1, 2. (1) ¿Jarat tü apünüinsükat kasa nüsülajaka Jeʼwaa wamüin? (2) ¿Kasa wekirajaajeetka anain sünain ekirajaayakat tüü?

NIAʼALA neʼe Jeʼwaa washitshaanaka nümüiwaʼa. Nia kamüinka süpüshuaʼa tü kasa eekat yaa mmapaʼa jee tü chakat iipünaa (1 Crón. 29:11, 12). Asülajüishaata maʼin Jeʼwaa, müsüjeseʼe naapüin wainma kasa namüin na kojutukana amüin tü kasairua anashaatasü nümaʼanajeejatkat. Anuu soʼutku tia kasakalüirua: 1) tü Nuluwataayakat Maleiwa, 2) tü aküjaakat pütchi otta 3) tü shiimain suluʼukat tü Wiwüliakat. ¿Aashin kojutushaatain wamüin tia? Eejüinjatpejeʼe waaʼin suulia mojutuin wamüin shia. Süpüla nnojoluin sülatüin wamüin tia, acheküsü wekirajaain sünain jee wanaajaain shia suluʼu waaʼin süpüla kojutushaatain shia wamüin. Jülüja waaʼin tü nümakat Jesuu: «Shieerü jülüjaka paaʼin waneepia tü kasa kojutukat maʼin pümüin» (Luc. 12:34, TNM).

² Wekirajaa sünain tü waaʼinrajatkat süpüla ayatüin kojutuin wamüin tü Nuluwataayakat Maleiwa, tü aküjaakat pütchi otta tü shiimain suluʼukat tü Wiwüliakat. Jee müsia süpüla kooʼomüinjatüin sujutü wamüin tia makat. Sümaʼinruʼu wekirajaain sünain, wasakira  waaʼin kasain wayu tü waaʼinrajatkat süpüla kooʼomüinjatüin sujutü wamüin tia kasa nüsülajakat Maleiwa.

3. ¿Kasa naainjaka wanee wayuu süpüla niyaʼlajüin wanee kaaʼürülai anaka maʼin? (Piirakaa sümüin tü ayaakuaa suluʼukat süpana 9).

³ (Paashajeʼera Mateo 13:45, 46). Akuentajüshi Jesuu nüchiki wanee wayuu achajaakai süchiki kaaʼürülairua eekai anasüin. Watta maʼin saalin tü niyaʼlajakat jee tü nuikakat. Soʼu wanee kaʼi, nünta anainrü chia wayuukai wanee kaaʼürülai anasü maʼin. Süpüla niyaʼlajüin shia nuiküin süpüshuaʼa tü kasa eejatkat nümaʼana. Nüchekakajasaʼa maʼin shia chi wayuukai süpüla müinjatüin shia niyaʼlajüin.

4. ¿Kaseerü waaʼinraka kojutule wamüin tü Nuluwataayakat Maleiwa?

⁴ ¿Kasa watüjaka sünainjee tü nukuentajakalü achiki Jesuu? Tü shiimainkat süchiki Nuluwataaya Maleiwa müsü aka saaʼin tia kaaʼürülai anakat maʼin. Müleka kojutule maʼin wamüin tü Nuluwataayakat Maleiwa maʼaka kojutuin nümüin chia wayuukai tü kaaʼürülai anakat maʼin, wapüteerü kasa süpüshuaʼa süpüleerua waʼyataain sümüin Nuluwataaya Maleiwa (paashajeʼera Marcos 10:28-30). Wekirajaa nachiki piamashii wayuu aaʼinrakana tia.

5. ¿Kasa naainjaka Zaqueo sutuma kojutuin nümüin Nuluwataaya Maleiwa?

