1. (a) Aha do na ibahen si Jepta pakon si Hanna? (Idah gambar i atas.) (b) Sungkun-sungkun aha do na laho iulas hita bani artikel on?

SAHALAK puanglima na pangkar do si Jepta. Sahalak naboru na parduli bani kaluarga do si Hanna. Haduasi sidea manombah Jahowa. Anjaha mambahen bagah-bagah bani Jahowa. Dob ai, marusaha do sidea pasaudkon ai. Halani ai, gabe siusihan na madear ma sidea bani juakjuak ni Naibata na mambahen bagah-bagah bani Jahowa. Bani artikel on, iulas hita ma tolu sungkun-sungkun: Aha do artini marbagah-bagah? Mase ponting bagah-bagah na dob ibahen hita bani Jahowa? Parlajaran aha do na dapot hita humbani si Jepta pakon si Hanna?

2, 3. (a) Aha do bagah-bagah ai? (b) Aha do na ihatahon Bibel pasal mambahen bagah-bagah bani Naibata?

² Bani Bibel, bagah-bagah ai ma sasada halak na marpadan bani Naibata. Contohni laho mambahen sada horja, mambere galangan, atap dihut bani dinas sepenuh waktu, atap lang be mangkorjahon na lepak. Sasahalak na marpadan lang halani ipaksa, tapi humbani uhurni do ai. Ulang ma mapas sasada halak bani padan na dob  binahenni, halani rosuh do Jahowa ase ipasaud ai. Bani Bibel sasada halak na ihatahon marbagah-bagah ai ma marbija laho mangkorjahon atap lang mangkorjahon sada horja. (1 Mus. 14:22, 23; Heb. 6:16, 17) Aha do na iajarhon Bibel pasal pontingni pasaudkon aha na ibagahkon hita bani Naibata?

³ Bani Titah ni si Musa ihatahon anggo sasahalak marbagah-bagah bani Jahowa, “seng bulih ubahonni hatani, maningon romban hubani haganup hata na luar hun pamanganni bahenonni”. (4 Mus. 30:2) Dob ai, si Salomo pe manuratkon, “Anggo marbagah-bagah ho bani Naibata, ulang ma padokah-dokah pasaudkon ai, ai seng marosuh Ia mangidah halak na oto. Aha na dob binagahkonmu, pasaud ma ai.” (Par. 5:3) Jesus pe mangajarhon, “Ibogei hanima do hata hubani ompung na lobei, ‘Seng bulih bijahononmu na so tongon! Na dob nibulawankon bani Naibata, maningon galaronmu do ai!’”—Mat. 5:33.

4. (a) Mase maningon ipasaud hita bagah-bagah bani Naibata? (b) Aha do na laho iparlajari hita humbani si Jepta pakon si Hanna?

⁴ Tangkas do ibotoh mase maningon ipasaud hita bagah-bagah bani Jahowa. Gabe dear ma parhasomananta pakon Jahowa anggo igalar hita bagah-bagahta. Lambin talar ma ai sanggah ihatahon si Daud, “Ise do na boi tangkog hu dolog ni Jahowa? Ise do na boi jongjong bani ianan-Ni na pansing in?” Dob ai ibalosi ma use, ijalo Jahowa do “halak na so ra marbija laho manipu”. (Ps. 24:3, 4) Aha do na ibagahkon si Jepta pakon si Hanna? Mase lang urah pasaudkon ai?

5. Aha do na ibagahkon si Jepta? Tapi aha na masa?

⁵ Marbagah-bagah do si Jepta bani Jahowa sanggah manlawan halak Amon, munsuh ni sidea. (Panguh. 10:7-9) Mangindo hamonangan do ia bani Jahowa, nini ma, “Anggo iondoskon Ham halak Amon hubagas tanganku, jadi barang aha na luar parlobei hun labah ni rumahku manjumpahkon ahu, sanggah na mulak ahu horas-horas humbani halak Amon, maningon Jahowa ma simada ai.” Ibalosi Jahowa ma ai, monang ma sidea. Daskonsi si Jepta i rumah, boruni do na manjumpahkonsi. Gabe ‘Jahowa ma simadasi’. (Panguh. 11:30-34) Aha do artini on bani boruni?

6. (a) Ai urah do bani si Jepta ampa boruni laho manggalar bagah-bagah ni sidea? (b) Aha na iparlajari hita humbani 5 Musa 23:21, 23 ampa Psalmen 15:4?

