1, 2. (a) Rosai arasai rikyor ḇemaeja Yahwe ḇyukna? (b) Rosai nari kofarkor ro artikel ine?

YAHWE ima Mankun ḇenana kaku ro supswan ma farsyos. Isma rosai riryakame. (1 Tawarikh 29:11, 12) Ḇape, Yahwe fyasna snemura faro kokame. Kokofen kasumasa snar ḇyuk arasai rur nabor kaku ḇe ko! Rosai monda Arasai ḇyukna? Isoine (1) Karajan Allah, (2) fararmyan koḇena, ma (3) napnapes ḇemaeja ḇero Refo. Ḇape, rofyor kosasor ko ḇa ido, na koḇefnder snar arasai anna nḇemaeja kaku. Fandun kaku koswarepen fainda ro arasai nane ma koswar syadi nawer, snar Yesus doḇe ”Romoḇ nana bena naisya, rodia kako snebedi isya.”—Lukas 12:34.

² Kirine nari kofarkor rariso kofaduru saswar koḇena ma ḇaḇesyowi ḇeba kaku faro Karajan, fararmyan, ma napnapes nasambraḇ pdef. Ma wawasenkara rosai bisa wafrur ya insama waswar syadiwer faro arasai rur ine.

3. Rosai snon ḇero Yesus fawar ḇyeja ifrurya fa kyoḇes inkin mkamor oser? (Mam sonin ro randak artikel ine.)

³ Wasya Matius 13:45, 46. Yesus fyawar snon oso ḇekoḇes ma ḇeḇoḇ inkin mkamor. Ras oso, isrow inkin mkamor ḇeḇemaeja kaku ro inkin mkamor isrow ḇepon kwarna. Snon ani imarisen kaku faro inkin ani, inja ḇyoḇ pres nana ḇyenakam fa ḇyukikoḇes na. Komam kada, snon anine imarisen kaku faro inkin ani.

4. Rosai komarisen kofrur faro Karajan ya?

⁴ Rosai kofarkor ro Yesus fawar ḇyedine? Napnapes faroro Karajan Allah imnis inkin mkamor ḇemaeja kaku ani. Rofyor koswar Karajan Allah raris snon ḇemarisen kaku inkin ani ido, nari komarisen koḇuk roi kosmanakam insama kakḇe kawasa ro Karajan Allah. (Wasya Markus 10:28-30.) Mkorama komam rariso snonkaku risuru ḇefrur roi nane.

5. Rosai Zakheus imarisen ifrur faro Karajan Allah ya?

⁵ Zakheus ima mananir ḇeyor som. Isma nana nabor kuker dun syadi pipi ro snonkaku sya. (Lukas 19:1-9) Ḇape ras oso, Zakheus ryower Yesus dawos kuker Karajan Allah. Imarisen kaku faro rosai ryowerna, inja fyadwer kankenem ḇyeja. Doḇe, ”Manseren! rarwas ro nana ayena, nari yaḇuk na faro snonkaku ḇesaḇararsya ma rofyor yun syadi roi ono ro snonkaku onoido nari yakaḇer na ḇe rarwan rifiak.” Zakheus kyaḇer pipi dun ro snonkaku sya ma imnai dun syadi pipi ro siwer.

6. Fararwe rosai bin oso ifrurya, ma sai ḇefnai ya?

⁶ Taun ḇeḇeso aniwara, bin oso ḇefrur fasfesepen saswar kuker min bin sesi ryower kuker Karajan Allah. I kako bin ḇeyawoswarek hak ro snonkaku ḇekenem ḇe homoseksual sya. Ḇape, rofyor ifarkor nabor Refo kwar ma fyawi Karajan Allah ḇyemaeja, fandun fa ifrur fararwe ro kankenem ḇyeja. (1 Korintus 6:9, 10) Snar iswar Yahwe I, syaebur organisasi ani ma imnai ro fasfesepen saswar ḇyedi. Ḇyebaptis ro 2009, ma taun ḇeuserya ḇye perintis biasa. Ifrur fararwe ḇeba kaku ine snar iswar syadi Yahwe I ro marasrisen ḇesasar ḇyeja.—Markus 12:29, 30.

