Erlinnartuutit anersaakkut ittut noqqaassutigikkit
‘Uummatissi erlinnartuutisi najortuartarpaat.’ – LUK 12:34.
1, 2. (a) Erlinnartuutit Jehovameersut pingasut suuppat? (b) Allaaserisami matumani suut sammissavavut?
JEHOVA qilammi nunarsuarmilu pisuujunerpaavoq. Taassuma suut tamaasa pigai. (1 Nal 29:11, 12) Kikkunnulli tamanut tunisiumatungaarpoq. Erlinnartuuterpassuarnik anersaakkut ittunik avitseqatigisimammatigut qujamasungaarpugut! Erlinnartuutit taakku suugamik? Taakkua ilagaat (1) Guutip naalagaaffia, (2) oqaluussinerput, kiisalu (3) sallusuissutit erlinnangaartut taassuma oqaasianiittut. Mianersunngikkuttali erlinnartuutit taakkua qanoq pingaaruteqartiginerat puioriartuaarsinnaavarput. Taakkua pingaaruteqassusiannik imminut eqqaasittuartariaqarpugut taakkuninngalu nuannarinninnerput ineriartortittuartariaqarparput. Jiisusi ima oqarpoq: ‘Uummatissi erlinnartuutisi najortuartarpaat.’ – Luk 12:34.
2 Maanna misissoriartigu qanoq ililluta Guutip naalagaaffianik, oqaluussinermik sallusuissummillu nuannarinnittuarlutalu pingaartitsiuarsinnaasugut. Taamaaliornitsinni eqqarsaatigiuk illit nammineq erlinnartuutinik anersaakkut ittunik qanoq ilillutit nuannarinninnerulersinnaasutit.
GUUTIP NAALAGAAFFIA SAPANNGARISSUTUT IPPOQ
3. Jiisusip assersuusiaani angut sapanngarissumik ataatsimik pisiumalluni sunissamut piumassuseqarpa? (Allaaserisap aallaqqaataani assiliaq takuuk).
3 Matthæusi 13:45, 46 atuakkit. Jiisusip assersuusiaani niuertoq sapanngarissorsiorpoq. Ullut ilaanni sapanngarissumik sapanngarissunit takunikuusaminit allanit tamanit naleqarnerusumik nassaarpoq. Angutip sapanngarissoq taanna ima perusutsigigamiuk pisiarisinnaajumallugu pigisani tamaasa tunivai. Takorloorsinnaaviuk sapanngarissoq taanna qanoq nuannaarutigitigigaa?
4. Guutip naalagaaffia pillugu sunissamut piumassuseqarpugut?
4 Jiisusip assersuusiaa sumik ilinniarfigisinnaavarput? Guutip naalagaaffia pillugu sallusuissut sapanngarissutut ippoq. Guutip naalagaaffia angutip sapanngarissumik nuannarinninneratulli nuannarigutsigu, Guutip naalagaaffiani innuttaalerumalluta innuttaajuarumallutalu tamanik isumakkeerinissamut piumassuseqassaagut. (Markusi 10:28-30 atuakkit). Inuit marluk qanoq taamaaliorsimanersut misissoriartigu.
5. Zakæusi Guutip naalagaaffia pillugu sunissaminut piumassuseqarpa?
5 Zakæusi ilanngaaserisuuvoq. Inunnik pinngitsaaliilluni akiliisitsiniaasarnermigut pisoorsuanngorsimavoq. (Luk 19:1-9) Ullulli ilaanni Zakæusip tusaalerpaa Jiisusi Guutip naalagaaffianik eqqartuisoq. Tusakkani nuannaringaaramigit allanngorluinnarusulerpoq. Ima oqarpoq: “Naalagaq, pigisama affaat piitsunut tunniutissavakka, pinngitsaaliinikkullu aningaasanik pissarsisimaguma sisamariaammik taarsiissaanga.” Zakæusi aningaasanik inunnit arsaarinnissutiginikuusaminik utertitsivoq piumatujunnaarlunilu.
