1, 2. (a) Ni bindu byahi bisathu eby’obughuli ebya Yehova abirithuha? (b) Thukendi kania okuki omo mwatsi ono?

SIHALI omughuda nga Yehova. Obuli kindu ni kiwe. (1 Emyatsi y’Emigulu 29:11, 12) Aliwe Yehova akaha obuli mundu. Ka thutsemire kutsibu busana n’eribya iniabirithuha ebindu bingyi by’obunyakirimu! Ebighuma by’okwa bindu ebyo by’ebyahi? Mwamuli bino; (1) Obwami bwa Nyamuhanga, (2) omubiiri w’erithulira, (3) n’ekwenene eyiri omwa Kinywe kiwe. Aliwe thwamathendi yitheya, ithwangan’ibirirwa ngoku ebindu ebyo ni by’obughuli bunene kutsibu. Thutholere ithwabya ithunemuy’ibukya ku ni by’obughuli n’eryongera eritsemerabyo kundi ngoku Yesu anabugha, “ahali ebindu byenyu, h’emithima yenyu yasyabya nibya.”​—Luka 12:34.

² Thuthalebya nga thwanga kolhaki erighumya olhwanzo olhwa thuwithire Obwami, omubiiri w’erithulira, n’ekwenene. Thukendibya thunemukolha ekyo, ghaniraya ngoku iwe ng’iwe wanga ghumya olhwanzo olhwa wuwithire ebindu by’obughuli ebi.

3. Omulhume w’omwa lhughano lhwa Yesu mwathwamu erikolhaki nuku anga ghulha elulu? (Lebaya ekisasani ekiri okw’itsuka.)

³ Soma Matayo 13:45, 46. Yesu mwaya olhughano lhw’omulhume oyuwabya akaghulha n’erighulya esyolulu. Kiro kighuma, mwabana elulu ey’obughuli bunene kwilhaba esyosi esy’abya iniabirithalholhako. Omulhume mwanza elulu eyo yo kutsibu erihika n’okw’ighulya ebyosi aby’awithe nuku anga ghulhayo. Wanamalhangira ngoku kyabya kindu ky’obughuli bunene okw’iyo?

4. Ni kyahi ekya thutholere ithwakolha busana n’Obwami?

⁴ Omwatsi oyu akathweghesayaki? Ekwenene y’Obwami bwa Nyamuhanga yiri ng’elulu eyo. Thwamanza Obwami ng’omulhume oyo kw’anza elulu, ithukendi thwamu erileka ebindi byosi thwanamathabya omw’isi sy’Obwami. (Soma Mariko 10:28-30.) Thuthakania okwa bandu babiri, ekyo nga mubakikolha bathi.

5. Zakayo mwathwamu erikolhaki busana n’Obwami?

⁵ Zakayo abya musolesya. Mwabya mughuda omw’imya esyosente sy’abandi omwa bulibathangania. (Luka 19:1-9) Aliwe kiro kighuma, Zakayo mwowa Yesu akakania oko Bwami. Eby’owa mubyamuhambako kutsibu, amanza eribindulha engebe yiwe. Mwabugha athi: “Lebaya Mukama! Ngaha ekihande ky’ebindu byaghe oko bera, kandi namabya nalitheba mundu kw’ekindu kiwe, ngendi subulyakyo ngendo ini.” Zakayo mwasubulya esyosente esy’abya iniabirinyegha oko bandu, amatsira erithasyakolha ekyo.