7. Rosai fandun fa koswarepen ya?

⁷ Insama kakḇe kawasa ro Karajan Allah, ḇebor rofandu ko kofrur fararwe ḇeba ro kankenem koḇena kwar. (Roma 12:2) Ḇape sasewar koḇena namnai ḇaim. Koswarepen komam monda awer saswar koḇena faro Karajan Allah nsambraḇ werḇa, snaro nana ḇaido marasrisen ḇesasar ro fararur farḇuk. (Amsal 4:23; Matius 5:27- 29)  Insama saswar koḇena faro Karajan Allah syambraḇ syadi, Yahwe ḇyuk ḇeko arasai ḇemaeja ḇesena wer.

8. (a) Rosai ḇefnai fa manwawan Paulus ikofen fararmyan koḇena imnis arasai ḇero kron ḇeḇefrur ro saprop? (b) Rariso Paulus fyasnaḇair snar iswar fararmyan ḇyena?

⁸ Yesus ḇyuk fararur ḇeko fa koḇaryas ma koḇuk farkarkor kuker ankankinem ḇeḇye Karajan Allah. (Matius 28:19, 20) Manwawan Paulus ikofen fararmyan ani imnis arasai ḇero kron ḇeḇefrur ro saprop. (2 Korintus 4:7; 1 Timotius 1:12) Snar konapesḇa, inja komnis kuker kron ḇeḇefrur ro saprop ani. Ḇape, ankankinem koḇaryasna imnis ra arasai, snaro nun kankenem fyoro ḇeko ma snonkaku ḇerower sya. Iso ḇefnai fa Manwawan Paulus dobe, ”Yafrur nakam rarirya faro Ankankinem Ḇeḇye ro Allah insa yasma ḇok kako.” (1 Korintus 9:23) Paulus fyararur marḇak fa fyarkor ḇesesya kuker Karajan Allah. (Wasya Roma 1:14, 15; 2 Timotius 4:2.) Iswar kaku ankankinem ḇeḇye ya, inja isma wayam ḇeḇyeḇa kaku raryano ḇyaryas pdef. (1 Tesalonika 2:2) Rariso kofarari Manwawan Paulus i?

9. Nyan rosai monda kofrurya fa kofasna koswar fararmyan ya?

⁹ Nyan oser Paulus fyasna iswar fararmyan yaiso dawos ḇe ḇesesya ro fafisu sariryakam. Raris Paulus ma snonkaku Kristen ro abad randaksya, ko kako komarisen koḇaryas ankankinem ḇeḇye ḇe snonkaku sya ro rum ḇe rum, moḇ snonkaku sya sibor, ma ro moḇ sariryakam na kosrow si. (Farfyar ro Manwawansya [Kisah] 5:42; 20:20) Komarisen kofrur naborwer fa koḇaryas imnis samambraḇ koḇena. Raris, kofarmyan ḇe perintis ekstra ḇaido perintis biasa, kofarkor wos ḇebabo, kofarmyan ro sup ḇese, ḇaido kofarmyan ro sup bondi.—Kisah 16:9, 10.

10. Rosai bon Irene ismana snar fyararur marḇak fa ḇyaryas ankankinem ḇeḇye?

¹⁰ Irene, imbesrar oso ḇefarḇuk ḇaim ro Amerika Serikat, imarisen ḇyaryas ankankinem ḇeḇye ḇe snonkaku ḇeyawos wos Rusia. Inja ro 1993, fyanjur kuker raryur kasun ḇeyawos wos Rusia ro New York City. Ro fafisu ya, manḇaryas ri 20 monda ḇero raryur ani. Taun ri 20 ramnai, Irene doḇe, ”Yafawi yawospyum ḇaim ro wos Rusia.” Ḇape, Yahwe ifnoḇek i ma manḇaryas ḇesesya fa sḇaryas ḇe snonkaku ḇeyawos wos ani. Bon ya, kirine sidang riwonem ḇefanjur ro wos Rusia nasya ro New York City. Irene ḇyuk farkarkor Refo ḇe snonkaku sibore ma 15 ro si sḇebaptis. Kirine sisya sifarmyan ḇe anggota Betel, perintis, ma penatua. Irene doḇe, ”Rofyor  yakara kuker fararur-fararur ḇese bisa yasmana, fararur ine monda ḇefrur yasma raryaḇ nabor kaku.” Irene iswar kaku fararur ḇaḇeḇaryas ya!