6. Arnaq qanoq allannguisimava, aamma sooq allannguiva?
6 Arnaq ukiualuit matuma siorna Guutip naalagaaffia pillugu tusagaqarami arnaqatiminik inooqateqarpoq. Aamma kattuffimmi arnaqatiminnik anguteqatiminnillu atoqateqartartut pisinnaatitaaffiinik illersuiffiusumi siulittaasuuvoq. Biibilimilli misissuinerujartortilluni Guutillu naalagaaffiata qanoq erlinnartigineranik paasisaqarnerujartuinnartilluni paasilerpaa inuunermini allannguerujussuartariaqarluni. (1 Kor 6:9, 10) Jehova asagamiuk kattuffimmi ilaasortaajunnaarpoq inooqatinilu arnaq qimallugu. 2009-mi kuisippoq, aappaaguanilu pionerinngorpoq. Taamatut allannguerujussuarpoq Jehovamik asanninnera kissaatipiluinit sakkortunerummat. – Mark 12:29, 30.
7. Qanoq ililluta Guutip naalagaaffianik nuannarinningaartuarsinnaavugut?
7 Amerlavugut Guutip naalagaaffiani innuttaalersinnaajumalluta inuunitsinnik allannguerujussuartariaqarsimasut. (Rom 12:2) Sulili akiuuppugut Guutip naalagaaffianik nuannarinninnerput suugaluartunilluunniit, soorlu pigisaleritunermit kinguaassiuutitigulluunniit pilerissusipilunnit, sanngiillisinneqaqqunagu. (Uss 4:23; Matt 5:27-29) Guutip naalagaaffianik nuannarinningaartuarnissamut iluaqutissatut Jehovap erlinnartuummik naleqangaartumik allamik tunivaatigut.
OQALUUSSINERPUT ANNAANNEQAATAASINNAAVOQ
8. (a) Sooq apustilip Paulusip kiffartornerput ‘erlinnartuutitut immersakkani marraasuniittutut’ allaatigaa? (b) Paulusip oqaluussinermik nuannarinningaarnini qanoq ersersippaa?
8 Jiisusip Guutip naalagaaffia pillugu Matt 28:19, 20) Apustilip Paulusip oqaluussineq allaatigaa erlinnartuutitut immersakkani, imaluunniit qummuattani, marraasuniittutut. (2 Kor 4:7; 1 Tim 1:12) Naammalluinnanngitsuugatta qummuattatut marraasutut taakkunatut ippugut. Oqaluussissutigisarpulli erlinnartuutitut naleqangaartutut ippoq naassaanngitsumik inuuneqalissutigisinnaagatsigu allallu tamatuminnga tusarnaartut naassaanngitsumik inuuneqalissutigisinnaagamikku. Taamaattuminguna Paulusi ima allattoq: ‘Tamakkuninnga tamanik iliuuseqarpunga iivangkiiliu pillugu taassuminnga pissarseqataajumallunga.’ (1 Kor 9:23) Paulusi allat Guutip naalagaaffia pillugu ilinniartinniarlugit ilungersorpoq. (Romamiut 1:14, 15; 2 Timotheusi 4:2 atuakkit). Nutaarsiassamik nuannersumik nuannarinninnini sakkortuumik malersugaagaluarluni oqaluussiuarnissaminut iluaqutigaa. (1 Th 2:2) Paulusip oqaluussinermik nuannarinninneranik qanoq ilaarsisinnaavugut?
nutaarsiassamik nuannersumik oqaluussissutiginninnissaq tamannalu pillugu ilinniartitsinissaq uagutsinnut suliassiissutigai. (9. Sutigut ersersissinnaavarput oqaluussineq nuannaralugu?
9 Paulusip oqaluussinermik nuannarinninnerminik ersersitseriaasiisa ilagaat allanik oqaloqateqarnissamut periarfissanik tamanik atorluaasarnera. Paulusip kristumiullu siulliit pisimanerattut uaguttaaq illumiit illumut, kikkut tamarmik takkuanni inunnillu naapitsiffigisinnaasatsinni sumiluunniit nutaarsiassaq nuannersoq oqaluussissutigisarparput. (ApS 5:42; 20:20) Inuit sapinngisamik amerlanerpaat angujumallugit assigiinngitsunik oqaluusseriaasissarsiortarpugut. Pisinnaagutta immaqa ikiorti-pioneritut pioneritulluunniit kiffartorsinnaavugut. Immaqaluunniit oqaatsinik allanik ilinniarsinnaavugut, imaluunniit nunagisatsinni sumiiffimmut allamut, allaallu nunamut allamut, nuussinnaavugut. – ApS 16:9, 10.
