1. (a) Ki Zefta ek Ana ti annan an komen? (Vwar portre o konmansman sa lartik.) (b) Ki bann kestyon ki pou ganny reponn dan sa lartik?

ZEFTA ti en dirizan kouraze e i ti en gerye brav. Ana ti en madanm ki ti annan limilite e i ti pran swen avek son msye ek son lakour. Zefta ek Ana ti ador Zeova. Me zot ti annan en lot keksoz an komen. Tou le de ti fer en ve avek Zeova e zot ti akonpli zot ve. Zot bann bon legzanp pour bann zonm ek madanm ozordi ki deside pour fer bann ve avek Zeova. Aprezan, annou diskit larepons trwa kestyon: Kisisa en ve? Ki degre serye nou devret vwar nou ve ki nou fer avek Bondye? Ki nou kapab aprann avek Zefta ek Ana?

2, 3. (a) Kisisa en ve? (b) Ki Labib i dir lo fer bann ve avek Bondye?

² Dan Labib, en ve i en promes serye ki ganny fer avek Bondye. Par egzanp, en dimoun i kapab promet Zeova ki i pou fer en aksyon, ofer en kado, fer en serten servis ouswa pa servi serten keksoz. Pour fer en ve, en dimoun i servi son liberte pour swazir. Personn pa ganny forse pour fer en ve. Me ler en dimoun i swazir pour fer li,  Zeova i vwar son ve konman en promes serye ki bezwen ganny respekte e akonplir. Dan Labib, en ve i annan menm lenportans ki en serman. En serman i ganny fer ler en dimoun i lev son lanmen anler e dir ki i pou fer en serten keksoz ouswa i pa pou fer sa keksoz. (Zenez 14:22, 23; Ebre 6:16, 17) Alor, ki Labib i dir konsernan ki degre serye nou devret vwar nou ve ki nou fer avek Bondye?

³ Lalwa Moiz i dir ki si en dimoun i fer en ve avek Zeova, “i pou bezwen gard son parol; i ava fer parey i’n promet.” (Nonm 30:2) Pli tar, Salomon ti ekri: “Ler ou fer en ve avek Bondye, pa tarde pour akonpli li, akoz Bondye pa pran plezir dan bann sotiz; akonpli ve ki ou’n fer.” (Eklezyast 5:4) Zezi ti ansennyen ki fer en serman avek Bondye i en keksoz serye ler i ti dir: “Zot in osi tande ki i’n ganny dir avek nou zanset: ‘Ou pa devret fer en serman e pa gard ou parol, me ou devret akonpli ou ve anver Zeova.’”—Matye 5:33.

4. (a) Ki degre i serye pour fer en ve avek Bondye? (b) Ki nou anvi aprann avek Zefta ek Ana?

⁴ I kler ki nou devret pran o serye nenport ki promes ki nou fer avek Zeova. Nou latitid anver nou ve i annan en lefe lo nou relasyon avek li. David ti fer sa kler ler i ti demande: “Lekel ki kapab mont lo montanny [Zeova]? Lekel ki kapab tenir debout dan son sanktyer?” Apre i ti reponn sa bann kestyon par dir ki Zeova pou aksepte nenport ki, ki “pa fer fo promes.” (Psonm 24:3, 4) Ki ve Zefta ek Ana ti fer? Eski i ti fasil pour zot akonpli zot ve?

5. Ki ve Zefta ti fer? Ki ti rezilta?

⁵ Zefta ti fer en promes avek Zeova avan ki i ti al lager kont bann Amonit. Sa nasyon ti en lennmi pep Bondye. (Ziz 10:7-9) Zefta ti sipliy Zeova pour en laviktwar. I ti fer en ve avek Zeova e i ti dir: “Si vreman ou livre mwan bann Amonit, si mon retournen apre laviktwar kont zot, sa premye dimoun ki ava sorti dan mon lakaz pour akeyir mwan, ava pour [Zeova]; mon ava ofer li konman en sakrifis konplet.” Bondye ti reponn lapriyer Zefta e i ti ed li pour ganny lager. Kan i ti retourn kot li, son fiy byenneme ti vin rankontre li. I ti sa enn ki ti pou vin “pour [Zeova].” (Ziz 11:30-34) Ki ti pou arive avek son fiy?

6. (a) Akoz i ti difisil pour Zefta ek son fiy akonpli sa promes ki Zefta ti fer avek Bondye? (b) Ki nou aprann konsernan bann ve dan Deterononm 23:21, 23 ek Psonm 15:4?