11. Rosai bonya snar koḇaryas pdef rofyor kosma ḇaḇewayam?

¹¹ Koswar fararmyan koḇena ido, nari kofarari Manwawan Paulus ma koḇaryas pdef, iba syadiwer rofyor kosma samamyai. (Kisah 14:19-22) Imnis raris, ro swaf taun 1930 ma 1944, naek srar koḇesya ro Amerika Serikat sisma wayam ḇefnak ḇa. Ḇape sḇaryas pdef. Rofyor bena papoik sya imbe sidwarek si, naek srar koḇesya sun parkara ine ḇe pengadilan ma simkei ro kasus ḇeborna. Ro 1943, Naek Knorr dapḇair kasus oser ḇemkei ro Mahkamah Agung AS. Ikofen kasus Pengadilan ani nari nasyaḇa rofyor naek srar sya siḇaryas pdef ḇa. Ikofenwer snar naek srar ḇebor sya ro supswan ḇesiper sḇaryas pdef, sifasnabair snar ḇaḇewayam ani nun roinoḇa. Naek srar ro sup ḇesena kako sakmkei ro kasus hukum ḇemnis radirya. Snar komarisen koḇaryas, inja kosma ḇaḇewayam raryano kopok komnaiḇa.

12. Rosai wamarisen wafrurya?

¹² Rofyor koswar fararmyan koḇena ido, nari kokara monda ḇa faro oras riḇeso kofas ro laporan koḇedi. Nari komarisen koḇuk rosai bisa koḇukna fa ’koḇaryas ankankinem ḇeḇye’. (Kisah 20:24; 2 Timotius 4:5) Ḇape rosai nari kofarkor ḇe ḇesesya? Ineiso arasai ḇese Allah ḇyukna.

13, 14. Rosai ”kron arasai” Yesus dap ro Matius 13:52, ma rariso koser kron ani?

¹³ Arasai ḇekyor Yahwe ḇyuk ḇeko isoine napnapes ḇebor kofarkor kwarna. Yahwe iso Knam ro napnapes ya. (2 Samuel 7:28; Mazmur 31:5) Snar  ima Kma ḇefasna sneḇenaḇye, imarisen ḇyuk napnapes annakam ḇeko. Kofarkor roi nabor kwar kuker kowasya Wos Ḇyena, publikasi koḇena, koso munara kebaktian, ma fananjur ro minggu ḇe minggu. Yesus ikofen rofyor kofarkor napnapes nane, nari kosma ”kron arasai” ḇeser napnapes ”ḇebabo ma ḇekwar”. (Wasya Matius 13:52.) Yahwe nari ifnoḇek ko fa koser ”kron arasai” koḇena rofyor kosewar napnapes imnis kosewar arasai ḇeyokef. (Wasya Amsal 2:4-7.) Rariso koserna rai?

¹⁴ Komarisen fa kofarkor Refo ma publikasi koḇena ras ḇe ras ma kofrur riset ḇedo kaku. Ine nari nafnoḇek ko fa kosma napnapes ”ḇeḇabo” kofawi ḇaimna. (Yosua 1:8, 9; Mazmur 1:2, 3) Topik ḇerandak ro Menara Pengawal, ḇeḇesae ro Juli 1879, ikofen napnapes ima imnis raris pampen ḇesur rofandu ampyampumberna. Rofyor snonkaku oso imbe dun pampen ani ido, fandun fa syewar mnis kakuna. Ma rofyor isrow pampen ani, nari imarisen dun oser monda ḇa. Ḇape, fandun fa syewar pampen nabor syadiwer. Kuker nyan rarirya, komarisen monda awer faro napnapes oser kosrowna. Fandun fa koraryaḇ pdef fa kosewar nabor syadiwer napnapes ya.

15. Rosai ḇefnai fa kap napnapes ḇeḇeso ḇe napnapes ”ḇekwar”, ma rosai wamarisen kaku ya?

¹⁵ Rofyor kofarkor randak Refoya, kofarkor napnapes ḇeḇeso ḇemaeja. Ineiso sap ḇe napnapes ”ḇekwar” snar kofarkor ḇeponna kwar. Rosai monda napnapes anna? Randakya, kofarkor Yahwe iso Manḇedaw koḇedi, ma nya marisen faro snonkaku sya. Ko kako kofarkor Allah iwan rumkun ḇyedi ḇe supswan fa imarwarek ko ḇe farsarser fasaspar ḇefrur ko fa komkeibur sasar ma marmar ya. Ma kofarkor roro Karajan Allah nari ipyos kandera nakam ma nari kokenem fyoro ro supswan kuker aski ma marisen.—Yohanes 3:16; Fasasna faro Yohanes [Wahyu] 4:11; 21:3, 4.

