Kotea ʼAe Ka Pulihi Anai Moka Hoko Mai Te Puleʼaga ʼo Te ʼAtua?
“ʼE puli anai te malamanei pea mo ʼona holi, kaʼe ko ia ʼae ʼe ina fai te finegalo ʼo te ʼAtua ʼe nofo anai ia ʼo talu ai.”—1 SOANE 2:17.
KATIKO: 134, 24
1, 2. (1) He koʼe ʼe feala ke fakata ia te malama agakovi ʼaeni ki te tagata faifakapo ʼae ʼe ʼamanaki matehi? (Vakaʼi te ʼuluaki pāki.) (2) Kotea ʼae ka logoʼi anai e natou fuli ʼae ʼe maʼuʼuli ʼi te lagi pea mo te kele, ʼi te hili ʼo te fakaʼauha ʼo te tuʼu agakovi ʼaeni?
KOTOU fakakaukauʼi age muʼa te aluʼaga ʼaeni. Ko he tagata faifakapo mo agakovi ʼe lolotoga haʼele fakatahi mo te ʼu tagata leʼo, ʼi te loto fale pilisoni. ʼE kotou logo ki te ʼu tagata leʼo ʼe natou kalaga fenei: “Ko te tagata ʼaeni kua mate!” He koʼe ʼe nā kalaga feia? He logo la ʼe kei maʼuli te tagata ʼaia, kaʼe neʼe kua fakatuʼā ia ki te mate, pea kua vave pe tona matehi. ʼE hage pe ia kua mate. *—Vakaʼi te kiʼi nota.
2 ʼE feala pe ke tou fakata ia te malama agakovi ʼaeni ki te tagata faifakapo ʼaia ka ʼamanaki matehi. ʼE ui fenei ʼi te Tohi-Tapu: “ ʼE puli anai te malamanei.” (1 Soane 2:17) Neʼe kua fakatotonu e Sehova ʼe pulihi anai te tuʼu ʼaeni. Pea ʼe tou tui papau ʼe hoko moʼoni anai. Kaʼe ʼe ʼi ai pe te kehekehe ʼo te pulihi ʼo te tuʼu ʼaeni pea mo te matehi ʼo te tagata faifakapo. ʼE feala pe ki ʼihi hahaʼi ke natou fakafihiʼi te tautea ʼae neʼe fai ʼo ʼuhiga mo te tagata faifakapo, mo natou fakaʼamu ʼe mole matehi anai ia. Kaʼe ko Sehova, ʼe ko he tuʼi fakamau haohaoa. Pea ko tana tonu ʼae ke fakaʼauha ia te tuʼu ʼaeni, ʼe faitotonu ia. (Tetelonome 32:4) ʼE mole tauhala anai tona fakaʼauha. Hili ia, pea ko natou fuli ʼae ʼe maʼuʼuli ʼi te lagi pea mo te kele, ʼe natou fiafia fuli anai, koteʼuhi neʼe faitotonu te tautea ʼae neʼe fai e Sehova. ʼE ko he fakafimalie lahi anai ia.
3. Kotea te ʼu fihifihia ʼe fa ʼae ka pulihi anai moka hoko mai te Puleʼaga ʼo te ʼAtua?
3 ʼE ui ʼi te Tohi-Tapu “ ʼe puli anai te malamanei.” Kotea te fakaʼuhiga ʼo te ʼu palalau ʼaia? ʼE pulihi anai te ʼu aga kovi fuli ʼae ʼe tou sisio ki ai ʼi te ʼaho fuli. ʼE pulihi moʼoni anai ia. ʼE ko te koga ʼaia ʼo “te logo lelei . . . ʼo te Puleʼaga” ʼae ʼe tou fakamafola. (Mateo 24:14) ʼE tou talanoa anai ʼi te alatike ʼaeni kia fihifihia ʼe fa ʼe pulihi anai moka hoko mai te Puleʼaga ʼo te ʼAtua: Te hahaʼi agakovi, te ʼu kautahi aga fakakaka, te ʼu aga ʼae ʼe kovi, pea mo te ʼu aluʼaga fakaʼofaʼofa ʼi te kele. ʼE tou vakaʼi anai, ʼi te ʼu fihifihia takitahi (1) pe ʼe malave feafeaʼi kia tatou ʼi te temi nei, (2) kotea ʼae ka fai anai e Sehova ʼo ʼuhiga mo te ʼu fihifihia ʼaia, pea (3) kotea ʼae ka ina fetogi ʼaki anai.