⁶ Pour akonpli ve son papa, fiy Zefta ti bezwen al servi Zeova kot tabernak  tou son lavi. Eski Zefta ti’n fer son ve san byen reflesir? Non. Anfet, i tre probab ki Zefta ti konnen ki son fiy ti pou sa premye dimoun ki ti pou’n vin rankontre li. Ki swa i ti konnen ouswa non, akonpli son ve pa ti fasil ni pour Zefta e ni pou son fiy. Ler Zefta ti vwar li, i ti dir ki son leker ti kase. Son fiy ti al lo montanny pour “pler son virzinite.” Akoz? Zefta ti napa en garson e la son fiy pa ti kapab marye e fer zanfan. Sa i vedir ki non fanmir Zefta ti pou fini lanmenm. Me kantmenm sa, tou le de, Zefta ek son fiy ti konnen ki i ti annan en keksoz pli enportan ki zot prop santiman. Zefta ti dir: “Mon’n angaz mwan devan [Zeova] e mon pa kapab retourn annaryer.” Son fiy ti dir: “Azir anver mwan dapre promes ki ou’n fer.” (Ziz 11:35-39) Zefta ek son fiy ti de dimoun fidel ki pa ti pou zanmen mazin pour pa akonpli en ve avek Bondye menm si i ti vreman difisil pour zot.—Lir Deterononm 23:21, 23; Psonm 15:4.

7. (a) Ki ve Ana ti fer e akoz? Ki ti arive apre? (b) Ki ti pou arive avek Samyel par sa ve ki Ana ti fer? (Vwar not.)

⁷ Ana osi ti fer en ve avek Zeova pandan en moman difisil dan son lavi. I ti malere akoz i pa ti kapab fer zanfan e akoz i ti pe ganny provoke. (1 Samyel 1:4-7, 10, 16) I ti dir Zeova ki mannyer i ti santi e i ti fer sa promes: “[Zeova] Toupwisan! Si ou zet en regar lo ou servant, dan son leta mizer, si ou pran pitye e pa oubliy ou servant; si ou donn mwan en garson, mon pou konsakre li tou son lavi pour servi ou. Razwar pa pou zanmen pas lo son latet.” * (Vwar not.) (1 Samyel 1:11) Zeova ti ekout lapriyer Ana e son lannen apre i ti donn nesans en garson ki i ti apel Samyel. Ana ti vreman kontan! Me i pa ti oubliy son ve ki i ti fer avek Bondye. Ler son pti garson ti ne, i ti dir: “I ti avek Zeova ki mon ti demann li.”—1 Samyel 1:20, NWT.

8. (a) Eski i ti fasil pour Ana akonpli son ve? (b) Ki mannyer Psonm 61 i fer ou rapel bon legzanp Ana?

⁸ Ler Samyel ti apepre trwa-z-an, Ana ti akonpli son promes avek Zeova. I ti anmenn Samyel kot Granpret Eli kot tabernak Silo e i ti dir: “Pour sanmenm sa zanfan ki mon ti pe priye; [Zeova] in donn mwan sa ki mon ti pe demann li. Aprezan i mon tour pour donn li [Zeova]. I ava reste pour [Zeova] tou dilon son lavi.” (1 Samyel 1:24-28) Depi sa zour, Samyel ti reste  kot tabernak. Labib i dir ki “Samyel, sa pti garson ti kontinyen grandi avek Zeova.” (1 Samyel 2:21 NWT) I pa ti fasil pour Ana akonpli son ve parski i pa ti pou kapab avek son pti garson ki i ti kontan en kantite. I pa ti pou kapab vwar li anmezir ki i ti pe grandi. Me, pour Ana, son ve ki i ti’n fer avek Zeova ti en keksoz serye. I ti pare pour sakrifye son bann keksoz enportan pour ki i gard son promes ki i ti’n fer avek Bondye.—1 Samyel 2:1, 2; lir Psonm 61:1, 5, 8.

9. Ki nou pou diskite aprezan?

⁹ La ki nou’n konpran ki fer ve avek Zeova i en keksoz serye, annou diskit lo sa bann kestyon: Ki bann kalite ve nou kapab fer ozordi? Ki kantite determinasyon nou devret annan pour akonpli sa bann ve?

10. Ki sa ve pli enportan ki en Kretyen i kapab fer? Ki sa i enkli?

¹⁰ Sa ve pli enportan ki en Kretyen i kapab fer, i sa enn kot i dedye son lavi  avek Zeova. Dan en lapriyer an prive, en dimoun i promet ki nenport kwa ki kapab arive i pou servi Bondye tou son lavi. Zezi ti dir ki nou devret “aret viv” zis pour nou menm, savedir, nou promet pour met Zeova premye e non pa nou menm. (Matye 16:24) Depi sa zour, “nou viv pour Zeova.” (Romen 14:8) Nou pran nou dedikasyon o serye. Nou santi parey sa psalmis ki ti dir: “Ki mon pou donn [Zeova] an retour pour tou sa kantite dibyen ki i’n fer pour mwan? Devan tou son pep, mon pou akonpli mon promes anver [Zeova].”—Psonm 116:12, 14.