10. Irenep nutaarsiassaq nuannersoq oqaluussissutiginiarlugu ilungersornini qanoq pilluaqquneqaatigaa?
10 Irenep, qatanngutip arnap aappaqanngitsup USA-miittup, nutaarsiassaq nuannersoq inunnut russisut oqaluttunut oqaluussissutigerusuppaa. Taamaammat 1993-imi oqaluussisartoqatigiinnut russisut oqaluttunut New Yorkimiittunut ilannguppoq. Taamanikkut oqaluussisartoqatigiinni taakkunaniittut 20-t missaannaanniipput. Ukiut 20-t tamatuma kingorna Irene russisut suli oqallorissinikuunnginnerarpoq. Taamaakkaluartorli Jehovap taanna oqaluussisartullu allat russisut oqaluussinissaannut ikiorpai. Tamatuma kingunerisaanik New Yorkimi russisut oqaluttut ilagiivi arfiniliupput. Irene Biibilimik atuaqqissaaqatigisartagarpassuaqarpoq, taakkualu ilaat 15-it kuisipput. Taakkua ilaat Betelimi suleqataasutut, pioneritut utoqqaanertatullu kiffartorput. Irene ima oqarpoq: “Anguniagarisimasinnaasakka allat eqqarsaatigigaangakkit takorloorsinnaanngilara allamik nuannaarutiginerusaqarsinnaallunga.” Irenep oqaluussisarnini ilumut inuunermini pingaartingaarpaa!
Oqaluussisinnaanerit pingaartingaarpiuk, sapaatillu-akunneri tamaasa piffissaqarfigisarnissaanut pilersaaruteqarpit? (Immikkoortut 11 aamma 12 takukkit)
11. Malersorneqaraluarluta oqaluussiuarnerput qanoq kinguneqartarpa?
11 Oqaluussineq pingaartingaarutsigu apustili Paulusi ilaarlugu malersugaagaluarluta oqaluussiuassaagut. (ApS 14:19-22) Assersuutigalugu 1930-kkunni 1940-kkullu aallartinneranni qatanngutivut USA-miittut sakkortuumik malersugaapput. Oqaluussiuarpulli. Oqartussaasunit unitsinniarneqaraluarlutik qatanngutivut eqqartuussisutigoortitsipput ajugaasaqattaarlutillu. 1943-mi qatanngutip Knorrip USA-mi eqqartuussiviit qullersaanni ajugaasimanerput eqqaavaa. Oqarpoq qatanngutit oqaluussiuarsimanngitsuuppata eqqartuussivik taanna aqqutigalugu suliassanngortitsisussaqartoqarnavianngikkaluartoq. Nangilluni oqarpoq qatanngutit nunarsuaq tamakkerlugu oqaluussiuarnermikkut uppernarsaraat imminnik malersuisut iluatsinnavianngitsut. Qatanngutit nunani allaniittuttaaq assingusunik eqqartuussivinnut suliassanngortitsinerminni ajugaasimapput. Aap, oqaluussineq nuannaringaaratsigu malersorneqaraluarluta oqaluussiuarusuppugut.
12. Sunissat aalajangiusimaviuk?
12 Oqaluussinitsinnik pingaartitsingaarutta oqaluussinermi nalunaaquttap-akunnerinik qassinik atuisimanerput kisiat eqqarsaatiginavianngilarput. Sapinngisarput tamaat atorlugu ‘nutaarsiassamik nuannersumik peqqissaartumik nalunaajaatiginnissaagut’. (ApS 20:24, NW; 2 Tim 4:5) Allanulli ilinniartitsissutigisassarput suugami? Erlinnartuut Guutimeersoq alla sammeriartigu.
SALLUSUISSUTIT ERLINNANGAARTUT PAASISIMASAVUT
13, 14. ‘Qui’ Jiisusip Matthæusi 13:52-imi innersuussutigisaa sumut assersuutaava, qanorlu immersorsinnaavarput?