⁶ Laho pasaudkon bagah-bagah ni bapani, maningon do boru ni si Jepta mambere gok panorang mangidangi i tabernakel. Ai lang ipingkirhon si Jepta  lobei paima marbagah-bagah? Lang sonai. Ra do ibotoh si Jepta anggo boruni do na parlobei manjumpahkonsi. Hassi pe ibotoh ia atap lang, lang urah bani sidea laho pasaudkon bagah-bagah ai. Sanggah ididah si Jepta boruni, pusok tumang uhurni. Boruni ai pe, laho do “manangisi haanakboruonni”. Mase? Lang adong anak ni si Jepta, janah boru sasadani pe seng bulih marhajabuan. Jadi lang adong be na pagoluhkon ginompar bani si Jepta. Tapi ibotoh sidea, pontingan do pasaudkon bagah-bagah ai marimbangkon uhur ni sidea. Nini si Jepta, “Domma hubuha pamanganku marbagah-bagah hubani Jahowa, anjaha seng be tartarik ahu bagah-bagahkai.” Nini boruni ma, “Bahen ham ma bangku romban hu bani na dob iluarhon ham.” (Panguh. 11:35-39) Lang ongga sidea marpingkir laho mangosei padanni bani Naibata hassi pe sunsah iahap sidea.—Basa 5 Musa 23:21, 23; Psalmen 15:4.

7. (a) Aha do na ibagahkon si Hanna, janah mase? Aha na masa? (b) Aha do arti padan ni si Hanna bani si Samuel? (Idah surat partoruh.)

⁷ Marbagah-bagah do homa si Hanna bani Jahowa sanggah pusok uhurni. Lang boi ia marniombah. Halani ai iejek imbangni ma ia. (1 Sam. 1:4-7, 10, 16) Martonggo ma ia bani Jahowa janah ihatahon, ‘Ham Jahowa Zebaot, anggo itatap Ham do hasombuhan ni jabolon-Mu on, anjaha idingat Ham do ahu, anjaha seng ihalupahon Ham jabolon-Mu on, tapi ra Ham mambere bani jabolon-Mu on sada anak, bereonku ma ia hu bani Jahowa, sadokah manggoluh ia anjaha seng anjai dais pisou parsuhur bani uluni.’ * (Idah surat partoruh.) (1 Sam. 1:11) Ibalosi Jahowa ma tonggoni janah dob satahun tubuhan anak ma ia, ai ma si Samuel. Megah tumang uhur ni si Hanna! Tapi seng lupa ia bani padanni. Sanggah tubuh anakni, nini do, “Hun bani Jahowa do ia hupindo.”—1 Sam. 1:20.

8. (a) Mase lang urah si Hanna pasaudkon bagah-bagahni? (b) Aha do na idingat hita humbani si Hanna sanggah mambasa Psalmen 61?

⁸ Sanggah si Samuel marumur tolu tahun, ipasaud si Hanna ma padanni ai bani Jahowa. Iondoskon ma si Samuel hu bani Sintua ni Malim Eli i tabernakel i Silo, janah mangkatahon, “Dakdanak on do, na hutonggohon ijia, gabe ilayak-layakkon Jahowa hu bangku na pinindo ni uhurhu hun Bani. Halani ai ondoskononku ma ia bani Jahowa. Sai ondos bani Jahowa ma ia, sadokah ia manggoluh.” (1 Sam. 1:24-28) Jadi,  tading ma si Samuel ijai. Bibel patugahkon “magodang i lobei ni Jahowa do anggo si Samuel”. (1 Sam. 2:21) Lang urah bani si Hanna laho pasaudkon padanni ai, halani lang boi be ia pagodangkon si Samuel. Tapi bani si Hanna ponting tumang do pasaudkon bagah-bagahni. Ra do ia mambere aha na maharga hun bani, ase boi pasaudkon bagah-bagahni.—1 Sam. 2:1, 2; basa Psalmen 61:2, 6, 9.

9. Aha do na laho iulas hita?

⁹ Dob iarusi hita mase maningon ipasaud hita bagah-bagahta bani Jahowa, ulas hita ma sungkun-sungkun on: Padan aha do na ibahen hita sonari on? Aha do na maningon bahenonta laho pasaudkon ai?

10. Padan aha do na siporlunan na ibahen halak Kristen? Aha do artini ai?

¹⁰ Padan na sipontingan na ibahen halak Kristen ai ma sanggah ia mangondoskon diri hubani Jahowa. Sanggah martonggo, marbagah-bagah do ia laho mambere goluhni bani Jahowa,  lang soal aha na masa. Songon na ihatahon Jesus, “iparnalang” hita do dirinta, artini Jahowa do na sipontingan sedo dirinta. (Mat. 16:24) Halani ai “tong do bani Tuhan in hita”. (Rom 14:8) Maningon do galaronta na dob ibagahkon hita songon na ihatahon bani Psalmen, “Naha ma pambalasku bani Jahowa, halani haganup pambahenan-Ni bangku? Bagah-bagahku bani Jahowa, hugalar ma, hugalar i lobei ni haganup bangsa-Ni.”—Ps. 116:12, 14.