⁵ Zaqueo okotchojüipuʼu nneerü nümüin chi sülaülashikai mma, washitshaana nia süka nimeejüin wayuu saaʼu sünneetse (Luc. 19:1-9). Naapapa nünüiki Jesuu süchiki tü Nuluwataayakat Maleiwa jee niʼrapa shiain wanee kasa kojutushaatainjatka nümüin, nümaka: «Tasülajeerü jooluʼu shiatapünaa tü tawashirüinkat sümüin wayuu eekai müliain. Je müleka teʼikeʼerüle paala wane wayuu süka taʼalain saaʼu sükorolo, tawalaajeerü sümüin süchikua pienchitua». Nüleʼejirüin süpüshuaʼa tü kasa nuʼluwajakat jee nnojotsü kachiiruain naaʼin mapa tü washirüükat.

6. ¿Kasa saainjaka wanee wayuu sütüjaapa saaʼu kojutushaatain tü Nuluwataayakat Maleiwa?

⁶ Eejatüinka wanee wayuu jiet kaʼwayuuseka wanee jiet, shiasejeʼe soʼu wanee kaʼi saapüin süchiki tü Nuluwataayakat Maleiwa. Tia wayuukot, shikiipüʼü shia wanee organización atkaaka süchiirua tü nakuwaʼipakat na jaleetshiikana. Shikirajaapa sünain tü Wiwüliakat, shiyaawata aaʼu kojutushaatain tü Nuluwataayakat Maleiwa. Otta shiyaawata aaʼu sunouteʼerüinjatüin sukuwaʼipa (1 Cor. 6:9, 10). Sutuma sütüjaaitpain aaʼu tia, ooʼulaasü shia suulia tü shiʼyataapuʼukalü anain jee ooʼulaasü shia suulia tü jiet kepiajiraakalü amaa shia. Woutiisasü shia soʼu 2009 jee pürekutsootsü shia wanee juya süchikijee tia. Sutuma aishaatain Jeʼwaa süpüla jee kojutushaatain sümüin tü Nuluwataayakat, nnojotsü saaʼinrüin tü mojusü suchuntaakat saaʼin (Mar. 12:29, 30).

7. ¿Kasa eejüinjatka oulia waaʼin süpüla nnojoluin mojutuin wamüin tü Nuluwataayakat Maleiwa?

⁷ Süpüla waʼyataain sümüin Nuluwataaya Maleiwa, wainma kasa wanouteʼeraka palajana sünainjee wakuwaʼipa (Roma 12:2). Eejüinjatpejeʼe  waaʼin suulia kachiiruain waaʼin tü washirüükat jee wamaʼüjiraain wakuwaʼipa. Nnojotsü waainjüinjatüin tia suulia mojutajüin wamüin tü Nuluwataayakat Maleiwa (Prov. 4:23; Mat. 5:27-29). Eesü wanee kasa nüsülajaka wamüin Jeʼwaa süpüla ayatüinjatüin kojutuin wamüin tü Nuluwataayakat.

8. (1) Naashin Pablo, tü aküjaakat pütchi müsü aka saaʼin wanee korolo kojutusü suluʼuka wanee iita aainjuushi süka pootshi, ¿jamaluʼulu nünüiki? (2) ¿Kasa naainjaka Pablo süka kojutuin nümüin tü aküjaakat pütchi?

