1, 2. (a) Lonyo me cwiny ango ma Jehovah ominiwa? (b) Gin ango ma wabinyamo i pwony man?

PE TYE ngat mo mulony calo Jehovah. Jami ducu obedo mege. (1 Tekwaro 29:11, 12) Ento Jehovah cinge yot bot dano ducu. Pud dong watye ki yomcwiny madit ya pien en ominiwa lonyo mapol! Lonyo magi kwako gin ango? Man aye (1) Ker pa Lubanga, (2) ticwa me pwony, ki dong (3) lok ada ma nonge i Baibul. Ento ka pe wagwokke, wiwa twero wil woko i kom lonyo magi ma pigi tego-ni ka kare woto ki kato. Myero wiwa obed ka po kare ducu i kom kit ma lonyo magi pigi tek kwede dok wabed ka dongo marwa i komgi pien Yecu owaco ni, “ka ma lonyowu tye iye, cwinywu bene bedo iye.”​—Luka 12:34.

² Kong dong wanen kit ma watwero gwoko kwede ki marwa kacel ki pwocwa i kom Ker-ri, ticwa me pwony, ki dong lok me ada wek obed matek. Ka watimo meno, myero ilwod lok i kom kit ma itwero dongo kwede ki marri i kom lonyo me cwiny magi.

3. Gin ango ma laco ma i carolok ma Yecu obolo-ni otimo wek ewil tiko acel? (Nen cal ma i pot karatac 9.)

³ Kwan Matayo 13:45, 46. Yecu obolo carolok mo i kom laco ma onongo tye ka wilo ki cato tiko me wel. I nino mo acel, en onongo tiko mo ma wele dit kato mukene ma en oneno con. Laco-ni onongo mito tiko man adada ma oweko en ocato jamine ducu wek ewil. Tika itwero goyo kit ma tiko meno onongo pire tek kwede bote?

4. Gin ango ma watye atera me jalone pi Ker-ri?

⁴ Gin ango ma wapwonyo ki i carolok ma Yecu obolo-ni? Lok ada me Ker pa Lubanga rom ki tiko meno. Ka wamaro Ker kit ma laco-ni onongo maro kwede ki tiko meno, ci wabijalo jami ducu ma watye kwede wek wabed i te Ker meno. (Kwan Marako 10:28-30.) Kong dong waneno kit ma jo aryo mo gutimo kwede meno.

5. Gin ango ma Jakayo onongo tye atera me timone pi Ker-ri?

⁵ Jakayo onongo lajog mucoro. En odoko lalonyo pi tim me camucana. (Luka 19:1-9) Ento i nino mo acel, Jakayo owinyo ka Yecu loko i kom Ker. En omaro lok meno adada ma oweko en omoko tamme me loko kite kwicikwici. En owaco ni: “Nen, Ladit, abimiyo nucu jamina bot lucan; ka abumo ngat mo i gin mo, abicule wang angwen.” Jakayo odwoko cente ducu ma en onongo i yo me camucana dok oweko tim me woro woko.

6. Alokaloka ango ma dako mo acel otimo, ki dok pingo en oloko kwone?

⁶ I kare ma dako mo owinyo lok me Ker mwaki mogo mukato angec, en onongo odonyo i tim me buto ki dako lawote. En onongo obedo preciden me dul ma lwenyo pi twero pa coo ma buto ki coo wadigi ki mon ma buto ki mon wadigi. Ento en opwonyo kit ma Ker pa Lubanga pire tek kwede i kare ma en tye ka kwano Baibul, dok oniang ni myero elok kwone. (1 Jo Korint 6:9, 10) Pi marre i kom Jehovah, en oweko dul meno woko dok ogiko tim me buto ki mon luwote. En onongo batija i mwaka 2009 dok ocako tic macalo painia i nge mwaka acel. En oloko kwone pien marre pi Jehovah onongo tek kato marre pi tim macilo macon-ni woko.​—Marako 12:29, 30.

