1, 2. (a) Kai telu erta si meherga arah Jahwe? (b) Kai si man bahasenta i bas artikel enda?

SI BAYAKNA kel i bas alam semesta enda eme Jahwe. Kerina Ia si empunasa. (1 Kronika 29:11, 12) Tapi melumbar kel Ia man kerina. Ngata bujur kel kita kerna melala erta rohani si iberekenNa banta! Kai saja kin e? (1) Kinirajan Dibata, (2) pelayanenta, ras (3) kebenaren si meherga si lit bas KataNa. Tapi adi la kita metenget, banci kita lupa uga ergana erta e. Emaka perlu tetap sipersingeti dirinta kerna uga bagesna kekelengenta nandangi erta e. Bali bagi si ikataken Jesus, ”Sabap i ja erta-ertandu i je pe ukurndu.”​—Lukas 12:34.

² Mari sibahas uga carana gelah tetap paguh kekelengen ras pengerganta nandangi Kinirajan, pelayanen, ras kebenaren. Asum silakoken e, siukuri uga carana gelah reh bagesna kekelengenta nandangi erta rohani enda.

3. Kai si ilakoken sekalak dilaki i bas turi-turin Jesus guna nukur sada mutiara? (Nen gambar pemena artikel.)

³ Oge Matius 13:45, 46. Ituriken Jesus sada turi-turin  kerna sekalak dilaki si erbinaga mutiara. Bas sada wari, iidahna mutiara si ndauh ergan asangken kerina mutiara si deban si pernah iidahna. Merhat kel ia mutiara e emaka idayakenna kerina si lit bas ia guna nukursa. Banci nge ibayangkenndu uga mehergana iakapna mutiara e?

4. Kai si nggit kita ngelakokenca guna Kinirajan?

⁴ Kai si banci sipelajari arah turi-turin Jesus? Kebenaren Kinirajan Dibata bali bagi mutiara si meherga ndai. Adi kekelengenta nandangi Kinirajan seri bagi kekelengen dilaki ndai nandangi mutiara, tentu nggit kita nadingken kai pe gelah banci tetap jadi rayat Kinirajan. (Oge Markus 10:28-30.) Mari sinen dua usihen si ngelakoken si bage rupana.

5. Kai si ilakoken Sakeus guna Kinirajan?

⁵ Dahin Sakeus eme pemungut pajak. Bayak ia erkiteken itipuna kalak. (Lukas 19:1-9) Tapi bas sada wari, ibegi Sakeus kotbah Jesus kerna Kinirajan. Meriah kel akapna kerna kai si ibegina e janah robah atena. Nina, ”Setengah i bas erta-ertangku kubereken man kalak musil; janah adi lit kalak enggo kutipu, kuulihken man bana empat kali lipat.” Iulihken Sakeus sen si ibuatna janah lanai ia merangap nandangi erta.

6. Perubahen kai si ilakoken sekalak diberu, janah ngkai maka ia nggit ngelakokenca?

⁶ Piga-piga tahun si lewat, lit sekalak diberu si ngerondong janah tading ras sekalak diberu ka, janah paksa si e ibegina kerna Kinirajan. Ia ketua bas sada organisasi si mbela hubungen sesama jenis. Tapi asum ia erlajar Pustaka si Badia janah ibegina kerna uga mehergana Kinirajan Dibata, tuhu-tuhu isedarina maka ia arus robah. (1 Korinti 6:9, 10) Erkiteken kekelengenna man Jahwe, itadingkenna organisasi e janah iputuskenna rondongna ndai. Iperidiken ia tahun 2009, setahun kenca si e jadi perintis biasa me ia. Ibanna perubahen si mbelin e erkiteken belinen kekelengenna man Jahwe asangken sura-surana si la mehuli.​—Markus 12:29, 30.

