1, 2. (a) Ikkefa úlúngát mettóch mi fókkun aúchea Jiowa a ngenikich? (b) Met sipwe pwóróus wóón lón ei lesen?

 JIOWA i ewe mi wéúéch seni meinisin lón unuselapen láng me fénúfan. Mettóch meinisin, an. (1 Kron. 29:11, 12) Nge Jiowa a fókkun kisáseú ngeni meinisin. A ifan me kilisouch pún a ngenikich chómmóng mettóch mi aúchea lón pekin lúkú! Ikkefa ekkóch me leir? Ikkeei, (1) ewe Mwúún Kot, (2) ach angangen afalafal, me (3) ekkewe pwóróus mi enlet me aúchea mi mak lón an we Kapas. Nge ika sia túmúnúngaw, sia tongeni ménúkaaló úkúkún aúchean ekkena mettóch. A lamot sipwe ákkáchema ngenikich usun aúchean me akkalóllóólaaló ach tongei ekkewe mettóch mi aúchea lón pekin lúkú. Iei met Jesus a erá usun ena: “Ia wöümi a nom ie, ikenan lelukemi epwe pwal nom ie.”​—Luk. 12:34.

² Iei sipwe pwóróus wóón ifa usun sia tongeni akkalapaló ach aúcheani me ach kilisou ren ewe Mwúún Kot, ewe angangen afalafal, me ewe enlet. Atun ach féri ena, ekilonei ifa usun  en pwisin ka tongeni alóllóólaaló óm tongei ekkeei mettóch mi aúchea lón pekin lúkú.

3. Lón án Jesus we kapas áwewe, met ewe mwán a féri pwe epwe tongeni mééni ewe eféú féún pwei? (Ppii ewe sasing lepoputáán ei lesen.)

³ Álleani Mateus 13:45, 46. Jesus a eáni eú kapas áwewe usun emén mwán mi kan kamé me amémé féún pwei. Eú rán, a kúna eféú féún pwei mi fókkun aúchea lap seni meinisin ekkewe féún pwei a fen kúna lón manawan. Ena mwán a fókkun mochen néúni ena féún pwei, iwe a améméló mettóch meinisin mi nóm ren pwe epwe mééni. Ka tongeni anchangei úkúkún an aúcheani ena féún pwei?

4. Met sipwe tipemecheres le féri fán iten ewe Mwúún Kot?

⁴ Met sia tongeni káé seni án Jesus na kapas áwewe? Ewe pwóróus mi enlet usun ewe Mwúún Kot a usun chék ena féún pwei mi aúchea. Ika sia aúcheani ewe Mwú usun chék án ewe mwán aúcheani ewe féún pwei, iwe sipwe tipemecheres le pennúkúóló mettóch meinisin pwe sipwe ketiw me ren án Kot we Mwú me nónnóm lón. (Álleani Markus 10:28-30.) Sipwe ppii ifa usun rúúemén aramas ra féri ena.

5. Met Sakios a tipemecheres le féri fán iten ewe Mwúún Kot?

⁵ Sakios i emén chón ioni takises. A pisekisekiló ren an tunosolá ngeni aramas lón an we angang. (Luk. 19:1-9) Nge eú rán, Sakios a rongorong án Jesus afalafal usun ewe Mwú. A fókkun sani met a rongorong, iwe a mochen unusen siwili manawan. A erá: “Ai Samol, nengeni, ngang üpwe ngeni ekewe chon wöüngau esopun ai kewe pisek. Nge are üa atupu eman won moni, üpwe aliwinisefäli ngeni fän rüanü.” Sakios a eliwini ngeni ekkewe aramas ewe moni a solááni seniir me a úkútiw le tipemmóng.

