JIHOVA, muéne o Muthu uala ni umvuama uoso. Ima ioso ia mu tokala muene. (1 Malunda 29:11, 12) Maji Jihova mukua kubhana. Tu sakidila kiavulu mukonda, muene u tu bhana o ima ioso i tua bhindamena! Iebhi o ima iii? O ima íii, ia lungu ni (1) Utuminu ua Nzambi, (2) o ukunji uetu, ni (3) milongi i tu sanga mu Bibidia. Maji se ki tu di lange, tu tena kujimba o valolo ia ima iii. Tua tokala ku di lembalala jinga o valolo ia ima iii, ni kusuluka mu ku i zola. Mukonda diahi? Mukonda Jezú uambe: “Kuoso kua mi kala o jimbongo, kuene ue ku mi kala o muxima.”—Luka 12:34.

1, 2. (a) Ima iebhi i tua tambula kua Jihova? (b) Ihi i tua-nda di longa mu milongi iii?

² Tua-nda di longa kiebhi ki tu tena kusuluka mu kuzola, ni kulondekesa o kisakidilu kietu kua Nzambi mu ku tu bhana o Utuminu, o ukunji, ni mu ku tu bhana ue o milongi ia Bibidia. Kioso ki tuia ni kubhanga kiki, tu xinganeke kiebhi ki tu tena kuzola dingi o maujitu iâ.

3. Ihi ia bhange o diiala dia musoso ua Jezú phala kusumba o phélula? (Tala o foto ia dianga.)

³ Tanga Matesu 13:45, 46. Jezú ua tele musoso ua lungu ni diiala, ua kexile ni ufunu ua kusumba o jiphélula, ni ku ji sumbisa dingi. Sai kizuua, muene ua bongo phélula ia kexile ni valolo ia dikota, o ja bongele m’ukulu ndenge. O diiala ua mesenene kiavulu o phélula ienióio, mukonda dia kiki ua sumbisa o imbamba ioso phala ku i sumba. O phélula ienióio, ia kexile ni valolo iavulu phala muene.

4. Ihi i tua-ndala kubhanga mukonda dia Utuminu ua Nzambi?

⁴ Ihi i tu tena ku di longa ku musoso iú ua Jezú? O kidi kia lungu ni Utuminu ua Nzambi, kiala ni valolo iavulu. O diiala dienhódio ua bhanene valolo iavulu ku phélula. Se tu zola ue o Utuminu ua Nzambi, tua-nda bhanga ioso, phala kukolokota mu ku u zokela. (Tanga Marku 10:28-30.) Tua-nda mona phangu ia athu aiiadi a bhange kiki.

5. Ihi ia bhange Zakeu kioso kiévu ia lungu ni Utuminu ua Nzambi?

⁵ Zakeu uexile mukua kutambula lubhaku. Muene ua kituka mvuama mu kunhana o kitadi kia athu. (Luka 19:1-9) Maji, sai kizuua Zakeu uévu Jezú kuzuela ia lungu ni Utuminu ua Nzambi. O ima ia zuela Jezú ia tula ku muxima ua Zakeu, mukonda dia kiki ua mesenene kulungulula o ukexilu ua muenhu uê. Muene uambe: “Ngana, kaxaxe ka jimbongo jami, ngi ka bhana jingadiama. Se bhuala muthu nga mu-di mangonha, mu ku bhana o lubhaku, ngi mu fute-kiu mu luuana.” Zakeu ua vutuila o kitadi kia tambuile ku athu, anga ua tula o luímbi.

