1. (a) Rosai ḇemnis ro Yefta ma Hana su? (Mam sonin ro randak artikel ine.) (b) Fakfuken rosai monda na kokarem ro artikel ine?

YEFTA ima manfarkin ḇebri kaku ma sordade ḇe makakakḇa. Hana ima bin bena sne ḇerun kaku ma myamfaduru swari ma rum kina ḇyesya. Sukame susyom faro Yahwe I. Su kako sufrur roi ḇemnis. Yefta ma Hana sufrur asas ḇe Yahwe I, ma sufaduru asas suḇena kuker soasuser. Sukame farari ḇepyum faro snon ma bin ro baboine ḇekinfir fa ḇefrur asas ḇe Yahwe I. Mkorama kowawos kankarem faro fakfuken rikyor nane: Asas ido, rosai rirya? Sai ḇefnai fa kofrur asas ḇe Allah ima roi ḇefandun kaku? Farkarkor rosai kun ro Yefta ma Hana su?

2, 3. (a) Asas ido rosairiri? (b) Rosai Refo ikofen kuker kofrur asas ḇe Allah?

² Ro Refoya, asas ima fasfes ḇefandun kaku kofrur kuker Allah I. Imnis raris, snonkaku oso imbude ḇyeanun ḇe Yahwe I nari ifrur roi ḇeḇeso, ḇyuk roi ḇepyum ḇeḇeso, dakso ro fararur ḇesren ḇeḇeso, ḇaido byinkwanbur roi oso. Ḇape rofyor snonkaku oso kyinfir fa ifrurna, Yahwe myam asas ḇyena ḇe fasfes bekaku fandun fa  byesyowi ma fyaduruna. Ro Refoya, asas oso ima imnis raris sowar. Sowar ima wos ro snonkaku oso ikofen nari ifrur roi oso ḇaido nari ifrur roi osoḇa. (Kejadian 14:22, 23; Ibrani 6:16, 17) Rosai Refo ikofen kuker asas kofrur ḇe Allah I?

³ Ro Sasoser Moses, kowasya rofyor snonkaku oso ifrur asas ḇe Yahwe, ”Pok fa ḇyefarander awer wos ḇyena. Fandun fa ifrur kaku imnis kuker roi nakam ḇeḇesae kwar ro swadon ḇyedi.” (Bilangan 30:2) Ramnai, Salomo fyas ”Rofyor ḇeasas ḇe Allah ido, wafrurna ḇeri, snaro imarisen faro snonkaku ḇeḇarḇor sya ḇa. Rosai ḇeasas kwarna, wafrur rarirya.” (Pengkhotbah 5:4) Yesus ikofen kofrur asas ḇe Yahwe ima roi ḇekaku rofyor ikofen ”Mko mnaf kako kwar wos sikofen faro kpu koḇesi: ’Swowar ankar awer, mḇoi wufepen sowar bedi ro ḇarpon Manseren.’”—Matius 5:33.

4. (a) Sai ḇefnai fa kofrur asas ḇe Allah ima roi ḇefandun kaku? (b) Rosai komarisen kofarkor ro Yefta ma Hana su?

⁴ Kakuḇae, anun kofrur ḇe Yahwe I komarisen komam na ḇe roi befandun kaku. Nyan kofrur asas koḇena nari nawyae ḇaḇebati koḇena kuker Yahwe I. Daud fyasnaḇairna fyor ikofen, ”Mansei na ḇeyek ḇe Yahwe bon ḇyedi, ma mansei ḇenaḇye fa ḇeyores ro moḇ ḇesren ḇyedi?” Ramnai kyarem ma doḇe Yahwe nari imarisen snonkaku oser-oser ”ḇesowar kuker ankarkarḇa”. (Mazmur 24:3, 4) Rosai Yefta ma Hana asas suḇena? Napyan fa sufrur asas suḇena ke?