16. Rosai nari kofrurya, rofyor fawawi ḇero Refo nefararwe?

¹⁶ Fyorno ido, fawawi koḇena kuker ḇardadi ro Refo ḇaido mnuk oso fandun fa kofadwerna. Rofyor nasya ido, fandun kofasos oras koḇena fa kofarkor fararwe anna ma kokarauserna. (Kisah 17:11; 1 Timotius 4:15) Fandun kako kofawi roi ḇeḇese rofandu fawawi ḇekwar ma ḇebabo. Ramnai, ko kako fandun fa kofawi mnis oser ma oser ro fawawi ḇebabo ani. Kofarkor mnis kaku ido, nari nafnoḇek ko fa kofawi mnis bar ro napnapes ḇero Refo. Fainda rosai kosmana rofyor kofrur rarirya?

17, 18. Rariso rur ḇesren ifnoḇek ko?

¹⁷ Yesus ikofen Allah rur ḇesren ḇyeja nari nafnoḇek ko fa koswarepen roi kofarkor ḇepon kwarna. (Yohanes 14:25, 26) Rosai fainda ya rofyor koḇaryas ankankinem ḇeḇye? Kokarapan fawar ro naek oso ḇenirḇe Peter. Ro 1970, rofyor ḇyeumur taun ri 19 fyarmyan babo ro Betel Inggris. Rofyor Peter ḇyaryas ro rum ḇe rum, isrow kuker snon oso ḇeḇewurbur  beumur syadi ro i. Ifuken ḇe snon ani imarisen fyawi Refoya ke? Snon ani ima rabi Yahudi rirya, ma snon ani ikandor kaku snar romawa babo ine imarisen ḇyuk farkarkor Refo ḇe i. Insama fyawi rosai Peter ifawina, rabi ani ifukeni, ”Wafawi syap Daniel sfas na kuker wos risai?” Peter doḇe, ”Bar ro syap ani sifas na ro wos Aram.” Peter iswarepen, ”Rabi ani ikandor kaku, ḇape ayaiso ḇekandor syadi snar bisa yafawi kankarem ya! Rariso yafawi kankarem ani? Rofyor yabur ḇe rum yamam kaḇer Menara Pengawal ma Sedarlah! majalah ro paik ḇeponya, ramnai yasrow artikel oso ḇefasnabair snar Daniel fyas na ro wos Aram.” (Daniel 2:4, fas-fas kasun ro sop) Kakuḇae, rur ḇesren nafnoḇek ko fa koswarepen kaḇer rosai kowasya kwarna ma kokram ro kron arasai koḇena.—Lukas 12:11, 12; 21:13-15.

¹⁸ Rofyor koswar ma koḇesyowi napnapes kofarkor ro Yahwe I, nari komarisen fa koserwer arasai ro kron koḇena. Kofrur pdef ker na ido, nari bisa kofarkor snonkaku ḇesesya.

19. Rosai ḇefnai fa fandun kaku kofaduru warek arasai rur koḇena?

¹⁹ Ro artikel ine, kofarkor kwar fandun kaku koswar ma koḇesyowi arasai rur koḇena. Ḇape, fandun fa kosasor ko snar Setan ma rosai ḇero dunya ine imbe nafrur saswar koḇena faro arasai nsambraḇ werḇa. Rofyor kosasor ko ḇa ido, nari roi ḇeradine bisa nawyaye ko, raris fararur bena ḇaḇyak ḇekaki, marisen faro kenem ḇesyadadi, ḇaido marisen fa kofasnai roiebor kosmana. Manwawan Yohanes ḇyuk swarapepen ḇeko rosai ḇero supswan ine ma roi ḇebor sirmomen ro ina nari napromes. (1 Yohanes 2:15-17) Inja, fandun fa koḇesyowi ma kofaduru warek arasai rur koḇena.

20. Rosai imbe wafrurya insama wafaduru warek arasai rur Bena?

²⁰ Waswarepen insama rosai riryakam nafrur awer saswar bena faro Karajan Allah syambraḇ werḇa. Ḇensewar pdef fa ḇaryas kuker raryaḇ, ma waswar fararmyan bena pdef. Swewar pdef napnapes ḇero Refo. Wafrur rarirya ido, nari wasma syadi ”nana . . . ro boiyaswa nari ḇeḇroba, ma ḇekarawsya nari skarawḇa ma as sya nari san naḇa. Snar romoḇ nana bena naisya, rodia kako snebedi isya”.—Lukas 12:33, 34.