7. Uga carana gelah tetap paguh kekelengenta nandangi Kinirajan Dibata?

⁷ Gelah banci jadi rayat Kinirajan Dibata, nterem kita nggo erban perubahen si mbelin bas geluhta. (Roma 12:2) Tapi perjuangenta labo ngayak je saja. Ula sipeturut kekelengenta nandangi Kinirajan reh kurangna erkiteken kai pe, contohna erkiteken kekelengenta nandangi erta doni ntah pe sura-sura seksual si salah. (Kuan-kuanen 4:23; Matius 5:27-29) Guna nampati kita njaga kekelengen nandangi Kinirajan tetap paguh, ibere Jahwe kita erta rohani si deban.

8. (a) Engkai maka iandingken rasul Paulus pelayanenta bagi ’erta-erta si isimpan i bas kudin taneh’? (b) Kai buktina keleng ate Paulus pelayanen?

⁸ Ibere Jesus kita tugas guna erberita janah ngajarken berita si meriah kerna Kinirajan Dibata man kalak si deban. (Matius 28:19, 20) Iandingken rasul Paulus pelayanen e bagi erta si lit bas kudin taneh. (2 Korinti 4:7; 1 Timotius 1:12) Erkiteken la kita serta, seri kita bagi kudin taneh. Tapi berita si peseh kita e bali bagi erta si meherga erkiteken banci erban kita bage pe kalak si megiken nggeluh si rasa lalap. Emaka nina Paulus, ”Si enda kerina kubahan guna berita si meriah, gelah aku pe dat bagin subuk i bas dahin bage pe i bas pasu-pasu berita si meriah e.” (1 Korinti 9:23) Tutus kel ate Paulus ngajari kalak si deban kerna Kinirajan Dibata. (Oge Roma 1:14, 15; 2 Timotius 4:2.) Kekelengen nandangi berita si meriah nampati ia tetap erberita amin gia ianiaya alu kejam. (1 Tesalonika 2:2) Uga caranta ngusih kekelengen Paulus nandangi pelayanen?

9. Kai piga-piga cara i bas ncidahken kekelengenta nandangi pelayanen?

⁹ Salah sada cara Paulus ncidahken kekelengenna nandangi pelayanen eme alu nggunaken kerina kesempaten guna ngerana man si deban. Bagi Paulus ras kalak Kristen abad pemena, sipeseh ka berita si meriah arah rumah ku rumah, bas ingan jelma si nterem ras i japa pe kalak e banci sijumpai. (Perbahanen Rasul-Rasul 5:42; 20:20) Sidarami cara guna erberita ku kerina jelma. Adi ngasup kita, banci ka kita ngelayani jadi perintis ekstra ntah pe perintis biasa. Ntah pe banci ka kita erlajar cakap si deban, pindah ku daerah si deban bas negaranta, ntah pe banci saja pindah ku negara si deban.​—Perbahanen Rasul-Rasul 16:9, 10.

10. Kai gunana man Irene erkiteken tutus atena mpeseh berita si meriah?

¹⁰ Irene, sekalak turang senina si lenga erjabu si tading i Amerika Serikat, ipesehna atena berita si meriah ku kalak si make cakap Rusia. Emaka, tahun 1993, ergabung ia ku terpuk si make cakap Rusia i kota New York. Paksa si e, 20 kalak ngenca perberitana i bas terpuk e. Dua puluh tahun kenca e, nina Irene, ”Lalap denga aku la lancar ngerana bas cakap Rusia.” Tapi, isampati Jahwe ia bage pe perberita si deban guna erberita ku kalak i bas cakap e. Ulihna, gundari lit enem runggun cakap Rusia i kota New York. Melala isampati Irene kalak erlajar Pustaka,  janah lit 15 kalak si isampatina e nggo iperidiken. Piga-piga ngelayani i Betel, jadi perintis, ras pertua. Nina Irene, ”Paksa kuukuri ka kerna sura-sura doni si banci saja kuayaki mbarenda, tek aku maka e labo banci erban aku ermeriah ukur bagenda.” Tuhu-tuhu iergai Irene kel pelayanenna!