5. Rosai Yefta ḇyeasas ya? Rosai bon ya?

⁵ Yefta ḇyeasas ḇe Yahwe rofyor imḇe myamunmun kuker er Amon sya. Er ani Allah mbroḇ ḇyesi. (Hakim-Hakim 10:7-9) Yefta dor ḇe Yahwe insama ikafyo si, ma ḇyeasas, ”Rofyor wafnoḇek aya fa yakafyo er Amon sya, nari yaḇuk ḇe Au snonkaku ḇesae ḇepon fa ḇesrow aya rofyor yakaḇer kuker aski ro er Amon sya.” Allah kyarem Yefta nadi ḇyeja ma ifnoḇek i fa ikafyo embroḇ ḇyesi. Rofyor Yefta iḇur ḇe rum, inai iswar kakuya ryama fa isrow i. Ima binjos ḇyedi ma nari ’Yahwe iso bena i.’ (Hakim-Hakim 11:30-34) Rosai knam ro wos ine ḇe inai ḇyeja?

6. (a) Napyan ḇe Yefta ma inai ḇyeja fa sufrur asas suḇena ḇe Allah ke? (b) Rosai kofarkor kuker asas ḇero Ulangan 23:21, 23; Mazmur 15:4?

⁶ Insama ifrur kmari asas ḇyeja, Yefta inai ḇyedine fandun fa rya fyarmyan ḇe Yahwe oras nakam ro tabernakel. Fyor ifrur asas ḇyedine Yefta kyarauser ḇa rosai nari ḇeḇejadi ya ke? Roba. Kakuya, Yefta imbude ifawi  kwar inai ḇyedine nari ḇesae randak fa ḇesrowi. Ifawi kwar ke roḇa, dufepen asas ḇyena pdef faro Yahwe I. Kofawi inema roi ḇepyan ḇa faro Yefta ma inai ḇyedi. Rofyor Yefta myam inai ḇyeja, ikofen sne ḇyedi iḇoryae kaku. Inai ḇyedi kako ”kyanes snaro nari fyarḇuk ḇa”, Kitab Suci Komunitas Kristiani (KSKK). Sai ḇefnai ya? Yefta nya romawa ḇa, ma nya inai oser monda ḇape nari fyarḇuk ma nya romawa ḇa. Ine kyurfasna nari keret ḇyedi namnai rodine monda. Ḇape Yefta ma inai ḇyedi sufawi snar roi oso isya ḇefandun syadi ro sneḇaḇir suḇena. Yefta ikofen, ”Yabas swadon yedi be Yahwe I kwar, ma na pok fa yayer kaḇer na ba.” Inai ḇyedi ikofen, ”Wafrur maḇeaya mura imnis ḇeasas kwarna.” (Hakim-Hakim 11:35-39) Yefta ma inai ḇyeja susouser faro Yahwe ma sukara ḇaḇeri fa sufrur asas suḇena ḇa, imbude roi ine napyan ḇesu ḇa fa sufaduruna.—Wasya Ulangan 23:21, 23; Mazmur 15:4.

7. (a) Rosai Hana ḇyeasas ya, ma sai ḇefnai ya? rosai bon Hana ismana? (b) Ro asas Hana ḇyedi nari rosai Samuel ifrurna? (Mam fas-fas kasun ro sop.)

⁷ Hana ikako ifrur asas ḇe Yahwe ro fafisu ḇesamswen ro kenem ḇyedi. Ḇyesneso kaku snar nya romawa ḇa ma skoryae i ker. (1 Samuel 1:4-7, 10, 16) Ikofen ḇe Yahwe rosai ḇyaḇirna ma ifrur asas ine, ”Sye, Yahwe bena sarar, fyor wamarisen kaku mam kandera infamyan banine ma waswarepen aya, ḇefnder awer aya ma buk ḇe infamyan banine romawa snon, nari yaḇuk i ḇe Yahwe ro ras-ras kankenem ḇyedi ma roḇesar nari nkauk bruri ḇa.” * (Mam fas-fas kasun ro sop.) (1 Samuel 1:11) Yahwe ryower Hana nadi ḇyedi, ma taun ḇeuser ya nya romawa isoine Samuel i. Hana imarisen kaku! Ḇape ḇyefnder ḇaḇeri asas ḇyedi faro Allah. Rofyor ikapar roma ḇyedi, ikofen, ”Roro Yahwe Iso yori.”—1 Samuel 1:20.