6. Kiebhi muhatu kia lungulula o ukexilu uê, ni mukonda diahi ua bhange kiki?

⁶ Mivu ku dima, sai muhatu ande dia kuívua o njimbu ia Utuminu, ua sakanene muhatu ni mukuâ. Muene uexile ue mutuameni ua kisangela ki zokela o ufôlo ua maiala a sakana maiala ni akuâ. Maji, kioso kia di longo ia lungu ni valolo ia Utuminu ua Nzambi, muene ua mono kuila, ua tokalele kulungulula o ukexilu ua muenhu uê. (1 Kolindo 6:9, 10) Mukonda dia henda iê kua Jihova, ua xisa o kisangela, iu ua batula o ukamba ni muhatu’a tungile nê kumoxi. Muene a mu batizala ku muvu ua 2009. Mu kubhita muvu umoxi ua mateka kusidivila kala muboki ua thembu ioso. Muene ua lungulula o muenhu uê, mukonda o henda iê kua Jihova ia betele-o-kota, o jihânji jê jaiibha, ndenge.—Marku 12:29, 30.

7. Ihi i tua tokala kubhanga phala kusuluka mu kuzola o Utuminu ua Nzambi?

⁷ Sai jiphange javulu a lungulula o ukexilu ua muenhu uâ, phala kuzokela o Utuminu ua Nzambi. (Loma 12:2) Maji o ita ietu ki ia bhu luua. Ki tu tokala kuehela kima kioso-kioso ku tu bhangesa kuzoza mu kuzola o Utuminu, kála o jihânji ja kukala ni jimbongo javulu, mba o jihânji ja xitu. (Jisabhu 4:23; Matesu 5:27-29) Phala ku tu suinisa kuzola o Utuminu ua Nzambi, Jihova ua tu bhana kima kiéngi kiala ni valolo iavulu.

8. (a) Mukonda diahi poxolo Phaulu ua sokesa o ukunji uetu ni ujitu ua valolo uala mu ‘kitutu kia mavu?’ (b) Kiebhi Phaulu kia londekesa kuila ua zolele o ukunji uê?

⁸ Jezú ua tu bhana o kikalakalu kia kuboka ni kulonga o njimbu iambote ia lungu ni Utuminu ua Nzambi. (Matesu 28:19, 20) Poxolo Phaulu ua sokesa o kikalakalu kiki, ni ujitu ua valolo uala mu kitutu kia mavu. (2 Kolindo 4:7; 1 Timote 1:12) Kuma tu akua ituxi, tuala kála tu kitutu kia mavu. Maji, o njimbu i tu tudila o athu, iala ni valolo iavulu kála o jiphélula mukonda i tu bhangesa kukala ni kidielelu kia muenhu ua kalelaku. O njimbu i bhana ue kidielelu ku athu a tuívua. Mukonda dia kiki, poxolo Phaulu ua boko o njimbu iii, mu maukexilu avulu. Muene uambe: “Ima ioso iii ngi i bhanga mukonda dia Njimbu Iambote, phala ngi tambule ku mbote iê kumoxi ni akuetu.” (1 Kolindo 9:23) Phaulu ua kalakala ni nguzu ioso, phala kubokela akuâ ia lungu ni Utuminu ua Nzambi. (Tanga Loma 1:14, 15; 2 Timote 4:2.) Sumbala ni izukutisu, poxolo Phaulu ua kolokotele mu kuboka o njimbu iambote. Muene ua bhange kiki mukonda, ua zolele o njimbu iii. (1 Tesalonika 2:2) Kiebhi ki tu tena kuzola o sidivisu ia kuboka kála kia zolele poxolo Phaulu?

9. Mu maukexilu ebhi u tu tena kulondekesa kuila, tua zolo o sidivisu ia kuboka?

⁹ Phaulu ua londekesa kuila, ua zolele o ukunji uê, mu kuzuela ni athu kabasa kithangana. Tu londekesa kuila, tua zolo o ukunji uetu, kála poxolo Phaulu ni Jikidistá ja dianga, mu kuboka nzo ni inzo, mu ididi muene mu di bhongolola athu avulu, ni mu kuzuela nau kabasa kididi. (Ikalakalu 5:42; 20:20) Tu bhanga ioso ni ioso, phala kubokela athu avulu. Tu tena kusidivila kala aboki a ithangana ni ithangana, mba aboki a thembu ioso. Nange tu tena ku di longa dimi diéngi, kuia ku mbanza iengi, mba kutunga mu ixi iengi, phala kuboka o njimbu iambote.—Ikalakalu 16:9, 10.