6. Ni mbinduka syahi esya mukali mughuma akolha, kandi asikolha busana naki?

⁶ Omwa myaka y’ahanyuma eyi, omukali mughuma mwowa oko mwatsi w’Obwami. Abya iniabiriyingirya omwa by’erithahania mukali-okwa-mukali. Kandi iya prezidenti w’akathongole akakalhwira obughabe bw’erithahania ly’ab’olhubutho lhughuma. Aliwe abere anemwigha e Biblia n’erilhangira omughaso w’Obwami bwa Nyamuhanga, mwaminya kw’atholere iniakolha esyombinduka omwa ngebe yiwe. (1 Abanya Korinto 6:9, 10) Busana n’erianza Yehova, mwathwamu erilhua omwa kathongole ako, n’erithwa eby’erithahania n’omukali ng’iyo. Mwabatizibwa omo mwaka 2009, n’omwaka owakwamako amabya mutemburi w’omughulhu wosi. Mwathoka erikolha esyombinduka esi kundi olhwanzo lhwiwe oku Yehova lhwabya lhughumire kwilhaba esyongumbu nyibi esyo abya nasyo.​—Mariko 12:29, 30.

7. Thwang’ongera thuthi erighumya olhwanzo olhwa thuwithire Obwami?

⁷ Abangyi omw’ithwe, erithoka eribya ndulhani sy’Obwami bwa Nyamuhanga, muthwabindulha engebe yethu yosi. (Abanya Roma 12:2) Aliwe amalhwa ayo sy’alyahwa. Sithutholere thukaleka olhwanzo olhwa thuwithire Obwami bwa Nyamuhanga lhukaholhokibwa na kindu kyosi-kyosi, ng’eryanza ebindu bya kutsibu kutse eby’obutswatswa. (Emisyo  4:23; Matayo 5:27-29) Yehova abirithuha ekindi kihembo ky’obughuli ekikaghumaya olhwanzo lhwethu busana n’Obwami.

8. (a) Busana naki omukwenda Paulo mwahulha erithulira lyethu ng’omubiiri ow’akahekawa omwa malegha w’eribumba? (b) Paulo mwakangania athi kw’anzire omubiiri w’erithulira?

⁸ Yesu abirithuha olhukwamirwa lhw’erithulha n’erikangirirya engulhu mbuya y’Obwami. (Matayo 28:19, 20) Omukwenda Paulo mwakania okwa mubiiri oyu ng’obughuda obukahekawa omwa malegha w’eribumba. (2 Abanya Korinto 4:7, NW; 1 Timoteo 1:12) Kundi sithuhikene, thukasosekanibawa ng’amalegha awakolire omwa muthaka ayo. Aliwe omwatsi ogho thukathulha ni w’obughuli kundi akaha engebe y’erikotha okw’ithwe n’abakathuhulikirira. Ekyo ky’ekyaleka Paulo iniabugha athi: “Ngakolha emyatsi yosi busana n’engulhu yuwene, inathoka erisangira omo mughisa wayo.” (1 Abanya Korinto 9:23) Paulo mwakolha kutsibu omw’ikangirirya abandi oko Bwami bwa Nyamuhanga. (Soma Abanya Roma 1:14, 15; 2 Timoteo 4:2.) Busana n’erianza engulhu yuwene, mukyaleka inialholha embere erithulira nomwanabya ak’endereribwa kutsibu. (1 Abanya Tesalonika 2:2) Thwanga gherererya thuthi omuhwa wa Paulo ow’erithulira?

9. Ni byahi ebya thwanga kolha erikangania ku thwanzire omubiiri w’erithulira?

⁹ Ekighuma ky’okwa bya kanganaya ngoku Paulo abya anzire omubiiri w’erithulira, iniakakolesaya akaghisa akosi-kosi erikania n’abandi. Nga Paulo n’abandi Bakristayo ba kera, nethu thukabwira abandu okwa ngulhu yuwene nyumba okwa nyumba, ahakabya bandu bangyi, n’ahandi ahosi aho thwanga babana. (Emibiri 5:42; 20:20) Thukasondekanaya emibere yosi-yosi eyanga thuwathikya erihika okwa bandu bangyi. Thwamabya ithwangana thoka, ithwangana saba obutemburi bw’obuwathikya kutse obw’omughulhu wosi. Kutse ithwangan’igha owundi mubughe, erighenda omwa bundi bulhambu, kutse nibya erighenda omwa kindi kihugho.​—Emibiri 16:9, 10.