8. (a) Napyan ḇe Hana fa ifrur asas ḇyedi ke? (b) Rariso Mazmur 61 nḇuk swarapepen ḇe Au faro contoh ḇepyum ro Hana i?

⁸ Rofyor Samuel ḇyeumur taun rikyor, Hana ifrur raris asas ḇyedi ḇe Yahwe I. Dun Samuel i ḇe Imam Ḇeba Eli i, ḇe tabernakel ro syilo ma ikofen, ”Snar romawa ine iso ḇefnai fa yaḇenadi insama Yahwe kyarem fararyor kaku yena yor ro i na. Inja yaḇuki ḇe Yahwe I. Ro kankenem ḇyedi ḇesiper, iso snonkaku ḇeḇeyor fa ḇeḇebuk ḇe Yahwe I.” (1 Samuel 1:24-28) Ro fafisu ya, Samuel ḇyarek ro tabernakel. Refo ikofen, ”romawa snon ani, iba mufyase ma  Yahwe ryousi besya kwar”. (1 Samuel 2:21) Fyaduru asas ḇyedi ine roi ḇepyan ḇa. Snaro nari nya oras naḇor ḇa kuker romawa myanmin kaku ani. Nari myam isur mufyas ḇe romawa babo ḇa. Ḇape Hana ifrur pdef asas ḇyedi faro Yahwe I kuker sne ḇesiper. Imarisen ḇyuk roi ḇemaeja kaku nya na insama ifrurmnis asas ḇyedi faro Allah.—1 Samuel 2:1, 2; wasya Mazmur 61:1, 5, 8.

9. Rosai nari kowawos wer?

⁹ Kirine kofawi asas ima roi ḇefandun kaku kofrur ḇe Yahwe I, mkorama kowawos fakfuken nane: Asas ḇemnis rariso komarisen kofrur ro kirine? Ma sai ḇefnai kun snemuk fa kofaduru asas kofrur ya?

10. Rosai Asas ḇefandun kaku snonkaku Kristen oso ifrurna? Rosai monda ḇefesepen ya?

¹⁰ Asas ḇefandun kaku snonkaku Kristen bisa ifrur ya iso ḇyuk farsamsyom kankenem ḇyedi ḇe Yahwe I. Ro nadi mankun ḇyedi, snonkaku oso ḇyeasas rosai monda ḇeḇejadiya na ḇyuk kankenem ḇyedi ḇesiper fa  fyarmyan ḇe Allah isof fyoro-fyoro. Yesus ikofen ’kofamyun mankunko’ iso koḇe asas nari korir Yahwe I ḇepon ḇardibur marisen koḇena. (Matius 16:24) Ro ras ani ”Manseren iso ḇenakonya.” (Roma 14:8) Komam farsamsyom koḇena ḇe roi ḇefarfnak ḇa. Koḇaḇir raris manbefas mazmur ḇekofen, ”Rosai nari yaḇuk kaḇer ḇe Yahwe faro roi ḇepyum ḇyuk kwar ḇe ayana? Asas yena nari yaḇakna ḇe Yahwe I, ro ḇarpon kawasa byesya.”—Mazmur 116:12, 14.