TE HAHAʼI AGAKOVI
4. Kotea ʼe tou logoʼi ʼo ʼuhiga mo te aga ʼa te hahaʼi agakovi?
4 Kotea ʼe tou logoʼi ʼo ʼuhiga mo te aga ʼa te hahaʼi agakovi? Neʼe ui e te apositolo ko Paulo, ʼe ʼi ai anai ʼi te ʼu ʼaho fakamuli, “he ʼu temi makehe pea mo faigataʼa.” Pea neʼe ina toe ui fenei: “ ʼE ʼaʼasili kovi age anai te hahaʼi agakovi pea mo kaka.” (2 Timoteo 3:1-5, 13) ʼE kotou fakamoʼoni koa ki ai? Tokolahi ia tatou neʼe lagi kua tou felaveʼi mo he tahi neʼe agakovi mai, peʼe ko he tahi ʼe fehiʼa ki totatou lanu, peʼe ko he tahi ʼe faifakapo. ʼE ʼi ai ʼihi ʼe mole natou ufiufi ʼi te fai ʼo te ʼu aga kovi ʼaia. ʼE ʼi ai ʼihi ʼe natou lau ʼe natou fia tokoni ki te hahaʼi, kaʼe ko te ʼu hahaʼi agakovi. Kaʼe tatau aipe pe neʼe heʼeki tou felaveʼi mo he aluʼaga feia, kaʼe ʼe tou logoʼi te tuʼania ʼo ʼuhiga mo te ʼu hahaʼi agakovi feia. ʼE tou lotomamahi moka tou logo ʼe gaohi koviʼi te tamaliki, peʼe ko te kau matutuʼa, peʼe ko te hahaʼi vaivavai. ʼE hage pe te aga ʼa te hahaʼi agakovi ʼaia ko he ʼu manu peʼe ko he ʼu temonio. (Sakopo 3:15) Kaʼe meʼa lelei foki, heʼe foaki mai e Sehova he ʼamanaki lelei.
5. (1) Kotea te faigamalie ʼe kei tuku ki te kau agakovi? (2) Kotea ka hoko anai kia natou ʼae ʼe mole fia fetogi ʼanatou aga?
5 Kotea ʼae ka fai anai e Sehova? ʼE kei tuku pe e Sehova ia te fealagia ʼae ke fetogi e te kau agakovi ʼanatou aga. (Esaia 55:7) ʼE moʼoni kua vave pulihi te tuʼu ʼaeni, kaʼe heʼeki fakamauʼi te kau agakovi. Kaʼe kotea ʼae ka hoko anai kia natou ʼae ʼe mole fia fetogi ʼanatou aga, pea mo natou ʼae ʼe lagolago ki te tuʼu ʼaeni ʼo kaku ki te kamata ʼo te mamahi lahi? Neʼe fakapapauʼi e Sehova, ʼe ina pulihi anai te kau agakovi ʼi te kele katoa. (Lau ia Pesalemo 37:10.) Tokolahi ʼe natou lava fufu te ʼu aga kovi ʼae ʼe natou fai, ʼo mole tauteaʼi ai natou. (Sopo 21:7, 9) Kaʼe ʼe fakamanatuʼi fenei mai ʼi te Tohi-Tapu: “E sio te Atua ki te mauli o te u tagata fuli, pea e tuku ona mata ki te u lakaaga o te tagata taki toko tahi. E mole feala ke fufu e te fakapouli pee ko te malu o te mate natou ae e natou fai te agakovi.” (Sopo 34:21, 22) Koia ʼe mole feala ke tou fufu he meʼa kia Sehova. ʼE sio ki te ʼu meʼa fuli ʼae ʼe fai e te tagata agakovi. Hili Alamaketone, ʼe mole tou toe sisio anai kia natou. ʼE kua pulihi natou ʼo talu ai.—Pesalemo 37:12-15.