10. Mbote jebhi ja katula Irene mukonda dia kuboka ni nguzu ioso?

¹⁰ Sai phange ia muhatu mu ixi ia Estados Unidos, a mu ixana Irene, ua mesenene kuboka o njimbu iambote ku athu a zuela o dimi dia Russo. Mu kiki, ku muvu ua 1993, muene ua mateka kusidivila mu kibuka kia dimi dia Russo, mu mbanza ia Nova York. Mu kithangana kieniókio, mu kibuka kuexile ngó 20 a aboki. Kioso kia bhiti 20 a mivu, Irene uambe: “Ki ngejiia luua kiambote o dimi dia Russo.” Né kiki, Jihova uene mu mu kuatekesa kubokela o athu mu dimi dienhidi. Mukonda dia kiki, lelu kuene ilunga isamanu mu dimi dia Russo mu mbanza ia Nova York. Irene ua longo o kidi kia Bibidia ku athu avulu. Muene ua kuatekesa 15 kia athu ku di batizala kala Jimbangi ja  Jihova. Sai iá, a mu sidivila ku Betele, a mukuá a mu sidivila kala aboki a thembu ioso, a mukuá kala tufunga. Irene uambe: “Kuboka ni kusuina kuoso kua ngi bhekela kisangusangu kionéne, o kusuua kima kiengi, ndenge.” Mu kidi, Irene u bhana valolo ku ukunji uê.

11. Ihi i tu tambula kioso ki tu kolokota mu kuboka né muene ni izukutisu?

¹¹ Poxolo Phaulu ua suluka mu kuboka o njimbu iambote né muene ni izukutisu. Se tu bhana valolo ku ukunji uetu, tua-nda kaiela o phangu iê. (Ikalakalu 14:19-22) Mu kifika, ku mivu ia 1930 ndu 1944, o jiphange jetu mu ixi ia Estados Unidos a kexile mu a zukutisa kiavulu. Maji né kiki, ene a sulukile mu kuboka. Kioso o jinguvulu kia fidisa o kuboka, o jiphange aile mu jinzo ja kufundisa. Ene a a lungisa mu jinzo jenhojo. Ku muvu ua 1943, Phange Knorr ua zuela ia lungu ni kikoué ki tua tambula mu inzo ia kufundisa ia beta-o-kota ia ixi ia Estados Unidos. Muene uambe kuila, ki kueji kala maka ni Jinzo ja Kufundisa se o jiphange ka kolokotele mu kuboka. Muene uambe dingi kuila, o jiphange ku mundu uoso a kolokota, ene mu londekesa kuila, o izukutisu ki iene mu tu fidisa kuboka. Sai Jiphange mu jixi ja mukuá, jene mua lungisa ue mu jinzo ja kufundisa. Se tu zola o ukunji uetu, ki tua-nda kuehela o izukutisu ku tu fidisa kuboka o njimbu iambote.

12. Ihi i tua mesena kubhanga ia lungu ni ukunji uetu?

¹² Se tu bhana valolo ku ukunji uetu, ki tua-nda banza kiavulu mu jiola ji tua tokala kubhana ku disukilu dia mbeji. Mu veji dia kiki, tua-nda bhanga ioso i tu tena phala “kubhana umbangi ua Njimbu Iambote.” (Ikalakalu 20:24; 2 Timote 4:5) Maji ihi i tua-nda bhanga phala kulonga akuetu? Tu di longe o ujitu ua mukuá ua tu bhana Nzambi.