11. Rosai ḇeḇejadi ro ras ḇebaptis ya?

¹¹ Wamarisen buk kankenem bedi ḇe Yahwe I ma ḇeḇairna kuker ḇebaptis ro war ke? Wamarisen ido, ima roi ḇepyum kaku! Waswarepen fyor naek ḇeyun faya ḇaḇebaptis ani ikofen buk farsamsyom bedi ḇe Yahwe I kwar ma wafawi snar ”farsamsyom ma ḇaḇebaptis bena, nafrur fa sifawi Au ḇe Saksi-Saksi Yahwe ke”? Rofyor kwarem imbo, snonkaku ḇefanjur syakam sifawi buk farsamsyom bedi kwar ma sifawi Auma manfamyan ḇeḇebaptis ḇe Saksi Yahwe. Rosai wafrur kwar nane nafrur Yahwe imarisen kaku!

12. (a) Fakfuken rosai nari kokarem ro mankunko? (b) Rari-rari rosai monda Petrus danun ḇe ko fa kofrurna?

¹² Rofyor ḇebaptis kwar, ḇeasas ḇe Yahwe I snar wamarisen buk kankenem bedi fa wafarmyan ḇe I ma wafrur rosairiryakam imnis raris standar ḇyena. Ḇape baptisan ima randak ro fararmyan bena. Kofawi kwar, kokame fandun fa komamḇir mankunko. Bisa kofuken: ’Rariso ḇaḇebati yedi kuker Yahwe nasur pdef rofyor yaḇebaptis kwar? Yafarmyan kaker ḇe Yahwe I kuker sne ḇesiper ke? (Kolose 3:23) Yaḇenadi ro ras ḇe ras ke? Yawasya Refo ro ras nakam ke? Yaso pdef fananjur Kristen ya ke? Yaḇensewar fa yaso ro fararur ḇaḇebaryas ya ke? Ḇaido yararyaḇ werḇa ro fararur fararmyan nane ke?’ Manwawan Petrus ḇyuk swarapepen ḇeko nari kosmai roi ḇeḇyeḇa fyor koḇe aktif werḇa fa kofarmyan ḇe Yahwe I. Bisa koḇinkwanbur roi nane rofyor koḇensewar fa kosur pdef ro kakyar ya, fawawi, ḇaḇefarmku ma soasuser koḇena.—Wasya 2 Petrus 1:5-8.

13. Farsamsyom ma ḇaḇebaptis ḇemnis rariso fandun fa snonkaku Kristen sifawina?

¹³ Fafisu oso na kofrur asas fa kofarmyan ḇe Yahwe I ma fandun kaku fa kofrurna. Snonkaku oso ḇensewar fa ḇefarmyan ḇe Yahwe I ma ikenem ḇe snonkaku Kristen nari ikofen ḇa farsamsyom ḇyedi ḇe Allah ma baptisan ḇyedi nama roi ḇekaku ḇa. * (Mam fas-fas kasun ro sop.) Rofyor snonkaku ḇebuk farsamsyom ḇyedi ḇe Yahwe ifrur sasar ḇeba ido, fandun fa kyamar sasar ḇyena ḇe Yahwe I ma sidang. (Roma 14:12) Komewer komnis raris snonkaku Yesus ikofen sya, ”Snar saswar ḇepon mkobani maro aya isyaḇa kwar.” Ḇape komarisen ikofen ḇeko, ”Yafawi roi ḇeḇor mkofrur na yafawi mkosaswar, mkosouser, mkofararur, ma mkofarmku ro kandera. Yafawi  baboine mkofararur nabor syadi ro ḇeponiwara.” (Fasasna Faro Yohanes [Wahyu] 2:4, 19) Komarisen kofrur Yahwe imarisen kuker kokenem imnis farsamsyom koḇena.