6. Ikkefa ekkewe siwil emén fefin a féri, me pwata?

⁶ Lupwen emén fefin a rongorong usun ewe Mwúún Kot fitu ier a ló, i a fen pwúpwúlú ngeni pwal emén fefin. I pwal preseten lón eú mwicheich mi penaatá án ekkewe mwán mi sani mwán are fefin mi sani fefin pwúúng pwe resap kúna aapaap. Nge atun an a káé ewe Paipel me mirititi aúchean ewe Mwúún Kot, a kúna pwe mi lamot epwe féri watteen siwil lón manawan. (1 Kor. 6:9, 10) Pokiten an tong ngeni Jiowa, iwe a atowu seni ewe mwicheich me a áwesi lefilan we me ewe pwal emén fefin. A papatais lón 2009, nge lón ewe ier mwirin, a wiliti emén regular pioneer. A féri ekkena watteen siwil pokiten a péchékkúl an tongei Jiowa lap seni ekkewe mochen mi ngaw a eáni.​—Mark. 12:29, 30.

7. Ifa usun sia tongeni akkamwéchú péchékkúlen ach tong fán iten ewe Mwúún Kot?

⁷ Ren ach sipwe ketiw me ren án Kot we Mwú, mi lamot ngeni chómmóng leich ach sipwe unusen siwili manawach. (Rom 12:2) Nge mi chúen lamot ach sipwe sópweló ach fiffiu. Mi lamot sisap mut ngeni ach tong fán  iten ewe Mwúún Kot epwe apwangapwangoló ren och mettóch, áwewe chék ren tongen pisek me mochenian futukach. (SalF. 4:23; Mat. 5:27-29) Ren án Jiowa epwe álisikich le akkamwéchú péchékkúlen ach tong fán iten ena Mwúún Kot, a ngenikich pwal eú mettóch mi aúchea.

8. (a) Pwata aposel Paulus a erá pwe ach angangen afalafal a usun och “feiöch mi aüchea lon sepi mi för seni pwül”? (b) Ifa usun Paulus a pwáraatá pwe a aúcheani ewe angangen afalafal?

⁸ Jesus a ewisa ngenikich ach sipwe afalafala me asukula ngeni aramas ewe kapas allim usun ewe Mwúún Kot. (Mat. 28:19, 20) Ewe aposel Paulus a erá pwe ewe angangen afalafal a usun chék och pisek mi aúchea lón eú sepi mi ffér seni pwúl. (2 Kor. 4:7; 1 Tim. 1:12) Pokiten kich sise unuséch, kich mi usun ekkena sepi mi ffér seni pwúl. Nge ewe pwóróus sia afalafala ngeni aramas a usun chék eú pisek mi aúchea pokiten a tongeni atoto manaw esemuch ngenikich me pwal ngeni chókkewe mi aúseling ngenikich. Ina ewe popun Paulus a erá: “Ekei mettoch meinisin üa föri fänäsengesin ewe Pworausen Manau, pwe üpwe angei wisei lon ekewe feiöch.” (1 Kor. 9:23) Paulus a angang weires an epwe asukula aramas usun ewe Mwúún Kot. (Álleani Rom 1:14, 15; 2 Timoty 4:2.) An aúcheani ewe kapas allim a álisi an epwe sópweló le afalafal inaamwo ika a kúna watteen riáfféúmwáál. (1 Tes. 2:2) Ifa usun sia tongeni áppirú án Paulus aúcheani ewe angangen afalafal?

9. Ikkefa ekkóch mettóch sia tongeni féri ren ach sipwe pwári pwe sia fókkun aúcheani ewe angangen afalafal?

⁹ Eú mettóch Paulus a féri mi pwári pwe a fókkun aúcheani ewe angangen afalafal, ina an fós ngeni aramas fansoun meinisin mi suuk ngeni. Sia pwal usun Paulus me ekkewe popun Chón Kraist ren ach afalafala ewe kapas allim ngeni aramas imw me imw, lón ekkewe leeni aramas ra kan soun nóm ie, me ese lifilifil ia chék sia tongeni fós ngeni aramas ie. (Föf. 5:42; 20:20) Sia kan kútta alen ach sipwe afalafal ngeni chómmóng aramas. Ika mi tufich ngenikich, neman sia tongeni auxiliary pioneer are regular pioneer. Are neman sia tongeni káé pwal eú fósun fénúfan, mwékút ngeni eú leeni lón fénúach, are pwal mwo nge mwékút ngeni pwal eú fénú.​—Föf. 16:9, 10.

