1, 2. (a) Tolu arta na maharga aha do na ibere Jahowa? (b) Aha do na laho iulas hita?

JAHOWA do sibayakan halani Ia do simada haganupan. (1 Kron. 29:11, 12) Tapi, mardear layak do Ia hubani ganup halak. Bereon-Ni do arta na maharga hubanta, ai ma (1) Harajaon ni Naibata, (2) pangidangionta, ampa (3) hasintongan na dong bani Bibel. Tontu martarima kasih do hita halani ai! Tapi anggo lang jaga hita, boi do lambin dokah gabe hurang ma pangkargaionta bani arta ai. Jadi, maningon do tongtong ihargai ampa ihaholongi hita ai, halani ihatahon Jesus do “ija artanima, ijai do uhurnima”.—Luk. 12:34.

² Ulas hita ma sonaha hita boi patoguhkon holongta hubani Harajaon ni Naibata, pangidangion, ampa hasintongan. Janah, pingkirhon ma sonaha hita boi mangkargai arta na maharga na binere ni Jahowa ai.

3. Aha do na ibahen partiga-tiga mutiara na isaritahon Jesus? (Idah gambar bani alaman 9.)

³ Basa Mateus 13:45, 46. Adong sarita ni Jesus, pasal sada dalahi partiga-tiga mutiara. Bani sada panorang, jumpahsi ma sada mutiara na maharga tumang. Mutiara na sada on, legan do humbani mutiara na legan. Rosuh tumang uhurni mangidah ai, jadi jualonni ma ganup na dong bani, laho mamboli mutiara ai. Boi do ibayangkon nasiam sonaha pangkargaionni bani mutiara ai?

4. Sonaha hita mangkargai Harajaon ni Naibata?

⁴ Aha do na boi iparlajari hita humbani sarita ni Jesus ai? Usih songon mutiara ai do Harajaon ni Naibata. Anggo hita mangkaholongi Harajaon ni Naibata songon partiga-tiga ai, ra do hita manadingkon haganup ase boi gabe rayat ni Harajaon ai. (Basa Markus 10:28-30.) Eta torih hita ma dua halak na mandalankon sisonai.

5. Aha do na ibahen si Sakeus halani rosuh bani Harajaon ni Naibata?

⁵ Adong sahalak sijalo sohei na margoran si Sakeus. Bayak do ia halani manipu halak. (Luk. 19:1-9) Tapi bani sada panorang, ia manangar ambilan ni Jesus pasal Harajaon ni Naibata. Rosuh tumang ia manangar ai janah ibahen ma hamubahon. Nini ma, “Eak Tuhan, satongah humbani artangku hubere ma bani halak na masombuh, anjaha anggo adong na hutipu, ompat lompit ma ai hupaulak.” Jadi, ipaulak si Sakeus ma ganup duit ni halak ai. Dob ai lang be ihorjahon sisonai ai.

6. Parubahan aha do na ibahen sada naboru, janah mase sonai?

⁶ Piga-piga tahun na salpu, dong sada naboru na lesbian. Ia do na mangopalai sada organisasi homoseksual. Bani sada panorang, ia manangar pasal Harajaon ni Naibata. Dob ai marlajar Bibel ma ia. Sanggah marlajar pasal Harajaon ni Naibata, iarusi ma maningon do ia mambahen hamubahon. (1 Kor. 6:9, 10) Halani mangkaholongi Jahowa, itadingkon ma organisasi ai janah lang be lesbian ia. Ididi ma ia bani tahun 2009. Bani tahun na mangihut gabe parintis biasa ma ia. Halani banggalan do holongni hubani Jahowa marimbangkon hubani hisap-hisap ni dagingni, ai ma ase boi ia mambahen hamubahon.—Mrk. 12:29, 30.

7. Sonaha ase totap toguh holongta bani Harajaon ni Naibata?

⁷ Bahat do hita na dob mambahen hamubahon ase boi gabe rayat ni Harajaon ni Naibata. (Rom 12:2) Tapi lang sungkup pitah ai. Arta ampa hisap-hisap ni daging boi do mambahen hita lang be mangkaholongi Harajaon ai. Halani ai, maningon do ipatoguh hita  holongta hubani Harajaon ni Naibata. (Pod. 4:23; Mat. 5:27-29) Ase boi sonai, ibere Jahowa ma hubanta arta na legan na boi mangurupi hita ase totap toguh holongta.

8. (a) Mase ihatahon si Paulus pangidangionta doskon arta ibagas “ianan na urah mabolah”? (b) Sonaha si Paulus patuduhkon holong bani pangidangionni?