13 Erlinnartuutit Jehovameersut pingajoraat sallusuissutit paasisimasavut tamarmik. Jehova sallusuissutit pilerfigaat. (Joh 17:17; Tit 1:2) Ataataagamilu tukkortoq sallusuissutinik taakkuninnga avitseqatigerusuppaatigut. Maannamut taakkua ilarpassui paasisimavavut taassuma oqaasianik Biibililersaarutinillu atuaqqissaartarnitsigut, ataatsimeersuaqataasarnitsigut sapaatillu-akunneri tamaasa ataatsimiigiartarnitsigut. Sallusuissutit paasisavut amerlatsikkiartuinnartillugit Jiisusip oqarneratut ‘queqalissaagut’ sallusuissutinik “nutaanik pisoqqanillu” imalinnik. (Matthæusi 13:52 atuaruk). Erlinnartuutinik isertukkanik ujaasisoqartarneratut sallusuissutinik ujaasisarutta Jehovap ‘quitsinnik’ immersuinissamut ikiorumaarpaatigut. (Ussatit 2:4-7 atuakkit). Qanoq ililluta sallusuissutinik ujaasisinnaavugut?
14 Biibili Biibililersaarutillu atuaqqissaartuartariaqarpavut misissueqqissaartariaqarlutalu. Tamanna sallusuissutinik ‘nutaanik’, tassa siornatigut paasisimanngisatsinnik, nassaarnissamut iluaqutigissavarput. (Jos 1:8, 9; Tuss 1:2, 3) Napasuliaq Alapernaarsuiffik-mi saqqummersumi siullermi, 1879-imi juulimi naqiterneqartumi, sallusuissut naasuaqqamut naasupiluppassuit akornanniittumut assersuunneqarpoq. Naasoq taanna nanissagaanni peqqissaartumik ujaasinissaq pisariaqarpoq. Nanigaannilu ataasiinnaq naammagiinnarnagu naasunik suli amerlanerusunik ujaasiuarnissaq pisariaqarpoq. Tamatumunnga assingusumik uagut sallusuissummik ataasiinnarmik ‘nassaarnerput’ naammagiinnassanngilarput. Sallusuissutinik suli amerlanerusunik ujaasinissamut pilerisariaqarpugut.
15. Sooq sallusuissutit ilaat ‘pisoqqanik’ taaneqarsinnaappat, sallusuissullu sorleq illit nuannarinerpaaviuk?
15 Biibilimik atuaqqissaartaleratta sallusuissutinik nuanningaartunik paasisaqarpugut. Taakku ‘pisoqqanik’ taaneqarsinnaapput sallusuissutit paasisatta siullersarimmatigit. Sallusuissutit taakkua ilaat suuppat? Siullermik paasivarput Jehova Pinngortitsisigigipput inunnullu siunertaqartoq. Aamma paasivarput Guutip ernini nunarsuarmut aallartikkaa utertitsissutitut pilliutigalugu uagut ajortimit toqumillu annaanneqarsinnaaniassagatta. Paasivarputtaaq Guutip naalagaaffia naalliuutinik tamanik piuneerutitsiumaartoq nunarsuarmilu eqqissilluta pilluarlutalu naassaanngitsumik inuusinnaasugut. – Joh 3:16; Saqq 4:11; 21:3, 4.
16. Sallusuissutinik Biibilimiittunik paasinnittaatsitsinnut naqqiissuteqartoqaraangat susariaqarpugut?
16 Ilaannikkut siulittuummik allassimaffimmilluunniit Biibilimiittumik paasinnittaatsitsinnut naqqiissuteqartoqartarpoq. Taamatut pisoqaraangat pingaaruteqarpoq naqqiissutigineqartunik eqqissilluni atuaqqissaarnissaq eqqarsaatiginneqqissaarnissarlu. (ApS 17:11; 1 Tim 4:15) Paasinnittaatsit pisoqqat nutaallu assigiinngissutaannik paasinnittariaqaannanngilagut, aammali paasinnittaatsip nutaap annikitsualuttortai eqqumaffigisariaqarpavut. Taamatut peqqissaartumik misissuisarutta taakkua sallusuissutinik Biibilimeersunik katersugaatitsinnut ilanngutitinnissaat qulakkiissavarput. Sooq taamatut iliuuseqarnerput imminut akilersinnaava?