11. Kai ulihna adi terus kita erberita amin gia ianiaya?

¹¹ Adi meherga siakap pelayanenta, seri kita bagi rasul Paulus janah terus erberita amin gia ianiaya. (Perbahanen Rasul-Rasul 14:19-22) Contohna, antara tahun 1930 seh ku 1944, turang seninanta i Amerika Serikat ianiaya alu kejam. Tapi tetap ia erberita. Paksa iusahaken pemerentah ngelarang kalak e erberita, ibaba turang seninanta masalah e ku pengadilen janah imenangken kalak e melala kasus. Tahun 1943 ituriken Turang Seninanta Knorr salah sada kasus si imenangken kita i Mahkamah Agung Amerika Serikat. Ikatakenna maka labo lit kasus kai pe si ibaba ku Pengadilen e adi turang seninanta lanai erberita. Ikatakenna ka maka turang seninanta i belang-belang doni terus erberita. Enda mbuktiken maka penganiayan e gagal. Turang senina i negara si deban pe ndatken kemenangen si seri. Payo, kekelengenta nandangi pelayanen erban kita tetap erberita amin gia ianiaya.

12. Kai si atendu iusahakenndu?

¹² Adi meherga siakap pelayanenta, labo uga buena laporen jamta erberita ngenca siperdiateken. Silakoken asa ngasupta gelah banci alu mehuli ”meritaken berita si meriah”. (Perbahanen Rasul-Rasul 20:24; 2 Timotius 4:5) Tapi, kai si iajarken kita man si deban? Ukuri erta si deban arah Dibata.

13, 14. Kai erta si ikataken Jesus i bas Matius 13:52, janah uga cara mpepulungsa?

¹³ Erta si peteluken si ibereken Jahwe man banta eme kerina kebenaren si nggo sipelajari. Jahwe eme ulu kebenaren, janah KataNa eme kap kebenaren. (2 Samuel 7:28; Johanes 17:17) Selaku Bapa si melumbar, ibereNa ateNa kebenaren man banta. Sedekah enda, nggo melala sipelajari kerna si e alu ngoge KataNa ras oge-ogenta bage pe alu reh ku kebaktin regional, kebaktin wilayah, ras perpulungen tep-tep minggu. Asum sipepulung kebenaren e, lit me bas kita bagi nina Jesus erta-erta kebenaren ’si mbaru ras si nggo ndekah’. (Oge Matius 13:52.) Adi sidarami kebenaren seri bagi ndarami erta terbuni, isampati Jahwe kita nambahi ertanta. (Oge Kuan-kuanen 2:4-7.) Uga caranta ngelakokenca?

¹⁴ Perlu sipelajari Pustaka bage pe oge-ogenta alu ratur janah siriset alu mbages. Enda nampati kita ndatken kebenaren ”si mbaru”, si la pernah sieteh. (Josua 1:8, 9; Masmur 1:2, 3) I bas terbiten si pemena Watch Tower Juli 1879, ibandingkenna kebenaren ras rudang si itutupi dukut-dukut. Gelah banci dat kalak rudang e, arus megermet kel ia ndaramisa. Janah adi nggo datna sada, ula min minter ia puas. Arusna terus min idaramina terbuen. Bage ka pe, ula min kita puas adi sada kebenaren denga sidat. Ateta min terus sidarami terbuen kebenaren.

15. Engkai maka piga-piga kebenaren banci sikataken kebenaren ”si nggo ndekah”, janah siapai akapndu si mehergana?

¹⁵ Paksa mulai erlajar Pustaka kita, sipelajari kerna kebenaren si luar biasa. Enda me si ikataken kebenaren ”si nggo ndekah”, erkiteken e me tangtangna sipelajari. Kai piga-piga kebenaren e? Tangtangna, sipelajari maka Jahwe eme Si Nepa kita janah lit sura-suraNa nandangi manusia. Sipelajari ka maka iutus Jahwe anakNa ku doni guna mate selaku korban tebusen, alu bage banci kita bebas arah dosa ras kematen. Janah sipelajari ka kerna Kinirajan Dibata si ndungi kerina perbeben janah banci kita nggeluh rasa lalap i doni si dem alu kedamen ras keriahen.​—Johanes 3:16; Ketangkasen 4:11; 21:3, 4.