7. Watwero gwoko marwa pi Ker pa Lubanga wek obed matek nining?

⁷ Wek wabed i te Ker pa Lubanga, onongo mitte ni jo mapol i kinwa gulok kwogi kwicikwici. (Jo Roma 12:2) Ento tye jami mukene ma myero pud wagwokke kwede. Pe myero wawek gin mo keken owek marwa pi Ker-ri okwe woko, me labolle, miti pi jami me kom nyo tim me carocaro. (Carolok 4:23;  Matayo 5:27-29) Wek marwa pi Ker pa Lubanga obed matek, Jehovah ominiwa lonyo mukene ma pire tek adada.

8. (a) Pingo Paulo owaco ni ticwa me pwony tye calo ‘lonyo ma i atabo ma gicweyo ki lobo’? (b) Paulo onyuto nining ni emaro ticce me pwonyo jo mukene?

⁸ Yecu ominiwa tic me tito ki pwonyo dano ki lok me kwena maber me Ker pa Lubanga. (Matayo 28:19, 20) Lakwena Paulo otito ni tic me pwony-nyi rom ki lonyo ma giketo i atabo ma gicweyo ki lobo. (2 Jo Korint 4:7; 1 Temceo 1:12) Pi roc ma watye kwede, oweko watye macalo atabo ma gicweyo ki lobo. Ento kwena ma watito rom ki lonyo pien kelo kwo ma pe tum botwa kacel ki bot jo ma giwinyo. Meno aye gin ma oweko Paulo owaco ni: “Meno ducu atiyo pi lok me kwena maber, wek an bene anywak gum mo ma a iye kacel kwedgi.” (1 Jo Korint 9:23) Paulo otute matek me pwonyo jo mukene ki lok me Ker pa Lubanga. (Kwan Jo Roma 1:14, 15; 2 Temceo 4:2.) Marre pi kwena maber okonye me medde ki tito kwena kadi bed ni obedo ka wok ki i aunauna magwar. (1 Jo Tecalonika 2:2) Watwero dongo marwa pi ticwa me pwony calo Paulo nining?

9. Yo ango mukene ma watwero nyuto kwede ni wamaro ticwa me pwony?

⁹ Yo acel ma Paulo onyuto kwede ni emaro ticwa me pwony en aye me tic ki kare mo keken ma owec me lok ki jo mukene. Calo Paulo ki Lukricitayo me kare macon, wan bene wanywako kwena maber i ot ki ot, i dye lwak, ki dong ka mo keken ma watwero nongogi iye. (Tic pa Lukwena 5:42; 20:20) Wayenyo yo me tito kwena bot dano mapol i kit mo keken ma watwero. Ka twere, ci waromo tic macalo painia pi tutunu nyo painia pi kare malac. Nyo watwero pwonyo leb mukene, cito i kabedo ma can lutit kwena tye iye i lobowa, nyo bene i lobo mukene.​—Tic pa Lukwena 16:9, 10.

10. Adwogi maber ango ma Irene onongo pien ni otiyo matek me nywako i tic me tito kwena maber?

¹⁰ Irene, lamego mo ma wiye nono i lobo Amerika onongo mito nywako lok me kwena maber bot jo ma giloko leb pa jo Russia. Pi meno i 1993, en okobo i kacokke ma bedo i leb pa jo Russia ma tye i Boma me New York. I kare meno, onongo tye lutit lukwena 20 keken i gurup meno. I nge mwaki 20, Irene owaco ni, “Pud pe aloko leb pa jo Russia maber tutwal.” Ento, Jehovah okonyo en kacel ki lutit kwena mukene me tito kwena bot jo ma giloko leb meno. Macalo adwogine, dong tye kacokke ma romo abicel ma bedo i leb meno i Boma me New York i kare-ni. Irene okwano Baibul ki dano mapol, dok 15 ki i kingi gunongo batija. Jo mogo i  kingi gitiyo calo Lubetel, lupainia, ki dong luelda. Irene owaco ni, “Ka atamo i kom yub mogo ma onongo atwero ketogi, pe tye mo i kingi ma onongo twero kela yomcwiny madwong kit man.” Irene tero ticwa me pwony calo gin ma pire tek adada!

