1. (a) Nama utai ti sama ke digaga Jeptah enggau Hanah? (Peda gambar ba pun artikel.) (b) Nama tanya ti deka disaut ba artikel tu?

JEPTAH nya seiku tuai sereta soldadu ti berani. Hanah nya seiku indu ti baruh ati ke nemu ngintu laki iya sereta ruang bilik iya. Jeptah enggau Hanah sama nyembah Jehovah. Tang bisi utai bukai mega ke sama ba seduai iya. Seduai iya ngaga semaya enggau Jehovah, lalu tetap ati ngamatka semaya diri. Seduai iya nyadi teladan ti badas ke orang lelaki enggau indu kemaya hari tu ke deka ngaga semaya enggau Jehovah. Aram kitai berandauka saut ngagai tiga iti tanya: Nama reti semaya? Ni pemesai reti semaya ke digaga enggau Jehovah? Nama ulih dipelajarka kitai ari Jeptah enggau Hanah?

2, 3. (a) Nama reti semaya? (b) Nama dipadah Bup Kudus pasal ngaga semaya enggau Petara?

² Dalam Bup Kudus, semaya nya sumpah ti besai ke digaga enggau Petara. Ngambika chunto, orang engka besemaya deka bejalaika pengawa, meri pemeri, enggau sesebengkah pengawa, tauka nyeliahka sekeda utai. Semaya ke digaga nitihka peneka diri tauka ngena peluang bibas milih. Nadai orang tau dipejal ngaga semaya. Tang lebuh orang milih deka  ngaga semaya, Jehovah ngumbai semaya iya hal ti berat ke patut dibasa sereta dikeamatka. Dalam Bup Kudus, semaya enggau sumpah sama besai reti. Sumpah nya jaku ke disebut orang lebuh iya besemaya deka ngereja siti-siti utai tauka enda. (P-kal. 14:22, 23; Heb. 6:16, 17) Nama dipadah Bup Kudus pasal pemesai reti ngaga semaya enggau Petara?

³ Ba Adat Moses kitai macha, enti orang besemaya enggau Jehovah, “orang nya enda tau mungkir ari semaya nya, tang ngereja semua utai ti disebut iya.” (P-pau. 30:2) Udah nya, Solomon nulis: ‘Nya alai, lebuh nuan ngaga semaya enggau Petara, nuan enda tau enda enggau naka pengelengkas ngamatka semaya nya. Petara enda begunaka orang ke beli. Kereja aja utai ti disemaya nuan.’ (P-jar. 5:4) Jesus madahka ngaga semaya enggau Petara nya hal ti besai lebuh iya nyebut: “Jaku ti udah disebut ngagai orang ke dulu kelia, ‘Anang bulaka semaya, tang kereja utai ti udah disemaya kita enggau Jehovah.’”—Mat. 5:33.

4. (a) Baka ni kitai nemu ngaga semaya enggau Petara nya hal ti besai? (b) Nama deka dipelajarka kitai pasal Jeptah enggau Hanah?

⁴ Amat, kitai enda tau enda beberatka semaya ke digaga kitai enggau Jehovah. Chara kitai mutarka semaya ulih ngubah kaul enggau Iya. David nanya: ‘Sapa tau niki ngagai bukit Jehovah? Sapa tau bediri dalam Rumah Sembiang Iya ti kudus?’ Udah nya iya nyaut enggau madahka, Jehovah deka nerima orang ke “enda ngaga semaya ti bula.” (Mas. 24:3, 4) Nama disemaya Jeptah enggau Hanah? Kati senang seduai iya ngamatka semaya diri?

5. Nama disemaya Jeptah? Nama nyadi?

⁵ Jeptah ngaga semaya enggau Jehovah sebedau iya beperang ngelaban orang Amon. Bansa nya munsuh nembiak Petara. (P-ulu. 10:7-9) Jeptah minta Jehovah nulung iya menang, lalu iya besemaya: “Enti Nuan deka ngasuh aku menang ngelaban orang Amon, aku deka nyerahka orang ke terubah-rubah pansut ari rumah aku, ti deka ngambat aku lebuh aku pulai menang beperang.” Petara nyaut sampi Jeptah, lalu nulung iya menang ba perang. Lebuh Jeptah pulai ke rumah, anak indu ti dikesayauka iya pansut ngambat iya. Anak iya nya meh ti deka ‘diserahka’ ngagai Jehovah. (P-ulu. 11:30-34) Nama reti nya ba anak indu Jeptah?