13. Ihi ilombolola o “dilundilu” dia tumbula Jezú mu divulu dia Matesu 13:52?

¹³ O ujitu ua mukuá ua tu bhana Jihova, o  milongi i tuene mu tambula bhu kaxi ka Bibidia. Jihova muéne o Mubhani ua milongi iii. (2 Samuuele 7:28; Jisálamu 31:5) Kuma Tat’etu, uala ni ukexilu ua kubhana, muene ua mesena kuila, tu bokela ue akuetu. Tundé ukulu, tuene mu di longa o milongi iii mu Maka mê, mu madivulu metu, mu iônge ia makota, mu iônge ia ilunga, ni mu iônge ia semana joso. Kioso ki tuia ni kuijiia dingi ia lungu ni milongi iii, tua-nda kala ni “dilundilu [dia] ima ióbhe ni iókulu,” kála kiambe Jezú. (Tanga Matesu 13:52.) Se tu tokuesa o milongi ni vondadi ioso, kála kia kusota jimbongo j’osueke, Jihova ua-nda tu kuatekesa kuizalesa o “dilundilu” dietu. (Tanga Jisabhu 2:4-7.) Kiebhi ki tu bhanga kiki?

14. Kiebhi ki tu tena kuizalesa o dilundilu dietu?

¹⁴ Etu tua tokala ku di longa o Bibidia ni madivulu metu ithangana ioso, ni kutokuesa kiambote o milongi. Kiki, kia-nda tu kuatekesa kuijiia “ima ióbhe,” ki tu ijiidile m’ukulu. (Josuué 1:8, 9; Jisálamu 1:2, 3) O Mulangidi ua dianga ua mbeji ia Kavua ua 1879, ua sokesa o kidi ni kithulu kiósueke mu’axaxi ka minha. Phala kusanga kithulu, o muthu ua tokala ku ki sota ni muanhu uoso. O muthu kioso kia ki sanga, muene ka tokala kuimana ni kusanguluka mukonda dia kithulu kimoxi. Muene ua tokala kusuluka mu kusota, phala kusanga ithulu ia ka mukuá. Kiene ue kimoxi n’etu, ki tu tokala kusanguluka mukonda dia kutendela milongi imoxi ngó. Tua tokala kusuluka mu kutokuesa ni kutendela milongi iengi ia ubhe.

15. Mukonda diahi tuamba kuila sai milongi “iókulu”? Ni iebhi i ua zolo dingi?

¹⁵ Kioso ki tua mateka ku di longa o Bibidia, a tu longo milongi iavulu. Tu tena kuzela kuila o milongi iii, milongi “iókulu,” mukonda iene ia tu longo ku dimatekenu. O milongi iii ia lungu ni ihi? Ku dimatekenu, a tu longo kuila Jihova muéne o Mubhangi uetu, muene ua mesena ue kubhana o muenhu ua kalelaku ku athu. A tu longo ue kuila, Nzambi ua tumikisa Mon’ê mu ixi phala kufua ni ku tu kula, phala tu bhuluke ku ituxi ni kalunga. A tu longo ue kuila, o Utuminu ua Nzambi ua-nda zubha o hadi ioso ni kuila, tu tena kukala ni muenhu ua kalelaku mu ixi ni kuzediua, ni kutululuka kua kidi.—Nzuá 3:16; Dijingunuinu 4:11; 21:3, 4.

16. Ihi i tua tokala kubhanga kioso kia lungulula o ukexilu uetu ua kutendela o milongi ia Bibidia?

¹⁶ Sai ithangana, a lungulula o ukexilu uetu ua kutendela o kikanenu kia Bibidia mba velusu imoxi. Kioso kia u lungulula, kima kiambote kukatula kithangana kia soko phala kutendela kiambote o milongi ia ubhe, ni ku i xinganeka ue. (Ikalakalu 17:11; 1 Timote 4:15) Ki tu tokala ngó kuijiia o ima ia lunguluka, maji tua tokala ue kutendela o mbote i tu tena kukatula ku milongi ia ubhe. O kudilonga mu ukexilu iú, kua-nda tu bhangesa kubhaka ku muxima uetu o milongi ia ubhe. Mukonda diahi kima kiambote ku di longa o milongi ia ubhe mu ukexilu iú?

17, 18. Kiebhi o nzumbi ikôla i tena ku tu kuatekesa?