11. Ki ti arive zour ou ti batize?

¹¹ Eski ou’n dedye ou lavi avek Zeova e senboliz ou dedikasyon par batenm? Si ou’n fer sa, sa i tre byen! Eski ou rapel ler sa frer ki ti pe fer diskour batenm ti demande si ou ti’n dedye ou lavi avek Zeova e konpran ki “ou dedikasyon i idantifye ou konman en Temwen Zeova”? Ler ou ti reponn wi, tou sa ki ti la ti konnen ki ou ti’n dedye ou lavi e kalifye pour ganny batize konman en minis ordonnen Zeova. Ou ti’n bezwen fer Zeova vreman kontan!

12. (a) Ki bann kestyon ki nou devret demann nou lekor? (b) Ki bann kalite ki Pyer ti ankouraz nou devlope?

¹² Ler ou ti batize, ou ti promet Zeova ki ou ti pou servi ou lavi pour servi li e fer tou sa ki ou kapab pour swiv son bann standar. Me batenm i zis en konmansman. Anmezir letan i pase, nou tou nou devret kontinyen analiz nou lekor. Nou kapab demande: ‘Ki mannyer mon relasyon avek Zeova in agrandi depi ki mon’n batize? Eski mon ankor pe servi li avek tou mon leker? (Kolosyen 3:23) Eski mon priy regilyerman? Eski mon lir Labib tou le zour? Eski mon asiste renyon regilyerman? Eski mon prese otan ki posib? Eski mon’n konmans perdi mon devouman pour sa bann aktivite? Zapot Pyer in averti nou ki nou kapab vin inaktif dan servis Zeova. Nou kapab evite vin koumsa si nou fer tou zefor pour ogmant nou lafwa, konnesans, landirans ek devosyon pour Bondye.—Lir 2 Pyer 1:5-8.

13. Ki en Kretyen ki’n dedye son lavi avek Zeova e ki’n batize i bezwen konpran?

¹³ Enn fwa ki nou’n fer en ve avek Zeova, sa ve i reste pour touzour. En dimoun ki nepli anvi servi Zeova oubyen aret viv konman en Kretyen pa kapab pli tar dir ki i pa ti’n vreman dedye son lavi avek Bondye e ki son batenm pa ti valid. * (Vwar not.) Si en dimoun ki’n dedye son lavi avek Zeova i komet en pese grav, sa dimoun i bezwen rann kont avek Zeova ek kongregasyon. (Romen 14:12) Nou pa devret zanmen vin parey sa bann ki Zezi ti dir zot: “Ou’n perdi sa lanmour ki ou ti annan o konmansman.” O kontrer, nou anvi ki i dir sa lo nou: “Mon konn sa ki ou fer,  ou lanmour, lafwa, ou minister ek landirans e ki tou dernyenman, ou’n fer plis ki o konmansman.” (Revelasyon 2:4, 19) Nou anvi fer Zeova plezir par viv nou lavi dapre nou dedikasyon.

14. Ki sa dezyenm ve pli enportan ki en dimoun i kapab fer? Akoz?

¹⁴ Sa dezyenm ve pli enportan ki en dimoun i kapab fer i ve maryaz. Maryaz i sakre. Zeova i vwar ve maryaz konman en keksoz vreman serye. Ler nouvo ek nouvel marye i fer zot ve, zot pe fer en promes devan Zeova e osi devan tou sa bann dimoun ki prezan. Zot promet pour kontan, serir e respekte kanmarad osi lontan ki zot viv ansanm lo later annakor avek laranzman Bondye lo maryaz. Lezot i kapab pa servi sa bann menm mo, me kantmenm sa, zot pe fer en ve devan Bondye. Ler zot fer sa bann ve, zot vin msye ek madanm. Maryaz i devret en linyon ki dir pour touzour. (Zenez 2:24; 1 Korentyen 7:39) Zezi ti dir: “Sa ki Bondye in ini ansanm, zonm pa devret separe.” Sa de dimoun ki pe al marye pa devret mazinen ki si zot maryaz pa mars byen, nenport ki ler zot pou kapab divorse.—Mark 10:9.

15. Akoz pwennvi ki bann Kretyen i annan lo maryaz i devret diferan avek sa ki pour lemonn?

¹⁵ Byensir, vi ki i napa bann dimoun parfe, i pou osi napa bann maryaz ki parfe. Se pour sa rezon ki Labib i dir ki tou dimoun marye “pou ganny problenm” par ler. (1 Korentyen 7:28) Ozordi dan lemonn, i annan en kantite ki pa pran maryaz o serye. Zot santi ki si zot maryaz pa marse, nenport ki ler zot kapab divorse. Me en Kretyen pa devret annan sa kalite pwennvi lo maryaz. Zot konnen ki zot in fer zot ve devan Bondye. Si zot kas zot ve, i ti pou konmsi zot ti pe koz manti avek Bondye e Bondye i ay bann ki koz manti. (Levitik 19:12; Proverb 6:16-19) Bann Kretyen ki’n marye i devret rapel parol zapot Pol: “Eski ou annan en madanm? Pa rod en separasyon.” (1 Korentyen 7:27) Pol ti kapab dir sa akoz i ti konnen ki Zeova i ay divors ki ganny plàn pour en move rezon.—Malaki 2:13-16.

