1. (1) ?Olsem wanem Jeftaha mo Hana i sem mak? (Yu luk pija long stat blong stadi.) (2) ?Wanem trifala kwestin we bambae yumi tokbaot?

JEFTAHA i wan strong man blong faet mo i wan lida we i no fraet. Hana i wan woman we i stap lukaot nomo long man blong hem mo haos blong hem. Jeftaha mo Hana i wosipim Jehova. Mo i gat wan narafala samting long saed blong tufala we i sem mak. Tufala wanwan i mekem promes long Jehova, mo tufala i holem promes ya. Tufala i soemaot nambawan eksampol long ol man mo woman tede we oli jusum blong mekem promes long Jehova. Bambae yumi tokbaot trifala kwestin ya: ?Wan promes i olsem wanem? ?From wanem yumi mas tinghevi long ol promes we yumi mekem long God? ?Stori blong Jeftaha mo Hana i tijim yumi long wanem?

2, 3. (1) ?Wan promes i olsem wanem? (2) ?Baebol i talem wanem long saed blong ol promes we yumi mekem long God?

² Taem wan man i mekem promes, hem i talem se bambae hem i mekem sam samting, no i givim presen, no i joen long wan spesel wok, no i blokem sam samting long laef blong hem. Baebol i tokbaot promes we sam man oli mekem long Jehova. Ol man ya nomo oli jusum blong mekem ol promes ya, i no gat wan narafala i fosem olgeta. Be taem man i mekem promes olsem, Jehova i wantem se hem i holem promes ya.  Long Baebol, sam man oli talem nem blong wan man blong mekem promes blong olgeta i strong. (Jenesis 14:22, 23; Hibrus 6:16, 17) ?From wanem yumi mas tinghevi long promes we yumi mekem long God? ?Baebol i talem wanem?

³ Long Loa we Jehova i givim long Moses, Baebol i talem se wan man we i mekem promes long God, “i no mas brekem promes ya . . . hem i mas mekem evri samting we hem i promes blong mekem.” (Namba 30:2) Solomon tu i talem se: “Sipos yu mekem wan promes long God, bambae yu mas mekem samting ya we yu promes blong mekem. Mo yu mas mekem kwiktaem, from we hem i no glad long krangke man we i save mekem promes be i no save holem.” (Prija 5:4) Jisas i tijim ol man se oli mas tinghevi long ol promes we oli mekem long God, i se: “Oli talem long ol olfala blong yumi bifo se, ‘Yu no save talem nem blong God blong mekem tok blong yu i strong, nao biaen yu brekem tok ya. Sipos yu talem nem blong God, yu mas mekem stret olsem we yu yu talem.’”—Matiu 5:33.

4. (1) ?From wanem yumi mas tinghevi long ol promes we yumi mekem long God? (2) ?Yumi wantem save wanem long saed blong Jeftaha mo Hana?

⁴ I klia se yumi mas tinghevi long ol promes we yumi mekem long Jehova. Sipos yumi holem ol promes ya, bambae yumi fren gud wetem hem. Be sipos yumi no holem, bambae yumi no moa fren gud wetem hem. Deved i soemaot samting ya taem hem i talem se: “?Hu man i gat raet blong go antap long hil blong Hae God? ?Hu man i save go insaed long tabu ples ya blong hem?” Nao hem i ansa se, Jehova i glad long man we “i no save mekem ol giaman promes.” (Ol Sam 24:3, 4) ?Wanem tufala promes blong Jeftaha mo Hana? ?I isi blong tufala i holem ol promes ya?

5. ?Wanem promes blong Jeftaha? ?Wanem i hapen?

⁵ Taem Jeftaha i rere blong go faet agensem ol man Amon, hem i mekem wan promes long Jehova. Ol man Amon oli enemi blong ol man blong God. (Jajes 10:7-9) Jeftaha i askem strong long Jehova blong i givhan long hem blong winim faet ya, mo hem i promes se: “Jehova, sipos yu mekem we mi mi winim ol man Amon, nao mi kambak long haos blong mi, fas man we bambae i kamaot blong mitim mi, bambae mi givim i go long yu.” God i ansarem prea blong Jeftaha mo i mekem hem i win. Taem Jeftaha i gobak long haos, gel blong hem we hem i lavem tumas, i kamaot blong mitim hem. Gel ya nao Jeftaha i “givim i go” long Jehova. (Jajes 11:30-34, NW) ?Hemia i min se gel ya i mas mekem wanem?