6. Ko ai ʼae ka haofaki anai moka pulihi te kau agakovi? He koʼe ʼe ko he logo lelei?
6 Ko ai ʼae ka haofaki anai moka pulihi te hahaʼi agakovi? Neʼe fai e Sehova te fakapapau ʼaeni: “Kaʼe ʼe maʼu anai e te kau agavaivai te kele, pea ʼe natou fiafia moʼoni anai ʼi te mahu ʼo te tokalelei.” Pea ʼe ina toe hoko atu fenei: “ ʼE maʼu anai e te kau faitotonu te kele, pea ʼe natou nonofo ai anai ʼo talu ai.” (Pesalemo 37:11, 29, MN ) Ko ai “te kau agavaivai” pea mo “te kau faitotonu”? Ko te kau agavaivai ʼe ko natou ʼae ʼe akoʼi e Sehova pea mo natou fakalogo kia te ia. Ko te kau faitotonu ko natou ʼae ʼe natou fakalogo ki te ʼu lao faitotonu ʼa te ʼAtua ʼaki he lotofiafia. ʼI te malama ʼaeni ʼe kaugā malie age te hahaʼi agakovi ʼi te hahaʼi faitotonu. Kaʼe ʼi te malama foʼou, ʼe ko te hahaʼi agavaivai pe anai pea mo faitotonu ʼe maʼu ai, pea ʼe natou fakaliliu anai ia te kele ko he palatiso.
TE ʼU KAUTAHI AGA FAKAKAKA
7. Kotea ʼe tou logoʼi ʼo ʼuhiga mo te ʼu kautahi aga fakakaka?
7 Kotea ʼe tou logoʼi ʼo ʼuhiga mo te ʼu kautahi aga fakakaka? ʼE lahi te ʼu aga kovi ʼe fakahoko e te hahaʼi. Kaʼe ʼe toe lahi age te ʼu agakovi ʼe fakahoko e te ʼu kautahi. Ko te toko lauʼi miliona hahaʼi ʼe mole kei natou falala ki te ʼu kautahi fakalotu. Ohage la, neʼe natou fai he ʼu loi ʼo ʼuhiga mo te ʼAtua, mo natou ui ʼe mole feala ke tou falala ki te Tohi-Tapu. ʼE natou lohiʼi te hahaʼi ʼo ʼuhiga mo te ka haʼu ʼo te kele pea mo te tagata. ʼE fakatupu e te ʼu puleʼaga kaka te ʼu tau pea mo ʼekenaki te hahaʼi ke natou fehihiʼa ki te tahi ʼu fenua. ʼE natou fakamamahiʼi te hahaʼi masisiva pea mo te hahaʼi fakaʼofaʼofa. ʼE tuputupu pe te ʼu puleʼaga ʼaia ʼo koloaʼia pea mo malolohi ʼuhi pe ko ʼanatou aga fakakaka. ʼE lahi te ʼu matani gaue ʼe natou manumanū falā. Koia ʼe natou ʼulihi ai te ʼulu fenua, mo maumauʼi te natula pea mo kakaʼi te hahaʼi, ke natou liliu ai ʼo koloaʼia. ʼE mahino ia, ʼe lahi te ʼu mamahi ʼe tau mo te hahaʼi ʼi te malamanei katoa ʼuhi pe ko te ʼu kautahi aga fakakaka.
8. Kotea ʼae ʼe ui ʼi te Tohi-Tapu ʼo ʼuhiga mo te ʼu kautahi ʼae ʼe hage ʼe tologa ia ʼaho nei?
8 Kotea ʼae ka fai anai e Sehova? ʼE kamata anai ia te mamahi lahi moka ʼohofi e te ʼu malohi fakapolitike ia te ʼu kautahi fakalotu hala fuli. ʼE fakata ʼi te Tohi-Tapu ia te ʼu lotu hala fuli ki te fafine paomutu ʼe higoa ko Papiloni Lahi. (Fakaha 17:1, 2, 16; 18:1-4) ʼE fakaʼauha katoa anai ia te ʼu kautahi fakalotu ʼaia. Kaʼe kotea ʼae ka hoko anai ki te ʼu kautahi aga fakakaka fuli ʼae? ʼE fakatatau ʼi te Tohi-Tapu te ʼu kautahi ʼaia ki he ʼu moʼuga mo he ʼu motu koteʼuhi ʼe hage mai ʼe natou malolohi mo tologa. (Lau ia Fakaha 6:14.) Kaʼe ʼe toe ui ai, ʼe fakaʼauha anai ia te ʼu puleʼaga pea mo te ʼu kautahi fuli ʼae ʼe mole lagolago ki te Puleʼaga ʼo te ʼAtua. ʼE ko te koga fakaʼosi ʼaia ʼo te mamahi lahi. (Selemia 25:31-33) Hili ʼaia, ʼe mole toe maʼu anai he kautahi aga fakakaka ʼi te kele ʼo talu ai.