⁸ Sotuinjatü waaʼin nuluwataain waya Jesuu süpüla waküjain jee wekirajüin wayuu sünain tü Nuluwataayakat Maleiwa (Mat. 28:19, 20). Kojutushaatasü nümüin Pablo tü aküjaakat pütchi, naashin niakai müsü aka saaʼin wanee korolo kojutusü suluʼuka wanee iita aainjuushi süka pootshi (2 Cor. 4:7, TNM; 1 Tim. 1:12). Eesü süpüla katüin woʼu sutuma tü pütchi wekirajaakat nüchiki Maleiwa jee kateerü noʼu na wayuu aapakana shia. Eesü süpüla waainjain tia aʼyatawaakat mayaapejeʼe waleʼeruʼuin tü kaainjalaakat. Müshijeseʼe nümüin Pablo: «Teisalajüin takuaippa shiiʼiree naapeein nüchiki chi Oʼtteʼerüikai taküjakat nümüin sümaa nünoujain nünain. Talatashaateerü taaʼin müleka nünoujale» (1 Cor. 9:22, 23). Kojutushaatasü nümüin Pablo tü aküjaakat pütchi, müshijeseʼe nikirajüin wayuu sünain tia (paashajeʼera Roma 1:14, 15; 2 Timoteo 4:2). Süka kojutuin nümüin tü aküjaakat pütchi, nnojoishi nia ooʼulaain mayaapejeʼe müliashaatain nia atumawaa (1 Tes. 2:2). ¿Kasa waaʼinrüinjatka süpüla müin wakuwaʼipa maʼaka naaʼin Pablo?

9. Püküja kasain eein süpüla waainjain süka kojutuin wamüin tü aküjaakat pütchi.

⁹ Sutuma kojutuin nümüin Pablo tü aküjaakat pütchi, aküjashi nia pütchi sümüin wayuu süpüshuaʼa. Maaʼulu yaa, washatüin nakuwaʼipa na aluwataaushiikana jee na waneinnua anoujashii namaiwajanakana, aküjashii waya pütchi eepünaale waya, eere jouluin wayuu, sainküin piichi otta eepünaale eein wayuu (Aluw. 5:42; 20:20). Wachajaa sukuwaʼipa süpüla waküjain pütchi sümüin wainma wayuu. Müleka eere süpüla pürekutsoolüin aaʼusiliaat waya, eesü süpüla waainjain shia, eeshii süpüla pürekutsoolüin rekulaat wayayaa. Wekirajaa sünain wanee anüikii naatajatü, wakolojoo suluʼumüin wanee mma yaʼayaa suluʼu woumain jee shiale wakolojooin suluʼu wanee mma waneejatü (Aluw. 16:9, 10).

10. ¿Kasa anasü eeka sutuma süküjain pütchi tü wawalakat Irene?

¹⁰ Anuu sukuwaʼipa Irene, wanee wawala majayüt, shiakat keeʼireesü saaʼin süküjain pütchi namüin na wayuu aashajaakana süka pütchi ruso. Oʼttüsü shia sünain aküjaa pütchi soʼu 1993, eejana 20 wawalayuu atüjakana aashajawaa süka tia pütchikat chaa Nueva York. Süchikijee sülatüin 20 juya, ayatüsia isaataʼain müin süchiki aashajawaa ruso. Nükaaliinjapejeʼe Jeʼwaa shia sünain tia aʼyatawaakat, akaataajaʼa neʼe waneinnua wawalayuu makana akuwaʼipa. Maaʼulu yaa, eesü aipiruasü outkajaalee eere naashajaain na wawalayuukana süka tü pütchikat ruso. Tia outkajawaakat chasü Nueva York. 15 wayuu shikirajaka Irene sünain tü Wiwüliakat, noʼutku naya wayuukana weteliita, pürekutsoot otta laülaashii naya. Anuu  sünüiki Irene: «Talatashaatasü taaʼin sutuma tü taainjakat, nnojotsüje müin taaʼin sutuma wanee kasa naatajatü suulia tü makalü yaa». Tia wawalakat, kojutushaatasü sümüin tü aküjaakat pütchi.

11. ¿Kasa anasü weʼreetka ayatüle waküjain pütchi mayaapejeʼe müliain waya atumawaa?