6. (1) ?From wanem i no isi blong Jeftaha mo gel blong hem, tufala i holem promes blong tufala? (2) ?Dutronome 23:21, 23 mo Ol Sam 15:4 i tijim yumi long wanem?

⁶ Blong Jeftaha i holem promes blong hem, gel blong hem i mas go wok fultaem long haos blong God. ?Olsem wanem? ?Jeftaha i tingting gud fastaem long  promes ya? Yes. Ating hem i save finis se gel blong hem nao bambae i fas man blong kamaot long haos blong mitim hem. Nating se hem i save no nogat, be i no isi nating blong tufala i holem promes ya. Taem Jeftaha i luk gel blong hem, hem i talem se hem i harem nogud tumas. Mo gel blong hem tu i gowe blong krae, from we neva bambae hem i mared. Jeftaha i no gat wan boe blong hem, mo gel blong hem bambae i no gat pikinini, hemia i min se laen blong Jeftaha bambae i lus. Be tufala i kasem save se i gat wan samting we i moa impoten i bitim filing blong tufala. Jeftaha i talem se: “Mi mi mekem wan strong promes finis long Hae God, mo bambae mi no save brekem promes ya.” Gel blong hem i talem se: “Yu mas mekem long mi olsem we yu talem finis se bambae yu mekem.” (Jajes 11:35-39) Tufala i lavem God, taswe tufala i no tingbaot nating blong brekem promes we tufala i mekem long God, nating se i had blong tufala i holem.—Ridim Dutronome 23:21, 23; Ol Sam 15:4.

7. (1) ?Hana i mekem wanem promes, mo from wanem? ?Wanem i hapen biaen? (2) ?Promes blong Hana i mekem wanem long Samuel? (Yu luk futnot.)

⁷ Hana i mekem wan promes long Jehova long wan taem we hem i harem nogud tumas. Hem i no save gat pikinini, mo wan narafala woman i stap jikim hem mo daonem hem from. (1 Samuel 1:4-7, 10, 16) Hana i talemaot ol trabol blong hem long Jehova, mo hem i mekem wan promes, i se: “Hae God, yu yu gat olgeta paoa. !Mi mi woman blong wok blong yu nomo! Be plis yu sore long mi, yu luk long trabol blong mi, yu tingbaot mi. . . . Sipos yu letem blong mi mi gat wan pikinini we i boe, mi mi promes se bambae mi givim hem long yu, blong hem bambae i man blong yu oltaem long laef blong hem. Mo . . . neva bambae oli katem hea blong hem samtaem.” * (1 Samuel 1:11) Jehova i lesin long prea blong Hana, mo wan yia biaen, Hana i bonem wan boe, nem blong hem Samuel. !Hana i glad we i glad! Be hem i no fogetem promes we hem i mekem long God. Taem smol boe ya i bon, Hana i talem se: “Mi mi askem long Hae God blong i givim pikinini ya long mi.”—1 Samuel 1:20.

8. (1) ?From wanem i no isi blong Hana i holem promes blong hem? (2) ?Olsem wanem ol tok blong Sam 61 i mekem yu yu tingbaot Hana?