11. Aha do na isungkun sanggah nasiam laho ididi?

¹¹ Ai domma mangondoskon diri ham hubani Jahowa janah ididi? Anggo domma, jenges ma ai! Ai idingat ham do sanggah sanina na padaskon ambilan pandidion mangkatahon, ai domma mangondoskon diri nasiam bani Jahowa janah mangarusi anggo “mangondoskon diri janah ididi, nasiam itanda gabe Saksi-Saksi Jahowa”? Sanggah eak balos ni nasiam ibotoh ganup halak na roh ma anggo nasiam domma mangondoskon diri janah domma boi ididi gabe juakjuak ni Naibata. Tontu malas do uhur-Ni!

12. (a) Sonaha do hita mamareksa diri? (b) Biak na sonaha do na iojur si Petrus ase ipataridah hita?

¹² Sanggah ididi, marbagah-bagah do nasiam bani Jahowa laho mambalosi-Si janah mandalankon ganup aturan-Ni. Tapi, mungkahni ope ai. Porlu do tongtong ipareksa hita sonaha dirinta. Sungkun ma, ‘Sonaha do parhasomananku pakon Jahowa dobkonsi ahu ididi? Ai tongtong ope ahu mangidangi-Si humbani gok ni uhur? (Kol. 3:23) Ai gati do ahu martonggo? Hubasa do Bibel bai ganup ari? Ai tongtong do ahu martumpu? Ringgas do ahu marbarita? Atap lang be marosuh ahu mandalankon ai?’ Apostel Paulus pasingatkon maningon jaga do hita humbani aha pe na mambahen hita rayohan ibagas mangidangi Jahowa. Ase ulang sonai, maningon do ipatoguh hita haporsayaon, hasabaron, ampa hadaulatonta. Janah pongkut ma hita marlajar.—Basa 2 Petrus 1:5-8.

13. Aha do na porlu ibotoh halak na laho mangondoskon diri janah ididi?

¹³ Hita lang boi mosei bani padan laho mambalosi Jahowa. Jadi, halak na lang ra be mambalosi Jahowa, lang bulih hatahononni anggo ia lang tongon-tongon mangondoskon diri bani Naibata janah lang sah pandidionni ai. * (Idah surat partoruh.) Anggo halak na dob mangondoskon diri mambahen dousa, martanggung jawab do ia bani Naibata Jahowa ampa kuria. (Rom 14:12) Lang ra hita songon halak na ihatahon Jesus, “Itadingkon ham do holong ni uhurmu na bani mungkahni ondi.” Tapi rosuh do hita anggo ia mangkatahon, “Hubotoh do sagala horjamu pakon holong ni uhurmu pakon haporsayaonmu pakon pansarihonmu pakon hasabaronmu ampa pambahenanmu  na parpudi on, na bueinan humbani na parlobei ai.” (Pangk. 2:4, 19) Hita sihol pamalaskon uhur ni Naibata Jahowa marhitei mandalankon bagah-bagahta hu Bani.

14. Padan na paduahon aha do na boi ibahen sasada halak? Mase?

¹⁴ Padan na paduahon na sipontingan na ibahen halak Kristen ai ma padan partongah jabuan. Pansing do partongah jabuan ai. Ponting do bani Jahowa padan ai. Sanggah sidea na laho marhajabuan marpadan, sidea marbagah-bagah i lobei ni Jahowa ampa halak na roh hujai. Somalni marbagah-bagah do sidea ase hormat janah marsihaholongan sadokah sidea rup manggoluh i tanoh on domu bani aturan partongah jabuan hun Naibata. Bani na legan, ra do lang sonai na ihatahon, tapi totap do sidea marbagah-bagah i lobei ni Naibata. Dob ihatahon padan ai, gabe sah ma parhajabuan ni sidea. Marhajabuan artini pardomuan sadokah manggoluh. (1 Mus. 2:24; 1 Kor. 7:39) Nini Jesus, “Na dob pinadomu ni Naibata, seng bulih sirangon ni jolma.” Ulang ma mintor marsirang sidea na mangahap parhajabuanni lang martuah.—Mrk. 10:9.

15. Pasal parhajabuan, mase halak Kristen lang boi songon dunia on?

¹⁵ Tontu sai adong do parsoalan ibagas partongah jabuan halani sidea lang sempurna. Ai ma ase ihatahon Bibel “marhasunsahan do” halak na marhajabuan. (1 Kor. 7:28) Sonari, bahat halak i dunia on lang sai parduli bani parhajabuan ni sidea. Anggo lang martuah parhajabuanni, iahap sidea boi do marsirang. Tapi halak Kristen lang sonai. Ibotoh sidea do, domma marpadan sidea i lobei ni Naibata. Anggo ilanggar sidea padan ai, doskon marladung bani Naibata do ai. Janah magigi do Naibata bani halak sisonai. (3 Mus. 19:12; Pod. 6:16-19) Maningon do idingat halak Kristen na marhajabuan, na ihatahon si Paulus, “Domma sangkut ham bani sada naboru? Ulang pindahi dalan sirang!” (1 Kor. 7:27) Si Paulus mangkatahon sonai halani ia mambotoh magigi do Jahowa bani halak na mangosei padan parhajabuan.—Mal. 2:13-16.

