopowa ekhotto ya Armagedoni? Nvahe ntakiheryo. (b) Muhaana opaka exeeni wira moopowe okathi olumwenku ola onrowa aya omala?

¹⁶ Itthu soohiloka sinrowa oranttelihiwa ni exeeni? Okhala wira mixankiho iya sipacenrye khalai, ti voovila okupali wira sinrowa omala. Nto pooti ikwaha sikina ohoonaka moota sinnikumiherya aya maxakha. Mwa ntakiheryo, nwuupuwele atthu anikhala waattamela ostasau wa komboi, woonasa wene awo pooti ohiiwa onyakula wa komboi. Nave atthu anikhala waattamela opuro oniittheliwa ikokhola, pooti ohoona wunkha. Masi vaavo Yehova onrowa awe omaliha mikhalelo soohiloka, atthu anrowa otaphuwa moomalela!

¹⁷ Maxakha otheene anniphwanya olelo-va, anrowa oranttelihiwa ni exeeni? Esalimo 37:11, enihimya wira: “Anokhala-mu ni murettele womalela”. Tthiri ti voomaaliha osuwela wira Yehova onniphavela opaka eyo! Okathi ola wooxankiha, mwiimananihe opaka sotheene siniwerya anyu wira mmwaattamele Yehova ni mutthenkeso awe. Etthuvo ya muhoolo ti yookuxa murima, tivonto, muupuweleleke saana, mukupaliki tthiri, ni mwaaleeleke atthu akina. (1 Timótheyo 4:15, 16; 1 Pedru 3:15) Mwiira siiso, mukupaliki tthiri wira okathi olumwenku ola onrowa aya omala, munrowa woopowa ni ohakalala mahiku otheene!