⁸ Ibere Jesus do tugas hubanta laho mambaritahon janah mangajarhon pasal Harajaon ni Naibata. (Mat. 28:19, 20) Ipatorang si Paulus, anggo pangidangion ai doskon arta ibagas ianan na urah mabolah atap hudon tanoh. (2 Kor. 4:7; 1 Tim. 1:12) Hita doskon hudon tanoh halani lang gokan dear. Barita ai maharga songon arta halani boi mambere hagoluhan sisadokah ni dokahni hubanta pakon hubani halak na ra manangar. Mambotoh on, ringgas ma si Paulus mambaritahon ai hubani na legan, janah ihatahon do, “Haganupan in huhorjahon halani Ambilan Na Madear.” (1 Kor. 9:23) Pongkut do si Paulus mangajarhon pasal Harajaon ni Naibata. (Basa Rom 1:14, 15; 2 Timoteus 4:2.) Halani holongni bani ambilan na madear, totap do ia marbarita hassi pe iparburu. (1 Tes. 2:2) Sonaha hita boi mangusihi si Paulus ibagas pangidangionta?

9. Sonaha hita pataridahkon holongta bani horja parambilanon?

⁹ Sada cara si Paulus pataridahkon holongni bani horja parambilanon marhitei ringgas marbarita bai ganup panorang hubani na legan. Usih songon si Paulus pakon halak Kristen bani abad na parlobei, hita pe dihut do ringgas marbarita hun rumah hu rumah, bani ianan na mabuei atap ija pe halak boi ijumpahi. (Lah. 5:42; 20:20) Pindahi ma cara ase boi manjumpahi buei halak. Umpamani marintis ekstra, marintis biasa, marlajar bahasa na legan, pindah hubani ianan na mamorluhon parbarita i nagorinta atap pe i nagori na legan.—Lah. 16:9, 10.

10. Pasu-pasu aha do na iahapkon si Irene halani ringgas marbarita?

¹⁰ Dong sada botou na lape marhajabuan i Amerika Serikat na margoran si Irene. Botou on, sihol marbarita hubani halak Rusia. Halani ai bani tahun 1993, pindah ma ia hu kalompok na marsahap Rusia i New York City. Ijia dong 20 halak parbarita. Si Irene mangkatahon, “Hassi pe domma 20 tahun, totap ope lang dear ahu marsahap Rusia.” Tapi iurupi Jahowa do ia pakon parbarita na legan marbarita bani sahap Rusia. Hasilni, sonari dong onom kuria i New York City na marsahap  Rusia. Buei do parlajar Bibel ni si Irene. Dong 15 halak na ididi. Humbani na ididi ai, dong na marhorja i Betel, gabe parintis, atap pe gabe sintua i kuria. Si Irene mangkatahon, “Porini huparayak cita-cita na legan, lang adong na boi mambahen malas uhurhu songon na huahapkon sonari.” Arga tumang do bani si Irene horja pangidangion on!

11. Aha do hasilni anggo hita totap marbarita hassi pe iparburu?

¹¹ Anggo hita mangkargai horja pangidangion songon si Paulus, totap do hita marbarita hassi pe iparburu. (Lah. 14:19-22) Umpamani, humbani tahun 1930 ronsi 1944 iparburu do hasomanta i Amerika Serikat. Hassi pe sonai, totap do sidea marbarita. Sanggah ilarang pamarentah, laho ma sidea hu pangadilan janah monang do sidea. Bani tahun 1943, ipatugah Sanina Knorr monang do hita bani sada parkara i Mahkamah Agung AS. Ia mangkatahon lang boi hita monang i Pangadilan anggo soh do saninanta marbarita. Hunjon taridah ma hassi pe iparburu, lang adong na boi manlanglangi saninanta marbarita i sab dunia on. Bahat do homa saninanta i nagori na legan monang i pangadilan. Tangkas ma halani holongta bani pangidangion, totap do hita marbarita hassi pe iparburu.

12. Aha do na sihol bahenonta?

¹² Anggo hita mangkargai pangidangion, tontu hita lang pitah mangindahi jam dinas sanggah marbarita. Tapi marusaha do hita mangkorjahon aha pe laho “manaksihon Ambilan Na Madear”. (Lah. 20:24; 2 Tim. 4:5) Tapi aha do na laho iajarhon hita hubani na legan? Pardiateihon ma arta na legan humbani Naibata.

13, 14. Aha do bahenonta ase bahat artanta “na baru ampa madokah” songon na ihatahon Mateus 13:52?

¹³ Arta patoluhon na ibere Jahowa hubanta ai ma hasintongan na dob iparlajari hita. Humbani Jahowa do hasintongan ai. (2 Sam. 7:28; Joh. 17:17) Halani pardear layak do Bapanta on, bereon-Ni ma hubanta hasintongan ai. Sonari hasintongan ai boi dapot hita marhitei mambasa Bibel ampa publikasi, janah roh hu kebaktian ampa partumpuan. Anggo lambin buei hasintongan na ipatumpu hita, gabe adong ma banta panimpanan hasintongan “na baru ampa madokah”. (Basa Mateus 13:52.) Iurupi Jahowa do hita manggoki panimpanan artanta, anggo ipindahi hita ai songon mangindahi arta na ponop. (Basa Podah 2:4-7.) Aha na boi ibahen hita?