¹⁷ Jezú uambe kuila, o nzumbi ikôla i tena ku tu kuatekesa kulembalala o ima i tua di longo m’ukulu. (Nzuá 14:25, 26) Kiebhi o nzumbi ikôla i tu kuatekesa kioso ki tu boka o njimbu iambote? Tala o musoso ua phang’ietu a mu ixana Phetele. Ku muvu ua 1970, muene ua kexile ni 19 dia mivu. Muene ua mateka kusidivila ku Betele ia Grã-Bretanha. Sai kizuua, Phetele ua kexile mu boka nzo ni inzo, hé ua phuphu ku dibhitu  dia muadiakimi ua kexile ni muezu uavulu. Muene uebhula muadiakimi se ua mesenene kutendela o Bibidia. O mukua dibhata uexile mulongexi ua ngeleja ia Jijudé. O muadiakimi ua diuanene kiavulu, mu kumona munzangala ua mesenene ku mu longa o Bibidia. Phala kulola Phetele, muene ua mu ebhuidisa: “Ngi tangele, o divulu dia Daniiele a di soneka mu dimi diebhi?” Phetele ua tambuijila uixi: “Sai mbandu a i soneka mu dimi dia Alamaiku.” Phetele u lembalala: “O mulongexi ua diuanene kiavulu mu kumona kuila, ngejidile o kitambuijilu,maji eme nga betele mu kudiuana! Kiebhi ki ngejidile o kitambuijilu? Kioso ki nga vutuka kubhata, nga tange o Mulangidi ni Despertai! dia jimbeji ja tundu-mu, nga sange-mu milongi i nga tangele kiá, ia jimbulula kuila, o divulu dia Daniiele a di soneka muene mu dimi dia Alamaiku.” (Daniiele 2:4) Mu kidi, o nzumbi ikôla i tena ku tu kuatekesa kulembalala milongi i tua tange kiá m’ukulu, i tua bhakele ku muxima.—Luka 12:11, 12; 21:13-15.

¹⁸ Se tu zola o milongi i tu tambula kua Jihova, ni kulondekesa o kisakidilu kietu, tua-nda kala ni vondadi ia kubandekesa dingi o kuijiia mu dilundilu dietu. Kioso ki tuia ni kubhanga kiki, tua-nda divua kuila tuala polondo phala kulonga akuetu.

19. Mukonda diahi tua tokala kukolokota kubhana valolo ku maujitu a Nzambi?

¹⁹ Mu milongi iii, tua di longo kuila tua tokala kubhana valolo ku maujitu a tu bhana Nzambi. Maji tua tokala ku di langa phala ki tuehele Satanaji ni mundu uê, ku tu bhangesa kukamba kubhana valolo ku maujitu a Nzambi. Se ki tu di lange, tu tena kulanduka ni ima kala o ikanenu ia ikalakalu i tu bhangesa kunganhala kitadi kiavulu, mba luímbi lua kukala ni jimbongo javulu, mba izala mu ima ioso iene ku muenhu. O poxolo Nzuá ua tu dimuna kuila, o mundu iú, ni ima ioso iala na-iu ia mu bhita. (1 Nzuá 2:15-17) Mukonda dia kiki, tua tokala kukolokota kubhana valolo ku maujitu a tu bhana Nzambi.

20. Ihi i ua mesena kubhanga phala kukolokota kubhana valolo ku maujitu a Nzambi?

²⁰ Sota kuxisa kima kioso-kioso ki tena kuzozesa o henda ié ku Utuminu ua Nzambi. Sota kuboka ni nguzu ioso, kana kuehela kima kioso-kioso kuzozesa o ukunji ué. Kolokota kutokuesa o milongi ia Bibidia. Se u bhanga kiki, ua-nda bhaka “jimbongo ku maúlu, ji kamba kúbhua. Mukonda koko kuene ku kididi kia bhingi ki ku bhiti muíi, ki kuene ue kabamba ka kesa. Mukonda kuoso kua mi kala o jimbongo, kuene ue ku mi kala o muxima.”—Luka 12:33, 34.