6. (a) Kati Jeptah enggau anak indu iya senang ngamatka semaya enggau Petara? (b) Nama ulih dipelajarka kitai pasal semaya ari Ulang Adat 23:21, 23 enggau Masmur 15:4?

⁶ Kena ngamatka semaya apai iya, anak indu Jeptah patut gawa penuh jam ke Jehovah ba langkau sembiang. Kati Jeptah enda berunding dulu sebedau ngaga semaya? Enda. Indah Jeptah engka nemu,  anak iya ke deka nyadi orang ti keterubah pansut ngambat iya. Tang sekalika Jeptah nemu tauka enda, ngamatka semaya diri ngagai Jehovah enda senang ba Jeptah tauka ba anak iya. Lebuh Jeptah meda anak iya, iya madahka ati diri balat tusah. Anak iya mupuk ngagai endur bukai natka diri tusah ati laban ngenang diri ke enda ulih belaki. Nama kebuah? Jeptah nadai anak lelaki, lalu diatu anak indu tunggal iya enda ulih belaki sereta ngembuan anak. Nama peturun Jeptah deka nadai agi. Tang Jeptah enggau anak iya nemu, bisi utai bukai ti berat agi ari asai ati seduai iya. Ku Jeptah madahka: ‘Aku udah besumpah enggau Jehovah, nya alai aku enda ulih matak semaya diri!’ Ku anak iya madahka: “Kereja aja meh utai ti deka dikereja nuan ngagai aku.” (P-ulu. 11:35-39) Jeptah enggau anak indu iya nya orang ti taluk ke nadai berunding deka mungkir ari semaya enggau Petara, taja pan seduai iya balat tusah deka ngamatka semaya nya.—Bacha Ulang Adat 23:21, 23; Masmur 15:4.

7. (a) Nama disemaya Hanah, lalu nama kebuah? Nama asil iya? (b) Nama reti semaya Hanah ba Samuel? (Peda nota kaki.)

⁷ Hanah mega ngaga semaya enggau Jehovah ba maya ti tusah dalam pengidup iya. Iya balat tusah ati laban enda ulih ngembuan anak, lalu iya dikelese sereta dipejai ketegal nadai anak. (1 Sam. 1:4-7, 10, 16) Iya madahka asai ati diri ngagai Jehovah, lalu besemaya: ‘Jehovah ti Pemadu Bekuasa, enti Nuan deka merening ngagai pemerinsa aku ke nembiak Nuan, lalu ingatka aku, lalu meri aku siku anak lelaki, aku deka nyerahka iya ngagai Jehovah sepemanjai umur iya, lalu buk iya deka digalau enda diguntin.’ * (Peda nota kaki.) (1 Sam. 1:11) Jehovah mendingka sampi Hanah, lalu ba taun siti iya ngadaka seiku anak lelaki ke diberi nama Samuel. Hanah balat gaga! Tang iya mengkang ingatka semaya diri enggau Petara. Lebuh anak lelaki iya ada, ku iya madahka: ‘Aku udah minta iya ari Jehovah.’—1 Sam. 1:20.

8. (a) Kati senang Hanah ngamatka semaya diri? (b) Baka ni Masmur 61 ngingatka nuan pasal chunto Hanah ti manah?

⁸ Lebuh Samuel beumur kira-kira tiga taun, Hanah ngamatka semaya iya enggau Jehovah. Iya mai Samuel ngagai Imam Besai Eli ba langkau sembiang di Siloh, lalu ku Hanah: ‘Iya tu meh anak ke dipinta aku ari Jehovah, lalu Jehovah udah nyaut sampi aku. Nya alai aku diatu nyerahka iya ngagai Jehovah. Seagi-agi iya idup, iya diserahka ngagai Jehovah.’ (1 Sam. 1:24-28) Kenyau ari hari nya, Samuel diau ba langkau sembiang. Bup Kudus madahka, ‘Samuel mansang besai, sereta majak bekereja ke Jehovah.’  (1 Sam. 2:21) Ngamatka semaya diri enda senang ba Hanah. Reti nya, iya enda ulih begulai enggau anak ti balat dikesayauka iya. Iya enda ulih meda anak iya mansang besai. Tang Hanah ngumbai semaya iya enggau Jehovah nya hal ti berat. Iya sanggup ngelengkaka utai ti besai reti ba iya ngambika ulih ngamatka semaya iya enggau Petara.—1 Sam. 2:1, 2; bacha Masmur 61:1, 5, 8.