14. Asas ḇesuru ḇefandun kaku rosai snonkaku oso bisa ifrurna? Sai ḇefnai ya?

¹⁴ Asas ḇefandun kaku ḇesuru snonkaku sifrurna iso asas farḇakḇuk. Farḇakḇuk ima nasren. Yahwe myam asas farḇakḇuk ḇe roi ḇefandun kaku. Rofyor pengantin snon ma bin sufrur asas suḇena, sufrur asas ro ḇarpon Yahwe I ma snonkaku ḇerama sya. Suḇeasas fa suswaryae, sufasna syowi ḇe oso ma besesya fyor sukenem ro supswan imnis kuker sasoser farḇakḇuk ḇerama ro Allah. Ḇesesya imbude sḇuk wos ḇemnis radine ḇa, ḇape sifrur kaker asas ro ḇarpon Allah I. Rofyor sufrur asas ani, sifawi suḇe imbeswa. Farḇaḇuk ine nasya ḇyefesepen isof fyoro. (Kejadian 2:24; 1 Korintus 7:39) Yesus ikofen, ”Rosai Allah fyesepen kwar, snonkaku sya sipok sfaspar awer.” Snon ma bin ḇefarbuk kwar sya, skara awer farḇakḇuk sena nasma samswen ido, fafisu oso bisa sifrur farḇakḇuk sena namuk.—Markus 10:9.

15. Rosai ḇefnai snonkaku Kristen smam farḇaḇuk raris dunya ineḇa?

¹⁵ Kakuḇae, snar koine snonkaku ḇenapesḇa, inja farḇakḇuk osoḇaberi na ḇemnis kaku. Iso ḇefnai fa Refo ikofenḇair ḇeko fyorno ido ḇefarḇuk syakam ”nari sisrow kandera nabor”. (1 Korintus 7:28) Ro baboine, snonkaku ḇebor sya smam farḇakḇuk ima roi ḇefarfnak monda. Sḇaḇir rofyor sisma samswen ro farḇakḇuk sena ido, bisa sifrurmuk farḇakḇuk sena. Ḇape snon ma bin Kristensya skara rariryaḇa. Sifawi snar sifrur asas farḇakḇuk ro ḇarpon Allah kwar. Rofyor sifrur asas ani ḇa ido, ima raris sankar I, dayin kaku ḇeankarkar sya. (Imamat 19:12; Amsal 6:16-19) Snonkaku Kristen ḇefarḇuk kwarsya, fandun fa siswarepen rosai Paulus ikofenna, ”Rofyor naek fakawin ḇaim ḇesewar fa fakawin awer.” (1 Korintus 7:27) Paulus bisa ikofen rarirya snar ifawi Yahwe I kako dayin ḇefrur farḇakbuk sena namuk.—Maleakhi 2:13-16.

16. Rosai Refo ya ikofen kuker ḇaḇesisye ma imbeswa befrurmuk farḇakḇuk sena?

¹⁶ Yesus ḇyuk farkarkor snar Refo iso ḇeyap sai ḇefnai fa imbeswa sya bisa sifrurmuk farḇakḇuk sena, rofyor oso rofandu su ifrur fararur farḇuk ma ḇesasar ḇa ine kyinfir fa ḇyuk maf ḇe i ḇa. (Matius 19:9; Ibrani 13:4) Rariso kuker ḇaḇesisye ro snon ḇaido bin ḇefarḇuk kwar sine? Refoya kako fyasnaḇair roi ine. (Wasya 1 Korintus 7:10, 11.) Roi osoḇaḇeri ro Refo ḇekofenḇair ḇaḇesisye ro farḇakḇuk ine. Ḇape fyorno ido fafisu nasya ḇefrur fa snonkaku Kristen oso kyara ipyum ya ḇyesisye kuker swa ḇyeja resari. Imnis raris, ḇeḇeso sya imbude skara kankenem sena ḇaido ḇaḇebati sena kuker Yahwe nari nasmai samswen fyor sḇeoser kaker kuker swa ḇewayam si ani. * (Mam fas-fas kasun ro sop.)