11. Adwogi ango ma wanongo ka wamedde ki tito kwena kadi bed aunauna tye?

¹¹ Ka watero ticwa me pwony calo gin ma pire tek, ci wabilubo lanen pa lakwena Paulo kun wamedde ki tito kwena kadi bed ni watye ka kemme ki aunauna. (Tic pa Lukwena 14:19-22) Me labolle, nicakke i 1930 me o i 1944, kibedo ka keto aunauna magwar adada i kom utmegiwa ma i lobo Amerika. Ento pud gumedde ameda ki tito kwena. Luloc gutemme me juko utmegiwa, ento gucito i kot ci guloyo kot tyen mapol. I 1943 Omego Knorr otito pi kot mo ma kiloyo i Kot Mamalo Loyo i lobo Amerika. En owaco ni onongo kono pe tye lok mo ma kidoto i Kot meno ka utmegiwa pe gumedde ki tito kwena. En omedde ni, utmegiwa i twok lobo lung gumedde ki tito lok me kwena maber, dok gunyuto ni aunauna pe twero gengogi. Utmegiwa i lobo mukene bene guloyo lok macalo magi i kot. Ada, marwa pi ticwa me pwony pe biweko aunauna gengowa ki medde ki tito kwena.

12. Gin ango ma imoko tammi me timone?

¹² Ka wamaro ticwa me pwony, ci pe wabibedo ka keto cwinywa tutwal i kom wel cawa ma wacoyo i ripotwa. Wabitimo jami ducu ma watwero wek wabed ki kare “me tito lok me kwena maber” kore ki kore. (Tic pa Lukwena 20:24; 2 Temceo 4:5) Ento ngo ma wabipwonyo ki jo mukene? Kong dok wanen lonyo mukene ma Lubanga omiyo.

13, 14. ‘Lonyo’ ango ma Yecu oloko iye i Matayo 13:52, dok wanongo nining?

¹³ Lonyo me adek ma Jehovah ominiwa aye lok ada ma wapwonyo. Jehovah aye Wang It me lok ada. (2 Camuel 7:28; Jabuli 31:5) Macalo Wego ma cinge yot, en mito nywako lok ada man kwedwa. Dong wapwonyo jami mapol ki i Lokke, bukewa, gurewa madito ki me adwol, ki dong cokke ma bedo cabit ki cabit. Ka wawoto ki pwonyo ada mapol, ci wabinongo gin ma Yecu owaco ni ‘lonyo’ me ada “manyen ki macon.” (Kwan Matayo 13:52.) Jehovah bikonyowa wek wabed ki ‘lonyo’ mapol, ka wayenyo lok ada kit ma kiyenyo ki lonyo ma kikano. (Kwan Carolok 2:4-7.) Watwero timo meno nining?

¹⁴ Myero wakwan Baibul kacel ki bukewa kare ki kare dok wakwed lok i yo matut. Man bikonyowa me niang lok ada “manyen” ma onongo pe wangeyo con. (Yocwa 1:8, 9; Jabuli 1:2, 3) Wi Lubele ma kikwongo goyone i Julai 1879 oporo lok ada ki ature ma okanne i kin doo mapol. Wek ngat moni onong ature meno, myero oket cwinye me yenyone. Ka en onongo, pe biyeng ki acel ma en onongo-ni keken. En myero omedde ki yenyo ature mukene. I yo acel-li, pe myero dong waton tokwa mot pien waniang lok ada moni. Myero wabed ki miti me medde ki kwedo lok i yo matut wek waniang lok ada mapol.

15. Pingo walwongo lok ada mukene ni “macon” ki dok mene ma imaro loyo?

¹⁵ I kare ma wacako kwano Baibul, wapwonyo lok ada manyen mapol. Watwero lwongogi ni lok ada “macon” pien wapwonyogi con. Lok ada magi kwako ngo? I acakkine wapwonyo ni, Jehovah aye Lacwecwa ki dok ni en tye ki yub pi dano ducu. Wapwonyo bene ni en ocwalo Wode i lobo wek omi kwone macalo ginkok wek kigonywa ki i bal ki to. Dok bene wapwonyo ni Ker pa Lubanga bigiko pekki ducu ki dok ni wabikwo pi naka i lobo kany ki kuc kun wabedo ki yomcwiny.​—Jon 3:16; Niyabo 4:11; 21:3, 4.