¹¹ Kojutule wamüin tü aküjaakat pütchi, ayateena waya aküjain pütchi nüchiki Maleiwa mayaapejeʼe müliain waya atumawaa maʼaka naaʼin Pablo (Aluw. 14:19-22). Suʼunnaa tü juyakat 1930 otta 1944, müliashii atumawaa na wawalayuukana chaa Estados Unidos. Mayaapejeʼe müin na wawalayuukana, ayatüshii naya aküjain pütchi maʼaka naaʼin Pablo. Süpüla ayatüin naya sünain tia, oʼunüshii naya laülaapialuʼu kojuyatua süpüla neeʼiyatüin eein süpüla naküjain pütchi. Soʼu 1943 müshi chi wawalakai Nathan Knorr süchiki nakanajüin na wawalayuukana suluʼu Tribunal Supremo chakat Estados Unidos: «Makaʼa wakanajüin, shia jutuma jiakana tawalayuu. Jamüshiijaʼa juuʼulaayüliije suulia aküjaa pütchi, nnojotsüje kasainjatüin waküjain chaa Laülaapialuʼu. Nnojoluinapa waya müliain atumawaa süka ayatüin na wawalayuukana sünain tü aküjaakat pütchi sainküin mmakat süpüshuaʼa, nnojoleena naya ooʼulaain suulia tia. Makaʼa wakanajüin shia süka süchecheraain tü nupueulosekat chi Senyotkai sünain aküjaa pütchi». Sutuma ayatüin tia natuma na wawalayuukana, ayatüshii waya akanajüin suluʼu waneirua laülaapia chaa suluʼu waneirua mma. Ayatüle kojutuin wamüin tü aküjaakat pütchi, akanajuujeena watuma na weʼipolokana. Shiimainkalajaʼa tia.

12. ¿Kasa wayu tü waaʼinrüinjatkat süka süpüshuaʼa waaʼin?

¹² Müleka kojutule maʼin wamüin tü aküjaakat pütchi, nnojoleena waya aküjain pütchi süpüla neʼe wasaʼwatüin tü oora eʼitaanakat wapüleerua. Tü waaʼinrüinjatkat shia waküjain pütchi anasü nüchiki Maleiwa (Aluw. 20:24; 2 Tim. 4:5). ¿Kasa wekirajüinjatka anain waküjapa pütchi? Wekirajaa sünain waneeirua kasa nüsülajaka wamüin Jeʼwaa.

13, 14. (1) ¿Kasa korolo kojutusü naashajaaka achiki Jesuu suluʼu Mateo 13:52? (2) ¿Kasa waaʼinrüinjatka süpüla wakooʼomüinjüinjatüin shia?

¹³ Jeʼwaa nia chi Maleiwa aküjakai tü shiimainkat, wekirajaainjatü anain jooluʼu tü shiimain nikirajakalü anain waya suluʼujee tü Wiwüliakat (2 Sam. 7:28; Sal. 31:5). Niakai nia chi Washi asülajüishaatakai, nikirajüin sünain tü shiimainkat na wayuu kojutukana amüin nia. Wanaa sümaa wekirajünüin sünain tü shiimainkat, ayatüshii waya ekirajaain sooʼomüin waashajeʼerapa tü Wiwüliakat, tü pütchi naapakat chi achepchieekai, woʼunapa sünain tü outkajawaakat miyoʼu jee tü outkajawaa aainjünakat semaanawai. Sülata sülata sümapa tü kaʼikat, kooʼomüinsü tü watüjainkat süchiki tü shiimain kakaliaitkat jee tü jeketkat (paashajeʼera Mateo 13:52). Nükaaliinjeena waya Jeʼwaa süpüla watüjaleein sooʼomüin süchiki tia müleka wachajaale maʼin tü shiimain suluʼukat tü Wiwüliakat (paashajeʼera Proverbios 2:4-7). ¿Kasa waaʼinrüinjatka süpüla wountuin tia?