16. Ki Labib i dir lo divors ek separasyon?

¹⁶ Zezi ti ansennyen ki sel rezon pour divorse i, si en konzwen i komet adilter e sa konzwen inosan i deside pour pa pardonn li. (Matye 19:9; Ebre 13:4) Ki pour dir lo separasyon? Labib i kler lo la. (Lir 1 Korentyen 7:10, 11) Dapre Labib, i napa okenn rezon pour ki de dimoun ki’n marye i separe. Me, par ler i kapab annan sityasyon kot en Kretyen i santi ki i absoliman bezwen separe avek son konzwen. Par egzanp, en Kretyen i kapab konvenki ki son lavi ouswa son relasyon avek Zeova pou vreman an danze si i kontinyen reste avek en konzwen ki pa tret li byen ouswa si sa konzwen i en aposta. * (Vwar not.)

17. Ki en koup Kretyen i kapab fer pour ki zot maryaz i dire?

 ¹⁷ Si en koup i demann konsey lo konman pour amelyor zot maryaz avek bann ansyen dan kongregasyon, sa bann ansyen i kapab demann sa koup si zot in get sa video Kisisa vre lanmour? ek sa pti liv Ou fanmir i kapab ere. Dan sa de piblikasyon i annan bann prensip Labib ki kapab ede pour ki en maryaz i vin pli for. En koup ti dir: “Depi ki nou pe etidye sa pti liv, nou maryaz in vin pli ere ki avan.” En ser ki ti’n marye pour 22 an ti krwar ki son maryaz ti pros pour kase. Me apre ki i ti’n get sa video, i ti dir: “Nou tou le de nou’n batize, me emosyonnelman nou ti konpletman diferan. Sa video in vin zis a tan! Nou pe fer pli byen konman en koup aprezan.” Alor, i kler ki si msye ek madanm i aplik bann prensip Zeova dan zot maryaz, zot relasyon avek kanmarad pou vin pli ere e pli for.

18, 19. (a) Ki bokou paran Kretyen in fer? (b) Ki nou kapab dir lo bann ki pe fer servis spesyal a plen tan?

¹⁸ O konmansman sa lartik nou ti diskit lo ve ki Zefta ek Ana ti fer. Gras a sa bann ve, fiy Zefta ek garson Ana ti servi zot lavi pour servi Zeova dan en fason spesyal. Plizyer paran Kretyen ozordi in ankouraz zot zanfan pour pran servis a plen tan e konsantre lo servi Bondye. Nou tou nou kapab fer nou par pour ankouraz sa bann zenn pour kontinyen dan zot servis.—Ziz 11:40, NWT; Psonm 110:3.

¹⁹ Ozordi, i annan apepre 67,000 Serviter spesyal a plen tan dan lemonn antye. Serten i servi kot Betel, dan travay konstriksyon ouswa konman sirveyan rezyonal. Lezot i travay dir konman bann enstrikter, pionye spesyal, misyonner, serviter Lasal Lasanble ouswa bann serviter lekol ki baze lo Labib. Sakenn parmi zot in fer en “ve lobeisans ek lapovrete.” Ler zot fer sa ve, zot promet pour travay dir dan nenport servis Zeova ki zot gannyen, viv en lavi senp e zot pa fer travay profann san ki zot ganny permisyon. I pa bann serviter ki spesyal me zot travay ki spesyal. Avek limilite, zot determinen pour gard zot ve osi lontan ki zot reste dan servis spesyal a plen tan.

20. Konman nou devret vwar nou ve ki nou fer avek Bondye? Akoz?

²⁰ Dan sa lartik, nou’n diskit lo trwa kalite ve ki nou kapab fer avek Bondye. Petet ou menm ou’n fer serten sa bann ve. Nou konnen ki nou devret vwar nou ve konman en keksoz serye e ki nou bezwen fer tou sa ki nou kapab pour akonpli zot. (Proverb 20:25) Si nou pa akonpli nou ve avek Zeova, i pou annan bann konsekans serye. (Eklezyast 5:6) Alor, annou vin parey sa psalmis ki ti dir: “Mon pou sant an loner ou non pour touzour, pour ki mon kapab akonpli mon bann ve zour apre zour.”—Psonm 61:8 NWT.