⁸ Taem Samuel i gat tri yia, Hana i mekem samting we hem i promes long Jehova. Hem i tekem Samuel i go long Hae Pris Ilae long haos blong God long Silo. Hem i talem long Ilae se: “Mi mi askem wan pikinini long [Jehova], mo hem i ansa long prea blong mi. Nao from samting ya, mi mi kam blong givim pikinini ya i gobak long hem, nao oltaem long laef blong hem bambae hem i man blong wok blong hem.” (1 Samuel 1:24-28) Stat long taem ya,  Samuel i laef long haos blong God. Baebol i talem se: “Boe ya Samuel i stap gruap long haos blong Hae God, mo oltaem, i stap mekem wok blong hem.” (1 Samuel 2:21) Ating i no isi blong Hana i holem promes blong hem. Hem i no moa save spenem taem evri dei wetem smol boe ya we hem i lavem tumas. Hem i no save luk boe ya i stap gruap. Be Hana i tinghevi long promes we hem i mekem long Jehova. Taswe, hem i rere blong lego ol samting ya we oli impoten tumas long laef blong hem, blong holem promes blong hem.—1 Samuel 2:1, 2; ridim Ol Sam 61:1, 5, 8.

9. ?Bambae yumi tokbaot wanem?

⁹ Yumi kasem save se taem yumi mekem wan promes long Jehova, yumi mas tinghevi long promes ya. Naoia bambae yumi tokbaot tufala kwestin ya: ?Wanem ol promes we yumi stap mekem tede? ?From wanem yumi mas gat strong tingting blong holem ol promes ya?

10. ?Wanem promes we i moa impoten i bitim ol narafala promes? ?Promes ya i minim wanem?

¹⁰ Promes we i moa impoten i bitim ol narafala promes, hemia taem wan Kristin  i givim laef blong hem i go long Jehova. Hem i prea long God, mo i promes blong mekem wok blong hem oltaem long laef blong hem, nomata wanem samting i hapen. Jisas i talem se yumi mas “blokem ol samting” we yumi nomo i wantem, i min se, yumi promes blong putum Jehova fastaem long ol samting we yumi nomo i wantem. (Matiu 16:24) Stat long taem ya, laef blong yumi i blong Jehova. (Rom 14:8) Yumi tinghevi long promes ya. Yumi harem olsem man we i raetem Sam ya, we i talem se: “Hae God i stap mekem i gud tumas long mi. ?Bambae mi save givim wanem presen long hem? Long fes blong olgeta man blong hem, bambae mi givim olgeta samting ya long hem we mi mi promes finis blong givim.”—Ol Sam 116:12, 14.

11. ?Wanem i hapen long dei we yu yu baptaes?

¹¹ ?Olsem wanem? ?Yu yu givim laef blong yu long Jehova finis mo yu baptaes long wota? !Sipos yes, hemia i gud tumas! ?Yu tingbaot yet tok blong baptaes? Brata we i mekem tok ya i askem sipos yu givim laef blong yu i go long Jehova finis. Mo hem i askem tu sipos yu kasem save se, “taem yu givim laef blong yu i go long God mo yu baptaes, yu soemaot se yu kam wan Witnes blong Jehova.” Taem yu talem yes long tufala kwestin ya, yu soemaot long evriwan se yu givim laef blong yu long Jehova finis, mo i stret blong yu baptaes olsem wan man blong hem. !Long taem ya, yu mekem Jehova i glad we i glad!

12. (1) ?Wanem ol kwestin we yumi mas tingbaot? (2) ?Wanem ol fasin we Pita i pulum yumi blong wokem?

¹² Taem yu baptaes, yu promes long Jehova se bambae yu mekem wok blong hem oltaem long laef blong yu, mo bambae yu folem ol loa blong hem. Be baptaes hem i stat blong rod nomo. Taem ol yia oli pas, yumi evriwan i mas gohed blong lukluk gud long laef blong yumi. I gud yumi tingbaot ol kwestin ya: ‘?Stat long taem ya we mi mi baptaes, mi traehad blong fren moa wetem Jehova? ?Mi stap gohed yet blong mekem wok blong hem wetem olgeta hat blong mi? (Kolosi 3:23) ?Mi stap prea oltaem? ?Mi ridim Baebol evri dei? ?Mi go oltaem long ol miting blong kongregesen? ?Mi tekem evri janis blong joen long wok blong prij? ?Mi mi glad blong mekem ol samting ya, no mi no moa glad olsem bifo?’ Aposol Pita i givim woning se yumi save kam slak long wok blong Jehova. Be yumi save blokem samting ya sipos yumi wok had blong gat moa bilif, save, yumi stanap strong longtaem, mo yumi mekem ol samting we God i wantem.—Ridim 2 Pita 1:5-8.