10. Irene mwabana mighisaki busana n’erihira h’akaghalha ak’eribwira abandi okwa ngulhu yuwene?

¹⁰ Irene, mwali wethu omuhuru omwa Amerika, mwanza erithulira abandu abakabugha Olhurasha b’engulhu yuwene. Neryo omwa 1993, mwathwamu eribya omwa kithunga ekikakolesaya Olhurasha. Okwa buthuku obo, omwa kithunga ekyo imuli abathuliri 20. Enyuma w’emyaka 20, Irene mwabugha athi, “Na munabwire sindi nathabugha Olhurasha lhwa ndeke.” Aliwe ibbwa, Yehova abirimuwathikya, n’abandi bathuliri erithulira abandu omwa mubughe oyo. Erighunzerera, hathya omwa New York City muli ebithunga by’Olhurasha mukagha. Irene mwigha e Biblia n’abandu bangyi, kandi 15 mubabatizibwa. Abaghuma b’okw’ibo bakakolera okwa Beteli, abandi ni batemburi, n’abandi ni basyakulhu. Irene akabugha athi, “Ngabya namathalengekania okwa bindi bilhubirirwa ebyo nanga kwamire, sindi lengekanaya  indi hane ekya ndethere etseme ng’eya ngali nayu.” Omo kwenene, Irene abya anzire omubiiri w’erithulira!

11. Thwamalholha embere erithulira nomuhane eriendereribwa mukalhwiririraki?

¹¹ Thwamabya ithunanzire kutsibu omubiiri w’erithulira, ithukendibya ng’omukwenda Paulo, ithwalholha embere erithulira nomuthwang’endereribwa. (Emibiri 14:19-22) Ng’eky’erileberyako, ahakathi-kathi ka 1930 na 1944, balikyethu omwa Amerika mub’endereribwa kutsibu. Aliwe mubalholha embere n’erithulira. Abanya buthoki babere bakanza erib’imania, balikyethu aba mubaya omwa koti, bamasinga esyombanza nyingyi esyo bahirawako. Omwa 1943, mughalha wethu Knorr mwakania okwa lhubanza olhwa thwasingira omwa Koti ngulhu eye Amerika. Mwabugha athi sihangabere misango y’erithuthwalha omwa koti balikyethu kubathalholha embere erithulira. Mwongerako athi, erithuthwalha omwa koti eyo ly’eryamaleka n’abandi balikyethu omwa bindi bihugho ibathunga obwiranda bw’erithulira. Nomwa bindi bihugho, balikyethu mubasinga eyindi misango eyiri ng’eyi. Omo kwenene, busana n’eribya ithwanzire omubiiri w’erithulira, eriendereribwa siryanga thwimania.

12. Wukendi thwamu erikolhaki?

¹² Thwamabya ithunanzire omubiiri wethu w’erithulira, isithwendi hira omuwathu okwa syosaha esyathukahandika okwa ripoti y’okwezi. Aliwe ithukendi kolha ekyosi-kyosi erithoka “eribugha obukwenda” bw’engulhu yuwene. (Emibiri 20:24; 2 Timoteo 4:5) Aliwe ni byahi ebya thukendi kangirirya abandi? Thuthakania okwa kindi ky’obughuli ekya Nyamuhanga abirithuha.

13, 14. Ekighona ky’eby’obughuli ekyathukalhusaya mw’ebya thubikire ekiri omu Matayo 13:52, ky’ekyahi kandi thwanga kyusulya thuthi?