17. Rosai imbeswa Kristen sufrurya insama farḇakḇuk suḇena sambraḇ syadi?

 ¹⁷ Rofyor imbeswa oso surama ḇe penatua ro sidang fa suyor farkankin rariso sufrurmnis kaḇer farḇakḇuk suḇena ido, penatua ani na ifuken ḇe su sumam kwar video Apa itu Cinta Sejati? ma sufarkor brosur Na Kina Bedi Ismai Aski. Wos ḇefarkin ro Refo anna bisa nsambraḇser farḇakḇuk suḇena nako syadi. Imbeswa oso sukofen, ”fyor nufarkor brosur ine, farḇakḇuk nuḇena neaski syadi ro randak ya”. Imḇesrar oso ḇefarḇuk taun ri 22 kwar ikofen farḇakḇuk ḇyena indokada namuk. Ramnai myam video ani. Ikofen, ”Nuḇebaptis kwar, ḇape rari nuḇena nebeseyae. Video ani ryama ro fafisu bemnis! Nufrur roi ḇepyum nabor kaku ḇe imbeswa oso.” Kakuḇae, fyor imbeswa sufrur Yahwe farkankin ḇyena ro farḇakḇuk suḇena ido, fasfesepen suḇena nari neaski ma sambraḇ.

18, 19. (a) Rosai monda sinan Kristen beborsya sifrurna? (b) Rosai bisa kokofen ḇe naek srar ḇero fararur ḇesren ro oras nakam sine?

¹⁸ Ro randak artikel ine kowawos kwar kuker asas Yefta ma Hana sufrurna. Snar asas suḇena, Yefta inai ḇyedi ma Hana romawa ḇyeja suḇuk kankenem suḇena fa sufarmyan ḇe Yahwe I kuker nyan ḇepyum kaku. Sinan Kristen ro baboine sanun ḇe romawa sesya insama saksun ro fararmyan ro oras nakam ma sefakapon fararmyan sena ḇe Allah. Ma kokame bisa kanun romawa babo sya fa sifarmyan pdef ro fararur ine.—Hakim-Hakim 11:40; Mazmur 110:3.

¹⁹ Kirine, ḇero Fararmyan Ḇekhusus ro Oras Nakam barbor sena ri 67.000 ro Saksi-Saksi Yahwe ḇero Supswan Ḇesiper. Ḇeḇeso sya sfarmyan ro Betel ḇaido ro fararur konstruksi ma fararur keliling. Ḇesesya sfararur marḇak ḇe instruktur, perintis istimewa, misionaris, Hamba Balai Kebaktian, ḇaido hamba-hamba ḇefarmyan ro fasilitas sekolah Alkitab ḇeḇeso. Oser-oser ro si sifrur ”Ikrar Ketaatan dan Kesahajaan.” Ro asas anine, sikofen kwar nari sifarur marḇak ro fafarur rosai monda sḇuk besi ro fararmyan sena ḇe Yahwe I, sifrur kenem sena napyan, ma sifararur ro moḇ ḇese ḇa fyor sḇuk ijin ḇaim. Ine faro snonkaku syaḇa, ḇape faro fararur ḇepyum sena. Sifasna sne ḇerun ma sun snemuk fa sufepen pdef asas sena rofyor sro fararur ḇesren ḇekhusus ro oras nakam.

20. Rariso mamam koḇena faro asas kofrur ḇe Allah? Sai ḇefnai ya?

²⁰ Ro artikel ine, kowawos kwar asas rikyor kofrur ḇe Allah. Imbude wafrur asas ḇeḇeso ro mankundaw kwar. Kofawi snar asas koḇena fandun fa kofrurna kuker kakaku ma fandun fa kofrur rosairiryakam insa kofaduruna. (Amsal 20:25) Rofyor kofaduru asas koḇena ḇe Yahwe ḇa ido, nari kosmai bon ḇeḇyeḇa kaku. (Pengkhotbah 5:6) Inja komarisen kofrur raris manḇefas mazmur ḇekofen faro Yahwe, ”Nari yadisen doya faro snonsnon bedi isof fyoro-fyoro, insama yaḇak asas yena ro ras ḇe ras.”—Mazmur 61:8.