9. He koʼe ʼe tou tui papau ʼe fakatuʼutuʼu lelei anai ia te kele foʼou?
9 Kotea ʼae ka ina fetogi anai ia te ʼu kautahi aga fakakaka? Hili Alamaketone, ʼe kei maʼu anai koa he kautahi ʼi te kele? ʼE ui fenei ʼi te Tohi-Tapu: “ ʼO mulimuli ki tana fakapapau, ʼe tou fakaatalitali ki he lagi foʼou mo he kele foʼou, pea ʼe maʼu ai anai te faitotonu.” (2 Petelo 3:13) Ko te lagi ʼafeā ʼe ko te ʼu puleʼaga kaka. Ko te kele ʼafeā ʼe ko te hahaʼi ʼae neʼe fakalogo ki te ʼu puleʼaga kaka ʼaia. Ka pulihi anai natou ʼaia, ko ai ʼae ka ina fetogi anai natou? “He lagi foʼou mo he kele foʼou.” Ko te lagi foʼou ʼe ko he puleʼaga foʼou, ʼe faʼufaʼu e Sesu Kilisito pea mo te toko 144 000 ʼae ka kaugā hau anai mo ia. Ko te kele foʼou, ʼe ko te hahaʼi ʼae ka puleʼi anai e te Puleʼaga ʼo te ʼAtua. ʼE faʼifaʼitakiʼi lelei anai e Sesu mo ʼona kaugā hau, ia Sehova ʼAtua, ia ia ʼae ko te ʼAtua ʼo te tokalelei. (1 Kolonito 14:33) ʼE tou mahino ai, ʼe fakatuʼutuʼu lelei anai te “kele foʼou.” ʼE ʼi ai anai he ʼu tagata agalelei ʼe natou tokakaga anai ki te ʼu gaue. (Pesalemo 45:17) ʼE takitaki anai e Sesu pea mo te toko 144 000 ia te ʼu tagata ʼaia. ʼI te temi ʼaia, ʼe fetogi anai e te kautahi ʼa te ʼAtua ia te ʼu kautahi aga fakakaka fuli. Pea ko te kautahi ʼaia ʼe mole feala anai ke liliu ʼo aga fakakaka.
TE ʼU AGA ʼAE ʼE KOVI
10. Kotea te ʼu aga ʼe kovi ʼe tou sisio ki ai? ʼE malave feafeaʼi kia tatou pea mo ʼotatou famili?
10 Kotea ʼe tou logoʼi ʼo ʼuhiga mo te ʼu aga kovi ʼae ʼe tou sisio ki ai? ʼE tou maʼuʼuli ʼi he malama ʼe aga fakalialia, mo aga fakakaka pea mo agamalohi. ʼE ha lelei te ʼu aga ʼaia ʼi te ʼu fakafiafia ʼo te malama, pea ʼe ʼekenaki ai te hahaʼi ke natou fia fai ki te ʼu aga ʼaia. Koia kua natou meʼa noaʼi ia te manatu ʼa Sehova ʼo ʼuhiga mo te lelei pea mo te kovi. (Esaia 5:20) ʼE tonu ki te ʼu matuʼā ke natou faiga malohi ʼo puipui ʼanatou fanau, mai te ʼu fakaneke kovi ʼaia. ʼI tona fakahagatonu, ʼe tonu ki te kau Kilisitiano moʼoni fuli, ke natou puipui ʼanatou felogoʼi mo Sehova, he ʼe tou maʼuʼuli ʼi he malama ʼe mole fakaʼapaʼapa ki te ʼu pelesepeto ʼa te ʼAtua.