10. Ikkefa ekkewe feiéch Irene a kúna pokiten a angang weires le afalafala ewe kapas allim?

¹⁰ Emén Chón Kraist fefin mi lipich lón Merika itan Irene, a mochen afalafala ewe kapas allim ngeni aramas mi eáni fósun Russia. Iwe lón 1993 a fiti ewe kúmi mi eáni fósun Russia lón New York City. Lón ena fansoun, mi chék wor ina epwe 20 chón afalafal lón ena kúmi. Nge mwirin 20 ier, Irene a apasa, “Tori iei usaamwo kon sileéchú fósun Russia.” Iwe nge Jiowa a álisiir me ekkewe pwal  ekkóch chón afalafal ar repwe afalafal ngeni ekkewe aramas mi eáni ena fós. Iwe iei, a wor wonu mwichefel mi eáni fósun Russia lón New York City. Irene a káé Paipel ngeni chómmóng aramas, me 15 leir ra papatais. Ekkóch me leir ra angang lón Bethel, ekkóch ra fiti angangen pioneer, me ekkóch ra wiseni ewe wis mwán mi ásimaw. Irene a erá: “Lupwen ua ekieki usun ekkewe pwal ekkóch mettóch ua tongeni achocho ngeni, me rei ese wor eú me leir epwe atoto ngeniei ei úkúkún watteen pwapwa.” Irene a fókkun aúcheani an angangen afalafal!

11. Epwe met mwirilóón ika sipwe sópweló le afalafal inaamwo ika sia kúna riáfféúmwáál?

¹¹ Ika sia aúcheani ach angangen afalafal, sipwe usun ewe aposel Paulus me sópweló le afalafal pwal mwo nge lupwen sia kúna riáfféúmwáál. (Föf. 14:19-22) Áwewe chék, lefilen ekkewe ier 1930 me 1944, pwiich kewe lón Merika ra kúna watteen riáfféúmwáál. Nge ra chúen sópweló le afalafal. Lupwen ekkewe néúwis ra sótun aúkaló ar angangen afalafal, pwiich kana ra waalong lón kapwúng me ra win lón chómmóng ar kewe case. Lón 1943, Pwiich Knorr a fós usun eú case sia winneni lón ewe imwen Kapwúng Tekia lón Merika. A erá pwe ika pwiich kewe rese likiitú le afalafal, iwe esap tongeni wor case sipwe waalong lón ena imwen Kapwúng Tekia. A pwal erá pwe pokiten pwiich kewe wóón unusen fénúfan ra sópweló le afalafal, ra ánneta pwe án aramas eriáfféúmwááliir esap sópwéch. Pwiich kewe lón pwal ekkóch fénú ra pwal winneni ekkewe case usun ekkena. Ewer, pokiten sia aúcheani ewe angangen afalafal, sisap mut ngeni riáfféúmwáál an epwe aúkaló ach fiti ewe angangen afalafal.

12. Met ka tipeppós le féri lón óm angangen afalafal?

¹² Ika sia aúcheani ach angangen afalafal, iwe sise chék ekieki ewe úkúkún awa sipwe makkeetiw lón néúch repot. Nge sia fen achocho úkúkún ach tufich le “pwärätä ewe  Pworausen Manau.” (Föf. 20:24; 2 Tim. 4:5) Nge met sipwe asukula ngeni aramas? Sipwe ppii pwal eú mettóch mi aúchea Kot a fang ngenikich.

13, 14. Met ewe “lenien iseis” Jesus a fós usun lón Mateus 13:52, me ifa usun sia tongeni amasoua?