¹⁴ Wekirajaainjatü anain waneepia tü Wiwüliakat jee tü pütchi naapakat chi achepchieekai jee wekirajaainjatü anain tü kasa kapüleekat suluʼu. Müle shia watuma, atüjeena waya sooʼomüin süchiki tü shiimain nnojotpuʼukat weʼraajüin (Jos. 1:8, 9; Sal. 1:2, 3). Sünain tü palajatkat Aapiria Wayuu ojuʼitaka juulioʼu 1879, müsü wanee pütchi suluʼu: «Tü shiimainkat müsü aka saaʼin wanee süsii wunuʼu anachonka maʼin süpaʼa wanee anooui otta müsia tü alawaakat müsü aka saaʼin tü mojuui keimsesükat, watta maʼin saalii süʼütpünaa tü süsiikat wunuʼu. Pünteere sünain tü shiimainkat eejüinjatü paaʼin. [...] Acheküshi pejepülaain müleka paapaweere shia. Nnojo anain paaʼin sümaa waneesia neʼe pütchi shiimainkat. [...] Ayataʼaya püchajaain shia». Keeʼireeshaatainjatü waaʼin wakooʼomüinjüin watüjain süchiki tü shiimain suluʼukat tü Wiwüliakat.

15. (1) ¿Jarat tü «kasa eekai laülaain» nümaka amüin Jesuu? (2) ¿Jarat kojutuleeka pümüin?

¹⁵ Wanaa sümaa woʼttüin sünain ekirajawaa sünain tü shiimainkat, wainma tü kasa watüjakat suluʼujee tü Wiwüliakat. Tü «kasa eekai laülaain» eeshii süpüla wamüin sümüin süka shiain tü watüjakat palajana suluʼujee tü Wiwüliakat. Soʼutku tia watüjakat shia nukumalain waya Jeʼwaa jee aneerüin sukuwaʼipa wayuu süpüshuaʼa nutuma. Tü wane kasa watüjakat shia alin maʼin waya nüpüla Jeʼwaa jee suluʼujee tia naapüin nikii chi Nüchonkai süpüla nülaʼajaain waainjala jee nnojoluinjanain waya outuin piantua. Ekirajünüshii waya najaʼlajeʼereerüin Jeʼwaa tü müliaakat sükajee tü Nuluwataayakat jee kateerüin woʼu süpüla kaʼikat süpüshuaʼa (Juan 3:16, TNM; Alat. Map. 4:11; 21:3, 4).

16. ¿Kasa waaʼinrüinjatka müleka sunouteʼennüle wanee kasa wanoujaka anain?

¹⁶ Eesü sunouteʼennüle nutuma chi achepchieekai wanee kasa wanoujakalü anain jee shiale wanee pütchi ekeraajüinjatka saashin tü Wiwüliakat. Sülatapa tia, acheküsü wekirajaainjatüin maʼin sünain tia pütchikat sümaa wasakireʼerüin waaʼin sünain (Aluw. 17:11; 1 Tim. 4:15, TNM). Wekirajaainjatü anain süpüshuaʼa tü pütchi jeketkat jee waʼwanaajireʼerüinjatü sümaa tü wanoujapuʼukalü anain paala. Waaʼinrüle tia, kojuteerü maʼin wamüin tia pütchikat. ¿Kasa anasü weʼreetka müleka waaʼinrüle tia?

17, 18. ¿Kasa nükaaliinjaka anain waya chi naaʼinkai Maleiwa?