11. Kotea ʼe tou ako mai te tautea ʼae neʼe fai e Sehova ki Sotoma mo Komola?
11 Kotea ʼae ka fai anai e Sehova? Tou vakaʼi age muʼa pe kotea ʼae neʼe fai e Sehova ki Sotoma mo Komola ʼuhi ko ʼanatou aga kovi. (Lau ia 2 Petelo 2:6-8.) Ko Lote neʼe ko te tagata faitotonu. Pea neʼe maʼuli mamahi mo tona famili, ʼuhi ko te ʼu aga kovi ʼae neʼe fai e te hahaʼi. Neʼe fakaʼauha leva e Sehova ia te potu fenua katoa ʼaia, ke fakagata te ʼu aga kovi ʼae neʼe fai ʼi ai. Pea ʼe ko he “faʼifaʼitaki” ʼaia ʼe ina tuku ki te hahaʼi agakovi ʼo totatou temi. ʼE pulihi anai e Sehova ia te tuʼu ʼaeni, mo natou ʼae ʼe natou fai ia te ʼu aga kovi.
12. Kotea te ʼu gaue ʼe tou fakahoko anai moka pulihi te tuʼu ʼaeni?
12 Kotea ʼae ka ina fetogi anai te ’u aga ʼae ʼe kovi? ʼE tou maʼumaʼua anai ʼi te malama foʼou ki te ʼu gaue fakafiafia. Ohage la, ʼe tou fakaliliu anai ia te kele ko he palatiso. ʼE tou laga anai ʼotatou ʼapi pea mo tokoni ki ʼotatou tehina mo tuagaʼane ʼofaina. ʼE tou fakatalitali anai ia natou fuli ʼae ka fakatuʼuake anai ki te maʼuli. ʼE tou akoʼi anai natou ʼo ʼuhiga mo Sehova pea mo te ʼu gaue fuli neʼe ina fai maʼa te tagata. (Esaia 65:21, 22; Gaue 24:15) ʼI te temi ʼaia, ʼe tou maʼumaʼua anai ʼi te fai ʼo he ʼu gaue ʼe tou fiafia ai pea mo tou fakavikiviki ai kia Sehova.
TE ʼU ALUʼAGA FAKAʼOFAʼOFA ʼI TE KELE
13. Kotea te ʼu fua kovi talu mai te aluʼaga ʼae neʼe hoko ʼi Eteni?
13 Kotea ʼe tou logoʼi ʼo ʼuhiga mo te ʼu aluʼaga fakaʼofaʼofa ʼi te kele?
ʼE tou lolotoga maʼuʼuli nei ʼi he malama fakaʼofaʼofa, ʼuhi ko te hahaʼi agakovi, mo te ʼu kautahi ʼe aga fakakaka pea mo te ʼu aga ʼae ʼe kovi. ʼE tou lotomamahi fuli ʼi tatatou sisio ki te ʼu tau, te maʼuli masiva, te fehiʼa ki te ʼu lanu, te mahaki, pea mo te mate. Neʼe kamata te ʼu mamahi ʼaia koteʼuhi neʼe talagataʼa ia Satana, mo Atama pea mo Eva kia Sehova. ʼE tou tau fuli mo te ʼu mamahi ʼuhi ko tanatou talagataʼa.14. Kotea ʼae ka fai anai e Sehova ʼo ʼuhiga mo te ʼu aluʼaga fakaʼofaʼofa ʼi te kele?
14 Kotea ʼae ka fai anai e Sehova ʼo ʼuhiga mo te ʼu aluʼaga fakaʼofaʼofa ʼi te kele? Tou vakaʼi ʼihi fakapapau. Neʼe fakapapauʼi e Sehova ʼe ina fakagata anai te ʼu tau. (Lau ia Pesalemo 46:9, 10.) ʼE ina pulihi anai ia te mahaki. (Esaia 33:24) ʼE ina pulihi anai ia te mate ʼo talu ai. (Esaia 25:8) ʼE ina pulihi anai ia te maʼuli masiva. (Pesalemo 72:12-16) ʼE pulihi anai e Sehova ia te ʼu aluʼaga fuli ʼae ʼe ina fakamamahiʼi ia te hahaʼi ia ʼaho nei. ʼE ina pulihi anai ia Satana pea mo ʼana temonio, ke ʼaua naʼa natou toe fakaneke te hahaʼi ke natou fai he ʼu aga ʼe kovi.—Efeso 2:2.