¹³ Ewe aúlúngátin mettóch mi aúchea Jiowa a ngenikich, ina meinisin ekkewe pwóróus mi enlet sia fen káé. A feito seni Jiowa meinisin ekkewe pwóróus mi enlet. (2 Sam. 7:28; Kölf. 31:5) I emén Sam mi kisáseú, iwe a mochen ngenikich ekkena pwóróus mi enlet. Seni ewe atun sia kerán silei ewe enlet tori iei, sia fen káé chómmóng ekkena pwóróus seni ach álleani an we Kapas me néúch kewe puk me ach fiti ach kewe mwichelap me mwich iteiten wiik. Lón ach akkalapaló ekkena pwóróus mi enlet sia akkangei epwe lapóló minne sia ioni, iwe epwe nóm rech ewe mettóch Jesus a erá pwe eú “lenien iseis” pwóróus mi enlet, ekkewe mi fé me minen lóóm. (Álleani Mateus 13:52.) Jiowa epwe álisikich le akkamasoua ach “lenien iseis” ika sia kúttafichi ekkewe pwóróus mi enlet usun ach kúttafichi pisek mi aúchea mi monomonoló. (Álleani Än Salomon Fos 2:4-7.) Ifa usun sia kan féri ena?

¹⁴ Mi lamot sipwe káé ewe Paipel me néúch kewe puk iteitan me kúttafichi pwóróus ren ach féri research. Ach féri ena epwe álisikich le silei mineféén pwóróus mi enlet sisaamwo silei. (Jos. 1:8, 9; Kölf. 1:2, 3) Ewe ákkáeúin Watch Tower mi katowu lón July 1879, a apépé ewe enlet ngeni epa péén irá mi monoló lein petewel. Ren án emén epwe kúna ena sókkun péén irá, a lamot epwe achocho le kúttafichi. Nge lupwen a kúna, itá esap menemenéch ren ena chék epa. Itá epwe sópweló le kútta pwal chómmóng péén irá. Pwal ina usun kich, itá sisap chék menemenéch ren eú pwóróus mi enlet sia silei. Sipwe fen tinikken le kúkkútta pwal chómmóng pwóróus mi enlet.

15. Pwata sia tongeni erá pwe ekkóch pwóróus mi enlet iir minen lóóm, me menni leir ka kon aúcheani?

¹⁵ Lupwen sia kerán poputá le káé Paipel, sia káé ekkóch pwóróus mi echipwér. Neman sia tongeni erá pwe iir minen lóóm pokiten ina met sia káé me akkomwan. Ikkefa ekkóch lein ekkena pwóróus? Lepoputáán, sia káé pwe Jiowa i ewe Chón Férikich me a wor met a tipeni fán iten aramas. Sia pwal káé pwe Kot a tiinatiw Néún we ngeni fénúfan an epwe máló pwe epwe eú méén kepich epwe angasakicheló seni tipis me máló. Me sia káé pwe án Kot we Mwú epwe asopwaló meinisin riáfféú me sipwe tongeni kúna manaw esemuch wóón fénúfan lón kinamwe me pwapwa.​—Joh. 3:16; Pwär. 4:11; 21:3, 4.

16. Met mi lamot sipwe féri lupwen a wor siwil lón ach weweiti ewe enlet lón Paipel?

¹⁶ Fán ekkóch, a tongeni wor siwil lón ach weweiti eú oesini are wokisin lón Paipel. Lupwen a fis ena, a lamot ach sipwe awora fansoun le káéfichi ewe siwil me ekilonei. (Kölf. 119:97; Föf. 17:11) Mi lamot sipwe káéfichi ewe watteen siwil lón ach weweiti eú pwóróus, nge sipwe pwal túmúnú ewe tichikin pwóróus lón ewe mineféén áwewe. Ena esin káé epwe álisikich le isonalóng ena mineféén pwóróus lón ach we leenien iseis. Pwata a éch ach sipwe achocho le féri ena?