16. Gin ango ma myero watim ka niangowa i kom lok ada me Baibul olokke?

¹⁶ I kine mukene, niangowa i lok pa lunebi me Baibul nyo niangowa i kom ginacoya moni twero lokke. Ka meno otimme, pire tek ni water cawa me kwano alokaloka meno dok walwod lok iye maber. (Tic pa Lukwena 17:11; 1 Temceo 4:15) Pe mitte ni waniang apokapoka ma tye i kin niango manyen ki macon keken, ento mitte bene ni waket cwinywa i kom ngec mogo matinotino ma tye i niango meno. Kwan i yo ma kit meno bimedo ngecwa i kom lok ada me Baibul. Pingo pire tek ni watute kit meno?

17, 18. Cwiny maleng twero konyowa nining?

¹⁷ Yecu opwonyo ni cwiny maleng twero konyowa wek wiwa opo i kom jami ma wapwonyogi con. (Jon 14:25, 26) Man twero konyowa nining ka watye ka tito kwena maber? Tam kong i kom gin ma otimme i kom omego mo ma nyinge Peter. I 1970, en onongo tye ki mwaka 19 dok onongo pud  ocako tic acaka i Betel i lobo Britain. Peter onongo tye ka tito kwena i ot ki ot ci orwatte ki laco mo ma yer tike tye mapol dok onongo pud peya otegi tutwal. En openyo laco-ni ka mito niang Baibul. Laco-ni onongo obedo lapwony pa Lujudaya, dok obedo ki ur ni awobi matidi tamo ni etwero pwonye ki lok me Baibul. Me temo ngec pa Peter, lapwony-nyi openyo ni, “Latinna, buk pa Daniel onongo kicoyo i leb mene?” Peter ogamo ni, “Bute mogo kicoyo i leb Aram.” Peter owaco ni, “lapwony-nyi obedo ki ur pien ni onongo angeyo lagam​—ento en pe obedo ki ur makato an! Angeyo lagam meno nining? I kare ma adok gang ci acako ngiyo magajin me Wi Lubele ki Awake! me dwe mogo mukato angec, anongo pwony ma tito ni buk pa Daniel kicoyo i leb Aram.” (Daniel 2:4) Ada, cwiny maleng twero konyowa me po i kom jami ma wakwanogi con dok wagwoko tye i wiwa.​—Luka 12:11, 12; 21:13-15.

¹⁸ Ka wamaro lok ada ma wapwonyo ki bot Jehovah ci wabibedo ki pwoc iye dok wabibedo ki mitti me medo ngecwa. Ka wabedo ka timo man, ci wabiyubbe maber me pwonyo jo mukene.

19. Pingo myero wagwok lonyo me cwiny ma watye kwede?

¹⁹ I pwony man, wanyamo kit ma pire tek kwede botwa me tero lonyo ma Jehovah ominiwa calo gin ma pigi tek. Ento myero wagwokke wek Catan kacel ki lobo man pe owek marwa pi lonyo man okwe woko. Ka pe wagwokke jami calo cikke me nongo tic ma culle lamal, miti pi kwo i rom mamalo, nyo wakke ki jami me kom ma watye kwede twero nyweno wiwa woko. Lakwena Jon opoyo wiwa ni cokcok-ki, kibijwero lobo-ni kacel ki jami ducu ma tye iye. (1 Jon 2:15-17) Meno aye gin mumiyo myero wabed ki pwoc madit pi lonyo ma watye kwede dok wagwokgi maber adada.

20. Gin ango ma imoko tammi me timone me gwoko lonyoni me cwiny?

²⁰ Bed atera me jalo gin mo keken ma twero weko marri pi Ker pa Lubanga kwe woko. Mok tam me bedo ki arima i tic me tito kwena, dok pe iwek mari pi ticwa me pwony okwe woko. Medde ki yenyo lok ada me Baibul. Ka imedde ki timo meno, ci ibigwoko ‘lonyo ma pe tum i polo, ka ma lakwo pe o iye, dok nyenye pe balo. Pien ka ma lonyoni tye iye, cwinyi bene bedo iye.’​—Luka 12:33, 34.