15. Kotea ʼihi aluʼaga ʼe pulihi anai hili Alamaketone?
15 Kotou fakakaukauʼi age muʼa pe ʼe feafeaʼi anai te maʼuli ʼi te malama foʼou. ʼE mole toe ʼi ai anai he tau, mo te mahaki pea mo te mate. ʼE mole toe ʼi ai anai he kau solia, peʼe ko he ʼu mahafu tau. ʼE mole toe maʼu anai he ʼu lopitali, peʼe ko he ʼu toketa, peʼe ko he ʼu afilimie, peʼe ko he ʼu fale mate peʼe ko he ʼu tanuma. ʼE mole toe ʼi ai anai he ʼu fakapo, ʼe mole toe ʼaoga anai he kau polisi. ʼE mole toe ʼaoga anai ke kalaviʼi te ʼu ʼapi. ʼE pulihi anai ia te ʼu aluʼaga fuli ʼae neʼe fakatupu tuʼania kia tatou. ʼE pulihi anai ia ʼo talu ai.
16, 17. (1) Kotea ʼae ka logoʼi anai e natou ʼae ka haofaki ʼi Alamaketone? Kotou tuku mai he faʼifaʼitaki. (2) ʼE tou lava iloʼi feafeaʼi ʼe tou hao anai moka pulihi te tuʼu ʼaeni?
16 ʼE feafeaʼi anai te maʼuli moka pulihi te ʼu aluʼaga fakaʼofaʼofa ʼi te kele? ʼE faigataʼa tona iloʼi. Lagi ʼe mole tou tokagaʼi totatou lotohoha tuʼumaʼu, koteʼuhi kua fualoa fau totatou maʼuli mamahi. Ke feala hatatou mahino ki ai, ʼe lelei ke tou toʼo he ʼu kiʼi faʼifaʼitaki. Ohage la ko natou ʼae ʼe maʼuʼuli ovi ki he malaʼe vakalele, ʼaki te temi ʼe mole kei natou tokagaʼi te logoaʼa. Ko natou ʼae ʼe maʼuʼuli ovi ki he lakuʼaga ʼotaʼota, ʼaki te temi ʼe mole kei natou tokagaʼi te mamanu ʼo te ʼu ʼotaʼota. ʼE mahino ia, ʼe ko he toe fiafia lahi anai ʼe tou logoʼi moka pulihi e Sehova ia te ʼu aluʼaga kovi fuli ʼaia.
17 Kotea ka ina fetogi anai ia te lotohoha ʼae tou logoʼi ʼi te temi nei? ʼE ui fenei ia Pesalemo 37:11, MN: “ ʼE maʼu anai e te kau agavaivai te kele, pea ʼe natou fiafia moʼoni anai ʼi te mahu ʼo te tokalelei.” ʼE tou fiafia ʼi tatatou iloʼi ʼae, ʼe ko te finegalo ʼaia ʼo Sehova ʼo ʼuhiga mo tatou. ʼI te lolotoga ʼo te ʼu temi faigataʼa ʼaeni, ʼe tonu ke tou fai ia meʼa fuli ke tou nonofo ovi kia Sehova pea mo tana kautahi. ʼE maʼuhiga kia tatou tatatou ʼamanaki ʼo ʼuhiga mo te ka haʼu. Koia ʼe tonu ai ke tou metitasio lelei, pea mo tou tui papau ki ai, pea ke tou toe fakaha ki te hahaʼi. (1 Timoteo 4:15, 16; 1 Petelo 3:15) Kapau ʼe tou fai feia, ʼe tou tui papau ai, moka hoko mai te fakaʼauha ʼo te tuʼu ʼaeni, ʼe haofaki anai tatou pea ʼe tou maʼuʼuli fiafia anai ʼo talu ai.
^ pal. 1 ʼE fakamatala ʼi te palakalafe ʼaeni te aluʼaga neʼe hoko mahani ʼi te ʼu fale pilisoni ʼi ʼihi potu fenua ʼo Amelika.