¹⁴ Maningon itangkasi hita do publikasi hun Bibel laho patumpuhon hasintongan “na baru” na lape ibotoh hita. (Jos. 1:8, 9; Ps. 1:2, 3) Bani majallah Watch Tower bulan Juli 1879 edisi na parlobei, ipausih do hasintongan ai songon bunga i tongah-tongah ni poyon-poyon. Sanggah mangindahi bunga ai, anget do hita manorihi. Janah, anggo domma dapot sada, tontu marusaha ma hita mangindahi use bunga na legan. Sonai homa pasal hasintongan, lang sungkup sada tumang na ibotoh hita. Tapi maningon ringgas ma hita patumpuhon buei hasintongan.

15. Hasintongan na sonaha do ihatahon “madokah”, janah na ija do na iharosuhkon nasiam?

¹⁵ Dobkonsi hita marlajar Bibel, ibotoh hita ma piga-piga hasintongan. Ihatahon ma on hasintongan na “madokah” halani ai do hasintongan na parlobei na iparlajari hita. Aha deba hasintongan na iparlajari hita? Umpamani, Jahowa do na manompa hita janah dong do sura-sura-Ni bani manisia. Isuruh Naibata do Anak-Ni hu tanoh on laho paluahkon hita humbani dousa ampa hamatean. Anjaha, marhitei Harajaon ni Naibata masab ma sitaronon janah manisia boi manggoluh sadokah ni dokahni ibagas malas ni uhur.—Joh. 3:16; Pangk. 4:11; 21:3, 4.

16. Aha do na porlu ibahen hita anggo adong pangarusion na porlu iubah?

¹⁶ Sipata, ra do adong pangarusion pasal panjahaion ni Bibel atap ayat na porlu iubah. Anggo sonai na masa, bahen ma panorang laho manangkasi ajaran ai. (Lah. 17:11; 1 Tim. 4:15) Lang sungkup mambotoh aha na mubah tumang, tapi maningon do itangkasi hita pangarusion naimbaru ai. Anggo ibahen hita sonai, tontu lambin bahat ma ipatumpu hita hasintongan naimbaru pasal ajaran ni Bibel. Aha do gunani ai hubanta?

17, 18. Sonaha tonduy na pansing boi mangurupi hita?

¹⁷ Jesus mangkatahon anggo tonduy na pansing boi mangurupi hita laho mardingat aha na dob iparlajari hita. (Joh. 14:25, 26) Tongon do ai? Pardiateihon ma pangalaman ni sada saninanta na margoran si Peter. Bani tahun  1970, sanggah marumur 19 tahun, marhorja i Betel Inggris ma ia. Bani sada ari, sanggah ia marbarita, jumpahsi ma sada dalahi na marumur hira-hira 50 tahun. Isungkun ma atap na ra do dalahi ai marlajar Bibel. Hape guru ni Jahudi do dalahi ai. Jadi tarsonggot ma ia, mase homa na maposo boi mangajarisi marlajar Bibel. Jadi iuji dalahi ai ma si Peter, “Ibagas sahap aha do buku Daniel isuratkon?” Balos ni si Peter, “Ibagas sahap Aram.” Isaritahon si Peter ma, “Tarsonggot do dalahi ai halani hubotoh balosni. Janah ahu pe tarsonggot do, mase boi hubotoh ai?” Daskonsi i rumah, hupareksa ma majallah Ambilan na Madear pakon Sadarlah! Jumpahku ma, hape hatorangan ai domma iparlajari bani bulan-bulan na salpu.” (Dan. 2:4, Terjemahan Dunia Baru) Tongon, tonduy na pansing boi do mangurupi hita mardingat hatorangan na dob ibasa janah isimpan bani panimpanan artanta.—Luk. 12:11, 12; 21:13-15.

¹⁸ Anggo hita mangkaholongi janah mangkargai hasintongan na ibere Jahowa, sihol do hita ase torus patumpuhon ai hubagas panimpanan artanta. Anggo sonai ibahen hita, lambin marosuh ma hita mangajari na legan.

19. Mase maningon ijaga hita arta na ibere Jahowa hubanta?

¹⁹ Bani artikel on, domma iparlajari hita mase porlu mangkargai arta na dob ibere Jahowa hubanta. Tapi maningon jaga ma hita halani Sibolis pakon duniani marusaha mambahen ase hita lang be mangkargai arta ai. Umpamani, boi do hita gabe bungbang halani dong na patugahkon horja na banggal gajini, atap sihol gabe bayak, atap rosuh mangenjengkon haadongan. Tapi apostel Johannes pasingatkon hita na laho salpu mando dunia on ampa rosuh-rosuhni. (1 Joh. 2:15-17) Halani ai porlu tumang do hita mangkargai janah manjaga arta na binere ni Jahowa.

20. Aha do na sihol bahenonmu laho manjaga arta na ibere Jahowa?

²⁰ Padaoh nasiam ma aha pe na mambahen surut holongmu bani Harajaon ni Naibata. Ringgas ma marbarita janah haholongi ma pangidangionmu. Tongtong ma pindahi hasintongan ni Bibel. Anggo sonai ibahen nasiam, dos ma ai patumpuhon “arta i nagori atas, na so ra bois, na so tardohori panangko anjaha na so targagat ngitngit. Ai atap ija artanima, ijai do uhurnima.”—Luk. 12:33, 34.