13. ?Wan Kristin we i givim laef blong hem i go long Jehova mo i baptaes, i no save talem wanem?

¹³ Yumi no save tekemaot promes ya we yumi mekem long Jehova. Wan man we i les blong mekem wok blong Jehova no blong mekem ol Kristin fasin, hem i no save talem se hem i no rili givim laef blong hem i go long Jehova, mekem se baptaes blong hem i no stret. * Taswe, taem wan man i givim laef blong hem i go long Jehova be biaen i mekem wan bigfala sin, hem i gat fol long fes blong Jehova mo kongregesen. (Rom 14:12) Yumi no wantem kam olsem ol man we Jisas i talem long olgeta se: “Yufala i no moa lavem mi  olsem we yufala i lavem mi fastaem.” Be yumi wantem we hem i talem long yumi se: “Mi mi save finis fasin blong yufala . . . Mi save we yufala i lavlavem yufala, mo yufala i bilif long mi. Mi save we yufala i stap givhan gud long ol man, mo mi save we tingting blong yufala i longfala, i no save foldaon. Mo mi save tu we wok blong yufala naoia i moa gud long wok ya we yufala i mekem fastaem.” (Revelesen 2:4, 19) Yumi wantem mekem Jehova i glad, mo yumi mekem olsem taem yumi holem promes ya blong givim laef blong yumi i go long hem.

14. ?Wanem narafala impoten promes we man i mekem? ?From wanem i impoten?

¹⁴ Wan narafala promes we i impoten tumas long wan Kristin, hemia promes we hem i mekem taem hem i mared. Mared i tabu, mo Jehova i tingbaot promes ya olsem wan samting we i impoten tumas. Taem wan man mo wan woman i mared, tufala i mekem promes ya long fored blong Jehova mo olgeta we oli stap long mared ya. Tufala i promes blong lavem tufala, mekem i gud long tufala, mo onagud long tufala, long olgeta yia we tufala i stap laef tugeta long wol ya, aninit long plan we God i putumap long saed blong mared. Nating se sam oli no talem ol semfala tok ya, be oli mekem wan promes long fored blong God. Taem tufala i mekem promes ya, tufala i kam hasban mo waef. Mared ya i mas stap olwe. (Jenesis 2:24; 1 Korin 7:39) Jisas i talem se: “From we God i joenem tufala olsem, man i no mas brekem mared blong tufala.” Tufala we i mared i no mas ting se sipos mared ya i no wok gud, tufala i save divos nomo.—Mak 10:9.

15. ?From wanem ol Kristin oli no mas gat tingting olsem ol man blong wol?

¹⁵ I no gat wan man we i stret gud olgeta, taswe i no gat wan mared tu we i stret gud olgeta. Baebol i talem se sam samtaem, olgeta we oli mared bambae “oli gat trabol long laef blong olgeta.” (1 Korin 7:28) Long wol tede, plante man oli no tinghevi long mared. Oli ting se sipos oli no glad long mared blong olgeta, oli save brekem. Be ol Kristin oli no gat tingting olsem. Oli save se oli mekem promes blong mared long fored blong God. Sipos oli brekem promes ya, i olsem se oli giaman long God. Mo God i no laekem nating ol man blong giaman. (Levitikas 19:12; Ol Proveb 6:16-19) Ol Kristin we oli mared, oli mas tingbaot ol tok ya blong aposol Pol se: “Yu we yu mared finis, i nogud yu traem brekem mared blong yu.” (1 Korin 7:27) Pol i talem olsem from we hem i save se Jehova i no laekem ol man we oli divos blong nating nomo.—Malakae 2:13-16.

16. ?Baebol i talem wanem long saed blong divos mo fasin blong seraot?