¹⁷ Naashin Jesuu, nükaaliinjeena waya chi naaʼinkai Maleiwa süpüla sotuinjatüin waaʼin tü wekirajaakalü anain suluʼujee tü Wiwüliakat (Juan 14:25, 26). ¿Jamüshii nükaaliinjeenaka waya chi naaʼinkai Maleiwa waküjapa pütchi? Wekirajaa sünain tü alatakat nümüin chi wawalakai Peter. Soʼu 1970, 19 nuuyase chia  wawalakai otta chajachi nia aʼyataain suluʼu tü Weteet chajatkat Gran Bretaña. Soʼu wanee kaʼi, oʼunüshi chi wawalakai sünain aküjaa pütchi sainküin piichi, nüntaka eemüin wanee piichi eere nujuʼitaain wanee wayuu ataralaaichi, miyoʼu nüʼliima. Müshi Peter nümüin: «¿Pütüjawee aaʼu tü sümakat tü Wiwüliakat?». Chi wayuu nüsakirakai nia wanee judío ekirajüi, ainküsü naaʼin chia wayuukai süka nikirajünüinjachin sünain tü Wiwüliakat nutuma wanee jimaʼai. Anuujeseʼe nünüiki chia ekirajüikai süpüla nuuʼulaküin naaʼin chi wawalakai: «¿Pütüjaa aaʼu jaralin tü anüikii ashajünakalü aka tü karaloʼutakat Daniel?». Nümaka Peter: «Soʼutku tia karaloʼutakat ashajünüsü süka pütchi arameo». Ponoshootosü naaʼin chi ekirajüikai sutuma nütüjaain saaʼu tia chi wawalakai. Nnojotsü nütüjaain aaʼu Peter jamakuwaʼipalüin süpüla nütüjaain saaʼu tü susoutiakat tia asakinnakalü anain nia. Nüntapa Peter nipialuʼumüin nüchajaain tü karaloʼutakat Aapiria Wayuu jee Despertad! naashajeʼeraka paala aipirua kashi süpülapünaa tia. Suluʼu tia rewiisütakat, aküjünüsü süshajünüin karaloʼutaka Daniel süka pütchi arameo (Dan. 2:4). Chi naaʼinkai Maleiwa, nüsoʼirüin waaʼin sünain wanee pütchi eekai kakaliairüin waashajeʼerüin jee kojutushaataka wamüin (Luc. 12:11, 12; 21:13-15).

¹⁸ Müleka kojutushaatale wamüin tü kasa nümaʼanajeejatkat Maleiwa, keeʼireejeerü waaʼin wachajaain sooʼomüin tü «kasa eekai laülaain» jee «kasa eekai jeketüin». Sutuma kojutuin wamüin tü kasa nikirajakalü anain waya Jeʼwaa, akooʼomüinraajeerü shia jee kettaajeena waya süpüla wekirajüin wayuu.

19. ¿Jamüsü kojutuinjatka wamüin tü kasa nikirajakalü anain waya Jeʼwaa?

¹⁹ Satanaa otta na wayuu nuluwataakana aaʼu, meemeraainsalii naya süpüla mojutuinjatüin wamüin süpüshuaʼa tü kasairua nikirajakalü anain waya Jeʼwaa. Nnojorüle eejüin waaʼin, eesü süpüla kachiiruain waaʼin washirüinjanain waya, wainmain korolo wamaʼana jee aʼwaatawaa suluʼu wawashirüin. Naashin Juan, yüüʼülaa meerü soʼuweena wanee kaʼi tü nakuwaʼipakat na manoujainsaliikana sümaa tü kasa mojusü keeʼireekat naaʼin (1 Juan 2:15-17). Müshiijeseʼe ayatüinjanain waya ichein süchiirua kojutuin wamüin tü kasa nümaʼanajeejatkat Jeʼwaa.

20. ¿Kasa paaʼinrüinjatka süpüla kojutuin pümüin tü kasa nümaʼanajeejatkat Maleiwa?

²⁰ Eere wanee kasa ashakajaka atuma sujutu tü Nuluwataayakat Maleiwa pümüin, piyoutamaata shia. Ayataʼaya püküjain pütchi otta ayata kojutuin shia pümüin. Püchajaa waneepia tü kasairua anashaatasü eekat suluʼu tü Wiwüliakat. Müle sukuwaʼipa watuma, wainmeerü kasa anasü wanaajaaka chaa iipünaa, eere nnojoleerüin sürütkaain kaʼruwarat sünain jee sheʼe mma. Anuu nünüiki Jesuu: «Shieerü jülüjaka paaʼin waneepia tü kasa kojutukat maʼin pümüin» (Luc. 12:33, 34, TNM).