9. Nama deka dikerandauka kitai?

⁹ Diatu kitai nemu, ngaga semaya enggau Jehovah nya hal ti besai. Aram kitai berandauka tanya tu: Nama semaya ke digaga kitai kemaya hari tu? Nama kebuah nya beguna kitai ngamatka semaya diri?

10. Nama semaya ti pemadu besai ke ulih digaga orang Kristian? Tu nyengkaum nama?

¹⁰ Siti semaya ti pemadu besai ke ulih digaga orang Kristian, iya nya nyerahka pengidup diri ngagai Jehovah. Dalam sampi kediri empu, orang besemaya deka ngena pengidup diri gawa ke Petara belama iya, enda ngira utai ke nyadi. Jesus madahka kitai “badu agi berundingka”  diri empu, iya nya kitai besemaya ngenuluka Jehovah, ukai ngenuluka diri empu. (Mat. 16:24) Kenyau ari hari nya, ‘kitai endang enggi Jehovah.’ (Rom. 14:8) Kitai enda ngumbai pengawa nyerahka diri ngagai Jehovah nya hal ti mit. Kitai ngasaika utai ti diasaika pemasmur ke nyebut: ‘Nama utai ti tau diberi aku ngagai Jehovah kena malas semua pemanah Iya enggau aku? Aku deka mayar semaya aku ngagai Jehovah di mua semua bala nembiak Iya.’—Mas. 116:12, 14.

11. Nama nyadi ba hari nuan dibaptisa?

¹¹ Udah nuan nyerahka pengidup diri ngagai Jehovah, lalu nanda iya ngena pengawa maptisa dalam ai? Enti udah, nya utai ti manah! Kati nuan agi ingat lebuh menyadi Kristian lelaki ke meri cheramah baptisa nanya sekalika nuan udah nyerahka diri ngagai Jehovah lalu nemu “pengawa nuan ke nyerahka diri ngagai Jehovah sereta dibaptisa nunjukka nuan nyadi seiku ari Saksi-Saksi Jehovah”? Lebuh nuan nyaut ya, semua orang ke datai nemu nuan udah nyerahka pengidup diri sereta layak dibaptisa, lalu nyadi seiku ari penyembah ke dipilih Jehovah. Nuan tentu udah ngelantangka ati Jehovah!

12. (a) Nama tanya ke patut ditanya kitai ngagai diri empu? (b) Nama kualiti ti diasuh Peter dikemansangka kitai?

¹² Lebuh nuan dibaptisa, nuan besemaya enggau Jehovah deka ngena pengidup nuan gawa ke Iya sereta enggau naka ulih nitihka standard Iya. Tang baptisa nya semina pun aja. Nyau kelama, semua kitai patut meresa diri empu. Kitai tau nanya: ‘Baka ni pemansang kaul aku enggau Jehovah pengudah aku dibaptisa? Kati aku agi gawa ke Iya enggau pengabis ati? (Kol. 3:23) Kati aku suah besampi? Kati aku macha Bup Kudus ninting hari? Kati aku datai begempuru enggau tetap? Kati aku enggau naka ulih nginjil enggau tetap? Tauka kati aku nyau enda entu ransing ba semua pekara tu?’ Rasul Peter nangkan kitai nyeliahka diri ari enda aktif ba pengawa ke Jehovah. Kitai ulih nyeliahka tu enti kitai bebendar mansang ba pengarap, ba penemu, ngembuan ati ti tan sereta ati ti nangika Petara.—Bacha 2 Peter 1:5-8.