16. Kai si perlu silakoken paksa lit perubahen i bas pemetehta kerna kebenaren Pustaka?

¹⁶ Maun-maun, pemetehta kerna nubuat Pustaka ntah pe ayat-ayat Pustaka banci berubah. Adi bage, penting sipelajari perubahen e janah siukuri alu mbages. (Perbahanen Rasul-Rasul 17:11; 1 Timotius 4:15, Terjemahan Dunia Baru) Labo gelah siangkai saja kai bedana pemeteh si ndekah ras si mbaru, tapi perlu ka sipelajari alu manjar-anjar. Enda nampati kita gelah reh tekna maka kebenaren si mbaru e bagin arah kebenaren-kebenaren Pustaka si nggo sipepulung. Ngkai maka mehuli adi silakoken bage?

17, 18. Uga kesah si badia nampati kita?

¹⁷ Ikataken Jesus maka kesah Dibata banci nampati kita gelah siinget kai si nggo sipelajari. (Johanes 14:25, 26)  Uga enda banci nampati kita paksa mbarken berita si meriah? Ukuri pengalamen sekalak turang seninanta, gelarna Peter. Tahun 1970, umurna 19 tahun janah paksa si e mbaru denga ia ngelayani i Betel Inggris. Paksa erberita Peter arah rumah ku rumah jumpa ia ras sekalak dilaki si erjenggot, si ndauh tuan asangken ia. Isungkunna dilaki e nggit nge ia ngangkai Pustaka. Sengget dilaki e ngidah kalak si nguda denga si beluh akapna bana ngajari ia, selaku guru agama Jahudi, kerna Pustaka. Iujina Peter, nina, ”O nakku, i bas cakap kai nge mbarenda buku Daniel itulis?” Nina Peter, ”Sebagin bas cakap Aram.” Iinget Peter, ”Sengget kel Rabi e, erkiteken kueteh jabapenna—tapi senggeten ka aku! Uga maka kueteh jabapenna? Paksa mulih aku kurumah janah ku pereksa majalah Watchtower ras Awake! bulan si lewat, kudat artikel sinuriken maka i bas cakap Aram buku Daniel itulis.” (Daniel 2:4) Payo, kesah si badia banci nampati kita gelah siinget keterangen si pernah sioge.​—Lukas 12:11, 12; 21:13-15.

¹⁸ Adi keleng ateta kebenaren si nggo sipelajari arah Jahwe nari janah siergai e, ateta terus min sitambah kebenaren e bagi mpepulung erta. Reh rusurna silakoken e, nggo reh pangna kita ngajar kalak si deban.

19. Engkai maka arus sijaga erta rohaninta?

¹⁹ Bas artikel enda, nggo sipelajari uga pentingna ngergai erta rohaninta. Tapi arus kita metenget gelah ula sipeturut Setan bage pe doni enda erban kekelengenta nandangi erta e reh kurangna. Adi la kita metenget, banci tersimpangken kita guna ngaloken pendahin si melala gajina, ersura-sura gelah bayak ntah pe ersura-sura mbanggaken erta. Ipersingeti rasul Johanes kita maka masap kap pagi doni enda ras kerina si itawarkenna. (1 Johanes 2:15-17) Emaka arus tetap siergai janah sijaga erta rohaninta.

20. Upaya kai si atendu ilakokenndu gelah banci ijagandu erta rohanindu?

²⁰ Nggitlah kita nadingken kai pe si banci erban kekelengenta man Kinirajan Dibata reh kurangna. Usahakenlah terus erberita alu ergiah-giah, janah ula pernah bene kekelengenndu nandangi pelayanen. Teruslah darami kebenaren i bas Pustaka. Alu ngelakoken e, isusunndu me ”kinibayakenndu i surga, i je la urak beliganna sabap la ibengketi penangko ntah pe ipan ngetnget”.​—Lukas 12:33, 34.