¹⁶ Jisas i tijim se i gat wan risen nomo blong man mo woman i divos, hemia se wan long tufala i go slip wetem narafala man no woman. Long taem olsem, hemia we i no mekem rong i save fogivim narawan no i save mekem divos long hem. (Matiu 19:9; Hibrus 13:4) ?Olsem wanem sipos tufala we i mared i wantem seraot? Baebol i talem ol klia tok long saed ya. (Ridim 1 Korin 7:10, 11.) Baebol i no talem wan risen blong man mo woman i seraot. Be sam samtaem maet wan Kristin i harem se hem i mas lego man no woman  blong hem, from we i stap kilim nogud hem no i wan man blong apostasi. * Maet Kristin ya i haremsave se hem i stap long bigfala denja blong lego Jehova.

17. ?Ol Kristin oli save mekem wanem blong mared blong olgeta i stap gud?

¹⁷ Sam man mo woman we oli gat trabol long mared blong olgeta, oli go luk ol elda blong askem advaes. I gud ol elda oli askem long olgeta sipos oli stadi finis long buklet ya Famle i Save Glad mo wajem video ya What Is True Love? Buklet ya mo video ya i soemaot ol advaes blong Baebol blong mekem mared i kam gud. Wan mared man mo woman i talem se: “Stat long taem ya we mitufala i stadi long buklet ya, mared blong mitufala i kam gud moa.” Wan sista we i mared 22 yia finis, i ting se mared blong hem bambae i brok. Nao hem i wajem video ya, mo i talem se: “Mitufala i baptaes finis, be mitufala i no gat sem filing nating. !Video ya i kam long stret taem! Naoia mitufala i harem gud moa.” I klia se sipos ol man mo woman we oli mared oli folem ol advaes blong Jehova, bambae oli joen gud mo oli hapi.

18, 19. (1) ?Plante Kristin papa mo mama oli mekem wanem? (2) ?Olgeta we oli mekem wan spesel fultaem wok, oli mekem wanem promes?

¹⁸ Yumi tokbaot finis tufala promes we Jeftaha mo Hana i mekem. From samting ya, gel blong Jeftaha mo boe blong Hana, tufala i yusum laef blong tufala blong mekem spesel wok blong Jehova. Plante Kristin papa mo mama tede oli pulum ol pikinini blong olgeta, blong oli yusum laef blong olgeta blong mekem wok blong God fultaem. Mo yumi evriwan i save talem ol gudfala toktok long ol yangfala ya, blong oli glad blong gohed long wok ya.—Jajes 11:40; Ol Sam 110:3.

¹⁹ Tede i gat samwe long 67,000 Witnes blong Jehova we oli mekem wan spesel fultaem wok. Maet oli wok long Betel, bildim ol haos wosip, tijim ol narafala long wan spesel wok, mekem wok blong eria elda, spesel paenia, misinari, lukaot long Haos Asembli, no lukaot long ples we i gat ol Baebol Skul. Olgeta ya oli mekem “Promes Blong Obei Mo Laef Olsem Puaman.” Hemia wan promes se bambae oli wok had long enikaen wok blong Jehova, bambae oli gat wan laef we i no fasfas, mo sipos oli mas wok smoltaem blong kasem mane bambae oli askem fastaem. Ol man ya oli no spesel, be wok blong Jehova we oli mekem, hemia nao samting we i spesel. Tingting blong olgeta i stap daon, mo taem oli gohed long spesel fultaem wok ya, oli gat strong tingting blong holem promes blong olgeta.

20. ?Yumi mas gat wanem tingting long ol promes we yumi mekem long God? ?From wanem?

²⁰ Long stadi ya, yumi tokbaot tri promes we yumi mekem long God. Maet yu yu mekem sam long ol promes ya finis. Yumi save se yumi mas tinghevi long ol promes blong yumi, mo traehad oltaem blong holem. (Ol Proveb 20:25) Sipos yumi no holem wan promes we yumi mekem long Jehova, yumi save kasem bigfala trabol. (Prija 5:6) Taswe, i gud yumi mekem olsem man blong raetem Sam ya, we i talem long Jehova, se: “Bambae mi stap givim ol samting ya long yu we mi promes blong givim, mo oltaem bambae mi sing blong presem yu.”—Ol Sam 61:8.