17, 18. Anersaaq illernartoq qanoq iluaqutigisinnaavarput?
17 Jiisusip ilinniartippaatigut Guutip anersaava iluaqutigalugu siornatigut ilinniarsimasatsinnik eqqaasaqarsinnaasugut. (Joh 14:25, 26) Tamanna nutaarsiassamik nuannersumik oqaluussissutiginninnitsinni qanoq iluaqutigisinnaavarput? Qatanngutip Peterimik atillip misigisimasaa eqqarsaatigeriaruk. 1970-imi 19-inik ukioqarluni Tuluit Nunaanni Betelimi kiffartuleqqammerpoq. Peterip illumiit illumut oqaluussitilluni angut utoqqasaaq umilik naapippaa. Aperaa Biibilimik paasinnikkusunnersoq. Angut taanna rabbineriuvoq juuteq, taassumalu uissuummissutigeqaa angutip inuusuttup Biibilimik ilinniartissinnaasorimmani. Rabbinerip Peter misilinniarlugu ima aperaa: “Uumaangaa, Danielip allagai oqaatsit sorliit atorlugit allanneqarpat?” Peter ima akivoq: “Ilaa aramæerisut allagaavoq.” Imalu eqqaamasalikkersaarpoq: “Rabbineri tupaallappoq apeqqutaa akigakku – kisianni uattulli tupaallatsiginngilaq! Qanoq ilillunga akissut nalunnginnakku? Angerlarama Napasuliaq Alapernaarsuiffik aamma Iteritsi! qaammammi siuliani saqqummersut alakkarlugit paasivara Danielip allagaasa aramæerisut allanneqarsimaneranut tunngasumik allaaserisaqartoq.” (Dan 2:4) Aap, anersaaq illernartoq paasissutissanik atuarsimasatsinnik siornatigullu ‘quitsinnut’ immiussimasatsinnik eqqaasaqaqqinnissamut iluaqutigisinnaavarput. – Luk 12:11, 12; 21:13-15.
18 Sallusuissutit Jehovamit paasisavut qamannga pisumik nuannarigutsigit qujamasuutigigutsigillu ‘querput’ taama ittunik immersortuarusussavarput. Immersuinerujartortilluta allanik ilinniartitsinissamut piareersimasutut misiginerujartuinnassaagut.
ERLINNARTUUTITIT PAAREQQISSAAKKIT
19. Sooq erlinnartuutivut paareqqissaartariaqarpavut?
19 Allaaserisami matumani paasivarput erlinnartuutitsinnik anersaakkut ittunik pingaartitsinissarput qanoq pingaaruteqartigisoq. Mianersortariaqarpugulli Saatanimit silarsuaanillu sunnerneqaqqunata erlinnartuutinik taakkuninnga nuannarinnippiarunnaarutigisatsinnik. Mianersunngikkutta akissaatigissumik suliffittaarnissamut periarfissat piisaarluniluunniit inoorusunneq pigisanilluunniit usorsitsaaruteqarumaneq allamut saasaatigisinnaavavut. Apustilip Johannesip eqqaasippaatigut silarsuaq manna tamatumalu neqeroorutigisinnaasai peerutingajalersut. (1 Joh 2:15-17) Taamaattumik erlinnartuutit anersaakkut ittut qujamasuutigiuartariaqarpavut paareqqissaartariaqarlugillu.
20. Erlinnartuutitit anersaakkut ittut paareqqissaarumallugit sunissat aalajangiusimaviuk?
20 Guutip naalagaaffianik nuannarinnippiarunnaassutigisinnaasannik taamaatitserusussuseqarit. Aallussilluarlutit oqaluussinissat aalajangiusimajuk, oqaluussinerlu nuannaarutigiunnaanngisaannaruk. Sallusuissutinik Biibilimiittunik ujaasiuarit. Taamaalioruit katersisinnaavutit “qilanni erlinnartuutinik nungussanngitsunik, tillinniat inugaannik qillaalaallu aserussanngisaannik. Uummatissimi erlinnartuutisi najortuartarpaat.” – Luk 12:33, 34.