17, 18. Ifa usun ewe manaman mi fel a tongeni álisikich?

¹⁷ Jesus a áiti ngenikich pwe án Kot we manaman mi fel a tongeni álisikich le  chemeni ekkewe mettóch sia fen káé lóóm. (Joh. 14:25, 26) Ifa usun epwe álisikich atun sia afalafala ewe kapas allim? Ekieki pwóróusen pwiich ei itan Peter. Lón 1970, Peter a 19 ierin me a kerán chék poputá le angang lón ewe Bethel lón Britain. Peter a afalafal imw me imw me a sereni emén re Jus mi ttam enisan. A eisini ena mwán ika mi mochen an epwe weweiti ewe Paipel. Ena mwán i emén rappai, me a máirú ren án emén alúwél át ekieki pwe a tongeni asukula lón Paipel. Ren án ena rappai epwe sótuni Peter, i a eisini, “Iwe, nei nan át, menni fós ewe puken Taniel a mak lón?” Peter a ereni, “Kinikinin a mak lón fósun Aramaik.” A pwal erá, “Ewe rappai a máirú ren ai silei pélúwen an we kapas eis nge a fen kon watte ai máirú mwan! Ifa usun ua silei pélúwan? Lupwen ua liwiniti leim me cheki ekkewe Watchtower me Awake! minen chék ekkewe maram ra ló, ua kúna eú lesen mi áweweei pwe ewe puken Taniel a mak lón fósun Aramaik.” (Tan. 2:4) Ewer, ewe manaman mi fel a tongeni áchema ngenikich ekkewe pwóróus sia fen álleani me isonalóng lón ach leenien iseis.​—Luk. 12:11, 12; 21:13-15.

¹⁸ Ika sia fókkun aúcheani ekkewe pwóróus mi enlet sia káé me ren Jiowa, sipwe mochen akkalapaló ekkewe pwóróus sia isoni lón ach leenien iseis. Lapólóón ach féri ena, pwal ina lapólóón ach meefi pwe sia mmólnetá le asukula ekkewe ekkóch.

19. Pwata sipwe túmúnú ekkewe mettóch lón pekin lúkú mi aúchea mi fen nóm rech?

¹⁹ Lón ei lesen, sia fen káé lamoten ach sipwe aúcheani ekkewe mettóch lón pekin lúkú. Nge mi lamot sipwe túmúnú pwe site mut ngeni Satan me an ei fénúfan ar repwe apwangapwangaaló ach aúcheani ekkena mettóch. Ika sise túmúnúéch, sia tongeni rikiló ren eú angang mi watte peioffun, are ach mochen eáni eú manaw mi fókkun ekinamwe me pisekisek, are ach mochen esika wéúch. Ewe aposel Johannes a áchema ngenikich pwe ei fénúfan me mettóch meinisin a tongeni ngenikich repwele móróló. (1 Joh. 2:15-17) Ina popun mi lamot sipwe akkaúcheani ekkewe mettóch lón pekin lúkú mi fen nóm rech me pwal túmúnúúr.

20. Met ka tipeppós le féri pwe kopwe túmúnú ekkewe mettóch mi aúchea lón pekin lúkú mi fen nóm reom?

²⁰ Kopwe tipemecheres le likitaló mettóch meinisin mi tongeni apwangapwangaaló óm tong fán iten án Kot we Mwú. Kopwe tipeppós le afalafal fán tinikken, me kosap mut ngeni óm aúcheani ewe angangen afalafal an epwe móróló. Sópweló le kúkkútta ekkewe pwóróus mi enlet lón Paipel. Atun óm féri ena, kopwe ‘iseis woum lon läng, ewe ia esap tongeni kisikisila me ie, pun chon solä resap tongeni angeer, nge pwötür resap tongeni atarela. Pun ia woum a nom ie, ikenan lelukom epwe pwal nom ie.’​—Luk. 12:33, 34.