13. Nama utai ke patut ditemu orang Kristian ke udah nyerahka diri ngagai Jehovah sereta udah dibaptisa?

¹³ Pengudah kitai ngaga semaya deka gawa ke Jehovah, kitai enda ulih mungkir ari semaya nya. Enti orang nya nyau lelak gawa ke Jehovah tauka lelak idup nitihka chara orang Kristian, iya enda tau ngumbai diri enda amat nyerahka diri ngagai Petara, lalu baptisa iya enda sah. * (Peda nota kaki.) Enti orang ke udah nyerahka diri ngagai Jehovah ngereja dosa ti besai, iya betanggungjawap ngagai Jehovah sereta ngagai eklisia. (Rom. 14:12) Kitai enggai baka orang ke dipadah Jesus: “Nuan udah ngelengkaka pengerindu nuan ti keterubah.” Tang kitai deka iya madah ngagai kitai: “Aku nemu utai ti dikereja nuan, pengerindu nuan, pengarap nuan, pengawa ti dikereja nuan, pasal ati nuan ti liat sereta tan. Aku nemu utai ti dikereja nuan diatu besai agi ari utai ti udah dikereja nuan terubah iya suba.”  (Pem. 2:4, 19) Kitai deka ngelantangka ati Jehovah enggau ransing idup sejalai enggau semaya ke udah nyerahka diri ngagai Jehovah.

14. Nama semaya kedua ti pemadu besai ke digaga orang? Nama kebuah?

¹⁴ Semaya kedua ti pemadu besai iya nya semaya jadi melaki-bini. Pengawa jadi melaki-bini nya tuchi. Jehovah ngumbai semaya jadi melaki-bini nya hal ti besai. Lebuh pengantin indu enggau pengantin lelaki ngaga semaya, seduai iya ngaga semaya di mua Jehovah sereta di mua semua orang ke datai. Seduai iya besemaya deka rindu, ibuh, sereta bebasaka pangan diri seagi-agi seduai iya idup begulai ba dunya nitihka penemu Petara pasal adat melaki-bini. Orang bukai engka enda ngena rambai jaku ti sama, tang sida mega ngaga semaya di mua Petara. Lebuh sida ngaga semaya nya, sida nyadi laki bini. Laki bini patut jadi enggau pangan diri seumur idup. (P-kal. 2:24; 1 Kor. 7:39) Jesus madahka: ‘Nadai orang tau nyeraraka utai ti udah ditampilka Petara.’ Indu enggau lelaki ke deka kawin enda tau ngumbai seduai iya tau sarak enti rumah tangga enda mujur.—Mrk. 10:9.

15. Nama kebuah orang Kristian enda tau nitihka chara dunya pasal pengawa jadi melaki-bini?

¹⁵ Endang amat, ketegal mensia enda sempurna, pengawa jadi melaki-bini bisi penusah. Nya kebuah Bup Kudus madahka, kekadang tiap iku orang ke udah kawin “deka dituntung penusah.” (1 Kor. 7:28) Ba dunya kemaya hari tu, mayuh orang bisi ulah ke enda entu beberatka pengawa jadi melaki-bini. Sida ngasaika diri tau sarak enti rumah tangga enda mujur. Tang tu ukai runding orang Kristian pasal pengawa jadi melaki-bini. Sida nemu, sida udah ngaga semaya di mua Petara. Enti sida mungkir ari semaya nya, sida baka ke bula ngagai Jehovah, lalu Iya begedika orang ke bula. (Lew. 19:12; J-lam. 6:16-19) Orang Kristian ke udah kawin patut ingatka jaku rasul Paul: “Kati nuan bisi bini? Anang muai bini nuan.” (1 Kor. 7:27) Paul ulih madah baka nya laban iya nemu Jehovah mega begedika pengawa sarak ke udah dipelan enggau ati ti jai.—Mal. 2:13-16.

16. Nama dipadah Bup Kudus pasal sarak enggau beserara?

¹⁶ Jesus madahka, siti kebuah tau sarak ti dikemendarka Bup Kudus iya nya enti kaling pengidup butang, lalu kaling ke enda salah enggai ngampun iya. (Mat. 19:9; Heb. 13:4) Baka ni enti ninggalka tauka beserara enggau kaling pengidup tang enda sarak? Bup Kudus pan bisi nyebut pasal pekara tu. (Bacha 1 Korint 7:10, 11.) Bup Kudus nadai nyebut kebuah ke ngasuh laki bini tau beserara. Taja pia, kekadang engka bisi utai ke ngasuh orang Kristian ngasaika diri patut beserara enggau kaling pengidup iya. Ngambika chunto, sekeda orang engka ngasaika pengidup tauka kaul sida enggau Jehovah balat dikachau enti sida mengkang idup begulai enggau kaling pengidup ke kasar tauka limpang ari Jehovah. * (Peda nota kaki.)