¹³ Ekindu ky’obughuli ekyakasathu ekya Yehova abirithuha y’ekwenene eyosi eyo thwabirigha. Yehova ya nzuko y’ekwenene. (2 Samweli 7:28; Esyonyimbo 31:5) Kandi iyo  nga Thatha omwenge, akathuha ekwenene eyi. Ebingyi omwa kwenene eyi thwabirib’igha omw’isoma e Biblia n’omwa bitabu byethu n’omw’ihindana okwa mihindano yethu eminene-minene n’emike-mike. Thukabya thunemughenda thukasorokya ekwenene, ithukendi thunga ekiri nga kighona ky’ekwenene “y’ebindu bihya-bihya n’ebikulhu-bikulhu.” (Soma Matayo 13:52.) Yehova iniakendi thuwathikya eryusulya ebighona byethu thwamasondya ekwenene ng’abakasondaya eby’obughuli ebibisirwe. (Soma Emisyo 2:4-7.) Ekyo thwanga kikolha thuthi?

¹⁴ Thutholere ithwayeghesya e Biblia n’ebitabu byethu mughulhu wosi n’erisekulya buuli. Eki ikikendi thuwathikya eriminya ekwenene “nyihya-nyihya,” eyo thuthalhwe thwasi. (Yosua 1:8, 9; Esyonyimbo 1:2, 3) Egazeti ye Watch Tower, ey’erimbere eyahulhuka omo Kwomusanju 1879, muyalinganisya ekwenene ng’ekimole ekiyibisire omwa bindi bithi bingyi. Erithoka eribana ekimole ekyo, omundu atholere iniasondya ndeke. Kandi amakibana, syatholere akasondya bungaho. Atholere inialholha embere erisondya erithasyabana ebindi bimole. Kuthya nethu, sithutholere thukayowa nga thwamaghonerya thukathabana ekwenene nguma nyisa. Thutholere ibbwa ithwanza eriminya ebindi bingyi ebihambire oko kwenene.

15. Busana naki eyindi kwenene yangana thwalhwa ng’eyikulire, kandi iwe ni yahi eya wukatsemera kutsibu-tsibu?

¹⁵ Thwabere thukatsuka erigha e Biblia, muthw’igha myatsi mingyi ey’ekwenene okw’itsuka. Ithwangana bugha thuthi eyo y’ekwenene “engulhu” kutse eya kera kundi ya thwatsuka erigha. Ni byahi ebiri omwa kwenene eyi? Erimbere muthw’igha ngoku Yehova ya Muhangiki wethu kandi ngoku anawithe eby’atheghekere abandu. Kandi muthwaminya ngoku Nyamuhanga mwathuma mughalha wiwe y’okwa kihugho ng’ekihongwa erithuthongolya okwa kibi n’olhuholho. Kandi muthw’igha ngoku Obwami bwa Nyamuhanga bukendi syaghunzaho eriaghalhwa lyosi neryo ithwasy’ikalha okwa kihugho omwa buholho n’etseme.​—Yoane 3:16; Eribisulirwa 4:11; 21:3, 4.

16. Ni kyahi ekya thutholere ithwakolha hamabya embinduka omw’ithasyayitheghererya ekwenene eya thulhue thwasi omwa Biblia?

¹⁶ Okwa bundi buthuku, hakanabya embinduka omw’iyitheghererya erya thulhue thuwithe okwa buminyereri bulebe kutse okw’isako lirebe. Ekyo kyamabya, thutholere ithwathwamu erigha ndeke eriyitheghererya lihya-lihya eryo. (Emibiri 17:11; 1 Timoteo 4:15) Ikyangana thendi thuyithaghisya eritsomana embaghane eyiri ahakathi-kathi k’eriyitheghererya erya kera n’elihya-lihya bisa, aliwe thutholere ithwanza erilebya, n’eriyitheghererya ndeke enzoborera nyihya-nyihya eyo. Eriyithendya oko mwatsi ng’eryo irikendi leka ithw’ongera ekwenene nyihya-nyihya eyo omwa kighona kyethu. Busana naki ni kikulhu ithwe erihira h’akaghalha ng’ako?

17, 18. Omulimu abuyirire akathuwathikaya athi?