16. Aha do na ihatahon Bibel pasal marsirang ampa padaoh-daoh?

¹⁶ Jesus mangajarhon sasada halak boi marsirang anggo ia lang ra manasap dousa ni pasangan hidupni na marbangkis. (Mat. 19:9; Heb. 13:4) Tapi, sonaha do pasal na padaoh-daoh? Lang dong ipatugah bani Bibel aha do alasanni na marhajabuan boi padaoh-padaoh. Dong do prinsip ni Bibel bani na marhajabuan. (Basa Mateus 19:6.) Sipata, adong do situasi na mambahen na marhajabuan padaoh-daoh. Umpamani, Anggo kasar pasangan hidupni ai atap manlanglangi ia laho manombah Jahowa, ra do dearan pangahapni anggo ia padaoh-daoh pakon pasanganni ai marimbangkon totap rup hape boi  parohkon parmaraan. * (Idah surat partoruh.)

17. Aha do na boi ibahen pasangan halak Kristen ase toguh parhajabuan ni sidea?

¹⁷ Anggo adong pasangan na mangindo bani sintua ase mangurupi parhajabuan ni sidea lambin dear, boi do isuruh sintua ai ase sidea manonton video Apa Itu Cinta Sejati? ampa marlajar humbani buku Kaluarga Nasiam Boi Martuah. Ijai adong prinsip hun Bibel na boi mangurupi ase toguh parhajabuan ni sidea. Sada pasangan mangkatahon, “Dobkonsi iparlajari hanami buku ai, lambin martuah ma parhajabuannami.” Sada botou na marhajabuan sadokah 22 tahun laho marsirang ma uhurni. Tapi dob ia manonton video ai, nini ma, “Hassi pe haduasi hanami domma ididi, tapi hanami lang sauhur. Pas tumang ma adong video on! Jadi marusaha ma hanami mambahen sidearan.” Anggo paramangon pakon parinangon mangihutkon aturan ni Jahowa, lambin toguh janah martuah ma parhajabuan ni sidea.

18, 19. (a) Aha do na ibahen bahat namatoras? (b) Padan aha do na ibahen sidea na mangidangi ibagas dinas sepenuh waktu khusus?

¹⁸ Nongkan ai, iulas hita pasal padan na ibahen si Jepta pakon si Hanna. Halani domma marbagah-bagah, boru ni si Jepta pakon anak ni si Hanna gabe mangidangi Jahowa sadokah goluhni. Sonari pe, bahat do namatoras mangojur niombahni ase dihut ibagas dinas sepenuh waktu laho mangidangi Jahowa. Janah ganup hita boi do homa mangojur na maposo ase totap bani dinas sisonai.—Panguh. 11:40; Ps. 110:3.

¹⁹ Sonari dong hira-hira 67.000 anggota Ordo Khusus Saksi-Saksi Jahowa i Sab Dunia na Mambere Gok Panorang Mangidangi. Dong na mangidangi i Betel, tukang atap horja kaliling. Na legan gabe sipangajari ibagas horja pangidangion, parintis istimewa, misionaris, siparugas Balei Kebaktian atap siparugas bani ianan sikolah Bibel. Ganup sidea mambahen “Padan Ase Unduk janah Lang Marlobih-Lobih”. Marpadan do sidea ase ringgas mangkorjahon tugas aha pe na ibere bani sidea, sederhana goluhni, janah lang mansari anggo lang dong izin. Jadi ijon sedo halakni na gabe istimewa, tapi horjani do. Martoruh ni uhur do sidea laho mandalankon aha na dob ibagahkon sadokah sidea ibagas dinas sepenuh waktu khusus.

20. Aha do bahenonta anggo domma marbagah-bagah? Mase?

²⁰ Bani artikel on domma iulas hita tolu bagah-bagah na boi ibahen hita bani Naibata. Humbani bagah-bagah ai, ra do adong na dob ibahen nasiam. Domma ibotoh hita, maningon do galaron aha na dob ibagahkon hita. (Pod. 20:25) Anggo lang igalar hita ai, mardousa ma hita i lobei ni Naibata. (Par. 5:5) Jadi bahen hita ma songon na ihatahon bani buku Psalmen, “Hudodingkon ma goran-Mu tongtong, anjaha hugalari bagah-bagahku ganup ari.”—Ps. 61:9.