17. Nama ulih digaga laki bini ke Kristian ngambika rumah tangga seduai iya meruan?

¹⁷ Enti laki bini ngiga jaku ajar ari tuai  gempuru pasal chara ngemanahka rumah tangga, tuai gempuru tau nanya sekalika seduai iya udah meda video Kati Tu Amat Pengerindu? sereta belajarka brosur Kita Sebilik Ulih Gaga Ati. Dua iti utai tu nerangka prinsip Bup Kudus ke ulih nulung rumah tangga teguh agi. Sepasang laki bini madahka: “Pengudah kami duai belajarka brosur tu, rumah tangga kami duai lantang agi ari ke udah.” Seiku menyadi Kristian indu ke udah belaki pengelama 22 taun ngumbai rumah tangga iya deka nadai peluang agi. Udah nya iya meda video nya. Ku iya madahka: “Kami duai sama udah dibaptisa, tang asai ati enggau runding kami duai pasal pengidup enda agi sebaka. Video nya dikeluarka ba maya ti ngena! Kaul kami duai diatu manah agi.” Amat, enti laki bini nitihka prinsip Jehovah ba rumah tangga, kaul seduai iya deka lantang sereta teguh agi.

18, 19. (a) Nama udah digaga mayuh apai indai ke Kristian? (b) Nama ulih ditemu kitai pasal orang ke gawa penuh jam ke Jehovah?

¹⁸ Sebedau tu kitai udah berandau pasal semaya ke digaga Jeptah enggau Hanah. Ketegal semaya nya, anak indu Jeptah enggau anak lelaki Hanah ngena pengidup seduai iya gawa ke Jehovah enggau chara ti spesial. Mayuh apai indai ke Kristian kemaya hari tu meransang bala anak sida gawa penuh jam ke Jehovah, lalu betumpu ba pengawa nya aja. Lalu semua kitai patut meransang orang ke biak tu terus ba pengawa nya.—P-ulu. 11:40; Mas. 110:3.

¹⁹ Kemaya hari tu, bisi kira-kira 67,000 iku raban Worldwide Order of Special Full-Time Servants of Jehovah’s Witnesses. Sekeda sida gawa ba Betel tauka enggau pengawa nirika bengunan tauka enggau pengawa ba pelilih. Sekeda da agi bebendar nyadi field instructors, * pengerintis spesial, pengerintis seberai tasik, penulung ba Palan Gempuru Besai, tauka penulung ba bengunan sekula Bup Kudus. Tiap iku sida udah ngaga “Vow of Obedience and Poverty.” Dalam semaya tu, sida besemaya deka bebendar ngereja sebarang pengawa ari Jehovah ke diberi ngagai sida, ngembuan pengidup ti pengumbas iya, lalu nadai ngereja pengawa sekular semadi sida udah minta pemendar. Ukai orang, tang pengawa ke diberi nya ti dikumbai spesial. Sida baruh ati sereta keran deka ngamatka semaya sida seagi-agi sida gawa penuh jam ke Jehovah.

20. Nama runding ke patut dikembuan kitai pasal semaya enggau Petara? Nama kebuah?

²⁰ Ba artikel tu kitai udah berandauka tiga iti semaya ke engka digaga kitai enggau Petara. Nuan engka udah ngaga sekeda semaya nya. Kitai nemu, kitai enda patut ngumbai semaya kitai nya hal ti mit, lalu kitai patut enggau naka ulih ngamatka semaya nya. (J-lam. 20:25) Enti kitai enda ngamatka semaya ngagai Jehovah, nya ukai utai ti manah. (P-jar. 5:6) Nya alai, aram meh kitai baka pemasmur ke madah ngagai Jehovah: “Aku deka selalu belagu muji Nuan, lebuh aku meri ngagai Nuan tiap hari, utai ti udah disemaya aku.”—Mas. 61:8.