¹⁷ Yesu mwakangirirya athi omulimu abuyirire wa Nyamuhanga angana thuwathikya eryibuka ebya thw’igha kera. (Yoane 14:25, 26) Eki kyanga thuwathikya kithi omughulhu thukathulha engulhu yuwene? Thalengekania okwa kyabya oku mughalha wethu oyuk’ahulhawa mwa Peter. Omwa 1970, aby’awithe myaka 19 kandi abya imwanamasa okwa Beteli ye Britain. Peter abya inianemuthulira nyumba okwa nyumba, neryo am’eya omulhume ow’ebireru. Mwabulya omulhume oyo ng’ananzire in’igha e Biblia. Omulhume abya  ini mukangirirya w’edini y’Ekiyuda, neryo mwasweka ak’owa omulhwana mulere akabugha athi yukanza erimukangirirya e Biblia. Omukangirirya oyo abere akanza erilengesya Peter, mwamubulya athi, “Mulhwana, thambwira ekitabu kya Danieli nga kyahandikawa omwa mubugheki?” Peter mwabugha athi, “Ekitsweka kya kukyo kyahandikawa omwa Aramaiki.” Peter akabugha athi “Omukangirirya mwasweka kutsibu eriowa ingabugha ekihikire​—aliwe ningye nasweka kwilhaba! Naminya indi ekihikire? Nabere nahika eka ekiro ekyo, munalebya omwa syogazeti sye Watchtower ne Awake! esyathwathunga omwa mezi w’ahanyuma, munabana omwatsi ow’asoborera ngoku ekitabu kya Danieli kyahandikawa omwa Aramaiki.” (Danieli 2:4) Ni kwenene, omulimu abuyirire angana thuwathikya eryibuka emyatsi eyothwabirisoma kera n’erihirayo omwa kighona kyethu eky’ekwenene.​—Luka 12:11, 12; 21:13-15.

¹⁸ Thwamabya ithunanzire ekwenene eyo Yehova akathweghesaya, kandi ithukamusima, ithukendyanza eribya ithunemw’ongerayo omwa kighona kyethu. Thwamalholha embere erikolha ekyo, ithukendi yowa ithwamatholera erikangirirya abandi.

19. Busana naki thutholere ithwatheya ndeke ekwenene eya thuk’igha?

¹⁹ Omo mwatsi ono, thwamabir’igha ku ni ky’omughaso eritsemera ebiri omwa kighona kyethu ky’emyatsi y’obunyakirimu. Aliwe thutholere ithwayitheya kutsibu okw’ilighira Sitani n’ekihugho kiwe kino erithughunza mw’omuthima w’erianza eby’obughuli ebiri omwa kighona kyethu. Thwamathendi yitheya, ithwangana lengemeribwa omwa bindu ng’erilhaghanisibwa erihebwa omubiiri ow’aliko esyosente nene, kutse erilengekania okwa ngebe y’eribya n’ebindu by’omulembe, kutse erihalisya omwa byathuwithe. Omukwenda Yoane akathwibukaya ngoku ekihugho kino n’ebyosi ebyakyo bikayahwaho. (1 Yoane 2:15-17) Ekyo ky’ekyanga leka ithwasima eribana ekwenene n’eritheyayo ndeke.

20. Wukendithwamu erikolhaki erithoka eritheya ebindu byawu by’obughuli eby’obunyakirimu?

²⁰ Ibya iwunayitheghekire erilhangira wuthi wukalhwika ekyosi-kyosi ekyangaleka iwalhuhirira okw’anza Obwami bwa Nyamuhanga. Ithwamu eribya n’omuhwa omwa mubiiri w’erithulira, kandi olhwanzo olhwa wuwithire omubiiri w’erithulhughania engulhu y’Obwami isilhwahwa kisi. Lholha embere omw’ithasyongera okwa kwenene yawu. Erikolha ekyo, imukendibya imwamayibikira “ebindu elhubulha ebithekeha, ahathehika murahi n’ehinyurughunzu sihyeherayabyo. Kusangwa ahali ebindu byenyu h’emithima yenyu yasyabya nibya.”​—Luka 12:33, 34.